கல்பிட்டி: இலங்கையின் கிராமப்புறங்களை வறுமையின் பிடியிலிருந்து விடுவித்து, மக்களின் வாழ்வாதாரத்தை முன்னேற்றும் நோக்கில், கிராமிய அபிவிருத்தி, சமூக பாதுகாப்பு மற்றும் சமூக வலுவூட்டல் அமைச்சினால் பிரம்மாண்டமான தேசிய திட்டம் ஒன்று களம் இறக்கப்பட்டுள்ளது.

“பிரஜா சக்தி 2026 – ஆயிரம் கிராமங்களில் ஆயிரம் வேலைத்திட்டங்கள்” என்ற பெயரிலான இந்த வரலாற்றுச் சிறப்புமிக்க தேசிய வேலைத்திட்டம் நேற்று (2026 ஜூன் 02) கல்பிட்டி பிரதேச செயலகப் பிரிவிலும் கல்பிட்டி பிரதேச ஒருங்கிணைப்புக் குழுவின் தலைவரும், நாடாளுமன்ற உறுப்பினருமான கௌரவ எம்.ஜே.எம்.பைசல் அவர்களின் தலைமையில் இந்த ஆரம்ப விழா உத்தியோகபூர்வமாக ஆரம்பித்து வைக்கப்பட்டது.

பொதுமக்களின் வரிப்பணத்திலிருந்து 25,000 மில்லியன் ரூபாய் என்ற பிரம்மாண்ட நிதி ஒதுக்கீட்டில், நாடு முழுவதும் பல்பரிமாண வறுமையை ஒழிப்பதற்காக இந்த விசேட திட்டம் நேற்றைய தினம் நடைமுறைக்கு வந்துள்ளது.

புதுக்குடியிருப்பில் உதித்த புதிய விடியல்!

இதன் முதற்கட்டமாக, கல்பிட்டி பிரதேச செயலகப் பிரிவுக்குட்பட்ட புதுக்குடியிருப்பு கிராம உத்தியோகத்தர் பிரிவில், பிரதேச பொருளாதாரத்தை வலுப்படுத்தும் நோக்கில் மிக முக்கிய வாழ்வாதாரத் திட்டமான “உப்பு உற்பத்தி” திட்டத்திற்கான மதகு அமைக்கும் பணி முறைப்படி ஆரம்பித்து வைக்கப்பட்டது. இத்திட்டம் அப்பகுதி மக்களின் பொருளாதாரத்தில் பெரும் திருப்புமுனையை ஏற்படுத்தும் என எதிர்பார்க்கப்படுகிறது.

மக்கள் பிரதிநிதிகள் மற்றும் அதிகாரிகளின் பங்கேற்பு

இந்த விசேட ஆரம்ப விழாவில் அரசியல் தலைவர்கள், அரச அதிகாரிகள் மற்றும் பொதுமக்கள் எனப் பலரும் ஒன்றிணைந்து புதியதோர் ஆரம்பத்திற்கு வித்திட்டனர்.

குறித்த நிகழ்வில் கல்பிட்டி பிரதேச சபையின் தவிசாளர் ஏ.எஸ்.ஆர். ரிகாஸ், உப தவிசாளர் சமன் குமார ஹேரத் உள்ளிட்ட பிரதேச சபை உறுப்பினர்கள் பலர் கலந்துகொண்டதுடன், கல்பிட்டி பிரதேச செயலாளர், உதவித் திட்டமிடல் பணிப்பாளர், சமூக வலுவூட்டல் உத்தியோகத்தர்கள் உள்ளிட்ட அரச அதிகாரிகள் குழுவினர் பங்கேற்று திட்டங்களை வழிநடத்தினர்.

மக்களின் பலமே நாட்டின் பலம்!

வறுமையை ஒழித்து, ஒவ்வொரு குடும்பத்தின் வாழ்வாதாரத்தையும் உயர்த்துவதே “பிரஜா சக்தி 2026” திட்டத்தின் முக்கிய இலக்காகும். இத்திட்டத்தின் கீழ் தெரிவு செய்யப்பட்ட பயனாளி பொதுமக்கள், தங்களின் பொருளாதாரத்தை தாங்களே கட்டியெழுப்பும் இந்த அரிய வாய்ப்பை மிகவும் ஆர்வத்துடனும், மகிழ்ச்சியுடனும் வரவேற்று இந்த நிகழ்வில் கலந்துகொண்டனர்.

