இலங்கையில் டெங்கு தொற்றின் தாக்கம் மீண்டும் தீவிரமடைந்துள்ள நிலையில், கடந்த ஆண்டுடன் ஒப்பிடுகையில் இந்த ஆண்டு டெங்கு நோயாளர்களின் எண்ணிக்கை 50 முதல் 55 சதவீதம் வரை அதிகரித்துள்ளதாக தேசிய டெங்கு ஒழிப்பு பிரிவு எச்சரிக்கை விடுத்துள்ளது.

அந்தப் பிரிவின் பணிப்பாளர் வைத்தியர் கபில கண்ணங்கர தெரிவிக்கையில், இந்த ஆண்டு ஜூன் 5ஆம் திகதி வரையிலான காலப்பகுதிக்குள் நாடளவில் மொத்தமாக 36,168 டெங்கு நோயாளர்கள் பதிவாகியுள்ளதாகக் குறிப்பிட்டார். அதில், சுமார் 50 சதவீதமான நோயாளர்கள் மேல் மாகாணத்திலேயே பதிவாகியிருப்பது கவலைக்கிடமான நிலையை வெளிப்படுத்துவதாகும் எனவும் அவர் சுட்டிக்காட்டினார்.

மேல் மாகாணத்திற்கு அடுத்ததாக தெற்கு மாகாணத்தின் காலி மற்றும் மாத்தறை மாவட்டங்களிலும், சப்ரகமுவ மாகாணத்தின் இரத்தினபுரி மற்றும் கேகாலை மாவட்டங்களிலும், மேலும் புத்தளம் மற்றும் கண்டி மாவட்டங்களிலும் அதிகளவிலான டெங்கு நோயாளர்கள் அடையாளம் காணப்பட்டுள்ளதாக அவர் தெரிவித்தார்.

டெங்கு தொற்றின் அதிகரிப்புக்கு காரணமாக, இந்த ஆண்டு ஜனவரி மாதம் முதல் தொடர்ச்சியாக நிலவிய மழையுடனான வானிலை முக்கிய பங்காற்றியுள்ளதாகவும் வைத்தியர் கபில கண்ணங்கர விளக்கமளித்தார். அதேவேளை, அண்மையில் தாக்கத்தை ஏற்படுத்திய ‘டிட்வா’ புயலுக்குப் பின்னர் பல இடங்களில் தேங்கிய குப்பைகள் மற்றும் கழிவுப் பொருட்கள் கொசுக்கள் பெருகுவதற்கான புதிய இனப்பெருக்கத் தளங்களாக மாறியுள்ளன என்றும் அவர் எச்சரித்தார்.

இதனையடுத்து, பொதுமக்கள் தங்களது வீடுகள் மற்றும் சுற்றுப்புறங்களை சுத்தமாக வைத்திருப்பதுடன், மழைநீர் தேங்கக்கூடிய பாத்திரங்கள், பழைய டயர்கள், பிளாஸ்டிக் பொருட்கள் உள்ளிட்ட கொசு பெருகும் இடங்களை உடனடியாக அகற்ற நடவடிக்கை எடுக்க வேண்டியது அவசியம் என சுகாதார அதிகாரிகள் வலியுறுத்தியுள்ளனர்.

டெங்கு என்பது சாதாரண காய்ச்சல் அல்ல. சரியான நேரத்தில் மருத்துவ ஆலோசனையைப் பெறத் தவறினால் உயிரிழப்புகளுக்கும் வழிவகுக்கக்கூடிய ஆபத்தான நோயாகும். எனவே, காய்ச்சல், கடுமையான தலைவலி, கண் வலி, உடல்வலி போன்ற அறிகுறிகள் தென்பட்டால் உடனடியாக அருகிலுள்ள மருத்துவமனையை அணுகுமாறு பொதுமக்களிடம் மீண்டும் மீண்டும் அறிவுறுத்தப்பட்டுள்ளது.

“கொசுவை கட்டுப்படுத்துவது அதிகாரிகளின் பொறுப்பு மட்டுமல்ல; ஒவ்வொரு குடும்பத்தினரின் விழிப்புணர்வும் நாட்டை டெங்கிலிருந்து பாதுகாக்கும் மிகப்பெரிய ஆயுதமாகும்” என்பதே சுகாதாரத் துறையினரின் வலியுறுத்தலாகும்.

ஜூட் சமந்த

மஹவெவ – ஹொரகலே தோட்டத்தில் மணல் அகழ்வு சர்ச்சை: சுற்றுச்சூழல் பாதிப்பா? அரச அனுமதியுடன் மேற்கொள்ளப்படும் நடவடிக்கையா?

