இலங்கைத் திருநாட்டின் 78வது சுதந்திர தினக் கொண்டாட்டங்கள் தெற்கில் களைகட்டியுள்ள நிலையில், வடக்கிலும் கிழக்கிலும் சோகம் தோய்ந்த கறுப்பு நிறம் வீதிகளை ஆக்கிரமித்துள்ளது.
கிளிநொச்சியில் இன்று சுதந்திர தினத்தை எதிர்ப்பு தெரிவித்து வர்த்தக நிலையங்கள் அனைத்தும் மூடப்பட்திருந்தன.
“தமிழர்களுக்கு இது சுதந்திர தினம் அல்ல, இது ஒரு கரிநாள்” என்ற கோஷத்துடன், கிளிநொச்சி கந்தசுவாமி ஆலய முன்றலில் இன்று ஒரு மாபெரும் மக்கள் புரட்சி வெடித்திருக்கிறது.
யாழ். பல்கலைக்கழக மாணவர் ஒன்றியம் விடுத்த ஒருமித்த அழைப்பு, இன்று ஒரு மக்கள் இயக்கமாக உருவெடுத்துள்ளது. சிவில் அமைப்புகள், அரசியல் கட்சிகள் மற்றும் பல்கலைக்கழக விரிவுரையாளர்கள் என அனைத்துத் தரப்பினரும் ஒரு புள்ளியில் இணைந்துள்ளனர்.
போராட்டம் கிளிநொச்சி கந்தசுவாமி ஆலய முன்றலில் ஆரம்பமாகி, நகரத்தை நோக்கி ஒரு பெரும் பேரணியாக உருவெடுத்தது.
- வலிந்து காணாமல் ஆக்கப்பட்டோரின் உறவுகள்: கைகளில் படங்களை ஏந்தி, நீதிக்காகக் காத்திருக்கும் அந்த விழிகளில் தெறிப்பது வெறும் கண்ணீரல்ல, அது காலங்காலமான வலி.
- இளைஞர் மற்றும் மாணவர்கள்: வருங்கால சந்ததியினரின் உரிமையை உறுதிப்படுத்த வீதியில் இறங்கியுள்ளனர்.
- தென்னிந்திய ஆதரவு: இந்த போராட்டத்திற்கு எல்லை கடந்து தென்னிந்தியப் பிரபலங்களும் ஆதரவு தெரிவித்துள்ளமை, ஈழத் தமிழர்களின் கோரிக்கைக்கு சர்வதேசப் பரிமாணத்தை வழங்கியுள்ளது.
போராட்டத்தின் ஒரு பகுதியாக ஐக்கிய நாடுகள் சபையின் பொதுச்செயலாளருக்கு அனுப்பப்பட்டுள்ள ஊடக அறிக்கையில், தமிழர்களின் அடிப்படை அரசியல் அபிலாசைகள் முன்வைக்கப்பட்டுள்ளன.
போராட்டம் நடைபெறும் வீதிகளெங்கும் பொலிஸாரும், விசேட அதிரடிப்படையினரும் பெருமளவில் குவிக்கப்பட்டிருந்ததுடன், இந்த பாதுகாப்பு கெடுபிடிகளுக்கு மத்தியிலும், மக்கள் எவ்வித அச்சமுமின்றித் தமது கோரிக்கைகளை முன்வைத்தனர்.
இலங்கை, சுதந்திர தினத்தை மிக விமரிசையாகக் கொண்டாடும் இவ்வேளையில், வடக்கு கிழக்கில் ஒலிக்கும் இந்த “கரிநாள்” முழக்கம், ஒரு நிரந்தரமான அரசியல் தீர்வுக்கான அவசியத்தை உலக நாடுகளுக்கு மீண்டும் ஒருமுறை நினைவுபடுத்தியுள்ளது.
