கருவலகஸ்வெவ: வீதி ஒழுங்குகளை மீறிய அதிவேகம், மீண்டும் ஒரு இளம் உயிரைப் பறித்திருக்கும் அதிர்ச்சிச் சம்பவம் கருவலகஸ்வெவ – ரஜவிகம பகுதியில் நேற்று நள்ளிரவு அரங்கேறியுள்ளது. வேகமாக பயணித்த உந்துருளி ஒன்று, வாய்க்கால் பாலத்துடன் மோதி சிதறியதில், 21 வயதுடைய அவிது ரந்தீப என்ற இளைஞன் சிகிச்சை பலனின்றி இன்று அதிகாலை உயிரிழந்துள்ளார்.
நேற்று (ஜூலை 02) இரவு கருவலகஸ்வெவ – ரஜவிகம வீதியில் வழமைக்கு மாறான வேகத்தில் அந்த உந்துருளி பயணித்ததாகக் கூறப்படுகிறது. கட்டுப்பாட்டை இழந்த வாகனம், ரஜவிகம வாய்க்கால் பாலத்தின் பக்கவாட்டுப் பகுதியில் மிகக் கொடூரமாக மோதி விபத்துக்குள்ளானது. மோதிய வேகத்தில் உந்துருளியில் பயணித்த இரு இளைஞர்களும் தூக்கி வீசப்பட்டு, கடுமையான காயங்களுக்கு உள்ளாகினர்.
உடனடி மீட்பு நடவடிக்கை: விபத்து நடந்த உடனே, அங்கிருந்தவர்களின் உதவியுடன் காயமடைந்த இருவரும் உடனடியாக ஆனமடுவ மாவட்ட வைத்தியசாலையில் அனுமதிக்கப்பட்டனர். எனினும், இருவரது நிலையும் கவலைக்கிடமாக இருந்ததால், மேலதிக அவசர சிகிச்சைக்காக அவர்கள் வெவ்வேறு பிரதான வைத்தியசாலைகளுக்கு மாற்றப்பட்டனர்.
உந்துருளியின் பின்னால் பயணித்த கருவலகஸ்வெவ – ரஜவிகமவைச் சேர்ந்த 21 வயதுடைய அபேசிங்க ஹேரத் முதியன்சேலாகே அவிது ரந்தீப அபேசிங்க என்ற இளைஞர், தீவிர சிகிச்சைக்காக குருணாகல் போதனா வைத்தியசாலைக்கு மாற்றப்பட்டார். எனினும், இன்று (ஜூலை 03) அதிகாலை அவர் சிகிச்சை பலனின்றி உயிரிழந்ததாக பொலிஸார் உறுதிப்படுத்தியுள்ளனர்.
அதேவேளை, உந்துருளியைச் செலுத்திய ஆனமடுவ – பரமாகந்த பகுதியைச் சேர்ந்த மற்றைய இளைஞன் புத்தளம் தள வைத்தியசாலையில் தற்போதும் தீவிர சிகிச்சை பிரிவில் அனுமதிக்கப்பட்டு, சிகிச்சை பெற்று வருகின்றார்.
தொடரும் பொலிஸ் விசாரணைகள்
இந்தக் கொடூர விபத்து குறித்து கருவலகஸ்வெவ பொலிஸ் நிலையத்தின் போக்குவரத்துப் பிரிவினர் விசேட விசாரணைகளை ஆரம்பித்துள்ளனர். நள்ளிரவு வேளையில் உந்துருளி பயணித்த வேகம் மற்றும் விபத்துக்கான பின்னணி காரணங்கள் குறித்து தடயவியல் சோதனைகளும் முன்னெடுக்கப்பட்டு வருகின்றன.
இளம் தலைமுறையினரின் அத்தீவிர வேகப் பயணங்கள், வீதிகளில் சோகக் கதைகளையே மிச்சப்படுத்துகின்றன என்பதற்கு இந்த விபத்து மற்றுமொரு சான்றாக மாறியுள்ளது.
செய்தித் தொகுப்பு: ஜூட் சமந்த
