ஐக்கிய மக்கள் சக்தி , ஐக்கிய தேசியக் கட்சியுடன் மாத்திரமே இணைந்து செயற்படும் என அந்த கட்சியின் நாடாளுமன்ற உறுப்பினர் எஸ்.எம். மரிக்கார் தெரிவித்துள்ளார்.
பொதுக் கூட்டம் ஒன்றில் உரையாற்றிய அவர், இரு கட்சிகளுக்கும் இடையிலான உறவை ஒரு சுவாரஸ்யமான உதாரணத்தின் மூலம் பின்வருமாறு விளக்கினார்:
“நானும் ஒரு பெண்ணும் காதலிப்பதாக வைத்துக் கொள்வோம். தந்தை அதற்கு எதிர்ப்புத் தெரிவிக்கிறார். நாங்கள் வீட்டை விட்டு வெளியேறி திருமணம் செய்து கொள்கிறோம். பின்னர் தந்தை நோய்வாய்ப்படும்போது, அவரைப் பார்ப்பதற்காக எமது தாய் வீட்டிற்கு வருகிறோம். அங்கே எம்மால் தங்கியிருக்க முடியும் அல்லவா?” என அவர் கேள்வி எழுப்பினார். இதன் மூலம் ஐக்கிய தேசியக் கட்சியே தங்களின் ஆரம்ப வீடு என்பதை அவர் சுட்டிக்காட்டினார்.
வலதுசாரி அரசியல் கலாசாரத்தைக் கொண்ட ஐக்கிய மக்கள் சக்தி மீது எந்தவித ஊழல் குற்றச்சாட்டுகளும் இல்லை எனத் தெரிவித்த அவர், நாட்டை வங்குரோத்தடையச் செய்தவர்களுடன் ஒருபோதும் கூட்டணி அமைக்கப்போவதில்லை எனத் திட்டவட்டமாகக் கூறினார்.
“மஹிந்த ராஜபக்ச, கோட்டாபய ராஜபக்ச மற்றும் அஜித் நிவாட் கப்ரால் ஆகியோரே இலங்கையின் பொருளாதார வீழ்ச்சிக்குக் காரணம் என நீதிமன்றம் தீர்ப்பளித்துள்ளது. இவ்வாறான நிலையில், அவர்களுடன் எம்மால் எவ்வாறு கூட்டணி அமைக்க முடியும்?”
நாட்டைப் பொருளாதார ரீதியாகப் பாதிப்புக்குள்ளாக்கிய தரப்பினரைத் தவிர்த்து, தமது அரசியல் கொள்கையுடன் ஒத்துப்போகும் தரப்புடன் மாத்திரமே இணைந்து பயணிக்கத் தீர்மானித்துள்ளதாக அவர் மேலும் விளக்கமளித்தார்.
வடக்கு, கிழக்கு, வடமத்திய, மத்திய மற்றும் சப்ரகமுவ மாகாணங்களிலும் புத்தளம், காலி மற்றும் மாத்தறை மாவட்டங்களிலும் பிற்பகல் 2.00 மணிக்குப் பின்னர் ஆங்காங்கே மழையோ அல்லது இடியுடன் கூடிய மழையோ பெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.
மேல் மாகாணத்திலும் புத்தளம் மற்றும் யாழ்ப்பாணம் மாவட்டங்களின் கடலோரப் பகுதிகளிலும் காலை வேளையில் மழை பெய்ய வாய்ப்புள்ளதாக அந்த திணைக்களம் குறிப்பிட்டுள்ளது.
மத்திய, சப்ரகமுவ மற்றும் ஊவா மாகாணங்களிலும் அம்பாறை மாவட்டத்தின் சில இடங்களிலும் அதிகாலை வேளையில் பனிமூட்டமான நிலை காணப்படலாம்.
இடியுடன் கூடிய மழையின் போது தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளைக் குறைத்துக்கொள்ளத் தேவையான முன்னெச்சரிக்கை நடவடிக்கைகளை மேற்கொள்ளுமாறு பொதுமக்கள் கேட்டுக்கொள்ளப்படுகிறார்கள்.
இதேவேளை சூரியனின் வடதிசை நோக்கிய நகர்வின் காரணமாக, ஏப்ரல் மாதம் 05 ஆம் திகதி முதல் எதிர்வரும் 15 ஆம் திகதி வரை இலங்கைக்கு நேர் உச்சியில் சூரியன் நிலைபெறுகின்றது.