மக்களை உண்மையிலேயே வலுவூட்டும் இந்த “பிரஜா சக்தி” திட்டம், கல்பிட்டி மண்ணில் ஒரு புதிய பொருளாதாரப் புரட்சியை ஏற்படுத்தும் என்பதில் ஐயமில்லை!

கடந்த 2019ஆம் ஆண்டு இலங்கையில் நடத்தப்பட்ட ஈஸ்டர் ஞாயிறு பயங்கரவாதத் தாக்குதல்கள் தொடர்பான விசாரணைகளுக்கு அமைவாக, முன்னாள் ஜனாதிபதி கோட்டாபய ராஜபக்ஷ மற்றும் இரண்டு இராணுவ அதிகாரிகளுக்கு கொழும்பு கோட்டை நீதவான் நீதிமன்றம் வெளிநாட்டுப் பயணத்தடை விதித்து உத்தரவிட்டுள்ளது.​

ஈஸ்டர் ஞாயிறு தொடர் தற்கொலைத் குண்டுத்தாக்குதல்கள் குறித்து தற்போது முன்னெடுக்கப்பட்டு வரும் விரிவான விசாரணைகளின் அடிப்படையிலேயே இந்த அதிரடி உத்தரவை நீதிமன்றம் பிறப்பித்துள்ளது.​

இத்தாக்குதல்களின் பின்னணியில் உள்ள சூழ்ச்சிகள் மற்றும் பாதுகாப்பு குறைபாடுகள் குறித்து குற்றப்புலனாய்வுத் திணைக்களத்தினர் (CID) தீவிர விசாரணைகளை முடுக்கிவிட்டுள்ள நிலையிலேயே, சம்பந்தப்பட்டவர்கள் வெளிநாடுகளுக்கு தப்பிச் செல்வதைத் தடுக்கும் நோக்கில் இப்பயணத்தடை விதிக்கப்பட்டுள்ளது.​

இந்தத் தாக்குதல்களின் பின்னணியில் அரசியல் நோக்கம் மற்றும் சதி இருப்பதாக எழுந்துள்ள குற்றச்சாட்டுகளை முன்னாள் ஜனாதிபதி கோட்டாபய ராஜபக்ஷ தொடர்ச்சியாக மறுத்து வரும் நிலையில் குறித்த தீர்ப்பு வெளியாகியுள்ளமை பெரும் அதிர்வலையை ஏற்படுத்தியுள்ளது.

​உயிர்த்த ஞாயிறு தாக்குதலில் பாதிக்கப்பட்ட மக்களுக்கு நீதியைப் பெற்றுத்தரும் வகையில், தற்போதுள்ள அரசாங்கம் இந்த விசாரணைகளை மீண்டும் தீவிரப்படுத்தியுள்ள சூழலில், நீதிமன்றத்தின் இந்த உத்தரவு அரசியல் மற்றும் பாதுகாப்பு வட்டாரங்களில் பெரும் பரபரப்பை ஏற்படுத்தியுள்ளது.

கற்பிட்டி: கடல் அரிப்பின் கோரப்பிடியில் இருந்து தங்களது வாழ்வாதாரப் பகுதிகளைப் பாதுகாப்பதற்காக, கற்பிட்டி – கீரிமுந்தல் (டச்பே) கிராமிய மீனவ அமைப்பினர் மற்றும் பொதுமக்கள் ஒன்றிணைந்து இன்று அதிரடி நடவடிக்கை ஒன்றில் இறங்கியுள்ளனர்.

கீரிமுந்தல் (டச்பே) கிராமிய மீனவ அமைப்பின் தலைவர் தினேஷ் சுரஞ்சன் பெர்னாண்டோ விடுத்த அவசர வேண்டுகோளுக்கு இணங்க, கரையோரப் பாதுகாப்பை உறுதி செய்யும் நோக்கில் இந்த அவசர மண்வேலி கட்டும் பணி இன்று காலை உத்தியோகபூர்வமாக ஆரம்பித்து வைக்கப்பட்டது.

இன்று காலை கற்பிட்டி பங்குத்தந்தை, உதவிப் பங்குத்தந்தை ஆகியோரின் விசேட ஆசிர்வாதங்கள் மற்றும் இறை வழிபாடுகளுடன் இப்பணிகள் சுபயோக முகூர்த்தத்தில் தொடங்கப்பட்டன. இயற்கைச் சீற்றத்திடமிருந்து தங்களது கிராமத்தையும், கடற்கரையையும் பாதுகாக்க வேண்டும் என்ற ஒற்றை இலக்கோடு அப்பகுதி மக்கள் அதிகாலையிலேயே திரண்டிருந்தனர்.