பசுமை பாதுகாப்பை உறுதி செய்வதாக வாக்குறுதி அளித்து ஆட்சிக்கு வந்த அரசாங்கத்தின் கீழ், அரச நிறுவனத்துக்குச் சொந்தமான நிலப்பரப்பிலேயே மணல் அகழ்வு இடம்பெறுவதாகக் கூறப்படும் சம்பவம் புத்தளம் மாவட்டத்தில் புதிய சர்ச்சையை ஏற்படுத்தியுள்ளது.

கால்நடை அபிவிருத்தி சபைக்குச் சொந்தமான மஹவெவ – ஹொரகலே தோட்டப் பகுதியில் சட்டவிரோத மணல் அகழ்வு நடைபெறுவதாக நாத்தாண்டிய பிரதேச சபையின் பொது எதிர்க்கட்சி உறுப்பினர்கள் குற்றஞ்சாட்டியுள்ளனர். எனினும், அந்த குற்றச்சாட்டுகளை கால்நடை அபிவிருத்தி சபை அதிகாரிகள் முற்றாக மறுத்து, இது முழுமையாக சட்டபூர்வமான வர்த்தக நடவடிக்கை என விளக்கமளித்துள்ளனர்.

சுமார் 800 ஏக்கர் பரப்பளவைக் கொண்ட ஹொரகலே தோட்டத்தில் கால்நடைப் பண்ணை நடவடிக்கைகளுடன் இணைந்து குறிப்பிடத்தக்க அளவில் தென்னைச் சாகுபடியும் மேற்கொள்ளப்பட்டு வருகிறது. அந்தத் தென்னைத் தோட்டத்தின் ஒரு பகுதியில் மணல் அகழ்வு மேற்கொள்ளப்பட்டு வருவதாகவும், இதனால் கடுமையான சுற்றுச்சூழல் பாதிப்புகள் ஏற்படக்கூடும் என்றும் எதிர்க்கட்சி உறுப்பினர்கள் குற்றம் சாட்டுகின்றனர்.

கடந்த 5ஆம் திகதி நாத்தாண்டிய பிரதேச சபையின் பொது எதிர்க்கட்சி உறுப்பினர்கள் குழுவொன்று சம்பவ இடத்திற்குச் சென்று ஆய்வு மேற்கொண்டது. அப்போது சுமார் ஐந்து ஏக்கர் பரப்பளவில் மணல் அகழ்வு நடைபெற்றிருப்பது அவதானிக்கப்பட்டதாக அவர்கள் தெரிவித்தனர்.

இதுகுறித்து கருத்து தெரிவித்த எதிர்க்கட்சி உறுப்பினர்கள்,

“சுற்றுச்சூழலுக்கு எந்தவித பாதிப்பும் ஏற்படாது என்று மக்களிடம் உறுதியளித்தே இந்த அரசாங்கம் ஆட்சிக்கு வந்தது. ஆனால் இன்று நடைபெறுவது அதற்கு முற்றிலும் முரணான செயல்பாடுகளாகும். மணல் அகழ்வுக்காக ஒதுக்கப்பட்ட பகுதியில் இருந்த பல தென்னை மரங்கள் அகற்றப்பட்டுள்ளன. மூன்று அடி அளவிலான மணல் அடுக்கு மட்டுமே அகற்றப்படும் என கூறப்பட்டாலும், அதைவிட அதிகளவு மணல் தோண்டப்பட்டிருப்பது தெளிவாக தெரிகிறது,” என குற்றம்சாட்டினர்.

இந்நிலையில், இந்த விவகாரம் தொடர்பில் கால்நடை அபிவிருத்தி சபையின் ஹொரகலே தோட்ட துணைப் பொது முகாமையாளர் நீலக்ஷ நிமல்சிறி விளக்கமளித்தார்.

“இங்கு எந்தவித மணல் கொள்ளையும் நடைபெறவில்லை. இது முற்றிலும் சட்டபூர்வமான செயற்பாடாகும். தோட்டத்தின் குறிப்பிட்ட பகுதியில் தென்னைச் சாகுபடி வெற்றிகரமாக செய்ய முடியாத நிலை இருந்தது. ஆய்வுகளின் மூலம் அப்பகுதியில் இருந்த சிலிக்கா மணல் அடுக்கே அதற்குக் காரணம் என தெரியவந்தது. அதனால் அந்த மணல் அடுக்கை அகற்றி நிலத்தை தென்னைச் சாகுபடிக்குத் தகுந்தவாறு மாற்ற தீர்மானிக்கப்பட்டது.

