ஜூட் சமந்த
அண்மையில் வீசிய டிட்வா (Ditwa) சூறாவளி காரணமாக கின் ஓயாவில் (Gin Oya) அடித்துவரப்பட்டு தேங்கியுள்ள பொலித்தீன் மற்றும் பிளாஸ்டிக் உள்ளிட்ட கழிவுகளை அகற்றும் விசேட வேலைத்திட்டம் ஒன்று வெற்றிகரமாக முன்னெடுக்கப்பட்டது.
டிட்வா சூறாவளியைத் தொடர்ந்து ஏற்பட்ட கடும் மழையினால் கின் ஓயா நதி வான்பாய்ந்தது. இதன் விளைவாக, வென்னப்புவ மற்றும் அதனைச் சுற்றியுள்ள பகுதிகளில் உள்ள தொழிற்சாலைகள் மற்றும் வணிக நிறுவனங்களிலிருந்து வெளியேறிய பெருமளவிலான பொலித்தீன் மற்றும் பிளாஸ்டிக் கழிவுகள் ஆற்றின் கரைகளிலும் ஆற்றுப்படுகையிலும் அதிகளவில் படிந்துள்ளன.
வென்னப்புவ – நைனாமடும (Nainamadama) பகுதியில் அமைந்துள்ள ஹோட்டல்களுக்கு வருகை தரும் உள்நாட்டு மற்றும் வெளிநாட்டு சுற்றுலாப் பயணிகள், கின் ஓயாவில் படகு சவாரிகளை மேற்கொள்வதில் அதிக ஆர்வம் காட்டுகின்றனர். தற்போது ஆற்றில் தேங்கியுள்ள இந்தக் கழிவுகள் நதியின் அழகைச் சீர்குலைப்பதோடு, சுற்றுலாத் துறைக்கும் பெரும் அச்சுறுத்தலாக அமைந்துள்ளதாகச் சுட்டிக்காட்டப்பட்டுள்ளது.
சுற்றுச்சூழல் அமைப்புகள் இது குறித்து வென்னப்புவ பிரதேச சபைக்கு (Wennappuwa Pradeshiya Sabha) வழங்கிய தகவலையடுத்து, இந்தச் சுத்திகரிப்புப் பணிகள் ஆரம்பிக்கப்பட்டன. இந்த வேலைத்திட்டமானது ‘தூய்மையான இலங்கை’ (Clean Sri Lanka) திட்டத்திற்கு இணையாக வென்னப்புவ பிரதேச சபையினால் ஏற்பாடு செய்யப்பட்டிருந்தமை குறிப்பிடத்தக்கது.
