உயிர்காக்கும் மருத்துவ சேவைக்கு வலுவூட்டும் உதவி: மன்னார் பொது வைத்தியசாலைக்கு 2 புதிய டயாலிசிஸ் இயந்திரங்கள் கையளிப்பு!

மன்னார்: மன்னார் மற்றும் அதனைச் சுற்றியுள்ள கிராமப்புறப் பிரதேசங்களில் சிறுநீரக நோயினால் பாதிக்கப்பட்டு, டயாலிசிஸ் (சிறுநீரக சுத்திகரிப்பு) சிகிச்சைக்காகக் காத்திருக்கும் நோயாளர்களின் வாழ்வில் புதியதோர் நம்பிக்கையை ஏற்படுத்தும் வகையில் ஒரு உன்னத மனிதாபிமான உதவி கிடைத்துள்ளது.

மன்னார் மாவட்ட பொது வைத்தியசாலையின் சிறுநீரக சிகிச்சை சேவைகளை மேலும் நவீனமயப்படுத்தி, அதன் கொள்ளளவை விரிவாக்கும் நோக்கில், பிரபல மனிதாபிமான அமைப்பான ISRC Sri Lanka நிறுவனம், 4.2 மில்லியன் பெறுமதியான இரண்டு (8.4 மில்லியன் மொத்தம்) அதிநவீன டயாலிசிஸ் இயந்திரங்களை அண்மையில் உத்தியோகபூர்வமாகக் கையளித்துள்ளது.

சிறுநீரக செயலிழப்பு உள்ளிட்ட கடுமையான உடல்நலப் பிரச்சினைகளால் டயாலிசிஸ் சிகிச்சையை தொடர்ந்து பெற வேண்டிய நோயாளிகளுக்கு, சிகிச்சை அணுகலை விரிவுபடுத்துவதிலும் காத்திருப்பு நேரத்தை குறைப்பதிலும் இந்த புதிய இயந்திரங்கள் பெரும் பங்களிப்பை வழங்கும் என எதிர்பார்க்கப்படுகிறது.

அரச சுகாதார அமைப்புகளின் சேவைத் திறனை மேம்படுத்தும் இத்தகைய மனிதாபிமான தலையீடுகள், தேவையடிப்படையிலான மற்றும் சமத்துவமான சுகாதார சேவைகளை மக்களிடம் கொண்டு சேர்க்கும் முக்கியமான கூட்டாண்மை முயற்சிகளாகக் கருதப்படுகின்றன.

தேசிய சுகாதார சேவைகளுக்கு துணைநிற்கும் நிலையான, பொறுப்பான மற்றும் மரியாதைக்குரிய மனிதாபிமான செயற்பாடுகளை தொடர்ந்து முன்னெடுக்கத் தாங்கள் உறுதிபூண்டுள்ளதாக ISRC Sri Lanka நிறுவனம் மீண்டும் வலியுறுத்தியுள்ளது.

உயிர் காக்கும் சிகிச்சைக்காக போராடும் நோயாளிகளின் வாழ்க்கையில் நம்பிக்கையின் ஒளிக்கீற்றாக அமைந்துள்ள இந்த உதவி, சமூகப் பொறுப்புணர்வும் மனிதநேயமும் இணையும் போது சுகாதாரத் துறையில் ஏற்படக்கூடிய நேர்மறை மாற்றங்களுக்கு சிறந்த எடுத்துக்காட்டாகப் பார்க்கப்படுகிறது.

நோயாளர்களின் சுமையைக் குறைக்கும் உன்னத தலையீடு

சிறுநீரக நோயாளர்களுக்கு டயாலிசிஸ் என்பது வெறுமனே ஒரு சிகிச்சை மட்டுமல்ல, அது அவர்களின் வாழ்நாளை நீடிக்கும் ஒரு உயிர்காக்கும் உன்னத சேவையாகும். இந்த விசேட சுகாதார தலையீட்டின் மூலம் பல நன்மைகள் மக்களுக்குக் கிடைக்கவுள்ளன:

• சிகிச்சைக்கான அணுகல் விரிவாக்கம்: புதிய இயந்திரங்களின் வருகையால், டயாலிசிஸ் சிகிச்சை தேவைப்படும் அதிகளவான நோயாளர்களுக்கு ஒரே நேரத்தில் தடையின்றிச் சேவை வழங்க முடியும்.
• உயிர்காக்கும் மருத்துவத்தின் தொடர்ச்சி: அவசர மற்றும் அத்தியாவசிய டயாலிசிஸ் தேவைகளுடைய நோயாளர்களின் சிகிச்சைத் தொடர்ச்சி இதன் மூலம் முழுமையாக உறுதிப்படுத்தப்படும்.
• பிராந்திய மக்களின் சுமை குறைப்பு: தூர இடங்களுக்குச் சென்று அலைந்து திரிந்து சிகிச்சை பெற வேண்டிய கட்டாயத்தில் இருந்த மன்னார் மாவட்ட மக்களுக்கு, இந்த உதவி தங்களது சொந்த மண்ணிலேயே தரமான சிகிச்சையைப் பெற்றுக்கொள்ளும் பெரும் நிவாரணத்தை வழங்கியுள்ளது.

