இலங்கைக் கடல் எல்லைக்கு அருகில் தாக்குதலுக்குள்ளான ஈரானிய கப்பலில் இருந்தவர்களைக் காப்பாற்றியதோடு, ஈரானின் மற்றொரு கப்பலை இலங்கைத் துறைமுகத்தில் தரிப்பதற்கும் அதில் பயணம் செய்த 208 பேருக்கு அடைக்கலம் கொடுப்பதற்கும் மனிதாபிமான அடிப்படையில் தீர்மானம் மேற்கொண்ட, ஜனாதிபதி அனுர குமார திசாநாயக்கவுக்கு, அகில இலங்கை மக்கள் காங்கிரஸ் தலைவரும் நாடாளுமன்ற உறுப்பினருமான றிஷாட் பதியுதீன் தனது பாராட்டுக்களையும் நன்றிகளையும் தெரிவிப்பதாகக் கூறியுள்ளார்.

ஜனாதிபதி எடுத்த இந்தத் தீர்மானத்தின் மூலம் ‘மனிதாபிமானமே எதிலும் முதன்மையானது’ என்பதை – அவர் நிரூபித்துள்ளார் என்றும், இது – இலங்கையர்கள் அனைவரும் பெருமை கொள்ளும் தருணம் எனவும் றிஷாட் பதியுதீன் குறிப்பிட்டுள்ளார்.

”மத்திய கிழக்கில் நடந்து கொண்டிருக்கும் யுத்தம்  – ஈரான் மீது திணிக்கப்பட்டது. அந்த நாட்டில் ஆயிரக்கணக்கான மக்கள், அமெரிக்க – இஸ்ரேல் கூட்டுத் தாக்குதலில் கொல்லப்பட்டுள்ளனர். இந்தத் தருணத்தில் ஈரானின் இரண்டு கப்பல்களிலும் பயணித்த மொத்தம் 240 ஈரானிய பிரஜைகளை, ஜனாதிபதியின் துணிவான முடிவின் மூலம் காப்பற்றக் கிடைத்தமையினால், உலக வரலாற்றில் இலங்கை உயர்ந்து நிற்கிறது” என்றும் றிஷாட் பதியுதீன் கூறியுள்ளார்.

‘இந்த விவகாரம் தொடர்பில் பொய்யான, பயமுறுத்தும் நோக்குடனான அதிகமான கருத்துக்கள் முன்வைக்கப்பட்டன. நாட்டின் கௌரவத்தையும் மனித உயிர்களை பாதுகாக்கும் வகையிலும் நாடென்ற வகையில் சர்வதே உடன்பாடுகளுக்கு எமது அர்ப்பணிப்பை வெளிப்படுத்தும் வகையில்தான் நாம் இந்த தலையீட்டை செய்தோம்.

இது நாடென்ற வகையில் மிகவும் தைரியமான மனிதாபிமான முன்னெடுப்பாகும்’ என்று, ஜனாதிபதி அனுர குமார திசாநாயக் தெரிவித்துள்ளமையை சுட்டிக்காட்டியுள்ள றிஷாட் பதியுதீன்; “இதன் மூலம் மனிதாபிமானமுள்ள தலைமைத்துவத்தின் பண்பினை – ஜனாதிபதியிடத்தில் நான் காண்கிறேன்” எனவும் குறிப்பிட்டுள்ளார்.

‘ஜனாதிபதியின் இந்த நடவடிக்கையினால், அவர் அமெரிக்காவை பகைத்துக் கொள்ள நேரிடும்’ என்று வெளியிடப்படும் குரூரமான கருத்துக்களை, தான் கடுமையாக எதிர்ப்பதாகவும், ”ஒரு நன்மையை செய்யும் போது, அதன் பின்விளைவுளை கருணையுள்ள மனிதர்கள் ஆராய்ந்து கொண்டிருக்க மாட்டார்கள்” என்றும், அகில இலங்கை மக்கள் காங்கிரஸ் தலைவர் றிஷாட் பதியுத்தீன் சுட்டிக்காட்டியுள்ளார்.

