சர்ச்சைகளைக் கடந்து சாதனை படைத்த பெராரி: 40 மில்லியன் டொலர்களுக்கு ஏலம் போன முதலாவது மின்சாரக் கார்!
சர்வதேச வாகனச் சந்தையில் பெரும் எதிர்பார்ப்பை ஏற்படுத்தியிருந்த இத்தாலியின் பிரபல ‘பெராரி’ நிறுவனத்தின் முதலாவது முழுமையான மின்சாரக் கார் (All-Electric Car), கலிபோர்னியாவில் நடைபெற்ற ஆர்.எம். சோதபீஸ் (RM Sotheby’s) தொண்டு ஏலத்தில் 40 மில்லியன் அமெரிக்க டொலர்களுக்கு விற்றுத் தீர்ந்துள்ளது. புதிய கார் ஒன்று ஏல விற்பனையில் இந்தளவுக்கு பிரம்மாண்ட தொகையை ஈட்டியிருப்பது மோட்டார் வாகன வரலாற்றிலேயே இதுவே முதன்முறையாகும்.
‘லூஸ்’ (Luce) எனப் பெயரிடப்பட்டுள்ள இந்த விசேட தயாரிப்பு, ஆப்பிள் நிறுவனத்தின் புகழ்பெற்ற ஐபோன் வடிவமைப்பாளரான சர் ஜோனி ஐவ் (Sir Jony Ive) இன் கைவண்ணத்தில் உருவானதாகும். வெள்ளை நிறப் பூச்சு, பிரத்தியேக உதிரிப்பாகங்கள் மற்றும் தனித்துவமான பிரேக் கட்டமைப்புடன் தயாரிக்கப்பட்ட முதலாவது உற்பத்தி மாடல் காரே இந்த அசுர விலைக்கு ஏலம் விடப்பட்டுள்ளது.
இருப்பினும், கடந்த மே மாதம் இக்கார் அறிமுகப்படுத்தப்பட்ட போது கடுமையான விமர்சனங்களையும் சவால்களையும் எதிர்கொண்டது. ஐந்து இருக்கைகள் கொண்டதாகவும், பெட்ரோல் எஞ்சினுக்குப் பதிலாக மின்கலனில் இயங்குவதாகவும் வடிவமைக்கப்பட்டதால், “பெராரியின் பாரம்பரிய அடையாளமே அழிந்துவிட்டது” என இத்தாலிய துணைப் பிரதமர் மேட்டியோ சல்வினி மற்றும் பெராரியின் முன்னாள் தலைவர் லூகா கோர்டெரோ டி மொன்டசெமோலோ உள்ளிட்ட பலர் கடுமையான விசனங்களை வெளியிட்டிருந்தனர்.
இந்த விமர்சனங்களைத் தொடர்ந்து நிறுவனத்தின் பங்கு விலைகளிலும் சரிவு ஏற்பட்டது. ஆனால், மாற்றமும் புதுமையும் நிகழும்போது விமர்சனங்கள் எழுவது இயல்பானது என பெராரியின் தலைமை வடிவமைப்பாளர் பிளேவியோ மன்சோனி பதிலளித்திருந்தார். அதற்கு சான்றாக, சீனச் சந்தையில் ஏற்பட்ட அபார வரவேற்பைத் தொடர்ந்து பெராரி தனது வருடாந்த விற்பனை இலக்கை எட்டியுள்ளதாக தகவல்கள் வெளியாகியுள்ளன.
தற்போது இந்த ஏலத்தின் மூலம் பெறப்பட்ட ஒட்டுமொத்த வருமானமும், அடுத்த தலைமுறையினரின் நலன் கருதி பெராரி அறக்கட்டளையின் கல்வி மேம்பாட்டுத் திட்டங்களுக்கு முழுமையாக வழங்கப்படவுள்ளது. எலான் மஸ்க்கின் டெஸ்லா மற்றும் சீன உற்பத்தியாளர்களின் ஆதிக்கத்தில் இருக்கும் மின்சார வாகன சந்தைக்குள், பெராரியின் ‘துள்ளும் குதிரை’ தனது அதிகாரப்பூர்வ தடத்தைப் பதித்துள்ளமை குறிப்பிடத்தக்கது.
