வவுனியா, மன்னார் பிரதான வீதியில் புகையிரத்துடன் பட்டா வாகனம் ஒன்று மோதி விபத்துக்குள்ளாகியுள்ளது.

பட்டாவை வாகனத்தை செலுத்திவந்த தந்தை இரண்டு பிள்ளைகளையும் பட்டாவுக்குள் விட்டு விட்டு பாய்ந்து தப்பியுள்ளதுடன், இரண்டு பிள்ளைகளும் பெரும் காயங்களுடன் வவுனியா பைத்தியசாலையில் அனுமதிக்கப்பட்டுள்ளனர்.

கொழும்பில் இருந்து யாழ் சென்று கொண்டிருந்த ரயிளுடனே குறித்த பட்டா வாகனம் விபத்தில் சிக்கியது.

வவுனியா, மன்னார் பிரதான வீதியில் அமைந்திருக்கும் ரயில்வே கடவையின் கதவை மூடாததால் குறித்த விபத்து ஏற்பட்டுள்ளதாகவும், கதவை மூடும் பணியாளர் குறித்த நேரத்தில் கதவை மூடி திறக்கும் அறையில் இருக்கவில்லை என்றும் பொதுமக்கள் குற்றம் சுமத்தியுள்ளனர்.

பட்டா வாகனத்தில் இரண்டு குழந்தைகளுடன் பயணித்த தகப்பனார், ரயில் வருவதைக் கண்டு வாகனத்தை விட்டு அவசரமாக பாய்ந்து உள்ளார்.

இரண்டு குழந்தைகளும் விபத்தில் சிக்கி கடும் காயங்களுடன் சிகிச்சைகளுக்காக வவுனியா வைத்திய சாலையில் அனுமதிக்கப்பட்டுள்ளார்கள்.

இச்சம்பவம் தொடர்பாக வவுனியா போலீசார் மேலதிக விசாரணைகளை மேற்கொண்டு வருகின்றனர்.

நாட்டில் மீண்டும் எந்த விதமான யுத்தமும் ஏற்படாத வகையில் அமைதியையும் நல்லிணக்கத்தையும் கட்டியெழுப்ப தற்போதைய அரசாங்கம் பாடுபடுவதாக ஜனாதிபதி அநுரகுமார திசாநாயக்க தெரிவித்துள்ளார். 

யாழ்ப்பாணம், மயிலிட்டி மீன்பிடி துறைமுக மேம்பாட்டுத் திட்டத்தின் மூன்றாம் கட்டத்தின் ஆரம்ப நிகழ்வில் இன்று (1) கலந்து கொண்டு உரையாற்றும் போதே, ஜனாதிபதி இந்தவிடயத்தை குறிப்பிட்டுள்ளார். 

மீனவ சமூகத்திற்குத் தேவையான வசதிகளை வழங்குவது அரசாங்கத்தின் பொறுப்பு என்றும், வடக்கில் மீன்பிடித் துறைமுகத்தை அபிவிருத்தி செய்வதன் மூலம் மீனவ சமூகத்திற்குத் தேவையான வசதிகளை வழங்கவும் அவர்களது பிரச்சினைகளுக்கு தீர்வு காணவும் நடவடிக்கை மேற்கொள்ளப்படும் என்றும் ஜனாதிபதி குறிப்பிட்டுள்ளார். 

மயிலிட்டி மீன்பிடி துறைமுக அபிவிருத்தித் திட்டத்தின் மூன்றாம் கட்டத்தை ஜனாதிபதி அடையாள ரீதியாக தொடங்கி வைத்தார். 

இதன் கீழ், வட மாகாணத்தில் உள்ள மீனவ சமூகம் மாத்திரமன்றி, கிழக்கு மற்றும் தெற்கு மாகாணங்களில் இருந்து வரும் மீன்பிடி படகுகளுக்கும் நீர், மின்சாரம், எரிபொருள் போன்ற அத்தியாவசிய வசதிகள், குளிர்பதன சேமிப்பு வசதிகள், வலை தயாரிப்பு நிலைய வசதிகள், ஏலவிற்பனை மண்டப வசதிகள் மற்றும் தொடர்பாடல் பரிமாற்ற மைய வசதிகள் என்பனவும் வழங்க திட்டமிடப்பட்டுள்ளது. 

