இலங்கை பெற்றோலியக் கூட்டுத்தாபனத்தினால் மேற்கொள்ளப்பட்ட டீசல் இறக்குமதியின் போது பாரிய ஊழல்கள் மற்றும் முறைகேடுகள் இடம்பெற்றுள்ளதாகக் கூறி, அந்த விடயம் தொடர்பில் விசாரணை நடத்துமாறு கோரி இலஞ்சம் மற்றும் ஊழல் ஒழிப்பு ஆணைக்குழுவில் முறைப்பாடு தாக்கல் செய்யப்பட்டுள்ளது.

கூட்டு எதிர்க்கட்சியின் பிரதிநிதிகளால் இந்த முறைப்பாடு இன்று திங்கட்கிழமை (27) சமர்ப்பிக்கப்பட்டது. குறித்த டீசல் இறக்குமதி நடவடிக்கையினால் அரசாங்கத்திற்கு பெருமளவிலான நிதி நஷ்டம் ஏற்பட்டுள்ளதாக அந்த முறைப்பாட்டில் சுட்டிக்காட்டப்பட்டுள்ளது.

இந்த விடயம் தொடர்பில் உரிய அதிகாரிகளிடம் விசாரணை நடத்தி, சம்பந்தப்பட்ட ஆவணங்களைப் பரிசீலிக்குமாறு எதிர்க்கட்சி பிரதிநிதிகள் ஆணைக்குழுவிடம் கேட்டுக்கொண்டுள்ளனர். 

இந்த கொடுக்கல் வாங்கலில் பாரிய மோசடி இடம்பெற்றுள்ளதா என்பது குறித்து கண்டறியப்பட வேண்டும் எனவும், இந்த நஷ்டத்திற்குப் பொறுப்பான நபர்களுக்கு எதிராக சட்ட நடவடிக்கை எடுக்கப்பட வேண்டும் எனவும் அந்த முறைப்பாட்டில் மேலும் வலியுறுத்தப்பட்டுள்ளது.   

ஜூட் சமந்த

ஆரச்சிக்கட்டுவ, உடப்பு கடற்கரைப் பிரதேசம் மீண்டும் ஒருமுறை பாரிய கடல் அரிப்புக்கு உள்ளாகத் தொடங்கியுள்ளதாக அப்பகுதி மீனவர்கள் கவலை தெரிவிக்கின்றனர்.

தெற்கே பெருங்கடலாலும், மேற்கே முந்தலம் களப்பாலும் சூழப்பட்டுள்ள உடப்பு கிராமத்தில் சுமார் 5000-க்கும் மேற்பட்ட குடும்பங்கள் வாழ்ந்து வருகின்றனர்.

இவர்களில் பெரும்பாலானோரின் பிரதான வாழ்வாதாரமாக மீன்பிடித் தொழில் காணப்படுகிறது. கடலிலும் களப்பிலும் மீன்பிடித்தல் மற்றும் பிடிபடும் மீன்களை விற்பனை செய்தல் என இக்கிராமத்தின் பொருளாதாரம் முழுமையாக கடலைச் சார்ந்தே அமைந்துள்ளது. மேலும், உடப்புக் கடற்கரையில் அமைந்துள்ள மீன்பிடி வாடிகளில் பெருமளவிலான கருவாடு உற்பத்தி செய்யப்பட்டு தினசரி சந்தைக்கு விற்பனைக்காக அனுப்பி வைக்கப்படுகிறது.

கடலே தங்களின் உயிர்நாடி என்பதால், உடப்பு மக்கள் கடற்கரையைப் பாதுகாப்பதில் மிகுந்த அக்கறை காட்டி வருகின்றனர். கடற்கரை அரிப்புக்குள்ளாவதால் மீன்பிடிப் படகுகளை நிறுத்தி வைப்பதற்கும், மீன்பிடி வலைகளைச் சுத்தம் செய்வதற்கும், கருவாடு காயவைப்பதற்கான வாடிகளை அமைப்பதற்கும் இடமில்லாத சூழல் உருவாகியுள்ளமை அம்மக்களின் வாழ்வாதாரத்தை நேரடியாகப் பாதித்துள்ளது.

