இலங்கைக்குள் தனியார் பல்கலைக்கழகங்கள் செயற்படும் முறைகள் மற்றும் பல்கலைக்கழக மானியங்கள் ஆணைக்குழுவினால் அவை அனுமதி வழங்கப்பட்ட பல்கலைக்கழகங்களாக அங்கீகரிப்பதில் காணப்படும் பிரச்சினைகள் குறித்து கல்வி, ஊழியப்படை மற்றும் மனித மூலதனம் பற்றிய துறைசார் மேற்பார்வைக் குழுவில் கவனம் செலுத்தப்பட்டது.

கல்வி, ஊழியப் படை மற்றும் மனித மூலதனம் பற்றிய துறைசார் மேற்பார்வைக் குழு அதன் தலைவர் கௌரவ ஹேஷா விதானகே அவர்களின் தலைமையில் 21.11.2025ஆம் திகதி பாராளுமன்றத்தில் கூடியபோதே இவ்வியடம் பற்றிக் கலந்துரையாடப்பட்டது.

இங்கு கருத்துத் தெரிவித்த குழுவின் தலைவர், நாட்டில் குறைந்த தரத்திலான பட்டப்படிப்புக்களை வழங்கக்கூடிய நிறுவனங்கள் எவ்வாறு நிறுவப்பட்டுள்ளன என்பதையும், அதனால் ஏற்படும் பாதிப்புக்களையும் விளக்கிக் கூறினார். இந்த நிறுவனங்கள் கல்வியை வழங்குவதை முதன்மை நோக்கமாகக் கொண்டு செயல்படாமல், இலாபம் ஈட்டுவதையே முதன்மை நோக்கமாகக் கொண்டுள்ளன என்று குழுவின் தலைவர் மேலும் குறிப்பிட்டார். இதற்கமைய பட்டம் பெறவிரும்பும் மாணவர்கள் குறித்த பல்கலைக்கழகங்களுக்கு அனுமதிக்கப்பட்டது முதல் பட்டத்தைப் பெற்றுக் கொள்ளும் வரையிலான செயற்பாடுகளை பல்கலைக்கழக மானியங்கள் ஆணைக்குழு மேற்பார்வை செய்யவதற்கான முறைமையொன்றை உருவாக்க வேண்டியதன் முக்கியத்துவத்தையும் அவர் வலியுறுத்தினார்.

இங்கு கருத்துத் தெரிவித்த பல்கலைக்கழக மானியங்கள் ஆணைக்குழுவின் உபதலைவர், இவ்வாறு தனியார் பல்கலைக்கழகங்கள் உள்ளிட்ட பட்டப்படிப்புக்களை வழங்கும் நிறுவனங்களை மேற்பார்வை செய்வது மற்றும் ஒழுங்குறுத்துவதற்கு உயர் கல்வி ஆணைக்குழுவொன்றையும் உருவாக்க வேண்டியதன் தேவையை வலியுறுத்தினார். இதன் ஊடாகத் தேவையான தரவு அமைப்புகளைத் தயாரித்து, உலகின் பிற பல்கலைக்கழகங்களுடன் இணைத்து, அவற்றுக்கிடையே நல்ல ஒருங்கிணைப்பை ஏற்படுத்துவதன் மூலம், அந்தப் பல்கலைக்கழகங்களின் தன்மை, பாடநெறிகளின் தரம் போன்ற அனைத்து தகவல்களையும் அறிந்து கொள்ள முடியும் என்று பல்கலைக்கழக மானியங்கள் ஆணைக்குழுவின் உபதலைவர் குறிப்பிட்டார். இதன் ஊடாக இலங்கையில் திறக்க எதிர்பார்க்கப்படும் தனியார் பல்கலைக்கழகங்களுக்கு அனுமதி வழங்குவதா இல்லையா என்பதை தீர்மானிக்க முடியும் என கல்வி, உயர்கல்வி மற்றும் தொழிற்கல்வி அமைச்சின் மேலதிக செயலாளர் (அரசசார்பற்ற உயர் கல்வி), பல்கலைக்கழக மானியங்கள் ஆணைக்குழுவின் உப தலைவர் உள்ளிட்ட அதிகாரிகள் தெரிவித்தனர்.

உள்ளூர் பல்கலைக்கழகங்களில் உள்ள பிரச்சினைகள் மற்றும் வெளிநாட்டு பட்டப்படிப்புகளைத் தொடர்வதற்கு வழங்கப்படும் உதவித்தொகைகள் போன்ற பிரச்சினைகள் குறித்தும் இங்கு கவனம் செலுத்தப்பட்டது.

