பிவிதுரு ஹெல உறுமயவின் தலைவர் உதய கம்மன்பில எழுதிய ‘ஈஸ்டர் தாக்குதலின் சூத்திரதாரி’ நூல் வெளியீட்டு விழாவில் எதிர்க்கட்சித் தலைவர் சஜித் பிரேமதாச நேரில் கலந்துகொண்டார் என்பதை ஐக்கிய மக்கள் சக்தியின் பாராளுமன்ற உறுப்பினர் முஜிபுர் ரஹ்மான் இன்று (04) உறுதிப்படுத்தினார்.

சஜித் பிரேமதாச இந்த நிகழ்வில் பங்கேற்றது தொடர்பில் கடந்த சில நாட்களாக நிலவி வந்த சர்ச்சைகளுக்கு இதன் மூலம் முற்றுப்புள்ளி வைக்கப்பட்டுள்ளது.

உதய கம்மன்பிலவின் நூல் வெளியீட்டு விழாவில் எதிர்க்கட்சித் தலைவர் சஜித் பிரேமதாச கலந்துகொண்ட விவகாரம், குறிப்பாக ஐக்கிய மக்கள் சக்தியில் உள்ள முஸ்லிம் பாராளுமன்ற உறுப்பினர்கள் மற்றும் ஆதரவாளர்கள் மத்தியில் பலத்த விவாதங்களையும் சில அரசியல் சங்கடங்களையும் ஏற்படுத்தியுள்ளது.

ஈஸ்டர் தாக்குதல் தொடர்பான விசாரணைகளில் தற்போதைய மற்றும் முன்னாள் அரசாங்கங்களின் அணுகுமுறைகளை சஜித் பிரேமதாச தொடர்ந்து விமர்சித்து வருகிறார். இந்நிலையில், அதே ஈஸ்டர் தாக்குதல் தொடர்பில் சர்ச்சைக்குரிய கருத்துகளைக் கொண்ட உதய கம்மன்பில போன்ற ஒருவரின் நூல் வெளியீட்டில், அதுவும் ராஜபக்ஷக்களுடன் இணைந்து ஒரே மேடையில் அமர்ந்திருந்தது, அவரது அரசியல் நிலைப்பாடு குறித்த கேள்விகளை எழுப்பியுள்ளது. இது கட்சிக்குள்ளேயே சஜித்தின் முடிவெடுக்கும் திறன் குறித்த விமர்சனங்களை உருவாக்கியுள்ளது.

கொழும்பில் அண்மையில் நடைபெற்ற இந்த நூல் வெளியீட்டு விழாவில் சஜித் பிரேமதாச கலந்துகொண்ட காட்சிகள் ஊடகங்களில் வெளியாகியிருந்தன. எனினும், ஐக்கிய மக்கள் சக்தியின் சில பாராளுமன்ற உறுப்பினர்கள் இதனை மறுத்திருந்தனர். சஜித் பிரேமதாச அங்கு செல்லவில்லை என்றும், அவர் அங்கு இருப்பது போன்ற காட்சிகள் ‘செயற்கை நுண்ணறிவு’ (AI) தொழில்நுட்பத்தின் மூலம் போலியாக உருவாக்கப்பட்டவை என்றும் அவர்கள் வாதிட்டு வந்தனர்.

இந்த நிலையில் இன்று நடைபெற்ற ஊடகவியலாளர் சந்திப்பின் போது, இது குறித்து எழுப்பப்பட்ட கேள்விகளுக்கு முஜிபுர் ரஹ்மான் நேரடியாகப் பதிலளித்தார்.

• ஊடகவியலாளர்: “எதிர்க்கட்சித் தலைவர் ஏன் இடையில் எழுந்து சென்றார் என்று தெரியுமா? “முஜிபுர் ரஹ்மான்: “அதை அவரிடம்தான் கேட்க வேண்டும்.”
• ஊடகவியலாளர்: “உங்கள் கட்சியின் சில உறுப்பினர்கள் அது ‘AI’ மூலம் செய்யப்பட்டது என்கிறார்கள்.. அவர் கலந்துகொண்டதை நீங்கள் உறுதிப்படுத்துகிறீர்களா? “முஜிபுர் ரஹ்மான்: “ஆம், அவர் கலந்துகொண்டார் என்று பொதுச்செயலாளரே (ரஞ்சித் மத்தும பண்டார) ஏற்கனவே கூறிவிட்டாரே.”