”இலங்கையின் மிக நீண்டகால நண்பராக ஈரான் இருந்து வருகிறது. இலங்கை பெரும் அனர்த்தங்களில் சிக்கித் தவித்த போதெல்லாம், ஓடிவந்து ஈரான் உதவியிருக்கிறது. அந்த வகையிலும், ஈரானுக்கு உதவ – இலங்கை கடமைப்பட்டுள்ளது” என்றும் அவர் கூறியுள்ளார்.

ஈரானின் கப்பல்களில் இருந்த நூற்றுக்கணக்கான மனித உயிர்களை காப்பாற்றுவதற்கு ஜனாதிபதி எடுத்த தீர்மானத்தை நடைமுறைப்படுத்திய படையினரையும் பராட்டி – நன்றி தெரிவிப்பதாகவும் றிஷாட் பதியுதீன் மேலும் தெரிவித்துள்ளார்.

சமாதான நீதவான் பதவி இனி அரசியல் காரணங்களுக்காக வழங்கப்படமாட்டாது என நீதி மற்றும் தேசிய ஒருமைப்பாட்டு அமைச்சர் ஹர்ஷண நாணயக்கார தெரிவித்தார். 

இன்று (06) பாராளுமன்றில் உரையாற்றிய அமைச்சர், ஒரு சமாதான நீதவான் தொடர்பில் முறைப்பாடு செய்வதற்கு தற்போது முறையான வழிமுறை ஒன்று உருவாக்கப்பட்டுள்ளதாகக் குறிப்பிட்டார். 

அதேபோல், நாடு முழுவதிலும் உள்ள சமாதான நீதவான்களின் தகவல்கள் அடங்கிய தரவுத்தளம் ஒன்று தயாரிக்கப்பட்டு வருவதாகவும், இதன் மூலம் ஒரு பிரதியை அத்தாட்சிப்படுத்தும் நபர் உண்மையான சமாதான நீதவான்தானா என்பதை உறுதிப்படுத்திக் கொள்ள முடியும் என்றும் அவர் கூறினார். 

இனிவரும் காலங்களில் இப்பதவிக்கான நியமனங்களை வழங்கும்போது, அதிகபட்ச வயது எல்லை 75 வயது வரை மட்டுமே அமையும் என்றும் அமைச்சர் சுட்டிக்காட்டினார். 

இனி இந்தப் பதவி அரசியல் ரீதியாக வழங்கப்படமாட்டாது. அதேபோல், ஒவ்வொரு இரண்டு வருடங்களுக்கு ஒருமுறை சுய விபரக் கோவையை புதுப்பிப்பதற்கான புதிய முறையை நாம் உருவாக்கியுள்ளோம். 

கிராம உத்தியோகத்தர் மற்றும் பிரதேச செயலகம் ஊடாக இதனை உறுதிப்படுத்தும் நடைமுறை பின்பற்றப்படும். 

தவறிழைக்கும் சமாதான நீதவான்களுக்கு எதிராக முறைப்பாடு செய்ய வட்ஸ்அப் இலக்கம், மின்னஞ்சல் மற்றும் தொலைபேசி இலக்கம் ஆகியவற்றை நாம் தயார் செய்துள்ளோம். 

முன்னர் நியமிக்கப்பட்டவர்களின் பதவிகளை உடனடியாக ரத்து செய்வது குறித்து இன்னும் தீர்மானிக்கவில்லை. 

சிலர் 5-10 வருடங்களாக அனுபவம் பெற்றுள்ளனர். ஆனால், மிக விரைவில் தரவுத்தளம் ஒன்றை உருவாக்கும் பணியை முன்னெடுப்போம். அப்போது, எங்கு முத்திரை இடப்பட்டாலும் அவர் தகுதியுள்ள சமாதான நீதவான்தானா என்பதை எம்மால் அறிய முடியும். 

சிக்கலான ஆவணங்களை வாசித்துப் புரிந்துகொள்வதற்கு முறையான மனநிலை மற்றும் ஆரோக்கியம் இருக்க வேண்டும் என்பதால், எதிர்கால நியமனங்களுக்கான வயது எல்லை 75 என குழு தீர்மானித்துள்ளது. 

