சுமார் 12 கோடி ரூபா பெறுமதியான 12 கிலோ கிராம் ஹெரோயின் போதைப்பொருளுடன் சந்தேகநபர் ஒருவர் மேல் மாகாண வடக்கு குற்றத்தடுப்பு பிரிவினரால் நேற்று (24) ஹோமாகமவில் வைத்து கைது செய்யப்பட்டுள்ளார். 

இவ்வாறு கைது செய்யப்பட்டவர் ஹோமாகம பிரதேசத்தைச் சேர்ந்த பிரசாத் நிஷாந்த கொலம்பகே என அடையாளம் காணப்பட்டுள்ளார். 

இவர், வெளிநாட்டில் தலைமறைவாக உள்ள ஒழுங்கமைக்கப்பட்ட குற்றவாளியும் போதைப்பொருள் கடத்தல்காரருமான ‘ஹோமாகம ககன’ என்பவரின் போதைப்பொருள் கடத்தல்களை வழிநடத்தியவர் என்பது ஆரம்பகட்ட விசாரணைகளில் தெரியவந்துள்ளது. 

ஏற்கனவே கைது செய்யப்பட்டுள்ள சந்தேகநபர்களிடம் மேற்கொள்ளப்பட்ட விசாரணைகளில் கிடைத்த தகவலுக்கு அமையவே இவர் கைது செய்யப்பட்டுள்ளார். 

டுபாயில் அந்நாட்டு பொலிஸாரால் கைது செய்யப்பட்டுள்ளதாகக் கூறப்படும் ‘கொண்ட ரஞ்சித்’ என்ற ரஞ்சித் பெரேரா என்ற ஒழுங்கமைக்கப்பட்ட குற்றவாளி உள்ளிட்ட கடத்தல்காரர்களைக் கைது செய்ததன் மூலம் ஆரம்பிக்கப்பட்ட இந்த சுற்றிவளைப்பு நடவடிக்கைகளின் கீழ், இதுவரையில் 37 கிலோ கிராம் போதைப்பொருள் மீட்கப்பட்டுள்ளது. 

இதன் ஒரு கட்டமாக, டுபாய் பொலிஸாரால் கைது செய்யப்பட்டுள்ள சிவப்பு பிடியாணை பிறப்பிக்கப்பட்ட ஒழுங்கமைக்கப்பட்ட குற்றவாளியான ‘கொண்ட ரஞ்சி’ என்பவரின் முக்கிய உதவியாளர் ஒருவரும், சுமார் 30 கோடி ரூபா பெறுமதியான போதைப்பொருட்களுடன் ஏற்கனவே கைது செய்யப்பட்டுள்ளமை குறிப்பிடத்தக்கது.

பொது நிர்வாக அமைச்சின் உத்தியோகபூர்வ இணையத்தளம் மீது மேற்கொள்ளப்பட்ட சைபர் தாக்குதல் தொடர்பாக குற்றப் புலனாய்வுத் திணைக்களத்தில் முறைப்பாடு செய்யப்பட்டுள்ளதாக அந்த அமைச்சிற்குப் பொறுப்பான அமைச்சர் சந்தன அபேரத்ன தெரிவித்துள்ளார். 

அமைச்சின் செயலாளரின் தலையீட்டுடன் இந்த முறைப்பாடு செய்யப்பட்டுள்ளதாக அவர் சுட்டிக்காட்டியுள்ளார். 

பொது நிர்வாக அமைச்சின் இணையத்தளம் மீது அண்மையில் சைபர் தாக்குதல் நடத்தப்பட்டிருந்ததுடன், அதில் உள்ள தகவல்களை ஏலத்திற்கு விட்டு பணம் பெறுவதற்கு அந்த தரப்பினர் முற்பட்டிருந்ததாக கூறப்படுகிறது. 

இருப்பினும், இந்தத் தாக்குதலினால் அமைச்சின் இணையத்தளத்தில் உள்ள மிகவும் முக்கியம் வாய்ந்த தகவல்களுக்கு எவ்வித பாதிப்பும் ஏற்படவில்லை எனவும், சில பொதுவான தகவல்கள் மாத்திரமே மற்றுமொரு தரப்பிற்கு சென்றுள்ளதாகத் தகவல்கள் கிடைத்துள்ளதாகவும் அமைச்சர் சந்தன அபேரத்ன குறிப்பிட்டுள்ளார். 

