உள்நாட்டு இறைவரி (திருத்தச்) சட்டமூலத்திற்கு சபாநாயகர் கலாநிதி ஜகத் விக்ரமரத்ன நேற்று (03) தனது சான்றொப்பத்தை இட்டுள்ளார்.

உள்நாட்டு இறைவரி (திருத்தச்) சட்டமூலத்தின் இரண்டாம் மதிப்பு மீதான விவாதம் கடந்த 2026 மே 19ஆம் திகதி நடைபெற்றதோடு, அதன் போது இச்சட்டமூலம் திருத்தங்களுடன் அங்கீகரிக்கப்பட்டது.

2017ஆம் ஆண்டின் 24ஆம் இலக்க உள்நாட்டு இறைவரிச் சட்டத்தைத் திருத்தங்களுடன் அங்கீகரித்ததன் மூலம், வரி நிர்வாகச் செயல்முறைகளை நவீனப்படுத்துதல், தற்போதுள்ள விதிகளின் தெளிவை அதிகரித்தல், வரி இணக்கம் மற்றும் வரிச் சட்டங்களை நடைமுறைப்படுத்துவதை வலுப்படுத்துதல் ஆகிய பணிகள் முன்னெடுக்கப்படவுள்ளன.

மேலும், வரி கணிப்பீடுகள் மற்றும் வரி விலக்குகளை மிகவும் துல்லியமாக்குதல், மூலோபாய பொருளாதாரத் தேவைகளுக்கு ஆதரவளித்தல், அத்துடன் வெளிப்படைத்தன்மை மற்றும் பணமோசடியைத் தடுப்பதற்கான வேலைத்திட்டங்களை மேம்படுத்துவதுமே இந்தச் சட்டத்தின் முக்கிய நோக்கங்களாகும்.

குறிப்பிட்ட சில நிதிப் பரிமாற்றங்களின் போது வரி செலுத்துவோர் அடையாள எண் (TIN) சான்றிதழைப் பயன்படுத்துவதைக் கட்டாயமாக்குதல், வருமானத்தைக் கணக்கிடும் முறையில் சில திருத்தங்களை மேற்கொள்ளுதல், குறிப்பிட்ட சில திட்டங்கள் மற்றும் வணிகங்களுக்கு வழங்கப்படும் வரி விலக்குகளை மேலும் தெளிவுபடுத்துதல் மற்றும் சம்பந்தப்பட்ட அதிகாரிகளுக்குத் தகவல்களை வெளிப்படுத்தும் வரம்பை விரிவுபடுத்துதல் போன்ற சில முக்கிய மாற்றங்கள் இந்த புதிய சட்டத்தின் மூலம் அறிமுகப்படுத்தப்பட்டுள்ளன.

இதற்கமைய, இந்த உள்நாட்டு இறைவரி (திருத்தச்) சட்டமூலம், 2026ஆம் ஆண்டின் 11ஆம் இலக்க உள்நாட்டு இறைவரி (திருத்தச்) சட்டமாக நடைமுறைக்கு வருகிறது.

ஏ.எஸ்.எம்.அர்ஹம் – நிருபர் 

கல்முனை: கல்வி, மனிதநேயம் மற்றும் சர்வதேச நட்புறவின் உன்னத வெளிப்பாடாக, இலங்கைக்கான சீனத் தூதுவர் அதிமேதகு கீ ஜென்ஹொங் (HE. Qi Zhenhong) அவர்கள் நேற்று (04) கல்முனை நகருக்கு வரலாற்றுச் சிறப்புமிக்க விஜயம் ஒன்றினை மேற்கொண்டார்.

பாடசாலையின் அதிபர் திருமதி ரிஷானா அவர்களின் தலைமையில் நடைபெற்ற இந்நிகழ்வில், “சீனாவின் சகோதர பாசம்” எனும் தொனிப்பொருளின் கீழ் 3.8 மில்லியன் பெறுமதிமிக்க மாணவர்களுக்கான கற்றல் உபகரணப் பொதிகளும், தெரிவு செய்யப்பட்ட குடும்பங்களுக்கான உலர் உணவுப் பொதிகளும் வழங்கி வைக்கப்பட்டன.

கல்முனை மாநகர சபையின் முன்னாள் பிரதி முதல்வரும், ஸ்ரீலங்கா முஸ்லிம் காங்கிரஸின் தேசிய பொருளாளரும், ‘ரஹ்மத் பவுண்டேஷன்’ அமைப்பின் ஸ்தாபகத் தலைவருமான ரஹ்மத் மன்சூர் அவர்களின் விசேட அழைப்பை ஏற்று சீனத் தூதுவர் இந்த விஜயத்தை அமைத்திருந்தார்.

கோலாகலமாக நடந்த வரவேற்பும் “சகோதர பாச” திட்டமும்

சீனத் தூதுவரின் வருகையை முன்னிட்டு, கல்முனை அல்-அஸ்ஹர் வித்தியாலயத்தில் விசேட நிகழ்வொன்று ஏற்பாடு செய்யப்பட்டிருந்தது. பாடசாலையின் அதிபர் திருமதி ரிஷானா அவர்களின் தலைமையில் நடைபெற்ற இந்நிகழ்வு, இரு நாட்டு நட்புறவை பறைசாற்றும் வகையில் அமைந்தது.

“சீனாவின் சகோதர பாசம்” எனும் உன்னத தொணிப்பொருளின் கீழ் நடைபெற்ற இந்நிகழ்வில், அப்பகுதி மக்களின் வாழ்வாதாரத்தையும் மாணவர்களின் கல்வியையும் ஊக்குவிக்கும் வகையில் பல நலத்திட்ட உதவிகள் வழங்கி வைக்கப்பட்டன.

பாடசாலை மாணவர்களின் எதிர்கால வளர்ச்சியைக் கருத்திற்கொண்டு, அவர்களுக்குத் தேவையான கற்றல் உபகரணப் பொதிகள் இதன்போது வழங்கி வைக்கப்பட்டன.

மேலும் பிரதேசத்தில் தெரிவு செய்யப்பட்ட தேவையுடைய குடும்பங்களுக்கு உலர் உணவுப் பொதிகளும் இதன்போது தூதுவரால் நேரடியாகக் கையளிக்கப்பட்டன.