அதிகாரிகள் மற்றும் அமைப்புகளின் நேரடி மேற்பார்வை

கரையோரப் பாதுகாப்புத் திணைக்களத்தின் பிரதேச காரியாலய அதிகாரிகளின் நேரடி மேற்பார்வையின் கீழ் இப்பணிகள் மிகவும் திட்டமிட்டபடி தரம் வாய்ந்ததாக மேற்கொள்ளப்பட்டு வருகின்றன.

அத்துடன், இந்த உன்னத காரியத்திற்கு ஆலய நிர்வாக சபையினர், மீனவ சங்கத் தலைவர் மற்றும் அதன் முக்கிய உறுப்பினர்கள், கிராமத்தைச் சேர்ந்த பொதுமக்கள் மற்றும் இளைஞர்கள் என பலரும் தங்களது முழுமையான ஒத்துழைப்பை வழங்கி, களத்தில் இறங்கி வேலை செய்து வருவதுடன், சுமார் 80 மீட்டர் நீளம் கொண்ட குறித்த மண்வேலி 10 அடி அகலத்தை கொண்டதாக அமைக்கப்பட்டு வருகின்றது

இயற்கையின் சீற்றத்திற்கு முன்னால் கைகட்டி நிற்காமல், “நம் கிராமத்தை நாமே காப்போம்” என்ற நோக்கில் கீரிமுந்தல் (டச்பே) கிராம மக்கள் காட்டி வரும் இந்த ஒற்றுமையும் அர்ப்பணிப்பும் ஒட்டுமொத்த கரையோர பகுதி மக்களுக்கும் ஒரு முன்மாதிரியாக அமைந்துள்ளது. இந்த மண்வேலி அமைக்கும் பணி நிறைவடையும் பட்சத்தில், இப்பகுதியில் நிலவி வரும் கடல் அரிப்பு அபாயம் தற்காலிகமாக கட்டுப்படுத்தப்படும் என மக்களும் அதிகாரிகளும் நம்பிக்கை தெரிவித்துள்ளனர்.

மாதம்பை (மகாவெவ)

இலங்கையின் கிராமியப் பொருளாதாரம், உணவுப் பாதுகாப்பு மற்றும் வாழ்வாதார மேம்பாட்டை இலக்காகக் கொண்டு, நாடு தழுவிய ரீதியில் முன்னெடுக்கப்படும் பிரம்மாண்டமான “ஆயிரம் கிராமங்களுக்கு ஆயிரம் பணிகள்” திட்டத்தின் புத்தளம் மாவட்டத்திற்கான அங்குரார்ப்பண விழா இன்று மகாவெவ, மாதகொட கிராமத்தில் மிகவும் கோலாகலமாக நடைபெற்றது.

பொதுமக்களின் வரிப்பணத்திலிருந்து 25,000 மில்லியன் ரூபாய் அசுரச் செலவில், நாடு முழுவதும் ஒரே நேரத்தில் ஆரம்பிக்கப்பட்ட இந்த மாபெரும் தேசியத் திட்டத்தின் கீழ், புத்தளம் மாவட்டத்திற்கான முதற்கட்டப் பணிகள் மாதகொட கிராமத்தில் உத்தியோகபூர்வமாகத் தொடக்கி வைக்கப்பட்டன.

விவசாயிகளின் பல தசாப்த காலக் கனவு நனவாகிறது!

இத்திட்டத்தின் கீழ், மாதகொட பகுதியில் நீண்டகாலத் தேவையாக இருந்த “மாதகொட பொல்வத்தை கந்த” கால்வாயை புனரமைத்தல், 2 மதகுகள் (Water doors) அமைத்தல் மற்றும் முறையான நீரோட்டத்தை சீரமைத்தல் ஆகிய கட்டமைப்புப் பணிகள் மாகாண சபைகள் மற்றும் உள்ளூராட்சி மன்ற அமைச்சர் சந்தன அபேரத்ன அவர்களின் தலைமையில் ஆரம்பித்து வைக்கப்பட்டன.