கடந்த சில ஆண்டுகளாகவே பருவக்காற்று காலங்களில் உடப்பு கடற்கரை கடும் அரிப்புக்கு உள்ளாகி வருகின்றது. இது குறித்து மக்கள் மற்றும் ஊடகங்கள் விடுத்த கோரிக்கைகளை அடுத்து, கடற்கரை பாதுகாப்புத் திணைக்களம் கடல் அரிப்பைக் கட்டுப்படுத்த கற்பாறைகளை இட்டுத் தற்காலிகப் பாதுகாப்பை வழங்கியது.

இருப்பினும், தற்போது இடப்பட்டுள்ள அந்தப் பாறைகளுக்கு இடையினூடாக கடல் நீர் உட்புகுந்து கடற்கரை அரிக்கப்படுவது பாரிய சோகத்தை ஏற்படுத்தியுள்ளது.

“பருவக்காற்று காலம் ஆரம்பிப்பதற்கு முன்னரே இவ்வளவு மோசமான கடல் அரிப்பு ஏற்படுகின்றது என்றால், வரும் நாட்களில் நிலைமை இன்னும் மோசமாகும்,” என கிராம மக்கள் அச்சம் தெரிவிக்கின்றனர்.

கடல் அரிப்பின் கோரத்தாண்டவத்தால் ஏற்கனவே கடற்கரையோரம் இருந்த பல வீடுகளும், கடற்கரைக்கு இணையாக இருந்த வீதியும் கடலுக்குள் மூழ்கியுள்ளன. அத்துடன், கடற்கரையோரம் அமைக்கப்பட்டிருந்த பல மின் கம்பங்கள் கடல் அரிப்பினால் சரிந்து விழுந்துள்ளதை அவதானிக்க முடிகின்றது.

தொடர்ந்து அதிகரித்து வரும் இந்த கடல் அரிப்பைத் தடுக்க அதிகாரிகள் உடனடியாக நிரந்தரத் தீர்வொன்றை வழங்காவிட்டால், எதிர்காலத்தில் இலங்கையின் வரைபடத்திலிருந்து ‘உடப்பு’ என்ற கிராமம் மறைந்து போவது ஆச்சரியப்படுவதற்கில்லை என இப்பகுதி மக்கள் எச்சரிக்கின்றனர்.

பொலிஸ் போதைப்பொருள் ஒழிப்புப் பிரிவினரால் மேற்கொள்ளப்பட்ட பல்வேறு சுற்றிவளைப்புகளின் போது கைப்பற்றப்பட்ட பெருந்தொகையான போதைப்பொருட்கள் நீதிமன்ற உத்தரவிற்கமைய அழிக்கப்பட்டது.

இன்று 2026.04.27 திங்கட்கிழமை காலை 09.00 மணியளவில், புத்தளம் வநாதவில்லுவ பகுதியில் அமைந்துள்ள ‘லெக்டோவத்தை’ (Lactowatta) எரியூட்டும் உலையில் வைத்து குறித்த போதைப்பொருட்கள் தகனம் செய்யப்பட்டது.

பல்பிட்டிய மற்றும் சிலாபம் ஆகிய நீதிமன்றங்களில் விசாரணைகள் நிறைவடைந்த வழக்குகளுடன் தொடர்புடைய பெருமளவான போதைப்பொருள் தொகையே இவ்வாறு அழிக்கப்பட்டன.

அந்த வகையில் ஹெரோயின்: 22 கிலோ கிராம் 888 கிராம், கேரளா கஞ்சா: 33 கிலோ கிராம் 172 கிராம், கஞ்சா: 247 கிலோ கிராம் 940 கிராம் போதைப்பொருட்கள் எரியூட்டும் உலையில் வைத்து தகனம் செய்யப்பட்டது.

இன்று அதிகாலை 05.00 மணிக்கு, பல்பிட்டிய நீதவான் நீதிமன்ற வளாகத்திலிருந்தும், காலை 07.30 மணியளவில், சிலாபம் நீதவான் நீதிமன்ற வளாகத்திலிருந்து மீதமுள்ள போதைப்பொருள் தொகுதிகளும் எரியூட்டும் இடத்திற்கு கொண்டு செல்லப்பட்டமை குறிப்பிடத்தக்கது.