அதன்படி, இன்று (06) நண்பகல் 12:13 மணியளவில் பேருவளை, குருலுபெத்த, ரக்வானை, கொடகவெலை, உடவலவை மற்றும் தனமல்வில ஆகிய பிரதேசங்களுக்கு மேலாக சூரியன் உச்சம் கொடுக்கும் என அறிவிக்கப்பட்டுள்ளது.
அதிக வெப்பமான காலநிலை என்பதால் பொதுமக்கள் மிகுந்த அவதானத்துடன் இருப்பதோடு, அதிகளவில் நீரை அருந்துவது உள்ளிட்ட சுகாதார வழிகாட்டல்களை பின்பற்றுமாறு அறிவுறுத்தப்பட்டுள்ளனர்.
புத்தளம் மாவட்டத்தில் உள்ள வரலாற்றுச் சிறப்புமிக்க மகாவெவ குளத்தில், உள்நாட்டு மற்றும் வெளிநாட்டு சுற்றுலாப் பயணிகள் படகு சவாரி செய்வதற்கான புதிய வசதி நேற்று (05) மாலை உத்தியோகபூர்வமாக ஆரம்பித்து வைக்கப்பட்டது.
இந்த ஆரம்ப விழாவில் புத்தளம் மாவட்ட பாராளுமன்ற உறுப்பினர் கயான் ஜானக மற்றும் நாத்தாண்டியா பிரதேச சபையின் தலைவர் சாகர விஜேசேகர உள்ளிட்ட முக்கிய பிரமுகர்கள் கலந்து கொண்டனர். நாத்தாண்டியா பிரதேச சபை, மகாவெவ பிரதேச செயலகம் மற்றும் மகாவெவ உற்பத்தி சங்கம் ஆகியவை ஒன்றிணைந்து இந்த சுற்றுலா மேம்பாட்டுத் திட்டத்தை முன்னெடுத்துள்ளன.
சிலாபம் – கொழும்பு பிரதான வீதிக்கு அருகில் அமைந்துள்ள மகாவெவ குளம், ‘தனியவல்லப’ மன்னனால் நிர்மாணிக்கப்பட்டதாகக் கூறப்படுகிறது. சுமார் 169 ஏக்கர் பரப்பளவைக் கொண்ட இந்தக் குளம், காலங்காலமாக விவசாய நடவடிக்கைகளுக்கும் நன்னீர் மீன்பிடித் தொழிலுக்கும் வாழ்வாதாரமாக இருந்து வருகிறது.
கடந்த காலங்களில் ‘ஜப்பான் ஜபர’ உள்ளிட்ட தேவையற்ற நீர்த் தாவரங்களால் சூழப்பட்டிருந்த இந்தக் குளம், சமீபத்தில் பிரதேச மக்களின் பெரும் முயற்சியால் முழுமையாக சுத்திகரிக்கப்பட்டது. இதனைத் தொடர்ந்து, குளத்தை மையமாகக் கொண்ட ஒரு சுற்றுலாத் திட்டத்தை முன்னெடுக்க மகாவெவ பிரதேச செயலகம் நடவடிக்கை எடுத்தது.
இந்தத் திட்டத்தின் கீழ், பயணிகள் தனித்தனியாகவோ அல்லது குழுக்களாகவோ படகு சவாரி செய்ய வசதிகள் செய்யப்பட்டுள்ளன. தற்போது நாத்தாண்டியா பிரதேச சபையின் நேரடிப் மேற்பார்வை மற்றும் நிர்வாகத்தின் கீழ் இயங்கும் இப்படகு சேவையை, எதிர்காலத்தில் வெளிநாட்டு சுற்றுலாப் பயணிகளை கவரும் வகையில் மேலும் விரிவுபடுத்த திட்டமிடப்பட்டுள்ளதாக அமைப்பாளர்கள் தெரிவித்தனர்.
புதிய சுற்றுலா படகுச் சேவையின் ஆரம்பத்தை முன்னிட்டு, அப்பகுதி மீனவர்களுக்கு இடையிலான பாரம்பரிய ‘தெப்பம்’ வலிக்கும் போட்டியும் ஏற்பாடு செய்யப்பட்டிருந்தது.
இந்த புதிய முயற்சியானது பிரதேசத்தின் பொருளாதார வளர்ச்சிக்கும் சுற்றுலாத் துறையின் முன்னேற்றத்திற்கும் பெரும் பங்களிப்பை வழங்கும் என எதிர்பார்க்கப்படுகிறது.
