சர்வதேச கடற்பரப்பில் போதைப்பொருள் தொடர்பான குற்றங்களில் ஈடுபடுபவர்களுக்கு மரண தண்டனை அல்லது ஆயுள் தண்டனை உள்ளிட்ட மிகக் கடுமையான தண்டனைகளை வழங்கும் வகையில் இலங்கையில் புதிய சட்டத்திருத்தம் அதிகாரப்பூர்வமாக நடைமுறைப்படுத்தப்பட்டுள்ளது
சர்வதேச கடல் எல்லைகளில் (High Seas) இடம்பெறும் போதைப்பொருள் கடத்தல்களைக் கட்டுப்படுத்தும் நோக்கில், இலங்கைப் நாடாளுமன்றத்தினால் நிறைவேற்றப்பட்ட புதிய திருத்தச் சட்டம் உத்தியோகபூர்வமாக வர்த்தமானியில் வெளியிடப்பட்டுள்ளது.
இலங்கை நாடாளுமன்றத்தினால் நிறைவேற்றப்பட்ட ‘விஷப் பொருட்கள், அபின் மற்றும் அபாயகரமான மருந்துகள் (திருத்தப்பட்ட) சட்டம் 2026-ன் 7 ஆம் இலக்கம்’, கடந்த மார்ச் 6 ஆம் தேதி அரசிதழில் (Gazette) வெளியிடப்பட்டது. சர்வதேச கடல் வழி போதைப்பொருள் கடத்தலுக்கு எதிராக நாட்டின் சட்டக் கட்டமைப்பை வலுப்படுத்துவதே இதன் பிரதான நோக்கமாகும்
- இந்தச் சட்டத்தின் கீழ் புதிதாக இணைக்கப்பட்டுள்ள 54AA பிரிவின்படி, சர்வதேச கடற்பரப்பில் ஹெராயின், கோகெய்ன், மார்ஃபின் மற்றும் அபின் போன்ற அபாயகரமான போதைப்பொருட்களைத் தயாரிப்பது (Manufacture) முற்றாகத் தடை செய்யப்பட்டுள்ளது.
- இலங்கையில் பதிவு செய்யப்பட்ட கப்பல்கள் அல்லது எந்த நாட்டிற்கும் சொந்தமில்லாத (Stateless) கப்பல்களில் இத்தகைய குற்றங்களைச் செய்யும் இலங்கை குடிமக்கள் மற்றும் வெளிநாட்டவர்கள் ஆகிய இருசாராருக்கும் இச்சட்டம் பொருந்தும்.
- மேல் நீதிமன்றத்தினால் இக்குற்றங்களுக்காகக் குற்றவாளியாகக் காணப்படும் ஒருவருக்கு மரண தண்டனை அல்லது ஆயுள் தண்டனை விதிக்கப்படும்.
போதைப்பொருள் உற்பத்தியைத் தாண்டி, சர்வதேச கடல் பரப்பில் போதைப்பொருளைக் கைவசம் வைத்திருத்தல் மற்றும் கடத்துதல் ஆகியவற்றுக்கும் இப்புதிய சட்டம் கடும் தண்டனைகளை வழங்குகிறது. அனுமதிப்பத்திரமின்றி சட்டத்தில் குறிப்பிடப்பட்டுள்ள அளவை விட அதிகப்படியான போதைப்பொருட்களைக் கொண்டு செல்லும் எவரும் கடுமையான தண்டனைகளுக்கு உள்ளாவார்கள்.
சர்வதேச கடல் பரப்பில் சட்டவிரோத நடவடிக்கைகளில் ஈடுபடும் ‘அடையாளமற்ற கப்பல்களை’ (Stateless Ships) பறிமுதல் செய்யும் அதிகாரம் அதிகாரிகளுக்கு வழங்கப்பட்டுள்ளது. எந்தவொரு நாட்டிலும் பதிவு செய்யப்படாத அல்லது தேசியக் கொடியைப் பயன்படுத்தாத கப்பல்கள் இவற்றுள் அடங்கும்.
2025 ஆம் ஆண்டில் இலங்கை கடற்படையினர் சர்வதேச புலனாய்வுப் பிரிவினருடன் இணைந்து மேற்கொண்ட பாரிய போதைப்பொருள் சோதனைகளே இச்சட்ட மாற்றத்திற்கு முக்கிய காரணமாகும். குறிப்பாக, சர்வதேச கடற்பரப்பில் கைப்பற்றப்பட்ட பெருமளவிலான ஹெரோயின் மற்றும் ‘ஐஸ்’ (Crystal Meth) போதைப்பொருட்களுடன் கைது செய்யப்பட்ட வெளிநாட்டுச் சந்தேகநபர்களைத் தண்டிப்பதில் காணப்பட்ட சட்டச் சிக்கல்களைத் தீர்க்க இப்புதிய சட்டம் உதவும் என எதிர்பார்க்கப்படுகிறது.
இந்தச் சட்டமானது சர்வதேச சட்டங்களுக்கு இணங்க, பிரத்யேக பொருளாதார வலயத்தின் (EEZ) அந்தஸ்தைப் பாதிக்காத வகையில், இலங்கையின் அல்லது பிற நாடுகளின் பிராந்தியக் கடலுக்கு அப்பால் உள்ள கடல் பகுதிகளை ‘சர்வதேச கடல் எல்லை’ (High Seas) என வரையறுத்துள்ளது.
