டித்வா சூறாவளியால் பகுதியளவில் சேதமடைந்த வீடுகளுக்கான 05 இலட்சம் ரூபா இழப்பீட்டுத் தொகையை, மே மாத இறுதிக்குள் வழங்கி முடிக்கவும் – ஜனாதிபதி!

டித்வா சூறாவளியால் பகுதியளவில் சேதமடைந்த வீடுகளுக்காக அரசினால் அங்கீகரிக்கப்பட்ட 05 இலட்சம் ரூபா இழப்பீட்டுத் தொகையை, மிக சிக்கலான சந்தர்ப்பங்களைத் தவிர ஏனைய அனைத்துப் பயனாளிகளுக்கும் மே மாத இறுதிக்குள் வழங்கி முடிக்குமாறு ஜனாதிபதி அநுர குமார திசாநாயக்க பணிப்புரை விடுத்தார்.

டித்வா சூறாவளியால் பகுதியளவிலும் முழுமையாகவும் சேதமடைந்த வீடுகளில் வசித்தவர்களுக்கு இழப்பீடு வழங்குதல் மற்றும் புதிய வீடுகளை கையளிக்கும் பணிகள் தொடர்பாக இன்று (22) முற்பகல் ஜனாதிபதி அலுலகத்தில் நடைபெற்ற முன்னேற்ற மீளாய்வுக் கலந்துரையாடலின் போதே ஜனாதிபதி இவ்வாறு தெரிவித்தார்.

முழுமையாக சேதமடைந்த வீடுகளில் வசித்தவர்களுக்குப் புதிய வீடொன்றை வழங்குவது அல்லது வீடொன்றை கொள்வனவு செய்வதற்காக 50 இலட்சம் ரூபா இழப்பீட்டுத் தொகையை வழங்கும் பணிகளின் முன்னேற்றம் குறித்தும் இதன்போது விசேட கவனம் செலுத்தப்பட்டது. அந்த இழப்பீட்டுத் தொகையை விரைவாக வழங்குவதற்கு நடவடிக்கை எடுக்குமாறும் ஜனாதிபதி அதிகாரிகளுக்கு அறிவுறுத்தினார்.

இன்னமும் முகாம்களில் வசித்து வரும் மக்களுக்கு, புதிய வீடுகள் கிடைக்கும் வரை அவர்களைத் தற்காலிக வீடுகளில் குடியமர்த்துவது குறித்து இங்கு விரிவாகக் கலந்துரையாடப்பட்டது. அதற்கேற்ற பொருத்தமான இடங்களைக் கண்டறிந்து, அந்தப் பணிகளை மிக விரைவாக நிறைவு செய்வதற்கு தேவையான நடவடிக்கைகளை எடுக்குமாறும் ஜனாதிபதி பணிப்புரை விடுத்தார்.

மிக ஆபத்தான பகுதிகளில் வசிக்கும் மக்களை வேறு இடங்களில் குடியமர்த்துவது குறித்தும் இங்கு கலந்துரையாடப்பட்டதுடன், புதிய வீடு வாங்குவதற்கு இழப்பீடு பெறாதவர்களுக்காக வீட்டுத் தொகுதிகளை நிர்மாணிப்பதற்கான திட்டங்கள் குறித்தும் கவனம் செலுத்தப்பட்டது.

வீடமைப்பு, நிர்மாணிப்பு மற்றும் நீர் வழங்கல் அமைச்சர் வைத்தியர் சுசில் ரணசிங்க, நிதி, திட்டமிடல் மற்றும் பொருளாதார அபிவிருத்தி அமைச்சின் செயலாளர் கலாநிதி ஹர்ஷன சூரியப்பெரும, அத்தியாவசிய சேவைகள் ஆணையாளர் நாயகம் பிரபாத் சந்திரகீர்த்தி, பொது நிர்வாகம், மாகாண சபைகள் மற்றும் உள்ளூராட்சி அமைச்சின் செயலாளர் எஸ். ஆலோக பண்டார, பெருந்தோட்ட மற்றும் சமூக உட்கட்டமைப்பு வசதிகள் அமைச்சின் செயலாளர் குணதாச சமரசிங்க, பாதுகாப்பு அமைச்சின் மேலதிக செயலாளர் கே. ஜி. தர்மதிலக்க உட்பட அதிகாரிகள் பலரும் இந்நிகழ்வில் கலந்துகொண்டனர்.

ஜனாதிபதி ஊடகப் பிரிவு
2026-04-22

சுகாதார அமைச்சின் முன்னாள் பிரதம சட்ட அதிகாரி (ஓய்வு நிலை), பாரிய நிதி மோசடி மற்றும் ஊழல் குற்றச்சாட்டுகளின் அடிப்படையில் இலஞ்சம் அல்லது ஊழல் பற்றிய சார்த்துதல்களைப் புலனாய்வு செய்யும் ஆணைக்குழுவின் அதிகாரிகளால் நேற்று (21) கைது செய்யப்பட்டுள்ளார்.