இதற்கமையவே, இது குறித்து குற்றப் புலனாய்வுத் திணைக்களத்தில் முறைப்பாடு செய்யப்பட்டுள்ளது. 

இச்சம்பவம் தொடர்பாக இலங்கை கணினி அவசர தயார்நிலை குழுவும் விசாரணைகளை ஆரம்பித்துள்ளது. 

இதேவேளை, திறைசேரியின் வெளிநாட்டுக் கடன் கொடுப்பனவின் போது 2.5 மில்லியன் அமெரிக்க டொலர் பணம் வேறொரு தரப்பின் கைக்குச் சென்ற சம்பவம் தொடர்பாகவும் தமது நிறுவனம் தற்போது தொழில்நுட்ப ரீதியிலான விசாரணைகளை முன்னெடுத்து வருவதாக இலங்கை கணினி அவசர தயார்நிலை குழுவின் சிரேஷ்ட தகவல் பாதுகாப்பு அதிகாரி சாருக தமுனுபொல தெரிவித்தார். 

இந்தச் சம்பவம் எவ்வாறான முறையில் இடம்பெற்றது மற்றும் அதற்கான காரணங்கள் என்ன என்பது குறித்துத் தமது நிறுவனம் ஆராய்ந்து வருவதாகவும், சந்தேகநபர்களைக் கண்டறியும் மேலதிக விசாரணைகளை குற்றப் புலனாய்வுத் திணைக்களம் முன்னெடுத்து வருவதாகவும் அவர் மேலும் குறிப்பிட்டார்.

வெளிநாட்டு கடன் தவணைக்காக ஒதுக்கப்பட்ட 2.5 மில்லியன் அமெரிக்க டொலர் நிதி மாயமானது தொடர்பில் எதிர்க்கட்சி நாடாளுமன்ற உறுப்பினர் ஹர்ஷ டி சில்வா கடும் கவலை வெளியிட்டுள்ளார்.

இந்த நிதி உரிய கடன் வழங்குநரைச் சென்றடையாத நிலையில், இலங்கை தொழில்நுட்ப ரீதியாக மீண்டும் ஒரு ‘கடன் தவணையை செலுத்தத் தவறிய’ நாடாக மாறியுள்ளதா என அவர் கேள்வி எழுப்பியுள்ளார்.

இறையாண்மைக் கடன் முகாமைத்துவப் பணிகள் இலங்கை மத்திய வங்கியிடமிருந்து திறைசேரியின் அரச கடன் முகாமைத்துவ அலுவலகத்திற்கு மாற்றப்பட்ட போதே தாம் எச்சரித்ததாக ஹர்ஷ டி சில்வா குறிப்பிட்டுள்ளார்.

உலகளாவிய நிதிச் சந்தைகளைக் கையாளுவதற்குத் தகுதியான மற்றும் அனுபவம் வாய்ந்த நிபுணர்களை நியமிக்குமாறு அரச நிதி பற்றிய குழு வலியுறுத்தியும், திறைசேரி அதனைப் பொருட்படுத்தவில்லை என அவர் குற்றம் சாட்டினார்.

குறித்த வெளிநாட்டுத் தரப்பிற்கு ஐந்து கடன் தவணைகள் கிடைக்கவில்லை எனத் தெரியவந்துள்ளதாகக் குறிப்பிட்டுள்ள அவர், இது வெறும் கவனக்குறைவு அல்ல, ஒரு பாரிய நிர்வாகத் தோல்வி என விமர்சித்துள்ளார்.

இதேவேளை நிதி, திட்டமிடல் மற்றும் பொருளாதார அபிவிருத்தி அமைச்சின் வெளிநாட்டு வளங்கள் திணைக்களத்தின் கணினி அமைப்பிற்குள் இணைய ஊடுருவிகள் (Cyber Hackers) நுழைந்து மேற்கொண்ட திருட்டுச் சம்பவம் தொடர்பில் தற்போது விசேட விசாரணைகள் ஆரம்பிக்கப்பட்டுள்ளதாக நிதி அமைச்சு அறிவித்துள்ளது.

கடந்த ஜனவரி மாதம் மேற்கொள்ளப்பட்ட வெளிநாட்டு நாணயக் கொடுக்கல் வாங்கல் ஒன்றின் போதே இந்தத் திருட்டுச் சம்பவம் குறித்த தகவல்கள் வெளிச்சத்திற்கு வந்துள்ளன.