ஈரான் மற்றும் அமெரிக்கா இடையே போர் மேகங்கள் சூழ்ந்துள்ள நிலையில், அமெரிக்காவிற்கு ஈரான் ராணுவ அதிகாரி பெரிய அதிர்ச்சி காத்திருப்பதாக பகிரங்க எச்சரிக்கை விடுத்துள்ளார். இதனால் மத்திய கிழக்கில் போர் பதற்றம் அதிகரித்துள்ளது. மத்திய கிழக்கு நாடுகளில் நிலவி வரும் போர் பதற்றம் தற்போது உலகப்போருக்கான சூழலை உருவாக்கியுள்ளது.
கடந்த பிப்ரவரி மாதம் 28ம் தேதி தொடங்கிய இந்த மோதலில், இதுவரை 2,000க்கும் மேற்பட்டோர் உயிரிழந்துள்ளதாக ஈரான் சுகாதார அமைச்சகம் தெரிவித்துள்ளது. போர் தொடங்கி 6 வாரங்கள் ஆகும் நிலையில், தற்போது தாக்குதல்கள் தீவிரமடைந்துள்ளன. கடந்த மார்ச் 26ம் தேதியன்று ஈரான் நாட்டின் எரிசக்தி உள்கட்டமைப்புகள் மீது நடத்தப்பட இருந்த தாக்குதல்களை, ஏப்ரல் 6ம் தேதி திங்கட்கிழமை வரை (நாளை) நிறுத்தி வைப்பதாக டொனால்ட் டிரம்ப் அறிவித்திருந்தார்.
ஈரான் அரசின் வேண்டுகோளை ஏற்று, அமைதி பேச்சுவார்த்தையில் முன்னேற்றம் ஏற்பட்டுள்ளதால் இந்த கால அவகாசம் வழங்கப்படுவதாக அப்போது அவர் கூறியிருந்தார். இதற்காக 10 நாட்கள் அவகாசம் அளிக்கப்பட்டிருந்தது.
இதற்கிடையே கடந்த 3 மற்றும் 4ம் தேதிகளில் பாரசீக வளைகுடா பகுதியில் பறந்த அமெரிக்காவின் எப்-15 ஸ்டிரைக் ஈகிள் மற்றும் ஏ-10 தண்டர்போல்ட் ஆகிய 2 போர் விமானங்களை சுட்டு வீழ்த்தியதாக ஈரான் அதிரடியாக அறிவித்தது. இதற்கு பதிலடியாக அமெரிக்கா மற்றும் இஸ்ரேல் நாடுகள் ஈரானின் புஷெர் அணு உலை, எஃகு உற்பத்தி ஆலை மற்றும் முக்கிய பாலங்களை குறிவைத்து வான்வழித் தாக்குதல் நடத்தின.
குறிப்பாக காரஜ் பகுதியில் உள்ள பி1 பாலத்தை அமெரிக்கா தகர்த்தது. இதனால் ஆத்திரமடைந்த ஈரான், குவைத்தில் உள்ள எண்ணெய் சுத்திகரிப்பு ஆலை மற்றும் குடிநீர் சுத்திகரிப்பு நிலையம் மீதும், ஐக்கிய அரபு அமீரகத்தின் எரிசக்தி மையங்கள் மீதும் ஏவுகணை தாக்குதல் நடத்தியது. இந்த இக்கட்டான சூழலில், ேநற்று அமெரிக்க அதிபர் டிரம்ப், ஈரானுக்கு 48 மணி நேர அதிரடி கெடு விதித்தார். அதில், ‘ஹார்முஸ் நீர்சந்தியை மீண்டும் திறக்க ஈரான் உடன்பட வேண்டும், இல்லையெனில் நரகத்தை சந்திக்க நேரிடும்’ என்று எச்சரித்தார்.
அமெரிக்க நேரப்படி சனிக்கிழமை பிற்பகல் விதிக்கப்பட்ட இந்த கெடுவானது, இலங்கை நேரப்படி நாளை (திங்கட்கிழமை) அதிகாலை 3.30 மணி அளவில் முடிவுக்கு வருகிறது.
இந்த காலக்கெடுவுக்குள் ஈரான் பணியவில்லை என்றால் அமெரிக்கா மிகப்பெரிய அளவில் தாக்குதலை நடத்த திட்டமிட்டுள்ளது. இந்த சூழலில், ஈரானின் பார்ஸ் செய்தி நிறுவனத்திடம் பேசிய அந்நாட்டு பாதுகாப்பு அதிகாரி, ‘தெற்கு ஈரான் பகுதியில் அமெரிக்கா மற்றும் இஸ்ரேல் மேற்கொண்டு வரும் நடவடிக்கைகள், அவர்களுக்கு சாதகமாக அமையாது.