எதிர்க்கட்சி தலைவர் தலைவர் ஏன் இவ்வாறானதொரு மேடையில் தோன்றினார் என்பதற்குத் தமது தொகுதி மக்களுக்குப் பதிலளிக்க வேண்டிய கட்டாயத்திற்கு எதிர்க்கட்சி முஸ்லீம் பாராளுமன்ற உறுப்பினர்கள் தள்ளப்பட்டுள்ளனர். முஜிபுர் ரஹ்மான் போன்றவர்கள் இதனை உறுதிப்படுத்தினாலும், ஆரம்பத்தில் இது ‘AI’ மூலம் செய்யப்பட்டது என கட்சியின் சில உறுப்பினர்கள் கூற முயன்றதே அந்த அச்சத்திற்கு பிரதான காரணமாக உருவெடுத்துள்ளது.

முஸ்லிம் மற்றும் கத்தோலிக்க சமூகங்கள் சஜித் பிரேமதாசவின் முக்கிய வாக்கு வங்கிகளாக உள்ள நிலையில், ஈஸ்டர் தாக்குதலின் ‘சூத்திரதாரி’ யார் என்பது குறித்த உதய கம்மன்பிலவின் பார்வையும், அந்த மேடையில் இருந்தவர்களின் அரசியல் வரலாறும் இச்சமூகங்களுக்கு உடன்பாடானவை அல்ல. எனவே, இந்த நிகழ்வு சிறுபான்மைச் சமூகங்களின் நம்பிக்கையைச் சிதைத்து, எதிர்வரும் தேர்தல்களில் அது வாக்குகளாக மாறுவதைத் தடுக்கும் ஒரு காரணியாக அமையலாம் என கட்சி உறுப்பினர்கள் அஞ்சுகின்றனர்.

உதய கம்மன்பிலவின் இந்த நூல் வெளியீட்டு விழா அரசியல் ரீதியாகப் பெரும் கவனத்தைப் பெற்றுள்ளது. இந்நிகழ்வில் சஜித் பிரேமதாசவுடன், முன்னாள் ஜனாதிபதிகளான மஹிந்த ராஜபக்ஷ, மைத்திரிபால சிறிசேன, கோட்டாபய ராஜபக்ஷ ஆகியோரும் ஒரே மேடையில் காணப்பட்டனர்.

இவர்களுடன் முன்னாள் பாதுகாப்புப் பிரிவு பிரதானிகள் மற்றும் அரசியல் விமர்சகர்கள் எனப் பல முக்கியஸ்தர்கள் கலந்துகொண்டிருந்தமை குறிப்பிடத்தக்கது. கட்சிக்குள் நிலவிய முரண்பட்ட கருத்துகளுக்கு மத்தியில், கட்சியின் சிரேஷ்ட உறுப்பினர் ஒருவரே இதனை உறுதிப்படுத்தியிருப்பது அரசியல் களத்தில் பேசுபொருளாகியுள்ளது.

நாட்டில் நிலவும் வறட்சியான வானிலை காரணமாக கொழும்பு மாவட்டத்தின் பல பகுதிகளில் முன்னெடுக்கப்படும் நீர்வெட்டு இன்றும் (04) தொடர்கிறது. 

நுகர்வோரின் கோரிக்கைகளைக் கருத்திற்கொண்டு, திட்டமிடப்பட்ட நீர் விநியோகத் தடையை 24 மணித்தியாலங்களில் இருந்து 18 மணித்தியாலங்களாகக் குறைக்க நடவடிக்கை எடுத்துள்ளதாக தேசிய நீர் வழங்கல் மற்றும் வடிகாலமைப்புச் சபை நேற்று (03) மாலை அறிவித்தது. 