இது தொடர்பாக இலங்கை கணினி அவசர பதிலளிப்பு பிரிவு, காவல்துறையின் கணினி குற்றப் புலனாய்வுப் பிரிவு, குற்றப் புலனாய்வுத் திணைக்களம் (CID) மற்றும் மத்திய வங்கியின் நிதி உளவறிதல் பிரிவு ஆகியவற்றில் அமைச்சு முறைப்பாடுகளைச் செய்துள்ளது.

இந்த சம்பவம் குறித்து நடத்தப்பட்ட முதற்கட்ட உள்வாரி விசாரணைகளின் அடிப்படையில், சில அதிகாரிகளுக்கு எதிராக ஒழுக்காற்று நடவடிக்கை எடுக்கப்பட்டுள்ளதாக அமைச்சின் அறிக்கையில் குறிப்பிடப்பட்டுள்ளது.

அத்துடன், விசாரணை முன்னெடுப்புகளுக்காகச் சட்டத்தை அமுல்படுத்தும் நிறுவனங்களுக்குத் தேவையான அனைத்து ஒத்துழைப்புகளையும் தகவல்களையும் வழங்கியுள்ளதாக அமைச்சு வலியுறுத்தியுள்ளது.

இலங்கைக்கும் வெளிநாடுகளுக்கும் இடையிலான உடன்படிக்கைகளுக்கு அமைய, சர்வதேச ஒருங்கிணைப்புடன் மேலதிக நடவடிக்கைகள் முன்னெடுக்கப்படும் எனவும் அந்த அறிக்கையில் தெரிவிக்கப்பட்டுள்ளது.

விவசாய அமைச்சர் கே.டி. லால் காந்தவின் சொத்துக்கள் மற்றும் பொறுப்புக்கள் தொடர்பான அறிவிப்பு குறித்து ஹிரு செய்தி நிறுவனத்தின் செய்தி அறிக்கை தொடர்பில் அவரது சட்டத்தரணியால் அனுப்பப்பட்ட கோரிக்கை கடிதத்திற்கு, ஹிரு செய்தி நிறுவனத்தின் சட்டத்தரணிகள் கடும் பதிலடி கொடுத்து கடிதம் ஒன்றை அனுப்பியுள்ளனர்.

அமைச்சர் லால் காந்தவின் சட்டத்தரணிக்கு அனுப்பப்பட்டுள்ள அந்த கடிதத்தில், அமைச்சரின் சட்டத்தரணியால் முன்வைக்கப்பட்ட அனைத்துக் குற்றச்சாட்டுகளையும் தமது சேவைப் பெறுநரான ஹிரு நிறுவனம் முற்றாக நிராகரிப்பதோடு, அதில் குறிப்பிடப்பட்டுள்ள கோரிக்கைகளையும் நிராகரிக்கிறது.

திருத்தம் செய்யும் உரிமையை ஏற்றுக்கொண்டு, ஆசியா பிரோட்காஸ்டிங் கோர்ப்பரேஷன் (Asia Broadcasting Corporation) நிறுவனம் கடந்த ஏப்ரல் 18ஆம் திகதி ஹிரு டி.வி உள்ளிட்ட தனது அனைத்து ஊடகத் தளங்களிலும் உடனடியாகத் திருத்தம் ஒன்றை மேற்கொண்டதாக நிறுவனத்தின் சட்டத்தரணிகள் தெரிவித்துள்ளனர்.

2023ஆம் ஆண்டின் 09ஆம் இலக்க ஊழல் எதிர்ப்புச் சட்டத்தின் கீழ், லால் காந்தவின் பிரகடனத்தில் குறைபாடுகள் இருப்பதாகவும், அந்தச் சொத்து மற்றும் பொறுப்புக்கள் தொடர்பான பிரகடனம் சட்டத்திற்கு அமைய சமர்ப்பிக்கப்படவில்லை என்றும் அந்த கடிதத்தில் சுட்டிக்காட்டப்பட்டுள்ளது.