திட்டத்தின் முக்கிய சிறப்பம்சங்கள்:

மொத்த மதிப்பீட்டுச் செலவு: ரூ. 8,000,000/= (80 இலட்சம் ரூபாய்)
நேரடிப் பயன்: இப்பகுதியில் உள்ள 600 ஏக்கருக்கும் அதிகமான நெல் வயல்களுக்குத் தடையின்றி நீர் பாய்வதற்கான வசதி இதன் மூலம் ஏற்படுத்தப்படும்.

இந்தக் கால்வாய் புனரமைப்பின் மூலம், மாதகொட மற்றும் அதனைச் சுற்றியுள்ள நூற்றுக்கணக்கான விவசாயக் குடும்பங்களின் வாழ்வாதாரம் செழிப்படைவதோடு, பிராந்தியத்தின் நெல் உற்பத்தியும் பல மடங்கு அதிகரிக்கும் என எதிர்பார்க்கப்படுகிறது.

மக்கள் பிரதிநிதிகள் மற்றும் அதிகாரிகளின் பங்கேற்பு

இந்த வரலாற்றுச் சிறப்புமிக்க ஆரம்ப விழாவில், புத்தளம் மாவட்ட நாடாளுமன்ற உறுப்பினரும், மாவட்ட ஒருங்கிணைப்புக் குழுவின் இணைத் தலைவருமான திரு. கயான் ஜனக, நாத்தாண்டிய பிரதேச சபையின் தலைவர் திரு. சாகர விஜேசேகர, புத்தளம் மாவட்டச் செயலாளர் திரு. இந்திக சில்வா, மாவட்ட திட்டமிடல் பணிப்பாளர் திருமதி. சிந்தா விதான மற்றும் மகாவெவ பிரதேச செயலாளர் உள்ளிட்ட பல உயர் அரச அதிகாரிகள் கலந்துகொண்டனர்.

மேலும், பிரதேசத்தின் விவசாய அமைப்புகளின் பிரதிநிதிகள் மற்றும் பெருந்திரளான பொதுமக்களும் இப்புரட்சிகரமான திட்டத்தின் ஆரம்ப நிகழ்வில் மிகுந்த உற்சாகத்துடன் கலந்துகொண்டமை குறிப்பிடத்தக்கது. கிராமியப் பொருளாதாரத்தை வலுப்படுத்தும் இந்தத் திட்டம், புத்தளம் மாவட்ட விவசாய வரலாற்றில் ஒரு புதிய திருப்பமாக அமையும் என விழாவில் கலந்துகொண்ட முக்கியஸ்தர்கள் நம்பிக்கை தெரிவித்தனர்.

கொழும்பு: இவ்வருட புனித ஹஜ் கடமையை நிறைவேற்றுவதற்காக சவூதி அரேபியா சென்றிருந்த போது, அங்கு இடம்பெற்ற சில சம்பவங்கள் மற்றும் பரவிய வதந்திகள் குறித்து முஸ்லிம் சமய, கலாசார அலுவல்கள் திணைக்களத்தின் நூல் பரிசீலனைக் குழு உறுப்பினரும், அகில இலங்கை ஜம்இய்யத்துல் உலமாவின் பொதுச் செயலாளருமான அஷ்ஷைக் அர்கம் நூராமித் தெளிவுபடுத்தல் ஒன்றை வெளியிட்டுள்ளார்.

அதில், தான் சவூதி அதிகாரிகளால் கைது செய்யப்படவோ அல்லது தடுத்து வைக்கப்படவோ இல்லை என்பதை அவர் மிகவும் திட்டவட்டமாக மறுத்துள்ளார்.

சர்ச்சைக்குரிய பின்னணி என்ன?

இலங்கை முஸ்லிம் சமய மற்றும் கலாசார அலுவல்கள் திணைக்களத்தின் நூல் பரிசீலனைக் குழு உறுப்பினராக தான் வகிக்கும் பொறுப்பு தொடர்பாக நபர் ஒருவர் முன்வைத்த முறைப்பாடே இந்த விசாரணைக்குக் காரணம் என அவர் குறிப்பிட்டுள்ளார்.

“அந்த முறைப்பாட்டின் அடிப்படையில், நான் மீனா பொலிஸ் நிலையத்தில் ஆஜராகுமாறு கோரப்பட்டதுடன், சில விடயங்கள் குறித்து என்னிடம் வழக்கமான விசாரணை மேற்கொள்ளப்பட்டது. மேலும், சவூதி அரேபியாவின் இஸ்லாமிய விவகார அமைச்சின் அதிகாரிகளாலும் சில தகவல்கள் கோரப்பட்டன.