“அரச சுகாதார கட்டமைப்பின் சேவைத் திறனை வலுப்படுத்துவதும், தேவையுடைய மக்களுக்குச் சமத்துவமான மருத்துவ சேவைகள் சென்றடைவதை உறுதி செய்வதும் எமது முதன்மைக் குறிக்கோளாகும். தேசிய சுகாதாரத் துறைக்குத் தேவையான இத்தகைய நிலையான மற்றும் மரியாதைக்குரிய மனிதாபிமான உதவிகளை வழங்க ஐ.எஸ்.ஆர்.சி (ISRC) என்றும் தயாராகவே உள்ளது.” — ISRC Sri Lanka நிர்வாகம்

இந்த உதவி வழங்கும் நிகழ்வில், ISRC Sri Lanka நிறுவனத்தின் தலைமை நிர்வாக அதிகாரி திரு. அஹமட் செய்யாஃப், மன்னார் பிராந்திய சுகாதார சேவைகள் பணிப்பாளரும் மன்னார் மாவட்ட பொது வைத்தியசாலையின் பணிப்பாளருமான டாக்டர் ஆஸாத், டயாலிசிஸ் பிரிவு பொறுப்பாளர் டாக்டர் அன்டன் சிசில் மற்றும் டாக்டர் நைரூஸ் உள்ளிட்ட முக்கிய அதிகாரிகள் மற்றும் மருத்துவ நிபுணர்கள் கலந்துகொண்டு சிறப்பித்தனர்:

அரச சுகாதார அமைப்புகளுடன் தனியார் மனிதாபிமான அமைப்புகள் கைகோர்த்து, இத்தகைய பாரிய திட்டங்களை முன்னெடுப்பதன் மூலம் பின்தங்கிய பிரதேசங்களின் மருத்துவத் தேவைகளை மிக எளிதாக நிவர்த்தி செய்ய முடியும் என்பதற்கு இந்த உதவி ஒரு சிறந்த எடுத்துக்காட்டாகும். தேவையடிப்படையிலான, தரமான மற்றும் சமத்துவமான சுகாதார சேவைகளை மக்களுக்கு வழங்குவதற்கான கூட்டு முயற்சியின் ஒரு அங்கமாகவே இந்த டயாலிசிஸ் இயந்திரங்கள் வழங்கப்பட்டுள்ளன.

தேசிய சுகாதார சேவைகளுக்குப் பக்கபலமாக நின்று, மக்களின் ஆரோக்கியத்தை மேம்படுத்தும் இத்தகைய நிலையான மனிதாபிமானத் தலையீடுகளைத் தொடர்ந்து நாடளாவிய ரீதியில் முன்னெடுக்கவுள்ளதாக ISRC Sri Lanka தனது உறுதியை இந்நாளில் மீண்டும் பறைசாற்றியுள்ளது.

கிளிநொச்சி மாவட்டத்தில் தனியார் தொழிலகமொன்றில் பணியாற்றிக் கொண்டிருந்த 23 வயதுடைய இளைஞர் ஒருவர் மின்சாரம் தாக்கி உயிரிழந்த சம்பவம் பெரும் சோகத்தை ஏற்படுத்தியுள்ளது.

தருமபுரம் பொலிஸ் பிரிவுக்குட்பட்ட புன்னைநீராவி நாதன் குடியிருப்பு பகுதியில் அமைந்துள்ள தனியார் தொழிலகத்தில் இன்று (09) காலை இந்த துயரச் சம்பவம் இடம்பெற்றுள்ளது.

சம்பவத்தில் கிளிநொச்சி நகரைச் சேர்ந்த சிவகுருநாதன் சாரங்கன் (23) என்ற இளைஞரே உயிரிழந்துள்ளார். வழமையான தொழில் நடவடிக்கைகளில் ஈடுபட்டிருந்த வேளையில், எதிர்பாராத விதமாக மின்சாரம் தாக்கியதாக ஆரம்பக்கட்ட விசாரணைகளில் தெரியவந்துள்ளது.

மின்சாரம் தாக்கிய நிலையில் படுகாயமடைந்த இளைஞர் மீட்கப்பட்ட போதிலும், அவர் ஏற்கனவே உயிரிழந்திருந்ததாகத் தெரிவிக்கப்படுகிறது.

உயிரிழந்த இளைஞரின் சடலம் முதற்கட்ட நடவடிக்கைகளுக்காக தருமபுரம் வைத்தியசாலைக்கு கொண்டு செல்லப்பட்டதுடன், பிரேத பரிசோதனை மேற்கொள்வதற்காக கிளிநொச்சி மாவட்ட பொது வைத்தியசாலைக்கு மாற்றப்பட்டுள்ளது.

இந்நிலையில், சம்பவம் தொடர்பான மேலதிக விசாரணைகளை தருமபுரம் பொலிஸார் முன்னெடுத்து வருகின்றனர்.

இளம் வயதில் குடும்பத்தின் நம்பிக்கையாக விளங்கிய ஒருவரின் திடீர் மரணம், உறவினர்கள் மற்றும் பிரதேச மக்களிடையே பெரும் துயரத்தையும் அதிர்ச்சியையும் ஏற்படுத்தியுள்ளது. தொழிலிடங்களில் மின்சார பாதுகாப்பு நடைமுறைகள் கடுமையாகப் பின்பற்றப்பட வேண்டியதன் அவசியத்தை மீண்டும் ஒருமுறை இந்த சம்பவம் நினைவூட்டுகிறது.