இக்குழுக் கூட்டத்தில் கௌரவ பாராளுமன்ற உறுப்பினர்களான கிருஷ்ணன் கலைச்செல்வி, (சட்டத்தரணி) நிலுஷா லக்மாலி கமகே, சானக மாதுகொட, துரைராஜா ரவிகரன், சுனில் ராஜபக்ஷ ஆகியோரும், கல்வி, உயர்கல்வி மற்றும் தொழிற்கல்வி அமைச்சின் அதிகாரிகள், பல்கலைக்கழக மானியங்கள் ஆணைக்குழுவின் அதிகாரிகள் உள்ளிட்ட பலரும் கலந்துகொண்டனர்.

ஜூட் சமந்த

பாலகுடா களப்பில் படகு கவிழ்ந்த விபத்தில் இளைஞர் ஒருவர் உயிரிழந்துள்ளதாக கல்பிட்டி பொலிஸார் தெரிவிக்கின்றனர்.

இந்த விபத்து நேற்று 25 ஆம் தேதி மாலை 6.30 மணியளவில் இடம்பெற்றுள்ளது.

விபத்தில் உயிரிழந்தவர் பாலகுடா – சோத்துபிட்டிய வாடிய பகுதியைச் சேர்ந்த ஹேரத் முதியன்சேலகே ஜூட் கிருஷாந்த சவிந்த (வயது 22) ஆவார்.

ஒரு படகு இயந்திரம் தொழில்நுட்பக் கோளாறால் பாதிக்கப்பட்டுள்ளது.

குறித்த இளைஞர் பழுதுபார்க்கப்பட்ட இயந்திரத்தை படகில் பொருத்தி சோதிக்க நடவடிக்கை எடுத்தபோது பாலகுடா களப்பில் படகு கவிழ்ந்து இந்த விபத்து ஏற்பட்டதாக பொலிஸார் தெரிவிக்கின்றனர்.

களப்பில் மூழ்கிய இளைஞர் உள்ளூர்வாசிகளால் மீட்கப்பட்டு சிகிச்சைக்காக கல்பிட்டி மருத்துவமனையில் அனுமதிக்கப்பட்ட பின்னர் அவர் உயிரிழந்துள்ளார்.

பிரேத பரிசோதனை நடத்த திட்டமிடப்பட்டுள்ளது.

கல்பிட்டி பொலிஸார் மேலதிக விசாரணைகளை மேற்கொண்டு வருகின்றனர்.

கிளிநொச்சியில் ஜனாதிபதி அனுரா குமார திசாநாயக்கஅவர்களுக்கு பிறந்தநாள் கொண்டாடிய இளைஞர்கள்

வரலாற்றில் முதல்முறையாக வடமாகாணத்தில் ஜனாதிபதி ஒருவருக்கு பிறந்தநாள் கொண்டாடிய நிகழ்வு நேற்று கிளிநொச்சியில் இடம்பெற்றுள்ளது.

கிளிநொச்சி மாவட்டத்தின் சுண்டிகுளம் சந்தி இளைஞர்களின் ஏற்பாட்டினால் நேற்று 24.11.2025 மாலை 4.00 மணியளவில் ஜனாதிபதி அனுரகுமார திசாநாயக அவர்களின் 57வது பிறந்தநாளை முன்னிட்டு சுண்டிக்குளம் சந்தி இளைஞர்களினால் கேக் வெட்டி, பட்டாசு வெடித்து கொண்டாடப்பட்டது.

வீதியில் சென்ற மக்களுக்கு கேக், இனிப்பு வகைகளையும் வழங்கிக் கொண்டாடி மகிழ்ந்தனர்.

இதன் போது ஊடகங்களுக்கு கருத்து தெரிவித்த இளைஞர்கள்;

முன்னைய ஆட்சியாளர்கள் எவரும் சொன்னதை செய்வதில்லை, தற்போதைய ஜனாதிபதி கூறிய வாக்குறுதிகளை செயல்படுத்தி வருகிறார். போதை பொருளை முற்றும் முழுதாக அளித்து இளைய தலைமுறைகளை போதைப் பொருளிலிருந்து மீட்டெடுத்து, நாட்டின் போதை பொருளை முற்று முழுதாக ஒழிப்பதற்கு நடவடிக்கை மேற்கொண்டமை எமக்கு பிடித்துள்ளதாக தெரிவித்தனர்.