அமெரிக்க ராணுவம் வைத்துள்ள இலக்குகள் அனைத்தும் அர்த்தமற்றவை. பாலம் மற்றும் மின் நிலையங்களை தகர்ப்போம் என்ற அதிபர் டிரம்ப் விடுத்த மிரட்டல், அமெரிக்காவின் விரக்தியையே காட்டுகிறது. எங்களது அடுத்தகட்ட நடவடிக்கை அமெரிக்காவிற்கு மிகப் பெரிய அதிர்ச்சியாக அமையும். அமெரிக்கா மற்றும் இஸ்ரேலுக்கு பதிலடி கொடுக்க வளைகுடா நாடுகள் மற்றும் ஜோர்டானில் உள்ள 8 முக்கிய பாலங்களின் பட்டியலை தயார் செய்துள்ளோம். இதில் சவுதி அரேபியா – பஹ்ரைனை இணைக்கும் கிங் ஃபஹத் பாலம் மற்றும் குவைத்தின் ஷேக் ஜாபர் அல்-அகமது அல்-சபா பாலம் ஆகியவையும் அடங்கும்’ என்று அவர் கூறினார்.
ஹார்முஸ் நீர்சந்தி முடக்கப்பட்டதால் சர்வதேச சந்தையில் கச்சா எண்ணெய் மற்றும் எரிவாயு விலை வரலாறு காணாத அளவில் உயர்ந்துள்ளது. ஈரானுடன் சீனா உள்ளிட்ட சில நாடுகள் டிஜிட்டல் கரன்சி மூலம் வர்த்தகம் செய்ய முயன்றாலும், அந்த ஜலசந்தியை ராணுவ ரீதியாக திறக்க அமெரிக்கா தலைமையிலான 35 நாடுகள் ஐக்கிய நாடுகள் சபையில் தீர்மானம் கொண்டு வர தீவிர முயற்சி எடுத்து வருகின்றன. டிரம்ப் விதித்த கெடு நாளை அதிகாலை முடிய உள்ள நிலையில், ஈரான் தரப்பில் கூறப்படும் பெரிய அதிர்ச்சி என்னவாக இருக்கும் என்ற அச்சம் உலக நாடுகளிடையே பெரும் கலக்கத்தை ஏற்படுத்தியுள்ளது.
டிரம்பின் பைத்தியக்காரத்தனத்தை எவராலும் தடுக்க முடியாதா?
மத்திய கிழக்கு பிராந்தியத்தில் ஏற்பட்டுள்ள போர் பதற்றம் குறித்து சர்வதேச அணுசக்தி முகமையின் முன்னாள் இயக்குநரான முகமது எல்பாரடே தனது எக்ஸ் சமூக வலைதள பக்கத்தில் அரபு மொழியில், ‘இந்த பைத்தியக்காரர் (டிரம்ப்) இப்பகுதியை நெருப்புப் பந்தாக மாற்றுவதற்கு முன்பாக, உங்களால் முடிந்த அனைத்தையும் செய்து போரைத் தடுத்து நிறுத்துங்கள்’ என்று வளைகுடா நாட்டுத் தலைவர்களிடம் அவர் உருக்கமாக கேட்டுக்கொண்டுள்ளார். மேலும், உலக நாடுகளின் அமைப்பிற்கு அவர் விடுத்துள்ள மற்றொரு செய்தியில், ‘இந்த பைத்தியக்காரத்தனத்தை நிறுத்த யாராலும் ஒன்றும் செய்ய முடியாதா?’ என்று கேள்வி எழுப்பியுள்ளார்.
ஈரான் ராணுவ தளபதிகள் பலி;
மத்திய கிழக்கு நாடுகளில் போர் பதற்றம் உச்சத்தை எட்டியுள்ள நிலையில், அமெரிக்க அதிபர் டிரம்ப் தனது சமூக வலைதள பக்கத்தில் இன்று முக்கிய தகவலை வெளியிட்டுள்ளார். அதில், ஈரான் தலைநகர் டெஹ்ரான் மீது அமெரிக்கா நடத்திய பிரம்மாண்ட வான்வழித் தாக்குதலில், அந்நாட்டு ராணுவத்தின் முக்கிய தளபதிகள் பலர் கொல்லப்பட்டதாக அவர் குறிப்பிட்டுள்ளார்.