இதற்காக இந்த ஆண்டு அரசாங்கம் 298 மில்லியன் ரூபா ஒதுக்கியுள்ளது. 

ஜனாதிபதி அநுரகுமார திசாநாயக்க மேலும் தெரிவிக்கையில், பிளவுபட்ட மக்களை ஒன்றிணைப்பதில் வடக்கு மக்கள் ஒரு தீர்க்கமான காரணியாக கடந்த பொதுத் தேர்தலில் இருந்ததாகவும், எதிர்காலத்தில் இந்த ஒற்றுமை மேலும் வலுப்படுத்தப்பட வேண்டும் என்றும் ஜனாதிபதி கூறியுள்ளார். 

கடந்த அரசாங்கங்கள் போரை எதிர்பார்த்து பணியாற்றிய போதிலும், இந்த நாட்டில் மீண்டும் எந்த விதமான யுத்தமும் ஏற்படாத வகையில் நாட்டில் அமைதியையும் நல்லிணக்கத்தையும் கட்டியெழுப்ப தற்போதைய அரசாங்கம் பாடுபடுவதாகவும் குறிப்பிட்டார். 

கடந்த போரின் போது பாதுகாப்புப் படையினரின் பயன்பாட்டிற்காக கையகப்படுத்தப்பட்ட வடக்கில் விடுவிக்கக்கூடிய அனைத்து காணிகளும் மக்களுக்காக விடுவிக்கப்படும். 

நாட்டைச் சுற்றியுள்ள கடல், தீவுகள் மற்றும் காணிகளை மக்களுக்காகப் பாதுகாப்பதில் அரசாங்கம் உறுதியாக உள்ளது என்றும், அதில் எந்த விதமான அழுத்தத்திற்கும் இடமளிக்கப் போவதில்லை என்றும் ஜனாதிபதி வலியுறுத்தியுள்ளார்.

பொது சேவையின் செயல்திறன் மற்றும் உற்பத்தித்திறனை அதிகரிக்கும் நோக்கில், அனைத்து அரசு நிறுவனங்களையும் இலக்காகக் கொண்டு, ‘க்ளீன் ஸ்ரீலங்கா’ தேசிய திட்டத்தின் கீழ், இன்று (01) முதல் 04 ஆம் தேதி வரை ‘சேயிரி வாரம்’ என்ற சிறப்புத் திட்டத்தை செயல்படுத்த அரசாங்கம் முடிவு செய்துள்ளது.

இந்த திட்டத்தின் முதன்மை நோக்கம், அரசு அதிகாரிகள் தங்கள் கடமைகளைச் செய்வதற்கு அமைதியான, ஆரோக்கியமான மற்றும் நன்கு ஒழுங்கமைக்கப்பட்ட பணிச்சூழலை உருவாக்குவதாகும். உற்பத்தித்திறன் என்ற ஐந்து மடங்கு கருத்தாக்கத்தைச் சேர்ந்த ‘சேயிரி’, ஒரு நிறுவனத்திற்குத் தேவையான மற்றும் தேவையற்றவற்றைக் கண்டறிந்து தேவையற்றவற்றை அப்புறப்படுத்துவதைக் குறிக்கிறது. அதன்படி, வரையறுக்கப்பட்ட இடத்தை உகந்த முறையில் பயன்படுத்துவதன் மூலம் அரசு நிறுவனங்களில் குவிந்துள்ள தேவையற்ற பொருட்களை அகற்றுவது முன்னுரிமைப் பணியாக இருக்கும்.

பொது நிர்வாகம், மாகாண சபைகள் மற்றும் உள்ளூராட்சி அமைச்சின் செயலாளர் அனைத்து அமைச்சகங்கள், துறைகள் மற்றும் பொது நிறுவனங்களின் தலைவர்களுக்கு வெளியிட்ட சுற்றறிக்கையின்படி, இந்த வாரத்தில் ஒவ்வொரு நாளும் காலை நேரத்தில் இரண்டு மணி நேரம் நிறுவனங்களை சுத்தம் செய்வதற்கும் ஒழுங்கமைப்பதற்கும் செலவிட வேண்டும். கட்டிடங்களின் உட்புற மற்றும் வெளிப்புற சூழலின் அழகைப் பராமரிப்பதிலும், நிறுவனத்திற்கான சாலைகளின் நுழைவாயில்கள் மற்றும் பக்கவாட்டுகளிலும், குறிப்பாக மாற்றுத்திறனாளி சமூகத்திற்குத் தேவையான வசதிகளை வழங்குவதிலும் கவனம் செலுத்தப்படுகிறது.