மேலும் தற்போதைய ஜனாதிபதி இராணுவத்தினரை அகற்றுவதாகவும் தற்போதைய அரசாங்கத்தில் மக்களுக்கான பேச்சு சுதந்திரத்தை முற்றும் முழுதாக வழங்கப்பட்டுள்ளதாகவும் இதன் காரணமாக மக்கள் தமது தேவைகளை இலகுவாக பெற்றுக்கொள்ள கூடிய வகையில் அனைத்து திணைக்கலங்களும் செயற்பட்டு வருவதை முழு மனதுடன் வரவேற்பதாகவும் தெரிவித்தமை குறிப்பிடத்தக்கது.

கிளிநொச்சி அக்கராஜன்குளம் பொலிஸ் பிரிவுக்குற்பட்ட ஸ்கந்தபுரம் பகுதியில், மருமகனின் தாக்குதலுக்குள்ளான மாமனார் உயிரிழந்த சம்பவம் ஒன்று நேற்றிரவு பதிவாகியுள்ளது.

இறந்தவரின் மகளுடன் சண்டையிட்டபோது, மகள் தந்தை வீட்டிற்கு தப்பியோடிய நிலையில் மகளை தாக்க முற்பட்ட மருமகனை தடுக்க முற்பட்ட மாமனார் மருமகனின் தாக்குதலுக்குள்ளான நிலையில் வைத்தியசாலைக்கு கொண்டு செல்லும் வழியில் உயிரிழந்துள்ளார்.

குறித்த சம்பவத்தில் 59 வயதான கதிரவேலு சிவராசசிங்கம் என்பவரே இவ்வாறு உயிரிழந்துள்ளார்.

25 வயது மதிக்கத்தக்க மருமகன் கைது செய்யப்பட்டுள்ளதுடன், அவருடன் சேர்ந்து குறித்த சம்பவத்திற்கு உதவிய குற்றச்சாட்டில் அவரது சிறிய தந்தையும் கைது செய்யப்பட்டுள்ளார்.

சம்பவம் தொடர்பாக அக்கராஜன்குளம் பொலிசார் விசாரணைகளை மேற்கொண்டு வருகின்றனர்.

உயிரிழந்தவர்களின் சடலம் கிளிநொச்சி மாவட்ட பொது வைத்தியசாலையில் வைக்கப்பட்டுள்ளது.

ஜூட் சமந்த

ராஜகங்கனை, தெதுரு ஓயா, இங்கினிமிட்டிய மற்றும் தப்போவ நீர்த்தேக்கங்களின் வான்கதவுகள் மேலும் திறக்கப்பட்டுள்ளதால், கலா ஓயா, தெதுரு ஓயா மற்றும் மீ ஓயாவின் நீர்மட்டம் அதிக அளவில் இருப்பதாக புத்தளம் பேரிடர் மேலாண்மை பிரிவு தெரிவித்துள்ளது.

இன்று 25 ஆம் தேதி பிற்பகல் நிலவரப்படி, இங்கினிமிட்டிய நீர்த்தேக்கத்தின் 4 வான்கதவுகள் தலா 2 அடி மற்றும் 2 வான்கதவுகள் தலா 1 அடி திறக்கப்பட்டுள்ளன. திறக்கப்பட்ட வான்கதவுகளிலிருந்து மீ ஓயாவிற்கு வினாடிக்கு 5000 கன அடி தண்ணீர் வெளியேற்றப்படுகிறது.

தப்போவ நீர்த்தேக்கத்தின் 4 வான்கதவுகள் தலா 1 அடி திறக்கப்பட்டுள்ளன.

அந்த வான்கதவுகளிலிருந்து மீ ஓயாவிற்கு வினாடிக்கு 880 கன அடி தண்ணீர் சேர்க்கப்படுவதாக நீர்ப்பாசனத் துறை தெரிவித்துள்ளது.

ராஜாங்கனை நீர்த்தேக்கத்தின் நான்கு வான்கதவுகள் தலா 4 அடி திறக்கப்பட்டுள்ளன.

இந்த மதகுகள் வழியாக கலா ஓயாவில் வினாடிக்கு 3856 கன அடி நீர் சேர்க்கப்படுகிறது.

