அன்றைய தினம் காலை 11 மணி முதல் இரவு 9 மணிவரை நீர் வெட்டு அமுலாகவுள்ளது.

இதன்படி, கொலன்னாவ நகரசபை பகுதி, மொரகஸ்முல்ல, ராஜகிரிய, ஒபேசேகரபுர, பண்டாரநாயக்கபுர, அத்துல்கோட்டே, நாவல, கொஸ்வத்தை மற்றும் ராஜகிரியவில் இருந்து நாவல திறந்த பல்கலைக்கழகம் வரையான பிரதான வீதி மற்றும் அதனுடன் இணைந்த அனைத்து வீதிகளிலும் நீர் விநியோகம் தடைப்படவுள்ளது.

கொலன்னாவ நீர்விநியோக நிலையத்தின் பிரதான கட்டமைப்பில் மேற்கொள்ளப்படவுள்ள அத்தியாவசிய பராமரிப்பு பணிகள் காரணமாக இவ்வாறு நீர்வெட்டு அமுல்படுத்தப்படவுள்ளதாக தெரிவிக்கப்பட்டுள்ளது.

நேற்று முன்தினம் நாடாளுமன்ற உறுப்பினர் இராசமாணிக்கம் சாணக்கியனுக்கும், வெளிவிவகார அமைச்சர் அலி சப்ரிக்கும் இடையில் இடம்பெற்ற விவாதத்தின் போது, அன் பார்ளிமன்றி அதாவது நாடாளுமன்றத்திற்கு ஒவ்வாத சொற்பிரயோகத்தை அலி சப்ரி பயன்படுத்தினார் என்ற குற்றச்சாட்டு இன்று முன்வைக்கப்பட்டது.

நாடாளுமன்ற உறுப்பினர் சாணக்கியன் இதனை தமது நாடாளுமன்ற சிறப்புரிமை மீறப்பட்டதாக கூறி சபாநாயகரிடம் முறையிட்டார்.

எனினும், அவ்வாறான வர்த்தை பிரயோகத்தை தாம் பயன்படுத்தவில்லை என்றும் அவ்வாறு பயன்படுத்தியிருந்தால் மனித பண்பு கொண்டவர் என்ற அடிப்படையில் அதற்காக மன்னிப்பு கோரவும் அந்த சொல்லாடலை மீளப் பெற தயார் எனவும் வெளிவிவகார அமைச்சர் அலிசப்ரி குறிப்பிட்டார்.

இந்த பதிலுக்கு பின்னர் அலி சப்ரிக்கும், சாணக்கியனுக்கும் இடையில் மீண்டும் வாக்குவாதம் இடம்பெற்றது.

இதன்போது, தமது அரசியலை முன்னிலைப்படுத்தி, சாணக்கியன் செயற்படுவதாக அலி சப்ரி குற்றம் சுமத்தினார்.

எனினும், தாம் நீதியமைச்சராக இருந்த போது, பயங்கரவாத தடைச்சட்டத்தின் கீழ் கைது செய்யப்பட்டிருந்த பலரை விடுவித்தமையையும் அவர் சுட்டிக்காட்டினார்.

கொவிட் -19 பரவல் நிலைமையின் போது முஸ்லிம்களின் ஜனாசாக்கள் தகனம் செய்யப்பட்ட போது, தாம் அரசாங்கத்தில் இருந்த போதும், அதற்கு எதிராக குரல்கொடுத்ததாக அவர் குறிப்பிட்டார்.

இதன்போது இனமுறுகலை தாம் தடுக்கும் வகையில் செயற்பட்டதாகவும் சப்ரி தெரிவித்தார்.

தாம் தமிழ் மக்கள் மீது அன்பு கொண்டுள்ளதாகவும் அத்துடன் தாம் இனவாதி அல்லவென்றும் குறிப்பிட்ட அவர், தம்மால் நாடாளுமன்றத்திற்கு ஒவ்வாத வார்த்தை பிரயோகம் பயன்படுத்தப்பட்டிருந்தால் அதற்காக மன்னிப்பு கோருவதாகவும் மீண்டும் தெரிவித்தார்.

இதன்போது குறுக்கீடு செய்த எதிர்கட்சித் தலைவர் சஜித் பிரேமதாஸ நேற்று முன்தினம் அமைச்சர் அலி சப்ரி, சாணக்கியனுக்கு எதிராக பயன்படுத்திய வார்த்தை பிரயோகத்தின் பதிவை நாடாளுமன்ற பதிவுப்புத்தகமான ஹன்சார்ட்டின் பிரதியை சபையில் சமர்ப்பித்து, அலி சப்ரி நாடாளுமன்றத்திற்கு ஒவ்வாத வார்த்தை பிரயோகத்தை பயன்படுத்தியமையை நிரூபித்தார்.

இதன்போது தலையீடு செய்த சபாநாயகர் மகிந்த யாப்பா அபேவர்தன, அமைச்சர் அலி சப்ரி ஏற்கனவே இந்த விடயம் தொடர்பில் தமது மன்னிப்பை கோரி விட்டதாக சுட்டிக்காட்டினார்.

இடமாற்றம் செய்யப்பட்ட ஏழு பிரதி காவல்துறை அதிபர்களில் இருவர் தமது இடமாற்றங்களுக்கு எதிராக தேசிய காவல்துறை ஆணைக்குழுவுக்கு முறையிட்டுள்ளனர்.

சிரேஷ்ட பிரதி காவல்துறை அதிபர்களான அஜித் ரோஹன, மற்றும் பிரியந்த வீரசூரிய ஆகியோரே தேசிய காவல்துறை ஆணைக்குழு தலைவர் சந்திரா பெர்ணான்டோவுக்கு இது தொடர்பில் கடிதம் எழுதியுள்ளார்கள்.