ஜூட் சமந்த

முந்திரி தோட்டத்திற்குள் நுழைந்த நபருக்கு துப்பாக்கிச்சூடு – உயிரிழப்பு; 8 பேர் கைது

எயார் ரைஃபிள் (Air Rifle) மூலம் துப்பாக்கிச்சூடு நடத்தி ஒருவரை கொலை செய்த சம்பவம் தொடர்பாக எட்டு பேரை கைது செய்துள்ளதாக வனாத்தவில்லு பொலிஸார் தெரிவித்துள்ளனர்.

இந்த திடுக்கிடும் துயரச் சம்பவம் இன்று (09) அதிகாலை சுமார் 1.30 மணியளவில் வனாத்தவில்லு – கரைத்தீவு பகுதியில் இடம்பெற்றுள்ளது.

சம்பவத்தில் உயிரிழந்தவர் அத்துக்கோரளகே பிரதீப் சுசந்த என அடையாளம் காணப்பட்டுள்ள 38 வயதுடைய நபராவார்.

தகவலின்படி, சிலாபம் பெருந்தோட்ட நிறுவனத்திற்குச் சொந்தமான கரைத்தீவு பகுதியில் அமைந்துள்ள சுமார் 50 ஏக்கர் பரப்பளவுடைய முந்திரி தோட்டம், கற்பிட்டி பகுதியைச் சேர்ந்த ஒருவரால் முந்திரி அறுவடை செய்வதற்காக குத்தகை அடிப்படையில் பெற்றுக்கொள்ளப்பட்டிருந்தது.

அந்த முந்திரி தோட்டத்தை பாதுகாக்க குத்தகையாளர் தனிப்பட்ட பாதுகாப்பு காவலர்களை நியமித்திருந்ததாகவும் தெரிவிக்கப்படுகிறது.

இந்நிலையில், இன்று அதிகாலை குறித்த முந்திரி தோட்டத்திற்குள் இரகசியமாக நுழைந்ததாகக் கூறப்படும் நபர் ஒருவரை சந்தேகத்தின் பேரில் காவலில் இருந்த பாதுகாப்பு பணியாளர் ஒருவர் எயார் ரைஃபிள் மூலம் சுட்டதாக ஆரம்பகட்ட விசாரணைகளில் தெரியவந்துள்ளது.

கடுமையாக காயமடைந்த குறித்த நபர் உடனடியாக புத்தளம் ஆதார வைத்தியசாலையில் அனுமதிக்கப்பட்ட போதிலும், சிகிச்சை பலனின்றி உயிரிழந்துள்ளார்.

இந்த கொலைச் சம்பவம் தொடர்பாக இதுவரை எட்டு சந்தேகநபர்கள் கைது செய்யப்பட்டுள்ளதாகவும், சம்பவம் குறித்த நீதிமன்ற விசாரணை முன்னெடுக்கப்படவுள்ளதாகவும் பொலிஸார் தெரிவித்துள்ளனர்.

சட்டத்தை தமது கைகளில் எடுக்கும் செயற்பாடுகள் மீண்டும் சமூகத்தில் கேள்விக்குறிகளை எழுப்பியுள்ள நிலையில், முந்திரி தோட்டப் பாதுகாப்பு நடவடிக்கைகள் எவ்வாறு உயிர்ப்பலி வரை சென்றது என்பது தொடர்பில் வனாத்தவில்லு பொலிஸார் தீவிர விசாரணைகளை மேற்கொண்டு வருகின்றமை குறிப்பிடத்தக்கது.

“உள்ளூரில் வாங்கினால் 18% வரி… இறக்குமதிக்கு பூஜ்ஜியம்!” – உள்ளூர் தொழில்களை நசுக்கும் வரி கொள்கையா? நாடாளுமன்றத்தில் ஹர்ஷ டி சில்வாவின் அதிரடி வெளிப்பாடு

இலங்கையில் உள்ளூர் தொழில்துறையைப் பாதுகாக்க வேண்டிய பொருளாதாரக் கொள்கைகளே, இன்று அந்தத் துறையின் கழுத்தை நெரிக்கும் ஆயுதங்களாக மாறியுள்ளனவா? என்ற கேள்வி நாடாளுமன்றத்தில் சூடுபிடித்த விவாதமாக வெடித்துள்ளது.

உள்ளூர் உற்பத்தியாளர்கள் எதிர்கொள்ளும் வரிச் சுமைகள், மின்சாரக் கட்டண உயர்வுகள் மற்றும் ஏற்றுமதித் துறையில் உருவாகியுள்ள போட்டி இழப்பு குறித்து நாடாளுமன்ற உறுப்பினர் ஹர்ஷ டி சில்வா இன்று பாராளுமன்றத்தில் முன்வைத்த கருத்துக்கள் பெரும் கவனத்தை ஈர்த்துள்ளன.

SVAT (Simplified Value Added Tax) முறையின் நீக்கத்தால் ஏற்பட்டிருக்கும் பாதிப்பு தொடர்பான அவரது உரை மிகுந்த அதிர்வலைகளை ஏற்படுத்தியுள்ளது.

