நிந்தவூர் காஷிபுல் உலூம் அரபுக் கல்லூரியில் கல்வி கற்று விடுமுறைக்கு சென்ற சமயம் வெள்ள அனர்த்தத்தில் சிக்கி ஷஹீதான மாணவர்களை நினைவுகூர்ந்து நிந்தவூரில் வெள்ளைக் கொடி கட்டி பறக்கவிடப்பட்டது.
நிந்தவூர் காஷிபுல் உலூம் அரபுக் கல்லூரியில் ஷரீஆ மற்றும் ஹிப்ழ் பிரிவில் முழு நேரமாக கல்வி கற்று வந்த அனைத்து மத்ரசா மாணவர்களுக்கும், கால நிலை சீற்றத்தின் காரணமாக மத்ரசாவினால் 26-11-2024ம் திகதியன்று மாலை விடுமுறை வழங்கப்பட்டது.
அந்த வகையில் சம்மாந்துறையினைச் சேர்ந்த மாணவர்கள் தமது சொந்தவூரான சம்மாந்துறை பிரதேசத்திற்கு செல்லும் வழியில் காரைதீவு, மாவடிப்பள்ளி பாலத்தடியில் வெள்ள அனர்த்தத்தின் தாக்கம் அதிகமாக இருந்தமையால் குறித்த சோக சம்பவம் இடம்பெற்றது.
வபாத்தான இளம் மாணவர்களின் சம்பவமானது, சம்மாந்துறையினை மட்டுமல்லாது, முழு நாட்டையும் பெரும் சோகத்தில் ஆழ்த்தியுள்ளது.
மேலும் இம்மாணவர்களின் தவிர்க்க முடியாத பிரிவின் காரணமாக தமது துக்கத்தினை வெளிப்படுத்தும் நோக்குடன் சமூக நலன் விரும்பிகளால் நிந்தவூர் பெரிய ஜும்ஆ பள்ளிவாசல் முன்றல் மற்றும் நிந்தவூர் பிரதான வீதியில் வெள்ளைக் கொடி கட்டி பறக்கவிடப்பட்டுள்ளது.
அதே போன்று வெள்ளிக் கிழமை நிந்தவூர் ஜும்ஆ பெரிய பள்ளிவாசலின் கீழ் இயங்கக்கூடிய அனைத்து ஜும்ஆ பள்ளிவாசல்களிலும் இடம்பெறக்கூடிய குத்பாக்களில் ஷஹீதுகளுடைய அந்தஸ்து தொடர்பாக குத்பா உரை நிகழ்த்தப்பட்டதுடன், ஜும்ஆ தொழுகையினைத் தொடர்ந்து வபாத்தான மாணவர்களுக்காக காயிபான ஜனாஸா தொழுகை நடாத்தப்பட்டுள்ளதோடு, விஷேட துஆ பிரார்த்தனையும் இடம்பெற்றது.
வல்ல அல்லாஹ் வபாத்தான மாணவர்களுக்கு உயர்ந்த ஜன்னத்துல் பிர்தெளஸினை வழங்குவதோடு, இம் மாணவர்களின் பிரிவினால் கவலையுறும் அவர்களுடைய குடும்பத்திற்கு ஆறுதல் வழங்க வேண்டும் என பிரார்த்திக்கின்றோம்.
பட உதவி- எம்.ஸி.முபீத்
