கிளிநொச்சி நகரப் பகுதியில் காலை 6:40 தொடக்கம் 7:30 மணி வரையும், அதேபோன்று பாடசாலை முடிவுறும் நேரம் 1.30 தொடக்கம் 2.00 மணி வரையும் கனரக வாகனங்கள் செலுத்த தடை விதிக்கப்பட்டுள்ளது.

பாடசாலை மாணவர்களின் நலன் கருதி, பாடசாலை மாணவர்களுக்கு போக்குவரத்து பாதிப்பு ஏற்படாத வகையில் இவ்வாறு மட்டுப்படுத்தப்பட்ட போக்குவரத்து நடவடிக்கை மேற்கொள்ள்ளப்பட்டுள்ளதாக கிளிநொச்சி போலீஸார் தெரிவித்துள்ளனர்.

கிளிநொச்சி போலீஸாரின் மனித நேய செயலாகவும், முன்னுதாரணமான நடவடிக்கையாகவும் இந்த அதிரடி முயற்சிக்கு பொதுமக்கள் நன்னாரி தெரிவித்துள்ளனர்.

நாட்டில் வீதி விபத்துக்கள் அதிகரித்துள்ள நிலையில், கிளிநோச்சி பாடசாலை மாணவர்களின் நலனில் அக்கறை கொண்டு, பாடசாலை நாட்களில் தடைசெய்யப்பட்ட பாடசாலை நேரங்களில் கனரக வாகனங்கள் கிளிநொச்சி நகர பகுதிகளுக்குல் அனுமதிக்கப்பட மாட்டாது என தெரிவிக்கப்பட்டுள்ளது.

இதேவேளை ளிநொச்சி நகர பகுதிகளுக்குல் கனரக வாகனங்கள் செலுத்த மட்டுப்படுத்தப்பட்ட நேரங்களில், குறித்த கனரக வாகனங்கள் வீதி ஓரங்களில் நிறுத்தி வைக்கப்பட்டுள்ளமை குறிப்பிடத்தக்கது.

செம்மணி சித்துப்பாத்தி இந்துமயானத்தில் இனங்காணப்பட்ட மனிதப்புதைகுழியின் அகழ்வுப் பணிகளில் இதுவரை மீட்கப்பட்டுள்ள தடயப்பொருட்கள் பொதுமக்களால் அடையாளப்படுத்தப்படுமாக இருந்தால், அவற்றை அடிப்படையாகக்கொண்டு உண்மைகளைக் கண்டறிவதற்கான விசாரணைகளைக் கோர முடியும் என பாராளுமன்ற உறுப்பினரும் இலங்கைத் தமிழ் அரசுக் கட்சியின் பாராளுமன்றக் குழுத் தலைவருமான சிவஞானம் சிறீதரன் தெரிவித்துள்ளார். 

இது தொடர்பில் யாழ்ப்பாணம் நீதிவான் நீதிமன்றினால் விடுக்கப்பட்டுள்ள கட்டளையை மேற்கொள் காட்டி கருத்து தெரிவிக்கும் போதே அவர் இந்த கோரிக்கையை விடுத்துள்ளார். 

செம்மணியில் மீட்கப்பட்ட என்புத்தொகுதிகளின் பின்னணியிலுள்ள இனப்படுகொலைச் சம்பவங்களை எண்பிப்பதற்கு, அங்கு நடைபெற்று வரும் அகழ்வுப் பணிகளில் மீட்கப்பட்ட தடயப்பொருட்கள் உரியவர்களின் உறவினர்களால் அடையாளம் காட்டப்பட வேண்டும். 

ஆகவே, தடயப்பொருட்களை இனங்காட்ட வேண்டியதன் அவசியம் உணர்ந்து, தங்களின் உறவுகளும் செம்மணியில் புதைக்கப்பட்டிருக்கலாம் என சந்தேகிக்கும் காணாமலாக்கப்பட்டவர்களின் உறவினர்கள், எதிர்வரும் 2025.08.05 ஆம் திகதி மாலை 1.30 மணி முதல் 5.00 மணிவரை யாழ்ப்பாணம் சித்துப்பாத்தி இந்துமயானத்தருகில் காட்சிப்படுத்தப்படும் தடயப்பொருட்களை அடையாளம் காட்ட வருகைதந்து, இனப்படுகொலைக்கான சர்வதேச விசாரணைக்கான கோரிக்கைக்கு வலுச்சேர்க்குமாறு பாராளுமன்ற உறுப்பினர் சிவஞானம் சிறீதரன் வலியுறுத்தியுள்ளார்.