இது தொடர்பாக அவர் வெளியிட்டுள்ள வீடியோவில், இருள் சூழ்ந்த பகுதியில் போர் விமானங்கள் பறக்கும் சத்தமும், மிகப்பெரிய குண்டுகள் வெடிக்கும் சத்தமும் பதிவாகியுள்ளது. இதுகுறித்து அதிபர் டிரம்ப் தனது பதிவில், ‘ஈரான் நாட்டை தவறான பாதையில் வழிநடத்திச் சென்ற அந்த நாட்டு ராணுவத் தலைவர்கள் பலர், டெஹ்ரான் மீது நடத்தப்பட்ட இந்த பிரம்மாண்ட தாக்குதலில் அதிரடியாக கொல்லப்பட்டனர். அவர்களுடன் சேர்த்து இன்னும் பல முக்கிய இலக்குகளும் இந்த தாக்குதலில் அழிக்கப்பட்டுள்ளன’ என்று தெரிவித்துள்ளார். எனினும், இந்த தாக்குதலின் தொழில்நுட்ப விவரங்கள் குறித்தோ அல்லது பலியானவர்களின் எண்ணிக்கை குறித்தோ அமெரிக்க தரப்பில் விரிவான விளக்கம் இன்னும் அளிக்கப்படவில்லை.
கற்பிட்டி, தேத்தாவாடி மீனவ கிராமத்தில் நீண்டகாலமாக நிலவி வந்த பொதுப்பாதை ஆக்கிரமிப்புப் பிரச்சினைக்கு, கற்பிட்டி பிரதேச சபைத் தவிசாளர் ஏ.எஸ்.எம். றிகாஸ் அவர்களின் நேரடித் தலையீட்டின் மூலம் சுமூகமான ஒரு தீர்வு எட்டப்பட்டுள்ளது.
தேத்தாவாடி பகுதி மீனவர்கள் மற்றும் பொதுமக்கள் பல தசாப்தங்களாகப் பயன்படுத்தி வந்த பாதையை, அப்பகுதியில் உள்ள சுற்றுலா ஹோட்டல் உரிமையாளர் ஒருவர் ஆக்கிரமிக்க முயன்றதாகக் குற்றச்சாட்டுக்கள் எழுந்தன. இதனால் மீனவர்களின் வாழ்வாதாரப் போக்குவரத்து மற்றும் பொதுமக்களின் நடமாட்டம் பாதிக்கப்படும் நிலை உருவானது.
பிரதேச சபையின் உறுப்பினர் ஏ.ஆர்.எம். முஸம்மில் விடுத்த வேண்டுகோளுக்கிணங்க, தவிசாளர் ஏ.எஸ்.எம். றிகாஸ், பிரதித் தவிசாளர் சமன் குமார மற்றும் குழுவினர் தேத்தாவாடி கிராமத்திற்குச் நேரடி விஜயம் ஒன்றை மேற்கொண்டனர்.
அங்கு நிலவிய சூழலை நேரில் ஆராய்ந்த தவிசாளர், அதிரடியாக தனது முடிவுகளை அறிவித்தார்.
பொதுமக்களின் பயன்பாட்டிலுள்ள பாதையை எந்தவொரு தனியார் நிறுவனமோ அல்லது சுற்றுலா விடுதியோ ஆக்கிரமிக்க முடியாது என திட்டவட்டமாகத் தெரிவித்தார்.
மேலும் சம்பந்தப்பட்ட சுற்றுலா விடுதியின் பொறுப்பதிகாரியை நேரில் அழைத்து எச்சரித்த தவிசாளர், மீனவர்களின் போக்குவரத்திற்கு எவ்வித இடையூறும் விளைவிக்கக் கூடாது என கடும் உத்தரவு பிறப்பித்தார்.
பொதுமக்கள் மற்றும் கடற்தொழிலாளர்கள் எவ்வித தடையுமின்றிச் சுதந்திரமாகப் பாதையைப் பயன்படுத்துவதற்கு முழு உரிமை உண்டு என்பதை அங்கு கூடியிருந்த மக்கள் மத்தியில் அவர் தெளிவுபடுத்தினார்
இப்பிரச்சினைக்கு நிரந்தரத் தீர்வு காணும் நோக்கில், தவிசாளர் உடனடியாக நாரா (NARA) நிறுவனத்துடன் தொலைபேசி வாயிலாகத் தொடர்பு கொண்டார். கடலிலிருந்து 10 மீட்டர் வரையான சட்டரீதியான கடல் எல்லையை முறைப்படி அளவீடு செய்து, அந்த எல்லையை உறுதிப்படுத்தும் வகையில் எல்லைக் கூஞ்சிகளை (Boundary Pillars) நாட்டுமாறு அவர் வேண்டுகோள் விடுத்தார்.
