- இலங்கையில் 16 வயதுக்குட்பட்டோருக்கு சமூக வலைத்தளங்கள் தடையா? – நாடாளுமன்றில் வெடித்த விவாதம்!
- ஸ்மார்ட்போன்களுக்குள் சிக்கும் பிள்ளைகள்: பாராளுமன்றில் பைசர் முஸ்தபா வெளியிட்ட அதிரடித் தகவல்!
- இணையவழி மிரட்டல்களும் 9.1 மில்லியன் அச்சுறுத்தல்களும்: இலங்கைச் சிறுவர்களைக் குறிவைக்கும் டிஜிட்டல் வலை!
- டிக்டொக், பேஸ்புக்கிற்கு ‘நோ’… வட்ஸ்அப்-க்கு ‘எஸ்’ – வரப்போகும் புதிய சட்டம் என்ன?
இலங்கையின் எதிர்காலத் தலைமுறையினரான சிறுவர்கள் மற்றும் இளைஞர்கள் டிஜிட்டல் உலகில் மிகக் கடுமையான ஆபத்துகளை எதிர்கொண்டு வரும் நிலையில், அவர்களுக்குப் பாதுகாப்பான சூழலை உறுதிசெய்யும் முக்கிய சட்ட முயற்சியொன்று நாடாளுமன்றத்தில் முன்வைக்கப்பட்டுள்ளது. 16 வயதிற்குட்பட்ட பிள்ளைகள் சமூக வலைத்தளங்களைப் பயன்படுத்துவதற்குக் கடுமையான கட்டுப்பாடுகளை உடன் நடைமுறைப்படுத்துமாறு கோரி, நாடாளுமன்ற உறுப்பினர் ஜனாதிபதி சட்டத்தரணி கௌரவ பைசர் முஸ்தபா அவசர ஒத்திவைப்புப் பிரேரணை ஒன்றைக் கொண்டுவந்துள்ளார்.
கட்டுப்பாடுகளற்ற சமூக ஊடகப் பயன்பாடானது நாட்டின் இளம் தலைமுறையின் மனநலம், கல்வி, தனிப்பட்ட பாதுகாப்பு மற்றும் ஒழுக்க விழுமியங்களுக்குப் பாரிய பின்னடைவை ஏற்படுத்தி வருவதாக அவர் சுட்டிக்காட்டியுள்ளார். ஐக்கிய இராச்சியம் மற்றும் அவுஸ்திரேலியா போன்ற நாடுகள் தமது புதிய சட்டங்கள் ஊடாக 16 வயதுக்குட்பட்ட பிள்ளைகளுக்குச் சமூக வலைத்தளக் கட்டுப்பாடுகளை ஏற்கனவே அறிமுகப்படுத்தியுள்ளதைச் சுட்டிக்காட்டிய அவர், அதே போன்ற சர்வதேச நடைமுறைகளை இலங்கையிலும் அமுல்படுத்த வேண்டியதன் அவசியத்தை வலியுறுத்தினார்.
இந்த யோசனையின்படி இன்ஸ்டாகிராம், டிக்டொக், பேஸ்புக், யூடியூப், ஸ்னாப்சாட் மற்றும் எக்ஸ் (ட்விட்டர்) போன்ற பிரதான தளங்களுக்கான சிறுவர்களின் பிரவேசம் மட்டுப்படுத்தப்படும். அதேநேரம், அத்தியாவசிய தொடர்பாடல் தேவைகளுக்காக வட்ஸ்அப் போன்ற செயலிகளுக்கு விதிவிலக்கு அளிக்கப்படும் என்பதும் குறிப்பிடத்தக்கது.
தாம் கொண்டுவந்துள்ள இச்சட்டமூலம் நவீன தொழில்நுட்பத்திற்கு எதிரானது அல்ல என்பதைத் தெளிவுபடுத்திய முஸ்தபா, “இதற்கான தனிப்பட்ட பெருமையை நான் கோரவில்லை; டிஜிட்டல் சாதனங்களின் முக்கியத்துவத்தை ஏற்றுக்கொண்டாலும், ஆன்லைன் ஊடாக நமது பிள்ளைகளுக்கு ஏற்படும் கொடூரமான பாதிப்புகளிலிருந்து அவர்களைப் பாதுகாக்கச் சட்டப்பூர்வ கவசம் அவசியம்” எனக் குறிப்பிட்டார். மேலும், நீதி அமைச்சருடனான பேச்சுவார்த்தைகளைத் தொடர்ந்து இந்த யோசனை தற்போது சட்ட வரைவுச் செயன்முறையில் உள்ளதாகவும், அரசாங்கம் இதனை மிக விரைவாக நிறைவேற்ற வேண்டும் என்றும் அவர் கோரிக்கை விடுத்தார்.