எனினும், இந்த சாதாரண, வழக்கமான நடைமுறையானது சமூக ஊடகங்களிலும் பொதுவெளியிலும் பல்வேறு உண்மைக்குப் புறம்பான வதந்திகளுக்கும், ஊகங்களுக்கும் வழிவகுத்துவிட்டது என அஷ்ஷைக் அர்கம் நூராமித் தந்து முகநூல் பக்கத்தில் அறிக்கை ஒன்றை வெளியிட்டுள்ளார்.

வதந்திகளை உடைக்கும் உண்மைத் தகவல்கள்

தன்னைப்பற்றி பரவிய செய்திகள் அனைத்தும் அபாண்டமானவை என்பதை உறுதிப்படுத்திய அவர், பின்வரும் முக்கிய உண்மைகளைத் தெளிவுபடுத்தியுள்ளார்:

• கைது செய்யப்படவில்லை: சவூதி அரேபியாவில் தங்கியிருந்த காலப்பகுதியில் எந்தவொரு சந்தர்ப்பத்திலும் அவர் சவூதி அதிகாரிகளால் கைது செய்யப்படவோ அல்லது தடுத்து வைக்கப்படவோ இல்லை.
• கடவுச்சீட்டு பறிமுதல் செய்யப்படவில்லை: அவரது பாஸ்போர்ட் (Passport) அதிகாரிகளால் பறிமுதல் செய்யப்பட்டுள்ளதாகப் பரவிய செய்தியும் முற்றிலும் பொய்யானது.
• பாதுகாப்பான நாடு திரும்பல்: சவூதி அரேபிய வெளிவிவகார அமைச்சுடன் மேற்கொள்ளப்பட்ட சுமுகமான கலந்தாலோசனைகளின் அடிப்படையில், கடந்த 2026 மே 31 ஆம் திகதி அவர் பாதுகாப்பாக இலங்கை வந்தடைந்துள்ளார்.

இராஜதந்திர ரீதியில் நகர்த்தப்பட்ட காய்நகர்த்தல்கள்

இந்த விவகாரத்தின் போது இலங்கை அரசாங்கமும், இராஜதந்திர அதிகாரிகளும் மற்றும் அகில இலங்கை ஜம்இய்யத்துல் உலமாவும் (ACJU) மிகத் துரிதமாகச் செயற்பட்டுள்ளன என்பதை அஷ்ஷைக் அர்கம் நூராமித் நன்றியோடு நினைவு கூர்ந்துள்ளார்.

அஷ்ஷைக் அர்கம் நூராமித் விடுத்துள்ள விசேட வேண்டுகோள்

தற்போது தான் பாதுகாப்பாக நாடு திரும்பியுள்ளதால், இந்த விவகாரம் குறித்து மேலும் ஊகங்களை வெளியிடுவதையோ அல்லது உறுதிப்படுத்தப்படாத தகவல்களைப் பரப்புவதையோ முற்றாகத் தவிர்க்குமாறு அவர் பொதுமக்களிடமும் ஊடகங்களிடமும் பணிவன்புடன் வேண்டிக்கொண்டுள்ளார்.

“எஞ்சியுள்ள ஏதேனும் நிர்வாக அல்லது சட்ட நடைமுறைகள் இருப்பின், அவை உரிய முறையில் கையாளப்படும். நாம் அனைவரும் பரஸ்பர புரிந்துணர்வு, ஒற்றுமை மற்றும் மரியாதையுடன் முன்னோக்கிச் செல்ல வேண்டும். இந்த நிகழ்வுகளால் யாரேனும் மனவருத்தமடைந்திருந்தால் அவர்களிடம் பணிவுடன் மன்னிப்புக் கோருகின்றேன் என்றும் அர்கம் நூரமித் தெரிவித்துள்ளார்.

எமது ஒற்றுமையை அல்லாஹ் வலுப்படுத்துவானாக; தவறான புரிதல்களிலிருந்தும் பிளவுகளிலிருந்தும் நம்மைப் பாதுகாத்து, மார்க்கத்திற்கும் நாட்டிற்கும் சேவை செய்யும் பாக்கியத்தை வழங்குவானாக” என துஆப் பிரார்த்தனையுடன் தனது அறிக்கையை அவர் நிறைவு செய்துள்ளார்.