அமைச்சர் தரப்பு தமது சேவைப் பெறுநருக்கு எதிராக ஏதேனும் சட்ட நடவடிக்கை எடுத்தால், ஒரு நிறுவனப் பிரஜை என்ற வகையில் தமது சேவைப் பெறுநருக்குள்ள உரிமைகளைப் பயன்படுத்துவதோடு, கட்டாய சட்ட விதிகளைத் திட்டமிட்டு மீறியமை தொடர்பிலும் சட்டப்படி நடவடிக்கை எடுக்கப்படும் எனத் தெரிவிக்கப்பட்டுள்ளது.

மேலும், உங்களது சேவைப்பெறுநர் பகிரங்க மேடைகளில் ஒப்புக்கொண்டபடி, அவர் பொதுச் சொத்துக்களுக்கு சேதம் விளைவித்தல் மற்றும் பிரஜைகளுக்கு எதிராக வன்முறையைத் தூண்டுதல் போன்ற விடயங்களுடன் தொடர்புடையவர் என்பதால், எங்களது சேவைப்பெறுநர், சட்ட நடவடிக்கையின் போது அவர் ஒரு நற்பெயர் இல்லாத நபர் என்ற நிலைப்பாட்டை நீதிமன்றத்தில் முன்வைக்கப் போவதாக ஹிரு நிறுவன சட்டத்தரணிகள் வலியுறுத்தியுள்ளனர்.

தமது சேவைப்பெறுநரின் ஒளிபரப்பு உரிமைகளுக்குத் தடையாக இருக்கும் எந்தவொரு முயற்சிக்கும் எதிராகச் சட்ட நடவடிக்கை எடுக்கப்படும் என்றும் சட்டத்தரணிகள் நிறுவனத்தின் அந்த கடிதத்தில் குறிப்பிடப்பட்டுள்ளது.

2026ஆம் ஆண்டுக்கான அரச வெசாக் உற்சவத்தின் உத்தியோகபூர்வ நிகழ்வு மே மாதம் 30ஆம் திகதி ஏற்பாடு செய்யப்பட்டுள்ளதால், அதற்கு அடுத்த நாளான மே மாதம் 31ஆம் திகதியை அரசாங்க விடுமுறை தினமாகப் பிரகடனப்படுத்தி பொது நிர்வாக, உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சு அதிவிசேட வர்த்தமானி அறிவித்தலை வெளியிட்டுள்ளது. 

இதற்கமைய, முன்னதாக மே மாதம் 2ஆம் திகதி வழங்கப்படவிருந்த விடுமுறையைத் திருத்தம் செய்து இந்த வர்த்தமானி வெளியிடப்பட்டுள்ளது. 

அமைச்சரவை தீர்மானத்திற்கு இணங்க, இம்முறை வெசாக் வாரம் மே மாதம் 27ஆம் திகதி முதல் ஜூன் மாதம் 2ஆம் திகதி வரை பிரகடனப்படுத்தப்பட்டுள்ளமை குறிப்பிடத்தக்கது.

செய்தித் தொகுப்பு: ஜூட் சமந்த

வென்னப்புவ, வைக்காலை பகுதியில் வீடொன்றில் அனுமதிப்பத்திரமின்றி சட்டவிரோதமான முறையில் களஞ்சியப்படுத்தி வைக்கப்பட்டிருந்த 1,245 கிலோ கிராம் பீடி இலைகளை வென்னப்புவ பொலிஸார் கைப்பற்றியுள்ளனர்.

இந்தச் சம்பவம் தொடர்பாக குறித்த வீட்டைச் சேர்ந்த பெண் ஒருவரும் பொலிஸாரால் கைது செய்யப்பட்டுள்ளார்.

நேற்று (ஏப்ரல் 22) மாலை வென்னப்புவ பொலிஸ் நிலையப் பொறுப்பதிகாரி லலித் சந்தசிறி தலைமையிலான குழுவினரால் இந்தச் சுற்றிவளைப்பு மேற்கொள்ளப்பட்டது. பொலிஸார் கைப்பற்றிய பீடி இலைகள் 35 பொலித்தீன் உரைகளில் பொதி செய்யப்பட்டிருந்ததாகத் தெரிவிக்கப்படுகிறது.