அதன்படி, கால அட்டவணைக்கு அமைவாக எதிர்வரும் 10ஆம் திகதி வரை அந்தப் பகுதிகளில் அவ்வப்போது நீர் விநியோகம் மட்டுப்படுத்தப்படவுள்ளது. 

பாதுக்கை, ஹோமாகம, பெலன்வத்தை மற்றும் பன்னிப்பிட்டிய உள்ளிட்ட சில பகுதிகளில் இந்தத் திட்டமிடப்பட்ட நீர்வெட்டு அமுல்படுத்தப்படுவதாக தேசிய நீர் வழங்கல் மற்றும் வடிகாலமைப்புச் சபை தெரிவித்துள்ளது. 

இதற்கமைய முதற்கட்டத்தின் கீழ், பாதுக்கை பகுதியில் நேற்று முன்தினம் இரவு 8.00 மணி முதல் நேற்று பிற்பகல் 2.00 மணி வரை நீர்வெட்டு அமுல்படுத்தப்பட்டது. 

இதேவேளை, ஹோமாகம பகுதியில் நேற்று (03) இரவு 8.00 மணி முதல் இன்று (04) பிற்பகல் 2.00 மணி வரை 18 மணித்தியாலங்களுக்கு நீர் விநியோகம் நிறுத்தப்படும். 

பெலன்வத்தை பகுதியில் இன்று (04) இரவு 8.00 மணி முதல் நாளை அதாவது ஏப்ரல் 5ஆம் திகதி பிற்பகல் 2.00 மணி வரை நீர்வெட்டு அமுல்படுத்தத் தீர்மானிக்கப்பட்டுள்ளது. 

பாதுக்கை, ஹோமாகம மற்றும் பெலன்வத்தை ஆகிய பகுதிகளில் மூன்று நாட்களுக்கு ஒருமுறை இந்த நீர்வெட்டு மேற்கொள்ளப்படுவதாக தேசிய நீர் வழங்கல் மற்றும் வடிகாலமைப்புச் சபை குறிப்பிட்டுள்ளது. 

அத்துடன் பத்தரமுல்ல, பாமன்கடை, வெள்ளவத்தை மற்றும் நாவல ஆகிய பகுதிகளில் ஒரு நாள் விட்டு ஒரு நாள் இரவு 10.00 மணி முதல் அதிகாலை 1.00 மணி வரை 3 மணித்தியாலங்களுக்கு நீர் விநியோகம் நிறுத்தப்படும். 

எவ்வாறாயினும், நீர்வெட்டு அமுல்படுத்தப்படாத நாட்களில் தடையின்றி நீர் விநியோகத்தை வழங்க நடவடிக்கை எடுக்கப்பட்டுள்ளதாக தேசிய நீர் வழங்கல் மற்றும் வடிகாலமைப்புச் சபை மேலும் தெரிவித்துள்ளது.

நாடு முழுவதிலுமுள்ள அனைத்து அரச வைத்தியசாலைகளிலும் நாளை (04) காலை 08:00 மணி முதல் மீண்டும் வேலைநிறுத்தப் போராட்டமொன்று ஆரம்பிக்கப்படவுள்ளதாக அரச வைத்திய அதிகாரிகள் சங்கம் (GMOA) தெரிவித்துள்ளது. 

இந்தப் போராட்டம் தொடர்ச்சியாக முன்னெடுக்கப்படுமா? இல்லையா? என்பது குறித்து நாளை கூடவுள்ள மத்திய செயற்குழு கூட்டத்தில் தீர்மானிக்கப்படும் எனவும் அந்தச் சங்கம் மேலும் குறிப்பிட்டுள்ளது.

ஜூட் சமந்த

சிலாபம் – அம்பகந்தவிலவில் பாரிய சைபர் குற்றச்செயல் முறியடிப்பு: 150 வெளிநாட்டவர்கள் கைது

சிலாபம், அம்பகந்தவில பிரதேசத்தில் உள்ள சுற்றுலா விடுதி ஒன்றில் தங்கியிருந்த 150 வெளிநாட்டுப் பிரஜைகள், குற்றப் புலனாய்வுத் திணைக்களத்தின் (CID) கணினி குற்றப்பிரிவு அதிகாரிகளால் கைது செய்யப்பட்டுள்ளனர்.