கொழும்பு, ஜூன் 02- Daily Mirror:

சமீபத்தில் எரிபொருள் விலைகள் அதிகரிக்கப்பட்ட போதிலும், விற்பனை செய்யப்படும் ஒவ்வொரு லீற்றர் எரிபொருளிலும் சிலோன் பெட்ரோலியக் கூட்டுத்தாபனம் (CPC) இன்னமும் பெருமளவிலான நிதி நட்டத்தையே எதிர்கொண்டு வருவதாக அதன் தலைவர் டி.ஜே. ராஜகருணா தெரிவித்துள்ளார்.

உலக சந்தையில் எரிசக்தி விலைகள் கடுமையாக உயர்ந்துள்ள போதிலும், அரசாங்கம் பெரும் தொகையை மானியமாக வழங்கி மக்களைப் பாதுகாத்து வந்தபோதிலும், இந்த மானியங்களுக்காக ஒதுக்கப்பட்ட நிதி மிக வேகமாக தீர்ந்து வருவதாக அவர் எச்சரித்துள்ளார்.

ஜூன் மாதத்துடன் முடியும் ரூ. 57 பில்லியன் மானியம்!

டீசல் லீற்றர் ஒன்றுக்கு 100 ரூபாவையும், பெட்ரோல் லீற்றர் ஒன்றுக்கு 20 ரூபாவையும் மானியமாக வழங்குவதற்காக அரசாங்கம் 57 பில்லியன் ரூபா என்ற மாபெரும் தொகையை ஒதுக்கியிருந்த இந்த நிதியுதவி, கடந்த ஏப்ரல் மற்றும் மே மாதங்களில் வழங்கப்பட்டதுடன், இந்த ஜூன் மாதத்திலும் தொடர்கிறது.

“ஆனால், இந்த மானிய நிதி ஜூன் மாத இறுதியுடன் முழுமையாகத் தீர்ந்துவிடும். இதனால், நாடு மேலும் கடுமையான பொருளாதார சீர்குலைவுக்குள் தள்ளப்படுவதைத் தவிர்க்கவே எரிபொருள் விலையை உயர்த்த அரசாங்கம் தள்ளப்பட்டது,” என தலைவர் ராஜகருணா விளக்கியுள்ளார்.

தீவிரமடையும் டொலர் தட்டுப்பாடு: 100 மில்லியனிலிருந்து 522 மில்லியனாக உயர்ந்த செலவு!

இந்த நெருக்கடிக்கு முக்கிய காரணம், இலங்கையிலிருந்து வெளியேறும் மாபெரும் வெளிநாட்டு நாணயப் பரிமாற்றமாகும் (Foreign Exchange). முன்னைய மாதங்களில் எரிபொருள் இறக்குமதிக்கு 100 மில்லியன் முதல் 120 மில்லியன் டொலர்கள் வரை மட்டுமே செலவிடப்பட்டது. ஆனால், கடந்த மாதத்தில் இந்தச் செலவு 522 மில்லியன் டொலர்களாக அதிரடியாக உயர்ந்துள்ளது!

“இந்த பாரிய டொலர் வெளியேற்றம் நமது வெளிநாட்டு நாணய சந்தையை கடுமையாகப் பாதித்துள்ளது. இது இப்படியே தொடர்ந்தால், எரிபொருள் விலையை மட்டுமல்லாமல், அனைத்து அத்தியாவசியப் பொருட்கள் மற்றும் சேவைகளின் விலைகளையும் உயர்த்தி, ஒட்டுமொத்த பொருளாதாரத்திற்கும் மரண அடியைக் கொடுக்கும்,” என எச்சரித்துள்ள தலைவர், பொதுமக்கள் தங்களின் எரிபொருள் பயன்பாட்டைக் கட்டுப்படுத்துமாறு அவசரமாகக் கோரியுள்ளார்.

ஒரு லீற்றர் எரிபொருளில் அரசுக்கு எவ்வளவு நட்டம்? (விலை விபரம்)

அரசாங்கம் மானியம் வழங்கிய பின்னரும், தற்போதைய சந்தை விலையின்படி சிபெட்கோவிற்கு ஏற்படும் நட்ட விபரங்கள் இதோ:

QR குறியீடு (QR Code) கட்டாயமாக்கப்படுகிறது: மீறினால் கமிஷன் கட்!