தெதுரு ஓயா நீர்த்தேக்கத்தின் நான்கு மதகுகள் தலா 2 அடி திறக்கப்பட்டுள்ளன.

இந்த மதகுகள் வழியாக தெதுரு ஓயாவில் வினாடிக்கு 5400 கன அடி நீர் சேர்க்கப்படுவதாக நீர்ப்பாசனத் துறை மேலும் தெரிவித்துள்ளது.

பாராளுமன்றத்திற்குள் பெண் பாராளுமன்ற உறுப்பினர்கள் வாய்மொழியாகவோ அல்லது எவ்வகையிலோ துன்புறுத்தப்படுவதைத் தடுக்கும் வகையில், நிலையியற் கட்டளைகளை திருத்துவதற்கான முன்மொழிவை சபாநாயகரிடம் சமர்ப்பிக்க பெண் பாராளுமன்ற உறுப்பினர்களின் ஒன்றியம் எதிர்பார்ப்பதாக அமைச்சர் சரோஜா சாவித்ரி போல்ராஜ் தெரிவித்துள்ளார்.

பால்நிலைசார் வன்முறைக்கு எதிரான (GBV) 16 நாட்கள் வேலைத்திட்டத்திற்கு ஆதரவாகப் பாராளுமன்றத்தில் பல நிகழ்ச்சிகள் நேற்று (24) இடம்பெற்றன.

அதற்கமைய, பால்நிலைசார் வன்முறையை முடிவுக்குக் கொண்டுவருவதைக் குறிக்கும் இலச்சினைகள் பிரதமர் (கலாநிதி) ஹரினி அமரசூரிய மற்றும் சபாநாயகர் (வைத்தியர்) ஜகத் விக்கிரமரத்ன ஆகியோருக்கு அணிவிக்கப்பட்டன.

இந்த நிகழ்ச்சிகளுக்கு ஆதரவளிக்கும் வகையில், பெண் பாராளுமன்ற உறுப்பினர்கள் உள்ளிட்ட பாராளுமன்ற உறுப்பினர்கள் மற்றும் பாராளுமன்ற பணியாளர்கள் செம்மஞ்சள் நிறம் அல்லது செம்மஞ்சள் நிறம் கலந்த ஆடைகளை நேற்று (24) அணிந்து வந்திருந்தனர்.

பாராளுமன்ற பெண் உறுப்பினர்களின் ஒன்றியம், ஐக்கிய நாடுகளின் சனத்தொகை நிதியத்தின் (UNFPA) அனுசரணையுடன் ஏற்பாடு செய்த இந்த நிகழ்வில், பாராளுமன்றத்தின் பிரதி சபாநாயகர் (வைத்தியர்) ரிஸ்வி சாலி, குழுக்களின் பிரதித் தவிசாளர் ஹேமாலி வீரசேகர, சபை முதல்வரும் அமைச்சருமான பிமல் ரத்நாயக்க, ஆளும் கட்சியின் முதற்கோலாசான் அமைச்சர் (வைத்தியர்) நளிந்த ஜயதிஸ்ஸ, மற்றும் எதிர்க்கட்சியின் கௌரவ முதற்கோலாசான் கயந்த கருணாதிலக ஆகியோருக்கும் அடையாள இலச்சினைகள் அணிவிக்கப்பட்டன. அத்துடன், பாராளுமன்றத்தின் செயலாளர் நாயகம் குஷானி ரோஹணதீர, பணியாட்தொகுதியின் பிரதானியும் பிரதிச் செயலாளர் நாயகமுமான சமிந்த குலரத்ன மற்றும் உதவிச் செயலாளர் நாயகம் ஹன்ச அபேரத்ன ஆகியோருக்கும் ஒன்றியத்தினால் இலச்சினைகள் அணிவிக்கப்பட்டன.

மேலும், பாராளுமன்ற உறுப்பினர்கள் நுழைவாயிலில் அனைத்துப் பாராளுமன்ற உறுப்பினர்களுக்கும் பால்நிலைசார் வன்முறையை முடிவுக்குக் கொண்டுவருவதற்கான ஆதரவை வெளிப்படுத்தும் இலச்சினைகள் அணிவிக்கப்பட்டன.