மேலும், பயன்படுத்த முடியாத சரக்குப் பொருட்கள், பழைய மோட்டார் வாகனங்கள் மற்றும் கோப்புகளை முறையான முறையின்படி அப்புறப்படுத்த அறிவுறுத்தல்கள் வழங்கப்பட்டுள்ளன.

இந்த ‘சேயிரி வாரம்’ மூலம் உருவாக்கப்பட்ட ஒழுங்கமைக்கப்பட்ட சூழலை ஒரு முறை மட்டும் செயல்படுத்தி நிறுத்துவதற்குப் பதிலாக, தொடர்ந்து பராமரிக்க ஒரு நிரந்தர முறையைத் தயாரிக்குமாறு அனைத்து நிறுவனத் தலைவர்களுக்கும் மேலும் தெரிவிக்கப்பட்டுள்ளது.

இன்று நம் நாட்டின் நிலைமை சோகமானதும் துரதிர்ஷ்டவசமானதுமாகவே காணப்படுகின்றன. நாட்டு மக்களுக்கு பல எதிர்பார்ப்புகளை வழங்கி, மக்களை ஏமாற்றி, பொய்யால் வெற்றி பெற்று, இன்று நாட்டின் 22 மில்லியன் மக்களை விரக்தியில் ஆழ்த்தியுள்ளனர். புற்றுநோய் வைத்தியசாலையில் நிலவும் வசதிகளைக் கூட பெற்றுக் கொடுக்கவோ, மருந்துப் பற்றாக்குறையைத் தீர்க்கவோ முடியாது போயுள்ளது. ஆயிரக்கணக்கான மருத்துவர்கள் நாட்டை விட்டு வெளியேறி வருகின்றனர். இதனால் மூளைசாலிகள் வெளியேற்றம் சார் பிரச்சினை எழுகிறது. இதற்கும் எந்த தீர்வும் இல்லை. மேலும், நாட்டின் அபிவிருத்திப் பயணத்தை விரைவுபடுத்த எந்த நடவடிக்கையும் எடுக்கப்படவில்லை. தொலைநோக்குப் பார்வை இல்லாத ஒரு அரசாங்கத்தால் நாடு ஆளப்படுகிறது என எதிர்க்கட்சித் தலைவர் தெரிவித்தார். 

அம்பாறை மாவட்டத்தில் ஐக்கிய மக்கள் சக்தியால் இம்முறை புதிதாக தெரிவான உள்ளூராட்சி மன்ற உறுப்பினர்களுடனான சந்திப்பு நேற்று (31) அம்பாறை நகரில் இடம்பெற்றது. இதில் கலந்து கொண்டு உரையாற்றும் போதே எதிர்க்கட்சித் தலைவர் சஜித் பிரேமதாச இவ்வாறு தெரிவித்தார். 

இது தொடர்பில் அவர் மேலும் தெரிவிக்கையில், 

பொருட்களின் விலைகள் அதிகரித்து, வருமானம் குறைந்து, தொழிற்சாலைகள் மூடப்பட்டு, மக்கள் நாட்டை விட்டு வெளியேறி வரும் சூழ்நிலையில், நாட்டின் மொத்த உள்நாட்டு உற்பத்தியில் 50% பங்களித்து, சுமார் 4 மில்லியன் மக்களுக்கு வாழ்வாதரத்தைப் பெற்றுத் தரும் நுண், சிறிய மற்றும் நடுத்தர தொழில்முனைவோரின் சொத்துக்கள் பராட்டே சட்டத்தின் மூலம் ஏலம் விடப்படுகின்றன. 

அரிசியில் தன்னிறைவு பெற்றிருந்த ஒரு நாட்டில், தற்போது அரிசிக்கு நியாயமான விலை கூட இல்லாமல் இறக்குமதி செய்யும் நிலைக்கு நாடு சரிந்துள்ளது. நுகர்வோரைப் பாதுகாக்கிறோம் என்ற போலிக்காரணத்தின் கீழ் மோசடிகள் மேற்கொள்ளப்படுவதே இதற்குக் காரணம். 

