உலக அளவில் காலநிலை மாற்றம் தீவிரமடைந்து வரும் நிலையில், ஆசிய நாடான தென் கொரியாவில் தற்போது நிலவி வரும் கொதிக்கும் வெப்ப நிலை, அந்நாட்டு மக்களை நிலைகுலையச் செய்துள்ளது. இதுவரை இல்லாத அளவுக்குப் பதிவாகி வரும் இந்த அதீத வெப்ப அலை, தற்போது பெரும் உயிரிழப்புகளை ஏற்படுத்தி சோகத்தை ஏற்படுத்தியுள்ளது.
தாங்க முடியாத இந்தச் சுட்டெரிக்கும் வெயிலினால் ஏற்பட்ட வெப்பப் பக்கவாதம் மற்றும் தீவிர நீர்ச்சத்து இழப்பு காரணமாக, அந்நாட்டில் இதுவரை 21 பேர் உயிரிழந்துள்ளதாகத் தென் கொரிய அரசு அதிகாரப்பூர்வமாக அறிவித்துள்ளது. உயிரிழந்தவர்கள் பெரும்பாலும் வெயிலின் தாக்கம் தாங்க முடியாமல், திடீரென ஏற்பட்ட பக்கவிளைவுகள் மற்றும் தீவிர சிறுநீரகப் பாதிப்புகளுக்கு உள்ளாகியே உயிரிழந்துள்ளனர் என்பது அதிர்ச்சியளிக்கும் தகவலாகும்.
உயிரிழப்புகள் ஒருபுறமிருக்க, இந்த வெப்ப அலையின் கொடூரம் இத்துடன் முடிந்துவிடவில்லை! நிலைமை நாளுக்கு நாள் மோசமடைந்து வருவதால், நாட்டின் சுகாதாரக் கட்டமைப்பு கடுமையான அழுத்தத்திற்கு உள்ளாகியுள்ளது.
வெப்ப நோய்களால் பாதிக்கப்பட்ட 2,441 பேர் நாட்டின் பல்வேறு மருத்துவமனைகளில் தீவிர சிகிச்சைக்காக அனுமதிக்கப்பட்டுள்ளதாகத் தென் கொரிய சுகாதார அதிகாரிகள் தெரிவித்துள்ளனர். இதில் கவலைக்குரிய விடயம் என்னவென்றால், அனுமதிக்கப்பட்ட நோயாளிகளில் கணிசமானோர் அவசர சிகிச்சைப் பிரிவுகளில் (ICU) உயிருக்குப் போராடி வருவதுதான்.
நிலைமை தீவிரமடைந்து வருவதால், பொதுமக்கள் நண்பகல் வேளைகளில் வெளியில் செல்வதைக் தவிர்க்குமாறும், அதிகளவு நீர் அருந்துமாறும் அந்நாட்டு அரசு தொடர்ச்சியாக விழிப்புணர்வு எச்சரிக்கைகளை விடுத்து வருகின்றது.