16 நாட்கள் வேலைத்திட்டம் என்பது பால்நிலைசார் வன்முறைக்கு (GBV) எதிராக வருடாந்தம் நவம்பர் 25 முதல் டிசம்பர் 10 வரை நடத்தப்படும் ஒரு உலகளாவிய பிரச்சாரமாகும். இது பெண்களுக்கு எதிரான வன்முறை ஒழிப்புக்கான சர்வதேச தினத்தில் தொடங்கி மனித உரிமைகள் தினத்தன்று முடிவடைகிறது. உலகளவில் பெண்கள் மற்றும் சிறுமிகளுக்கு எதிரான வன்முறையைத் தடுக்கவும், அகற்றவும் விழிப்புணர்வை ஏற்படுத்துவது, நடவடிக்கைகளை பலப்படுத்துவதும் இந்த வேலைத்திட்டத்தின் நோக்கமாகும்.

ஐக்கிய நாடுகளின் செயலாளர் நாயகம் அவர்களின் 16 நாட்கள் வேலைத்திட்டத்தின் 2025 ஆம் ஆண்டுக்கான உலகளாவிய கருப்பொருள், “அனைத்து பெண்கள் மற்றும் சிறுமிகளுக்கும் எதிரான டிஜிட்டல் வன்முறையை முடிவுக்குக் கொண்டுவர ஒன்றிணைவோம்” என்பதை வலியுறுத்துகிறது.

இதனுடன் இணைந்ததாக, பாராளுமன்ற பெண் உறுப்பினர்களின் ஒன்றியத்தினால் ஒரு விசேட ஊடகச் சந்திப்பும் நடத்தப்பட்டது.

பாராளுமன்ற பெண் உறுப்பினர்களின் ஒன்றியத்தைப் பிரதிநிதித்துவப்படுத்தி, பிரதமர் (கலாநிதி) ஹரினி அமரசூரிய அவர்கள் இங்கு கருத்துத் தெரிவிக்கையில்,

இந்த ஆண்டுக்கான கருப்பொருளான, அனைத்துப் பெண்களுக்கும் மற்றும் சிறுமிகளுக்கும் எதிராக டிஜிட்டல் வெளியில் நிகழும் வன்முறையை முடிவுக்குக் கொண்டுவருவது குறித்து அனைவரும் விசேட கவனம் செலுத்த வேண்டும் எனத் தெரிவித்தார். அத்துடன், சட்டக் கொள்கைகளை உருவாக்குவதைத் தாண்டி, பால்நிலைசார் வன்முறையை ஒழிப்பதற்குச் சமூகப் பொறுப்பும் கவனமும் தேவை என்பதையும் அவர் சுட்டிக்காட்டினார். இம்முறை பாராளுமன்றத்தில் பெண் பிரதிநிதிகளின் எண்ணிக்கை 22 ஆக அதிகரித்துள்ளது ஒரு சாதகமான நிலைமையாகும் என்றும், பால்நிலைசார் வன்முறையை ஒழிப்பதைச் சமூகமயமாக்குவதற்கு கட்சி பேதமின்றி அனைவரும் ஒன்றிணையுமாறு அவர் கோரிக்கை விடுத்தார்.

பாராளுமன்ற பெண் உறுப்பினர்களின் ஒன்றியத்தின் தலைவரும் மகளிர் மற்றும் சிறுவர் அலுவல்கள் அமைச்சருமான சரோஜா சாவித்ரி போல்ராஜ் அவர்கள் குறிப்பிடுகையில்,

2024 ஆம் ஆண்டில் உலகெங்கிலும் 315 மில்லியன் பெண்கள் பாலியல் வன்முறைக்கு ஆளாகியுள்ளனர் என்று தெரிவித்தார். இலங்கையிலும் இது நிகழ்கிறது என்றும், குறிப்பாக டிஜிட்டல் வெளியில் அரசியல் உட்பட அனைத்துத் துறைகளிலும் பெண்களும் சிறுமிகளும் எதிர்கொள்ளும் துஷ்பிரயோகங்களின் எண்ணிக்கை அதிகரித்துள்ளது என்றும் அவர் தெரிவித்தார். அதற்கமைய, உயர்சபையான பாராளுமன்றத்திலும் பெண் பாராளுமன்ற உறுப்பினர்கள் வாய்மொழியாகவோ துன்புறுத்தப்படுவதைத் தடுப்பதற்காக நிலையியற் கட்டளைகளைத் திருத்துவதற்கான ஒரு முன்மொழிவைக் சபாநாயகரிடம் சமர்ப்பிக்க பாராளுமன்ற பெண் உறுப்பினர்களின் ஒன்றியம் எதிர்பார்ப்பதாகவும் அவர் தெரிவித்தார்.

