குடும்பங்கள் குடியேறச் சிறந்த நாடுகள்: உலகளவில் இலங்கை 4-வது இடம்!
புதிய நாடு ஒன்றிற்கு இடம்பெயரும் போது கவனிக்க வேண்டிய மிக முக்கிய காரணிகளான சுகாதாரத் தரம், வாழ்க்கைச் செலவு, வேலைவாய்ப்புகள் மற்றும் குடும்பங்களுக்கான உகந்த சூழல் உள்ளிட்ட 34 முக்கிய காரணிகளை அடிப்படையாகக் கொண்டு, உலகளவில் பிரபலமான 82 நாடுகள் இந்த ஆய்வுக்கு உட்படுத்தப்பட்டதில் இலங்கை மிக முக்கிய இடத்தை பிடித்துளளது.
இந்த ஆய்வின் முடிவில், குடும்பங்களுடன் குடியேறுவதற்கு மிகச்சிறந்த நாடுகளின் பட்டியலில் ஸ்பெயின் முதலிடத்தையும், சீனா இரண்டாம் இடத்தையும், அமெரிக்கா மூன்றாம் இடத்தையும் பிடித்துள்ளன. இவற்றைத் தொடர்ந்து இலங்கை 4-வது இடத்தைக் கைப்பற்றி ஆசிய பிராந்தியத்தில் கவனத்தை ஈர்த்துள்ளது.
தரவரிசையை தீர்மானித்த முக்கிய காரணிகள்
கடந்த 2025-ஆம் ஆண்டின் அறிக்கையோடு ஒப்பிடுகையில், இந்த 2026-ஆம் ஆண்டுக்கான அறிக்கையில் கூடுதல் காரணிகளும் விரிவான அளவீடுகளும் சேர்க்கப்பட்டுள்ளன. குறிப்பாக, குழந்தைகளுடன் இடம்பெயரும் குடும்பங்களின் அன்றாட வாழ்க்கையைத் தீர்மானிக்கும் நடைமுறைச் சாத்தியக்கூறுகள் குறித்து இந்த ஆய்வு தீவிரமாக ஆராய்ந்துள்ளது.
- கல்வியின் தரம்
- மலிவான குழந்தை பராமரிப்புச் செலவுகள் (Childcare Affordability)
- மகப்பேறு மற்றும் பிரசவ விடுப்புக் கொள்கைகள் (Maternity & Paternity Leave)
- சர்வதேசப் பள்ளிகளுக்கான வாய்ப்புகள் (International Schooling) போன்ற முக்கிய விடயங்கள் இதில் உற்றுநோக்கப்பட்டுள்ளன.
இலங்கையின் முன்னேற்றத்திற்கு வழியமைத்த காரணங்கள்
கடந்த ஆண்டு (2025) இதே தரவரிசையில் இலங்கை முதலிடத்தில் இருந்தமை குறிப்பிடத்தக்கது. இந்த ஆண்டும் புதிய மற்றும் விரிவுபடுத்தப்பட்ட அளவீடுகளுக்கு மத்தியிலும் இலங்கை முன்னணியில் திகழ்கிறது.
இலங்கையின் தரமான கல்வி முறை மற்றும் மிகவும் மலிவான குழந்தை பராமரிப்புச் செலவுகள் ஆகியவையே இலங்கை 4-வது இடத்தைத் தக்கவைத்துக் கொள்ள முக்கிய காரணங்களாக அமைந்துள்ளன.
மேலும், குடியேறும் குடும்பங்களுக்கு அத்தியாவசியத் தேவையாகக் கருதப்படும் “சிறந்த பொதுப் போக்குவரத்து அமைப்பு” கொண்ட நாடுகளின் வரிசையிலும் இலங்கை 5-வது இடத்தைப் பிடித்து மற்றுமொரு மைல்கல்லை எட்டியுள்ளது.
சர்வதேச நாடுகளின் நிலைப்பாடு (முதல் 3 இடங்கள்)
| தரவரிசை | நாடு | முக்கிய சிறப்பம்சங்கள் |
| 01 | ஸ்பெயின் | மலிவான குழந்தை பராமரிப்பு, தாராளமான பெற்றோர் விடுமுறைக் கொள்கைகள் (2026 முதல் கூடுதல் ஊதியத்துடன் கூடிய விடுமுறை அமலாகிறது) மற்றும் வலுவான பொதுக் கல்வி முறை. |
| 02 | சீனா | விரிவான கல்வி உள்கட்டமைப்பு, முக்கிய நகரங்களில் அதிகரித்து வரும் சர்வதேசப் பள்ளிகளின் தேர்வுகள் மற்றும் மேம்பட்டு வரும் பெற்றோர் விடுமுறை வசதிகள். |
| 03 | அமெரிக்கா | சில மாநிலங்களில் குழந்தை பராமரிப்புச் செலவுகள் அதிகமாக இருந்தபோதிலும், சர்வதேசப் பள்ளிகளின் தரம் மற்றும் பலதரப்பட்ட கல்விப் பாதைகள். |
இலங்கைக்கு அடுத்தபடியாக, சிறந்த சர்வதேசப் பள்ளிகள் மற்றும் கவர்ச்சிகரமான பெற்றோர் நலன்புரிச் சலுகைகள் காரணமாக ஐக்கிய அரபு அமீரகம் (UAE) வெளிநாட்டுத் தொழிலாளர்களை ஈர்க்கும் முக்கிய நாடாகத் தொடர்ந்து நீடிக்கிறது.
வெளிநாடுகளுக்கு இடம்பெயர நினைக்கும் குடும்பங்களுக்கு, வெறும் கனவுகளை விட அன்றாட நடைமுறைச் சாத்தியக்கூறுகளே மிக முக்கியம்” என ரெமிட்லி நிறுவனம் தெரிவித்துள்ளது. புதிய அளவீடுகளின் சேர்க்கை காரணமாக கடந்த ஆண்டு பின்வரிசையில் இருந்த பல நாடுகள் இம்முறை முதல் 10 இடங்களுக்குள் முன்னேறியுள்ள நிலையில், இலங்கை தொடர்ந்து தனது வலுவான நிலையைத் தக்கவைத்துக் கொண்டுள்ளமை சிறப்பம்சமாகும்.
