சிறுமிகள் இருவரைத் துஷ்பிரயோகம் செய்த குற்றச்சாட்டின் கீழ் இரண்டு வெவ்வேறு நபர்களைப் பள்ளம பொலிஸார் கைது செய்துள்ளனர். கைது செய்யப்பட்டவர்களில் ஒருவர் பாதிக்கப்பட்ட ஒரு சிறுமியின் தாத்தா என்பது குறிப்பிடத்தக்கது.
ஆன்டிகம – வெட்டியகல்வல பகுதியைச் சேர்ந்த 52 வயதுடைய நபரே தனது பேத்தியைத் துஷ்பிரயோகம் செய்த குற்றச்சாட்டில் கைது செய்யப்பட்டுள்ளார். பாதிக்கப்பட்ட சிறுமி 4 வயது 7 மாதங்களையுடையவர் ஆவார். இச்சிறுமியின் தாய் தொழில் நிமித்தம் சில மாதங்களுக்கு முன்னர் வெளிநாடு சென்றுள்ள நிலையில், சிறுமி தனது தந்தையுடன் வசித்து வந்துள்ளார்.
சிறுமி முன்பள்ளி முடிந்து வீடு திரும்பியிருந்த வேளையில், அங்கு வந்த தாத்தா அவரிடம் தவறாக நடந்து கொண்டுள்ளார். இது குறித்துச் சிறுமி தனது தந்தையிடம் தெரிவித்ததையடுத்து, அவர் நிக்கவெரட்டிய அடிப்படை வைத்தியசாலையில் அனுமதிக்கப்பட்டு இரண்டு நாட்கள் சிகிச்சை பெற்றுள்ளார். பின்னர் வீடு திரும்பிய சிறுமி, தனக்கு நேர்ந்த கொடுமையைத் தனது முன்பள்ளி ஆசிரியரிடம் கூறியுள்ளார். ஆசிரியர் உடனடியாகப் பள்ளம பொலிஸாருக்குத் தகவல் வழங்கியதையடுத்து, பொலிஸார் விசாரணைகளை மேற்கொண்டு சந்தேகநபரான தாத்தாவைக் கைது செய்தனர்.
மற்றொரு சம்பவத்தில், சிலாபம் – வில்பத்த பகுதியைச் சேர்ந்த 34 வயதுடைய நபர் ஒருவர் 14 வயது 5 மாதங்களையுடைய சிறுமியைத் துஷ்பிரயோகம் செய்த குற்றச்சாட்டில் கைது செய்யப்பட்டுள்ளார். இச்சிறுமியின் தாயாரும் வெளிநாட்டில் பணிபுரிவதுடன், தந்தை கொழும்பில் வேலை செய்கிறார். இதனால் சிறுமி தனது பாட்டியின் பராமரிப்பில் இருந்து வந்துள்ளார்.
கடந்த 28 ஆம் திகதி பாட்டி பாடசாலை நிகழ்வொன்றுக்குச் சென்றிருந்த சமயம், மாடுகளைக் கட்டுவதற்காக அங்கு வந்த குறித்த நபர், வெற்றிலை உள்ளதா என வினவி வீட்டிற்குள் நுழைந்து இச்சிறுமியைத் துஷ்பிரயோகம் செய்துள்ளதாகப் பொலிஸ் விசாரணைகளில் தெரியவந்துள்ளது. சிறுமியின் பாட்டி வழங்கிய முறைப்பாட்டின் அடிப்படையில் சந்தேகநபர் கைது செய்யப்பட்டார்.
பாதிக்கப்பட்ட சிறுமிகள் இருவரும் மேலதிக மருத்துவ பரிசோதனைகளுக்காகச் சிலாபம் பொது வைத்தியசாலையின் சட்ட வைத்திய அதிகாரியிடம் ஒப்படைக்கப்பட்டுள்ளனர். கைது செய்யப்பட்ட சந்தேகநபர்கள் இருவரையும் ஆனமடுவ நீதவான் நீதிமன்றத்தில் ஆஜர்படுத்தப் பள்ளம பொலிஸார் நடவடிக்கை எடுத்து வருகின்றனர்.
துபாயில் தலைமறைவாக இருக்கும் “அடா” (Ada) எனப்படும் திட்டமிடப்பட்ட குற்றவாளி மற்றும் போதைப்பொருள் கடத்தல்காரரின் நெருங்கிய சகாக்கள் இருவரைச் சிலாபம் கோட்ட குற்றப் புலனாய்வுப் பிரிவினர் கைது செய்துள்ளனர்.
கைது செய்யப்பட்டவர்கள் மஹவ – கரம்பே பகுதியைச் சேர்ந்த 30 வயதுடைய ஒருவரும், வென்னப்புவ – கிரிமெட்டியான பகுதியைச் சேர்ந்த 37 வயதுடைய ஒருவருமாவர். இவர்களில் 37 வயதுடைய சந்தேகநபர் படுவஸ்நுவர பகுதியில் உள்ள பாடசாலை ஒன்றில் உடற்கல்வி ஆசிரியராகப் பணிபுரிபவர் என்பதும், அவர் போதைப்பொருள் பயன்பாட்டிற்குத் தீவிரமாக அடிமையானவர் என்பதும் விசாரணைகளில் தெரியவந்துள்ளது.
கடந்த மார்ச் 22 ஆம் திகதி, தங்கொடுவ – களுஅச்சிமுல்ல பகுதியில் இளைஞர் மற்றும் யுவதி ஒருவரை வாளால் வெட்டி காயப்படுத்தி, அவர்கள் வந்த மோட்டார் சைக்கிளைக் கொள்ளையிட்ட கும்பல் தொடர்பாகப் பொலிஸார் விசாரணைகளை மேற்கொண்டனர். இது தொடர்பாக ஏற்கனவே கடந்த 26 ஆம் திகதி 11 கிராம் 780 மில்லிகிராம் ஹெரோயினுடன் 22 வயதுடைய ஒரு இளைஞரும் யுவதியும் கைது செய்யப்பட்டிருந்தனர்.