தனது வீட்டு ஒழுங்கையில் நித்திரை கொண்டிருந்த மைத்துனரின் மீது கவனயீனம் காரணமாக டிப்பர் ரக வாகனம் ஒன்றினால் தவறுதலாக ஏற்றப்பட்ட நிலையில் உடல் நசுங்கி உயிரிழந்த சம்பவம் ஒன்று பதிவாகியுள்ளது.

நெடுங்கேணி பட்டிக்குடியிருப்பு இளம் குடும்பஸ்தர் ஒருவரே இவ்வாறு பலியாகியுள்ளதாக தெரிவிக்கப்பட்டுள்ளது.

வீடொன்றில் சல்லிக்கல்லினை பறித்துவிட்டு வாகனத்தை திருப்பி வந்துகொண்டிருந்த வேளை இரவு நேரமாகையால் குறித்த ஒழுங்கையில் தனது மைத்துனர் படுத்திருந்ததை அறிந்திருக்காத நிலையில் குறித்த இளைஞன் மீது டிப்பர் வாகனம் ஏறியே குறித்த விபத்து இடம்பெற்றுள்ளது.

02.08.2025 இன்று காலையிலே குறித்த இளைஞன் வாகனத்துள் நசுங்கி நிலையில் பரிதாபகரமாக உயிரிழந்துள்ளதை அறிந்து மைத்துனரான வாகனச்சாரதி நெடுங்கேணிப் பொலிசாரிடம் சரணடைந்துள்ளதாக அறிய முடிகிறது.

இச்சம்பவும் தொடர்பாக மேலதிக விசாரணைகளை நெடுங்கனி போலீசார் மேற்கொண்டு வருகின்றனர்

மட்டக்களப்பு, வெல்லாவெளி பொலிஸ் பிரிவுக்குட்பட்ட கூழாவடி நெல்லிக்காட்டில் இன்று அதிகாலை 1.30 மணியளவில் யானை தாக்கியதில் 4 பிள்ளைகளின் தந்தை ஒருவர் உயிரிழந்துள்ளார். 

நெல்லிக்காட்டு கிராமத்திற்குள் நேற்றிரவு புகுந்த யானை வீட்டின் முன்பகுதியில் வைத்து மாணிக்கம் இராமலிங்கம் என்பவரை தாக்கியுள்ளது. 

பின்னர் சம்பவ இடத்திற்கு அதிகாலை சென்ற போரதீவுப்பற்று பிரதேச சபையின் உப தவிசாளர் த.கயசீலன், படுகாயமடைந்தவரை வைத்தியசாலைக்கு கொண்டுசெல்லும் பணியை முன்னெடுத்திருந்தார். 

இதன்போது யானையின் தாக்குதல் காரணமாக படுகாயமடைந்தவரை களுவாஞ்சிகுடி ஆதார வைத்தியசாலைக்கு கொண்டுசெல்லப்பட்ட நிலையில் சிகிச்சைப் பலனின்றி உயிரிழந்துள்ளார். 

உயிரிழந்தவரின் சடலம் களுவாஞ்சிகுடி ஆதார வைத்தியசாலையில் வைக்கப்பட்டுள்ளதோடு, வெல்லாவெளி பொலிஸார் விசாரணைகளை முன்னெடுத்துள்ளனர்.

கேகாலை – அவிசாவளை வீதியின் தெஹியோவிட்ட, தெம்பிலியான பகுதியில் பேருந்து விபத்தொன்று இடம்பெற்றுள்ளது. 

குறித்த விபத்தானது இன்று (02) அதிகாலை ஏற்பட்டதாக பொலிஸார் தெரிவித்தனர். 

ஆடைத் தொழிற்சாலை ஊழியர்களை ஏற்றிச் சென்ற பேருந்து ஒன்று வீதியை விட்டு விலகி கவிழ்ந்து விபத்துக்குள்ளாகியுள்ளது. 

விபத்தின் போது பேருந்தில் 41 பேர் பயணித்துள்ளதாகவும், இவர்கள் அனைவரும் சிகிச்சைக்காக அவிசாவளை வைத்தியசாலையில் அனுமதிக்கப்பட்டுள்ளதாக பொலிஸார் தெரிவித்தனர். 

தெரணியகலையில் இருந்து அவிசாவளை கைத்தொழில் பேட்டைக்கு பயணித்த பேருந்து ஒன்றே இவ்வாறு விபத்துக்குள்ளானதாக தெரியவந்துள்ளது. 