முக்கிய பிரமுகர்களின் பங்கேற்பு

இப்பிராந்தியத்தின் கல்வி மற்றும் சமூக நலனில் பெரும் தாக்கத்தை ஏற்படுத்திய இந்நிகழ்வில் பல முக்கிய அதிகாரிகள் கலந்துகொண்டு சிறப்பித்தனர்.

நாடாளுமன்ற உறுப்பினர் ஹிஸ்புல்லாஹ், அம்பாறை மாவட்ட பிரதிப் பொலிஸ் மா அதிபர் சுஜித் வேதமுல்ல, மற்றும் வலயக் கல்விப் பணிப்பாளர் ஷஹ்துல் நஜீம் ஆகியோர் இதில் கௌரவ விருந்தினர்களாகக் கலந்துகொண்டனர்.

கல்முனை மண்ணில் சர்வதேச தூதுவர் ஒருவரின் பங்களிப்போடு நடைபெற்ற இந்த மனிதாபிமானப் பணி, வெறும் உதவித்திட்டமாக மட்டுமன்றி, மாணவர்களின் எதிர்காலக் கனவுகளுக்குக் கிடைத்த பெரும் அங்கீகாரமாகப் பார்க்கப்படுகிறது. கல்வியையும் மனிதநேயத்தையும் முன்னிறுத்தி ரஹ்மத் பவுண்டேஷன் மற்றும் சீனத் தூதரகம் இணைந்து மேற்கொண்ட இத்தகைய முயற்சிகள், எதிர்காலச் சமூக முன்னேற்றத்திற்கான மிகச்சிறந்த முதலீடாகும் எனப் பிரதேச மக்கள் நன்றியோடு நினைவு கூருகின்றனர்.

புத்தளம் மாவட்டத்தின் வணாத்தவில்லு பிரதேச செயலகப் பிரிவுக்குட்பட்ட சேரக்குளிய கிராம உத்தியோகத்தர் பிரிவிலுள்ள சின்னநாகவில்லுவ கிராமத்தில் கடந்த வருடம் ஏற்பட்ட டித்வா அனர்த்தம் காரணமாக ஏற்பட்டுள்ள கடுமையான அனர்த்த நிலைமைகளை நேரில் ஆராய்ந்து, அதற்கான உடனடி தீர்வுகளை வழங்குவதை நோக்கமாகக் கொண்டு, பொது நிர்வாக, மாகாண சபைகள் மற்றும் உள்ளூராட்சி அமைச்சர் பேராசிரியர் சந்தன அபயரத்ன சுமார் 7 மாதங்கள் கழிந்துள்ள நிலையில் நேற்று (03) அங்கு விசேட கள விஜயமொன்றை மேற்கொண்டார்.

ஏற்கனவே ஏற்பட்ட அனர்த்தத்தைத் தொடர்ந்து, கடந்த சில நாட்களாக நிலவிய மோசமான காலநிலை காரணமாக மீண்டுமொரு இரட்டை அனர்த்த நிலைமை ஏற்பட்டுள்ளதுடன், இதனால் சின்னநாகவில்லுவ பிரதேசத்தில் 24 வீடுகள் முழுமையாக சேதமடைந்துள்ளன.

அத்துடன், கிராமத்தில் அமைந்துள்ள தேவாலயம், முன்பள்ளி மற்றும் மேலும் 13 வீடுகள் இதுவரை வெள்ள நீரில் மூழ்கியிருப்பதுடன், தொடர்ந்தும் அனர்த்தத்திற்கு உள்ளாகியுள்ளன.

இதன்போது, குறித்த இடங்களுக்குச் சென்று பாதிக்கப்பட்ட மக்களின் பிரச்சினைகளை கேட்டறிந்த அமைச்சர், அவற்றுக்கு விரைவான தீர்வுகளை வழங்குவதற்கான ஒருங்கிணைப்புப் பணிகளை முன்னெடுத்தார்.

பாதிக்கப்பட்ட மக்களுக்கும், சேதமடைந்த பொது இடங்களுக்கும் உடனடியாக நிவாரணம் வழங்குவதற்குத் தேவையான நடவடிக்கைகளை எடுக்குமாறு அமைச்சர் அங்கு வருகை தந்திருந்த உரிய அதிகாரிகளுக்கு அறிவுறுத்தினார்.

மேலும், அனர்த்த நிலைமைகளுக்கு மத்தியிலும், எதிர்வரும் நாட்களில் நடைபெறவுள்ள கள்ளக்கண்டல் தேவாலயத்தின் வருடாந்த திருவிழாவிற்குத் தேவையான உள்கட்டமைப்பு வசதிகளை எவ்வாறு வழங்கலாம் என்பது குறித்தும் அமைச்சர் விசேட கவனம் செலுத்தினார். இந்த கண்காணிப்பு நடவடிக்கைகளில் அப்பிரதேசத்தின் பங்குத்தந்தையும் கலந்துகொண்டார்.

இவ்விஜயத்தின் போது அமைச்சருடன் வணாத்தவில்லு பிரதேச செயலாளர், அமைச்சரின் ஒருங்கிணைப்புச் செயலாளர்கள், தேசிய மக்கள் சக்தியின் பிரதேச சபை உறுப்பினர்கள் உள்ளிட்ட அரசியல் பிரதிநிதிகள் மற்றும் அரச அதிகாரிகள் பலரும் கலந்துகொண்டனர்.

புத்தளம்: இயற்கையின் சீற்றத்திற்கு இலக்காகி, தங்களின் வாழ்வாதாரங்களையும் உடைமைகளையும் இழந்து தவித்த புத்தளம் பிரதேச மக்களுக்கு, புதிய நம்பிக்கையூட்டும் வகையில் மூன்றாம் கட்டமாக நிதியுதவி வழங்கிவைக்கப்பட்டுள்ளது.

‘தித்வா’ புயல் தாக்கத்தினால் முழுமையாகவும், பகுதியளவிலும் சேதமடைந்த வீடுகளுக்கான இழப்பீடுகள் மற்றும் வாழ்வாதாரத்தை இழந்த வர்த்தகர்களுக்கான நிதியுதவிகள் வழங்கும் மூன்றாம் கட்ட காசோலை வழங்கும் நிகழ்வு கடந்த திங்கட்கிழமை (01.06.2026) அன்று புத்தளம் பிரதேச செயலக பிரதான மண்டபத்தில் நடைபெற்றது.