கைப்பற்றப்பட்ட பீடி இலைகளின் சந்தைப் பெறுமதி சுமார் 70 இலட்சம் ரூபா என மதிப்பிடப்பட்டுள்ளது. இவை இந்தியாவிலிருந்து கடல் மார்க்கமாக இலங்கைக்குள் சட்டவிரோதமாகக் கடத்தி வரப்பட்டிருக்கலாம் என பொலிஸார் சந்தேகிக்கின்றனர். வேறொரு இடத்திற்கு விநியோகிப்பதற்காக இந்த வீட்டில் தற்காலிகமாக மறைத்து வைக்கப்பட்டிருந்தபோது பொலிஸார் இவற்றைக் கண்டுபிடித்துள்ளனர்.

இந்தச் சட்டவிரோதக் கடத்தல் பொருட்கள் பதுக்கி வைக்கப்பட்டிருந்த வீடானது, வென்னப்புவ மதுவரி அலுவலகத்திற்கு மிக அருகிலேயே அமைந்துள்ளது என்பது குறிப்பிடத்தக்கது. புத்தளம் மாவட்ட உதவி மதுவரி ஆணையாளர் அலுவலகம் மற்றும் வென்னப்புவ மதுவரி அத்தியட்சகர் அலுவலகம் ஆகியன அமைந்துள்ள அதே கட்டிடத் தொகுதிக்கு அருகிலேயே இந்தப் பதுக்கல் இடம்பெற்றுள்ளது.

கைது செய்யப்பட்ட பெண் மற்றும் கைப்பற்றப்பட்ட பீடி இலைத் தொகுதி என்பன மேலதிக சட்ட நடவடிக்கைகளுக்காக கட்டுநாயக்க சுங்கத் தடுப்புப் பிரிவினரிடம் ஒப்படைக்கப்படவுள்ளதாக வென்னப்புவ பொலிஸார் தெரிவித்துள்ளனர்.

செய்தித் தொகுப்பு: ஜூட் சமந்த

பண்டைய காலத்தில் இலங்கையர்களின் பிரதான போக்குவரத்துச் சாதனமாக விளங்கியவை ‘திரிக்கல’ (Thirikkala) அல்லது ‘டான்டு’ (Tantu) எனப்படும் மாட்டு வண்டிகள், தூர இடங்களுக்கான ஆன்மீகப் பயணங்கள் மற்றும் திருமணச் சடங்குகளுக்குக் கௌரவமான வாகனமாகப் பயன்படுத்தப்பட்டன, ஆனால் நவீன வாகனங்களின் வருகையோடு காலப்போக்கில் எமது சமூகத்திலிருந்து இது மறைந்து போயின.

இன்றும் தும்மலசூரிய – கட்டிமஹான தேவாலயத்தின் வருடாந்த திருவிழாவிற்குப் பக்தர்கள் மாட்டு வண்டிகளில் வருகை தருவது ஒரு பாரம்பரியமாகத் தொடர்கின்ற போதிலும், அன்றாடப் பயன்பாட்டிலிருந்து இவை அற்றுப்போயுள்ளன. இந்நிலையில், அழிந்து வரும் இந்தக் கலையை ஒரு குடிசைத் தொழிலாகக் கொண்டு, மாரவில – இஹல கட்டுநேரிய பகுதியைச் சேர்ந்த டப்ளியூ. அசோக பிரியந்த குமார பெர்னாண்டோ என்பவர் இன்றும் இந்த வண்டிகளை உற்பத்தி செய்து வருகின்றார்.

தமது உற்பத்தி அனுபவம் குறித்து அவர் பகிர்கையில்:

“சிறுவயதில் எங்கள் வீட்டில் ஒரு டான்டு வண்டி இருந்தது எனக்கு நினைவிருக்கிறது. நான் யாரிடமும் முறைப்படி இந்தக் கலையைக் கற்றுக்கொள்ளவில்லை. பார்த்துப் பார்த்தே அனைத்தையும் பழகினேன். இன்று என்னிடம் 60 முதல் 70 ஆண்டுகள் பழமையான வண்டிகள் உள்ளன. அதேபோன்று, நவீன காலத்திற்கு ஏற்றவாறு மிக ஆடம்பரமான வண்டிகளையும் நான் வடிவமைக்கிறேன். இலங்கையிலேயே மிக உயரமான டான்டு வண்டியும் என்னிடமே உள்ளது” என்கிறார்.