விபத்துக்கான காரணம் குறித்து தெஹியோவிட்ட பொலிஸார் விசாரணைகளை மேற்கொண்டு வருகின்றனர்.

சமஸ்டிக்கோரிக்கையை முன்வைத்து வடக்கு கிழக்கு ஒருங்கிணைப்பு குழு முன்னெடுத்துள்ள 100 நாள் போராட்டம் கிளிநொச்சியில் இன்று ஆரம்பமானது.

வடக்கு கிழக்கு ஒருங்கிணைப்பு குழுவானது தொடர்ச்சியாக வடக்கு கிழக்கில் உள்ள தமிழ் மக்களுக்கான நிரந்தர அரசியல் தீர்வினை நோக்கிய பயணத்தினை பல்வேறு மட்டங்களில் முன்னெடுத்து வருகின்றது.

அதன் அடிப்படையில் கடந்த 2022 ஆம் ஆண்டு ஆவணி மாதம் 1ம் திகதி அடையாளப்படுத்தப்பட்ட 100 நாள் செயல்முனைவு என்ற அடிப்படையில் ஒருங்கிணைந்த வடக்கு கிழக்கு மாகாணத்திற்குள் மீளப்பெறமுடியாத சமஷ்டி முறையிலான அரசியல் தீர்வினை முன்வைத்து தொடர் கவனயீர்ப்பு போராட்டத்தினை முன்னெடுத்திருந்தது.

அதன் தொடர்ச்சியாக 2025 ஆம் ஆண்டு ஆவணி மாதம் முதலாம் திகதி இன்று தொடக்கம் கார்த்திகை மாதம் எட்டாம் திகதி வரை தொடர்ச்சியான 100 நாட்களும் சுழற்சி முறையில் வடக்கு கிழக்கு மாகாணங்களில் உள்ள 8 மாவட்டங்களிலும் கவனயீர்ப்பு போராட்டம் முன்னெடுக்கப்பட உள்ளது.

இதன் முதல் நாளான இன்று 01.08.2025 இன்று காலை 9.30 மணிக்கு கிளிநொச்சி மத்திய பேரூந்து நிலையத்திற்கு முன்பாக கவனயீர்ப்பு போராட்டம் முன்னெடுக்கப்பட்டமை குறிப்பிடத்தக்கது.

வெளிநாட்டு வேலை வாய்ப்புப் பணியகத்தின் 11 பிரிவுகள் புதிய இடத்திற்கு மாற்றப்பட்டுள்ளன.

மெஹெவர பியச கட்டடத் தொகுதியில் அமைக்கப்பட்டிருந்த வெளிநாட்டு வேலை வாய்ப்பு பணியகத்தின் சில பிரிவுகள் சிமந்த்ரா கட்டட வளாகத்திற்கு இடமாற்றம் செய்யும் உத்தியோகபூர்வ ஆரம்ப நிகழ்வு வெளிநாட்டு அலுவலகங்கள் மற்றும் வெளிநாட்டு வேலை வய்ப்பு பிரதி அமைச்சர் அருண் ஹெமசந்திரா தலைமையில் இன்று (01) இடம்பெற்றது.

அதன்படி 11 பிரிவுகள் தலைமை அலுவலகத்திற்கு அருகில் உள்ள பத்தரமுல்ல, கனஹேன, இல. 465 என்ற (சிமந்திரா கட்டடத்தில்) நிறுவப்பட்டது.

அவ்வாறே நிறுவப்பட்ட பிரிவுகள்;

1.நலன்புரிப் பிரிவு
2.ஒருங்கிணைப்புப பிரிவு
3.வெளிநாட்டு உறவுகள் II பிரிவு
4. வணிக சிக்கல்களை தீர்க்கும் பிரிவு
5.நிறுவன மற்றும் தொழில் பயிற்சிப் பிரிவு
6.ஆய்வு பிரிவு
7.சந்தைப்படுத்தல் பிரிவு
8.பிரதி பொது முகாமையாளர் (சமூக அபிவிருத்தி)
9.சிரேஷ்ட முகாமையாளர் (சமூக அபிவிருத்தி)
10.IM Japan பிரிவு

அதன்படி இன்று (01) முதல் மேற்படி பிரிவுகளின் சேவைகள் புதிய இடத்தில் பெற்றுக் கொள்வதற்கு புலம்பெயர் சமூகத்திற்கு வாய்ப்பளிக்கப்பட்டுள்ளதாக தெரிவிக்கப்பட்டுள்ளது.