அவர்களிடம் நடத்தப்பட்ட விசாரணையில், அவர்கள் துபாயில் உள்ள “அடா” என்பவரின் கூட்டாளிகள் என்பது உறுதியானது. அதனைத் தொடர்ந்து அவர்கள் வழங்கிய தகவலின் அடிப்படையில், கடந்த 31 ஆம் திகதி தங்கொடுவ – கெரம்வத்த பகுதியில் காரில் பயணித்தபோது மற்றுமொரு இரு சந்தேகநபர்கள் கைது செய்யப்பட்டனர். வாள் வெட்டுச் சம்பவத்தில் ஈடுபட்ட குற்றவாளிகளை ஏற்றிச் சென்ற வாகனத்தை இவர்களே செலுத்தியுள்ளனர்.
கைது செய்யப்பட்டவர்கள் நாடு முழுவதும் போதைப்பொருள் விநியோகத்தில் ஈடுபட்டு வந்துள்ளனர். இவர்களது காரில் பொருத்தப்பட்டிருந்த பாதுகாப்பு கமெராக்கள் மற்றும் ஜிபிஎஸ் (GPS) தரவுகளைப் பரிசோதித்தபோது, இவர்கள் துபாயில் உள்ள “அடா” மற்றும் அவரது மகனான “மிஹிர்” (Mihir) ஆகியோருக்குச் சொந்தமான போதைப்பொருட்களையே விநியோகித்துள்ளனர் என்பது உறுதிப்படுத்தப்பட்டது.
சந்தேகநபர்கள் கைது செய்யப்படும்போது அவர்களிடம் 28 கிராம் 330 மில்லிகிராம் ஹெரோயின் போதைப்பொருள், இரண்டு கையடக்கத் தொலைபேசிகள், விநியோகத்திற்குப் பயன்படுத்தப்பட்ட கார் ஆகியவற்றை பொலிஸார் கைப்பற்றினர்.
சந்தேகநபர்கள் மாரவில நீதவான் முன்னிலையில் ஆஜர்படுத்தப்பட்டதையடுத்து, அவர்களைத் தடுத்து வைத்து விசாரணை செய்ய அனுமதி வழங்கப்பட்டுள்ளது.
சிலாபம் சிரேஷ்ட பொலிஸ் அத்தியட்சகர் ரோஹன் பெரேராவின் நேரடி மேற்பார்வையில், குற்றப் புலனாய்வுப் பிரிவின் நிலையப் பொறுப்பதிகாரி மஹிந்த குணசேன தலைமையிலான குழுவினர் மேலதிக விசாரணைகளை முன்னெடுத்து வருகின்றமை குறிப்பிடத்தக்கது.
கல்விப் பாரம்பரியம் மிக்க மன்னார் மாவட்டத்தில், பெண் கல்வியின் கலங்கரை விளக்கமாகத் திகழும் எருக்கலம்பிட்டி மகளிர் மகா வித்தியாலயம், அண்மையில் வெளியான 2025ஆம் ஆண்டுக்கான கல்விப் பொதுத்தராதர உயர்தரப் பரீட்சை முடிவுகளில் வரலாற்றுச் சிறப்புமிக்க சாதனையைப் பதிவு செய்துள்ளது.
பாடசாலையின் கலைத்துறை (Arts Stream) மாணவர்கள் வெளிப்படுத்தியுள்ள அபாரத் திறமை, அப்பகுதி மக்களிடையேயும் கல்விச் சமூகத்திடையேயும் பெரும் வரவேற்பைப் பெற்றுள்ளது.
தனிநபர் சாதனைகள்: பாடசாலையின் மாணவி ஹனீஸ் ஆதிலா (Hanees Aadhila) 3 ‘A’ தரச் சித்திகளைப் பெற்று முதலிடம் பிடித்து பாடசாலைக்குப் பெருமை சேர்த்துள்ளார்.
அவரைத் தொடர்ந்து, நூன் பாதிமா நப்லா, அப்துல் முத்தலிப் முப்லிஹா மற்றும் ருஹுல் அமீன் முஸரிபா முனஸ்ஸா ஆகியோர் தலா 2 ‘A’ மற்றும் ‘B’ சித்திகளைப் பெற்று சிறந்த பெறுபேறுகளைப் பதிவு செய்துள்ளனர். தரவரிசையில் இடம்பெற்றுள்ள முதல் 10 மாணவிகளுமே மிகச் சிறந்த சித்திகளைப் பெற்றுள்ளமை குறிப்பிடத்தக்கது.
பாடரீதியான நூறு வீத சித்தி: பிரதான பாடங்கள் அனைத்திலும் 100% சித்தி எய்தப்பட்டுள்ளமை இந்த ஆண்டு பெறுபேறுகளின் மிக முக்கியமான சிறப்பம்சமாக பார்க்கப்படுகிறது.
புவியியல் (Geography): 22 மாணவர்கள் தோற்றி அனைவரும் சித்தியடைந்துள்ளனர்.
இஸ்லாம் (Islam): 19 மாணவர்கள் தோற்றி 100% சித்தி பெற்றுள்ளனர்.
தமிழ், சித்திரம், அரசியல் மற்றும் மனைப் பொருளியல் ஆகிய பாடங்களிலும் மாணவர்கள் முழுமையான சித்தியைப் பெற்று பாடசாலையின் தரத்தை உயர்த்தியுள்ளனர்.
வெற்றியின் பின்னணி: மன்னார் வலயத்தின் கல்வி முன்னேற்றத்தில் இந்தப் பாடசாலையின் பங்கு அளப்பரியது. அதிபர், ஆசிரியர்களின் அர்ப்பணிப்புடன் கூடிய வழிகாட்டல் மற்றும் மாணவிகளின் கடின உழைப்பு என்பனவே இந்த வெற்றிக்குக் காரணமாகும்.
குறிப்பாக, கலைத்துறையில் இத்தனை மாணவர்கள் உயர்தரப் புள்ளிகளைப் பெற்றுள்ளமையானது, அவர்கள் பல்கலைக்கழகப் பிரவேசத்திற்கான அதிக வாய்ப்புகளைக் கொண்டிருப்பதை உறுதிப்படுத்துகிறது.