இந்நிகழ்வில் பொலிஸ் போதைப்பொருள் ஒழிப்புப் பிரிவின் சிரேஷ்ட பிரதிப் பொலிஸ் மா அதிபர் அசோக தர்மசேன, போதைப்பொருள் ஒழிப்புப் பிரிவின் பணிப்பாளர் சந்தன ஹேரத் ஆகியோர் கலந்துகொண்டனர்.

மேலும், அரசாங்க இரசாயன பகுப்பாய்வு திணைக்களம் மற்றும் அபாயகரமான ஒளடதங்கள் கட்டுப்பாட்டு தேசிய சபை ஆகியவற்றின் உயர்மட்ட அதிகாரிகளும் இந்த அழிப்பு நடவடிக்கையின் போது பிரசன்னமாகியிருந்தனர்.

கிளிநொச்சி, கனகாம்பிகைக்குளத்தில் நீராடச் சென்ற நிலையில் நீரில் மூழ்கி காணாமல் போன குடும்பஸ்தர், இன்று காலை சடலமாக மீட்கப்பட்டுள்ளார். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

நேற்று (ஞாயிற்றுக்கிழமை) பிற்பகல் கிளிநொச்சி கனகாம்பிகைக்குளத்தில் மூன்று பேர் நீராடிக்கொண்டிருந்தனர். இதன்போது, எதிர்பாராத விதமாக அவர்களில் ஒருவர் நீரில் மூழ்கி காணாமல் போயுள்ளார்.

காணாமல் போனவரைத் தேடும் பணிகள் நேற்று மாலை முதல் தீவிரமாக முன்னெடுக்கப்பட்டன. இரவு வரை தேடுதல் நடவடிக்கைகள் தொடர்ந்த போதிலும், போதிய வெளிச்சமின்மை மற்றும் இயற்கை சவால்களால் உடல் அடையாளம் காணப்படவில்லை.

இந்நிலையில், இன்று (திங்கட்கிழமை) அதிகாலை முதல் மீண்டும் தேடுதல் பணிகள் ஆரம்பிக்கப்பட்டன. காலை 8.00 மணியளவில், இரணைமடு நன்னீர் மீனவர்களின் பாரிய ஒத்துழைப்புடன் குறித்த நபர் சடலமாக மீட்கப்பட்டார்.

இச்சம்பவத்தில் உயிரிழந்தவர் கிளிநொச்சி, ஸ்கந்தபுரத்தைச் சேர்ந்த 32 வயதுடைய நபர் என அடையாளம் காணப்பட்டுள்ளார். இவர் மூன்று பிள்ளைகளின் தந்தை என்பது குறிப்பிடத்தக்கது.

சடலம் தற்போது உடற்கூற்று பரிசோதனைகளுக்காக வைத்தியசாலைக்கு கொண்டு செல்லப்பட்டுள்ளது. இச்சம்பவம் தொடர்பில் கிளிநொச்சி பொலிஸார் மேலதிக விசாரணைகளை முன்னெடுத்து வருகின்றனர்.

இன்றைய போட்டி நிறைந்த உலகில் கல்விக்கும் வேலைவாய்ப்பிற்கும் இடையிலான இடைவெளியை குறைப்பதில் திறன் மேம்பாட்டுப் பயிற்சிகள் மிக முக்கியப் பங்காற்றுகின்றன என புத்தளம் மாநகரசபை மாண்புமிகு மேயர் ரின்சாத் அகமது அவர்கள் தெரிவித்தார்.

தேசிய ரீதியில் முன்னெடுக்கப்படும் ஸ்கில்ஸ் விஸ்டா ‘Skills Vista’ திட்டத்தின் 2025/2026 ஆம் ஆண்டிற்கான சான்றிதழ் வழங்கும் விழா அண்மையில் மிகச்சிறப்பாக நடைபெற்றது. இந்நிகழ்வில் கௌரவ விருந்தினராகக் கலந்துகொண்டு உரையாற்றும் போதே அவர் மேற்கண்டவாறு குறிப்பிட்டார்.

இலங்கை கல்வி அமைச்சு, மூன்றாம் நிலை மற்றும் தொழிற்கல்வி ஆணைக்குழு (TVEC) மற்றும் தேசிய கல்வி நிறுவனம் (NIE) ஆகிய உயர்மட்ட நிறுவனங்கள் ஒன்றிணைந்து இத்திட்டத்தை முன்னெடுத்து வருகின்றன.