மேலும் ஜப்பான், தென் கொரியா மற்றும் இஸ்ரேல் ஆகிய நாடுகளில் இலங்கையர்களுக்கு அதிக வேலைவாய்ப்புகளைப் பெறுவதற்கு ஜப்பான், தென் கொரியா மற்றும் இஸ்ரேல் ஏற்கனவே தேவையான நடவடிக்கைகளை எடுத்துள்ளதாக வெளியுறவு மற்றும் வெளிநாட்டு வேலைவாய்ப்புத் துறை பிரதி அமைச்சர் அருண் ஹேமச்சந்திரா தெரிவித்தார்.

புதிய அரசாங்கத்தின் நியமனத்துடன் அரசாங்கத்தின் பல்வேறு துறைகளில் அரசியல் தலையீடுகள் இல்லாததால், வளர்ந்த நாடுகள் இலங்கைத் தொழிலாளர்களுக்கு புதிய வேலைவாய்ப்பு வாய்ப்புகளைத் திறந்து வருவதாகவும் பிரதி அமைச்சர் தெரிவித்தார்.

ஒரு அரசாங்கமாக நாங்கள் ஜப்பான், தென் கொரியா மற்றும் இஸ்ரேலுடன் மட்டுமே வெளிநாட்டு வேலைகளை வழங்க தலையிடுகிறோம். புதிய வெளிநாட்டு வேலைவாய்ப்பு வாய்ப்புகளைப் பெறுவதற்காக இந்த மூன்று நாடுகளுடன் தற்போது பேச்சுவார்த்தைகள் நடந்து வருகின்றன. ஜப்பானில் இருந்து பல சிறப்பு பிரதிநிதிகள் கடந்த சில நாட்களில் எங்களுடன் கலந்துரையாடினர் எனவும் அவர் மேலும் தெரிவித்தார்.

இலங்கையிலிருந்து இறக்குமதி செய்யப்படும் பொருட்களுக்கு விதிக்கப்பட்ட பரஸ்பர வரி விகிதத்தை 30 சதவீதத்திலிருந்து 20 சதவீதமாகக் அமெரிக்கா குறைத்துள்ளது. 

இந்த புதிய கட்டண விகிதங்கள் ஓகஸ்ட் மாதம் 7 ஆம் திகதி முதல் அமுலுக்கு வரும் என்று வெள்ளை மாளிகை அறிவித்துள்ளது. 

இது தொடர்பான விடயங்களை விளக்கி, நிதி அமைச்சின் செயலாளர் கலாநிதி ஹர்ஷன சூரியப்பெரும கூறுகையில், 

“இந்த சவால்களுடன், புதிய வாய்ப்புகளும் உருவாகியுள்ளன. இரு நாடுகளும்… எதிர்காலத்தில் இதன் மூலம் நமக்குத் தேவையான பலன்களைப் பெறப் போகின்றன என்பதை இது காட்டுகிறது. நாடாக இதை ஒரு சிறந்த வெற்றியாக நாங்கள் பார்க்கிறோம். இந்த கலந்துரையாடங்களை தொடர நாங்கள் எதிர்பார்க்கிறோம்” என்றார். 

இதற்கிடையில், அமெரிக்காவால் நாட்டின் மீது விதிக்கப்பட்ட வரி விகிதத்தை 20% ஆகக் குறைப்பது குறித்து மகிழ்ச்சியைத் தெரிவித்து எதிர்க்கட்சித் தலைவர் சஜித் பிரேமதாச, X கணக்கில் குறிப்பு ஒன்றை இட்டுள்ளார்.

இந்தியா மீது 25% வரி விதிக்கப்பட்டுள்ள நிலையில், இலங்கை, பங்களாதேஷ் மற்றும் வியட்நாம் மீதும் இதேபோன்ற 20% வரி விதிக்கப்பட்டுள்ளதாக அவர் கூறுகிறார். 

நமது ஏற்றுமதியாளர்களுக்கு உண்மையான நன்மையை வழங்க, அந்த விகிதத்தை 15% ஆகக் குறைக்க அமெரிக்காவுடன் மேலும் பேச்சுவார்த்தைகளில் ஈடுபட வேண்டும் என்றும் எதிர்க்கட்சித் தலைவர் வலியுறுத்துகிறார்.