இந்த நிலைமையைக் கட்டுக்குள் கொண்டுவர, டிஜிட்டல் உள்கட்டமைப்பு அமைச்சினுடன் இணைந்து, தேசிய எரிபொருள் QR குறியீடு முறையை (QR Code System) 100% கட்டாயமாக்க சிபெட்கோ தீர்மானித்துள்ளது.

கடந்த காலங்களில் சில எரிபொருள் நிரப்பு நிலையங்கள் இந்த QR முறையைச் சரியாகப் பயன்படுத்தவில்லை என்பதை ஏற்றுக்கொண்ட தலைவர், தற்பொழுது எரிபொருள் விற்பனையாளர்களின் இயக்கச் செலவுகளை ஈடுசெய்ய அவர்களுக்கான கமிஷன் தொகையை சிபெட்கோ அதிகரித்துள்ளதாகக் குறிப்பிட்டார்.

“இனிமேல், நாடு முழுவதும் உள்ள அனைத்து எரிபொருள் நிரப்பு நிலையங்களிலும் QR குறியீடு மூலம் எவ்வளவு எரிபொருள் விநியோகிக்கப்படுகிறது என்பதை எங்களால் டிஜிட்டல் முறையில் கண்காணிக்க முடியும். இந்த வாரம் முதல் இது தீவிரமாக கண்காணிக்கப்படும். எந்தவொரு எரிபொருள் நிலையமாவது QR முறையைத் துல்லியமாகப் பின்பற்றத் தவறினால், அவர்களுக்கு வழங்கப்பட்ட நிதிச் சலுகைகளும் கமிஷன்களும் உடனடியாக ரத்து செய்யப்படும்,” என சிபெட்கோ தலைவர் அதிரடி எச்சரிக்கை விடுத்துள்ளார்.

செய்தியாளர்: ஜூட் சமந்த

வெளிநாட்டு வேலைவாய்ப்புப் பெற்றுத் தருவதாகக் கூறி, இலட்சக்கணக்கில் பணம் மோசடி செய்த “துபாய் சுத்தா” எனும் அரசியல்வாதி ஒருவர், சினிமா பாணியில் காரில் தப்பியோட முயன்றபோது அதிகாரிகளால் மடக்கிப் பிடிக்கப்பட்டுள்ள சம்பவம் கடுவலைப் பகுதியில் பெரும் பரபரப்பை ஏற்படுத்தியுள்ளது.

யார் இந்த “துபாய் சுத்தா”?

கைது செய்யப்பட்ட சந்தேகநபர், புலத்சிங்கள பிரதேச சபையின் ஐக்கிய தேசியக் கட்சியின் உறுப்பினர் ஆவார். துபாய் மற்றும் மோல்டோவா ஆகிய நாடுகளுக்குச் சுற்றுலா விசா மூலம் சட்டவிரோதமாக ஆட்களை அனுப்பும் பாரிய மனிதக் கடத்தல் வியாபாரத்தின் பிரதான சூத்திரதாரியாக செயற்பட்டு வந்த இவர், கடத்தல் உலகில் “துபாய் சுத்தா” என்ற பெயரிலேயே பரவலாக அறியப்பட்டுள்ளார் என வெளிநாட்டு வேலைவாய்ப்புப் பணியகம் தெரிவித்துள்ளது.

கிரியுல்ல பிரதேசத்தைச் சேர்ந்த ஒருவர், தனக்கு துபாயில் நல்ல வேலை பெற்றுத் தருவதாகக் கூறி இந்த சந்தேகநபர் 7 இலட்சம் ரூபாயை வாங்கி ஏமாற்றியதாக வெளிநாட்டு வேலைவாய்ப்புப் பணியகத்தில் முறைப்பாடு செய்திருந்தார்.

இந்த முறைப்பாடு தொடர்பாக அதிகாரிகள் விசாரணைகளை முடுக்கிவிட்ட போது, சந்தேகநபர் கடுவலைப் பகுதியில் பதுங்கியிருப்பது தெரியவந்தது.

கடுவலைப் பகுதியில் வைத்து சந்தேகநபரை முற்றுகையிட்டு கைது செய்ய வெளிநாட்டு வேலைவாய்ப்புப் பணியக அதிகாரிகள் தயாரான நிலையில், இதனை மோப்பம் பிடித்த “துபாய் சுத்தா”, அதிகாரிகளிடம் இருந்து தப்புவதற்காகத் தனக்குச் சொந்தமான தனிப்பட்ட சொகுசு காரில் அதிவேகமாகப் பாய்ந்து தப்பியோட முயன்றுள்ளார். எனினும், அதிகாரிகள் சாதுரியமாகச் செயற்பட்டு, காரை வழிமறித்து அவரை அதிரடியாகக் கைது செய்தனர்.