இதற்காக புவியியல் மற்றும் சுரங்கத் திணைக்களம் உள்ளிட்ட அரச நிறுவனங்களிடமிருந்து தேவையான அனுமதிகள் பெறப்பட்டுள்ளன. மேலும், முறையான கொள்முதல் நடைமுறைகள் மற்றும் திறந்த டெண்டர் செயல்முறையின் ஊடாகவே மணல் விற்பனை செய்யப்பட்டுள்ளது. இந்த நடவடிக்கையின் மூலம் கால்நடை அபிவிருத்தி சபைக்கு சுமார் 180 மில்லியன் ரூபாய் வருவாய் கிடைத்துள்ளது. எனவே இது மணல் கொள்ளையோ அல்லது சுற்றுச்சூழல் அழிவை ஏற்படுத்தும் செயற்பாடோ அல்ல,” என அவர் தெரிவித்தார்.

அரச நிறுவன நிலத்தில் நடைபெறும் இந்த மணல் அகழ்வு தொடர்பான சர்ச்சை தற்போது புத்தளம் மாவட்ட மக்களின் கவனத்தை ஈர்த்துள்ளதுடன், இது தொடர்பாக சுயாதீன விசாரணை அவசியமென பல தரப்பினரும் வலியுறுத்தி வருகின்றனர்.

புத்தளம் பிரதேச செயலகப் பிரிவுக்குட்பட்ட பெரியபள்ளி குடியிருப்பு கிராம உத்தியோகத்தர் பிரிவில் வாழ்ந்து வரும் பொருளாதார ரீதியாக பின்தங்கிய குடும்பம் ஒன்றின் நீண்டநாள் சொந்த வீட்டுக் கனவு இன்று நனவாகும் பாதையில் முதல் அடியை எடுத்து வைத்தது.

தேசிய வீடமைப்பு அபிவிருத்தி அதிகார சபையின் நிதியுதவியுடன் நிர்மாணிக்கப்படவுள்ள நிரந்தர வீட்டிற்கான அடிக்கல் நாட்டும் நிகழ்வு, இன்று (06.06.2026) சனிக்கிழமை புத்தளம் மாவட்ட பாராளுமன்ற உறுப்பினர் கெளரவ M.J.M. பைசல் அவர்களின் தலைமையில் நடைபெற்றது.

குறைந்த வருமானம் கொண்ட குடும்பங்களின் வாழ்க்கைத் தரத்தை உயர்த்தும் நோக்கில் முன்னெடுக்கப்படும் இந்த வீட்டுத்திட்டத்தின் கீழ் தெரிவு செய்யப்பட்ட குடும்பமொன்றிற்கு பாதுகாப்பான, நிலையான மற்றும் கண்ணியமான வாழ்விடத்தை வழங்கும் அரிய வாய்ப்பு உருவாகியுள்ளது. இதன் மூலம் பல ஆண்டுகளாக சொந்த வீடு என்ற கனவை மனதில் சுமந்து வாழ்ந்த அந்தக் குடும்பத்தின் எதிர்காலத்திற்கு புதிய நம்பிக்கை ஒளி பிறந்துள்ளது.

நிகழ்வில் புத்தளம் மாவட்ட பாராளுமன்ற உறுப்பினர் கெளரவ முஹம்மது பைசல் அவர்களுடன், புத்தளம் மாநகர சபையின் மேயர் கெளரவ ரின்ஷாட் அகமட், பிரஜா சக்தி CDC தலைவி சகோதரி எஸ்மின், சகோதரர் ரியாஸ், சகோதரர் சர்ராஜ் உள்ளிட்ட சமூகப் பிரதிநிதிகள் கலந்துகொண்டனர்.

மேலும், தேசிய மக்கள் சக்தியின் கட்சி உறுப்பினர்கள், வீட்டு பயனாளிகள், சம்பந்தப்பட்ட கிராம சேவகர் பிரிவின் அரச உத்தியோகத்தர்கள் மற்றும் வீட்டுத்திட்ட உத்தியோகத்தர்களும் நிகழ்வில் பங்கேற்று புதிய வீட்டிற்கான அடிக்கல் நாட்டும் தருணத்தை சிறப்பித்தனர்.

