- வாக்களித்தால் நபருக்கு 5,000 டொலர்! இடைக்காலத் தேர்தலில் ட்ரம்பின் அதிரடி வாக்குறுதி!
- அமெரிக்க அரசியலில் “ட்ரம்பாபலூசா”: காங்கிரஸைத் தக்கவைக்க $1.35 ட்ரில்லியன் சூதாட்டம்!
- வாக்குச்சீட்டில் நானே இருப்பதாக நினையுங்கள்: சரிந்துவரும் ஆதரவுக்கு மத்தியில் ட்ரம்பின் பகிரங்க அழைப்பு!
நவம்பர் 3 ஆம் திகதி நடைபெறவுள்ள அமெரிக்க இடைக்காலத் தேர்தலுக்கு முன்னதாக, அமெரிக்க அரசியலையே அதிரவைக்கும் வகையிலான வாக்குறுதி ஒன்றை ஜனாதிபதியும் டொனால்ட் ட்ரம்ப் முன்வைத்துள்ளார். குடியரசுக் கட்சி தனது கட்டுப்பாட்டை காங்கிரஸில் தக்கவைத்துக்கொண்டால், நாட்டிலுள்ள ஒவ்வொரு வயதுவந்த பிரஜைக்கும் 5,000 அமெரிக்க டொலர் வீதம் ‘ட்ரம்பின் பங்குத்தொகை’ (Trump dividend) வழங்கப்படும் என அவர் அறிவித்துள்ளார்.
டல்லாஸில் நடைபெற்ற குடியரசுக் கட்சியின் முதலாவது வரலாற்றுச் சிறப்புமிக்க இடைக்கால மாநாட்டில் உரையாற்றியபோதே ட்ரம்ப் இந்த வியப்பூட்டும் அறிவிப்பை வெளியிட்டார். அமெரிக்காவில் சுமார் 27 கோடி வயதுவந்த பிரஜைகள் உள்ள நிலையில், இந்தத் திட்டத்தை நடைமுறைப்படுத்த சுமார் 1.35 ட்ரில்லியன் அமெரிக்க டொலர்கள் தேவைப்படும். எனினும், இவ்வளவு பெருந்தொகையான நிதியை எங்கிருந்து திரட்டுவது அல்லது இது சட்டரீதியாக சாத்தியமா என்பது குறித்து எந்தவொரு தெளிவான விளக்கமும் இதுவரை வெளியிடப்படவில்லை.
தனது தலைமைத்துவத்தின் கீழ் கடந்த இரண்டு ஆண்டுகளும் “அமெரிக்க ஜனாதிபதி வரலாற்றிலேயே மிகச் சிறப்பான காலம்” என்று தனது பிரைம்-டைம் உரையில் ட்ரம்ப் மார்தட்டிக்கொண்டார். ஆனால், நிஜ நிலவரம் வேறுவிதமாக உள்ளது. நாடு முழுவதும் நிலவும் கடுமையான வாழ்க்கைச் செலவு அதிகரிப்பு மற்றும் ஈரான் மீதான இழுபறிப் போர் காரணமாக வாக்காளர்கள் மத்தியில் ட்ரம்பின் செல்வாக்கு வரலாறு காணாத அளவுக்கு அதலபாதாளத்திற்குச் சென்றுள்ளது என கருத்துக்கணிப்புகள் தெரிவிக்கின்றன.
நிலைமை இவ்வாறிருக்க, தேர்தல் களத்தில் நடுநிலையாக உள்ள வாக்காளர்களை ஈர்ப்பதற்காக, “வாக்குச்சீட்டில் என் பெயரே இருப்பதாக எண்ணிக்கொண்டு வாக்களியுங்கள்” என்று வெளிப்படையாகவே வாக்காளர்களிடம் ட்ரம்ப் வேண்டுகோள் விடுத்துள்ளார். பிரபல இசைத் திருவிழாவை நினைவூட்டும் வகையில் ‘ட்ரம்பாபலூசா’ (Trumpapalooza) என கட்சித் தலைவர்களால் அழைக்கப்பட்ட இந்த மாநாடு, முழுக்க முழுக்க ட்ரம்பை முன்னிலைப்படுத்தியே ஒழுங்கமைக்கப்பட்டிருந்தது. இருப்பினும், 21,000 பேர் அமரக்கூடிய அந்த பிரம்மாண்ட அரங்கின் மேல் தளங்கள் பல ட்ரம்ப் உரையாற்றியபோது வெறிச்சோடிக் காணப்பட்டமை பெரும் பேசுபொருளாகியுள்ளது.
மறுபுறம், ட்ரம்பின் இந்த தீவிரப் போக்கு கட்சிக்குள்ளேயே பலத்த அதிர்வலைகளை ஏற்படுத்தியுள்ளது. கடுமையான போட்டியை எதிர்நோக்கும் மிச்சிகன், அலாஸ்கா மற்றும் மைனே போன்ற முக்கிய மாநிலங்களின் குடியரசுக் கட்சி வேட்பாளர்கள் பலர், ட்ரம்பின் செல்வாக்குச் சரிவு தங்களது வெற்றியையும் பாதித்துவிடும் என்ற அச்சத்தில் இந்த மாநாட்டை திட்டமிட்டுப் புறக்கணித்தனர். ஈரானுடனான போர் எப்போது முடிவுக்கு வரும் என்பது பற்றிய தெளிவான பார்வை அரசிடம் இல்லை என மாநாட்டில் கலந்துகொண்ட சொந்தக் கட்சிப் பிரதிநிதிகளே அதிருப்தி வெளியிடும் அளவுக்கு நிலைமை உள்ளது.
இத்தகைய கடுமையான உள்முரண்பாடுகளுக்கு மத்தியில், மாநாட்டில் அரங்கேறிய ஒரு சம்பவம் அனைவரையும் திடுக்கிட வைத்தது. தீவிர இடதுசாரி நிலைப்பாடுகளுடன் முரண்பட்டு வரும் ஜனநாயகக் கட்சியின் பிரபல செனட்டர் ஜோன் ஃபெட்டர்மன், காணொளி மூலம் மாநாட்டில் தோன்றி ஆச்சரியமளித்தார். பென்சில்வேனியாவின் உருக்குத் தொழிலைப் பாதுகாக்க ட்ரம்புடன் கைகோர்த்துப் பணியாற்றத் தயார் என அவர் பகிரங்கமாக அறிவித்தமை ஜனநாயகக் கட்சியினரை திகைப்பில் ஆழ்த்தியுள்ளது. இன்னும் இரு மாதங்களுக்கும் குறைவான காலமே எஞ்சியுள்ள நிலையில், தேர்தல் களத்தை வெற்றிகொள்ள ட்ரம்ப் வீசியுள்ள இந்த 5,000 டொலர் ‘துருப்புச் சீட்டு’ கைகொடுக்குமா என்பது உலகளாவிய ரீதியில் உற்றுநோக்கப்படுகிறது.