நாடாளுமன்றில் அவர் சமர்ப்பித்த புள்ளிவிவரங்கள் முழுச் சபையையும் உலுக்கியுள்ளன. இணையவெளி அச்சுறுத்தல்களில் இலங்கை உலகளவில் 20ஆவது இடத்தில் உள்ளதோடு, ஓராண்டில் மட்டும் 9.1 மில்லியன் அச்சுறுத்தல்கள் கண்டறியப்பட்டுள்ளன. இலங்கையிலுள்ள இளைஞர்களில் 52.8% பேர் இணையத்தைப் பயன்படுத்தி வரும் நிலையில், முதன்முதலில் இணையத்திற்குள் நுழையும் சராசரி வயது வெறும் 13 ஆகக் குறைந்துள்ளது.
இதைவிடப் பேரதிர்ச்சி என்னவென்றால், இணையத்தைப் பயன்படுத்தும் சிறுவர்களில் 46.3% பேர் முன்பின் தெரியாத அந்நியர்களுடன் தொடர்பில் உள்ளனர்; அவர்களில் 27% க்கும் அதிகமானோர் அந்த அந்நியர்களைப் பின்னொரு நாளில் நேரில் சந்திக்கவும் செல்கின்றனர். அத்துடன், இளம் பயனர்களில் 28% பேர் இணைய வன்முறைகளுக்கும், 27% பேர் சைபர்புல்லியிங் மற்றும் பிளாக்மெயில் அச்சுறுத்தல்களுக்கும் முகங்கொடுக்கின்றனர். ஐந்தில் ஒரு சிறுவர் தனது ஆபாசப் படங்கள் அல்லது அந்தரங்கத் தகவல்கள் இணையத்தில் பகிரப்பட்டு ‘செக்ஸ்டார்ஷன்’ வலையில் சிக்குகின்றனர். எனினும், சமூக அவப்பெயருக்குப் பயந்து இதில் பாதிக்கப்பட்ட 92% சிறுவர்கள் முறையிடுவதோ அல்லது சட்ட உதவியை நாடுவதோ இல்லை என்பது பெரும் சோகம்.
கடுமையான சட்ட எல்லைகள் இல்லாத காரணத்தால் பாலியல் துஷ்பிரயோகங்கள், போதைப்பொருள் விநியோகம், இணைய அடிமைத்தனம் மற்றும் இளம் உயிர்களைப் பறிக்கும் தற்கொலைகள் வரை நிலைமை மோசமடைந்துள்ளது. விளையாட்டு மைதானங்களை மறந்து போன்களையே தங்களின் உற்ற நண்பனாகக் கருதும் அளவுக்குப் பிள்ளைகளின் எதிர்காலம் முடங்கிப்போயுள்ளதாகவும், தங்கள் பிள்ளைகளின் சாதனப் பயன்பாட்டைக் கட்டுப்படுத்த முடியாமல் திணறும் பெற்றோர்களுக்கு இத்தகைய சட்டம் ஒரு பலமான அரணாக அமையும் எனவும் அவர் சுட்டிக்காட்டினார்.
“இந்தச் சட்டம் தாமதமாகும் ஒவ்வொரு நாளும் ஒரு பிள்ளை துஷ்பிரயோகத்திற்கு ஆளாகிறது, ஒரு பிள்ளையின் அந்தரங்கப் படம் இணையத்தில் வலம் வருகிறது” என எச்சரித்த ஜனாதிபதி சட்டத்தரணி பைசர் முஸ்தபா, சிறுவர்களின் எதிர்காலத்தைக் காப்பாற்ற நாடாளுமன்றத்தின் அனைத்துத் தரப்பினரும் வேறுபாடுகளைக் கடந்து இந்தச் சட்டத்தை அவசரமாக நிறைவேற்றக் கைகோர்க்க வேண்டும் என உருக்கமான வேண்டுகோள் விடுத்தார்.