கடந்த ஏப்ரல் மாதம் 2ஆம் திகதி இரவு முன்னெடுக்கப்பட்ட இந்த விசேட சுற்றிவளைப்பின் போது, பல்வேறு நாடுகளைச் சேர்ந்த ஆண்கள் மற்றும் பெண்கள் கைது செய்யப்பட்டுள்ளனர். அவர்களில் சீனர்கள்: 129 ஆண்கள் மற்றும் 06 பெண்கள், வியட்நாமியர்கள்: 10 ஆண்கள் மற்றும் 03 பெண்கள், தாய்வான்: ஒரு பெண், மலேசியா: ஓர் ஆண் அடங்குகின்றனர்.

கைது செய்யப்பட்டவர்களிடமிருந்து பெருமளவிலான மின்னணு சாதனங்களை அதிகாரிகள் கைப்பற்றியுள்ளனர். இதில் 99 டெஸ்க்டாப் கணினிகள், 26 மடிக்கணினிகள் (Laptops) மற்றும் 259 கையடக்கத் தொலைபேசிகள் உள்ளடங்குகின்றன.

குறித்த வெளிநாட்டவர்கள் சுமார் ஒரு மாதத்திற்கு முன்பே அம்பகந்தவில பகுதியில் உள்ள இந்த சுற்றுலா விடுதிக்கு வந்து தங்கியுள்ளமை தெரியவந்துள்ளது. பொலிஸ் புலனாய்வுப் பிரிவினருக்குக் கிடைத்த இரகசியத் தகவலையடுத்து, குற்றப் புலனாய்வுத் திணைக்களத்தின் கணினி பிரிவினர் இந்த சுற்றிவளைப்பை மேற்கொண்டனர்.

இவர்கள் தங்கியிருந்தவாறே கணினி ரீதியான குற்றச்செயல்களில் ஈடுபட்டிருக்கலாம் என பொலிஸார் பலமாக சந்தேகிக்கின்றனர். தற்போது கைது செய்யப்பட்டுள்ள அனைவரும் அந்த விடுதியிலேயே தடுத்து வைக்கப்பட்டு, மேலதிக விசாரணைகள் மேற்கொள்ளப்பட்டு வருகின்றது.

தற்போது நிலவும் கடும் வறட்சியான காலநிலை மற்றும் அதிகரித்துள்ள நீர் நுகர்வு காரணமாக, கொழும்பு மற்றும் அதனைச் சூழவுள்ள பகுதிகளுக்கு குடிநீர் வழங்கும் பிரதான நீர்த்தேக்கங்களின் நீர் மட்டம் அபாயகரமான நிலையை எட்டியுள்ளதாக தேசிய நீர் வழங்கல் மற்றும் வடிகாலமைப்புச் சபை எச்சரித்துள்ளது.

கொழும்பு நகருக்கு குடிநீர் வழங்கும் பிரதான நீர் சுத்திகரிப்பு நிலையங்களில் ஒன்றான கலடுவாவ நீர்த்தேக்கத்தில் இன்னும் 20 நாட்களுக்கு மாத்திரமே விநியோகிப்பதற்கான நீர் எஞ்சியுள்ளதாக சபையின் தலைவர் பொறியியலாளர் சந்தன பண்டார இன்று (02) தெரிவித்தார்.

இதேவேளை, லபுகம நீர் சுத்திகரிப்பு நிலையத்தில் இன்னும் 50 நாட்களுக்கு மாத்திரமே நீர் உள்ளதாகத் தெரிவிக்கப்பட்டுள்ளது.

வெப்பமான காலநிலையினால் பொதுமக்களின் நீர் நுகர்வு சடுதியாக அதிகரித்துள்ளது.