ஒரு வீடு என்பது வெறும் சுவர்களும் கூரையும் கொண்ட கட்டிடம் மட்டுமல்ல; அது ஒரு குடும்பத்தின் பாதுகாப்பு, நம்பிக்கை, மரியாதை மற்றும் எதிர்கால கனவுகளின் அடையாளமாகும். அந்த வகையில், பெரியபள்ளி கிராமத்தில் இன்று நாட்டப்பட்ட இந்த அடிக்கல், ஒரு வீட்டிற்கான அடிக்கல் மட்டுமன்றி, ஒரு வறிய குடும்பத்தின் புதிய வாழ்விற்கான நம்பிக்கையின் அடிக்கல்லாகவும் அமைந்துள்ளது.

அலைகளின் கோரப் பிடியில் மூன்று உயிர்கள் பலி; நுரைச்சோலையில் சோகத்தை ஏற்படுத்திய துயரச் சம்பவம்

இன்று மாலை நுரைச்சோலை தழுவ கடலில் மூழ்கி ஒரே குடும்பத்தை சேர்ந்த மூவர் உயிரிழந்த துயரச் சம்பவம், அப்பகுதி மக்களை பெரும் சோகத்தில் ஆழ்த்தியுள்ளது. குடும்பத்துடன் மகிழ்ச்சியாக கடற்கரைக்கு சென்றிருந்த குடும்பத்தினரில் மூவர், எதிர்பாராத விதமாக கடலலைகளில் சிக்கி உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.

புத்தளம் தில்லையடி பகுதியில் ஒரே குடும்பத்தைச் சேர்ந்த இரு இளம் பெண்களும் ஒரு இளைஞரும் இவ்வாறு உயிரிழந்துள்ளனர். இன்று மாலை குடும்பத்தினருடன் கடற்கரைக்கு சென்று கடற்கரையில் குதூகலித்துக்கொண்டிருந்த வேளையில் வீசிய பலத்த காற்றுடன் ஏற்பட்ட அலைகளில் சிக்கி அவர்கள் கடலுக்குள் இழுத்துச்செல்லப்பட்ட நிலையில் உயிரிழந்துள்ளனர்.

பல போராட்டங்களுக்கு மத்தியில் இவர்களின் உடல்கள் கரைக்கு கொண்டுவரப்பட்ட வேலை இவர்கள் உயிரிழந்த நிலையில் காணப்பட்டதாக உறவினர்கள் தெரிவித்துள்ளனர்.

உயிரிழந்தவர்களில் 25 வயதுடைய இளைஞர் ஒருவரும், 18 மற்றும் 19 வயதுடைய இரண்டு இளம் பெண்களும் அடங்குவதாக பொலிஸ் ஊடகப் பிரிவு உறுதிப்படுத்தியுள்ளது. விடுமுறையை சந்தோசமாக கழிக்க குடும்பத்துடன் கடற்கரைக்கு சென்ற பயணம், சில நிமிடங்களில் மீள முடியாத சோகமாக மாறியிருப்பது உறவினர்களை மட்டுமன்றி முழு ஊரையும் உலுக்கியுள்ளது.

உயிரிழந்தவர்களின் சடலங்கள் பிரேதப் பரிசோதனைக்காக புத்தளம் வைத்தியசாலையில் வைக்கப்பட்டுள்ளதுடன், சம்பவம் தொடர்பான மேலதிக விசாரணைகளை நுரைச்சோலை பொலிஸார் முன்னெடுத்து வருகின்றனர்.

இந்த துயரச் சம்பவம், கடற்கரைகளில் பாதுகாப்பு முன்னெச்சரிக்கைகளைப் பின்பற்றுவதன் அவசியத்தை மீண்டும் ஒருமுறை நினைவூட்டியுள்ளது. குறிப்பாக பலத்த அலைகள் காணப்படும் பகுதிகளில் எச்சரிக்கைகளைப் புறக்கணிக்காமல், உயிர் பாதுகாப்பை முதன்மைப்படுத்த வேண்டும் என்பதையும் இந்தச் சம்பவம் எமக்கு உணர்த்துகிறது.

அரசாங்கத்தின் ஆதரவாளர்கள் எனத் தம்மை அடையாளப்படுத்திக்கொண்டு,  மத்திய வங்கிக்கு முன்பாக திரண்டு அதன் ஆளுநர் நந்தலால் வீரசிங்கவைப் பதவியிலிருந்து விலகுமாறு கோரி நடத்திய போராட்டம், அரசாங்கத்தின் மற்றுமொரு அரசியல் நாடகமென சர்வஜன அதிகாரம் கட்சியின் கம்பஹா மாவட்ட முதன்மை அமைப்பாளரும் தொழிலதிபருமான ஜயந்த அத்துகோரள தெரிவித்துள்ளார்.

