இலங்கையின் நீதித்துறை கட்டமைப்பில் மிக முக்கியமானதொரு மாற்றத்தைக் கொண்டுவரும் நோக்கில், 22ஆவது அரசியலமைப்புத் திருத்தச் சட்டமூலத்தை அரசாங்கம் இன்று நாடாளுமன்றத்தில் சமர்ப்பித்துள்ளது.
நாடாளுமன்ற நிகழ்ச்சி நிரலில் உள்ளடக்கப்பட்டுள்ள இந்த விசேட சட்டமூலத்தை, நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார சபையில் உத்தியோகபூர்வமாக சமர்ப்பித்துள்ளார். 1978ஆம் ஆண்டு அரசியலமைப்பின் நீதித்துறை சார்ந்த முக்கிய ஏற்பாடுகள் மற்றும் நீதித்துறை அமைப்பு சட்டத்தில் பாரிய திருத்தங்களைச் செய்வதற்கு இதன் மூலம் திட்டமிடப்பட்டுள்ளது.
தற்போதைய நடைமுறையின்படி, உயர் நீதிமன்ற நீதியரசர்கள் 65 வயதிலும், மேன்முறையீட்டு நீதிமன்ற நீதியரசர்கள் 63 வயதிலும் ஓய்வுபெற வேண்டும் என்ற விதியே அமலில் உள்ளது.
ஆனால், முன்மொழியப்பட்டுள்ள புதிய சட்டமூலம் இந்த வயதெல்லையில் குறிப்பிடத்தக்க அதிகரிப்பைக் கோருகின்றது. அதன்படி, உயர் நீதிமன்ற நீதியரசர்களின் ஓய்வுபெறும் வயதை 67 ஆகவும், மேன்முறையீட்டு நீதிமன்ற நீதியரசர்களின் ஓய்வுபெறும் வயதை 65 ஆகவும் திருத்துவதற்கு ஏற்பாடுகள் செய்யப்பட்டுள்ளன.
இதில் மிக முக்கிய அம்சமாக, பிரதம நீதியரசரின் பதவிக்கான விசேட நிபந்தனையொன்றும் உள்ளடக்கப்பட்டுள்ளது. பிரதம நீதியரசர் ஒருவர் தனது 67 வயதை அடையும் நாளிலோ அல்லது நியமிக்கப்பட்ட திகதியிலிருந்து 6 வருடங்கள் பூர்த்தியாகும் நாளிலோ—இவ்விரண்டில் எது முதலில் வருகின்றதோ அந்நாளில்—ஓய்வுபெற வேண்டும் என்ற புதிய விதி முன்வைக்கப்பட்டுள்ளது.
நீதிமன்றங்களில் பல வருடங்களாகத் தீர்க்கப்படாமல் தேங்கிக் கிடக்கும் வழக்குகளை விரைந்து முடிவுக்குக் கொண்டுவருவதற்கும், சிரேஷ்ட மற்றும் அனுபவம் வாய்ந்த நீதியரசர்களின் நிபுணத்துவத்தை நாட்டுக்குத் தொடர்ந்தும் பெற்றுக்கொள்வதற்குமே இந்தத் திருத்தங்கள் கொண்டுவரப்படுவதாக அரசாங்கம் தெளிவுபடுத்தியுள்ளது.