அதனை மாற்றுவதற்கான நியாயமான காரணங்கள் எதுவும் இதுவரை முன்வைக்கப்படவில்லை எனத் தெரிவித்தார்.

இலங்கையின் தெற்கு கடற்பரப்பில் ஈரான் போர்க்கப்பல் மீது அமெரிக்க நீர்மூழ்கிக் கப்பல் நடத்திய டார்பிடோ (torpedo) தாக்குதலில் 87 பேர் உயிரிழந்துள்ளனர்,. இந்தச் சம்பவம் மத்திய கிழக்கு நாடுகளுக்கு இடையிலான போரின் எல்லையை விரிவுபடுத்தியுள்ளது.

கடந்த புதன்கிழமை அதிகாலை, இலங்கையின் காலி (Galle) துறைமுகத்திலிருந்து 19 கடல் மைல் தொலைவில் IRIS Dena என்ற ஈரான் போர்க்கப்பல் அமெரிக்காவினால் மூழ்கடிக்கப்பட்டது,. சர்வதேச கடல் பகுதியில் இப்போர் கப்பல் பாதுகாப்பாக இருப்பதாக நினைத்த வேளையில், அமெரிக்க நீர்மூழ்கிக் கப்பல் இதனைத் தாக்கியதாக அமெரிக்க பாதுகாப்புச் செயலாளர் பீட் ஹெக்செத் (Pete Hegseth) உறுதிப்படுத்தியுள்ளார். பென்டகன் வெளியிட்ட வீடியோ ஆதாரத்தின்படி, கப்பலின் பின்புறத்தில் ஏற்பட்ட பெரும் வெடிப்பினால் அது கடலில் மூழ்கியது தெரியவந்துள்ளது.

தாக்குதலுக்குள்ளான கப்பலில் இருந்து இதுவரை 32 பேர் உயிரிழந்த நிலையில் மீட்கப்பட்டுள்ளனர், மேலும் 87 உடல்கள் மீட்கப்பட்டு பிரேத அறைகளில் வைக்கப்பட்டுள்ளன,. காணாமல் போயுள்ள எஞ்சிய 10 பேரைத் தேடும் பணியில் இலங்கை இராணுவ மீட்புக் குழுவினருடன் இணைந்து இந்தியக் கடற்படையும் ஈடுபட்டுள்ளது.

இதற்கிடையில், இலங்கை கடற்பரப்பில் உள்ள இரண்டாவது ஈரான் கப்பலில் இருப்பவர்களின் உயிரைப் பாதுகாக்கத் தேவையான நடவடிக்கைகளை எடுத்து வருவதாக இலங்கை அரசாங்க செய்தித் தொடர்பாளர் நலிந்த ஜயதிஸ்ஸ தெரிவித்துள்ளார்,.

இந்தத் தாக்குதல் குறித்து எக்ஸ் (X) தளத்தில் பதிவிட்டுள்ள ஈரான் வெளியுறவு அமைச்சர் அப்பாஸ் அரக்சி, “அமெரிக்கா தான் செய்த இந்தச் செயலுக்காகப் கசப்பான விளைவுகளைச் சந்திக்கும்” என எச்சரித்துள்ளார். சுமார் 130 மாலுமிகளைக் கொண்டிருந்த இந்த IRIS Dena போர்க்கப்பல், பிப்ரவரி 18 முதல் 25 வரை வங்காள விரிகுடாவில் இந்தியா நடத்திய கடற்படைப் பயிற்சியில் பங்கேற்றுவிட்டுத் திரும்பிக் கொண்டிருந்தபோது இந்தத் தாக்குதல் நடத்தப்பட்டுள்ளது.

உயிரிழந்தவர்களின் உடல்களைத் தாயகம் கொண்டு செல்ல ஈரான் கோரிக்கை விடுத்துள்ள நிலையில், அதற்கான கால அவகாசம் இன்னும் தீர்மானிக்கப்படவில்லை என இலங்கை அதிகாரிகள் தெரிவித்துள்ளனர். இந்தச் சம்பவம் பிராந்தியத்தில் பெரும் பாதுகாப்பு நெருக்கடியை ஏற்படுத்தியுள்ளமை குறிப்பிடத்தக்கது.