எருக்கலம்பிட்டி மண்ணின் கல்வித் தாகத்தைத் தீர்த்து வைக்கும் இந்தச் சாதனை, வருங்கால மாணவிகளுக்கும் ஒரு பெரும் உந்துதலாக அமையும் என்பதில் ஐயமில்லை. சாதனை படைத்த மாணவிகளுக்கும், அவர்களுக்குப் பின்னால் நின்ற ஆசிரியர்களுக்கும், பெற்றோர்களுக்கும் எமது மனமார்ந்த வாழ்த்துகள்.
தற்போது நிலவும் கடும் வரட்சியான காலநிலை காரணமாக சிலாபம் மற்றும் அதனைச் சுற்றியுள்ள பகுதிகளில் தம்பிலி (செவ்விளநீர்) மற்றும் இளநீர் ஆகியவற்றின் விலைகள் சடுதியாக அதிகரித்துள்ளன.
சந்தையில் தம்பிலி ஒன்றின் விலை 250 ரூபாவாக உயர்ந்துள்ள போதிலும், அவற்றைப் பெற்றுக்கொள்வதில் பாரிய சிக்கல் நிலவுவதாக வியாபாரிகள் தெரிவிக்கின்றனர். இதன் காரணமாக, தம்பிலிக்கு மாற்றீடாக பல வியாபாரிகள் இளநீர் ஒன்றினை 150 ரூபா என்ற விலையில் விற்பனை செய்து வருகின்றனர்.
கடந்த ஆண்டின் முற்பகுதியிலும் இதே போன்று தெம்பிலிக்கு மாற்றீடாக இளநீர் விற்பனை செய்யப்பட்டிருந்தது. இவ்வாறு முதிர்ச்சியடையாத இளநீரை அதிகளவில் பறித்து விற்பனை செய்தமை, பின்னர் நாடு தழுவிய ரீதியில் பாரிய தேங்காய் தட்டுப்பாடு ஏற்படுவதற்கு ஒரு முக்கிய காரணமாக அமைந்தது எனத் தெரிவிக்கப்பட்டது.
தற்போதைய சூழலிலும் தெம்பிலிக்கு பதிலாக இளநீரை இவ்வாறு தொடர்ந்து விற்பனை செய்தால், எதிர்காலத்தில் மீண்டும் நாட்டில் தேங்காய் தட்டுப்பாடு ஏற்படக்கூடும் என தென்னை பயிர்ச்செய்கையாளர்கள் கவலை வெளியிட்டுள்ளனர்.
வெளிநாட்டு புலனாய்வுப் பிரிவினரிடமிருந்து கிடைத்த தகவலுக்கு அமைய, பேருவளைக்கு அப்பால் ஆழ்கடல் பகுதியில் இலங்கை கடற்படையினரால் முன்னெடுக்கப்பட்ட கண்காணிப்பு நடவடிக்கையின் போது கைப்பற்றப்பட்ட பலநாள் மீன்பிடிப் படகிலிருந்து 300 கிலோகிராமுக்கும் அதிக ஹெரோயின் போதைப்பொருள் கண்டு பிடிக்கப்பட்டுள்ளது.
இன்று (01) காலை குறித்த மீன்பிடிப் படகு திக்கோவிட்ட மீன்பிடித் துறைமுகத்திற்குக் கொண்டு வரப்பட்டு முன்னெடுக்கப்பட்ட சோதனைகளின் போது, படகிலிருந்த 298 உரப் பைகளில் இந்த போதைப்பொருள் மறைத்து வைக்கப்பட்டிருந்தமை கண்டறியப்பட்டதாக கடற்படைத் தளபதி வைஸ் அட்மிரல் காஞ்சன பானகொட தெரிவித்தார்.
குறித்த படகு இலங்கைக்குச் சொந்தமான பலநாள் மீன்பிடிப் படகு எனவும், அதிலிருந்த 6 சந்தேகநபர்களும் தொடர்பாடல் நடவடிக்கைகளுக்காகப் பயன்படுத்தப்பட்ட உபகரணங்களும் சட்டத்தின் முன் ஆஜர்படுத்தப்பட்டுள்ளதாகவும் கடற்படைத் தளபதி மேலும் குறிப்பிட்டார்.
கைப்பற்றப்பட்ட இந்த போதைப்பொருள் தொகையின் பெறுமதி சுமார் 6,000 மில்லியன் ரூபா என கடற்படை தெரிவித்துள்ளது.
சானி அபேசேகர மற்றும் ரவி செனவிரத்ன மீதான குற்றச்சாட்டு:
இராணுவத்தின் மீதான பழிவாங்கல்:
சாரா ஜெஸ்மின் குறித்த தெளிவு:
300 மனித வெடிகுண்டுகள் சுதந்திரமாக நடமாட்டம்:
அடிப்படைவாதத்தின் அச்சுறுத்தல்:
பகிரங்க விவாதத்திற்கு அழைப்பு:
உயிர்த்த ஞாயிறு குண்டுத்தாக்குதல்கள் சம்பவத்தின் பிரதான சூத்திரதாரி பயங்கரவாதி சஹ்ரான். பிரதான சூத்திரதாரியை தேடி 7 ஆண்டுகளை வீணடித்துள்ளோம் என பிவிதுறு ஹெல உறுமய அமைப்பின் தலைவர் உதய கம்மன்பில தெரிவித்தார்.
சஹ்ரான் அமைதியாக தாக்குதல்களை நடத்த சானி அபேசேகர மற்றும் ரவி செனவிரத்ன ஆகியோர் திரைமறைவில் இருந்து செயற்பட்டுள்ளார்கள் எனவும், சாரா இந்தியாவுக்கு செல்லவில்லை, உலகை விட்டே சென்றுவிட்டாள் எனவும், சஹ்ரானை தவிர பிறிதொருவர் பிரதான சூத்திரதானி என்று குறிப்பிடுபவர்கள் என்னுடன் பகிரங்க விவாதத்தில் ஈடுபடலாம் எனவும் உதய கம்மன்பில தெரிவித்தார்.