சர்வஜன அதிகாரம் கட்சியின் காரியாலயத்தில் நடைபெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே அவர் மேற்கண்டவாறு தெரிவித்தார்.

அவர் அங்கு மேலும் உரையாற்றுகையில்,

பொருளாதார நெருக்கடிக்குத் தீர்வுகளை வழங்குவதற்குப் பதிலாக, அரசாங்கம் தற்போதைய தோல்விகளுக்குப் பொறுப்புக்கூற வேண்டிய கட்டாயத்தில் உள்ளது. கடந்த காலங்களில் அரசாங்கம் தனது பல்வேறு தந்திரோபாயங்களைப் பயன்படுத்தி மத்திய வங்கியையும் நாட்டின் நிதியையும் தனிநபர்களுக்குச் சாதகமாக மாற்றியதன் மூலம் பெரும் களங்கத்தை ஏற்படுத்திக்கொண்டது. 

இவ்வாறான சூழலில், அரசாங்கத்தின் முறையற்ற நிர்வாகத்தினால் ஏற்பட்ட கசப்பான விளைவுகளுக்குத் தற்போதைய மத்திய வங்கி ஆளுநரை மட்டும் பொறுப்பாக்கி, அவரைப் பதவியிலிருந்து நீக்குவதன் மூலம் தாங்கள் செய்த தவறுகளிலிருந்து தப்பிக்க அரசாங்கம் முற்படுகிறது.

குறிப்பாக, கடந்த காலங்களில் இடம்பெற்ற 2.5 மில்லியன் டொலர் மோசடி உள்ளிட்ட அனைத்து நிதி கொடுக்கல் வாங்கல்களும் மத்திய வங்கி ஆளுநரின் கட்டுப்பாட்டில் மாத்திரம் இருக்கவில்லை. மாறாக, நிதி அமைச்சர் தலைமையிலான நிதி அமைச்சின் பொறுப்பிலேயே அவை முன்னெடுக்கப்பட்டன.

இவ்வாறான பின்னணியில், நாட்டை மீட்டெடுக்கப் போராடும் ஒருவரைப் பதவியிலிருந்து நீக்க அரசாங்கம் தனது ஆட்களைக் கொண்டு நேற்று நாடகமொன்றை அரங்கேற்றியுள்ளது. ஆட்சிக்கு வந்த நாள் முதல் மக்களை ஏமாற்றிவரும் இக்குழுவினர், தாங்கள் செய்த தவறுகளுக்கு எதிராகக் குரல் எழுப்புபவர்களை அடக்க இவ்வாறான நபர்களைப் பயன்படுத்துவதையே வழக்கமாகக் கொண்டுள்ளனர்.

அத்துடன், அரசாங்கம் பௌத்த மதத்துக்கு எதிரான செயற்பாடுகளைத் தொடர்ந்து முன்னெடுத்து வருகிறது. பாராளுமன்றத்தில் ஜயமங்கல காதாவைப் பாராயணம் செய்யத் தடை விதித்தது முதல், உள்ளூராட்சி மன்றங்களின் ஆரம்ப நிகழ்வுகளில் பஞ்சசீலத்தைப் பின்பற்றுவதைத் தடுத்தமை வரை இவை திட்டமிட்ட செயற்பாடுகளாகும். 

மேலும், வடக்கு மாகாணத்தில் பௌத்த பிக்குகளை அச்சுறுத்தியதும், அவர்களுக்குப் பாதிப்புகளை ஏற்படுத்தியதும் அரசாங்கத்தின் பௌத்த விரோதப் போக்கையே காட்டுகின்றது. இவ்வாறான சூழலில், புனிதமிக்க வெசாக் பண்டிகை காலத்திலும் தொடர்ச்சியான மின்வெட்டுகளை மேற்கொண்டு பௌத்த மக்களின் மனதைப் புண்படுத்தும் செயற்பாடுகளை அரசாங்கம் முன்னெடுத்துள்ளது என ஜயந்த அத்துகோரள மேலும் தெரிவித்துள்ளமை குறிப்பிடத்தக்கது.