சுகாதார அமைச்சிற்குச் சொந்தமான “மெடி ஹவுஸ்” (Medi House) எனும் கட்டிடத்திற்கான குத்தகை உரிமையைப் பெற்றுக்கொள்வது மற்றும் அது தொடர்பான ஒப்பந்தங்களை முன்னெடுப்பதில் இடம்பெற்ற முறைகேடுகள் குறித்து இலஞ்ச ஊழல் ஆணைக்குழுவிற்கு முறைப்பாடு ஒன்று கிடைத்திருந்தது. இதனைத் தொடர்ந்து முன்னெடுக்கப்பட்ட இரகசிய விசாரணைகளின் முடிவிலேயே இந்த அதிரடி கைது நடவடிக்கை மேற்கொள்ளப்பட்டுள்ளது.

சந்தேக நபர் சுகாதார அமைச்சின் பிரதம சட்ட உத்தியோகத்தராகப் பணியாற்றிய காலத்தில், பல மோசடிகளில் ஈடுபட்டதாக விசாரணைகளில் தெரியவந்துள்ளது:

அந்த வகையில் “மெடி ஹவுஸ்” கட்டிடத்தின் குத்தகை காலத்தை நீட்டிப்பதற்காக, விதிகளுக்கு முரணாக மூன்று குத்தகை ஒப்பந்தங்களைத் தயாரித்து இந்த ஒப்பந்தங்களைத் தயாரிப்பதற்கான கட்டணமாக 4,134,887 ரூபா தொகையை அவர் கோரியுள்ளார்.

கோரப்பட்ட தொகையில் முதற்கட்டமாக 2,000,000 ரூபா (20 இலட்சம்) பணத்தைப் பெற்றுள்ளதுடன், எஞ்சிய தொகையைப் பெற்றுக்கொள்ளும் நோக்கில், “QIDIO ஹவுஸ் பிரைவேட் லிமிடெட்” எனும் நிறுவனத்தின் பெயரில் மக்கள் வங்கியில் வழங்கப்பட்ட 500,000 ரூபா பெறுமதியான காசோலையைப் பெற்று பணமாக்கியுள்ளமையும் உறுதி செய்யப்பட்டுள்ளது.

ஆணைக்குழுவின் விசாரணை அதிகாரிகளால் முன்னெடுக்கப்பட்ட சுற்றிவளைப்பின் போது, நேற்று பிற்பகல் 3.45 மணியளவில் சந்தேக நபர் கைது செய்யப்பட்டார்.

“அரச பதவியைத் தவறாகப் பயன்படுத்தி, ஒப்பந்தங்களை மேற்கொள்வதற்காகப் பெருந்தொகை பணத்தை இலஞ்சமாகக் கோரியமை மற்றும் பெற்றுக் கொண்டமை தொடர்பான சட்டப்பிரிவுகளின் கீழ் மேலதிக விசாரணைகள் முன்னெடுக்கப்பட்டு வருகின்றன,”

கைது செய்யப்பட்ட சந்தேக நபரை நீதிமன்றத்தில் முன்னிலைப்படுத்துவதற்கான நடவடிக்கைகளை அதிகாரிகள் மேற்கொண்டு வருகின்றனர். சுகாதாரத் துறையில் உயர்மட்ட அதிகாரி ஒருவர் இவ்வாறான குற்றச்சாட்டில் சிக்கியுள்ளமை பெரும் பரபரப்பை ஏற்படுத்தியுள்ளது.

ஜூட் சமந்த

மகாவெவ – மட்டக்கொட்டுவ கடற்கரை கனிஷ்ட வித்தியாலயம் ஏற்பாடு செய்த “சூரிய மங்கள” புத்தாண்டு விழா அண்மையில் பாடசாலை வளாகத்தில் மிக விமர்சையாக நடைபெற்றது.

சுமார் 300 மாணவர்கள் கல்வி பயிலும் மட்டக்கொட்டுவ கடற்கரை கனிஷ்ட வித்தியாலயத்தின் சிறப்பம்சம் என்னவென்றால், அங்கு கற்கும் அனைத்து மாணவர்களும் ரோமன் கத்தோலிக்க மதத்தைப் பின்பற்றுபவர்கள் என்பதாகும். அந்தப் பாடசாலையில் பௌத்த அல்லது இந்து மதத்தைச் சேர்ந்த ஒரு மாணவர் கூட இல்லாவிட்டாலும், கலாசார விழுமியங்களைப் போற்றும் வகையில் இந்த விழா ஏற்பாடு செய்யப்பட்டிருந்தது.

ஆரம்பப் பிரிவு பாடத்திட்டத்தின்படி, அனைத்து மாணவர்களுக்கும் சிங்கள – தமிழ் புத்தாண்டு சடங்குகள் மற்றும் சம்பிரதாயங்கள் குறித்த அறிவை வழங்குவது அவசியமாகும். இதற்காக அதிபர் மற்றும் ஆசிரியர்களின் வழிகாட்டலில் பாடசாலை வளாகத்தினுள் “நீல்மிணி தென்ன” மற்றும் “ரன்மிணி தென்ன” என பெயரிடப்பட்ட சிங்கள மற்றும் தமிழ் கலாசாரங்களை பிரதிபலிக்கும் இரு கிராமங்கள் உருவாக்கப்பட்டிருந்தன.