40 ஆயிரம் தமிழர்களை இராணுவத்தினர் கொன்றார்கள் என்ற புலிகள் அமைப்பின் ஆதரவாளர்களின் குற்றச்சாட்டு சர்வதேச அரங்கில் வலுவிழந்துள்ள நிலையில் குண்டுத்தாக்குதல் சம்பவத்தை இராணுவத்தின் மீது சுமத்த புலம்பெயர் தமிழ் அமைப்புகள் முயற்சிக்கின்றன. அதற்கு இந்த அரசாங்கமும் ஒத்துழைக்கிறது.
சஹ்ரானிடம் பயிற்சிப் பெற்ற 300 பேர் தற்போதும் சமூகத்தில் சுதந்திரமாக உள்ளார்கள். மனித தற்கொலை குண்டுதாரிகள் சுதந்திரமாக நடமாடுகிறார்கள். சந்தர்ப்பம் கிடைக்கும் போது இவர்கள் நிச்சயம் மனித குண்டுகளாக வெடிப்பார்கள். இவர்களுக்கு புனர்வாழ்வளிப்பதற்கு அரசாங்கம் எவ்வித நடவடிக்கைகளையும் எடுக்கவில்லை எனவும் குறிப்பிட்டார்.
கொழும்பு சம்புத்த ஜயந்தி மண்டபத்தில் நேற்று செவ்வாய்க்கிழமை (31) இடம்பெற்ற ‘உயிர்த்த ஞாயிறு குண்டுத்தாக்குதல்கள் சம்பவத்தின் பிரதான சூத்திரதாரியை தேடிச் செல்லல்’ நூல் வெளியீட்டில் உரையாற்றுகையில் மேற்கண்டவாறு குறிப்பிட்டார்.
அங்கு அவர் மேலும் உரையாற்றியதாவது,
இலங்கையானது 1971 மற்றும் 1987 ஆம் ஆண்டு அரசியல் பயங்கரவாதத்துக்கும், 1983 முதல் 2009 ஆம் ஆண்டுவரை பிரிவினையாவாத பயங்கரவாதத்துக்கும், 2019 ஆம் ஆண்டு இஸ்லாமிய பயங்கரவாதத்துக்கும் முகங்கொடுத்துள்ளது. இந்த தாக்குதல்களால் அப்பாவி மக்கள் படுகொலை செய்யப்பட்டார்கள்.
2019.04.21 ஆம் ஆண்டு இஸ்லாமிய அடிப்படைவாதிகளால் நடத்தப்பட்ட உயிர்த்த ஞாயிறு குண்டுத்தாக்குதல்கள் சம்பவம் பற்றி இன்றளவிலும் பேசப்படுகிறது. பிரதான சூத்திரதாரி யார் என்பது புரியாத புதிராகவே காணப்படுகிறது. குண்டுத்தாக்குதல்கள் பற்றி விசாரணைகளை மேற்கொண்ட ஜனாதிபதி விசாரணை ஆணைக்குழுக்கள், பாராளுமன்ற தெரிவுக்குழுக்களின் மற்றும் அமெரிக்காவின் எப்.பி.ஐ. அறிக்கை ஆகியவற்றை முழுமையாக ஆராய்ந்து இந்த புத்தகத்தை படைத்துள்ளேன்.
விடுதலை புலிகள் அமைப்பின் பிரிவினைவாதிகளையும், புலம் பெயர் தமிழ் அமைப்புக்களையும் மகிழ்விப்பதற்காக தேசிய மக்கள் சக்தி தலைமையிலான அரசாங்கம் உயிர்த்த ஞாயிறு குண்டுத்தாக்குதல்கள் குற்றச்சாட்டை இராணுவத்தினர் மீது சுமத்த முயற்சிக்கிறது.
இராணுவத்தினர் 40 ஆயிரம் தமிழர்களை படுகொலை செய்தார்கள் என்று புலிகள் அமைப்பின் ஆதரவாளர்கள் முன்வைத்த குற்றச்சாட்டு சர்வதேச சட்டத்தில் வலுவிழந்துள்ள நிலையில், இந்த குண்டுத்தாக்குதல் ஊடாக இராணுவத்தினரை பழிவாங்க முயற்சிக்கின்றனர். ஏனெனில் இராணுவத்தில் பெரும்பான்மையான்மாக சிங்களவர்களே உள்ளார்கள். எமது இராணுவத்தினர் பழிவாங்கப்படக்கூடாது என்பதற்காகவே இந்த பணியை நான் பொறுப்பேற்றேன்.
உயிர்த்த ஞாயிறு குண்டுத்தாக்குதல்கள் சம்பவத்தின் பிரதான சூத்திரதாரியை தேடிச் செல்லல் என்ற நூலில் கோட்டபய ராஜபக்ஷவை ஜனாதிபதித் தேர்தலில் வெற்றிப்பெறச் செய்வதற்கு உயிர்த்த ஞாயிறு குண்டுத்தாக்குதல்கள் நடத்தப்பட்டன என்பதை உறுதிப்படுத்த நியாயமான சாட்சிகள் உள்ளதா?
இராணுவ புலனாய்வுப் பிரிவினர் இந்த தாக்குதல்களை நடத்தினார்கள் என்று குறிப்பிடும் குற்றச்சாட்டுக்கு சாதகமான சாட்சிகள் உள்ளதா? சஹ்ரான் உட்பட பயங்கரவாதிகள் கோட்டபய ராஜபக்ஷவுக்கான உயிரை தியாகம் செய்வதற்கான நோக்கம் என்ன? இராணுவ புலனாய்வு பிரிவு இந்த தாக்குதலை நடத்துவதற்கான உண்மையான நோக்கம் என்ன என்ற கேள்விகள் குறித்து விரிவாக ஆராய்ந்துள்ளோம்.