சுற்றுலாத்துறையில் பெரும் வரவேற்பு

தற்போது இந்த வண்டிகளுக்கான தேவை பெரும்பாலும் சுற்றுலாத் துறையைச் சார்ந்தே அமைகிறது. களுத்துறை, பேருவளை மற்றும் சிகிரியா போன்ற சுற்றுலாப் பகுதிகளில் சுற்றுலாப் பயணிகளின் பொழுதுபோக்குத் தேவைக்காக அசோகவின் வண்டிகள் பெருமளவில் கொண்டு செல்லப்படுகின்றன.

குறிப்பாக சித்திரைப் புத்தாண்டு காலங்களில் இடம்பெறும் மாட்டு வண்டிப் பந்தயங்களுக்காக (Race Carts) அதிக கேள்வி நிலவுவதாகவும் அவர் குறிப்பிடுகின்றார்.

உற்பத்தி சவால்கள்

தனது வீட்டில் மேலும் இரு பணியாளர்களின் உதவியுடன் இந்த வண்டிகளை உற்பத்தி செய்யும் அசோக, மரத்திற்கு மேலதிகமாக இரும்பு, துருப்பிடிக்காத எஃகு (Stainless Steel) மற்றும் பித்தளை ஆகியவற்றை வண்டிகளின் உறுதித்தன்மைக்காகப் பயன்படுத்துகின்றார்.

“இதை ஒரு குடிசைத் தொழிலாகவே நான் ஆரம்பித்தேன். அனைத்து வேலைகளையும் எனது மேற்பார்வையில் மிக நுணுக்கமாகச் செய்வதால், ஒரு தரமான வண்டியை உருவாக்க அதிக காலம் எடுக்கிறது. அதனால் சந்தையில் நிலவும் கேள்விக்கு ஏற்ப விநியோகம் செய்வதில் சவால்கள் உள்ளன” என அவர் மேலும் தெரிவித்தார்.

பாரம்பரியமான ஒரு வாகனக் கலையைத் தற்காலத் தேவைகளுக்கேற்ப மாற்றியமைத்து, அதனை அழியாமல் பாதுகாத்து வரும் அசோகவின் முயற்சி பலரதும் பாராட்டைப் பெற்றுள்ளது.

பாஸ்கரன் கதீசன்

வவுனியா, தாண்டிக்குளம் புகையிரத நிலையத்திற்கு அண்மித்த பகுதியில் இன்று (23) இடம்பெற்ற கோர விபத்தில் பெண் ஒருவர் உயிரிழந்ததுடன், முச்சக்கரவண்டி சாரதி படுகாயமடைந்த நிலையில் உயிருக்கு போராடி வருகின்றார்.

கொழும்பிலிருந்து யாழ்ப்பாணம் நோக்கிப் பயணித்த யாழ் தேவி கடுகதி புகையிரதத்துடன், தாண்டிக்குளம் பகுதியில் தண்டவாளத்தைக் கடக்க முயன்ற முச்சக்கரவண்டி மோதியதிலேயே இந்த விபத்து ஏற்பட்டுள்ளது. குறித்த பகுதியில் அமைந்துள்ள பாதுகாப்பற்ற புகையிரத கடவையைப் பயன்படுத்திய போதே இந்த அனர்த்தம் நிகழ்ந்துள்ளதாக ஆரம்பகட்ட விசாரணைகள் தெரிவிக்கின்றன.

புகையிரதத்துடன் மோதிய வேகத்தில் முச்சக்கரவண்டி பலத்த சேதமடைந்து உருக்குலைந்தது.

முச்சக்கரவண்டியில் பயணித்த பெண் ஒருவர் சம்பவ இடத்திலேயே பரிதாபமாக உயிரிழந்துள்ளார். விபத்தில் படுகாயமடைந்த முச்சக்கரவண்டி சாரதி, உடனடியாக மீட்கப்பட்டு வவுனியா மாவட்ட பொது வைத்தியசாலையில் அனுமதிக்கப்பட்டார்.

சாரதியின் நிலைமை கவலைக்கிடமாக உள்ளதால், அவர் தற்போது தீவிர சிகிச்சை பிரிவில் (ICU) அனுமதிக்கப்பட்டு சிகிச்சை பெற்று வருகின்றார்.

“குறித்த பகுதியில் சைகை விளக்குகளோ அல்லது முறையான பாதுகாப்புத் தடைகளோ இல்லாததே இவ்வாறான தொடர் விபத்துகளுக்குக் காரணமாகின்றது.” – அப்பகுதி மக்கள் கவலை.