புயலின் கோரத்தாண்டவத்தால் வீடுகளை இழந்து தவித்த குடும்பங்களுக்கு, அவர்களின் மறுவாழ்விற்கான மூன்றாம் கட்ட காசோலைகள் இதன்போது உத்தியோகபூர்வமாக கையளிக்கப்பட்டன.

அதேநேரம், புயல் காரணமாக கடும் பொருளாதார வீழ்ச்சியைச் சந்தித்த உள்ளூர் வர்த்தகர்களின் வாழ்வாதாரத்தை மீண்டும் கட்டியெழுப்பும் நோக்கில், அவர்களுக்கான விசேட இழப்பீட்டுத் தொகைகளும் இதன்போது வழங்கி வைக்கப்பட்டமை குறிப்பிடத்தக்கது. இந்த நிதியுதவியானது, முடங்கிப்போயிருந்த புத்தளத்தின் உள்ளூர் வர்த்தக நடவடிக்கைகளுக்கு புதியதொரு புத்துயிரை வழங்கும் என எதிர்பார்க்கப்படுகிறது.

மக்கள் பிரதிநிதிகள் மற்றும் அதிகாரிகளின் பங்கேற்பு

பாதிக்கப்பட்ட மக்களின் துயர் துடைக்கும் இந்த முக்கிய நிகழ்வில் பல முக்கிய பிரமுகர்கள் கலந்துகொண்டு காசோலைகளை வழங்கி வைத்தனர்.

• சகோதரர் எம்.ஜே.பைசல் – புத்தளம் மாவட்ட பாராளுமன்ற உறுப்பினர்
• சகோதரர் எம்.எப்.ரின்சாத் அஹமட் – புத்தளம் மாநகர சபை முதல்வர்
• எஸ்.பி.விதனகே – புத்தளம் பிரதேச செயலாளர்

இவர்களுடன் புத்தளம் மாநகர சபை மற்றும் பிரதேச சபையின் உறுப்பினர்கள், கிராம அபிவிருத்திச் சங்கங்களின் (CDC) தலைவர்கள், அரச உத்தியோகத்தர்கள் மற்றும் பயனாளிகளான பொதுமக்கள் எனப் பலரும் சமூகமளித்திருந்தனர்.

நாவலப்பிட்டி, மாபாகந்த பகுதியில் பயணித்துக் கொண்டிருந்த முச்சக்கரவண்டி மீது மரமொன்று முறிந்து வீழ்ந்ததில், அதில் பயணித்த பாடசாலை மாணவர் உட்பட மூவர் சம்பவ இடத்திலேயே உயிரிழந்துள்ளதாக நாவலப்பிட்டி காவல்துறையினர் தெரிவித்துள்ளனர்.

இன்று (04) காலை 6:45 மணியளவில் குறித்த முச்சக்கரவண்டி மாபாகந்த பகுதியிலிருந்து நாவலப்பிட்டி நோக்கி பயணித்துக் கொண்டிருந்த போதே இந்த விபத்து நேர்ந்துள்ளது.

பிரதான வீதிக்கு அருகில் இருந்த இந்த பெரிய மரம் முறிந்து வீழ்ந்ததில் முச்சக்கரவண்டியில் இருந்த மூவரும் சம்பவ இடத்திலேயே உயிரிழந்துள்ளதுடன், அதன் சாரதி அதிர்ஷ்டவசமாக உயிர் தப்பியுள்ளார்.

இந்த விபத்தையடுத்து நாவலப்பிட்டி காவல்துறையினர் மற்றும் பிரதேசவாசிகள் இணைந்து முறிந்து விழுந்த மரத்தை வெட்டி அகற்றியதுடன், உயிரிழந்தவர்களின் உடலங்களை நாவலப்பிட்டி மாவட்ட பொது மருத்துவமனைக்கு கொண்டு சேர்த்துள்ளனர்.

நெடுங்காலமாக பழுதடைந்த நிலையில் காணப்பட்ட இந்த மரத்தை வெட்டி அகற்றுமாறு சம்பந்தப்பட்ட அதிகாரிகளுக்கு பலமுறை அறிவித்தும், அதற்கு முறையான தீர்வு வழங்கப்படாதமையினாலேயே இந்த துரதிர்ஷ்டவசமான விபத்து நேர்ந்துள்ளதாக பிரதேசவாசிகள் குற்றம் சுமத்தியுள்ளனர்.

விபத்து குறித்து நாவலப்பிட்டி காவல்துறையினர் மேலதிக விசாரணைகளை மேற்கொண்டு வருகின்றனர்.

டாலர் தட்டுப்பாடும் சந்தை நம்பிக்கையீனமும்:
எரிபொருள் விலை உயர்வு:
உள்நாட்டு உற்பத்தியாளர்களுக்குப் பாதிப்பு:
$2.5 பில்லியன் திருட்டு அறிக்கை விவகாரம்:

நாடாளுமன்ற அரச கணக்குகள் பற்றிய குழுவின் (COPF) தலைவரும், ஐக்கிய மக்கள் சக்தியின் (SJB) முக்கிய உறுப்பினருமான ஹர்ஷ டி சில்வா விடுத்துள்ள புதிய எச்சரிக்கை, தற்பொழுது நாடு முழுவதும் பெரும் பரபரப்பை ஏற்படுத்தியுள்ளது.

நாட்டின் தற்போதைய பொருளாதார நிலைத்தன்மை தற்காலிகமானது என்றும், வரும் நாட்களில் மக்கள் மேலும் பல நெருக்கடிகளைச் சந்திக்க நேரிடும் என்றும் அவர் கணித்துள்ளார்.

எகிறப்போகும் டாலர் மதிப்பு: வாகன இறக்குமதியால் வரும் சிக்கல்!

வெளிநாட்டுப் பயணத்தை முடித்துக் கொண்டு அவசரமாக நாடாளுமன்றத்திற்கு வருகை தந்த ஹர்ஷ டி சில்வா, ஊடகங்களைச் சந்தித்தபோது சந்தையின் தற்போதைய பலவீனத்தை போட்டுடைத்தார்.

“வாகன இறக்குமதிக்காக வழங்கப்பட்ட கடன் கடிதங்கள் (Letters of Credit) சந்தைக்கு வரும்போது, அமெரிக்க டாலருக்கான தேவை மிகக் கொடூரமாக அதிகரிக்கும். ஆனால், தற்போதைய சந்தையில் அதற்கான போதிய நம்பிக்கை இல்லை.”