ஊடகத்துறைக்கு புதிய அத்தியாயம்! இலங்கையில் பட்டயம் பெற்ற ஊடக உயர்தொழிலர்களுக்கான நிறுவகம் உருவாகிறது

கொழும்பு: இலங்கையின் ஊடகத் துறையை மேலும் தொழில்முறைப்படுத்தும் நோக்கில், நாட்டின் ஊடகத் துறையில் பணியாற்றும் உயர்தொழிலாளர்களுக்கான தொழில்சார் நியமங்களை அறிமுகப்படுத்தி அவற்றைப் பேணுவதற்காக “இலங்கை ஊடக உயர்தொழிலர்களின் பட்டயம் பெற்ற நிறுவகம்” என்ற புதிய அமைப்பை நிறுவுவதற்கான சட்டமூலம் அரசாங்க விசேட வர்த்தமானியில் வெளியிடப்பட்டுள்ளது.

சுகாதார மற்றும் வெகுஜன ஊடக அமைச்சரின் பணிப்புரைக்கு அமைய, 2026 ஆம் ஆண்டு ஜூன் 5 ஆம் திகதி வெளியிடப்பட்டுள்ள இந்த விசேட வர்த்தமானி, நாட்டின் ஊடகத் துறையில் புதிய மாற்றத்திற்கான அடித்தளமாகப் பார்க்கப்படுகிறது.

சட்டமூலத்தின் படி, புதிய நிறுவகம் சுயாதீனமாக இயங்கும் ஒரு கூட்டுத்தாபனமாக அமையவுள்ளதுடன், ஊடகத்துறையில் செயற்படும் பல்வேறு துறையினரையும் ஒரே தொழில்சார் கட்டமைப்பின் கீழ் கொண்டு வருவதை பிரதான இலக்காகக் கொண்டுள்ளது.

எழுத்தாளர்கள், ஊடகவியலாளர்கள், பதிப்பாசிரியர்கள், தொகுப்பாளர்கள், ஒளிபரப்பாளர்கள், ஊடக ஆராய்ச்சியாளர்கள் மற்றும் புகைப்படப்பிடிப்பாளர்கள் உள்ளிட்ட அனைத்து உயர்தொழிலாளர்களுக்கும் இந்த நிறுவகத்தில் உறுப்புரிமை வழங்கப்படவுள்ளது. அதேவேளை, தகைமை மற்றும் திறமைகளை அடிப்படையாகக் கொண்டு உறுப்பினர்களுக்கு உத்தியோகபூர்வ அங்கீகாரம் வழங்கப்படவுள்ளதும் குறிப்பிடத்தக்கது.

மேலும், ஊடகக் கல்வி மற்றும் பயிற்சி நெறிகளை மேம்படுத்துவதற்காக பரீட்சைகள், ஆராய்ச்சிகள் மற்றும் சர்வதேச தரத்திலான கற்கைநெறிகள் அறிமுகப்படுத்தப்படவுள்ளன. உலகளாவிய ஊடகப் போக்குகளுக்கு ஏற்ப உள்ளூர் ஊடகத்துறையை முன்னேற்றும் முயற்சிகளும் இந்த நிறுவகத்தின் மூலம் முன்னெடுக்கப்படவுள்ளன.

இதன் முக்கிய அம்சங்களில் ஒன்றாக, உறுப்பினர்களும் மாணவர்களும் கடைப்பிடிக்க வேண்டிய விசேட நடத்தைக் கோவை தயாரிக்கப்படவுள்ளது. இதன் மூலம் ஊடகத் துறையில் தொழில்சார் ஒழுக்கம், பொறுப்புணர்வு மற்றும் நம்பகத்தன்மையை வலுப்படுத்த அரசாங்கம் எதிர்பார்க்கிறது.

நிறுவகத்தின் நிர்வாகத்தை மேற்கொள்ள 15 உறுப்பினர்களைக் கொண்ட ஆளும் பேரவையொன்று அமைக்கப்படவுள்ளது. இதில் 8 உறுப்பினர்கள் தேர்தல் மூலம் தெரிவு செய்யப்படவுள்ளதுடன், மேலும் 7 பேர் நியமனத்தின் மூலம் இணைக்கப்படவுள்ளனர்.

ஆளும் பேரவை முறைப்படி உருவாகும் வரை, அமைச்சரால் நியமிக்கப்படும் இடைக்காலப் பேரவை ஒன்று செயற்படும். இதில் அமைச்சின் செயலாளருடன், ஊடகத் துறையில் குறைந்தது 20 ஆண்டுகள் அனுபவம் கொண்ட ஆறு நிபுணர்கள் இடம்பெறுவர் என வர்த்தமானியில் தெரிவிக்கப்பட்டுள்ளது.

