- ரியாத் விமான நிலையம் மீது பயங்கர தாக்குதல்: 12 பேர் உயிரிழப்பு, 300 இற்கும் மேற்பட்டோர் காயம்!
- தசாப்த காலத்தின் கோரச் சம்பவம்: சவூதி வான் எல்லைக்குள் நுழைய வேண்டாம் என ஹூதிகள் எச்சரிக்கை!
- ஹூதிகளுக்கு எதிராக சவூதியுடன் கைகோர்க்கிறதா அமெரிக்கா? – டொனால்ட் ட்ரம்ப் பரபரப்பு தகவல்!
- ரியாத் சர்வதேச விமான சேவைகள் முடக்கம்: மத்திய கிழக்கில் வெடிக்கும் புதிய போர் பதற்றம்!
ரியாத் விமான நிலையம் இரத்தக் களரி: மத்திய கிழக்கை அதிரவைத்த தாக்குதல் பின்னணி
சவூதி அரேபியாவின் தலைநகர் ரியாத்தில் அமைந்துள்ள சர்வதேச விமான நிலையம் மீது சனிக்கிழமை முன்னறிவிப்பின்றி மேற்கொள்ளப்பட்ட ஏவுகணைத் தாக்குதலில் 12 பேர் உயிரிழந்துள்ளதுடன், 309 பேர் காயமடைந்துள்ளனர். கடந்த ஒரு தசாப்த காலத்தில் சவூதி அரேபிய எல்லைக்குள் இடம்பெற்ற மிகக் கொடூரமான தாக்குதலாக இது வர்ணிக்கப்படுகிறது.
விமான நிலையத்தின் புறப்படும் பகுதிக்கு (Departure Gate) அருகே கூரையின் ஒரு பகுதி இடிந்து வீழ்ந்ததாகவும், வானில் ஏதோ ஒன்று பாய்ந்து வந்த சில வினாடிகளில் பாரிய வெடிப்புச் சத்தம் கேட்டதாகவும் நேரில் கண்ட பயணிகள் விவரித்துள்ளனர். குண்டுவெடிப்பைத் தொடர்ந்து இரத்த வெள்ளத்தில் சரிந்த பயணிகள் அம்புலன்ஸ்கள் மற்றும் உலங்குவானூர்திகள் மூலம் அவசர அவசரமாக வைத்தியசாலைகளுக்குக் கொண்டு செல்லப்பட்டனர்.
உயிரிழந்தவர்களில் நான்கு சவூதிப் பிரஜைகளும், இரு பங்களாதேஷியர்களும் அடங்குவர். அத்துடன் அமெரிக்கா, ஜோர்தான், பலஸ்தீனம், சிரியா, சூடான் மற்றும் எகிப்து ஆகிய நாடுகளைச் சேர்ந்த தலா ஒருவரும் பலியாகியுள்ளதாக சவூதி சிவில் விமானப் போக்குவரத்து அதிகார சபை உறுதிப்படுத்தியுள்ளது.
முடங்கிய 8 மில்லியன் மக்களின் தலைநகர்
இந்தத் தாக்குதலைத் தொடர்ந்து, சுமார் 80 இலட்சம் மக்கள் வாழும் ரியாத் நகரத்தின் பிரதான விமான நிலைய நடவடிக்கைகள் முற்றாக ஸ்தம்பிதமடைந்தன. சர்வதேச மற்றும் உள்நாட்டு விமான சேவைகள் யாவும் உடனடி நடைமுறைக்கு வரும் வகையில் இரத்துச் செய்யப்பட்டு, பிற விமான நிலையங்களுக்கு திருப்பி விடப்பட்டன.
இதனிடையே, புனித நகரங்களான மக்கா மற்றும் மதீனா தவிர்ந்த சவூதி அரேபியாவின் ஒட்டுமொத்த வான்பரப்பும் தமது போர்க்களமாக மாற்றப்பட்டுள்ளதாகவும், சர்வதேச விமான நிறுவனங்கள் சவூதி வான்வழியைப் பயன்படுத்துவதைத் தவிர்க்க வேண்டும் என்றும் ஹூதி தரப்பு எச்சரித்துள்ளது.
களத்தில் இறங்குகிறதா அமெரிக்கா? ட்ரம்பின் நேரடி எச்சரிக்கை
சவூதி-ஹூதி மோதல் சர்வதேசப் போராக தீவிரமடைந்து வரும் நிலையில், இந்த விவகாரத்தில் அமெரிக்காவின் நிலைப்பாடு உலக நாடுகளின் கவனத்தை ஈர்த்துள்ளது.
சவூதி கூட்டுப்படையுடன் இணைந்து ஹூதிகள் மீது தாக்குதல் நடத்தப்படுமா என செய்தியாளர்கள் எழுப்பிய கேள்விக்குப் பதிலளித்த அமெரிக்க ஜனாதிபதி டொனால்ட் ட்ரம்ப், “நாங்கள் அது குறித்து பரிசீலித்து வருகிறோம்; எம்மால் மிக விரைவாகத் தீர்மானம் எடுக்க முடியும்” எனக் குறிப்பிட்டுள்ளார். அமெரிக்க இராஜாங்கச் செயலாளர் மார்கோ ரூபியோவும், ஐ.நா பொதுச்செயலாளர் அந்தோனியோ குட்டெரஸும் பொதுமக்களை இலக்குவைத்து நடத்தப்பட்ட இந்தத் தாக்குதலுக்குக் கடும் கண்டனம் வெளியிட்டுள்ளனர்.
முக்கிய சர்வதேச எரிசக்தி மற்றும் முதலீட்டு மாநாடுகளை நடத்துவதற்கு ரியாத் தயாராகி வந்த சூழலில் நிகழ்ந்துள்ள இச்சம்பவம், மத்திய கிழக்கின் பாதுகாப்பு மற்றும் வான்வழிப் பயணங்கள் மீது பாரிய கேள்விக் குறிகளை எழுப்பியுள்ளது.