“வெளிநாட்டிலிருந்து பொருள் இறக்குமதி செய்தால் வரி இல்லை. ஆனால் அதே பொருளை இலங்கையின் உள்ளூர் உற்பத்தியாளரிடமிருந்து வாங்கினால் 18 சதவீத VAT செலுத்த வேண்டும். அப்படியானால் யார் உள்ளூர் பொருட்களை வாங்க முன்வருவார்கள்?” என அவர் நேரடியாகக் சபையில் அதிரடி கேள்வி எழுப்பினார்.

ஒரு இலட்சம் ரூபாய் பெறுமதியான மூலப்பொருளை வெளிநாட்டிலிருந்து இறக்குமதி செய்தால் கூடுதல் வரிச் சுமை ஏதுமில்லை. ஆனால் அதே பெறுமதியிலான பொருளை நாட்டின் உள்ளூர் தொழில்முனைவோரிடமிருந்து வாங்கினால் 18 ஆயிரம் ரூபாய் மேலதிக வரி செலுத்த வேண்டிய நிலை உருவாகியுள்ளதாக அவர் கடுமையாக சுட்டிக்காட்டினார்.

இதன் விளைவாக, உள்ளூர் விநியோகச் சங்கிலி முற்றாக பாதிக்கப்படுவதோடு, சிறு மற்றும் நடுத்தர தொழில்கள் தங்களது சந்தையையே இழக்கும் அபாயத்திற்கு தள்ளப்பட்டுள்ளதாக அவர் எச்சரித்தார்.

மேலும், இந்தியா, பங்களாதேஷ் மற்றும் இந்தோனேசியா போன்ற நாடுகள் தங்களது உள்ளூர் உற்பத்தியாளர்களை பாதுகாக்க “Deemed Exports” எனப்படும் சிறப்பு வரிச் சலுகை முறையை நடைமுறைப்படுத்தி வருகின்றன என்றும் அவர் குறிப்பிட்டார்.

ஏற்றுமதிக்குத் தேவையான பொதியிடல் பொருட்கள், துணிகள், ஒட்டுப் பொருட்கள் உள்ளிட்டவற்றை வழங்கும் உள்ளூர் நிறுவனங்களுக்கு அந்த நாடுகள் ஊக்கத்தொகை மற்றும் வரிச்சலுகைகளை வழங்கும் நிலையில், இலங்கையில் அவ்வாறான சலுகைகள் நீக்கப்பட்டிருப்பது கவலைக்குரியது எனவும் மேலும் தெரிவித்தார்.

தொடர்ந்து உரையாற்றிய ஹர்ஷ டீ சில்வா;

அதிகரித்து வரும் மின்சாரக் கட்டணங்களும் உள்ளூர் உற்பத்தியாளர்களின் சுமையை பலமடங்கு அதிகரித்துள்ள

சர்வதேச சந்தையில் போட்டியிட வேண்டிய இலங்கை உற்பத்தியாளர்கள், உற்பத்திச் செலவு அதிகரிப்பால் பின்னடைவைச் சந்தித்து வருகிறார்கள். மின்சார உற்பத்தியில் குறைந்த செலவிலான மாற்று வழிமுறைகளைப் பயன்படுத்தத் தவறியதன் விளைவாக தொழில்துறையே நெருக்கடியில் சிக்கியுள்ளது.

இந்த நிலையில், அரசாங்கம் உடனடியாக வரிக் கொள்கைகளை மறுபரிசீலனை செய்ய வேண்டும், SVAT முறையில் இருந்த குறைபாடுகளைத் திருத்தி மீளமைக்க வேண்டும், மேலும் மின்சாரக் கட்டணத்தைக் குறைக்கும் தீர்வுகளை அவசரமாக நடைமுறைப்படுத்த வேண்டும்.

“நாட்டுக்குத் தேவையான டொலர்களை ஈட்ட வேண்டுமெனில், முதலில் உள்ளூர் உற்பத்தியாளர்களை வாழ வைக்க வேண்டும். உலகச் சந்தையை நோக்கிச் செல்ல வேண்டுமானால், நம் தொழில்துறைக்கு உயிர் கொடுக்க வேண்டியது அவசியம்,” என ஹர்ஷ டி சில்வா வலியுறுத்தினார்.

உள்ளூர் தொழில்துறையைப் பாதுகாப்பதா? அல்லது இறக்குமதிக்கு முன்னுரிமை அளிக்கும் தற்போதைய கொள்கைகளைத் தொடர்வதா? என்ற முக்கியமான தீர்மானத்தின் முன் அரசாங்கம் நிற்கும் நிலையில், இந்த விவாதம் நாட்டின் பொருளாதார எதிர்காலம் குறித்த புதிய கேள்விகளை எழுப்பியுள்ளது.

இலங்கை 18 வயதுக்கு உட்பட்ட பாடசாலைகளுக்கு இடையிலான தேசிய சம்பியன்சிப் கால்பந்து தொடரின் இறுதிப் போட்டியில் கொழும்பு சாஹிரா கல்லூரியை பெனால்டி சூட் அவுட் முறையில் வீழ்த்திய ஹமீட் அல் ஹுஸைனி கல்லூரி கிண்ணத்தை சுவீகரித்தது.