புத்தாண்டு இளவரசனின் வருகையைத் தொடர்ந்து விழா ஆரம்பமானது. சுப நேரங்களின்படி அடுப்பு மூட்டுதல், உறவினர் வீடுகளுக்குச் செல்லுதல், உணவு உட்கொள்ளுதல் மற்றும் தலைக்கு எண்ணெய் வைத்தல் போன்ற பாரம்பரிய சடங்குகள் முறையாகக் கடைபிடிக்கப்பட்டன. அத்துடன் மாணவர்கள் பாரம்பரிய ஊஞ்சல் ஆடுவதிலும் உற்சாகமாக ஈடுபட்டனர்.

மத அல்லது இன வேறுபாடின்றி அனைத்து மாணவர்களுக்கும் புத்தாண்டு சடங்குகள் மற்றும் சுப நேரங்கள் குறித்த விழிப்புணர்வை ஏற்படுத்துவதே இவ்விழாவின் நோக்கம் என பாடசாலை அதிபர் கே.டி. விமலசேன தெரிவித்தார்.

இவ்விழாவை வெற்றிகரமாக நடத்துவதற்கு மகாவெவ ஸ்ரீ தர்மாராம வித்தியாலயத்தின் அதிபர் ஏ.எச்.எம். காமிணி அபயசிங்க மற்றும் அவரது பாடசாலை ஆசிரியர்கள், மாணவர்கள் முழுமையான ஒத்துழைப்பை வழங்கியிருந்தனர். இப்பிரதேசத்தைச் சேர்ந்த பெருமளவிலான பொதுமக்கள் இந்த கலாசார விழாவைக் கண்டுகளிக்க வருகை தந்திருந்தமை குறிப்பிடத்தக்கது.

கிளிநொச்சி, பரந்தன் சந்திக்கு அண்மித்த ஏ-9 (A9) பிரதான வீதியில் நேற்று (21.04.2026) இரவு இடம்பெற்ற கோர விபத்தில் முதியவர் ஒருவர் பரிதாபமாக உயிரிழந்துள்ளார்.

யாழ்ப்பாணத்திலிருந்து கொழும்பு நோக்கி அதிவேகமாகப் பயணித்த கார் ஒன்று, நேற்று இரவு 7.00 மணியளவில் பரந்தன் சந்திக்கு அருகில் வீதியை ஊடறுக்க முயன்ற முதியவர் மீது பலமாக மோதியுள்ளது. காரின் வேகம் காரணமாகத் தூக்கி வீசப்பட்ட முதியவர், படுகாயமடைந்த நிலையில் சம்பவ இடத்திலேயே உயிரிழந்துள்ளார்.

இந்த விபத்தில் உயிரிழந்தவர் புன்னைநீராவி, கண்ணகைபுரம் பகுதியைச் சேர்ந்த 55 வயதுடைய முதியவர் என அடையாளம் காணப்பட்டுள்ளார். இவரது சடலம் தற்போது உடற்கூற்றுப் பரிசோதனைகளுக்காகக் கிளிநொச்சி பொது வைத்தியசாலையில் வைக்கப்பட்டுள்ளது.

விபத்துத் தொடர்பாகக் கிளிநொச்சி பொலிஸார் விசாரணைகளை முன்னெடுத்து வருகின்றனர். விபத்துக்குள்ளான காரின் ஓட்டுநர் பொலிஸாரால் கைது செய்யப்பட்டுள்ளதாகத் தெரிகிறது. இரவு நேரங்களில் போதிய வெளிச்சமின்மை அல்லது வாகனத்தின் அதிவேகம் விபத்துக்குக் காரணமாக இருக்கலாம் எனச் சந்தேகிக்கப்படுகிறது.

பரந்தன் சந்தி மற்றும் ஏ-9 வீதியோரங்களில் பாதசாரிகள் மிகுந்த அவதானத்துடன் செயற்படுமாறு பொலிஸார் வேண்டுகோள் விடுத்துள்ளனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

இந்தியாவின் கேரளக் கடற்கரையில் விபத்துக்குள்ளான எம்.எஸ்.சி. எலசா III (MSC Elasa III) கப்பலிலிருந்து வெளியேறிய அபாயகரமான நெகிழி மணிகள் (Plastic Pellets), தற்போது இலங்கையின் வடமேற்கு கடற்கரைப்பகுதிகளில் கரை ஒதுங்கி வருகின்றன. இதனால் ஏற்பட்டுள்ள சுற்றுச்சூழல் பாதிப்புகளைக் கட்டுப்படுத்த, கடல் சுற்றுச்சூழல் பாதுகாப்பு ஆணையம் (MEPA) தீவிர நடவடிக்கைகளை மேற்கொண்டு வருகிறது.

புத்தளம், வனாத்தவில்லுவ பிரதேச செயலகத்திற்கு உட்பட்ட கொங்கநத்த மற்றும் பாலுகத்துறை கடற்கரைகளில் பெருமளவிலான நெகிழி மணிகள் கரை ஒதுங்கியுள்ளமை கண்டறியப்பட்டுள்ளது. இதனையடுத்து, இப்பகுதிகளைத் தூய்மைப்படுத்தும் பணிகளை முறையாகத் திட்டமிடுவதற்காக கடந்த ஏப்ரல் (19) விசேட கள ஆய்வுப் பயணம் ஒன்று மேற்கொள்ளப்பட்டது.

