சர்வதேச சந்தையை உலுக்கும் அமெரிக்காவின் அடுத்த நகர்வு
ஈரான் மீது வரலாற்று ரீதியான புதிய பொருளாதாரத் தடைகள் விதிக்கப்படவுள்ளன என்ற செய்தி வெளியான உடனேயே, சர்வதேச எண்ணெய் சந்தையில் வர்த்தகர்கள் அவசர அவசரமாக இலாபம் ஈட்டும் நடவடிக்கைகளில் (Profit-taking) இறங்கியுள்ளனர். இதன் எதிரொலியாக, திங்கட்கிழமை வர்த்தகத்தில் கச்சா எண்ணெய் விலை ஒரு பீப்பாய்க்கு 1 டொலருக்கும் மேல் சரிவைக் கண்டது. பிரெண்ட் கச்சா எண்ணெய் 1.49 டொலர் குறைந்து 92.90 டொலராகவும், அமெரிக்க WTI கச்சா எண்ணெய் 1.74 டொலர் குறைந்து 85.32 டொலராகவும் வீழ்ச்சியடைந்தன.
கடந்த இரண்டு வாரங்களாக தொடர்ந்து 5 சதவீதத்திற்கும் மேல் ஏறுமுகத்தில் இருந்த எண்ணெய் விலை திடீரென சரியக் காரணம் என்ன?
காரணம் வாஷிங்டனில் இருந்து வெளிவரவுள்ள அந்த ஒரு அறிவிப்புதான். அமெரிக்க திறைசேரிச் செயலாளர் ஸ்காட் பெசென்ட், ஈரானுக்கு எதிராக இதுவரை இல்லாத வகையிலான மிகக் கடுமையான தடைகளை அறிவிக்கவுள்ளார். அதேநேரம், ஈரானுடன் வர்த்தகம் செய்யும் ஏனைய நாடுகளுக்கும் தடைகள் விதிக்கப்படும் என ஜனாதிபதி டொனால்ட் ட்ரம்ப் பகிரங்கமாக எச்சரித்துள்ளது சந்தையில் பெரும் கலக்கத்தை ஏற்படுத்தியுள்ளது.
மறுபுறம், ஈரானின் உயர்மட்டத் தலைமைக்குள் ஏற்பட்டுள்ள உள்முரண்பாடுகள் நிலைமையை மேலும் சிக்கலாக்கியுள்ளன. ஈரானிய ஜனாதிபதி மசூத் பெசெஷ்கியான் இராஜதந்திரப் பேச்சுவார்த்தைகளுக்கு அழைப்பு விடுத்தாலும், அந்நாட்டு தீவிர நிலைப்பாட்டாளர்கள் இறுதிவரை மோதும் முடிவில் இருப்பதாக சந்தை ஆய்வாளர்கள் கணிக்கின்றனர். இந்த வாரம் முடிவதற்குள் ஈரானின் உண்மையான பிடி யாருக்குச் செல்லும் என்பது தெரிந்துவிடும்.
இதன் நேரடித் தாக்கம் ஏற்கனவே தரைமட்டத்தில் உணரத் தொடங்கிவிட்டது. அமெரிக்காவின் கட்டுப்பாடுகள் காரணமாக சீக்கான ஈரானிய கச்சா எண்ணெய் ஏற்றுமதி குறைவடைந்து விலை உயர்ந்துள்ளது. இருப்பினும், ஈராக்கின் கோரிக்கையை ஏற்று சில ஈராக் எண்ணெய்க் கப்பல்கள் பயணிக்க ஈரான் அனுமதித்துள்ளது. உலகளாவிய எண்ணெய் போக்குவரத்தில் ஐந்தில் ஒரு பங்கை கையாளும் கேந்திர முக்கியத்துவம் வாய்ந்த ஹோர்முஸ் நீரிணையில், கடந்த வார இறுதியில் வெறும் 20-க்கும் குறைவான சரக்குக் கப்பல்களே கடந்து சென்றுள்ளன.
மத்திய கிழக்கின் இந்த விநியோக நெருக்கடி விரைவில் சீராகுமா? “இல்லை, விநியோக மீட்சி இன்னும் நீண்ட காலம் எடுக்கலாம்” என மோர்கன் ஸ்டான்லி ஆய்வாளர்கள் எச்சரிக்கின்றனர். கடலில் உள்ள எண்ணெய்க் கையிருப்பு மிகக் கடுமையான வீழ்ச்சியைக் கண்டுள்ள அதேவேளை, சீனா உள்ளிட்ட நாடுகளின் நிலத்தடி சேமிப்புக் கிடங்குகளிலும் கையிருப்பு குறைந்து வருகின்றது. மத்திய கிழக்கில் நிலவும் இந்த புவிசார் அரசியல் சதுரங்கம், அடுத்த சில நாட்களில் உலகப் பொருளாதாரத்தை எங்கு கொண்டு சேர்க்கப்போகிறது என்பதை சர்வதேசமே உன்னிப்பாகக் கவனித்து வருகின்றது.