குற்றப்புலனாய்வுப் பிரிவின் தற்போதைய பணிப்பாளர் சானி அபேசேகர தொடர்பில் இந்த புத்தகத்தில் 11 குற்றச்சாட்டுக்களை முன்வைத்துள்ளேன். குண்டுத்தாக்குதல்களை நடத்துவதற்கு இவர் தான் அமைதியான வழிகளை ஏற்படுத்திக் கொடுத்துள்ளார். பயங்கரவாதி சஹ்ரானை பிடிப்பதற்கு பொறுப்பாக இருந்தவர் இன்று குண்டுத்தாக்குதலின் பிரதான சூத்திரதாரியை தேடுவது இயற்கை அடிப்படை கோட்பாடுகளுக்கு முற்றிலும் விரோதமானது.
குண்டுத்தாக்குதலுக்கு முன்னர் வனாத்தவில்லு பகுதியில் பெருந்தொகையான வெடிப்பொருட்கள் கைப்பற்றப்பட்டுள்ளன. இச்சந்தர்ப்பத்தில் பொலிஸ் பரிசோதகர் மாரசிங்க ‘சஹ்ரானை பிடிப்பதற்கு தனக்கு மேலதிகமாக பொலிஸ் குழுக்கள் வேண்டும்’ என்று சானி அபேசேகரவிடம் வினவியுள்ளார்.ஆனால் சானி அபேசேகர அதற்கு அனுமதியளிக்கவில்லை. இந்த விடயம் குறித்து ஜனாதிபதி விசாரணை ஆணைக்குழுவிடம் கேள்வியெழுப்பப்பட்ட போது ‘ நாட்டின் மத கலவரம் ஒன்று தோற்றம் பெறும் என்பதால்தான் அதற்கு அனுமதியளிக்கவில்லை.’என்று நீதியரசர்கள் முன்னிலையில் குறிப்பிட்டுள்ளார்.
அதேபோல் 2018 மார்ச் மாதமளவில் பொலிஸ் பயங்கரவாத தடுப்பு பிரிவு சஹ்ரானின் குருநாகல் வீட்டை சுற்றிவளைத்த போது குற்றப்புலனாய்வு பிரிவு தொலைபேசி அழைப்பை மேற்கொண்டு ‘யாரை கேட்டு அங்கு சென்றீர்கள்’ அந்த விசாரணையை நாங்கள் தான் மேற்கொள்கிறோம். உடனடியாக அங்கிருந்து வெளியேறுங்கள் என்று குறிப்பிட்டுள்ளது. சானி அபேசேகர தான் இதற்கான ஆலோசனைகளையும் வழங்கியுள்ளார்.
பயங்கரவாதி சஹ்ரான் உட்பட அவனது குழுவினர் குண்டுத்தாக்குதல்களை சிறப்பாக நடத்துவதற்கு குற்றப்புலனாய்வு பிரிவின் தற்போதைய பணிப்பாளர் சானி அபேசேகர மற்றும் பொதுமக்கள் பாதுகாப்பு அமைச்சின் தற்போதைய செயலாளர் ரவி செனவிரத்ன ஆகியோர் திரைமறைவில் இருந்து செயற்பட்டுள்ளார்கள்.
குண்டுத்தாக்குதலின் பிரதான சூத்திரதாரி யார் என்ற கேள்வி கடந்த 7 ஆண்டுகாலமாக தொடர்கிறது. இஸ்லாமிய அடிப்படைவாததத்தால் ஈர்க்கப்பட்ட மௌலவியான சஹ்ரான் சிரியாவில் ஐ.எஸ்.ஐ.எஸ் அமைப்புடன் நேரடியாக இணைவதற்கு பல்வேறு வழிகளில் முயற்சித்து, அவை தோல்வியடைந்த பின்னணியில் ஐ.எஸ்.ஸ்ரீ லங்கா என்ற அமைப்பை உருவாக்கி இஸ்லாமிய அடிப்படைவாதத்தால் ஈர்க்கப்பட்டவர்களையும், மூளைச்சலவை செய்தவர்களையும் ஒன்றிணைத்து 2017 நவம்பர் மாதம் அநுராதபுரம் றம்பேவ காட்டுப்பகுதியில் சத்தியபிரமாணம் செய்து அந்த காணொளியை சிரியாவில் உள்ள ஐ.எஸ்.ஐ.எஸ். அமைப்பின் தலைமையகத்துக்கு மொஹமட் அரூஸ் ஊடாக அனுப்பி வைத்துள்ளான்.
2017 நவம்பர் முதல் 2018 டிசெம்பர் வரையான காலப்பகுதியில் பயங்கரவாதி சஹ்ரான் மற்றும் ரில்வான் ஆகியோர் சுமார் 300 பேருக்கு தற்கொலை குண்டுதாரிகளாக மாறுவதற்கு 5 பயிற்சி நிலையங்கள் ஊடாக பயிற்சியளித்துள்ளார்கள். இவர்கள் 2019 ஆகஸ்ட் மாதம் கண்டி ரந்தொலி பெரஹராவின் மீது தாக்குதல் நடத்தவே திட்டமிட்டிருந்தனர்.
இந்த காலப்பகுதியில் பயங்கரவாதி சஹ்ரானின் அணிக்குள் உள்ளக முரண்பாடுகள் தோற்றம் பெற்ற நிலையிலும், பாதுகாப்பு தரப்பினர் விசாரணைகளை தீவிரப்படுத்தியுள்ளதையும் அறிந்தும், நியுசிலாந்து பள்ளிவாசலில் இடம்பெற்ற தாக்குதலுக்கு பழிதீர்க்கும் வகையில் 2019.04.21 ஆம் திகதி நாடளாவிய ரீதியில் தற்கொலை குண்டுத்தாக்குதல்களை நடத்தினார்கள்.
இலங்கையில் ஐ.ஸ் அமைப்பை உருவாக்கியது, ஆட்களை சேர்த்தது, தாக்குதலுக்காக திட்டமிட்டது, குண்டுகளை தயாரித்தது அனைத்தையும் செய்தது பயங்கரவாதி சஹ்ரான். ஆகவே அவன் தான் இந்த தாக்குதலின் பிரதான சூத்திரதாரி. அபு ஹிந், சொனிக் சொனிக், சுரேஸ் சலே, பிள்ளையான் ஆகியோரோ அல்லது இந்தியா, இஸ்ரேல், அமெரிக்கா ஆகிய நாடுகளோ பிரதான சூத்திரதாரியல்ல, பிரதான சூத்திரதாரியை தேடி 7 ஆண்டுகளை வீணடித்துள்ளோம்.
