தடை செய்யப்பட்ட வார்த்தை பிரயோகத்தை பயன்படுத்த வேண்டாம் என தமிழ் முற்போக்கு கூட்டணி தலைவர் மனோ கணேசன், கிரிக்கெட் போட்டியாளர் முத்தையா முரளிதரனை வலியுறுத்தியுள்ளார்.
கிரிக்கெட் போட்டியாளர் முத்தையா முரளிதரனின் வாழ்க்கை சரிதம் என்ற அடிப்படையில் வெளிவரவுள்ள திரைப்படத்தின் முன்னோட்ட காணொளியில் இடம்பெறும் சர்ச்சைக்குரிய சொற்பிரயோகம் தொடர்பில் நாடாளுமன்ற உறுப்பினர் மனோ கணேசன் இந்த கண்டனத்தை வெளியிட்டுள்ளார்.
இலங்கையில் வாழும் இந்திய வம்சாவளி மலையக தமிழர் மத்தியில், தடைசெய்யப்பட்ட வார்த்தையை உங்கள் திரைப்பட முன்னோட்ட காட்சியில் (ட்ரேலரில்) பயன்படுத்த வேண்டாம்.
அந்த வார்த்தையை நானே நேரடியாக தடை செய்து காட்டியுள்ளேன். கதையம்சத்துக்கு தேவை என என்னிடம் கதைவிட வேண்டாம்.
நானே ஒரு கதாசிரியர். எனக்கு இது பற்றித் தெரியும். குறிப்பிட்ட இடத்தில் “நாட்டை திரும்பி பார்க்க வைத்த மலையக தமிழன்” என்று இடுங்கள். சரியாக வரும்” என்று நாடாளுமன்ற உறுப்பினர் மனோ கணேசன் சுட்டிக்காட்டியுள்ளார்.
