சொந்த மண்ணை விட்டு, பல்லாயிரம் மைல்கள் கடந்து அந்நிய தேசத்தில் வாழ்ந்தாலும், ஒரு மனிதனின் ஆன்மா எப்போதும் தனது வேர்களையும், உறவுகளையும் தேடியே துடிக்கும். அந்தத் துடிப்பின் அழகிய வெளிப்பாடாக, ஐக்கிய இராச்சியத்தில் வாழும் எருக்கலம்பிட்டி மக்களின் வருடாந்த ஒன்று கூடல் கடந்த 04/01/2026 அன்று லண்டனில் உள்ள Sri Lanka Muslim Cultural Centre மண்டபத்தில் மிக விமரிசையாக நடைபெற்றது.
இரு தசாப்த கால ஈரம் மிக்க பயணம்
2004-ம் ஆண்டு ஒரு சிறு விதையாக ஆரம்பிக்கப்பட்ட எருக்கலம்பிட்டி பொதுநல அமைப்பு (EWO), இன்று 20 ஆண்டுகளைக் கடந்து ஒரு விருட்சமாக வளர்ந்து நிற்கிறது. வெறும் அமைப்பாக மாத்திரமன்றி, லண்டன் வாழ் எருக்கலம்பிட்டி மக்களுக்கு ஒரு குடும்பமாகத் திகழும் இந்த அமைப்பின் 21-வது வருட சங்கமம், உறவுகளுக்கிடையிலான பிணைப்பை மீளவும் உறுதிப்படுத்தும் ஒரு நிகழ்வாக அமைந்தது.
மகிழ்ச்சியில் நனைந்த தருணங்கள்
ஐக்கிய இராச்சியத்தின் மூலை முடுக்குகளில் இருந்தெல்லாம் வருகை தந்திருந்த உறவுகளால் மண்டபம் களைகட்டியிருந்தது. நீண்ட நாட்களுக்குப் பின் ஒருவரை ஒருவர் சந்தித்துக் கொண்ட போது வெளிப்பட்ட புன்னகைகளும், நலம் விசாரிப்புகளும் அந்த இடத்தையே ஒரு குட்டி எருக்கலம்பிட்டியாக மாற்றியிருந்தது.
மேலும் நிகழ்வை அடுத்த கட்டத்திற்கு கொண்டுசெல்லும் வகையில் நடத்தப்பட்ட இஸ்லாமிய மற்றும் பொது அறிவுப் போட்டிகளில், சிறுவர்கள் முதல் பெரியவர்கள் வரை அனைவரும் உற்சாகத்துடன் பங்கேற்றனர்.
போட்டிகளில் வெற்றி பெற்றவர்களுக்கும், கலந்து கொண்டவர்களுக்கும் வழங்கப்பட்ட பரிசுகள் அவர்களின் முகங்களில் மட்டற்ற மகிழ்ச்சியைத் தோற்றுவித்தது.
இளைய தலைமுறையினர் தமது கலாச்சார விழுமியங்களை அறிந்து கொள்ளவும், முதியவர்கள் தமது பழைய நினைவுகளைப் பகிர்ந்து கொள்ளவும் இந்தத் தளம் ஒரு பாலமாக அமைந்தது.
ஊர் மணக்கும் பிரியாணி விருந்து
எந்தவொரு கொண்டாட்டமும் எமது ஊர் உணவின்றி முழுமையடையாது. மதிய உணவாக எருக்கலம்பிட்டி மக்களுக்கே உரித்தான சுவையில் சமைக்கப்பட்ட பிரியாணி பரிமாறப்பட்டது. அந்தச் சுவை நாவிற்கு விருந்தாக அமைந்ததுடன், ஊர் நினைவுகளையும் கிளறிவிட்டது. மாலை வேளையில் இதமான தேநீர் விருந்துடன் கலந்துரையாடல்கள் தொடர்ந்தன.
வேலைப்பழுக்களும், இயந்திரத்தனமான லண்டன் வாழ்வும் எமது உறவுகளைப் பிரித்துவிட முடியாது என்பதை இந்த நிகழ்வு மீண்டுமொருமுறை நிரூபித்துள்ளது.
தர்மம், கல்வி மற்றும் பொதுநலச் சேவைகளில் 20 ஆண்டுகளைக் கடந்து பயணிக்கும் Erukkalampiddy Welfare Organisation (UK), வரும் காலங்களிலும் இதே ஒற்றுமையுடன் மென்மேலும் வளர வேண்டும் என்பதே அனைவரினதும் பிரார்த்தனையாகும்.
