- செங்கடலில் திடீர் திருப்பம்: பாப் அல்-மந்தப் நீரிணையை மீட்ட யேமன் படைகள்; சவூதிக்குள் சீறிய ஹூதி ஏவுகணைகள்!
- உலக எரிபொருள் சந்தையை அதிரவைத்த மின்னல் தாக்குதல்: ஹூதிகளுக்கு விழுந்த பலத்த அடி!
- மக்கா பாதுகாப்பு ஒப்பந்தம் அமல்: களமிறங்கும் பாகிஸ்தான் – துருக்கி ராணுவப் படைகள்!
உலகளாவிய வர்த்தகப் பாதைகளின் மிக முக்கியமான நரம்பாகப் பார்க்கப்படும் செங்கடல் பிராந்தியத்தில் போர் மீண்டும் உச்சக்கட்டத்தை எட்டியுள்ளது. சர்வதேச அங்கீகாரம் பெற்ற யேமன் அரசப் படைகள், சவூதி கூட்டுப் படைகளின் கடுமையான வான்வழித் தாக்குதல்களின் துணையுடன் பாப் அல்-மந்தப் நீரிணையை அண்டிய கரையோரப் பகுதிகளை மின்னல் வேகத்தில் மீட்டுள்ளதாக அறிவித்துள்ளன. கடந்த மாதம் ஈரான் ஆதரவு ஹூதி அமைப்பினரால் கைப்பற்றப்பட்ட பல முக்கிய நிலைகளில் இருந்து அவர்கள் விரட்டியடிக்கப்பட்டு, வரலாற்று முக்கியத்துவம் வாய்ந்த மோச்சா நகரின் விளிம்பை அரசப் படைகள் அடைந்துள்ளன.
களத்தில் விழுந்த இந்த எதிர்பாராத அடிக்கு உடனடியாகவும் மிக உக்கிரமாகவும் பதிலடி கொடுத்துள்ளது ஹூதி தரப்பு, சவூதி அரேபியாவின் தலைநகர் ரியாத்தில் உள்ள மன்னர் காலித் சர்வதேச விமான நிலையம், ரபிக்கில் அமைந்துள்ள அராம்கோ நிறுவனத்தின் பிரதான எண்ணெய் சுத்திகரிப்பு நிலையம், அபா விமான நிலையம் மற்றும் கமிஸ் முஷைத் ராணுவத் தளம் ஆகிய அதிமுக்கிய பொருளாதார மற்றும் ராணுவ இலக்குகளை ஏவுகணைகள் மற்றும் ட்ரோன்கள் மூலம் தாக்கியதாக ஹூதிகள் அதிரடியாக உரிமை கோரியுள்ளனர்.
ஹோர்முஸ் நீரிணையை ஈரான் முடக்கியுள்ள நிலையில், செங்கடலின் எண்ணெய்ப் பாதையான பாப் அல்-மந்தப் பகுதியிலும் யுத்தம் தீவிரமடைந்திருப்பது சர்வதேச சந்தையில் எண்ணெய்ப் பற்றாக்குறையையும் விலை உயர்வையும் அச்சுறுத்தும் நிலைக்குத் தள்ளியுள்ளது. கடற்பரப்பில் அரசுப் படைகள் ஆதிக்கம் செலுத்தினாலும், மலையகப் பகுதிகளில் பதுங்கியிருக்கும் ஹூதிகள் அங்கிருந்து வர்த்தகக் கப்பல்கள் மீது தொடர்ந்து ட்ரோன் தாக்குதல்களை நடத்தும் அபாயம் நீடிக்கவே செய்கிறது.
அதேவேளை, தெற்கு மற்றும் தென்மேற்கு யேமனில் தரைப்போர் மிகக் கடுமையான ஒரு கட்டத்தை எட்டியுள்ளது. யேமனின் மூன்றாவது பெரிய நகரமான தாயிஸ் பகுதியில் முக்கிய மலைப்பாதை இணைப்புகளைத் துண்டித்து, அரை மில்லியனுக்கும் அதிகமான மக்கள் வாழும் நகரை ஹூதிப் படைகள் சுற்றிவளைத்துள்ளன. இதனால் எரிபொருள் நிலையங்களில் பொதுமக்கள் நீண்ட வரிசையில் காத்திருக்கும் அவல நிலை ஏற்பட்டுள்ளதுடன், யுத்தம் மீண்டும் மூண்டதில் இருந்து இதுவரை 184,000 க்கும் மேற்பட்ட பொதுமக்கள் இடம்பெயர்ந்துள்ளதாக ஐக்கிய நாடுகள் சபை கவலை வெளியிட்டுள்ளது.
போர் பிராந்திய எல்லைகளைத் தாண்டி விரிவடைவதைத் தொடர்ந்து, இஸ்லாமிய நாடுகளின் பெரும் ராணுவக் கூட்டணி ஒன்று இப்போது களத்தில் இறங்கத் தயாராகியுள்ளது. சவூதி அரேபியா, துருக்கி மற்றும் பாகிஸ்தான் ஆகிய நாடுகள் ரியாத்தில் அவசரமாகக் கூடிப் பேசி, தமக்கிடையேயான ‘மக்கா கூட்டுப் பாதுகாப்பு ஒப்பந்தத்தின்’ கீழ் சவூதி மண்ணில் துருப்புக்களையும் ராணுவ பலத்தையும் உடனடியாக நிலைநிறுத்த முடிவு செய்துள்ளன. ஒரு நாட்டின் மீதான தாக்குதல் மூன்று நாடுகள் மீதான தாக்குதலாகக் கருதப்படும் என்ற இந்த உடன்பாடு, மத்திய கிழக்கு பிராந்தியப் போரை ஒரு புதிய சர்வதேச பரிமாணத்திற்கு இட்டுச் சென்றுள்ளது.