இன்று, நெல் விவசாயிகள் முதல் சகல விவசாயத்திலும் ஈடுபட்டுள்ள மக்கள் கைவிடப்பட்டுள்ளனர். விவசாயிகளை கோலோட்சுவோம் எனக் கூறி ஆட்சிக்கு வந்த இந்த வினைதிறன்ற்ற அரசாங்கம், இன்று விவசாயிகளை நிர்க்கதிக்கு ஆக்கியுள்ளது. இந்த மக்களுக்கு வழங்கிய வாக்குறுதிகளும் நம்பிக்கைகளும் எதிர்பார்ப்புகளும் நிறைவேற்றப்படவில்லை. ஜனாதிபதி பதவியையும், 159 பெரும்பான்மையையும், உள்ளூராட்சி மன்றங்களில் பெரும்பான்மை அதிகாரத்தையும் வைத்துக் கொண்டிருக்கும். 

இந்த அரசாங்கம் நாட்டிற்காக எதையும் செய்யவில்லை. இது தொடர்ந்தால், 2022 ஆம் ஆண்டு போலவே, நாடு கடனைத் திருப்பிச் செலுத்த முடியாமல் 2028 ஆம் ஆண்டிலும் மீண்டும் வங்குரோத்து நிலையை எட்டும். 

2028 ஆம் ஆண்டு முதல் 5.5 பில்லியன் டொலர் வருடாந்த வெளிநாட்டுக் கடனை அடைக்க வேண்டுமானால் 2025 ஆம் ஆண்டு முதல் 5% பொருளாதார வளர்ச்சி விகிதத்தை பேணிச் செல்ல வேண்டும். புள்ளிவிவரங்களின்படி, இந்த இலக்கை தற்போது அடைய முடியாது. மீண்டும் வங்குரோத்துயடையக் கூடாது என பிரார்த்திக்கின்றேன். 

மக்களின் அழுத்தத்தையும் அதிருப்தியையும் சுரண்டி தனிப்பட்ட அரசியல் ஆதாயங்களைப் பெறுவதற்கு நான் தயார் இல்லை. IMF உடன் பேச்சுவார்த்தை நடத்தி ஒப்பந்தத்தை திருத்துமாறு அரசாங்கத்திடம் கேட்டுக் கொண்டாலும், புதிய அரசாங்கமாக இந்த அரசாங்கம் அதனைச் செய்யவில்லை. நாட்டு மக்கள் இவற்றை புரிந்து கொள்ள வேண்டும் என தெரிவித்தார்.

இலங்கை கடற்படையினர், 2025 ஆகஸ்ட் 27 மற்றும் 29 ஆம் திகதிகளில் மன்னார், வன்காலை பகுதி மற்றும் யாழ்ப்பாணம், நெடுந்தீவுக்கு அருகிலுள்ள உள்ளூர் கடல் பகுதியில் நடத்திய சிறப்பு தேடுதல் நடவடிக்கைகளின் போது, இரண்டு (02) டிங்கி படகுகள், ஐந்து (05) சந்தேக நபர்கள் மற்றும் நூற்று இருபத்தொரு (121) கிலோகிராம் கேரள கஞ்சாவை கைப்பற்றினர்.

அதன்படி, 2025 ஆகஸ்ட் 29 ஆம் தேதி நெடுந்தீவுக்கு அருகிலுள்ள இலங்கைக் கடல் பகுதியில் வடக்கு கடற்படை கட்டளையுடன் இணைக்கப்பட்ட இலங்கை கடற்படை கப்பல் ரணவிக்ரம நடத்திய தேடுதல் நடவடிக்கையின் போது, குறித்த கடற்பகுதியில் பயணித்த இரண்டு (02) சந்தேகத்திற்கிடமான டிங்கிகள் அவதானிக்கப்பட்டு பரிசோதிக்கப்பட்டன. அப்போது, நான்கு (04) சந்தேக நபர்களும் இரண்டு (02) டிங்கிகளும், குறித்த டிங்கிகளுக்குள் இருந்த நூற்று பத்தொன்பது (119) கிலோகிராம் ஐநூறு (500) கிராம் கேரள கஞ்சாவுடன் கைது செய்யப்பட்டனர்.