தற்போதைய தவிசாளரின் இந்த துரித நடவடிக்கையினால் மீனவ சமூகத்தின் நீண்டகாலப் கவலை நீங்கியுள்ளதுடன் மக்கள் பிரதிநிதிகளின் இந்த அதிரடித் தலையீட்டை தேத்தாவாடி கிராம மக்கள் வெகுவாகப் பாராட்டியுள்ளனர்.
உள்ளகப் பயிற்சியைப் பூர்த்தி செய்த வைத்தியர்களுக்குப் நியமனங்கள் வழங்கும் முறைமைக்கு எதிராக அரச மருத்துவ அதிகாரிகள் சங்கம் (GMOA) முன்னெடுத்துள்ள பணிப்பகிஷ்கரிப்புப் போராட்டமானது, எவ்விதமான கலந்துரையாடல்களுக்கும் அடிப்படையற்ற ஒரு செயலாகும் எனச் சுகாதார அமைச்சர் நலிந்த ஜயதிஸ்ஸ தெரிவித்துள்ளார்.
நேற்று (04) இடம்பெற்ற ஊடக சந்திப்பொன்றில், GMOA முன்னெடுத்துள்ள தொழிற்சங்க நடவடிக்கை குறித்துக் கருத்துத் தெரிவிக்கையிலேயே அமைச்சர் இவ்வாறு குறிப்பிட்டார்.
இந்த விவகாரம் தொடர்பில் அவர் மேலும் தெரிவித்ததாவது:
“நியாயமான காரணங்களின் அடிப்படையில் பணிப்பகிஷ்கரிப்பு முன்னெடுக்கப்பட்டால், அது குறித்து எம்மால் கலந்துரையாட முடியும். ஆனால், தற்போது முன்னெடுக்கப்பட்டுள்ள இந்தப் போராட்டமானது எவ்வித அடிப்படையுமற்றது. இது குறித்துப் பேசுவதற்குக்கூட ஒன்றுமில்லை” என அமைச்சர் சுட்டிக்காட்டினார்.
அமைச்சருடன் உள்ள தனிப்பட்ட மோதல்களுக்காக நோயாளிகளின் உயிர்களைப் பணையம் வைக்க வேண்டாம் என அவர் கேட்டுக்கொண்டார். “என்னுடன் உங்களுக்கு ஏதேனும் பிரச்சினை இருந்தால் எனக்குச் சவால் விடுங்கள். அதை விடுத்து, நோயாளிகளின் உயிர்களைப் பணையக் கைதிகளாக ஆக்கி அவர்களை இந்தப் பிரச்சினைகளுக்குள் இழுக்க வேண்டாம். அமைச்சருடன் இருக்கும் பிரச்சினைகளைப் பொதுமக்கள் மீது திணிக்க வேண்டாம்” என அவர் வலியுறுத்தினார்.
உள்ளகப் பயிற்சி நியமனங்கள் வழங்கும் முறைமை சட்டவிரோதமானது என GMOA கருதினால், அதற்கு எதிராக நீதிமன்றத்திற்குச் செல்லுமாறு அமைச்சர் அவர்களுக்குச் சவால் விடுத்தார். “நீங்கள் நீதிமன்றத்திற்குச் சென்றால், ஒரு பக்கத்தில் நானும் மறுபக்கத்தில் உங்கள் குழுவினரும் இருந்து சட்ட ரீதியாக இப்பிரச்சினைக்குத் தீர்வு காண முடியும்” என அவர் மேலும் குறிப்பிட்டார்.
தன்னுடன் உள்ள முரண்பாடுகளைத் தீர்க்கச் சட்ட ரீதியான வழிகளைப் பின்பற்றுமாறு வலியுறுத்திய அமைச்சர், பொதுமக்களின் சுகாதார சேவையைப் பாதிக்கச் செய்யும் நடவடிக்கைகளைக் கைவிடுமாறு கேட்டுக்கொண்டார்.