இந்த ஆய்வின்போது, தூய்மைப் பணிகளை எவ்வாறு முன்னெடுப்பது மற்றும் சுற்றுச்சூழல் பாதிப்புகளை எப்படிக் குறைப்பது என்பது குறித்து விரிவாக ஆலோசிக்கப்பட்டது.

இதில் ஆர். பிரபாகரன் – வனத்தவில்லுவ பிரதேச செயலாளர், சமந்த குணசேகர – தலைவர், கடல் சுற்றுச்சூழல் பாதுகாப்பு ஆணையம், ஜகத் குணசேகர – பொது மேலாளர், கடல் சுற்றுச்சூழல் பாதுகாப்பு ஆணையம், சுசந்த குமார – பூக்குளம் கிராம அலுவலர், கடல் சுற்றுச்சூழல் பாதுகாப்பு ஆணையத்தின் (MEPA) கள உதவியாளர் ஷமில விக்ரமசிங்க மற்றும் விசேட அதிகாரிகள் குழுவினர்.

விபத்துக்குள்ளான கப்பலிலிருந்து வெளியேறிய இந்தச் சிறிய நெகிழி மணிகள், கடல்வாழ் உயிரினங்களுக்குப் பெரும் அச்சுறுத்தலாக அமைந்துள்ளன. இவை மீன்கள் மற்றும் ஆமைகளால் உணவெனத் தவறாகக் கருதப்பட்டு உட்கொள்ளப்படுவதால், கடல்சார் உணவுச் சங்கிலி கடுமையாகப் பாதிக்கப்படும் அபாயம் ஏற்பட்டுள்ளது.

குறித்த கள ஆய்வின் முடிவில், பிரதேச செயலகத்தின் முழுமையான ஒத்துழைப்புடன் தன்னார்வலர்கள் மற்றும் பாதுகாப்புப் பிரிவினரை ஒருங்கிணைத்து, கடற்கரைகளைச் சுத்தம் செய்யும் பணிகளை உடனடியாகத் தொடங்க தீர்மானிக்கப்பட்டது. மணலில் கலந்துள்ள இந்த நுண் நெகிழிகளை அகற்றுவது சவாலான காரியம் என்பதால், இதற்கென விசேட தொழில்நுட்ப முறைகளைக் கையாளவும் அதிகாரிகள் திட்டமிட்டுள்ளனர்.

கடல் வளத்தையும், கடற்கரை அழகையும் பாதுகாக்கும் நோக்கில் முன்னெடுக்கப்படும் இந்தத் தூய்மைப் பணியில் பொதுமக்களின் ஒத்துழைப்பும் எதிர்பார்க்கப்படுகிறது.

இன்று ஏப்ரல் 22, உலகம் முழுவதும் “உலக பூமி தினம்” (Earth Day) மிகவும் எழுச்சியுடன் அனுசரிக்கப்படுகிறது. மனிதகுலம் எதிர்கொண்டுள்ள சுற்றுச்சூழல் நெருக்கடிகளுக்கு மத்தியில், இயற்கையோடு இணைந்த ஒரு வாழ்வியலை மீட்டெடுக்கும் நோக்கில் இந்த ஆண்டு இத்தினம் முக்கியத்துவம் பெறுகிறது.

2026 ஆம் ஆண்டிற்கான உலகளாவிய தொனிப்பொருளாக “நமது சக்தி – நமது பூமி” (Our Power – Our Planet) என்பது பிரகடனப்படுத்தப்பட்டுள்ளது. பூமியின் வளங்களைச் சுரண்டுவதை விடுத்து, புதுப்பிக்கத்தக்க எரிசக்தி மற்றும் நிலையான வாழ்வாதாரங்கள் மூலம் பூமியைப் பாதுகாக்கும் அதிகாரத்தை மக்கள் கையில் எடுக்க வேண்டும் என்பதே இதன் மையக்கருத்தாகும்.

நாம் இன்று ஒரு இக்கட்டான காலகட்டத்தில் நின்றுகொண்டிருக்கிறோம். 2026 இல் சுற்றுச்சூழல் சவால்கள் முன்னெப்போதும் இல்லாத வகையில் தீவிரமடைந்துள்ளன:

• காலநிலை மாற்றம்: புவி வெப்பமடைதலால் ஏற்படும் எதிர்பாராத இயற்கைச் சீற்றங்கள்.
• பல்லுயிர் இழப்பு: அரிய வகை உயிரினங்கள் மற்றும் தாவரங்களின் அழிவு.
• சுற்றுச்சூழல் சிதைவு: தொழில்துறை கழிவுகள் குவிதல் மற்றும் திட்டமிடப்படாத காடழிப்பு நடவடிக்கைகள்.

இவை வெறும் செய்திகள் மட்டுமல்ல, மனித குலத்தின் உயிர்வாழ்விற்கான எச்சரிக்கை மணிகளாகும்.