இந்த நம்பிக்கையின்மை காரணமாக, இறக்குமதியாளர்கள் தங்களது ரூபாய்களை உடனடியாக டாலராக மாற்ற துடிக்கிறார்கள். மறுபுறம், ஏற்றுமதியாளர்கள் தங்களுக்குக் கிடைக்கும் டாலர் வருமானத்தை ரூபாயாக மாற்றாமல் தங்களின் வசமே வைத்திருக்க விரும்புகிறார்கள். மத்திய வங்கி போன்ற முன்னணி நிறுவனங்கள் உடனடி சீர்திருத்தங்களை மேற்கொண்டு, சந்தை மீதான நம்பிக்கையை கட்டியெழுப்ப வேண்டும் என அவர் வலியுறுத்தினார். மேலும், வட்டி விகிதங்கள் முன்னரே அதிகரிக்கப்பட்டிருக்க வேண்டும் என்றும் அவர் சுட்டிக்காட்டினார்.

சாமானியர்களைச் சாடப்போகும் எரிபொருள் விலை உயர்வு!

வாகனக் கனவு ஒருபுறமிருக்க, அன்றாட வாழ்க்கையைத் தீர்மானிக்கும் எரிபொருள் விலையிலும் பெரும் அதிர்ச்சி காத்திருக்கிறது. அரசாங்கம் தற்போது வழங்கி வரும் எரிபொருள் மானியத்தைக் குறைப்பதற்குத் திட்டமிட்டுள்ளது.

இது குறித்துப் பேசிய எம்பி ஹர்ஷ டி சில்வா, “எரிபொருள் விலை உயருமா என்று யாரும் இனி கேள்வி கேட்கத் தேவையில்லை; ஏனெனில் அது நிச்சயம் உயரத்தான் போகிறது” என மிகத் திட்டவட்டமாகக் கூறினார். மானியக் குறைப்பு அமலுக்கு வந்தவுடன், எரிபொருள் விலையேற்றம் தவிர்க்க முடியாத ஒன்றாக மாறும் என அவர் எச்சரித்துள்ளார்.

அரசாங்கத்தின் மற்றுமொரு திட்டமான ‘ஏற்றுமதி தீர்வை’ (Export Cess) நீக்கும் முடிவு குறித்தும் அவர் தனது கவலையை வெளியிட்டார். இந்த வரி நீக்கமானது, உள்நாட்டு உற்பத்தியாளர்களை மிக மோசமாகப் பாதிக்கும் என்றும், அவர்களின் வாழ்வாதாரத்தை நசுக்கும் செயலாக இது அமையும் என்றும் அவர் குறிப்பிட்டார்.

இருப்பினும், இந்த வரவிருக்கும் பொருளாதாரச் சவால்களைச் சமாளிப்பது சாத்தியமற்றது அல்ல என்றும், மிகுந்த அர்ப்பணிப்புடனும் சாதுரியத்துடனும் அரசாங்கம் செயல்பட்டால் இந்த இக்கட்டான நிலையிலிருந்து மீள முடியும் என்றும் அவர் நம்பிக்கை தெரிவித்தார்.

$2.5 பில்லியன் திருட்டு அறிக்கை திருப்பி அனுப்பப்பட்டது ஏன்?

சமீபத்தில் பெரும் விவாதத்தைக் கிளப்பிய 2.5 பில்லியன் டாலர் திருட்டு தொடர்பான அறிக்கை திருப்பி அனுப்பப்பட்டதற்கான பின்னணியையும் அவர் வெளிப்படுத்தினார்.

நிதி அமைச்சகம் அந்த அறிக்கையை நாடாளுமன்றக் குழுவின் பார்வைக்கு வைக்காமல், ஹர்ஷ டி சில்வாவின் தனிப்பட்ட பார்வைக்காக மட்டுமே அனுப்பியிருந்ததே அதற்குக் காரணம்.

“ஒரு முக்கிய ஆவணத்தை எனது தனிப்பட்ட பார்வைக்கு மட்டும் அனுப்புவது முறையல்ல. COPF குழுவின் மற்ற உறுப்பினர்களுடனும் நான் இதை விவாதிக்க வேண்டும். எனவேதான் அதைத் திருப்பி அனுப்பினோம்.”

தற்போது, அனைத்து உறுப்பினர்களின் பார்வைக்கும் உகந்த வகையில் முறையானதொரு அறிக்கையைச் சமர்ப்பிக்க நிதி அமைச்சகத்திற்கு 4 வார கால அவகாசம் வழங்கப்பட்டுள்ளது. விரைவில் முழுமையான அறிக்கை நாடாளுமன்றத்தில் சமர்ப்பிக்கப்படும் என எதிர்பார்ப்பதாகக் கூறினார்.

எரிபொருள் விலை உயர்வு, டாலர் தட்டுப்பாடு, உள்நாட்டு உற்பத்திக்கான சவால்கள் எனப் பலமுனைத் தாக்குதல்களை இலங்கை சந்திக்கவிருப்பதாக ஹர்ஷ டி சில்வாவின் இந்த அறிக்கை எச்சரிக்கிறது. அரசாங்கம் அடுத்து எடுக்கப்போகும் நடவடிக்கைகள் மட்டுமே இந்தச் சூறாவளியில் இருந்து நாட்டைக் காக்கும்!

கொழும்பு: ‘டித்வா’ சூறாவளி ஏற்படுத்திய பேரழிவிலிருந்து மீள முடியாமல், இன்னும் தற்காலிக முகாம்களிலும் பாதுகாப்பான இடங்களிலும் பல்லாயிரக்கணக்கான மக்கள் கண்ணீரோடு காத்துக்கொண்டிருக்கிறார்கள். ஆனால், அவர்களைக் கைதூக்கி விடுவதற்காக உலகெங்கிலும் இருந்து திரட்டப்பட்ட ‘ஸ்ரீலங்காவை கட்டியெழுப்புவோம்’ (Rebuilding Sri Lanka) நிதியத்தின் கோடிக்கணக்கான பணம், ஒரு சதம் கூட பயன்படுத்தப்படாமல் வங்கிக் கணக்கில் முடங்கிக்கிடக்கும் அதிர்ச்சித் தகவல் தற்போது வெளிச்சத்திற்கு வந்துள்ளது.