2019.04.29 ஆம் திகதி சாய்ந்தமருது வீட்டில் இடம்பெற்ற தற்கொலை குண்டுத்தாக்குதலில் ரில்வான், சாரா ஜெஸ்மின் உட்பட அனைவரும் உயிரிழந்து விட்டார்கள். ஆகவே சாரா தொடர்பான சந்தேகங்கள் இத்துடன் முடிவடைந்து விட்டது. சாரா இந்தியாவுக்கு செல்லவில்லை, உலகை விட்டே சென்று விட்டாள்.
சமூகத்தில் தற்போதும் 300 மனித தற்கொலை குண்டுதாரிகள் சுதந்திரமாக நடமாடுகிறார்கள். சந்தர்ப்பம் கிடைக்கும் போது இவர்கள் நிச்சயம் மனித குண்டுகளாக வெடிப்பார்கள். இவர்களுக்கு புனர்வாழ்வளிப்பதற்கு அரசாங்கம் எவ்வித நடவடிக்கைகளையும் எடுக்கவில்லை. யுத்தம் முடிவடைந்தவுடன் புலி போராளிகளுக்கு முறையான புனர்வாழ்வளித்ததால் தான் 2009 ஆம் ஆண்டு புலிகள் அமைப்பு கொள்கை மீளுருவாக்கப்படவில்லை.
இஸ்லாமிய அடிப்படைவாதம் தொடர்பில் எவ்வித நடவடிக்கைகளும் இதுவரையில் எடுக்கப்படவில்லை. மத்ரஸா பாடசாலைகள் கண்காணிக்கப்படவில்லை. சஹ்ரான் உருவாக்கிய மத்ரஸா பாடசாலைகள் இன்றும் இயங்குகின்றன. அவற்றில் கற்பிக்கும் பாடங்களும் நாட்டின் அடிப்படை சட்டத்துக்கு முரணாக உள்ளது.
குண்டுத்தாக்குதலின் பிரதான சூத்திரதாரி சஹ்ரான், இவரை தவிர்த்து பிறிதொரு பிரதான சூத்திரதாரி உள்ளார் என்று குறிப்பிடுபவர்கள் என்னுடன் பகிரங்க விவாதத்தில் ஈடுபடலாம். நான் தயாராகவே உள்ளேன் என்றார்.
கற்பிட்டி குடாவ கடலோரப் பகுதியில் கடற்படையினர் நேற்று செவ்வாய்க்கிழமை (31) நடத்திய விசேட தேடுதல் நடவடிக்கையின் மூலம், சட்டவிரோதமாக நாட்டிற்குள் கொண்டுவரப்பட்டதாக சந்தேகிக்கப்பட்டு, கைவிடப்பட்டிருந்த பொதிகளை கடற்படையினர் கைப்பற்றியுள்ளனர்.
கடல் வழிகள் ஊடாக மேற்கொள்ளப்படும் பல்வேறு கடத்தல் மற்றும் சட்டவிரோத செயற்பாடுகளை கட்டுப்படுத்தும் பொருட்டு, கடற்படையினர், நாட்டை சுற்றியுள்ள கடற்கரை மற்றும் கடற்கரையை உள்ளடக்கி வழக்கமான ரோந்து மற்றும் தேடுதல் நடவடிக்கைகளை மேற்கொள்கின்றனர்.
அதன்படி, கற்பிட்டி குடாவ கடற்கரைப் பகுதியில் வடமேற்கு கடற்படை கட்டளையின் இலங்கை கடற்படைக் கப்பலான விஜயவினால் நடத்தப்பட்ட இந்த சிறப்பு தேடுதல் நடவடிக்கையின் போது, மேற்கூறிய கடற்கரைப் பகுதியில் கைவிடப்பட்டிருந்த பதின்மூன்று (13) சந்தேகத்திற்கிடமான பொதிகள் பரிசோதிக்கப்பட்டன.
இதன் போது, சட்டவிரோதமாக நாட்டிற்குள் கொண்டுவரப்பட்டதாக சந்தேகிக்கப்பட்ட சுமார் 170 கிலோகிராம் முந்திரி பருப்புகள், 180 சவர்காரக்கட்டிகள், 90 கிலோகிராம் ஏலக்காய், பூச்சிக்கொல்லி திரவம் நிரப்பப்பட்ட 169 சிறிய போத்தல்கள் மற்றும் பூஞ்சைக்கொல்லிகள் அடங்கிய 90 பொதிகள் கடற்படையினரால் கைப்பற்றப்பட்டன.
மேலும், கடலோரப் பகுதிகளைக் கண்காணிக்கும் கடற்படையின் தொடர்ச்சியான கடற்படை நடவடிக்கைகள் காரணமாக, கடத்தல்காரர்களால் இந்தப் பொருட்களைக் கரைக்குக் கொண்டுவர முடியாமல், அவற்றைக் கடலோரப் பகுதியிலேயே கைவிட்டிருக்கலாம் என்று சந்தேகிக்கப்படுகின்றதுடன் இந்த நடவடிக்கையின் மூலம் கடற்படையால் கைப்பற்றப்பட்ட பொருட்கள், மேலதிக சட்ட நடவடிக்கைக்காக கட்டுநாயக்க சுங்கத் தடுப்பு அலுவலகத்திடம் ஒப்படைக்கப்பட்டன.
கல்விப் பொதுத் தராதர உயர்தரப் பரீட்சைப் பெறுபேறுகள் நேற்று இரவு வெளியாகின.
இதற்கமைய, இந்த பெறுபேறுகளை www.doenets.lk மற்றும் www.results.exams.gov.lk ஆகிய இணையதளங்களுக்கு சென்று பார்வையிட முடியும் என அறிவிக்கப்பட்டுள்ளது.
