இயற்கை அனர்த்தத்தினால் சொல்லொணாத் துயரங்களைச் சந்தித்த புத்தளம் மாவட்டத்தின் வண்ணாதவில்லு பிரதேச மக்களுக்கு, முதற்கட்ட அனர்த்த நிவாரணக் காசோலைகள் வழங்கும் ஆரம்ப நிகழ்வு இன்று (25.05.2026) மிகவும் எழுச்சியுடன் நடைபெற்றது.
அந்த வகையில் சுமார் 15 கோடி ரூபா நிவாரணத்தொகை குறித்த பயனாளர்களுக்கு வண்ணாதவில்லு பிரதேச சபையின் பிரதான மண்டபத்தில் வைத்து இன்று வழங்கிவைக்கப்பட்டது.
பாதிக்கப்பட்ட மக்களின் கண்ணீரைத் துடைத்து, அவர்களின் வாழ்வாதாரத்தை மீளக் கட்டியெழுப்பும் நோக்கில் நடைபெற்ற இந்நிகழ்வில் முக்கிய அரசியல் தலைவர்கள் மற்றும் அரச அதிகாரிகள் பலரும் கலந்துகொண்டு காசோலைகளை நேரடியாக மக்களிடம் கையளித்தனர்.
இந்நிகழ்வில்:
- பொது நிர்வாக அமைச்சர் சகோதரர் சந்தன அபயரத்ன
- தேசிய மக்கள் சக்தியின் கட்சி பிரதி அமைப்பாளரும் நாடாளுமன்ற உறுப்பினருமான சகோதரர் கயன் ஜனக
- புத்தளம் மாவட்ட நாடாளுமன்ற உறுப்பினர் M.J.M. பைசல்
- வண்ணாதவில்லு தேசிய மக்கள் சக்தியின் தலைவர் சகோதரர் சுரங்க
- வண்ணாதவில்லு பிரதேச செயலாளர், பிரதேச சபையின் செயலாளர், பிரதேச சபை உறுப்பினர்கள் மற்றும் பிரஜா சக்தி தலைவர்கள் உள்ளிட்ட பலரும் கலந்துகொண்டு மக்களுக்குத் தங்களின் ஆதரவினை வெளிப்படுத்தினர்.
சேத விபரங்களும் துரித நடவடிக்கைகளும்
அண்மையில் ஏற்பட்ட டித்வா அனர்த்தத்தின் காரணமாக வண்ணாதவில்லு பிரதேச செயலாளர் பிரிவில் பெரும் சேதங்கள் ஏற்பட்டிருந்தன.
இதில் 68 வீடுகள் முழுமையாகச் சேதமடைந்ததுடன், 100 வீடுகள் பகுதியளவு சேதமடைந்திருந்தன.
பாதிக்கப்பட்ட குடும்ப உறுப்பினர்களின் பங்களிப்போடு உணர்வுப்பூர்வமாக நடைபெற்ற இந்நிகழ்வில், பாதிக்கப்பட்டோருக்கான முதற்கட்ட காசோலைகள் இதன்போது வழங்கப்பட்டன. வீடுகளை இழந்து தவித்த மக்களுக்கு இந்த நிதியுதவி பெரும் நம்பிக்கையையும் ஆறுதலையும் தந்துள்ளது.
துயரக் கடலில் மூழ்கியிருந்த வண்ணாதவில்லு மக்களுக்கு, இன்றைய தினம் அரச மற்றும் மக்கள் பிரதிநிதிகளின் நேரடித் தலையீட்டின் மூலம் கிடைத்த இந்த 15 கோடி ரூபாய்க்கும் அதிகமான நிவாரணம், ஒரு புதிய மறுமலர்ச்சிக்கான ஆரம்பமாக அமைந்துள்ளது என்பதில் ஐயமில்லை.
