மத்திய கிழக்கை உலுக்கி வரும் ஐந்து மாத கால கோரப் போரில், திடீர் திருப்பமாக அமெரிக்கா தனது இரண்டு வார வான்வழித் தாக்குதல் பிரச்சாரத்தை தற்காலிகமாக நிறுத்தியுள்ளது. ஈரானுடன் “நல்ல பேச்சுவார்த்தைகள்” நடந்து வருவதாக அமெரிக்க அதிபர் டொனால்ட் ட்ரம்ப் அறிவித்துள்ள போதிலும், அதன் பின்னணியில் ஒரு கடுமையான எச்சரிக்கையும் மறைந்துள்ளது. பேச்சுவார்த்தை விரும்பிய முடிவைத் தராவிட்டால், இரண்டு நாட்களுக்கு முன்பு செய்தது போல மீண்டும் ஈரானை நிலைகுலைய வைக்கும் தாக்குதல்கள் தொடரும் என ட்ரம்ப் குறிப்பிட்டுள்ளார்.
எங்களது DNA-விலேயே அது இல்லை: ஈரானின் அதிரடி மறுப்பு!
அமெரிக்க அதிபரின் இந்த சமரச அறிவிப்பை ஈரான் மிகவும் சாதுரியமாக எதிர்கொண்டுள்ளது. இடைத்தரகர்கள் மூலம் செய்திகள் பரிமாறப்பட்டு வருவதை ஒப்புக்கொண்ட ஈரான் வெளியுறவு அமைச்சு, ஆனால் தாங்கள் யாரிடமும் கெஞ்சி பேச்சுவார்த்தைக்கான கோரிக்கையை வைக்கவில்லை என்று தெள்ளத்தெளிவாகக் கூறியுள்ளது. “சரணடைவது அல்லது கெஞ்சுவது எங்களது DNA-விலேயே இல்லை” என ஈரானிய வெளியுறவு செய்தித் தொடர்பாளர் இஸ்மாயில் பாகேய் மிகக் காட்டமாகத் தெரிவித்துள்ளார். அதேவேளை, அமெரிக்கா தனது தாக்குதலை நிறுத்தியிருக்கும் வரை தாங்களும் தாக்குதல்களை முன்னெடுக்க மாட்டோம் என்ற நிபந்தனையையும் ஈரான் விதித்துள்ளது.
இலக்குகள் தீர்ந்துபோனதா அமெரிக்க இராணுவத்திற்கு?
ட்ரம்ப் இராஜதந்திர பேச்சுவார்த்தை பற்றிப் பேசினாலும், இந்த வான்வழித் தாக்குதல் நிறுத்தத்திற்குப் பின்னால் அமெரிக்க இராணுவத்தின் பாரிய நெருக்கடி இருப்பதாக அதிர்ச்சித் தகவல்கள் வெளியாகியுள்ளன. ஈரானில் தாக்குதல் நடத்துவதற்கான முக்கிய இராணுவ இலக்குகள் தீர்ந்துபோய்விட்டதாகவும், வான் பாதுகாப்பு ஏவுகணைகளின் இருப்பு அபாய கட்டத்தை எட்டியுள்ளதாகவும் அமெரிக்க கூட்டுப் படைகளின் தளபதி ஜெனரல் டான் கெய்ன் அதிபருக்கு ஆலோசனை வழங்கியதாகக் கூறப்படுகிறது. எனினும், ஆயுதப் பற்றாக்குறை என்ற கூற்றை மறுத்துள்ள ட்ரம்ப், அமெரிக்கா தனது ஆயுதக் கிடங்குகளை வேகமாக நிரப்பி வருவதாகத் தெரிவித்துள்ளார்.
எண்ணெய் சந்தையில் பெரும் வீழ்ச்சியும் ஹோர்முஸ் நீரிணை மோதலும்
13 நாட்கள் தொடர்ந்து இரவோடு இரவாக நடத்தப்பட்ட குண்டுவீச்சுகள் தற்காலிகமாக நிறுத்தப்பட்ட செய்தி வெளியான மறு கணமே, சர்வதேச சந்தையில் கச்சா எண்ணெய் விலையில் வரலாறு காணாத வீழ்ச்சி பதிவாகியுள்ளது. பிரெண்ட் ரக கச்சா எண்ணெய் விலை பீப்பாய் ஒன்றுக்கு 9.31% வரை சரிவடைந்து $87.77 ஆகக் குறைந்துள்ளது. ஆனால் மறுபுறம், உலகின் மிக முக்கியமான எண்ணெய் போக்குவரத்து பாதையான ஹோர்முஸ் நீரிணையில், தங்களின் அனுமதியின்றி பயணிக்க முயன்ற 6 சர்வதேச கப்பல்களை ஈரான் மீண்டும் திருப்பி அனுப்பியுள்ளதால், கடல்சார் பதற்றம் இன்னும் தணிந்தபாடில்லை.
சாம்பலுக்குள் எரியும் தணல்: சவுதி மீது பாய்ந்த ட்ரோன்கள்!
போர் நிறுத்தப் பேச்சுக்கள் ஒருபுறம் நடந்து கொண்டிருந்தாலும், களத்தில் பதற்றம் குறையவில்லை என்பதைக் காட்டும் வகையில் சவுதி அரேபியாவின் ரியாத் பகுதியில் உள்ள எண்ணெய் சுத்திகரிப்பு நிலையங்களைக் குறிவைத்து ட்ரோன் தாக்குதல்கள் நடத்தப்பட்டுள்ளன. ஈராக்கில் உள்ள ஈரான் ஆதரவு குழுக்களே இத்தாக்குதலை நடத்தியதாக சவுதி குற்றம்சாட்டியுள்ளதுடன், பதிலடி கொடுக்கும் உரிமையும் தங்களுக்கு இருப்பதாக எச்சரித்துள்ளது. அமெரிக்காவில் ட்ரம்பின் போர்க் கொள்கைக்கு எதிராக மக்கள் கருத்துக்கணிப்புகள் சரிந்து வரும் நிலையில், இந்த தற்காலிக அமைதி நிரந்தர அமைதிக்கு வழிகோலுமா அல்லது பேரழிவின் அடுத்த கட்டத்திற்கு வழிவகுக்குமா என்பதை பொறுத்திருந்தே பார்க்க வேண்டும்.