இதற்கிடையில், ஆகஸ்ட் 27 ஆம் திகதி மன்னார் வன்காலை பகுதியில் வடமத்திய கடற்படை கட்டளையைச் சேர்ந்த இலங்கை கடற்படை கப்பல்களான புஸ்ஸதேவ மற்றும் கஜபா, மன்னார் காவல் பிரிவின் குற்றப் புலனாய்வுப் பிரிவின் ஒத்துழைப்புடன் நடத்தப்பட்ட தேடுதல் நடவடிக்கையின் போது, ஒரு (01) சந்தேக நபர் இரண்டு (02) கிலோகிராம் முன்னூறு (300) கிராம் கேரள கஞ்சாவுடன் கைது செய்யப்பட்டார்.

இந்த நடவடிக்கைகளின் மூலம் கடற்படையால் கைப்பற்றப்பட்ட நூற்று இருபத்தொரு (121) கிலோகிராம் எண்ணூறு (800) கிராம் கேரள கஞ்சா மொத்த மதிப்பு இருபத்தேழு (27) மில்லியன் ரூபாய்க்கு மேல் இருக்கும் என்று நம்பப்படுகிறது.

மேலும், நெடுந்தீவுக்கு அருகிலுள்ள கடலில் கடற்படையினரால் கைது செய்யப்பட்ட சந்தேக நபர்கள் 26 முதல் 51 வயதுக்குட்பட்ட மாதம்பே மற்றும் ஊர்காவற்துறையைச் சேர்ந்தவர்கள் என அடையாளம் காணப்பட்டதுடன், மன்னார் வன்காலை பகுதியில் சிக்கிய சந்தேக நபர், வன்காலை பகுதியைச் சேர்ந்த 19 வயதுடையவர் என அடையாளம் காணப்பட்டுள்ளார். குறித்த, ஐந்து (05) சந்தேக நபர்கள், கேரள கஞ்சா தொகை மற்றும் இரண்டு (02) டிங்கிகள் மேலதிக சட்ட நடவடிக்கைகளுக்காக நெடுந்தீவு மற்றும் வன்காலை காவல் நிலையங்களில் ஒப்படைக்கப்பட்டன.

எந்தச் சேவையாக இருந்தாலும் அதை நேர்மையாகவும் வெளிப்படைத் தன்மையாகவும் முன்னெடுக்கவேண்டும். அவ்வாறு செய்யும்போது சவால்கள், அழுத்தங்கள் வரத்தான் செய்யும். ஆனால் நேர்மையாகவும், வெளிப்படையாகவும் செயற்பட்டால் எப்போதும் யாருக்கும் பயப்படவேண்டியதில்லை என வடக்கு மாகாண கௌரவ ஆளுநர் நா.வேதநாயகன் அவர்கள் தெரிவித்தார்.

மறைந்த ரகுநாதன் குடும்பத்தினரின் நிதி அனுசரணையுடன், ரட்ணம் பவுண்டேசனின் ஏற்பாட்டில், விஷன் குளோபல் எம்பவமன்ர் ஊடாக இலங்கையிலுள்ள பல்கலைக்கழகங்களில் கல்வி பயிலும் மாணவர்களில் நேர்முகத்தேர்வு மூலம் தெரிவு செய்யப்பட்ட மாணவர்களுக்கான புலமைப்பரிசில் வழங்கும் நிகழ்வு வவுனியாவிலுள்ள மாகாண தகவல் தொழில்நுட்ப மற்றும் தொலைக்கல்வி மையத்தில் இன்று ஞாயிற்றுக்கிழமை (31.08.2025) விஷன் குளோபல் எம்பவமன்ர் தலைவர் ந.தெய்வேந்திரராஜா தலைமையில் நடைபெற்றது.