உலக பூமி தினத்தின் வரலாறு 1970 ஆம் ஆண்டு அமெரிக்காவில் தொடங்கியது. அமெரிக்க செனட்டரும் சூழலியலாளருமான கேலார்ட் நெல்சன் என்பவரால் இந்த முன்னெடுப்பு முதன்முதலில் அறிமுகப்படுத்தப்பட்டது.

“ஐரோப்பிய நாடுகளின் அதிகப்படியான வள நுகர்வு காரணமாக ஏற்பட்ட காற்று மற்றும் நீர் மாசுபாட்டினால், மனித ஆரோக்கியத்திற்கு ஏற்பட்ட அச்சுறுத்தல்களைத் தவிர்க்க மக்கள் வீதியில் இறங்கிப் போராடியதன் விளைவே இத்தினம் உருவாகக் காரணமாக அமைந்தது.”

தற்போது, இந்த இயக்கம் உலகம் முழுவதும் பரவி, சுமார் 193 நாடுகளில் ஒரு பில்லியனுக்கும் அதிகமான மக்களின் பங்கேற்புடன் ஒரு பிரம்மாண்டமான மக்கள் இயக்கமாக உருவெடுத்துள்ளது.

ஐக்கிய நாடுகள் சபையின் அங்கீகாரம்

2009 ஆம் ஆண்டு ஐக்கிய நாடுகள் பொதுச் சபையினால் நிறைவேற்றப்பட்ட தீர்மானத்தின்படி, இத்தினம் உத்தியோகபூர்வமாக அங்கீகரிக்கப்பட்டது. பூமியில் உள்ள அனைத்து உயிரினங்களின் வாழ்வையும் உறுதி செய்யும் ஒரு அமைப்பாகப் பூமியைக் கருதுவதை (Mother Earth) இந்தத் தீர்மானம் நோக்கமாகக் கொண்டுள்ளது.

பூமி என்பது நாம் நமது முன்னோர்களிடமிருந்து பெற்ற சொத்து அல்ல, நமது வருங்கால சந்ததியினரிடமிருந்து நாம் வாங்கிய கடன். “நமது சக்தி – நமது பூமி” என்ற இந்த ஆண்டின் உறுதிமொழிக்கு இணங்க, பிளாஸ்டிக் பயன்பாட்டைக் குறைத்தல், மரங்களை நடுதல் மற்றும் இயற்கை வளங்களைச் சிக்கனமாகப் பயன்படுத்துதல் போன்ற சிறு மாற்றங்கள் மூலம் ஒரு பெரும் மாற்றத்தை உருவாக்குவோம்.

பூமியைப் பாதுகாப்போம்; வருங்காலத்தைக் காப்போம்!

ஏ.எஸ்.எம்.அர்ஹம்

சமூக மேம்பாடு மற்றும் மனிதாபிமானப் பணிகளில் தடம் பதித்து வரும் கல்முனை ரஹ்மத் பவுண்டேஷன், மாணவர்களின் நலன் கருதி மற்றுமொரு காத்திரமான செயற்திட்டத்தை முன்னெடுத்துள்ளது.

மாவடிப்பள்ளி அல்-அஷ்ரப் பாடசாலை மாணவர்களின் நீண்டகாலத் தேவையாக இருந்த, தொழுகைக்கான ‘வுழு’ செய்யும் நவீன நீர் தொகுதி இன்று (21.04.2026) உத்தியோகபூர்வமாகத் திறந்து வைக்கப்பட்டது.

பாடசாலையின் அதிபர் ரஜாப்தீன் அவர்களின் தலைமையில் நடைபெற்ற இந்நிகழ்வில், கல்முனை முன்னாள் மாநகர சபை பிரதி முதல்வரும், ஸ்ரீ லங்கா முஸ்லிம் காங்கிரஸின் பொருளாளரும், ரஹ்மத் பவுண்டேஷனின் ஸ்தாபகத் தலைவருமான ரஹ்மத் மன்சூர் அவர்கள் பிரதம அதிதியாகக் கலந்துகொண்டார். அவர் நாடாவினை வெட்டி, புதிய நீர் தொகுதியை மாணவர்களின் பயன்பாட்டிற்காகத் திறந்து வைத்தார்.

மாணவர்கள் தங்களது அன்றாடக் கல்வி நடவடிக்கைகளுடன், ஆன்மீகக் கடமைகளையும் தடையின்றி நிறைவேற்றும் வகையில் இந்த ‘வுழு’ செய்யும் வசதி வடிவமைக்கப்பட்டுள்ளது. இதன் முக்கிய அம்சங்களாக மாணவர்கள் சுத்தமான முறையில் வுழுச் செய்வதை உறுதிப்படுத்துவதன் மூலம் பாடசாலைச் சூழலில் சிறந்த சுகாதாரப் பழக்கவழக்கங்கள் ஊக்குவிக்கப்படுகின்றன.

பாடசாலைக் காலத்திலிருந்தே மாணவர்களிடையே ஒழுக்கம் மற்றும் ஆன்மீகப் பண்புகளை வளர்த்தெடுக்க இத்திட்டம் ஒரு பாலமாக அமையும். ஒரே நேரத்தில் பல மாணவர்கள் இலகுவாகப் பயன்படுத்தும் வகையில் இந்நீர் தொகுதி அமைக்கப்பட்டுள்ளது.