கொழும்பு, சுகததாச அரங்கில் நேற்று முன்தினம் (07) நடைபெற்ற ஆட்டத்தில் இரு அணிகளுக்கும் இடையே கடும் போட்டி நிலவியது. எனினும் முதல் பாதி கோலின்றி முடிவுற்றது. இதனால் இரண்டாவது பாதியில் பரபரப்பு மேலும் அதிகரித்தது. இந்நிலையில் போட்டியின் 68 ஆவது நிமிடத்தில் சாஹிரா அணிக்காக ஹதீம் அஹமட் தலையால் அபார அடித்து கோல் ஒன்றை புகுத்தினார்.

எவ்வாறாயினும் போட்டியின் இரண்டாவது பாதியின் மேலதிக நேரத்தில் வைத்து ஹமீட் அல் ஹுஸைனி பதிலுக்கு கோல் ஒன்றை அடித்து ஆட்டத்தை திசைதிருப்பியது. உயரவந்த பந்தை எம்.என்.எம். ரிஷாட் தலையால் முட்டி கோலாக மாற்றினார். இதனால் முழு நேர முடிவின்போது போட்டி 1–1 என சமநிலை பெற்றது. போட்டியின் முடிவைத் தீர்மானிக்க பெனால்டி ஷூட் அவுட் முறை பயன்படுத்தப்பட்டதோடு அதில் சாஹிரா முதல் மூன்று முயற்சிகளிலும் கோல் பெறத் தவறிய நிலையில் ஹமீட் அல் ஹுஸைனி முதலாவது மற்றும் நான்காவது முயற்சிகளில் கோல் புகுத்தியது. இறுதியில் ஹமீட் அல் ஹுஸைனி 2–1 என பெனால்டி சூட் அவுட் முறையை வென்று சம்பியன் பட்டத்தையும் கைப்பற்றியது.

முன்னதாக ஹமீட் அல் ஹுஸைனி அரையிறுதியில் கேட்வே கல்லூரியை 1–0 என்ற கோல் கணக்கில் வீழ்த்தியே இறுதிப் போட்டிக்கு முன்னேறியதோடு சாஹிரா தனது அரையிறுதியில் புனித ஹென்றி கல்லூரியை 4–0 என்ற கோல் கணக்கில் அபார வெற்றிபெற்று இறுதிப்போட்டிக்கு முன்னேறி இருந்தமை குறிப்பிடத்தக்கது.

நாட்டின் சில பகுதிகளில் இன்றும் மழை பெய்யக்கூடும் என வளிமண்டலவியல் திணைக்களம் எதிர்வு கூறியுள்ளது.

அதன்படி, மேல், சபரகமுவ மற்றும் வடமேல் மாகாணங்களிலும் காலி, மாத்தறை, கண்டி மற்றும் நுவரெலியா ஆகிய மாவட்டங்களிலும் அவ்வப்போது மழை அல்லது இடியுடன் கூடிய மழை பெய்யக்கூடும் என, எதிர்வு கூறப்பட்டுள்ளது.

இதனிடையே, மத்திய மலைநாட்டின் மேற்கு சரிவுகள், வடக்கு மற்றும் வடமத்திய மாகாணங்களிலும் ஹம்பாந்தோட்டை மற்றும் திருகோணமலை மாவட்டங்களிலும் அவ்வப்போது, மணித்தியாலத்துக்கு 40 முதல் 50 கிலோ மீற்றர் வேகத்தில் காற்று வீசக்கூடும் என, எதிர்வு கூறப்பட்டுள்ளது.

அத்துடன், காங்கேசன்துறையிலிருந்து மன்னார் ஊடாக கற்பிட்டி வரையான கடற்பிராந்தியங்களில் காற்றின் வேகமானது அவ்வப்போது மணித்தியாலத்திற்கு 60 முதல் 70 கிலோமீற்றர் வரை அதிகரித்து வீசக்கூடும் என வளிமண்டலவியல் திணைக்களம் எதிர்வு கூறியுள்ளது.

எனவே, மறு அறிவித்தல் வரை குறித்த கடல் பிராந்தியங்களுக்குள் கடற்றொழில் நடவடிக்கைகளில் ஈடுபட வேண்டாம் என கடற்றொழிலாளர்களுக்கு எச்சரிக்கை விடுக்கப்பட்டுள்ளது.

“அரசு சட்டங்களை குவிக்கிறது; ஆனால் தாக்கமுள்ள சட்டங்கள் எங்கே?” – அரசை சவாலுக்கு உட்படுத்திய ஐ.தே.க.

கொழும்பு, ஜூன் 8 – முன்னாள் ஜனாதிபதி மைத்திரிபால சிறிசேன தலைமையிலான அரசாங்கத்தின் முதல் 18 மாத காலத்தில் நிறைவேற்றப்பட்ட சட்டங்களையும், தற்போதைய ஜனாதிபதி அனுர குமார திசாநாயக்க தலைமையிலான அரசாங்கத்தின் முதல் 18 மாத சட்டமன்ற செயல்பாடுகளையும் ஒப்பிட்டு வெளியிடப்பட்டுள்ள ஆய்வறிக்கையின் துல்லியம் குறித்து ஐக்கிய தேசியக் கட்சி (ஐ.தே.க.) கடுமையான கேள்விகளை எழுப்பியுள்ளது.