பொது பாதுகாப்பு அமைச்சர் திரான் அலஸின் நியாயமற்ற இடமாற்றங்களை அங்கீகரிக்க வேண்டாம் என்று அவர்கள் தேசிய காவல்துறை ஆணைக்குழு தலைவர் சந்திரா பெர்னாண்டோவிடம் அவர்கள் கோரிக்கை விடுத்துள்ளனர்.

அத்துடன் தமது இடமாற்றம் தொடர்பான பரிந்துரைகளுக்கு ஆணைக்குழு ஒப்புதல் அளிக்கக் கூடாது என்றும் அவர்கள் வலியுறுத்தியுள்ளார்கள்.

தமது இடமாற்றங்களுக்கு உரிய காரணங்கள் கூறப்பட்டிருக்கவில்லை என்றும் இரண்டு காவல்துறை அதிகாரிகளும் சுட்டிக்காட்டியுள்ளனர்.

முன்னதாக அஜித் ரோஹண தென் மாகாணத்திற்கு பொறுப்பான பதவியில் இருந்து கிழக்கு மாகாண பிரதி காவல்துறை அதிபராக மாற்றப்பட்டார்.

மத்திய மாகாணத்திற்கு பொறுப்பான சிரேஷ்ட பிரதி காவல்துறை மா அதிபர் பிரியந்த வீரசூரிய மத்திய குற்றப்பிரிவு மற்றும் போக்குவரத்து பிரதி காவல்துறை அதிபராக நியமிக்கப்பட்டுள்ளார்.

லலித் பத்திநாயக்க காவல்துறை களப் படைத் தலைமையகத்தில் இருந்து மத்திய மாகாணத்துக்கு பொறுப்பான சிரேஷ்ட பிரதி காவல்துறைமா அதிபராக இடமாற்றம் செய்யப்பட்டார்.

குற்றங்கள் மற்றும் போக்குவரத்து பிரிவு சிரேஷ்ட பிரதி காவல்துறை அதிபர் எல்.கே.டபிள்யூ.கே. சில்வா காவல்துறை களப் படைத் தலைமையகத்திற்கு மாற்றப்பட்டுள்ளார்.

சஜீவ மெதவத்த சப்ரகமுவ மாகாணத்தில் இருந்து தென் மாகாணத்துக்கு இடமாற்றம் செய்யப்பட்டார்.

கிழக்கு மாகாணத்திற்குப் பொறுப்பான சிரேஷ்ட பிரதி காவல்துறை மா அதிபர் கித்சிறி ஜயலத் சிரேஷ்ட பிரதி காவல்துறை மா அதிபர் ரன்மல் கொடித்துவக்கு ஆகியோரும் இடமாற்றங்களுக்கு உள்ளாகியுள்ளனர்.

கடந்த பண்டிகைக் காலத்தில் அதிகரிக்கப்பட்ட எரிபொருள் ஒதுக்கீடு மறு அறிவித்தல் வரையில் மாற்றம் இல்லாமல் நீடிப்பதற்கு தீர்மானித்துள்ளதாக மின்சக்தி மற்றும் எரிசக்தி அமைச்சர் கஞ்சன விஜேசேகர தெரிவித்துள்ளார்.

சித்திரை புத்தாண்டை முன்னிட்டு கடந்த வாரம் வரை எரிபொருள் ஒதுக்கீடு அதிகரிக்கப்பட்டதுடன், பின்னர் மேலும் ஒரு வாரத்துக்கு அது நீடிக்கப்பட்டது.

இந்த நிலையில், நேற்று நடைபெற்ற  இலங்கை பெற்றோலியக் கூட்டுத்தாபனத்தின் முன்னேற்ற ஆய்வுக் கூட்டத்தில், எரிபொருள் இறக்குமதி, முகாமை, விநியோகம் மற்றும் விற்பனை தரவுகளை ஆய்வு செய்த பிறகு, தற்போதைய எரிபொருள் ஒதுக்கீட்டு அதிகரிப்பை மறு அறிவித்தல் வரை நீடிக்க தீர்மானித்துள்ளதாக அமைச்சர் இன்று ட்விட்டர் பதிவில் தெரிவித்தார்.

தற்போது, முச்சக்கர வண்டிகளுக்கு 5 லீற்றரில் இருந்து 8 லீற்றராகவும், உந்துருளிகளுக்கு 4 லீற்றரில் இருந்து 7 லீற்றராகவும், பேருந்துகளுக்கு 40 லீற்றரிலிருந்து 60 லீற்றராகவும், மகிழுந்துகளுக்கு 20 லீற்றரிலிருந்து 30 லீற்றராகவும், மண் அகழ்வு வாகனங்களுக்கு 15 லீற்றரில் இருந்து 25 லீற்றராகவும் எரிபொருள் ஒதுக்கீட்டை அதிகரிக்க அரசாங்கம் நடவடிக்கை எடுத்துள்ளது.

அவ்வாறே பாரவூர்திகளுக்கு 50 லீற்றரிலிருந்து 75 லீற்றர் வரையும் சிறப்பு நோக்க வாகனங்களுக்கு 20 லீற்றரிலிருந்து 30 லீற்றர் வரையிலும், வேன்களுக்கு 20 லீற்றரிலிருந்து 30 லீற்றர் வரையும் எரிபொருள் ஒதுக்கீடு அதிகரிக்கப்பட்டுள்ளமை குறிப்பிடத்தக்கது.