இந்த புதிய சட்டமூலம் அமலுக்கு வந்தால், இலங்கையின் ஊடகத் துறையில் தொழில்முறை தரநிலைகள், ஒழுக்கம் மற்றும் பொறுப்புணர்வை மேலும் வலுப்படுத்தும் ஒரு முக்கிய திருப்புமுனையாக இது அமையும் என எதிர்பார்க்கப்படுகிறது.

வாகன இறக்குமதிக்கான வர்த்தமானி அறிவிப்பு வெளியாகும் முன்னரே, அரசாங்கத்திற்கு நெருக்கமான தரப்பினருக்கு நாணயக் கடிதங்கள் (LC) திறக்க அனுமதி வழங்கப்பட்டுள்ளதாக நாடாளுமன்ற உறுப்பினர் முஜிபுர் ரஹ்மான் கடுமையான குற்றச்சாட்டை முன்வைத்துள்ளார்.

ஊடகவியலாளர் சந்திப்பொன்றில் கருத்து வெளியிட்ட அவர், இந்த நடவடிக்கை அரசாங்கத்தின் வெளிப்படைத்தன்மை மற்றும் நியாயமான பொருளாதார நிர்வாகம் குறித்த கேள்விகளை எழுப்புவதாக தெரிவித்தார்.

சர்வதேச நாணய நிதியத்திடமிருந்து (IMF) தற்போதைய அரசாங்கத்திற்கு 695 மில்லியன் அமெரிக்க டொலர் நிதி கிடைத்திருந்த போதிலும், உள்நாட்டு சந்தையில் டொலரின் பெறுமதி கணிசமாகக் குறையாதது கவலைக்கிடமான விடயமாகும் என அவர் சுட்டிக்காட்டினார்.

சந்தையில் நிலவும் நம்பிக்கையின்மை மற்றும் எதிர்கால பொருளாதார நிலை குறித்த நிச்சயமற்ற தன்மையே இதற்குக் காரணம் எனக் குறிப்பிட்ட அவர், ரூபாயின் மதிப்பு மேலும் உயரக்கூடும் என்ற எதிர்பார்ப்பில் ஏற்றுமதியாளர்களும் வணிகர்களும் தங்களிடம் உள்ள டொலர்களை சந்தைக்குள் விடாமல் வைத்திருப்பதாக கூறினார்.

மேலும், வாகன இறக்குமதி தொடர்பாக 1,700 வாகனங்களை நாட்டுக்குள் கொண்டு வருவதற்காக 200 மில்லியன் அமெரிக்க டொலர்களுக்கும் அதிக பெறுமதியுடைய நாணயக் கடிதங்கள் திறக்கப்பட்டுள்ளதாகவும் அவர் தெரிவித்தார்.

இங்கு முக்கியமான விடயமாக, ஜனாதிபதி மே 16ஆம் திகதி வாகன இறக்குமதிக்கான வர்த்தமானி அறிவிப்பை வெளியிடுவதற்கு ஒரு நாள் முன்னரான மே 15ஆம் திகதியே 1,600 வாகனங்களுக்கான நாணயக் கடிதங்கள் அவசரமாகத் திறக்கப்பட்டுள்ளதாக அவர் அம்பலப்படுத்தினார்.

இந்த தகவல் முன்கூட்டியே சிலருக்கு வழங்கப்பட்டதா என்ற சந்தேகத்தையும் அவர் எழுப்பினார்.

அதேவேளை, வெள்ளிக்கிழமைகளில்தான் அதிகளவில் நாணயக் கடிதங்கள் திறக்கப்படுகின்றன என்று நிதி இராஜாங்க அமைச்சர் தெரிவித்த கருத்தை நிராகரித்த முஜிபுர் ரஹ்மான், அது “பச்சைப் பொய்” என விமர்சித்தார். உண்மையில் வாரத்தின் ஏனைய நாட்களுடன் ஒப்பிடுகையில் வெள்ளிக்கிழமைகளில்தான் குறைவான அளவில் நாணயக் கடிதங்கள் திறக்கப்படுகின்றன என்றும் அவர் வலியுறுத்தினார்.

வர்த்தமானி அறிவிப்பு வெளியாகவிருப்பதை முன்கூட்டியே அறிந்திருந்த சிலருக்கு, வாகன இறக்குமதிக்கான நாணயக் கடிதங்களை திறக்க அரசாங்கம் வாய்ப்பளித்துள்ளதாக குற்றஞ்சாட்டிய அவர், இது ஜனாதிபதியின் “நண்பர்களுக்கான பொருளாதாரக் கொள்கை” எவ்வாறு நடைமுறையில் உள்ளது என்பதை வெளிச்சம் போட்டுக் காட்டுவதாக தெரிவித்தார்.

