- இமயமலையில் நிலநடுக்க வீரியப் பனிச்சரிவு: 900-க்கும் மேற்பட்டோர் பலி, 4,000 பேருக்கு மேல் மாயம்!
- நேபாளத்தில் மீண்டும் பெருவெள்ள அபாயம்: சைரன் அலறல்களால் தூங்க முடியாமல் நடுங்கும் மக்கள்!
- அமெரிக்கர்கள் உட்பட நூற்றுக்கணக்கான வெளிநாட்டவர்கள் கதி என்ன? நேபாளத்தில் தொடரும் பேரவலம்!
இமயமலைத் தொடரில் ஏற்பட்ட திடீர் பனிப்பாறை சரிவு, நேபாள நாட்டையே புரட்டிப் போட்டுள்ளது. இதுவரை 903 மனித உயிர்கள் பலியாகியுள்ளதோடு, 4,247 பேரின் நிலை என்னவென்றே தெரியாமல் உறவுகள் தவித்து வருகின்றனர். எல்லையின் மறுபுறம் சீனாவின் திபெத் பகுதியிலும் 16 பேர் உயிரிழந்துள்ளதுடன், 546 பேர் காணாமல் போயுள்ளதாக சீன அதிகாரப்பூர்வ தகவல்கள் தெரிவிக்கின்றன.
காத்மாண்டுவை இணைக்கும் பிரதான நெடுஞ்சாலைகளில் குவிந்துள்ள சேற்றையும் பாறைகளையும் அகற்றும் பணிகள் இராணுவத்தின் உதவியுடன் ஒருபுறம் தீவிரமாக இடம்பெற்று வருகின்றன. ஆனால், இந்த மீட்புப் பணிகள் நிறைவடைவதற்குள், நள்ளிரவிலும் அதிகாலையிலும் மக்களின் தொலைபேசிகளுக்கு அடுத்தடுத்து ஒலிக்கும் வெள்ள அபாய எச்சரிக்கை சைரன்கள் அப்பகுதி மக்களை மரண பீதியில் ஆழ்த்தியுள்ளன.
சீன எல்லைப் பகுதியில் நீர்வரத்து தொடர்ந்து அதிகரிப்பதாகக் கிடைத்த தகவலையடுத்து, போட்டேகோசி ஆற்றுப் படுகை மக்களுக்குப் புதிய எச்சரிக்கைகள் பிறப்பிக்கப்பட்டுள்ளன. “அடிக்கடி எச்சரிக்கை ஒலிக்கிறது, மழையும் பெய்கிறது. எழுந்து நடக்க முடியாத 70 வயது முதிய பெற்றோரைத் தூக்கிக்கொண்டு நள்ளிரவிலும் மேடான பகுதிகளுக்கு ஓட வேண்டியுள்ளது, உடலிலும் மனதிலும் தெம்பே இல்லை” என்று பாதிக்கப்பட்ட கிராமவாசி ஒருவர் கண்ணீருடன் விவரித்துள்ளார்.
வீடுகளின் சுவர்கள் அடித்துச் செல்லப்பட்டு, கூரைகளும் உடமைகளும் சகதிக்குள் புதைந்து கிடக்கின்றன. “எல்லாம் முடிந்துவிட்டது; வீடும் இல்லை, உடமைகளும் இல்லை, உயிருடன் இருப்பதோடு சரி” என எஞ்சிய உடைமைகளைத் தேடி அலைந்த பெண்கள் கதறும் காட்சி காண்போரை உலுக்கியுள்ளது. சுமார் 20,000 மக்களுக்கு மின்சாரம் வழங்கிய முக்கிய மின்நிலையம் ஒன்று முற்றிலும் சேதமடைந்துள்ளது.
இந்த இயற்கைச் சீற்றத்தில் உள்ளூர் மக்கள் மட்டுமன்றி, மலை ஏறுவதற்கும் புனித யாத்திரைக்குமாக உலகின் பல நாடுகளிலிருந்து வந்த நூற்றுக்கணக்கான வெளிநாட்டவர்களும் சிக்கியுள்ளனர். இதில் 85 அமெரிக்கப் பிரஜைகளின் நிலை இன்னும் அறியப்படவில்லை என்றும், திபெத் பகுதியில் நேபாளிகள் உட்பட 261 வெளிநாட்டவர்கள் காணாமல் போயுள்ளதாகவும் தெரிவிக்கப்பட்டுள்ளது.
இந்தப் பேராபத்து வெறுமனே பெய்த பெருமழையால் மட்டும் உருவானதல்ல. இமயமலையின் உச்சியில் இருந்த பாறாங்கல் அடுக்கு ஒன்று 5.2 ரிக்டர் அளவிலான அதிர்வை ஏற்படுத்தும் வீரியத்துடன் சரிந்து விழுந்ததில், அதனுடன் பனிப்பாறையும் சேர்ந்து நொறுங்கி கீழே உள்ள ஆறுகளுக்குள் பாய்ந்ததே இந்த வெள்ளப் பிரளயத்திற்குக் காரணம் என்பதைச் செய்மதிப் படங்கள் உறுதிப்படுத்தியுள்ளன.
“பூகோள வெப்பமயமாதலுக்கு எங்கள் நாடு வெறும் 0.1% மட்டுமே பொறுப்பு, ஆனால் அதன் மிகக் கொடூரமான விளைவை எங்கள் அப்பாவி மக்கள் சுமக்கிறார்கள்” என நேபாளத்தின் வெளிவிவகார அமைச்சர் உலக நாடுகளிடம் உருக்கமாக முறையிட்டுள்ளார். தற்போது அமெரிக்கா மற்றும் மலேசியா போன்ற நாடுகள் மீட்புக் குழுக்களையும் பல மில்லியன் டொலர் அவசர நிதியுதவிகளையும் நேபாளத்திற்கு அனுப்பத் தொடங்கியுள்ளன.