இந்நிகழ்வில் ஸ்ரீ லங்கா முஸ்லிம் காங்கிரஸின் காரைதீவு பிரதேச சபை உறுப்பினர் ரனீஸ், பாடசாலையின் ஆசிரியர்கள், மாணவர்கள், பெற்றோர்கள் மற்றும் ரஹ்மத் பவுண்டேஷனின் செயற்குழு உறுப்பினர்கள் எனப் பலரும் கலந்துகொண்டு சிறப்பித்தனர்.

கல்வியறிவு என்பது வெறும் புத்தகப் படிப்போடு நின்றுவிடாமல், சமூக அக்கறை மற்றும் ஒழுக்க விழுமியங்களுடன் ஒன்றிணைய வேண்டும் என்பதில் ரஹ்மத் பவுண்டேஷன் காட்டி வரும் அக்கறை பாராட்டுதலுக்குரியது. “சமூகத்தின் அடிப்படைத் தேவைகளை அறிந்து, அவற்றை உரிய நேரத்தில் நிறைவேற்றுவதே உண்மையான சமூகப் பணி” என்பதை ரஹ்மத் மன்சூர் தலைமையிலான இவ்அமைப்பு மீண்டும் ஒருமுறை நிரூபித்துள்ளது.

இத்தகைய மனிதாபிமான முயற்சிகள், எதிர்கால சந்ததியினரின் கல்வி மற்றும் சமூக முன்னேற்றத்திற்கு ஒரு பலமான அஸ்திவாரமாக அமையும் என்பதில் ஐயமில்லை.

எரிசக்தி அமைச்சின் வளாகத்தில் நடைபெற்ற உத்தியோகபூர்வ நிகழ்வின் போது புதிய எரிசக்தி அமைச்சர் தனது கடமைகளை பொறுப்பேற்றுக்கொண்டார். இந்நிகழ்வில் அமைச்சின் செயலாளர் எம்.ஆர்.டி. அபோன்சு உள்ளிட்ட முக்கிய அதிகாரிகள் மற்றும் அரசியல் பிரதிநிதிகள் கலந்துகொண்டனர்.

புதிய அமைச்சர் கடமைகளை பொறுப்பேற்கும் இந்த நிகழ்வில், எரிசக்தி பிரதி அமைச்சர் இலியாஸ் முஹம்மது அர்கம், துறைமுகங்கள் மற்றும் சிவில் விமானப் போக்குவரத்து பிரதி அமைச்சர் ஜனித ருவன் கொடித்துவக்கு மற்றும் முன்னாள் எரிசக்தி அமைச்சர் குமார ஜயகொடி ஆகியோர் கலந்து சிறப்பித்தனர்.

கடமைகளை பொறுப்பேற்றதை தொடர்ந்து, அமைச்சர் தனது அமைச்சின் கீழ் உள்ள பல்வேறு நிறுவனங்களின் தலைவர்களுடன் ஆரம்பகட்ட கலந்துரையாடல் ஒன்றிலும் ஈடுபட்டார்.

தற்போது நிலவும் மத்திய கிழக்கு போர் சூழலால் எரிசக்தி துறையில் ஏற்பட்டுள்ள உலகளாவிய நெருக்கடி நிலை குறித்து அமைச்சர் இதன்போது கருத்து தெரிவித்தார். இந்த சவாலான சூழ்நிலையை கையாள்வதற்கு முன்னாள் அமைச்சர், பிரதி அமைச்சர் மற்றும் அதிகாரிகள் ஏற்கனவே முறையான திட்டங்களை வகுத்துள்ளதாக அவர் சுட்டிக்காட்டினார். அந்தத் திட்டங்களை தொடர்ந்தும் முன்னெடுத்துச் செல்வதன் மூலம் மக்களின் தேவைகளை எவ்வித தடையுமின்றி பூர்த்தி செய்ய தான் அர்ப்பணிப்புடன் செயற்படவுள்ளதாக அமைச்சர் உறுதியளித்தார்.

எரிசக்தி விநியோகம் தொடர்பாக பொதுமக்கள் மத்தியில் வலுவான நம்பிக்கை இருக்க வேண்டியது அவசியம் என்று குறிப்பிட்ட அமைச்சர், இது தொடர்பான உண்மையான தகவல்களை சமூகத்திற்கு கொண்டு சேர்க்குமாறு ஊடகங்களிடம் கேட்டுக்கொண்டார். எரிசக்தி துறையின் உண்மை நிலையை மக்களுக்கு தெளிவுபடுத்துவதில் ஊடகங்களுக்கு பெரும் பொறுப்பு இருப்பதாகவும் அவர் மேலும் வலியுறுத்தினார்.