இதன் காரணமாக வரும் நாட்களில் குடிநீர் உற்பத்தியில் சில கட்டுப்பாடுகளை விதிக்க வேண்டிய நிலை ஏற்படும் என தலைவர் சுட்டிக்காட்டினார்.

இதனால் நிலவும் வறட்சியான சூழலைக் கருத்திற்கொண்டு, நுகர்வோர் குடிநீரை மிகவும் சிக்கனமாகப் பயன்படுத்துமாறு கேட்டுக்கொள்ளப்படுகிறார்கள்.

இதேவேளை நாட்டின் பல பகுதிகளில் இன்று முதல் எதிர்வரும் 10 ஆம் திகதி வரை நீர் விநியோகம் தடைப்படும் என நீர் வழங்கல் வடிகாலமைப்பு சபை தெரிவித்துள்ளது.

கொழும்பு பத்தரமுல்லை, பாமன்கடை, வெள்ளவத்தை, நாவல ஆகிய பகுதிகளில் இரவு 10 மணி தொடக்கம் அதிகாலை 1 மணி வரையான மூன்று மணி நேரத்திற்கு இந்த நீர் விநியோகத்தடை அமுல்ப்படுத்தப்படும்.

ஜூட் சமந்த

லயன்ஸ் மாவட்ட 306 D கிளையினால், சிலாபம் பொது வைத்தியசாலையின் பயன்பாட்டிற்காக சுமார் 10 இலட்சம் ரூபா பெறுமதியான கணினிகள் உள்ளிட்ட மருத்துவ உபகரணங்கள் அண்மையில் வழங்கி வைக்கப்பட்டன.

இந்த உபகரணங்களை லயன்ஸ் மாவட்ட 306 D இன் ஆளுநர் லயன் போஸ்கோ சில்வா, சிலாபம் பொது வைத்தியசாலையின் பணிப்பாளர் விசேட வைத்திய நிபுணர் சுமித் அத்தநாயக்கவிடம் உத்தியோகபூர்வமாக கையளித்தார்.

இந்த நற்பணி நிகழ்வில் சிலாபம் பொது வைத்தியசாலையின் பிரதிப் பணிப்பாளர் விசேட வைத்திய நிபுணர் தினேஷ் கொக்கல, சலாபுர லயன்ஸ் கிளப்பின் தலைவர் நிமல் ஜயசூரிய, ரோயல் லயன்ஸ் கிளப்பின் தலைவி சேதனா தமேல் உள்ளிட்ட முக்கியஸ்தர்கள் பலரும் கலந்துகொண்டனர்.

வைத்தியசாலையின் தேவைகளை நிவர்த்தி செய்யும் பொருட்டு லயன்ஸ் கழகத்தினால் முன்னெடுக்கப்பட்ட இந்தச் சமூக சேவைத் திட்டம் வைத்தியசாலை நிர்வாகத்தினால் பெரிதும் பாராட்டப்பட்டது.

ஜூட் சமந்த

இலங்கையிலுள்ள அரசு மருத்துவமனைகளில் ஒக்சிஜன் (Oxygen) பயன்பாடு தொடர்பான நாட்டின் முதலாவது தேசிய வழிகாட்டுதல் நிகழ்வு அண்மையில் கொப்பபிட்டி NH Collection ஹோட்டலில் நடைபெற்றது. சுகாதார மற்றும் ஊடகத்துறை அமைச்சர் வைத்தியர் நலிந்த ஜயதிஸ்ஸ அவர்களின் தலைமையில் இந்த நிகழ்வு இடம்பெற்றது.

இந்த வழிகாட்டுதல்கள் வெளியிடப்பட்டதைத் தொடர்ந்து, அரசு மருத்துவமனைகளில் ஒக்சிஜன் பயன்பாடு குறித்த தொடர்ச்சியான பயிற்சித் திட்டங்களும் ஆரம்பிக்கப்பட்டுள்ளன. முதற்கட்டமாக விசேட வைத்திய நிபுணர்கள் உட்பட நூறு சுகாதாரப் பணியாளர்களுக்குப் பயிற்சி அளிக்கப்படவுள்ளது. இவர்கள் மூலம் மாவட்ட மற்றும் மாகாண மட்டங்களில் உள்ள ஏனைய சுகாதாரப் பணியாளர்களுக்குப் பயிற்சிகளை வழங்க சுகாதார அமைச்சு திட்டமிட்டுள்ளது.

