- சிசிடிவி அலர்ட் கொடுத்த பகீர்: கல்பிட்டியில் மின் கம்பங்களின் செப்புக் கம்பிகள் மாயம்!
- பட்டப்பகலில் அரங்கேறிய துணிகரம்: நுரைச்சோலை மின் விநியோகக் கம்பங்களில் கைவரிசை!
- ரூ. 1 லட்சத்துக்கும் அதிக செப்புக் கம்பிகள் கொள்ளை: கல்பிட்டியில் களமிறங்கிய பொலிஸார்!
ஜுட் சமந்த
நுரைச்சோலை மற்றும் அதனை அண்டிய பகுதிகளில் மின் விநியோகக் கட்டமைப்பையே கேள்விக்குறியாக்கும் வகையில், பட்டப்பகலில் திட்டமிட்டு அரங்கேற்றப்பட்ட பாரிய கம்பித் திருட்டுச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.
வழமை போல் தனது பணிகளை முன்னெடுத்துக் கொண்டிருந்த நுரைச்சோலை மின் பாவனையாளர் சேவை மத்திய நிலையத்தின் மின் அத்தியட்சகர் தெல்கே கணேஷ் நந்த துஷ்மந்த பீரிஸின் கையடக்கத் தொலைபேசிக்கு, கடந்த 21 ஆம் திகதி நண்பகல் 1.25 மணியளவில் திடீரென பாதுகாப்பு கெமரா (CCTV) எச்சரிக்கை சமிக்ஞைகள் வந்துள்ளன.
அந்தத் தொலைபேசித் திரையில் தெரிந்த அசாதாரண நகர்வுகள் அத்தியட்சகருக்குப் பெரும் சந்தேகத்தை ஏற்படுத்தவே, நிலைமையை ஆராய்வதற்காக அவர் உடனடியாகப் பாலாக்குடா மின் துணை நிலையம் மற்றும் அதனை அண்டிய பழைய துணை நிலையப் பகுதிக்கு விரைந்துள்ளார்.
அங்கு சென்று நேரில் பார்த்த அதிகாரிகளுக்குக் காத்திருந்தது பேரதிர்ச்சி. மின் துணை நிலையங்களுக்குட்பட்ட 8 மின்கம்பங்களில் பொருத்தப்பட்டிருந்த சுமார் 1,04,445 ரூபா பெறுமதியான செப்புக் கம்பிகள் அனைத்தும் துல்லியமாக வெட்டி அகற்றப்பட்டு, மர்மக் கும்பலால் அபேஸ் செய்யப்பட்டிருந்தமை இதன்போது உறுதியானது.
மின்சாரக் கம்பங்களை மட்டுமே குறிவைத்து, மிகவும் துணிகரமான முறையில் அரங்கேற்றப்பட்டுள்ள இந்தத் திருட்டின் பின்னணியில் உள்ள நபர்கள் யார் என்பது தொடர்பில் இதுவரை எவ்வித துப்பும் கிடைக்கவில்லை. எனினும், பாதுகாப்பு கெமரா பதிவுகளை அடிப்படையாகக் கொண்டு, களவாடலில் ஈடுபட்ட சந்தேகநபர்களைக் கைது செய்யும் விசேட நடவடிக்கைகளை பொலிஸார் தற்போது தீவிரப்படுத்தியுள்ளனர்.