பல்கலைக்கழகப் பிரவேசத்துக்கான தகுதியைப் பெற்ற மாணவர்களின் வீதத்தில் வடக்கு மாகாணம் தேசிய ரீதியில் முதலிடத்தைப் பெற்று இம்முறை வரலாற்றுச் சாதனை படைத்துள்ளது. இதற்காக உழைத்த அனைவரையும் பாராட்டும் அதேவேளை, இந்த இடத்தை எமது மாகாணம் தொடர்ந்தும் தக்கவைத்துக்கொள்ள வேண்டும் என்ற பொறுப்பும், அடுத்த ஆண்டு இவ்வீதத்தை மேலும் அதிகரிக்க வேண்டிய கட்டாயமும் எமக்கு ஏற்பட்டுள்ளதை நாம் ஒவ்வொருவரும் மனதிலிருத்த வேண்டும் என வடக்கு மாகாண கௌரவ ஆளுநர் நா.வேதநாயகன் அவர்கள் தெரிவித்தார்.

கிளிநொச்சி, புளியம்பொக்கணை நாகதம்பிரான் ஆலயத்தின் ஏற்பாட்டில், 2025ஆம் ஆண்டு க.பொ.த. உயர்தரப் பரீட்சையில் சாதனை படைத்த மாணவர்களைக் கௌரவிக்கும் விசேட நிகழ்வு ஆலய முன்றலில் இன்று (21.04.2026) செவ்வாய்க்கிழமை நடைபெற்றது. இந்நிகழ்வில் பிரதம விருந்தினராகக் கலந்துகொண்டு சாதனை மாணவர்களைக் கௌரவித்த பின்னர் உரையாற்றுகையிலேயே கௌரவ ஆளுநர் மேற்கண்டவாறு தெரிவித்தார்.

அங்கு அவர் மேலும் உரையாற்றுகையில்,

சமூகப் பணிகளுக்காக நிதியுதவி கோரினால் பலரும் தயங்குவார்கள்;. ஆனால், ஆலயங்களுக்குத் தாராளமாக வழங்குவார்கள். எனவே, ஆலய நிர்வாகங்கள் அந்தப் பணத்தை வைத்துச் சிறந்த சமூகப் பணிகளை முன்னெடுக்க முடியும். அந்த வகையில், புளியம்பொக்கணை நாகதம்பிரான் ஆலயத்தினர் முன்னெடுத்துள்ள இந்த முயற்சி மிகவும் போற்றுதலுக்குரியது.

ஆலயங்கள் தொடர்பில் எனக்குக் கிடைக்கப்பெறும் சில முறைப்பாடுகள் கவலைக்குரியனவாக உள்ளன. பல கோடி ரூபாய்களைச் செலவிட்டு ஆலயங்களைப் புனரமைப்புச் செய்து, கும்பாபிஷேகமும் நடத்தி முடித்த பின்னர், அது தொடர்பான கணக்கறிக்கைகளை வெளியிடாத ஆலயங்கள் உள்ளன. இது குறித்து அண்மையில்கூட எனக்கு முறைப்பாடுகள் கிடைத்துள்ளன. சில இடங்களில் ஆலய நிர்வாகங்களுக்குள் முரண்பட்டு நீதிமன்றங்களில் வழக்குகளும் நடைபெறுகின்றன. வழக்குகளுக்காக செலவிடும் பணத்தை, ஆலயத்தின் பெயரால் ஏழை மக்களின் வாழ்வாதாரத்தை உயர்த்தப் பயன்படுத்தலாம்.

ஆனால், புளியம்பொக்கணை நாகதம்பிரான் ஆலயத்தினர் பொங்கல் நிகழ்வு முடிந்த கையோடு, தமது வருவாய் தொடர்பான முழுமையான விவரங்களை வெறும் மூன்று நாட்களுக்குள் பொதுவெளியில் சமர்ப்பித்திருந்தனர். இது ஏனைய ஆலயங்களுக்கு மிகச் சிறந்த முன்மாதிரியாகும். இவ்வாறான வெளிப்படைத்தன்மை ஊடாக அவர்கள் மீதான மதிப்பு மேலும் அதிகரிப்பதுடன், பலரும் அவர்களை நம்பி உதவ முன்வருவார்கள்.

சமூகம் வேறு, ஆலயம் வேறு அல்ல. சமூகத்துக்குச் செய்யும் தொண்டே கடவுளுக்குச் செய்யும் தொண்டாகும். சமூகத்தில் ஒருவன் பட்டினியாக இருக்கும்போது, ஆலயத்துக்கு ஆடம்பரமான கோபுரம் அவசியமில்லை. ஆலயத்தின் வரலாற்றை எதிர்காலத் தலைமுறைக்குக் கடத்துவதற்கு கோபுரங்கள் உள்ளிட்ட நிர்மாணப் பணிகள் அவசியம்தான்; ஆனால், சமூகத்தின் தேவைகளைப் பூர்த்தி செய்யாமல் அவற்றை முன்னெடுப்பதில் எவ்வித அர்த்தமும் இல்லை.

கல்வியால்தான் எதனையும் சாதிக்க முடியும்; சமூகத்தில் மிகப்பெரிய மாற்றத்தையும் புரட்சியையும் கல்வியால்தான் ஏற்படுத்த முடியும். இன்று க.பொ.த. உயர்தரப் பரீட்சையில் பௌதிக விஞ்ஞானப் பிரிவில் தேசிய ரீதியில் முதலிடத்தை இந்தக் கிளிநொச்சி மண்ணைச் சேர்ந்த மாணவன் தனதாக்கியுள்ளான்.