பொது நிதி பற்றிய நாடாளுமன்றக் குழுவின் (CoPF) கூட்டத்தில் நேற்று இந்தத் திடுக்கிடும் உண்மைகள் அம்பலமாகின.

காகிதத்தில் மட்டுமே இருக்கும் நிதியம்?

அரசாங்கத்தால் உத்தியோகபூர்வமாக அறிவிக்கப்பட்ட ‘ஸ்ரீலங்காவை கட்டியெழுப்புவோம்’ நிதியத்திற்கு பல்வேறு உள்நாட்டு மற்றும் வெளிநாட்டு நிறுவனங்கள், கொடையாளிகள் எனப் பலரும் வாரி வழங்கியுள்ளனர். ஆனால், அவ்வாறு பெறப்பட்ட நிதியில் இருந்து ஒரு ரூபா கூட இதுவரை பாதிக்கப்பட்ட மக்களின் நலனுக்காகச் செலவிடப்படவில்லை என்பதை சட்டமா அதிபர் திணைக்களம் நேற்று உறுதிப்படுத்தியுள்ளது.

இதற்கெல்லாம் மேலாக, நாடாளுமன்றக் குழுவின் தலைவர் கலாநிதி ஹர்ஷ டி சில்வா, “இந்த நிதியத்தை நாம் தணிக்கை (Audit) செய்ய முடியுமா? அப்படியொரு நிதியம் சட்டப்பூர்வமாக இருக்கிறதா?” என்று எழுப்பிய கேள்விக்கு, சட்டமா அதிபர் திணைக்கள அதிகாரி அளித்த பதில் அங்கிருந்த அனைவரையும் உரைய வைத்தது.

“உண்மையில் ‘ஸ்ரீலங்காவை கட்டியெழுப்புவோம்’ என்ற பெயரில் இன்னும் ஒரு நிதியம் சட்டப்பூர்வமாக உருவாக்கப்படவே இல்லை!” என சட்டமா அதிபர் திணைக்கள அதிகாரி கூறியது பெரும் பரபரப்பை ஏற்படுத்தியுள்ளது.

ஜனாதிபதி செயலகத்தின் கீழ் இதனை ஒரு ‘சட்டப்பூர்வ நிதியமாக’ அமைப்பதற்கு அமைச்சரவை ஒப்புதல் மட்டுமே வழங்கப்பட்டுள்ளது. ஆனால், நடைமுறையில் அது இன்னும் சட்டமாக்கப்படவில்லை. இதனால், உலகெங்கிலும் இருந்து வந்த கோடிக்கணக்கான பணம் திறைசேரியின் பிரதிச் செயலாளரின் (DST) ஒரு சிறப்பு வங்கிக் கணக்கில் மட்டுமே தற்காலிகமாக வைக்கப்பட்டுள்ளது.

900 கோடியைத் தாண்டிய நிதி: முட்டுக்கட்டையாக இருக்கும் புதிய சட்டம்!

புதிய பொது நிதி மேலாண்மைச் சட்டத்தின்படி, நாடாளுமன்ற அங்கீகாரம் இல்லாத ‘சட்டத்திற்குப் புறம்பான நிதியங்களை’ இலங்கையில் உருவாக்க முடியாது.

இதைக் சுட்டிக்காட்டிய CoPF தலைவர் கலாநிதி ஹர்ஷ டி சில்வா, “முன்பு பெரும் சர்ச்சையை ஏற்படுத்திய ‘ஹெல்பிங் ஹம்பாந்தோட்டை’ (Helping Hambantota) நிதி விவகாரத்திற்குப் பிறகுதான், நாடாளுமன்ற அனுமதியின்றி நிதியங்களைத் தொடங்க முடியாது என்ற திருத்தம் கொண்டு வரப்பட்டது. எனவே, தற்போதைய சிறப்பு வங்கிக் கணக்கு நிதி அமைச்சின் கீழ் வருவதால், அதனை உடனடியாகத் தணிக்கை செய்து, பணம் முறையாகப் பயன்படுத்தப்படுகிறதா என்பதை ஆராய வேண்டும்” என்று வலியுறுத்தினார்.

நிதியுதவி தொடர்பான தரவுகளை வெளியிட்ட நிதி மற்றும் திட்டமிடல் பிரதி அமைச்சர் அனில் ஜெயந்த பெர்னாண்டோ, கடந்த ஏப்ரல் 24, 2026 அன்றைய நிலவரப்படி, இந்த நிதியத்திற்கு 9,583 மில்லியன் ரூபாய் (958 கோடி ரூபாவிற்கும் அதிகம்) கிடைத்துள்ளதாகத் தெரிவித்தார்.

உலக நாடுகள் கொடுத்த பணம் என்ன ஆனது?

புயல் பாதிப்பைக் கண்டு உருகி, இலங்கை மற்றும் வெளிநாடுகளில் வாழும் தாராள மனம்கொண்ட மனிதர்கள் இலங்கை வங்கி (BOC) மற்றும் மத்திய வங்கியின் சிறப்பு கணக்குகளுக்குப் பணத்தை அனுப்பியிருந்தனர். இலங்கை ரூபாய் மட்டுமன்றி அமெரிக்க டாலர் (USD), யூரோ (EUR), ஸ்டெர்லிங் பவுண்ட் (GBP), ஜப்பானிய யென் (JPY) மற்றும் அவுஸ்திரேலிய டாலர் (AUD) எனப் பல வெளிநாட்டு நாணயங்களிலும் இந்த நிதியுதவிகள் குவிந்திருந்தன.

இந்த நிதியை நிர்வகிக்க பிரதி நிதி அமைச்சர் அனில் ஜெயந்த தலைமையில், அரச மற்றும் தனியார் துறை அதிகாரிகளை உள்ளடக்கிய ஒரு மேலாண்மைக் குழுவும் அரசாங்கத்தால் நியமிக்கப்பட்டிருந்தது.

இவ்வளவு ஏற்பாடுகளும், ஒன்பதாயிரத்து ஐந்நூறு கோடிகளுக்கு மேல் பணமும் இருந்தும், வெறும் ‘சட்ட நடைமுறை’ என்ற நிர்வாகத் தாமதத்தால் புயலால் பாதிக்கப்பட்ட மக்கள் இன்னமும் நடுத்தெருவில் தவித்து வருகின்றனர்.