ஆரச்சிகட்டுவ பல்வேறு சேவை கூட்டுறவுச் சங்கத்திற்குச் சொந்தமான முக்கிய ஆவணங்களைத் திருடியதாகக் குற்றஞ்சாட்டப்பட்ட அந்தச் சங்கத்தின் பொது முகாமையாளரை எதிர்வரும் ஏப்ரல் மாதம் 09 ஆம் திகதி வரை விளக்கமறியலில் வைக்க சிலாபம் நீதவான் கடந்த 4 ஆம் திகதி உத்தரவிட்டுள்ளார்.
மாதம்பே – புதிய நகர் பகுதியைச் சேர்ந்த ஒருவரே இவ்வாறு கைது செய்யப்பட்டு விளக்கமறியலில் வைக்கப்பட்டுள்ளார்.
குறித்த நபர் கடந்த 3 ஆம் திகதி கூட்டுறவுச் சங்கத்திற்குச் சொந்தமான நான்கு லெட்ஜர் (Ledger) புத்தகங்களை எடுத்துச் சென்றுள்ளதாகச் சங்கத்தின் தலைவர் துமிந்த தர்மவன்ச சுபசிங்க ஆரச்சிகட்டுவ காவல்துறையில் முறைப்பாடு செய்திருந்தார்.
தலைவரின் முறைப்பாட்டின் அடிப்படையில் உடனடியாகச் செயற்பட்ட காவல்துறையினர், சந்தேகநபரைக் கைது செய்ததுடன் அவரிடமிருந்த நான்கு லெட்ஜர் புத்தகங்களையும் மீட்டுள்ளனர். சந்தேகநபர் கடந்த 4 ஆம் திகதி சிலாபம் நீதவான் முன்னிலையில் ஆஜர்படுத்தப்பட்ட போதே அவரைத் தொடர்ந்து விளக்கமறியலில் வைக்க உத்தரவிடப்பட்டது.
குறித்த கூட்டுறவுச் சங்கத்தின் கடந்த கால நிர்வாகத்தின் போது பல நிதி மோசடிகள் இடம்பெற்றுள்ளதாகப் பல முறைப்பாடுகள் கிடைத்துள்ளன. இது தொடர்பாகச் சிலாபம் உதவி கூட்டுறவு ஆணையாளர் அலுவலகத்தினால் தற்போது விசேட விசாரணைகள் முன்னெடுக்கப்பட்டு வரும் நிலையிலேயே, இந்த ஆவணத் திருட்டுச் சம்பவம் இடம்பெற்றுள்ளது குறிப்பிடத்தக்கது.
சிலாபத்தில் சுற்றுலா விடுதி ஒன்றில் தங்கியிருந்து இணையதளம் ஊடாக நிதி மோசடிகளில் ஈடுபட்டு வந்ததாகக் கருதப்படும் 152 வெளிநாட்டவர்களை ஏப்ரல் மாதம் 09 ஆம் திகதி வரை விளக்கமறியலில் வைக்குமாறு சிலாபம் நீதவான் மற்றும் மேலதிக மாவட்ட நீதிபதி எஸ்.டி. அபேரத்ன கடந்த 3 ஆம் திகதி உத்தரவிட்டார்.
கைது செய்யப்பட்டவர்களில் 137 பேர் சீன நாட்டவர்கள் ஆவர். ஏனையவர்கள் வியட்நாம், தாய்லாந்து மற்றும் மலேசியா ஆகிய நாடுகளைச் சேர்ந்த ஆண்கள் மற்றும் பெண்கள் எனத் தெரிவிக்கப்பட்டுள்ளது. இவர்களிடமிருந்து 177 கணினிகள், 577 கையடக்கத் தொலைபேசிகள் மற்றும் பல்வேறு மின்னணு உபகரணங்களை சோதனையிட்ட அதிகாரிகள் கைப்பற்றியுள்ளனர்.
சிலாபம் – இரணவில பகுதியில் உள்ள சுற்றுலா விடுதி ஒன்றில் கடந்த மூன்று மாதங்களாக தங்கியிருந்த இந்த வெளிநாட்டவர்கள், இணையதள குற்றங்களில் ஈடுபட்டு வருவதாக காவல்துறை புலனாய்வுப் பிரிவினருக்குத் தகவல் கிடைத்ததை அடுத்து, குற்றப் புலனாய்வுத் திணைக்களத்தின் (CID) கணினி குற்றப் பிரிவினர் கடந்த 2 ஆம் திகதி மாலை இந்தச் சோதனையை நடத்தினர்.