இந்த வருடம் நாட்டின் 2,362 பரீட்சை நிலையங்களில் பரீட்சை நடைபெற்றது, இதில் மொத்தம் 3,40,525 மாணவர்கள் பங்கேற்றுள்ளனர். இதில் 2,46,521 பேர் பாடசாலை வழிக் விண்ணப்பதாரர்கள் மற்றும் 94,004 பேர் தனியார் விண்ணப்பதாரர்கள் ஆவர்.
அதன்படி, இவர்களில் 7,477 பாடசாலை பரீட்சாத்திகளும், 823 தனிப்பட்ட பரீட்சாத்திகளும் அடங்குகின்றமை குறிப்பிடத்தக்கது.
அந்த வகையில் கணிதத்துறையில் கிளிநொச்சி மகா வித்தியாலய மாணவன் தெய்வேந்திரன் திருக்குமரன் அகில இலங்கை ரீதியில் முதல் இடத்தை பிடித்துள்ளார்.
இதேவேளை 2025ஆம் ஆண்டுக்கான கல்விப் பொதுத் தராதர உயர்தரப் பரீட்சை பெறுபேறுகளின் அடிப்படையில், காத்தான்குடி மத்திய மகா வித்தியாலய (தேசிய பாடசாலை) மாணவரான சுபைதீன் முஹம்மட் ஃபர்தான், வணிகப் பிரிவில் அகில இலங்கை ரீதியில் முதலிடத்தைப் பெற்று வரலாற்றுச் சாதனை படைத்துள்ளமை குறிப்பிடத்தக்கது.
நுரைச்சோலை லக்விஜய அனல் மின்நிலையத்தில் வெளியேறும் சாம்பலை சுற்றுச் சூழலுக்குப் பாதிப்பு ஏற்படாத வகையில் அகற்றுவதற்கான திட்டத்தை உடனயாகத் தயாரிக்குமாறு சுற்றாடல், கமத்தொழில் மற்றும் வளங்களின் நிலைத்தன்மை பற்றிய துறைசார் மேற்பார்வைக் குழு அதிகாரிகளுக்கு அறிவுறுத்தல் வழங்கியது.
குறித்த துறைசார் மேற்பார்வைக்குழு அதன் தலைவர் கௌரவ பாராளுமன்ற உறுப்பினர் ஹெக்டர் அப்புஹாமி அவர்களின் தலைமையில் அண்மையில் கூடியபோதே இந்த அறிவுறுத்தல் வழங்கப்பட்டது.
மின்சார உற்பத்திக்காக இலங்கைக்கு இறக்குமதி செய்யப்பட்டுள்ள நிலக்கரியின் தரம் குறித்த பிரச்சினை காணப்படுவதால், அதனைப் பயன்படுத்தி மின்சார உற்பத்தியை மேற்கொள்ளும்போது வெளியேறும் சாம்பலின் அளவு கணிசமான அளவு அதிகரித்திருப்பதும் இங்கு தெரியவந்தது.
இவை சரியான முறையில் அகற்றப்படாவிட்டால் சுற்றுச் சூழலுக்குப் பாதிப்பு ஏற்படும் அபாயம் இருப்பதாகச் சுட்டிக்காட்டிய குழு, இதற்குத் தேவையான திட்டத்தை மாவட்ட செயலாளர் தலைமையில் தயாரிக்குமாறு அறிவுறுத்தியது.
அகற்றப்படும் சாம்பலை மீள் உற்பத்திக்குப் பயன்படுத்தக் கூடியதன் சாத்தியக் கூறுகள் குறித்து ஆராயுமாறும், அதனால் ஈட்டப்படும் வருமானத்தை குறித்த மின்னுற்பத்தி நிலையத்தினால் பாதிக்கப்படும் அப்பிரதேச மக்களின் நலன்புரித் திட்டங்களுக்குப் பயன்படுத்துமாறும் குழு ஆலோசனை வழங்கியது.
அத்துடன், நுரைச்சோலை மின்னுற்பத்தி நிலையத்தினால் நீர் மாசு மற்றும் வளிமாசு ஏற்பட்டுள்ளதா என்பது தொடர்பான விரிவான அறிக்கையொன்றை சமர்ப்பிக்குமாறு மத்திய சுற்றாடல் அதிகார சபைக்குக் குழு அறிவுறுத்தல் வழங்கியது. அதேநேரம், நுரைச்சோலை மின்நிலையம் தொடர்பில் குழு அனுப்பும் கேள்விகளுக்கு இரண்டு வாரங்களுக்குள் பதில் வழங்குமாறு வடமேல் மாகாண சுற்றாடல் அதிகாரசபைக்கு பரிந்துரைத்தது.
இந்த மின்னுற்பத்தி நிலையத்திலிருந்து வெளியேறும் சாம்பலின் அளவு அதிகரித்திருந்தாலும், பறக்கும் சாம்பலைக் கட்டுப்படுத்தும் கட்டமைப்பு போதுமானதாக இருப்பதை அவதானிக்க முடிந்ததாக வடமேல் மாகாண சுற்றாடல் அதிகாரசபையின் அதிகாரிகள் தெரிவித்தனர்.
குறித்த மின்னிலையத்திற்கு சுற்றாடல் அனுமதிப் பத்திரம் வழங்குவது உள்ளிட்ட பல்வேறு விடயங்கள் தொடர்பில் இங்கு விரிவாகக் கலந்துரையாடப்பட்டது.
இக்குழுக் கூட்டத்தில் பாராளுமன்ற உறுப்பினர்களான கிங்ஸ் நெல்சன், ரோஷன் அக்மீமன, (சட்டத்தரணி) சித்ரால் பெர்னாந்து, சுசந்த குமார நவரத்ன, கிட்னன் செல்வராஜ், உபுல் கித்சிறி உள்ளிட்ட பலரும் கலந்துகொண்டனர்.
