இலங்கையின் வடமேற்கு மற்றும் மேற்கு கடலோரப் பகுதிகள் வழியாக முன்னெடுக்கப்பட்டு வரும் சட்டவிரோத கடத்தல் வலையமைப்புகளுக்குக் கடிவாளம் போடும் வகையில், இலங்கை கடற்படையினர் மின்னல் வேக தேடுதல் வேட்டைகளைத் தீவிரப்படுத்தியுள்ளனர். கற்பிட்டி, புத்தளம் மற்றும் நீர்கொழும்பு ஆகிய மூலோபாயக் கடலோரப் பகுதிகளை மையப்படுத்தி அடுத்தடுத்து முன்னெடுக்கப்பட்ட அதிரடி நடவடிக்கைகளில், பெரும் தொகையான நறுமணப் பொருட்கள், கடல் வளங்கள் மற்றும் பீடி இலைகள் கடற்படையின் வலையில் சிக்கியுள்ளன.
கற்பிட்டி, இலந்தையடி கடற்கரைப் பகுதியில் இன்று செப்டெம்பர் 29 செவ்வாய்க்கிழமை காலை வடமேற்கு கடற்படை கட்டளைக்குச் சொந்தமான ‘விஜய’ கடற்படைப் பிரிவினர் விசேட ரோந்துப் பணியில் ஈடுபட்டிருந்தனர். இதன்போது, வெறிச்சோடிய கடற்கரை ஓரத்தில் அநாதரவாகக் கைவிடப்பட்டிருந்த பதினைந்து (15) மர்ம உறைகளைக் கடற்படையினர் அவதானித்துச் சுற்றிவளைத்தனர்.
குறித்த உறைகளைப் பிரித்துப் பரிசோதித்த அதிகாரிகளுக்கு அங்கு பெரும் ஆச்சரியம் காத்திருந்தது. நாட்டிற்குள் சட்டவிரோதமாகக் கொண்டுவரப்பட்டதாகச் சந்தேகிக்கப்படும் 138 கிலோகிராம் உலர் மஞ்சள் துண்டுகள், 80 கிலோகிராம் ஏலக்காய் தோல் மற்றும் அரிய வகை கடல் வளமான 370 சங்குகள் மிக நேர்த்தியாகப் பொதி செய்யப்பட்டு மறைத்து வைக்கப்பட்டிருந்தமை அம்பலமானது. கடற்படையினரின் தீவிர தேடுதலை முன்கூட்டியே உணர்ந்த கடத்தல்காரர்கள், பொருட்களை நடுக்கடலில் அல்லது கரையோரப் பகுதியில் கைவிட்டுத் தப்பிச் சென்றிருக்கலாம் எனச் சந்தேகிக்கப்படுகிறது.
இதேவேளை, இதற்கு இரண்டு நாட்களுக்கு முன்னர், கடந்த செப்டெம்பர் 27 ஆம் திகதி, புத்தளம் மற்றும் நீர்கொழும்பு களப்புப் பகுதிகளை அதிரவைத்த மற்றொரு பாரிய கடத்தல் முறியடிப்பு அரங்கேறியுள்ளது. புத்தளம் களப்புப் பகுதியில் ‘விஜய’ கடற்படை பிரிவினரால் 20 உறைகளில் அடைக்கப்பட்டிருந்த 746 கிலோகிராம் பீடி இலைத் தொகுதியும், நீர்கொழும்பு களப்பில் ‘களனி’ கடற்படை பிரிவினரால் 4 உறைகளில் அடைக்கப்பட்டிருந்த 152 கிலோகிராமுக்கும் அதிகமான பீடி இலைகளும் மீட்கப்பட்டன.
ஒரே நாளில் முன்னெடுக்கப்பட்ட இக்களப்பு நடவடிக்கைகளின் ஊடாக மாத்திரம் சுமார் 898 கிலோகிராமுக்கும் அதிகமான பீடி இலைகள் கடத்தல்காரர்களின் கைகளில் இருந்து பறிக்கப்பட்டு சட்டத்தின் பிடிக்குள் கொண்டுவரப்பட்டுள்ளன. இலந்தையடியில் மீட்கப்பட்ட மஞ்சள், ஏலக்காய் தோல் மற்றும் சங்குகள் ஆகியவை மேலதிக விசாரணைகளுக்காக கற்பிட்டி பொலிஸாரிடம் ஒப்படைக்கப்பட்டுள்ள அதேவேளை, புத்தளம் மற்றும் நீர்கொழும்பில் மீட்கப்பட்ட பீடி இலைத் தொகுதிகள் கற்பிட்டி பொலிஸ் நிலையம் மற்றும் கட்டுநாயக்க சுங்கத் தடுப்புப் பிரிவினரிடம் பொறுப்பளிக்கப்பட்டு அடுத்தகட்ட சட்ட நடவடிக்கைகள் முடுக்கிவிடப்பட்டுள்ளன.
