- வரலாற்றில் முதல்முறையாக உலகளாவிய நற்பெயர் மற்றும் செல்வாக்கு மிக்க நாடுகளின் பட்டியலில் அமெரிக்காவை முந்தியது சீனா.
- பியூ ஆராய்ச்சி மையம் (Pew Research Center) நடத்திய உலகளாவிய புதிய கருத்துக்கணிப்பில் இந்த அதிரடித் தகவல் வெளியாகியுள்ளது.
- ஆய்வுக்கு உட்படுத்தப்பட்ட 36 நாடுகளில், கனடா மற்றும் பிரிட்டன் உட்பட 25 நாடுகள் அமெரிக்காவை விட சீனாவையே அதிகம் விரும்புகின்றன.
- இந்தியா, ஜப்பான், இஸ்ரேல் உள்ளிட்ட வெறும் 6 நாடுகள் மட்டுமே இன்னமும் அமெரிக்காவிற்கு தங்களது ஆதரவை வழங்கி வருகின்றன.
உலக அரங்கில் தங்களது ஆதிக்கத்தை நிலைநிறுத்த பலப்பரீட்சை நடத்தி வரும் இரு பெரும் வல்லரசுகளுக்கு இடையிலான போட்டியில், தற்போது ஒரு பாரிய திருப்புமுனை ஏற்பட்டுள்ளது. உலகளாவிய நன்மதிப்பு மற்றும் செல்வாக்கு குறித்த ஆய்வுகளில், வரலாற்றில் முதல்முறையாக அமெரிக்காவை பின்னுக்குத் தள்ளி சீனா முதலிடத்தைப் பிடித்து உலக நாடுகளை ஆச்சரியத்தில் ஆழ்த்தியுள்ளது.
சர்வதேச அளவில் புகழ்பெற்ற ‘பியூ ஆராய்ச்சி மையம்’ (Pew Research Center) வெளியிட்டுள்ள புதிய கருத்துக்கணிப்பு அறிக்கையிலேயே இந்த அதிரடித் தகவல் வெளியாகியுள்ளது. அமெரிக்காவின் செல்வாக்கு சரிந்து வருவதை உறுதிப்படுத்தும் இந்தத் தரவு, சர்வதேச அரசியலில் பெரும் விவாதத்தை கிளப்பியுள்ளது.
கடந்த 20 ஆண்டு கால உலகளாவிய அரசியல் வரலாற்றில், அமெரிக்காவை விட சீனாவை உலகின் பெரும்பாலான மக்கள் சாதகமான ஒரு நாடாகப் பார்ப்பது இதுவே முதல் முறையாகும். இந்த ஆய்விற்காக உலகம் முழுவதிலும் இருந்து சுமார் 36 நாடுகள் தேர்ந்தெடுக்கப்பட்டு மக்களின் கருத்துக்கள் கணிக்கப்பட்டன. இதில் யாரும் எதிர்பாராத விதமாக, சுமார் 25 நாடுகள் அமெரிக்காவை விட சீனாவே தங்களுக்குச் சிறந்த தெரிவு என வாக்களித்துள்ளன. வல்லரசு நாற்காலியில் அமர்ந்திருக்கும் அமெரிக்காவிற்கு இந்த முடிவு ஒரு பலத்த அதிர்ச்சியை கொடுத்துள்ளது.
இந்த மாற்றத்தில் மிகவும் சுவாரஸ்யமான விடயம் என்னவென்றால், அமெரிக்காவின் மிக நெருங்கிய, நீண்டகால நட்பு நாடுகளாகக் கருதப்படும் கனடா, ஆஸ்திரேலியா, பிரான்ஸ், ஜெர்மனி மற்றும் பிரிட்டன் போன்ற நாடுகள் கூட இப்போது அமெரிக்காவை கைவிட்டு, சீனாவிற்கு தங்களது ஆதரவை வாரி வழங்கியுள்ளன. வாஷிங்டனின் மிக நம்பிக்கையான கூட்டாளிகளின் இந்தத் திடீர் மனமாற்றம், அமெரிக்க வெளியுறவுக் கொள்கைக்கு விழுந்த பலத்த அடியாகவே பார்க்கப்படுகிறது.
இருப்பினும், சீனாவின் இந்த அசுர வளர்ச்சியைப் புறந்தள்ளி, இன்னமும் அமெரிக்கா பக்கமே உறுதியாக நிற்கும் நாடுகளும் சில இருக்கவே செய்கின்றன.
இந்த ஆய்வில் பங்கேற்ற நாடுகளில் இந்தியா, ஜப்பான், இஸ்ரேல், தென் கொரியா, பிலிப்பைன்ஸ் மற்றும் போலந்து ஆகிய 6 நாடுகள் மட்டுமே சீனாவை விட அமெரிக்காவையே தொடர்ந்து அதிகம் ஆதரிப்பதாகத் தெரிவித்துள்ளன. இந்த நாடுகள் அமெரிக்காவின் பக்கம் நின்றாலும், பெரும்பான்மை நாடுகளின் ஆதரவு சீனா பக்கம் சாய்ந்திருப்பதை அவர்களால் தடுக்க முடியவில்லை.
அமெரிக்காவின் இந்தத் திடீர் வீழ்ச்சிக்கும், சீனாவின் அசுர வளர்ச்சிக்கும் பின்னால் வலுவான காரணங்கள் இருப்பதாக அரசியல் நிபுணர்கள் சுட்டிக்காட்டுகின்றனர். அமெரிக்காவின் சுயநலமிக்க “அமெரிக்கா ஃபர்ஸ்ட்” (America First) கொள்கையும், உலகப் பொருளாதாரத்தை அச்சுறுத்தும் ஈரான் மீதான போர் அணுகுமுறைகளும் உலக நாடுகளை அமெரிக்கா மீது அதிருப்தி அடையச் செய்துள்ளன. அதேவேளை, சீனா தன்னை ஒரு நிலையான, நம்பகமான வர்த்தகப் பங்காளியாக உலகிற்கு நிரூபித்து வருவதால், உலக நாடுகள் தற்போது பெய்ஜிங்கை நோக்கி படையெடுக்கத் தொடங்கியுள்ளன.
இந்த உலகளாவிய மாற்றம் பற்றி உங்களது கருத்து என்ன? சீனா உண்மையிலேயே நம்பகமான நாடா? கீழே கமெண்ட் செய்யுங்கள்!