புத்தளம் மாவட்டத்தின் அரச மற்றும் தனியார் போக்குவரத்து, வீதி மறுசீரமைப்பு, ரயில் கடவை மற்றும் ரயில் போக்குவரத்து தொடர்பான குறைபாடுகள் பற்றிய விஷேட கலந்துரையாடல் இன்று புத்தளம் பிரதேச செயலக கேட்போர்கூடத்தில் இடம்பெற்றது.

குறித்த விஷேட சந்திப்பில் போக்குவரத்து, நெடுஞ்சாலைகள், துறைமுகங்கள் மற்றும் சிவில் விமானப் போக்குவரத்து அமைச்சரும் நாடாளுமன்ற அவைத் தலைவருமான பிமல் ரத்நாயக்க கலந்துகொண்டார்.

இதில் புத்தளம் மாவட்டத்தில் உள்ள மூன்று பஸ் டிப்போக்கள் தொடர்பாகவும், அவற்றின் செயற்பாடுகள் தொடர்பாகவும் அதிக கவனம் செலுத்தப்பட்டது.

புத்தளம் பஸ் டிப்போவுக்கு சொந்தமாக 63 பஸ்கள் இருந்தபோதிலும், அவற்றில் 48 பஸ்களே இயங்கும் நிலையில் இருப்பதாக புத்தளம் டிப்போ தலைவர் சுட்டிக்காட்டியதுடன், மேலதிகமாக 5 புதிய பஸ்கள் தேவைப்படுவதாகவும் தெரிவித்தார்.

இதேவேளை புத்தளம் தொடக்கம் அட்டவில்லு, மயிலங்குளம், மகாகும்புக்கடவல, இஹலபுளியங்குளம மற்றும் இங்கினிமிட்டியாவ பகுதிகளுக்கும் புதிதாக பஸ் சேவை இடம்பெறவேண்டும் என்று வலியுறுத்தப்பட்டது.

மேலும் புத்தளம் டிப்போவில் உள்ள கட்டிடங்கள் சுமார் 100 வருடங்கள் பழமையானவையும் எனவும், அவைகள் மீள் புனர்நிர்மாணம் செய்யப்படவேண்டும் எனவும் வேண்டுகோள் விடுக்கப்பட்டது.

இதற்கு பதிலளித்த போக்குவரத்து, நெடுஞ்சாலைகள், துறைமுகங்கள் மற்றும் சிவில் விமானப் போக்குவரத்து அமைச்சர் பிமல் ரத்நாயக்க,

புத்தளம் டிப்போ குறித்த குறைபாடுகள் தொடர்பிலும், அதன் முகாமைத்துவம் தொடர்பிலும் தனது அதிருப்தியை வெளிப்படுத்தினார்.

பஸ் கொள்வனவு தொடக்கம், சேதமடைந்த இலங்கை போக்குவரத்து பஸ்களை திருத்துதல் அனைத்துமே மக்களின் வரிப்பணத்தில் இடம்பெறுவதாகவும், மக்களுக்கு நியாமான சேவைகள் இடம்பெறவேண்டும் எனவும் அவர் தெளிவுபடுத்தினார்.

மேலும் சேவையில் உள்ள அனைத்து பஸ்களுக்கும் GPS இணைப்பை உடனடியாக பொருத்தும் நடவடிக்கையை ஆரம்பிக்குமாறும் வேண்டுகோள் விடுத்தார்.

கொழும்பு தொடக்கம் புத்தளம் வரையான நெடுஞ்சாலையில் காணப்படும் குறைபாடுகளை இனம்காண நடவடிக்கை எடுக்கப்பட்டதுடன், பாதுகாப்பற்ற பாதைகள் மற்றும் ரயில் கடவைகள் தொடர்பிலும் ஆராயப்பட்டது.

பாதை திருத்தப்பணி மற்றும் பாலங்கள் புனரமைப்பிற்காக சுமார் 250 மில்லியன் ஒதுக்கப்பட்டுள்ளதாகவும் அமைச்சர் பிமல் ரத்நாயக்க இதன்போது தெரிவித்தார்.

குறித்த நிகழ்வில், புத்தளம் மாவட்ட பாராளுமன்ற உறுப்பினர்கள், மாவட்ட அரசாங்க அதிபர், திணைக்கள தலைவர்கள் மற்றும் பணிப்பாளர்கள், உள்ளூராட்சி மன்ற தலைவர்கள், பொலிஸ் உயரதிகாரிகள் என பலரும் கலந்துகொண்டமை குறிப்பிடத்தக்கது.