நிகழ்வில் பிரதம விருந்தினராகக் கலந்துகொண்ட ஆளுநர், மாணவர்களுக்கான புலமைப்பரிசிலுக்குரிய சான்றிதழ்களை வழங்கி வைத்தார். அங்கு அவர் தனது உரையில்,

பல்கலைக்கழகத்தில் பட்டப்படிப்பை பூர்த்தி செய்கின்றவர்களில் பெரும்பான்மையானோர் புத்தகப்பூச்சிகளாகவே இருக்கின்றனர். அவர்கள் சமூகத்துக்கும் உதவுவதில்லை. ஆனால் இன்று உங்களுக்கு கற்கின்ற காலம் முழுவதுக்கும் புலமைப்பரிசில் நிதியை வழங்குகின்றார்கள். அத்துடன் வெறுமனே நிதியை வழங்கிவிட்டுச் செல்லாமல், உங்களுக்கு தலைமைத்துவப் பயிற்சியையும் தந்திருக்கின்றார்கள். நிச்சயம் அது உங்களில் மாற்றத்தை ஏற்படுத்தும். இப்போது கல்வி கற்றிருந்தால் மாத்திரம் போதாது. ஒவ்வொருவரும் திறனை வளர்த்துக்கொள்ள வேண்டும். இவர்கள் உங்களுக்கு நிதியுதவியுடன் அந்தத் திறனை வளர்ப்பதற்கு ஏதுவான களத்தையும் ஏற்படுத்தித் தந்திருக்கின்றார்கள்.

நாம் மற்றையவர்களுக்கு இரங்குதல் – உதவி செய்தல் ஆகிய பண்புகளை வளர்த்துக்கொள்ள வேண்டும். ஏழை எளியவர்கள் எங்களை நாடி வந்தால் அவர்களுடன் நாம் கதைப்பதால் அவர்களுக்கு உதவி செய்வதால் ஒருபோதும் நாம் சிறுமைப்பட்டு போகமாட்டோம். ஆனால் எங்கள் அதிகாரிகளில் சிலர் தாம் கதிரைகளிலிருந்தால், தங்களைப் பெரியவர்கள் என நினைத்துக்கொண்டு ஏழை, எளியவர்களுக்கு உதவுவதற்கு விரும்புகின்றார்கள் இல்லை. எதிர்காலத்தில் அத்தகைய பதவிகளுக்கு வர இருக்கும் நீங்களாவது சரியான திசையில் வளரவேண்டும். எங்களுக்கு வழங்கப்பட்ட இந்தப் பதவிகள் சேவை செய்வதற்கானது. அத்தோடு நீங்கள் ஒவ்வொருவரும் நேரிய சிந்தனையையும் வளர்த்துக்கொள்ளவேண்டும். எதையும் எங்களால் செய்ய முடியும். முயன்றால் முடியாதது என்று எதுவுமில்லை. இதை நீங்கள் ஒவ்வொருவரும் மனதிலிருத்தவேண்டும், என்றார் ஆளுநர்.

இந்த நிகழ்வில் வவுனியாப் பல்கலைக்கழக துணைவேந்தர் பேராசிரியர் அ.அற்புதராஜா, உதவிப் பதிவாளர் ஜெயக்குமார், விஷன் குளோபல் எம்பவமன்ர் நிறுவன பிரதம நிறைவேற்று அதிகாரி அன்ரனி ஜீவரட்ணம் மயூரன் ஆகியோரும் கலந்துகொண்டனர்.

ஐக்கிய தேசிய கட்சியின் வருடாந்த மாநாட்டில் கலந்து கொள்ளுமாறு எதிர்க்கட்சி தலைவர் சஜித் பிரேமதாசவுக்கு முன்னாள் ஜனாதிபதி ரணில் விக்ரமசிங்க அழைப்பு விடுத்துள்ளார். 

எதிர்வரும் 6ஆம் திகதி இடம்பெறவுள்ள குறித்த மாநாடு தொடர்பில் கருத்துரைத்த ரணில் விக்ரமசிங்க, எதிர்க்கட்சிகளுக்கு இடையேயான ஒற்றுமையே முதல் படியாக இருக்கும் என்று குறிப்பிட்டதாக ஆங்கில ஊடகமொன்று செய்தி வெளியிட்டுள்ளது.

அதேநேரம், ஐக்கிய தேசிய கட்சியிலிருந்து பிரிந்து சென்று ஐக்கிய மக்கள் சக்தியுடன் இணைந்த உறுப்பினர்களுக்கு விதிக்கப்பட்டுள்ள தடையும் நீக்கப்படும் என்று அவர் குறிப்பிட்டுள்ளார். 

