மண்ணின் துயரிலிருந்து விண்முட்டிய கல்வி விருட்சம்: எருக்கலம்பிட்டி முஸ்லிம் மகா வித்தியாலயத்தின் அர்ப்பணிப்பு வரலாறு
அகதி முகாம்களின் புழுதி படிந்த வெளிகளில் எதிர்காலம் குறித்த அச்சம் சூழ்ந்திருந்த வேளையில், நம்பிக்கையின் ஒரே வெளிச்சமாக முளைத்தது கல்வி.
1990களின் தொடக்கத்தில் தாய்மண்ணான மன்னார் எருக்கலம்பிட்டியிலிருந்து வேரோடு பிடுங்கி எறியப்பட்டு, உள்நாட்டு யுத்தத்தின் கோரப்பிடியில் சிக்கி, சொந்த நாட்டிலேயே அகதிகளாக புத்தளம் மண்ணில் தஞ்சம் புகுந்த ஒரு சமூகத்தின் கண்ணீர்க் கதை அது. இழப்புகளும் ஏமாற்றங்களும் சூழ்ந்திருந்த அத்தருணத்தில், பிள்ளைகளின் கல்வி எதிர்காலம் பாழாகிவிடக் கூடாது என்ற தீர்க்கதரிசனத்தில், இரண்டு ஓலைக் கொட்டில்களோடு 1996 ஆம் ஆண்டு ஒரு கல்விப் புரட்சி விதையானது. அந்த விதைதான் இன்று கம்பீரமாய் நிமிர்ந்து நிற்கும் புத்தளம் எருக்கலம்பிட்டி முஸ்லிம் மகா வித்தியாலயம்.
ஒரு சமூகத்தின் தலையெழுத்தை மாற்றி அமைக்கும் வல்லமை கல்விக்கு மட்டுமே உண்டு என்பதை அன்றே உணர்ந்து, பள்ளிக்கூடத்தை வெறும் கட்டடமாகப் பார்க்காமல், ஒரு சமுதாயத்தின் மீட்சியின் குறியீடாக மாற்றிய சாதனை கல்லூரியின் ஸ்தாபக அதிபர் மர்ஹூம் M.C.M. ஜூனைத் அவர்களையே சாரும். வசதிகளற்ற ஓலைக் குடிசையிலும், சுட்டெரிக்கும் வெயிலிலும், அடர்ந்த காட்டின் ஆபத்திலும், கொட்டும் மழையிலும் தளராமல் நின்று அவர் விதைத்த அர்ப்பணிப்பும் வழிகாட்டலும் இப்பாடசாலையின் அசைக்க முடியாத அடித்தளமாயிற்று.
அவருக்குப் பின் வந்த ஒவ்வொரு அதிபர்களும், நிர்வாகிகளும், ஆசிரியர்களும் தங்கள் வியர்வையையும் தியாகத்தையும் உரமாக்கி இந்த விருட்சத்தை வளர்த்தெடுத்தனர். இன்று, தற்போதைய அதிபர் ஜனாப் S.M. ஹுசைமத் அவர்களின் நேர்த்தியான முகாமைத்துவத்திலும் வழிகாட்டலிலும், இக்கல்லூரி புதிய பரிமாணங்களை எட்டி, நவீன காலக் கல்விச் சவால்களை வெற்றிகரமாக எதிர்கொண்டு நடைபோடுகிறது.
இன்று இந்நிழலில் இளைப்பாறி அறிவு பெற்று வெளிவந்த மாணவர்கள் வைத்தியர்களாக, பொறியியலாளர்களாக, நீதியை நிலைநாட்டும் வழக்கறிஞர்களாக, அரச நிர்வாகிகளாக, உயர் பதவிகளில் பணிபுரியும் உத்தியோகத்தர்களாக, புதிய தலைமுறையை உருவாக்கும் ஆசான்களாக நாடெங்கிலும், உலகெங்கிலும் பரந்து விரிந்து தடம் பதித்து நிற்கின்றனர். ஓலைக் கொட்டில்களில் ஆரம்பித்து, சமூகத்தின் உச்ச பதவிகளுக்குச் சென்ற இந்த வெற்றிப் பயணத்தின் பின்னணியில் நின்றவர்கள் யார்?
அவர்கள் வேறு யாருமல்ல; இந்நாளில் நாம் நெஞ்சாரப் போற்றும் ஆசிரியப் பெருந்தகைகள்.
ஒரு கையில் சாக் பீசையும் மறு கையில் மாணவர்களின் எதிர்காலத்தையும் ஏந்தி, வறுமையையும் இடப்பெயர்வின் வலியையும் வென்றெடுக்க மாணவர்களுக்குக் கற்றுக்கொடுத்தவர்கள் அவர்கள். பாடப்புத்தகக் கல்வியைத் தாண்டி, “நாம் இழந்தவற்றை நம் அறிவால் மீட்க முடியும்” என்ற தன்னம்பிக்கையை ஊட்டிய வழிகாட்டிகள் அவர்கள்.
“ஒரு சிறந்த ஆசிரியர் என்பவர் வெறும் பாடங்களை மட்டுமே போதிப்பதில்லை; வீழ்ந்து கிடக்கும் ஒரு சமூகத்திற்கு சிறகுகள் முளைக்கச் செய்து, வானத்தை வசப்படுத்தும் துணிச்சலையும் கற்றுத் தருகிறார்.”
உலக ஆசிரியர் தினமான இந்நாளில், எருக்கலம்பிட்டி முஸ்லிம் மகா வித்தியாலயத்தை உருவாக்கிய முன்னோடிகளையும், அதைத் தாங்கிப் பிடித்து வளர்த்த ஆசான்களையும், இன்றும் மாணவர்களின் எதிர்கால சிற்பிகளாகச் செயல்படும் அனைத்து ஆசிரியர்களையும் தலைவணங்கிப் போற்றுவோம்.
புத்தளம் எருக்கலம்பிட்டி முஸ்லிம் மகா வித்தியாலயத்தின் வரலாறு என்பது வெறும் கல்வி வரலாறு அல்ல; அது ஒரு சமூகம் தன் அறிவின் மூலம் மீண்டெழுந்த தியாக காவியம்!
