ஈரான் மீதான போரில் அமெரிக்க ராணுவம் தனது இலக்குகளை கிட்டத்தட்ட எட்டிவிட்டதாக அமெரிக்க அதிபர் டொனால்ட் டிரம்ப் நேற்று புதன்கிழமை இரவு தொலைக்காட்சியில் ஆற்றிய உரையில் தெரிவித்தார். இருப்பினும், இந்தப் போர் எப்போது முழுமையாக முடிவுக்கு வரும் என்பதற்கான குறிப்பிட்ட காலக்கெடு எதனையும் அவர் வழங்கவில்லை.
அமெரிக்க மக்களிடையே நிலவும் போர் குறித்த அச்சம் மற்றும் கூட்டணி நாடுகளின் அழுத்தங்களுக்கு மத்தியில் உரையாற்றிய டிரம்ப், ஈரானின் கடற்படை மற்றும் விமானப்படையை அமெரிக்கா முற்றிலும் அழித்துவிட்டதாகக் கூறினார். மேலும், ஈரானின் பாலிஸ்டிக் ஏவுகணை மற்றும் அணுசக்தி திட்டங்கள் முடக்கப்பட்டுள்ளதாகவும் அவர் தெரிவித்தார். அடுத்த இரண்டு முதல் மூன்று வாரங்களுக்கு ஈரானிய இலக்குகள் மீது தொடர்ந்து தாக்குதல்கள் நடத்தப்படும் என்றும், இந்த வேலை “மிக விரைவாக” முடிக்கப்படும் என்றும் அவர் உறுதியளித்தார்.
சுமார் 19 நிமிடங்கள் நீடித்த இந்த உரையில், ஈரானின் செறிவூட்டப்பட்ட யுரேனியம் மற்றும் பிப்ரவரி 28 முதல் மூடப்பட்டுள்ள ஹார்முஸ் ஜலசந்தி (Strait of Hormuz) போன்ற முக்கியமான பிரச்சினைகள் குறித்து அவர் விரிவாகப் பேசவில்லை. பேச்சுவார்த்தையின் போது ஈரானிய தலைவர்கள் அமெரிக்காவின் நிபந்தனைகளுக்கு அடிபணியாவிட்டால், ஈரானின் எரிசக்தி மற்றும் எண்ணெய் உள்கட்டமைப்புகள் மீது தாக்குதல் நடத்தப்பட்டு போர் தீவிரமடையக்கூடும் என்றும் அவர் எச்சரித்தார்.
போரினால் உலகளவில் ஏற்பட்டுள்ள எண்ணெய் விநியோகத் தட்டுப்பாடு மற்றும் பெட்ரோல் விலை உயர்வு குறித்து பேசிய டிரம்ப், இது ஒரு தற்காலிகமான தியாகம் மட்டுமே என்றார். அண்டை நாடுகளின் எண்ணெய் டாங்கர்கள் மீது ஈரான் நடத்திய தாக்குதல்களே இந்த விலை உயர்வுக்குக் காரணம் என்று அவர் குற்றம் சாட்டினார்.
டிரம்பின் இந்த உரையைத் தொடர்ந்து, போர் விரைவில் முடிவுக்கு வராது என்ற கவலையினால் பங்குச் சந்தைகள் வீழ்ச்சியடைந்தன, அதே நேரத்தில் கச்சா எண்ணெய் விலை மற்றும் டாலரின் மதிப்பு அதிகரித்தது. தற்போது இந்தப் போர் ஐந்தாவது வாரத்தில் அடியெடுத்து வைத்துள்ளது குறிப்பிடத்தக்கது.