நிர்வாக இயந்திரத்தின் இந்த மெத்தனப் போக்கு, “அரசாங்கம் உடனடியாகச் செயல்பட்டு இந்த நிதியத்தை முறைப்படி சட்டப்பூர்வமாக்கி, முகாம்களில் முடங்கிக் கிடக்கும் மக்களின் வாழ்வில் மறுமலர்ச்சியை ஏற்படுத்துமா?” என்ற பலத்த கேள்வியை மக்கள் மத்தியில் எழுப்பியுள்ளது.

புத்தளம்: புத்தளம் மாவட்ட ஊடகவியலாளர்களின் திறன்களையும் கௌரவத்தையும் மேம்படுத்தும் நோக்கில் விசேட ஒருநாள் பயிற்சிப் பட்டறை ஒன்று புத்தளம் மாவட்ட செயலாளர் வை. இந்திக மஞ்சுள சில்வாவின் தலைமையில் இன்று 03.06.2026 வெற்றிகரமாக நடாத்தப்பட்டது.

இன்றைய வேகமான டிஜிட்டல் உலகில், பொதுமக்களுக்கு உண்மையான செய்திகளை உடனுக்குடன் கொண்டு சேர்ப்பதில் பிரதேச ஊடகவியலாளர்களின் பங்கு அளப்பரியது. அதேநேரம், அவர்கள் நாளாந்தம் எதிர்கொள்ளும் சட்ட ரீதியான சவால்களுக்கும், தொழில்நுட்ப மாற்றங்களுக்கும் மத்தியிலேயே குறித்த பயிற்சிப் பட்டறை இடம்பெற்றது.

சுகாதார மற்றும் ஊடக அமைச்சின் இலங்கை பத்திரிகைப் பேரவையினால் ஏற்பாடு செய்யப்பட்ட இப்பயிற்சிப் பட்டறை, இன்று புதன்கிழமை புத்தளம் மாவட்ட செயலகத்தின் கேட்போர் கூடத்தில் மிகச் சிறப்பாக நடைபெற்றது.

இப்பயிற்சிப் பட்டறையில் ஊடகத் துறையின் தற்போதைய நிலைவரங்கள் மற்றும் எதிர்கால சவால்கள் குறித்து ஆழமான பல விடயங்கள் விரிவாக ஆராயப்பட்டன:

இன்றைய காலகட்டத்தில் ஊடகவியலாளர்கள் செய்திகளைச் சேகரிக்கும் போதும், அவற்றை வெளியிடும் போதும் சட்ட ரீதியாக எதிர்நோக்கும் சிக்கல்கள் என்னென்ன, அவற்றிலிருந்து தங்களை எவ்வாறு பாதுகாத்துக் கொள்வது மற்றும் அதற்கான சட்டபூர்வ தீர்வுகள் எவை என்பது குறித்து விரிவாக விளக்கமளிக்கப்பட்டது.

இலங்கை பத்திரிகை பேரவை ஆணைக்குழுவின் கட்டமைப்பு, அதன் பணிகள் மற்றும் ஊடகவியலாளர்களுக்கும் பேரவைக்கும் இடையிலான பரஸ்பர உறவுகள் குறித்தும் இதன்போது தெளிவுபடுத்தப்பட்டது.

சமூக மாற்றத்திற்கு வித்திடும் பிரதேச ஊடகவியலாளர்களின் சமூக அந்தஸ்து மற்றும் கௌரவத்தைப் பாதுகாப்பது எவ்வாறு, தொழில்முறை ஒழுக்கக்கோவைகளை எவ்வாறு பேணுவது என்பது பற்றி கலந்துரையாடப்பட்டது.

மாறிவரும் உலகிற்கு ஏற்ப, நவீன தொழில்நுட்பக் கருவிகளையும் டிஜிட்டல் தளங்களையும் கையாண்டு, பொதுமக்களுக்கு மிகவும் நம்பகத்தன்மையுடனும் வேகமாகவும் ஊடகச் சேவைகளை எவ்வாறு வழங்குவது என்பது குறித்து இதன்போது வழிகாட்டப்பட்டது.

முக்கியத்துவமிக்க இந்த அமர்வில் பல்துறை சார்ந்த ஆளுமைகள் கலந்துகொண்டு சிறப்பித்தனர்:

இலங்கை பத்திரிகை பேரவையின் தலைவர் பீ.என்.ஆர். விஜயபண்டார, முன்னாள் தகவல் அறியும் உரிமை ஆணைக்குழுவின் அங்கத்தவரும் பிரபல சட்டத்தரணியுமான ஜகத் லியாணாராச்சி, சிரேஷ்ட ஊடகவியலாளர் சிசிர யாப்பா, இலங்கை பத்திரிகை பேரவையின் உதவி ஆணையாளர் சுரோஷன இரங்க மற்றும் இலங்கை பத்திரிகை பேரவையின் ஆணையாளர் நிரோஷன தம்பவிட்ட ஆகியோர் வளவாளர்களாகவும் அதிதிகளாகவும் கலந்துகொண்டு தமது கருத்துக்களையும் ஆலோசனைகளையும் பகிர்ந்து கொண்டனர்.

இவர்களுடன் புத்தளம் மாவட்ட செயலகத்தின் ஊடக இணைப்பாளர் இந்துனி மற்றும் புத்தளம் மாவட்டத்தைச் சேர்ந்த பெருந்திரளான ஊடகவியலாளர்கள் கலந்துகொண்டு, தங்களின் சந்தேகங்களைத் தெளிவுபடுத்திக் கொண்டதோடு பயனுள்ள பல அனுபவங்களையும் பெற்றுக்கொண்டனர்.

இப்பயிற்சிப் பட்டறையானது, புத்தளம் மாவட்ட ஊடகவியலாளர்கள் தங்களின் ஊடகப் பணியை புதியதொரு பரிமாணத்தில், அதிக பொறுப்புணர்வுடனும் கௌரவத்துடனும் தொடர்வதற்குப் பெரும் பக்கபலமாக அமையும் என எதிர்பார்க்கப்படுகிறது.