அரசு மருத்துவமனைகளில் சிகிச்சை சேவைகளின் போது ஒக்சிஜனைப் பயன்படுத்துவதற்குத் தேவையான அனைத்து முக்கிய விடயங்களையும் உள்ளடக்கி இந்த வழிகாட்டுதல்கள் தயாரிக்கப்பட்டுள்ளன. இதன் மூலம் நோயாளர் பராமரிப்புச் சேவைகளை நிர்வகிக்கும் வைத்தியப் பரிபாலகர்கள் மற்றும் விசேட வைத்திய நிபுணர்களிடையே தொழில்நுட்ப ரீதியிலான புரிதலை மேம்படுத்த முடியும் என எதிர்பார்க்கப்படுகிறது.

யுனிசெஃப் (UNICEF) அமைப்பின் ஒத்துழைப்புடன் சுகாதார அமைச்சு மேற்கொண்ட ஆய்வின் முடிவாக இந்த வழிகாட்டுதல்கள் உருவாக்கப்பட்டுள்ளன. அமைச்சின் மேலதிக செயலாளர் (வைத்திய சேவைகள்) விசேட வைத்தியர் குமார விக்ரமசிங்க தலைமையிலான குழுவினால் இது தொகுக்கப்பட்டுள்ளது.

நிகழ்வில் உரையாற்றிய அமைச்சர் நலிந்த ஜயதிஸ்ஸ, அரசு மருத்துவமனைகளில் ஒக்சிஜன் பயன்பாட்டிற்காக அரசாங்கம் ஆண்டுதோறும் பெருமளவு நிதியைச் செலவிடுவதைச் சுட்டிக்காட்டினார். இவ்வாறான வழிகாட்டுதல்கள் மற்றும் பயிற்சிகள் மூலம் முறையான மற்றும் உன்னதமான நோயாளர் பராமரிப்புச் சேவையை வழங்க முடிவதுடன், சுகாதாரப் பணியாளர்களின் தொழில்சார் அறிவையும் மேம்படுத்த முடியும் என அவர் தெரிவித்தார்.

மேலும், யுனிசெஃப் அமைப்பின் உதவியுடன் திஸ்ஸமஹாராம ஆதார வைத்தியசாலை, அவிசாவளை மாவட்ட பொது வைத்தியசாலை, உடுகம ஆதார வைத்தியசாலை மற்றும் கேகாலை மாவட்ட பொது வைத்தியசாலை ஆகியவற்றில் தற்போது ஒக்சிஜன் உற்பத்தி அலகுகள் நிறுவப்பட்டுள்ளன.

இதன் மூலம் அந்தந்த வைத்தியசாலைகளின் தேவைகளைப் பூர்த்தி செய்வதுடன், மாவட்டத்திலுள்ள ஏனைய வைத்தியசாலைகளின் மேலதிக ஒக்சிஜன் தேவைகளையும் பூர்த்தி செய்ய முடியும் என அமைச்சர் வலியுறுத்தினார்.

இந்த நிகழ்வில் யுனிசெஃப் அமைப்பின் இலங்கைக்கான வதிவிடப் பிரதிநிதி எம்மா பிரிகாம் (Ms Emma Brigham), அந்த அமைப்பின் சுகாதார மற்றும் ஊட்டச்சத்து மேலாளர் வைத்தியர் அப்னர் டேனியல் (Dr Abner Daniel), சுகாதார அமைச்சின் மேலதிக செயலாளர்கள், பணிப்பாளர்கள், வைத்தியசாலைப் பணிப்பாளர்கள் மற்றும் விசேட வைத்திய நிபுணர்கள் எனப் பலரும் கலந்துகொண்டனர்.