அரச நிதியைப் பயன்படுத்தித் தனிப்பட்ட விஜயமாக பிரித்தானியாவுக்கு சென்ற குற்றச்சாட்டில் கைது செய்யப்பட்ட முன்னாள் ஜனாதிபதி ரணில் விக்ரமசிங்க பின்னர் பிணையில் செல்ல அனுமதிக்கப்பட்டுள்ளார். 

இந்தநிலையில் அவர் எதிர்க்கட்சிகளை ஒன்றிணைப்பதற்கு முயற்சிப்பதாக ஐக்கிய தேசிய கட்சியின் தகவல்கள் தெரிவிப்பதாகக் குறித்த ஆங்கில ஊடகம் செய்தி வெளியிட்டுள்ளது. 

எதிர்க்கட்சி உறுப்பினர்கள் கலந்து கொள்வதற்கு வசதியாக, குறித்த மாநாட்டை பொதுவான ஒரு இடத்திற்கு மாற்றுவதற்கும் ஐக்கிய தேசிய கட்சி தீர்மானித்துள்ளது. 

2020ஆம் ஆண்டு ஏற்பட்ட கடுமையான பிளவுக்குப் பின்னர் சஜித் பிரேமதாசவுக்கும் ரணில் விக்ரமசிங்கவுக்கும் இடையிலான உறவு வலுவடைவதாகத் தெரிவிக்கப்படுகிறது. 

அதேநேரம், குறித்த மாநாட்டில் பங்கேற்குமாறு முன்னாள் ஜனாதிபதிகளான மஹிந்த ராஜபக்ஷ, மைத்ரிபால சிறிசேன மற்றும் சந்திரிக்கா குமாரதுங்க ஆகியோருக்கும் அழைப்பு விடுக்கப்பட்டுள்ளதாக ஐக்கிய தேசிய கட்சியின் தகவல்கள் தெரிவிக்கின்றன. 

அத்துடன் இந்த விடயம் தொடர்பில் கருத்துரைத்துள்ள ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டார, ஐக்கிய தேசிய கட்சியின் மாநாட்டில் பங்கேற்பதற்கான அழைப்பு கிடைத்துள்ளதாக உறுதிப்படுத்தியுள்ளார்.

எல்ல 9ஆர்ச் பாலத்திற்கு அருகிலுள்ள மலைப்பகுதியில் இன்று (31) தீ பரவி வருவதாக பதுளை பேரிடர் மேலாண்மை மையம் தெரிவித்துள்ளது.

தீயைக் கட்டுப்படுத்த வன காப்பீட்டு அதிகாரிகள் மற்றும் காவல்துறையினர் தேவையான நடவடிக்கைகளை எடுத்து வருவதாகவும் மையம் தெரிவித்துள்ளது.

விடுமுறை நாள் என்பதால், உள்நாட்டு மற்றும் வெளிநாட்டு சுற்றுலாப் பயணிகள் இந்த நாட்களில் எல்ல பகுதியில் அதிக எண்ணிக்கையில் உள்ளனர் என்று மையம் தெரிவித்துள்ளது.

நிலவும் வறண்ட வானிலையால் தீ வேகமாக பரவி வருவதாகவும், யாரோ ஒருவரால் பற்றவைக்கப்பட்ட தீ இந்த வழியில் மலையை நோக்கி பரவி வருவதாகவும் பதுளை பேரிடர் மேலாண்மை மையம் தெரிவித்துள்ளது.

முன்னாள் ஜனாதிபதி ரணில் விக்ரமசிங்கவின் செயலாளர் சமன் ஏக்கநாயக்க வாக்குமூலம் அளிக்க குற்றப் புலனாய்வுத் திணைக்களத்துக்கு அழைக்கப்பட்டுள்ளதாகத் தெரிவிக்கப்பட்டுள்ளது.

முன்னாள் ஜனாதிபதி ரணில் விக்ரமசிங்கவின் இங்கிலாந்து பயணம் மற்றும் வருகைக்காக அரச நிதியைத் தவறாகப் பயன்படுத்திய குற்றச்சாட்டு குறித்து வாக்குமூலம் அளிக்க சமன் ஏக்கநாயக்கவை நாளை திங்கட்கிழமை (01) முன்னிலையாகுமாறு குற்றப்புலனாய்வுத் திணைக்களம் அழைப்பு விடுத்துள்ளது.