உள்ளூர் கொள்கை ஆய்வு நிறுவனமொன்று வெளியிட்ட அறிக்கையில், தற்போதைய அரசாங்கம் அதிகளவிலான சட்டங்களை நிறைவேற்றியதாகக் கூறப்பட்டிருந்தது. எனினும், “எண்ணிக்கையை மட்டுமே அடிப்படையாகக் கொண்டு அரசின் செயல்திறனை மதிப்பிட முடியாது; சட்டங்களின் தரமும் மக்களுக்கான தாக்கமும் முக்கியம்” என ஐ.தே.க. வலியுறுத்தியுள்ளது.

கட்சி வெளியிட்டுள்ள அறிக்கையில், நல்லாட்சிக் கால அரசாங்கத்தின் முதல் 18 மாதங்களில் நாட்டின் ஜனநாயகம், நல்லாட்சி, பொதுமக்கள் நலன் மற்றும் சட்ட ஆட்சி ஆகியவற்றை வலுப்படுத்திய பல முக்கியமான சட்டங்கள் நிறைவேற்றப்பட்டதாக சுட்டிக்காட்டப்பட்டுள்ளது.

அவற்றில் முக்கியமாக 19ஆவது அரசியலமைப்பு திருத்தம் குறிப்பிடப்பட்டுள்ளது. ஜனாதிபதியின் அதிகாரங்களை கட்டுப்படுத்தி நாடாளுமன்றத்தின் பங்கினை வலுப்படுத்திய இந்த திருத்தம், அந்நேர தேர்தல் வாக்குறுதிகளில் ஒன்றாகவும் இருந்தது.

மேலும், பொதுமக்கள் பயன்படுத்தும் மருந்துகளின் தரம், பாதுகாப்பு மற்றும் விலைகுறைவை உறுதிப்படுத்தும் வகையில் தேசிய மருந்துகள் ஒழுங்குமுறை அதிகாரசபைச் சட்டம் கொண்டு வரப்பட்டதாகவும் கட்சி நினைவூட்டியுள்ளது.

அதேபோல், அரசின் வெளிப்படைத்தன்மை மற்றும் பொறுப்புக்கூறலை உறுதிப்படுத்தும் வரலாற்றுச் சட்டமாக கருதப்படும் தகவல் அறியும் உரிமைச் சட்டம் மக்களுக்கு அரசின் தகவல்களைப் பெறும் உரிமையை வழங்கியதாக கூறப்பட்டுள்ளது.

தொழிலாளர்களின் நலனைப் பாதுகாக்கும் நோக்கில் தேசிய குறைந்தபட்ச ஊதியச் சட்டம் இயற்றப்பட்டதோடு, அனைத்து துறைகளிலும் பணிபுரியும் தொழிலாளர்களுக்கு சட்டபூர்வமான குறைந்தபட்ச ஊதியம் அறிமுகப்படுத்தப்பட்டதாகவும் குறிப்பிடப்பட்டுள்ளது.

அத்துடன், இலங்கை அதிகாரபூர்வமாக ஆசிய உட்கட்டமைப்பு முதலீட்டு வங்கியில் (AIIB) இணைவதற்கு வழிவகுத்த சட்டமும் அக்காலகட்டத்தில் நிறைவேற்றப்பட்டதாக கூறப்பட்டுள்ளது.

குற்றச்செயல்களின் பாதிக்கப்பட்டவர்கள் மற்றும் சாட்சிகளுக்கான பாதுகாப்பை உறுதிப்படுத்தும் பாதிக்கப்பட்டவர்கள் மற்றும் சாட்சிகளுக்கான பாதுகாப்புச் சட்டம், கைது செய்யப்பட்ட சந்தேகநபர்களுக்கு சட்ட உதவி பெறும் உரிமையை உறுதிப்படுத்திய குற்றவியல் நடைமுறைச் சட்டத் திருத்தம் ஆகியனவும் நல்லாட்சிக் காலத்தின் முக்கிய சாதனைகளாக அறிக்கையில் சுட்டிக்காட்டப்பட்டுள்ளன.

மறுபுறம், “அமைப்பு மாற்றம்” என்ற கோஷத்துடன் ஆட்சிக்கு வந்த தற்போதைய அரசாங்கம் தனது தேர்தல் வாக்குறுதிகளை நிறைவேற்றத் தவறிவிட்டதாக ஐ.தே.க. குற்றஞ்சாட்டியுள்ளது.

முன்னாள் ஜனாதிபதிகள் மற்றும் முன்னாள் நாடாளுமன்ற உறுப்பினர்களுக்கான சில சலுகைகளை நீக்கும் சட்டங்களைத் தவிர, நாட்டில் உண்மையான மாற்றத்தை ஏற்படுத்தக்கூடிய முக்கியமான சட்டங்களை அரசு கொண்டு வரவில்லை என கட்சி தெரிவித்துள்ளது.

இதற்கிடையில், முன்னாள் ஜனாதிபதி ரணில் விக்கிரமசிங்க தலைமையிலான 26 மாத ஆட்சிக்காலத்தில் 75 சட்டங்கள் நிறைவேற்றப்பட்டதாகவும், அவை நாட்டின் பொருளாதார மீட்சி மற்றும் வளர்ச்சிக்கு முக்கிய பங்காற்றியதாகவும் ஐ.தே.க. சுட்டிக்காட்டியுள்ளது.

அவற்றில் 22ஆவது அரசியலமைப்பு திருத்தம், பொருளாதார மாற்றச் சட்டம், இலங்கை மத்திய வங்கிச் சட்டம், பொது நிதி முகாமைத்துவச் சட்டம் உள்ளிட்ட பல முக்கியமான சட்டங்கள் இடம்பெற்றதாக குறிப்பிடப்பட்டுள்ளது.