தாண்டிக்குளம் பகுதியில் உள்ள இந்தப் பாதுகாப்பற்ற புகையிரத கடவை நீண்டகாலமாக அபாயகரமான ஒன்றாகவே இருந்து வருகின்றது. அடிக்கடி இவ்வாறான விபத்துகள் நிகழ்ந்து வரும் நிலையில், சம்பந்தப்பட்ட அதிகாரிகள் உரிய நடவடிக்கை எடுக்கவில்லை என பொதுமக்கள் கடும் விசனம் தெரிவித்துள்ளனர்.

சம்பவம் தொடர்பில் மேலதிக விசாரணைகளை வவுனியா பொலிஸார் முன்னெடுத்து வருவதுடன், உயிரிழந்த பெண்ணின் உடல் பிரேத பரிசோதனைக்காக வைத்தியசாலையில் வைக்கப்பட்டுள்ளது.

இலங்கை அமைச்சரவையின் வாராந்தக் கூட்டம் 2026.04.20 அன்று நடைபெற்றது. இதன்போது தேசிய பாதுகாப்பு, உட்கட்டமைப்பு மேம்பாடு, கல்வி மற்றும் சுகாதாரம் உள்ளிட்ட துறைகள் சார்ந்த பல முக்கிய தீர்மானங்களுக்கு அமைச்சரவை அங்கீகாரம் வழங்கியுள்ளது.

தேசிய பாதுகாப்பு மற்றும் விசாரணைப் பரிந்துரைகள்: உயிர்த்த ஞாயிறு தாக்குதல்கள் குறித்து விசாரணை செய்த ஜனாதிபதி ஆணைக்குழு மற்றும் நாடாளுமன்றத் தெரிவுக்குழு ஆகியவற்றின் பரிந்துரைகளை நடைமுறைப்படுத்துவதை முறையாகக் கண்காணிக்க இதுவரை நிலையான பொறிமுறை ஒன்று இருக்கவில்லை. எனவே, பாதுகாப்பு அமைச்சராக ஜனாதிபதி சமர்ப்பித்த யோசனைக்கு இணங்க, ஜனாதிபதி செயலகத்தின் மேற்பார்வையின் கீழ் தேசிய பாதுகாப்பு மற்றும் பயங்கரவாத எதிர்ப்பு தொடர்பான நிபுணர் குழுவொன்றை நியமிக்க அமைச்சரவை அனுமதி வழங்கியுள்ளது.

போக்குவரத்து மற்றும் விமான சேவைகள்

• புதிய போக்குவரத்து அனுமதிப்பத்திர நடைமுறை: மாகாணங்களுக்கு இடையிலான பயணிகள் போக்குவரத்து அனுமதிப்பத்திரங்களை வழங்குவதற்காக, தற்போதுள்ள பஸ் உரிமையாளர்களைப் பாதுகாக்கும் வகையிலும் புதிய முதலீட்டாளர்களை ஊக்குவிக்கும் வகையிலும் புதிய நடைமுறையொன்றை அறிமுகப்படுத்தத் தீர்மானிக்கப்பட்டுள்ளது.
• களனிவெலி புகையிரத பாதை நீடிப்பு: அவிசாவளையிலிருந்து இரத்தினபுரி வரை களனிவெலி புகையிரத பாதையை நீடிப்பதற்கான சாத்தியவள ஆய்வு மற்றும் விரிவான திட்டங்களைத் தயாரிக்கும் ஒப்பந்தம் M/s. Resources Development Consultants (Pvt) Ltd நிறுவனத்திற்கு 356.22 மில்லியன் ரூபாய் செலவில் வழங்கப்பட்டுள்ளது.
• டுபாய் விமான நிலையச் சேவைகள்: டுபாய் சர்வதேச விமான நிலையத்தில் ஸ்ரீலங்கன் ஏர்லைன்ஸ் விமானங்களுக்கான தரைக்கையாளுதல் மற்றும் சரக்குக் கையாளுதல் சேவைகளை அடுத்த மூன்று ஆண்டுகளுக்கு வழங்க Dnata நிறுவனத்திற்கு அனுமதி வழங்கப்பட்டுள்ளது.