முக்கியமாக, உயர் தர மாணவர்களை இலக்காகக் கொண்டு வடிவமைக்கப்பட்டுள்ள இத்திட்டம் பல முக்கிய அம்சங்களை உள்ளடக்கியுள்ளது:

• தொழில் வழிகாட்டல் (Career Guidance): மாணவர்களின் எதிர்கால இலக்குகளைத் தீர்மானித்தல்.
• தகவல் தொழில்நுட்பம் (ICT): நவீன டிஜிட்டல் உலகிற்குத் தேவையான கணினித் திறன்கள்.
• ஆங்கில மொழிப் பயிற்சி (English Language): சர்வதேச மட்டத்தில் தொடர்பாடல் திறனை வளர்த்தல்.
• வாழ்க்கைத் திறன்கள் (Life Skills): ஆளுமை மற்றும் தலைமைத்துவப் பண்புகளை மேம்படுத்தல்.

இந்நிகழ்வில் பயிற்சிகளை வெற்றிகரமாக நிறைவு செய்த மாணவர்களுக்கு மேயர் அவர்களால் சான்றிதழ்கள் வழங்கி கௌரவிக்கப்பட்டது. சான்றிதழ்களைப் பெற்றுக்கொண்ட மாணவர்களை வாழ்த்திய மேயர், கல்வி அறிவு என்பது வெறும் புத்தகங்களோடு நின்றுவிடாமல், இத்தகைய செயல்முறைத் திறன்களையும் (Practical Skills) வளர்த்துக்கொள்ளும் போதுதான் ஒரு இளைஞர் முழுமையான வெற்றியாளராக மாற முடியும் என வலியுறுத்தினார்.

மேலும், நாட்டின் எதிர்காலத் தூண்களான இளைஞர்களைச் சரியான பாதையில் வழிநடத்தும் நோக்கில் இத்தகைய காத்திரமான திட்டத்தை முன்னெடுத்து வரும் கல்வி அமைச்சு மற்றும் சம்பந்தப்பட்ட நிறுவனங்களுக்கு மேயர் தனது மனமார்ந்த பாராட்டுக்களைத் தெரிவித்துக் கொண்டார்.

இந்த ‘Skills Vista’ திட்டம் கல்வி முடித்து வெளியேறும் மாணவர்களுக்கு வேலைவாய்ப்புச் சந்தையில் ஒரு பலமான அடித்தளத்தை அமைத்துக் கொடுக்கும் என்பதில் ஐயமில்லை.

2026ஆம் ஆண்டுக்கான அரச வெசாக் உற்சவத்தை முன்னிட்டு, “வெசாக் வாரத்தில்” பாடசாலைகள் மற்றும் ஏனைய கல்வி நிறுவனங்களில் முன்னெடுக்கப்பட வேண்டிய வேலைத்திட்டங்கள் குறித்து கல்வி, உயர்கல்வி மற்றும் தொழிற்கல்வி அமைச்சு புதிய சுற்றுநிருபம் ஒன்றை வெளியிட்டுள்ளது.

அமைச்சின் செயலாளர் நாலக்க கலுவெவவினால் வெளியிடப்பட்டுள்ள இந்த புதிய சுற்றுநிருபத்தில்,

வெசாக் வாரத்தை முன்னிட்டு எதிர்வரும் மே மாதம் 26ஆம் திகதி முதல் ஜூன் மாதம் 02ஆம் திகதி வரை பாடசாலைகள், கல்வியியற் கல்லூரிகள், பிரிவெனாக்கள் மற்றும் ஆசிரியர் கலாசாலைகளில் விசேட ஆன்மீக மற்றும் கலாசார நிகழ்ச்சிகளை ஒருங்கிணைக்குமாறு கோரப்பட்டுள்ளது.

2026ஆம் ஆண்டுக்கான வெசாக் தினம் மே மாதம் 30ஆம் திகதி கொண்டாடப்படவுள்ளது. இதனையொட்டி, புத்தசாசன, மத மற்றும் கலாசார விவகார அமைச்சு மற்றும் பௌத்த விவகார திணைக்களம் இணைந்து நடத்தும் அரச வெசாக் உற்சவம் மே மாதம் 27ஆம் திகதி மாத்தறை – திஹகொட, மிதெலவல புராதன விகாரையில் நடைபெறவுள்ளது.