“தற்போதைய அரசாங்கத்தின் செயலற்ற தன்மையை மக்கள் ஏற்கனவே உணரத் தொடங்கியுள்ளனர். இவ்வாறான ஆய்வறிக்கைகள் அரசின் உண்மையான செயல்திறனை மறைத்து, வெள்ளையடிக்கும் முயற்சியாக மட்டுமே பார்க்கப்படுகின்றன” என ஐ.தே.க. தனது அறிக்கையில் தெரிவித்துள்ளது.

இந்த விவகாரம் அரசியல் வட்டாரங்களில் புதிய விவாதத்தை ஏற்படுத்தியுள்ள நிலையில், “சட்டங்களின் எண்ணிக்கையா முக்கியம்? அல்லது மக்களின் வாழ்க்கையில் மாற்றத்தை ஏற்படுத்தும் சட்டங்களா முக்கியம்?” என்ற கேள்வி மீண்டும் தேசிய அரசியல் அரங்கில் மையக்கருவாக மாறியுள்ளது.

(இது டெய்லி மிர்ரர் இணைய ஊடகத்தில் வெளியிடப்பட்ட முக்கிய செய்தி)

ஜூட் சமந்த

பொறுப்பதிகாரியைத் தவிர அனைத்து அதிகாரிகளும் இடமாற்றம் – பின்னணியில் ரகசிய அரசியல் சந்திப்பா?

புத்தளம் மாவட்டத்தின் கல்பிட்டி பொலிஸ் நிலையத்தில் பணியாற்றி வந்த பொறுப்பதிகாரியைத் தவிர்ந்த ஏனைய அனைத்து பொலிஸ் அதிகாரிகளும் இடமாற்றம் செய்யப்பட்டுள்ளமை பெரும் பரபரப்பை ஏற்படுத்தியுள்ளது.

புத்தளம் பொலிஸ் பிரிவிற்கு பொறுப்பான மூத்த பொலிஸ் அத்தியட்சகர் வழங்கிய உத்தரவின் அடிப்படையில், 24 பொலிஸ் அதிகாரிகள் உடனடியாக அமலுக்கு வரும் வகையில் இடமாற்றம் செய்யப்பட்டுள்ளதுடன், மேலும் 15 அதிகாரிகள் எதிர்வரும் ஜூன் 10ஆம் திகதி முதல் அமலுக்கு வரும் வகையில் புதிய பணியிடங்களுக்கு மாற்றப்பட்டுள்ளனர்.

இடமாற்றம் செய்யப்பட்ட அதிகாரிகள் அனைவரும் புத்தளம் பொலிஸ் பிரிவின் கீழ் இயங்கும் ஏனைய பொலிஸ் நிலையங்களுக்கு நியமிக்கப்பட்டுள்ளனர். அதேவேளை, அவர்களுக்கு பதிலாக புத்தளம் பிரிவின் பல்வேறு பொலிஸ் நிலையங்களில் பணியாற்றி வந்த 35 அதிகாரிகள் உடனடியாக கல்பிட்டி பொலிஸ் நிலையத்திற்கு மாற்றப்பட்டுள்ளனர்.

இதனுடன், நுரைச்சோலை (நொரொச்சோலை) பொலிஸ் நிலையத்தில் பணியாற்றிய எட்டு அதிகாரிகளும் புத்தளம் பொலிஸ் பிரிவின் பிற நிலையங்களுக்கு உடனடியாக இடமாற்றம் செய்யப்பட்டுள்ளதாக தகவல்கள் தெரிவிக்கின்றன.

இந்த இடமாற்றங்கள் அனைத்தும், அரச சேவை ஆணைக்குழுவினால் 2022 டிசம்பர் 14ஆம் திகதி வெளியிடப்பட்ட 2310/29 இலக்க நடைமுறை விதிமுறைத் தொகுப்பின் 258(1)ஆம் பிரிவின் கீழ், பொலிஸ்மா அதிபரின் அறிவுறுத்தல்களுக்கு அமைவாக மேற்கொள்ளப்பட்டதாக கூறப்படுகிறது.

இந்நிலையில், கடந்த மே மாதம் 15ஆம் திகதி சிலாபம் பகுதியில் உள்ள ஒரு ஹோட்டலில் பொது பாதுகாப்பு அமைச்சர் மற்றும் பொலிஸ்மா அதிபர் தலைமையில் புத்தளம் மாவட்ட பொலிஸ் அதிகாரிகளுடன் விசேட சந்திப்பு ஒன்று நடைபெற்றிருந்தது.

அந்த சந்திப்பைத் தொடர்ந்து, அமைச்சர், பொலிஸ்மா அதிபர் மற்றும் புத்தளம் மாவட்ட அரசியல் பிரதிநிதிகள் இடையே இரகசிய கலந்துரையாடல் ஒன்றும் இடம்பெற்றதாக தகவல்கள் வெளியாகியுள்ளன.

அக்கலந்துரையாடலின் போது, கல்பிட்டி பொலிஸ் நிலையத்தில் பணியாற்றும் சில அதிகாரிகள் பல்வேறு சட்டவிரோத வர்த்தக வலையமைப்புகளுடன் தொடர்பு பேணி, ஊழல் முறையில் கடமையாற்றுவதாக ஒரு பிராந்திய அரசியல்வாதி குற்றஞ்சாட்டியதாக அறியப்படுகிறது.