தித்வா புயலினால் ஏற்பட்டுள்ள பாதிப்புகளுக்கு முறையான தீர்வு கோரியும், தேங்கியுள்ள வெள்ள நீரை வெளியேற்ற வலியுறுத்தியும் வண்ணாத்திவில்லு பிரதேச செயலகத்திற்கு முன்பாக இன்று காலை கவனயீர்ப்பு போராட்டம் ஒன்று முன்னெடுக்கப்பட்டது.

கடந்த ஆண்டு ஏற்பட்ட தித்வா புயல் காரணமாக புத்தளம், வண்ணாத்திவில்லு பிரதேச செயலகப் பிரிவுக்குட்பட்ட கரைத்தீவு சின்ன நாகவில்லு பகுதி கடுமையாகப் பாதிக்கப்பட்டது. இன்றுடன் 102 நாட்கள் கடந்துள்ள நிலையிலும், அப்பகுதியில் சூழ்ந்துள்ள வெள்ள நீர் இதுவரையில் வெளியேற்றப்படவில்லை எனப் பாதிக்கப்பட்ட மக்கள் கவலை தெரிவிக்கின்றனர்.

வெள்ளத்தினால் வாழ்வாதாரத்தை இழந்து தவிக்கும் 26 குடும்பங்கள் ஒன்றிணைந்து முன்னெடுத்த இந்த ஆர்ப்பாட்டத்தில் பல முக்கிய கோரிக்கைகள் முன்வைக்கப்பட்டன. அந்த வகையில்,

• வெள்ள நீர் வெளியேற்றம்: நூறு நாட்களைக் கடந்தும் வடியாமல் இருக்கும் வெள்ள நீரை அகற்ற உடனடி நடவடிக்கை எடுக்க வேண்டும்.
• இழப்பீடு வழங்கல்: புயல் மற்றும் வெள்ளத்தினால் ஏற்பட்ட சொத்து மற்றும் வாழ்வாதார இழப்புகளுக்கு உரிய நஷ்டஈடு வழங்கப்பட வேண்டும்.
• நிரந்தர தீர்வு: தொடர்ச்சியாக வெள்ள அபாயத்திற்குள்ளாகும் இப்பகுதி மக்களுக்குப் பதிலாக, பாதுகாப்பான வேறு இடங்களில் வீடுகளை அமைத்துக் கொடுக்க அரசாங்கம் முன்வர வேண்டும் என ஆர்ப்பாட்டத்தில் ஈடுபட்ட மக்கள் வலியுறுத்தினர்.

பதாதைகளை ஏந்தியவாறு அமைதியான முறையில் போராட்டத்தை முன்னெடுத்த மக்கள், இறுதியில் வண்ணாத்திவில்லு உதவி பிரதேச செயலாளர் எஸ். பிரபாகரன் அவர்களை நேரில் சந்தித்து தமது கோரிக்கைகள் அடங்கிய மகஜர் ஒன்றைக் கையளித்தனர்.

சுமார் மூன்று மாதங்களுக்கு மேலாகியும் அடிப்படை வசதிகளின்றி தவிக்கும் தமக்கு, அதிகாரிகள் இனியாவது விரைவான தீர்வை வழங்க வேண்டும் என்பதே சின்ன நாகவில்லு மக்களின் எதிர்பார்ப்பாக உள்ளமை குறிப்பிடத்தக்கது.

ஏகாதிபத்தியவாதிகளான அமெரிக்கா – இஸ்ரேல் ஆகியவற்றின் கூட்டு நடவடிக்கையின் மூலம் ஈரான் மீது மேற்கொள்ளப்பட்ட ஆக்கிரமிப்புத் தாக்குதலில் படுகொலை செய்யப்பட்ட ஈரானின் ஆன்மீகத் தலைவர் அயத்துல்லா அலி காமெய்னி அவர்களின் மறைவை முன்னிட்டு, அகில இலங்கை மக்கள் காங்கிரஸின் தலைவரும் பாராளுமன்ற உறுப்பினருமான ரிஷாட் பதியுதீன் மற்றும் பாராளுமன்ற உறுப்பினர் NTM தாஹிர் ஆகியோர் தமது ஆழ்ந்த அனுதாபங்களை பதிவு செய்துள்ளனர்.