மேலும், கல்வி நிறுவனங்களில் நடைமுறைப்படுத்தப்பட வேண்டிய முன்மாதிரித் திட்டங்களை அமைச்சு பரிந்துரை செய்துள்ளது. அந்தந்த பாடசாலைகள் மற்றும் கல்வி நிறுவனங்களின் சூழலுக்கு ஏற்ப பொருத்தமான முறையில் இந்த வேலைத்திட்டங்களை முன்னெடுக்குமாறு செயலாளர் அறிவுறுத்தியுள்ளார்.

கல்வி அமைச்சின் இந்த வழிகாட்டல்களைப் பின்பற்றி அனைத்து கல்வி நிறுவனங்களும் உரிய நடவடிக்கைகளை மேற்கொள்ளுமாறு அந்த அறிக்கையில் மேலும் வலியுறுத்தப்பட்டுள்ளது.  

சத்திரசிகிச்சையின் பின்னர் நாடு திரும்பியுள்ள ரணில் விக்கிரமசிங்க, தற்போது மருத்துவக் கண்காணிப்பின் கீழ் சிகிச்சை பெற்று வருகிறார். ஓய்வில் இருக்கும் போதிலும், நாட்டின் தற்போதைய அரசியல் நிலைமைகள் குறித்து ஆலோசனை வழங்குவதற்காக அவர் தனது நெருக்கமான அரசியல் சகாக்களை அழைத்து கலந்துரையாடியுள்ளார்.

இந்த கலந்துரையாடல் கடந்த திங்கட்கிழமை மற்றும் புதன்கிழமை இடம்பெற்றுள்ளது. 

இதன்படி, பேராசிரியர் ஜி.எல். பீரிஸ், ஐக்கிய தேசியக் கட்சியின் தவிசாளர் வஜிர அபேவர்தன, பொதுச் செயலாளர் தலதா அத்துகோரள மற்றும் சாகல ரத்நாயக்க ஆகியோரை அழைத்து அவர் ஆலோசனைகளை வழங்கியுள்ளார்.

முன்னாள் எரிசக்தி அமைச்சர் குமார ஜயகொடி பதவியில் இருந்து விலகியமைக்கான உண்மைப் பின்னணியை நாட்டுக்கு வெளிப்படுத்த வேண்டும் என ரணில் இதன்போது வலியுறுத்தினார். பேராசிரியர் ஜி.எல். பீரிஸின் ஆலோசனையின் பேரில் இது தொடர்பான உத்தியோகபூர்வ அறிக்கையை வெளியிடுமாறும் அவர் பணிப்புரை விடுத்தார்.

தற்போதைய அரசாங்கத்திற்கு எத்தனை பேர் ஆலோசனை வழங்குகிறார்கள் என ரணில் இதன்போது கேள்வி எழுப்பினார். ஒரு பக்கம் அரசாங்கம் எரான் விக்கிரமரத்னவை கொண்டுவர முயற்சிக்கிறார்கள், மறுபுறம் ஹர்ஷ டி சில்வாவிடம் ஆலோசனை பெறுவதாகக் கூறப்படுகிறது.

எரான் விக்கிரமரத்னவை இவ்வாறான பதவிகளுக்குக் கொண்டுவருவது குறித்து ஐக்கிய மக்கள் சக்தியினரிடையே பெரும் எதிர்ப்பு நிலவுகிறது. இந்த கொடுக்கல் வாங்கல்களுக்குப் பின்னால் வேறு யாரெல்லாம் இருக்கிறார்கள் என்று தெரியவில்லை என ரணில் விக்கிரமசிங்க சுட்டிக்காட்டியுள்ளார்.

எவ்வாறாயினும் நாட்டு மக்களுக்கு உண்மை நிலைமையை தெரியப்படுத்த வேண்டும். அரசாங்கத்திற்கு எதிரான மோசடி குற்றச்சாட்டுக்களை மூடிமறைக்க அரசாங்கம் இன்னோரன்ன செயல்களை செய்து வருகிறது. வாக்களித்த மக்களை முட்டாள்களாக்கவே அரசாங்கம் முற்படுகிறது. கூட்டு எதிர்க்கட்சி இதற்கு எதிராக வலுவாக செயல்பட வேண்டும் என ரணில் விக்கிரமசிங்க வலியுறுத்தியுள்ளார்.