அதற்கமைய, பால்நிலைசார் வன்முறையை ஒழிப்பதற்கான முதலாவது முன்னுதாரணத்தை பாராளுமன்றம் என்றவையில் நாட்டிற்கு வழங்க நடவடிக்கை எடுக்கப்படும் என்றும் அமைச்சர் மேலும் குறிப்பிட்டார். அரசியலில் எத்தகைய கொள்கைகளைக் கொண்டிருந்தாலும், பால்நிலைசார் வன்முறையை ஒழிப்பதற்காக அனைவரும் ஒன்றிணையுமாறும் அவர் அழைப்பு விடுத்தார்.

அத்துடன், இங்கு கருத்துத் தெரிவித்த பாராளுமன்ற பெண் உறுப்பினர்களின் ஒன்றியத்தின் பிரதி-இணைத் தலைவர் கௌரவ பாராளுமன்ற உறுப்பினர் சமிந்திராணி கிரியெல்ல குறிப்பிடுகையில், பால்நிலைசார் வன்முறையை ஒழிப்பது குறித்து ஐக்கிய நாடுகள் சனத்தொகை நிதியம் (UNFPA) மற்றும் ஐ.நா. பெண்கள் வேலைத்திட்டம் (UN women) நடத்திய அண்மைய ஆய்வில், பெண்கள், சிறுமிகள் உட்பட அனைத்து தனிநபர்களும் அடிக்கடி பல்வேறு வகையான இணையத் துஷ்பிரயோகங்களுக்கு உள்ளாவது வெளிப்படுத்தப்பட்டுள்ளதாகத் தெரிவித்தார். அதற்கமைய, போலிக் கணக்குகளை உருவாக்குவது 36.9% என்றும், ஆபாசமான தகவல்கள்/வீடியோக்களைப் பகிர்வது 36.9% என்றும் அவர் குறிப்பிட்டார். இலங்கையில் ஐந்து பெண்களில் ஒருவர் உடல்ரீதியாகவோ அல்லது வாய்மொழியாகவோ பாலியல் வன்முறைக்கு ஆளாகிறார்கள் என்றும், இந்த நிலைமையை மாற்றி ஒரு சிறந்த சமூகத்தை உருவாக்க கட்சி பேதமின்றி அனைவரும் செயற்பட வேண்டும் என்றும் அவர் வலியுறுத்தினார். அத்துடன், இந்த வேலைத்திட்டத்தை இலங்கை பாராளுமன்றத்தில் செயற்படுத்துவதற்கு ஒத்துழைப்பு வழங்கியமைக்காக ஐக்கிய நாடுகளின் சனத்தொகை நிதியத்திற்கு (UNFPA) அவர் தனது நன்றியைத் தெரிவித்தார்.

இலங்கையைச் சுற்றியுள்ள தாழ்வான வளிமண்டலத்தில் நிலவும் கொந்தளிப்பான நிலை காரணமாக, வடக்கு, வடமத்திய, கிழக்கு மற்றும் ஊவா மாகாணங்களில் நிலவும் மழையுடனான நிலைமை இன்று (25) முதல் அடுத்த சில நாட்களுக்குள் அதிகரிக்க வாய்ப்புள்ளதாக வளிமண்டலவியல் திணைக்களம் தெரிவித்துள்ளது. 

அதன்படி வடக்கு, வடமத்திய, கிழக்கு மற்றும் ஊவா மாகாணங்களிலும், அத்துடன் ஹம்பாந்தோட்டை மற்றும் மாத்தளை மாவட்டங்களிலும் இடைக்கிடையே மழை அல்லது இடியுடன் கூடிய மழை பெய்யும். 

நாட்டின் ஏனைய பகுதிகளில் பிற்பகல் 1:00 மணிக்குப் பின்னர் மழை அல்லது இடியுடன் கூடிய மழை ஏற்பட வாய்ப்புள்ளதாக அந்த திணைக்களம் குறிப்பிட்டுள்ளது. 

கிழக்கு, வடமத்திய, ஊவா மற்றும் தென் மாகாணங்களில் சில இடங்களில் 100 மி.மீ இற்கு மேல் மிக கனமழை பெய்ய வாய்ப்புள்ளது. 

நாட்டின் ஏனைய பகுதிகளில் சில இடங்களில் 75 மி.மீ இற்கு மேல் ஓரளவு கனமழை பெய்யக்கூடும். 