காவல்துறையினர் சுற்றிவளைத்த போது, விடுதியில் இருந்த சில சந்தேகநபர்கள் தப்பியோட முயற்சித்தனர். இதன்போது காயமடைந்த இரண்டு சீன நாட்டவர்கள் சிகிச்சைக்காக சிலாபம் பொது மருத்துவமனையில் அனுமதிக்கப்பட்டு, பின்னர் நீதவான் முன்னிலையில் ஆஜர்படுத்தப்பட்டனர்.
கைது செய்யப்பட்டவர்களில் பெரும்பாலானோர் சுற்றுலா மற்றும் வணிக விசாக்களில் இலங்கைக்கு வந்துள்ளமை விசாரணைகளில் தெரியவந்துள்ளது. இவர்களில் சிலரிடம் இலங்கையில் தங்கியிருப்பதற்கான முறையான விசா அனுமதி இருக்கவில்லை என்பதும் கண்டறியப்பட்டுள்ளது. இது தொடர்பாக குடிவரவு மற்றும் குடியகல்வுத் திணைக்கள அதிகாரிகள் அந்த விடுதிக்கு நேரில் சென்று மேலதிக விசாரணைகளை ஆரம்பித்துள்ளனர்.
உலகெங்கிலும் உள்ள கிறிஸ்தவ மக்கள் மிகுந்த பக்தியுடன் கொண்டாடும் உயிர்த்த ஞாயிறு தினம் இன்றாகும் (05).
இயேசு கிறிஸ்து மரணத்தை வென்று உயிர்த்தெழுந்ததை நினைவு கூரும் வகையில் கிறிஸ்தவ மக்கள் உயிர்த்த ஞாயிறு தினத்தை மிகுந்த பக்தியுடன் கொண்டாடுகின்றனர்.
இயேசு கிறிஸ்து உலக மக்கள் அனைவரையும் பாவத்திலிருந்து மீட்பதற்காக சிலுவையில் தனது உயிரைத் தியாகம் செய்து, மூன்று நாட்களுக்குப் பிறகு உயிர்த்தெழுந்ததையே கிறிஸ்தவர்கள் உயிர்த்த ஞாயிறு பெருவிழாவாகக் கொண்டாடுகின்றனர்.
இயேசுவின் துன்பப்படுதல், மரணம் மற்றும் உயிர்த்தெழுதலை நினைவு கூர்ந்து கிறிஸ்தவ மக்கள் பல்வேறு வழிபாடுகளில் ஈடுபட்டு வந்த 40 நாட்கள் தவக்காலமும் இன்றைய உயிர்த்த ஞாயிறு தினத்துடன் நிறைவடைகிறது.
இதேவேளை தற்போது உலக அமைதி சீர்குலைந்துள்ளதாகவும், உலகை ஆள வேண்டும் என்ற ஒரு தனிமனிதனின் பேராசை காரணமாக ஒட்டுமொத்த மனிதகுலமும் வேதனையை அனுபவித்து வருவதாகவும் கொழும்பு மறைமாவட்ட ஆயர் அதிவணக்கத்திற்குரிய மெல்கம் கர்தினால் ரஞ்சித் ஆண்டகை தெரிவித்துள்ளார்.
உயிர்த்த ஞாயிறு தினத்தை முன்னிட்டு நடைபெற்ற பிரதான திருப்பலியில் கலந்துகொண்டு உரையாற்றும் போதே அவர் இதனைத் தெரிவித்தார்.
இதன்போது கிறிஸ்தவம் என்பது வெறும் பிரார்த்தனை செய்வது அல்லது புனித பைபிளின் பகுதிகளை வாசிப்பது மாத்திரம் அல்ல என்றும் அவர் சுட்டிக்காட்டினார்.
கிறிஸ்தவம் என்பது அன்பு மற்றும் வாழ்வியல் முறையாகும். அன்பு என்பது ஒரு சேவகனாக இருப்பது, கடவுள் முன்னிலையிலும் அண்டை வீட்டார் முன்னிலையிலும் உண்மையாக இருப்பது. ஒரு தலைவன் என்பவன் சேவகனாக இருக்க வேண்டும் என்று போதிக்கப்பட்டுள்ளது, ஆனால் இன்று உலகை ஆளுபவர்கள் தலைவர்களாக இருக்கிறார்களே தவிர சேவகர்களாக இல்லை. அவர்கள் அதிகாரத்தின் பின்னால் ஓடும் ஆட்சியாளர்களாகவே இருக்கிறார்கள்.” என அங்கு தொடர்ந்து உரையாற்றிய கர்தினால் ரஞ்சித் ஆண்டகை குறிப்பிட்டார்.