மினா (புனித பூமி): வாழ்க்கையின் ஆகச்சிறந்த ஆன்மீக உச்சத்தைத் தொடுவதற்காக, தங்களின் வாழ்நாள் சேமிப்பையெல்லாம் கொட்டிக் கொடுத்து புனித ஹஜ் கடமையை நிறைவேற்றச் சென்ற 3,500 இலங்கை யாத்திரிகர்களின் கனவு, தற்போது ஒரு கொடூரமான நரக வேதனையாக மாறியுள்ளது. மினாவின் கூடாரங்களில் தங்கியுள்ள இலங்கை ஹாஜிகள், தங்களின் அடிப்படை மனித உரிமைகள் மற்றும் கண்ணியத்தைக்கூட இழந்து தவிக்கும் அவல நிலை அரங்கேறியுள்ளதாக டெய்லி மிரர் செய்தி வெளியிட்டுள்ளது.

இதற்கெல்லாம் காரணம், இலங்கை ஹஜ் குழுவின் தன்னிச்சையான மற்றும் பொறுப்பற்ற நிர்வாகச் சீர்கேடுதான் என்று குற்றம் சாட்டப்பட்டு, பெரும் கொந்தளிப்பு ஏற்பட்டுள்ளது.

டெய்லி மிரர் செய்தியில் மேலும் குறிப்பிடப்பட்டுள்ளதாவது;

‘A-வகுப்பு’ என்ற பெயரில் அரங்கேறிய ‘C-வகுப்பு’ மோசடி!

அனுபவமிக்க உள்ளூர் முகவர்களை கலந்தாலோசிக்காமல், ‘ரஹ்லத் வா மனாஃபி’ (Rehlat Wa Manafe) என்ற சுற்றுலா நிறுவனத்தை இலங்கை ஹஜ் குழு தன்னிச்சையாகத் தேர்ந்தெடுத்ததே இந்த ஒட்டுமொத்த பேரழிவிற்கும் தொடக்கப்புள்ளியாக அமைந்துள்ளது.

ஒவ்வொரு யாத்திரிகரிடமிருந்தும் உயர்தரமான (A-வகுப்பு) சேவைகளை வழங்குவதாகக் கூறி, தலா 562,000 இலங்கை ரூபா பிரீமியம் தொகையாக வசூலிக்கப்பட்டுள்ளது. ஆனால், களத்திலோ அவர்கள் செலுத்திய தொகையில் பாதிக்கும் குறைவான மதிப்புடைய, தரம் குறைந்த (C-வகுப்பு) கூடாரங்களில் மிருகங்களைப் போல அடைக்கப்பட்டுள்ளனர்.

சுகாதார சீர்கேடு: 3,500 பேருக்கு வெறும் 32 கழிவறைகள்!

மினாவில் தங்கியிருந்த ஒட்டுமொத்த இலங்கை ஹாஜிகளின் கூட்டத்திற்கும் சேர்த்து வழங்கப்பட்டுள்ளது வெறும் 32 கழிவறைகள் மட்டுமே! இந்த கழிவறைகளே குளிப்பதற்கும் பயன்படுத்தப்படுவதால், 100 யாத்திரிகர்களுக்கு 1 கழிவறை என்ற சாத்தியமற்ற விகிதம் உருவாகியுள்ளது.

இதனால், முதியவர்களும், நோயாளிகளும் கொளுத்தும் வெயிலில் மணிக்கணக்காகக் வரிசையில் நின்று, தங்களின் இயற்கை உபாதைகளைக் கூட கழிக்க முடியாமல் கண்ணீர் வடிக்கும் அவலம் நேர்ந்துள்ளது.

பசிப் பட்டினி: 3,500 பேருக்கு இரண்டே இரண்டு பஃபே (Buffet) வரிசைகள்!

கடும் பாலைவன வெயிலில், அலைந்து திரிந்து சோர்வடைந்த 3,500 யாத்திரிகர்களுக்கும் உணவளிப்பதற்காக, ஆண்களுக்கு ஒன்று, பெண்களுக்கு ஒன்று என வெறும் இரண்டு பொபே (Buffet) உணவு விநியோகம் மட்டுமே அமைக்கப்பட்டுள்ளன.

பல மணிநேரக் காத்திருப்புக்குப் பிறகு, அந்த நீண்ட வரிசையில் நின்று வாங்கும் உணவும், மனிதர்கள் வாயில் வைக்க முடியாத அளவிற்கு மிக மோசமான தரத்தில் இருப்பதாக ஹாஜிகள் குற்றம் சாட்டுகின்றனர்.

மக்களின் அவலமும், அதிகாரிகளின் சொகுசும்: வெடித்தது மக்கள் ஆக்ரோஷம்!

சாதாரண குடிமக்கள் பசியாலும், தாகத்தாலும், கடுமையான வெப்பத்தாலும் மயங்கி விழும் நிலையில், அவர்களுக்கு உதவ வேண்டிய ஹஜ் குழு உறுப்பினர்களின் அநாகரிகமான செயல்பாடு ஒட்டுமொத்த சமூகத்தையும் ஆத்திரமடையச் செய்துள்ளது.

பொதுக் கூடாரங்களுக்குச் சென்று மக்களின் குறைகளைக் கேட்கக்கூட மறுத்துள்ள ஹஜ் குழு உறுப்பினர்கள், குளிரூட்டப்பட்ட சொகுசு VIP தங்குமிடங்களில் தங்களை ஒளித்துக் கொண்டுள்ளனர். மக்கள் அங்கே நரக வேதனைப் பட, இவர்கள் சொகுசு குளியலறைகளையும், உயர்தர வசதிகளையும் அநுபவித்துக் கொண்டிருக்கிறார்கள் என்ற அதிர்ச்சித் தகவல் வெளியாகியுள்ளது.

உடனடிப் பதவி விலகலுக்கு வலுக்கும் கோரிக்கை!

இது வெறும் ஒரு நிர்வாகத் தோல்வி மட்டுமல்ல; புனித யாத்திரை வந்த மக்களின் உரிமைகளைப் பறித்து, அவர்களின் பணத்தைச் சூறையாடிய நிர்வாணமான நிதி மோசடி என்றே குற்றம் சாட்டப்படுகிறது. நமது நாட்டின் முதியவர்களையும், பெற்றோர்களையும் பாலைவனத்தில் தவிக்கவிட்டு, சொகுசு வாழ்க்கை வாழும் ஹஜ் குழுவின் செயல், அவர்களின் தரமற்ற செயலைத்தான் காட்டுகிறது.