இன்று (05) கொழும்பிலுள்ள ஈரான் தூதரகத்திற்கு விஜயம் மேற்கொண்டு, அங்குள்ள தூதுவர் அலிடெர்ஷா டெல்கொஷ்வை சந்தித்து தனது அனுதாபத்தைத் பகிர்ந்துகொண்டதுடன், இரங்கல் பதிவேட்டிலும் தமது இரங்கல் செய்தியை பதிவு செய்தனர்.

இந்த விஜயத்தின் போது, அகில இலங்கை மக்கள் காங்கிரஸின் தேசிய அமைப்பாளரான அஷ்ரப் தாஹீர் ஆகியோரும் கலந்து கொண்டு தங்களது இரங்கலை பதிவு செய்தமை குறிப்பிடத்தக்கது.

இலங்கையில் தற்போது நிலவும் எரிபொருள் தட்டுப்பாடு காரணமாக இந்த ஆண்டுக்கான நெல் அறுவடை நடவடிக்கைகள் பெரும் அச்சுறுத்தலுக்கு உள்ளாகியுள்ளதாக தேசிய விவசாயிகள் சங்கத்தின் தலைவர் அனுராதா தென்னகோன் எச்சரிக்கை விடுத்துள்ளார்.

அரசாங்கத்திடம் தற்போது ஒரு மாதத்திற்கு மட்டுமே போதுமான எரிபொருள் இருப்பு உள்ளதாகக் கூறப்படுகிறது, ஆனால் சுமார் 800,000 ஏக்கர் நெல் வயல்களை அறுவடை செய்ய குறைந்தபட்சம் எட்டு மில்லியன் லிட்டர் டீசல் தேவைப்படுகிறது என அவர் சுட்டிக்காட்டினார்.

தற்போது அறுவடை பணிகள் நடைபெற்று வரும் அனுராதபுரம், பொலன்னறுவை மற்றும் மகாவலி மண்டலம் சி உள்ளிட்ட முக்கிய விவசாய மாவட்டங்களில் உள்ள விவசாயிகள் இந்த எரிபொருள் தட்டுப்பாட்டினால் கடுமையாக பாதிக்கப்பட்டுள்ளதாக ‘டெய்லி மிரர்’ (Daily Mirror) இதழுக்கு அளித்த பேட்டியில் தென்னகோன் தெரிவித்தார்.

ஒரு ஏக்கர் நெற்பயிரை அறுவடை செய்ய ஒரு அறுவடை இயந்திரத்திற்கு 10 முதல் 12 லிட்டர் டீசல் தேவைப்படுவதாக தெரிவித்த தென்னகோன், “அரசாங்கத்திடம் உள்ள இந்த மட்டுப்படுத்தப்பட்ட எரிபொருள் இருப்பை முறையாக நிர்வகித்து, விவசாய நடவடிக்கைகளுக்கு முன்னுரிமை அளிக்காவிட்டால், எதிர்காலத்தில் நாடு கடுமையான உணவு நெருக்கடியை சந்திக்க நேரிடும்” என்று எச்சரித்துள்ளார்.

அறுவடை இயந்திரங்கள் அல்லது நீர் இறைக்கும் பம்புகளை எரிபொருள் நிலையங்களுக்கு நேரடியாகக் கொண்டு செல்வது நடைமுறைக்கு சாத்தியமற்றது. இதன் காரணமாக, விவசாயிகள் வழக்கமாக பீப்பாய்களில் (Barrels) அல்லது மாட்டு வண்டிகள் மூலமே எரிபொருளைச் சேகரித்து எடுத்துச் செல்வது வழக்கம்.

இருப்பினும், பல எரிபொருள் நிலையங்கள் வெளிப்பக்க போக்குவரத்திற்காக (external transport) எரிபொருளை வழங்க மறுப்பதாக குற்றம் சாட்டியுள்ள தென்னகோன் இந்தச் செயல் விவசாயிகளை மிகவும் இக்கட்டான நிலைக்குத் தள்ளியுள்ளதாகவும் தெரிவித்துள்ளமை குறிப்பிடத்தக்கது.