வடக்கு மாகாணம் மற்றும் திருகோணமலை மாவட்டத்தில் மணிக்கு சுமார் 40 கி.மீ வேகத்தில் இடைக்கிடையே ஓரளவு பலத்த காற்று வீசக்கூடும். 

இடியுடன் கூடிய மழை பெய்யும் சந்தர்ப்பங்களில் தற்காலிக பலத்த காற்று மற்றும் மின்னல் தாக்கங்களால் ஏற்படக்கூடிய ஆபத்துக்களைக் குறைப்பதற்கான தேவையான நடவடிக்கைகளை எடுக்குமாறு வளிமண்டலவியல் திணைக்களம் பொதுமக்களைக் அறிவுறுத்தியுள்ளது.

ஜூட் சமந்த

ஒன்றாக மது அருந்திய பின்னர் ஏற்பட்ட கைகலப்பு மற்றும் கத்தி சண்டையில் காயமடைந்த இரண்டு நண்பர்கள் சிகிச்சைக்காக மருத்துவமனையில் அனுமதிக்கப்பட்டுள்ளதாக நுரைச்சோலை போலீசார் தெரிவித்தனர்.

காயமடைந்தவர்களில் ஒருவர் புத்தளம் மருத்துவமனையில் சிகிச்சை பெற்று வருவதுடன், மற்றவர் மேலதிக சிகிச்சைக்காக கொழும்பு தேசிய மருத்துவமனைக்கு மாற்றப்பட்டுள்ளார்.

இந்த மோதல் கடந்த 23 ஆம் தேதி இரவு நுரைச்சோலை காவல் பிரிவின் ஆதனாத்தலே – அந்தகன்னியா பகுதியில் நடந்தது.

ஏத்தாளை – அந்தகன்னிய பகுதியைச் சேர்ந்த இருவர் இந்த சம்பவத்தில் காயமடைந்தனர். அவர்களில், ஹதபான்கொட பத்மசிறி புத்தளம் மருத்துவமனையிலும், ருவன் ஸ்ரீலால் கொழும்பு தேசிய மருத்துவமனையிலும் சிகிச்சை பெற்று வருகின்றனர்.

சம்பவத்தில் காயமடைந்து சிகிச்சைக்காக மருத்துவமனையில் அனுமதிக்கப்பட்ட இருவரும் நண்பர்கள் என்று கூறப்படுகிறது.

23 ஆம் தேதி மாலை, இருவரும் ஒன்றாக மது அருந்தினர். பின்னர், இருவரும் வீடு திரும்பும் போது, ​​வாக்குவாதம் மோசமடைந்தததால் அக்கம்பக்கத்தினர் வந்து சண்டையை சமரசம் செய்ய முயன்றனர்.

பின்னர், ருவான் ஸ்ரீலால் வீட்டிற்குள் சென்று, கூர்மையான கத்தியை எடுத்து, பத்மசிறியைத் தாக்கி, காயங்களை ஏற்படுத்தினார். சம்பவத்தை நேரில் பார்த்த பத்மசிறியின் இரண்டு மகன்கள் சம்பவ இடத்திற்கு வந்து, ருவான் ஸ்ரீலாலை தடியால் தாக்கியதாக போலீசார் தெரிவிக்கின்றனர்.

சண்டையில் காயமடைந்த இருவரையும் அப்பகுதி மக்கள் சிகிச்சைக்காக புத்தளம் ஆதார மருத்துவமனையில் அனுமதித்துள்ளனர். அவர்களில் ஒருவர், ஆபத்தான நிலையில், மேலதிக சிகிச்சைக்காக கொழும்பு தேசிய மருத்துவமனைக்கு மாற்றப்பட்டுள்ளார்.

சண்டையில் ஈடுபட்ட ஒரு சந்தேக நபர், நோரச்சோலை போலீசாரால் கைது செய்யப்பட்டுள்ளார்.

நோரச்சோலை போலீசார் மேலதிக விசாரணைகளை மேற்கொண்டு வருகின்றனர்.

பயணிகள் பேருந்துகளில் பயணிக்கும் போது பயணச்சீட்டுகளை கொள்வனவு செய்வதற்கு வங்கி அட்டைகள் மூலம் பணம் செலுத்தும் வசதி இன்று முதல் வழங்கப்படவுள்ளதாக போக்குவரத்து அமைச்சு தெரிவித்துள்ளது. 