எனவே, இந்த பேரழிவிற்கு முழுப் பொறுப்பேற்று, இலங்கை ஹஜ் குழுவின் ஐந்து உறுப்பினர்களும் உடனடியாகத் தங்களின் பதவிகளை ராஜினாமா செய்ய வேண்டும். அவர்கள் இன்று பதவி விலகாவிட்டால், புனித ஹஜ் விவகாரத்தில் திட்டமிட்ட மோசடி நடந்துள்ளது என்பது அசைக்க முடியாத உண்மையாகிவிடும் என சமூக ஆர்வலர்களும், பாதிக்கப்பட்டோரின் உறவினர்களும் கொதித்தெழுந்துள்ளனர் என டெய்லி மிரர் இணைய செய்தியில் குறிப்பிடப்பட்டுள்ளது.

மதுரங்குளி: ஒரு கிராமத்தின் ஒட்டுமொத்த இயக்கமும் ஒரேயொரு பேருந்தை நம்பி இருந்தால், அந்தப் பேருந்துக்கு ஏதேனும் நேர்ந்தால் மக்களின் நிலை என்னவாகும்? அப்படியொரு அவல நிலையைத்தான் தற்போது கரம்பை, மதுரங்குளி, கொத்தந்தீவு மற்றும் பெரியபாடு கிராம மக்கள் எதிர்கொண்டு வருகின்றனர்.

விபத்தும்… முடங்கிய பேருந்தும்!

கடந்த மே மாதம் 29ஆம் தேதி (29.05.2026) மாலை வேளையில், மதுரங்குளி – கொத்தந்தீவு பகுதியில் இலங்கை போக்குவரத்துச் சபைக்குச் (இ.போ.ச) சொந்தமான பேருந்து ஒன்று துரதிர்ஷ்டவசமாக விபத்துக்குள்ளானது. இந்த விபத்தில் ஒருவர் உயிரிழந்த சம்பவம் அப்பகுதியை சோகத்தில் ஆழ்த்தியது. விபத்தையடுத்து, சட்டம் மற்றும் விசாரணை நடைமுறைகளுக்காக விபத்துக்குள்ளான பேருந்து தற்போது காவல்துறையினரின் கட்டுப்பாட்டில் வைக்கப்பட்டுள்ளது.

விசாரணைகள் ஒருபுறம் நடக்க, மறுபுறம் இந்தப் பேருந்தையே தங்கள் பிரதான போக்குவரத்தாக நம்பியுள்ள கிராம மக்களின் அன்றாட வாழ்க்கை முற்றிலும் முடங்கிப் போயுள்ளது.

இந்தக் கிராமங்களுக்குச் சேவை செய்ய இருக்கும் ஒரேயொரு பொதுப் போக்குவரத்து இந்த இ.போ.ச பேருந்து மட்டும்தான் என்பதுதான் இங்குள்ள ஆகப்பெரிய சோகம்.

• காலை நேரத்து கல்விப் பயணம்: தினமும் காலையில் பெரியபாடு கிராமத்தில் இருந்து சின்னப்பாடு பாடசாலைக்கு மாணவர்களை ஏற்றிச் செல்லும் ஒரேயொரு பேருந்து இது மட்டும்தான்.
• அரச மற்றும் தனியார் ஊழியர்கள்: காலை 07:50 மணிக்கு கொத்தந்தீவில் இருந்து அரச பணியாளர்கள், அன்றாடக் கூலித் தொழிலாளர்கள் என புத்தளம் நோக்கிப் பயணிக்கும் பலரும் இந்தப் பேருந்தை மாத்திரம் நம்பியே உள்ளனர்.
• பிற்பகல் நேரத்துப் பள்ளி மாணவர்கள்: மதியம் 02:00 மணியளவில் புத்தளத்தில் இருந்து புறப்படும் இந்த ஒரேயொரு பேருந்தில்தான் புத்தளம் ஆனந்தா கல்லூரி மற்றும் புத்தளம் நகரில் உள்ள ஏனைய பாடசாலைகளில் கல்வி பயிலும் நூற்றுக்கணக்கான மாணவர்கள் தங்களின் இருப்பிடங்களை வந்தடைகின்றனர்.

5 நாட்களாகத் தொடரும் அவதி: தீர்வு எப்போது?

விபத்து நடந்து சுமார் 5 தினங்களாகக் கடந்த நிலையிலும், இந்தப் பகுதிக்கு மாற்றுப் பேருந்துச் சேவை எதுவும் வழங்கப்படவில்லை. இதனால், பள்ளி மாணவர்கள் உரிய நேரத்திற்குச் செல்ல முடியாமலும், பொதுமக்கள் தங்களின் அன்றாடப் பணிகளுக்குச் செல்ல முடியாமலும் கடுமையான அவதிக்குள்ளாகியுள்ளனர்.

பொதுமக்களின் குமுறல்: “விபத்து நடந்தது துரதிர்ஷ்டவசமானதுதான். அதற்கான சட்ட நடவடிக்கைகளை நாங்கள் எதிர்க்கவில்லை. ஆனால், அதைக் காரணம் காட்டி ஒட்டுமொத்த கிராமத்தின் போக்குவரத்தையும் முடக்குவது எந்த வகையில் நியாயம்? எங்களின் பிள்ளைகளின் கல்வி பாதிக்கப்படுகிறது. மாற்றுப் பேருந்து ஒன்றை இயக்க அதிகாரிகள் ஏன் இன்னும் நடவடிக்கை எடுக்கவில்லை?” என அப்பகுதி மக்கள் வேதனையுடன் கேள்வி எழுப்புகின்றனர்.

பாடசாலை மாணவர்களின் எதிர்காலத்தையும், பொதுமக்களின் அத்தியாவசியத் தேவைகளையும் கருத்தில் கொண்டு, இலங்கை போக்குவரத்துச் சபையின் உயர் அதிகாரிகள் உடனடியாகத் தலையிட்டு, இப்பகுதிக்கு மாற்றுப் பேருந்துச் சேவை ஒன்றை விரைந்து வழங்க வேண்டும் என்பதே ஒட்டுமொத்த கிராமத்தினரதும் அவசரக் கோரிக்கையாக உள்ளது.