இந்தப் பிள்ளைகள் அனைவரும் 2009ஆம் ஆண்டு இறுதிப் போர்க் காலத்தில் சிறு குழந்தைகளாக இருந்திருப்பார்கள். அந்தப் போரின் கொடூரம் அவர்களுக்குத் தெரிந்திருக்க வாய்ப்பில்லை. ஆனால் அதன் வலியை அவர்கள் ஆழமாக உணர்ந்திருப்பார்கள். பல குடும்பங்கள் அந்தப் போரில் முற்றுமுழுதாக அழிக்கப்பட்டன. அப்படியானதொரு கொடிய துயரம் நிகழ்ந்து, அழித்தொழிக்கப்பட்ட இந்தக் கிளிநொச்சி மண்ணிலிருந்து, மிகக் குறுகிய காலத்துக்குள் தேசிய மட்டத்தில் ஒரு மாணவன் உச்சத்தைத் தொட்டிருப்பது எனக்கு மிகுந்த மகிழ்ச்சியளிக்கின்றது.

இந்த மாணவர்களின் விடாமுயற்சியே இன்று பெரும் வெற்றியாக மாறியிருக்கின்றது. ஒரு முயற்சி தோல்வியடைந்தால் நாம் வாழ்க்கையில் தோற்றுவிட்டோம் என அர்த்தமில்லை. நாம் எப்போது எமது முயற்சியைக் கைவிடுகின்றோமோ, அப்போதுதான் வாழ்க்கையில் தோற்றுப்போகின்றோம். இலட்சியத்துடன் உறுதியாகப் போராடினால் நினைத்ததை அடைய முடியும். இந்த மாணவர்கள் எதிர்காலத்தில் இந்த மண்ணுக்குச் சேவை செய்ய வேண்டும். தங்களைப் போன்று அடுத்த தலைமுறை மாணவர்களையும் சாதிக்கத் தூண்ட வேண்டும்.

யாழ்ப்பாணம் இந்துக் கல்லூரி அதிபர், தமது பாடசாலையில் கற்று வெளியேறிய பழைய மாணவர்களைப் பயன்படுத்தி அடுத்தாண்டு பரீட்சை எழுதும் மாணவர்களுக்கு வழிகாட்டல்களை வழங்குவதைப் போன்று, இந்தச் சாதனை மாணவர்களைப் பயன்படுத்தி எதிர்வரும் பரீட்சைகளுக்குத் தோற்றவுள்ள மாணவர்களுக்கு ஊக்கமளிக்கும் வேலைத்திட்டங்களை முன்னெடுக்கலாம். இவர்களைப் பார்க்கும்போது ஏனைய மாணவர்களுக்கும் நாமும் இவ்வாறு சாதிக்க வேண்டும் என்ற உந்துதல் ஏற்படும். வலயக் கல்விப் பணிப்பாளர்கள் இதனை முறையாக ஒழுங்கமைக்க வேண்டும்.

இறுதியாக, நீங்கள் வாழ்க்கையில் எவ்வளவு தூரம் சாதித்து உயர்ந்த நிலையை அடைந்தாலும், ஏனையோரை மதிக்கக் கற்றுக்கொள்ளுங்கள். அனைவரிடமும் பண்பாக நடந்துகொள்ளுங்கள். எத்தகைய சூழ்நிலை வந்தாலும் நேர்மையைக் கைவிடாதீர்கள். அதுவே உங்களை வாழ்வில் மேலும் உயர்த்தும், என்று தெரிவித்தார்.

இந்நிகழ்வில், க.பொ.த. உயர்தரப் பரீட்சையில் பௌதிக விஞ்ஞானப் பிரிவில் தேசிய மட்டத்தில் முதலிடம் பெற்ற மாணவன், மாவட்ட மட்டத்தில் ஒவ்வொரு துறைகளிலும் முதலிடம் பெற்ற மாணவர்கள் மற்றும் கண்டாவளைக் கோட்டத்தில் ஒவ்வொரு துறைகளிலும் முதலிடம் பெற்ற மாணவர்களுக்கு ஆலய நிர்வாகத்தினரால் பணப் பரிசுகள் வழங்கி கௌரவிக்கப்பட்டனர். அத்துடன், ஆலயத்தால் நடத்தப்படும் அறநெறிப் பாடசாலையில் பயிலும் மாணவர்களுக்கும் இதன்போது பரிசுகள் வழங்கப்பட்டன.

இவ்விழாவில் கௌரவ நாடாளுமன்ற உறுப்பினர் சி.சிறீதரன், கிளிநொச்சி மாவட்டச் செயலாளர் சு.முரளிதரன், கண்டாவளை பிரதேச செயலகப் பிரதித் திட்டமிடல் பணிப்பாளர், கரைச்சி பிரதேச சபையின் கௌரவ தவிசாளர் அ.வேளமாலிகிதன், வலயக் கல்விப் பணிப்பாளர்கள், முன்னாள் வலயக் கல்விப் பணிப்பாளர்கள், பாடசாலை அதிபர்கள், ஆசிரியர்கள், பெற்றோர்கள் மற்றும் பொதுமக்கள் எனப் பலரும் கலந்துகொண்டனர்.