இதற்கமைய, இதன் ஆரம்ப நிகழ்வு இன்று (24) காலை மாகும்புர பல்நோக்கு போக்குவரத்து மத்திய நிலையத்தில் இடம்பெறவுள்ளது.

பேருந்து கட்டணம் செலுத்திய பின்னர் மீதிப் பணத்தை திரும்பப் பெறாதது போன்ற பிரச்சினைகளுக்கு தீர்வாக, வங்கி அட்டைகள் ஊடாக கட்டணம் செலுத்தும் வசதி அறிமுகப்படுத்தப்பட்டுள்ளது. 

டிஜிட்டல் அமைச்சு மற்றும் போக்குவரத்து அமைச்சு இணைந்து இந்த புதிய முறையை நடைமுறைப்படுத்துகின்றன. 

முதற்கட்டமாக சுமார் 20 வழித்தடங்களில் இத்திட்டத்தை நடைமுறைப்படுத்த திட்டமிடப்பட்டுள்ளது.

அடுத்த 24 மணித்தியாலத்துக்கான, நாட்டைச் சூழவுள்ள கடற் பரப்பிற்கான வானிலை முன்னறிவிப்பு

2025 நவம்பர் 24ஆம் திகதி அதிகாலை 05.30 மணிக்கு வெளியிடப்பட்டது.

தென் அந்தமான் கடற்பரப்புகளுக்கு மேலாக ஒரு குறைந்த அழுத்தப் பிரதேசம் உருவாகியுள்ளது. அது மேற்கு – வடமேற்குத் திசையில் நகரக் கூடிய சாத்தியம் காணப்படுவதுடன், இன்று, நவம்பர் 24 ஆம் திகதியளவில் தென்கிழக்கு வங்காள விரிகுடா கடற்பரப்புகளுக்கு மேலாக ஒரு தாழமுக்கமாக வலுவடையக் கூடிய சாத்தியம் காணப்படுகின்றது.

கடலில் பயணம் செய்வோரும் மீனவ சமூகமும் இவ்விடயம் தொடர்பாக வளிமண்டலவியல் திணைக்களத்தால் வழங்கப்படும் எதிர்கால முன்னறிவிப்புகள் மற்றும் அறிக்கைகள் தொடர்பாக அவதானமாக இருக்குமாறு வேண்டிக் கொள்ளப்படுகிறீர்கள்.

மழை நிலைமை:

நாட்டைச் சூழவுள்ள கடற்பரப்புகளில் பல இடங்களில் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுகின்றது.

காற்று :

நாட்டைச் சூழவுள்ள கடற்பரப்புகளில் காற்றானது வடகிழக்குத் திசையிலிருந்து அல்லது மாறுபட்ட திசைகளிலிருந்து வீசக் கூடிய சாத்தியம் காணப்படுவதுடன், காற்றின் வேகமானது மணித்தியாலத்துக்கு 25-35 கிலோ மீற்றர் வரை காணப்படும் என எதிர்பார்க்கப்படுகின்றது.

திருகோணமலையிலிருந்து காங்கேசந்துறை மற்றும் மன்னார் ஊடாக சிலாபம் வரையான கரையோரத்திற்கு அப்பாற்பட்ட கடற்பரப்புகளில் காற்றின் வேகமானது அவ்வப்போது மணித்தியாலத்துக்கு 50-55 கிலோ மீற்றர் வரை அதிகரிக்கக் கூடிய சாத்தியம் காணப்படுகின்றது.

கடல் நிலை:

திருகோணமலையிலிருந்து காங்கேசந்துறை மற்றும் மன்னார் ஊடாக சிலாபம் வரையான கரையோரத்திற்கு அப்பாற்பட்ட கடற்பரப்புகள் அவ்வப்போது ஓரளவு கொந்தளிப்பாகக் காணப்படும் என எதிர்பார்க்கப்படுகின்றது.

நாட்டைச் சூழவுள்ள ஏனைய கடற்பரப்புகள் சாதாரண முதல் மிதமான அலை வரை காணப்படும் என எதிர்பார்க்கப்படுகின்றது.

இடியுடன் கூடிய மழை பெய்யும் நேரங்களில் கடற் பகுதிகளில் அவ்வப்போது பலமான காற்று வீசுவதுடன் அக்கடற் பிரதேசங்கள் மிகவும் கொந்தளிப்பாகவும் காணப்படும்.