- பாராளுமன்றத்தில் திடீர் திருப்பம்: மு.கா. தேசியப் பட்டியல் எம்.பி. எம்.எஸ். அப்துல் வாஹித் ராஜினாமா!
- இன்றோடு பதவி காலியானது: பாராளுமன்ற செயலாளர் நாயகம் தேர்தல் ஆணைக்குழுவிற்கு அவசர கடிதம்!
- அரசியல் களத்தில் அதிரடி மாற்றம்: வெற்றிடமான பத்தாவது பாராளுமன்றத்தின் ஆசனம்!
இலங்கை பாராளுமன்ற அரசியலில் மற்றொரு பரபரப்பான திருப்பம் அரங்கேறியுள்ளது. ஸ்ரீலங்கா முஸ்லிம் காங்கிரஸின் தேசியப் பட்டியல் பாராளுமன்ற உறுப்பினரான எம்.எஸ். அப்துல் வாஹித், தனது பாராளுமன்ற உறுப்பினர் பதவியிலிருந்து ராஜினாமா செய்துள்ளார்.
அவரது இந்த அதிரடி பதவி விலகல் தொடர்பான தீர்மானம் இன்றைய தினம் (14) முதலே உடனடியாக நடைமுறைக்கு வருவதாக அறிவிக்கப்பட்டுள்ளது. இந்த விடயம் குறித்து பாராளுமன்றத்தின் பதில் செயலாளர் நாயகம் ஹன்ச அபேரத்ன தேர்தல் ஆணைக்குழுவிற்கு உத்தியோகபூர்வமாக அறிவித்துள்ளார்.
இதனையடுத்து, பத்தாவது பாராளுமன்றத்தின் உறுப்பினர் ஆசனங்களில் ஒன்று உத்தியோகபூர்வமாக வெற்றிடமாகியுள்ளது. 1981 ஆம் ஆண்டின் 1 ஆம் இலக்க பாராளுமன்றத் தேர்தல்கள் சட்டத்தின் 64(5) ஆம் பிரிவின் விதிகளுக்கு அமைவாக, இந்த வெற்றிடம் குறித்த தகவல் தேர்தல் ஆணைக்குழுவின் தவிசாளருக்கு முறைப்படி எழுத்துமூலம் தெளிவுபடுத்தப்பட்டுள்ளது.
திடீரென ஏற்பட்டுள்ள இந்த வெற்றிடத்தால் முஸ்லிம் காங்கிரஸ் வட்டாரத்திலும் பாராளுமன்ற அரசியலிலும் அடுத்த நகர்வுகள் சூடுபிடிக்கத் தொடங்கியுள்ளன. அடுத்ததாக இந்த தேசியப் பட்டியல் ஆசனத்தை அலங்கரிக்கப் போகும் புதிய முகம் யார் என்ற எதிர்பார்ப்பு அரசியல் அரங்கில் தற்போது மேலோங்கியுள்ளது.