வீடமைப்பு மற்றும் உட்கட்டமைப்பு

• தேசிய வீடமைப்பு கொள்கை: 2019 ஆம் ஆண்டு இறுதியாகத் திருத்தப்பட்ட தேசிய வீடமைப்பு கொள்கையை, தற்கால சவால்களுக்கு ஏற்ப மீளாய்வு செய்ய அமைச்சரவை தீர்மானித்துள்ளது.
• இடைநிறுத்தப்பட்ட வீடமைப்புத் திட்டங்கள்: 2015-2019 காலப்பகுதியில் ஆரம்பிக்கப்பட்ட 2,562 வீடமைப்புத் திட்டங்களில் சுமார் 10,532 வீடுகள் மட்டுமே பூர்த்தியாகியுள்ளன. எஞ்சியுள்ள திட்டங்களை முடிக்க 11.26 பில்லியன் ரூபாய் தேவைப்படும் எனக் கணக்கிடப்பட்டுள்ள நிலையில், இது குறித்துப் பரிந்துரை வழங்க நிபுணர் குழுவொன்று நியமிக்கப்படவுள்ளது.

கல்வி மற்றும் கலாசாரம்

• புனித தாதுக்கள் அமெரிக்கா பயணம்: அம்பாறை நீலகிரி விகாரை, கங்காராம விகாரை மற்றும் மஹியங்கனை ரஜமகா விகாரை ஆகியவற்றில் உள்ள புனித தாதுக்களை 2026 மே 02 முதல் மே 10 வரை அமெரிக்காவின் டெக்சாஸில் உள்ள மகாவிபஸ்ஸனா தியான மையத்தில் காட்சிப்படுத்த அனுமதி வழங்கப்பட்டுள்ளது.
• பிக்ஷு பல்கலைக்கழகம்: இலங்கை பிக்ஷு பல்கலைக்கழகத்தின் பன்நோக்குக் கட்டடத்தின் கட்டுமானச் செலவு 663 மில்லியன் ரூபாயாகத் திருத்தப்பட்டு, அதனைப் பூர்த்தி செய்ய அங்கீகாரம் வழங்கப்பட்டது.
• வர்த்தகக் கல்வி: வர்த்தகக் கல்வியை மேம்படுத்தும் நோக்கில் நாடளாவிய ரீதியில் 100 செய்முறை கற்றல் நிலையங்களை அமைக்கத் திட்டமிடப்பட்டுள்ளது. இதன் முதற்கட்டமாக 25 மாவட்டங்களிலும் 25 நிலையங்கள் ஆரம்பிக்கப்படும்.

சுகாதாரம் மற்றும் போதைப்பொருள் ஒழிப்பு

• சிறுநீரக நோயாளர்களுக்கான மருந்துகள்: சிறுநீரக நோயாளிகளின் டயாலிசிஸ் சிகிச்சைக்காகத் தேவையான 800,000 மருந்துப் பைகளை (Peritoneal dialysis solution) 889.6 மில்லியன் ரூபாய் செலவில் கொள்வனவு செய்யத் தீர்மானிக்கப்பட்டுள்ளது.
• புனர்வாழ்வு நிலையங்கள்: ‘நாடும் ஒன்றாக’ (Ratama Ekata) போதைப்பொருள் ஒழிப்புத் திட்டத்தின் கீழ், சிகிச்சை மற்றும் புனர்வாழ்வுக்காக நாடு முழுவதும் புதிதாக 06 நிலையங்களை அமைக்கவும் அவற்றுக்கான பணியாளர்களை நியமிக்கவும் அமைச்சரவை ஒப்புதல் அளித்துள்ளது.

ஏனைய முக்கிய தீர்மானங்கள்

• கைத்தொழில் அபிவிருத்திச் சபை உள்ளிட்ட பல நிறுவனங்களை ஒன்றிணைத்து ‘இலங்கை கைத்தொழில் மற்றும் புத்தாக்க அதிகாரசபையை’ உருவாக்குவதற்கான சட்டமூலத்தைத் தயாரிக்க அனுமதி வழங்கப்பட்டுள்ளது.
• குடிவரவு குடியகல்வு கட்டுப்பாட்டாளர் நாயகமாக தற்போது பதில் கடமையாற்றும் ஈராஜ் சமிந்த பத்திரஜ அவர்கள் அந்தப் பதவிக்கு நிரந்தரமாக நியமிக்கப்பட்டுள்ளார்.