இதன் காரணமாகவே கல்பிட்டி பொலிஸ் நிலையத்தில் இந்த பாரிய அளவிலான இடமாற்ற நடவடிக்கை மேற்கொள்ளப்பட்டிருக்கலாம் என்ற கருத்து பொலிஸ் வட்டாரங்களில் பரவலாக பேசப்பட்டு வருகிறது.

இந்த திடீர் மற்றும் விரிவான இடமாற்றம், புத்தளம் மாவட்டத்தின் சட்டம் மற்றும் ஒழுங்கு நிர்வாகத்தில் புதிய மாற்றங்களுக்கு வழிவகுக்குமா என்பது குறித்து பொதுமக்களும் அரசியல் வட்டாரங்களும் தீவிர கவனம் செலுத்தி வருகின்றன.

இலங்கையில் டெங்கு தொற்றின் தாக்கம் மீண்டும் தீவிரமடைந்துள்ள நிலையில், கடந்த ஆண்டுடன் ஒப்பிடுகையில் இந்த ஆண்டு டெங்கு நோயாளர்களின் எண்ணிக்கை 50 முதல் 55 சதவீதம் வரை அதிகரித்துள்ளதாக தேசிய டெங்கு ஒழிப்பு பிரிவு எச்சரிக்கை விடுத்துள்ளது.

அந்தப் பிரிவின் பணிப்பாளர் வைத்தியர் கபில கண்ணங்கர தெரிவிக்கையில், இந்த ஆண்டு ஜூன் 5ஆம் திகதி வரையிலான காலப்பகுதிக்குள் நாடளவில் மொத்தமாக 36,168 டெங்கு நோயாளர்கள் பதிவாகியுள்ளதாகக் குறிப்பிட்டார். அதில், சுமார் 50 சதவீதமான நோயாளர்கள் மேல் மாகாணத்திலேயே பதிவாகியிருப்பது கவலைக்கிடமான நிலையை வெளிப்படுத்துவதாகும் எனவும் அவர் சுட்டிக்காட்டினார்.

மேல் மாகாணத்திற்கு அடுத்ததாக தெற்கு மாகாணத்தின் காலி மற்றும் மாத்தறை மாவட்டங்களிலும், சப்ரகமுவ மாகாணத்தின் இரத்தினபுரி மற்றும் கேகாலை மாவட்டங்களிலும், மேலும் புத்தளம் மற்றும் கண்டி மாவட்டங்களிலும் அதிகளவிலான டெங்கு நோயாளர்கள் அடையாளம் காணப்பட்டுள்ளதாக அவர் தெரிவித்தார்.

டெங்கு தொற்றின் அதிகரிப்புக்கு காரணமாக, இந்த ஆண்டு ஜனவரி மாதம் முதல் தொடர்ச்சியாக நிலவிய மழையுடனான வானிலை முக்கிய பங்காற்றியுள்ளதாகவும் வைத்தியர் கபில கண்ணங்கர விளக்கமளித்தார். அதேவேளை, அண்மையில் தாக்கத்தை ஏற்படுத்திய ‘டிட்வா’ புயலுக்குப் பின்னர் பல இடங்களில் தேங்கிய குப்பைகள் மற்றும் கழிவுப் பொருட்கள் கொசுக்கள் பெருகுவதற்கான புதிய இனப்பெருக்கத் தளங்களாக மாறியுள்ளன என்றும் அவர் எச்சரித்தார்.

இதனையடுத்து, பொதுமக்கள் தங்களது வீடுகள் மற்றும் சுற்றுப்புறங்களை சுத்தமாக வைத்திருப்பதுடன், மழைநீர் தேங்கக்கூடிய பாத்திரங்கள், பழைய டயர்கள், பிளாஸ்டிக் பொருட்கள் உள்ளிட்ட கொசு பெருகும் இடங்களை உடனடியாக அகற்ற நடவடிக்கை எடுக்க வேண்டியது அவசியம் என சுகாதார அதிகாரிகள் வலியுறுத்தியுள்ளனர்.

டெங்கு என்பது சாதாரண காய்ச்சல் அல்ல. சரியான நேரத்தில் மருத்துவ ஆலோசனையைப் பெறத் தவறினால் உயிரிழப்புகளுக்கும் வழிவகுக்கக்கூடிய ஆபத்தான நோயாகும். எனவே, காய்ச்சல், கடுமையான தலைவலி, கண் வலி, உடல்வலி போன்ற அறிகுறிகள் தென்பட்டால் உடனடியாக அருகிலுள்ள மருத்துவமனையை அணுகுமாறு பொதுமக்களிடம் மீண்டும் மீண்டும் அறிவுறுத்தப்பட்டுள்ளது.

“கொசுவை கட்டுப்படுத்துவது அதிகாரிகளின் பொறுப்பு மட்டுமல்ல; ஒவ்வொரு குடும்பத்தினரின் விழிப்புணர்வும் நாட்டை டெங்கிலிருந்து பாதுகாக்கும் மிகப்பெரிய ஆயுதமாகும்” என்பதே சுகாதாரத் துறையினரின் வலியுறுத்தலாகும்.