மீண்டும் சிக்கிய பழைய குற்றவாளி

சுவாரஸ்யமான விஷயம் என்னவென்றால், இந்த “துபாய் சுத்தா” இதேபோன்ற வெளிநாட்டு வேலைவாய்ப்பு மோசடி குற்றங்களுக்காக இதற்கு முன்னரும் வெளிநாட்டு வேலைவாய்ப்புப் பணியக அதிகாரிகளால் கைது செய்யப்பட்டு, பின்னர் பிணையில் விடுவிக்கப்பட்ட ஒருவராவார். பிணையில் வந்தும் தனது கைவரிசையை அவர் நிறுத்தவில்லை என்பது தற்போது நிரூபணமாகியுள்ளது.

கைது செய்யப்பட்டுள்ள சந்தேகநபரை குளியாப்பிட்டிய நீதவான் நீதிமன்றத்தில் ஆஜர்படுத்துவதற்கான ஏற்பாடுகளை அதிகாரிகள் தற்போது தீவிரமாக மேற்கொண்டு வருகின்றனர்.

ஜூட் சமந்தா | சிலாபம்

மத நல்லிணக்கத்திற்குச் சிறந்த உதாரணமாக, சிலாபம் – இநிகொடவெல ஸ்ரீ நிக்ரோதாராம புராதன விகாரையில் புதிதாக நிர்மாணிக்கப்பட்ட ‘வாஹல்கட’ (கோபுர வாசற்படி) நேற்று பக்திபூர்வமாகத் திறந்து வைக்கப்பட்டது.

இந்த நிகழ்வின் சிறப்பம்சமாக, பௌத்த, கத்தோலிக்க மற்றும் இஸ்லாமிய மதத் தலைவர்கள் ஒரே மேடையில் ஒன்றிணைந்து, மனிதநேயத்தின் வலிமையைப் பறைசாற்றினர்.

விகாரையின் புதிய வாசற்படியைத் திறந்து வைக்கும் இந்நாளில், சிலாபம் விஜயாராம அதிபதி பூஜ்ய சிலாபம் சுமநசிறி தேரர் உள்ளிட்ட மகா சங்கத்தினர் கலந்துகொண்டனர். இவர்களுடன் பந்தாரவத்தை பங்குத் தந்தை அருட்திரு நெவில் செபஸ்டியன் அவர்களும், சவரான ஜும்மா பள்ளிவாசலின் மௌலவி சித்திக் அவர்களும் கலந்துகொண்டு நிகழ்வை சிறப்பித்தனர். மதங்களைக் கடந்து, ஊர் மக்கள் அனைவரும் ஒன்றாகக் கைகோர்த்து நின்ற காட்சி, அந்தப் பகுதிக்கே ஒரு புதிய உத்வேகத்தைத் தந்தது.

இநிகொடவெல கிராமத்தைச் சேர்ந்த ஆர்.டி. தர்மரத்ன மற்றும் சந்திரானி சன்னஸ்கல தம்பதியினர் இணைந்து இந்த உன்னதமான பணியை முன்னின்று நிறைவேற்றியுள்ளனர். பொதுமக்களின் பெரும் பாராட்டுக்குரிய இந்தத் தம்பதியினர், சுமார் 40 இலட்சம் ரூபாய் சொந்தப் பணத்தை செலவிட்டு, விகாரையின் இந்த பிரம்மாண்டமான வாசற்படியை நிர்மாணித்துக் கொடுத்துள்ளனர்.

மத நல்லிணக்கம் என்பது வெறும் வார்த்தைகளில் மட்டுமல்ல, இத்தகைய சமூகப் பணிகளிலும் உள்ளடங்கியுள்ளது என்பதை இநிகொடவெல கிராம மக்கள் மீண்டும் ஒருமுறை உலகுக்கு உணர்த்தியுள்ளனர். இந்த நிகழ்வு அந்தப் பகுதியில் வசிக்கும் மக்களின் மனங்களில் நீங்காத இடத்தைப் பிடித்துள்ளமை குறிப்பிடத்தக்கது.