மத்திய கிழக்கு பகுதியில் நடைபெற்று வரும் போர் சூழ்நிலை நாளுக்கு நாள் தீவிரமடைந்து வரும் நிலையில், அமெரிக்கா மற்றும் இஸ்ரேல் இணைந்து ஈரான் மீது தொடங்கிய தாக்குதலுக்கு மூன்று வாரங்கள் கடந்துள்ளன.
இந்த காலகட்டத்தில் ஈரான் மேற்கொண்ட ஏவுகணை மற்றும் டிரோன் தாக்குதல்களால் அமெரிக்க ராணுவத்திற்கு மிகப்பெரிய அளவில் சேதம் ஏற்பட்டுள்ளதாக தகவல்கள் வெளியாகியுள்ளன.
இந்த தாக்குதல்களால் அமெரிக்காவின் சுமார் 3 பில்லியன் டாலர் மதிப்பிலான ராணுவ தளவாடங்கள் சேதமடைந்துள்ளதாக கூறப்படுகிறது. இந்திய மதிப்பில் இது சுமார் ரூ.29 ஆயிரம் கோடிக்கு சமம் என கணக்கிடப்பட்டுள்ளது.
இந்த தகவல் அமெரிக்காவில் வெளியாகும் முக்கிய நாளிதழ்களில் ஒன்றான வால் ஸ்ட்ரீட் ஜர்னல் வெளியிட்ட செய்தியில் குறிப்பிடப்பட்டுள்ளது. இதனால் உலகளவில் இந்த போரால் ஏற்படவுள்ள விளைவுகள் குறித்த கவலை மேலும் அதிகரித்துள்ளது.
போர் தொடங்கிய முதல் மூன்று வாரங்களிலேயே அமெரிக்காவுக்கு ஏற்பட்ட இழப்பு மிக அதிகமாக இருப்பதாக கூறப்படுகிறது. ஆரம்பகால கணக்கீட்டின்படி 1.4 பில்லியன் டாலர் முதல் 2.9 பில்லியன் டாலர் வரை இழப்பு ஏற்பட்டிருக்கலாம் என மதிப்பிடப்பட்டுள்ளது. இந்த மதிப்பீட்டை அமெரிக்க பாதுகாப்புத்துறை பட்ஜெட் தொடர்பான முன்னாள் அதிகாரி எலைன் மெக்கஸ்கர் உறுதிப்படுத்தியுள்ளதாக தகவல்கள் வெளியாகியுள்ளன. ஈரான் நடத்திய தாக்குதல்களில் அமெரிக்காவின் அதிநவீன போர் விமானங்களும் சேதமடைந்ததாக கூறப்படுகிறது.
குறிப்பாக எஃப்-35 வகை போர் விமானம் ஒன்று கடுமையாக சேதமடைந்ததால் அவசரமாக தரையிறக்கப்பட்டதாக தகவல்கள் தெரிவிக்கின்றன. மேலும் தவறுதலாக நடைபெற்ற தாக்குதலில் மூன்று எஃப்-15இ வகை போர் விமானங்கள் கீழே விழுந்து நொறுங்கியதாகவும் கூறப்படுகிறது.
அதுமட்டுமின்றி, ஈராக் வான்வெளியில் இரண்டு எரிபொருள் நிரப்பும் விமானங்கள் மோதிக் கொண்டதில் ஆறு ராணுவ வீரர்கள் உயிரிழந்ததாகவும் தகவல்கள் தெரிவிக்கின்றன. இந்த சம்பவம் அமெரிக்க ராணுவத்திற்கு மேலும் அதிர்ச்சியை ஏற்படுத்தியுள்ளது.
சவுதி அரேபியாவில் உள்ள இளவரசர் சுல்தான் விமானப்படை தளத்தின் மீது ஈரான் மேற்கொண்ட ஏவுகணை தாக்குதலில், ஐந்து கேசி-135 வகை எரிபொருள் நிரப்பும் விமானங்கள் சேதமடைந்துள்ளதாக கூறப்படுகிறது.
இந்த விமானங்கள் தற்போது பழுதுபார்க்கப்பட்டு வருவதாக தகவல்கள் வெளியாகியுள்ளன. மேலும் ஈரான் தாக்குதல்களில் அமெரிக்காவின் பல அதிநவீன ஆளில்லா உளவு விமானங்களும் சுட்டு வீழ்த்தப்பட்டதாக கூறப்படுகிறது. குறிப்பாக எம்.கியூ-9 ரீப்பர் வகையை சேர்ந்த 12-க்கும் மேற்பட்ட டிரோன்கள் அழிக்கப்பட்டுள்ளதாக தகவல்கள் தெரிவிக்கின்றன.
அமெரிக்காவுக்கு இழப்பு இந்த டிரோன்கள் அமெரிக்காவின் முக்கிய உளவு சாதனங்களாக கருதப்படுவதால், அவை சேதமடைந்தது பெரிய இழப்பாக பார்க்கப்படுகிறது. அதேபோல் சவுதி அரேபியா, கத்தார் மற்றும் ஜோர்டான் போன்ற நாடுகளில் உள்ள அமெரிக்க ராணுவ தளங்களில் நிறுவப்பட்டிருந்த ரேடார் அமைப்புகளும் தாக்குதலுக்கு உள்ளானதாக கூறப்படுகிறது. இந்த ரேடார் அமைப்புகள் எதிரி தாக்குதல்களை முன்கூட்டியே கண்டறியும் முக்கிய சாதனமாக இருப்பதால், அவற்றின் சேதம் பெரும் இழப்பாக இருக்கும் என்கின்றனர்.
இதற்கிடையில் கிரீஸ் நாட்டின் சூடா விரிகுடாவில் நிறுத்தப்பட்டிருந்த அமெரிக்காவின் மிகப்பெரிய போர்க்கப்பல்களில் ஒன்றான ‘யுஎஸ்.எஸ் ஜெரால்ட் ஆர். ஃபோர்டு’ கப்பலிலும் தீ விபத்து ஏற்பட்டதாக தகவல்கள் வெளியாகியுள்ளன. இந்த சம்பவமும் அமெரிக்க ராணுவத்திற்கு கூடுதல் இழப்பை ஏற்படுத்தியதாக கூறப்படுகிறது.