ஆட்சியில் இருப்பவர்கள் தமக்கு நெருக்கமானவர்களின் நலன்களையே முன்னிலைப்படுத்தி, சாதாரண மக்களின் தேவைகளையும் நலன்களையும் புறக்கணித்து வருகின்றனர் என அவர் கடுமையாக விமர்சித்தார்.

இந்த குற்றச்சாட்டுகள் அரசியல் மற்றும் பொருளாதார வட்டாரங்களில் புதிய விவாதங்களை ஏற்படுத்தியுள்ள நிலையில், அரசாங்கம் இதற்கு என்ன பதிலளிக்கப் போகிறது என்பது தற்போது கவனிக்கப்படும் முக்கிய விடயமாக மாறியுள்ளது.

இந்த வருடத்தின் இதுவரையிலான காலப்பகுதியில் பதிவாகியுள்ள டெங்கு நோயாளர்களின் எண்ணிக்கை 35,228 ஆக உயர்ந்துள்ளதாக தேசிய டெங்கு ஒழிப்பு பிரிவின் பணிப்பாளர் வைத்தியர் கபில கன்னங்கர தெரிவித்துள்ளார். 

தனியார் ஊடக நிகழ்ச்சி ஒன்றில் கலந்துகொண்டு கருத்து தெரிவித்த அவர், இது கடந்த வருடத்துடன் ஒப்பிடுகையில் 30% முதல் 40% வரையான அதிகரிப்பாகும் எனக் குறிப்பிட்டுள்ளார். 

இந்த நோயாளர்களில் அதிகமானோர் மேல் மாகாணத்தில் பதிவாகியுள்ளதுடன், அவர்களுள் பெரும்பாலானோர் கொழும்பு மாவட்டத்திலேயே கண்டறியப்பட்டுள்ளதாகக் குறிப்பிடப்பட்டுள்ளது. 

தென் மாகாணத்தின் மாத்தறை மற்றும் காலி மாவட்டங்களிலும், மத்திய மாகாணத்தின் கண்டி மாவட்டத்திலும், சப்ரகமுவ மாகாணத்தின் இரத்தினபுரி மாவட்டத்திலும் அதிகளவிலான டெங்கு நோயாளர்கள் அடையாளம் காணப்பட்டுள்ளதாக டெங்கு ஒழிப்பு பிரிவு சுட்டிக்காட்டியுள்ளது. 

டெங்கு நோயாளர்களில் சுமார் 80 சதவீதமானோர் கொழும்பு, கம்பஹா, இரத்தினபுரி, மாத்தறை, காலி மற்றும் கண்டி ஆகிய மாவட்டங்களிலிருந்தே பதிவாகியுள்ளனர். 

‘டித்வா’ புயல் நிலைமையுடன் நாட்டில் ஏற்பட்ட பலத்த மழைவீழ்ச்சி மற்றும் அதன் பின்னர் அவ்வப்போது பெய்த மழை காரணமாக டெங்கு நோயாளர்களின் எண்ணிக்கை சடுதியாக அதிகரித்துள்ளது. 

இதேவேளை, இன்றைய தினத்தில் (05) மற்றுமொரு டெங்கு மரணம் பதிவாகியுள்ளதாகத் தகவல் கிடைத்துள்ளதாகவும், இதனுடன் இந்த வருடத்தின் மொத்த டெங்கு மரணங்களின் எண்ணிக்கை 20 ஆக உயர்ந்துள்ளதாகவும் தேசிய டெங்கு ஒழிப்பு பிரிவின் பணிப்பாளர் வைத்தியர் கபில கன்னங்கர மேலும் தெரிவித்துள்ளார். 

உயிரிழந்தவர்களில் ஐந்து ஆண்கள் அடங்குவதுடன், ஏனையோர் பெண்கள் எனவும் குறிப்பிட்ட அவர் இவ்வாறு உயிரிழந்தவர்களில் மூன்று குழந்தைகளும் உள்ளடங்குவதாக தகவல் வெளியிட்டுள்ளார். 

கடந்த 2025-ஆம் ஆண்டில் 29 டெங்கு நோயாளர்கள் உயிரிழந்திருந்தனர் என்றும் வைத்தியர் கபில கன்னங்கர அங்கு மேலும் சுட்டிக்காட்டினார்.