அமெரிக்கா ஈரான் இடையேயான போர் ஒரு மாதத்திற்கு மேலாகத் தொடர்ந்த நிலையில், இந்த மோதல் முடிவுக்கு வருவதாக இன்று காலை அறிவிப்பு வெளியானது. இதற்கிடையே போர் நிறுத்தம் தொடர்பான அறிவிப்பில் பெரிய முரண்பாடு இருப்பது தெரிய வந்துள்ளது. யுரேனியம் செறிவூட்டல் தொடர்பான அறிவிப்பில் இரு வேறு கருத்துகள் இருப்பதாகச் சொல்லப்படுகிறது.

இன்று காலை ஈரான் மற்றும் அமெரிக்கா இடையே போர் நிறுத்தம் அறிவிக்கப்பட்டது. ஈரான் 10 அம்ச திட்டத்தை முன்மொழிந்ததாகவும், அதை டிரம்ப் நிர்வாகம் பரிசீலனை செய்வதாகவும் கூறப்படுகிறது.. இந்த அறிவிப்பால் வளைகுடா பிராந்தியத்தில் நிலவிவரும் பதற்றம் சற்றே தணியும் என எதிர்பார்க்கப்பட்டது. இதற்கிடையே ஈரான் போட்ட கண்டிஷன்களில் ஒரு விஷயம் உலகெங்கும் பலரது கவனத்தை ஈர்த்துள்ளது.

அதாவது ஈரான் அணு ஆயுதத்தை உற்பத்தி செய்யவே யுரேனியத்தை செறிவூட்டுவதாக அமெரிக்கா குற்றஞ்சாட்டியது. இந்த போரை ஆரம்பிக்க டிரம்ப் சொன்ன முக்கிய காரணங்களில் அதுவும் ஒன்று. இருப்பினும், இதை மறுத்த ஈரான், அணுசக்தி மூலம் மின்சாரம் தயாரிக்கவே யுரேனியத்தை செறிவூட்டுவதாகக் கூறியது.

இந்த விவகாரத்தைப் போர் நிறுத்த பேச்சுவார்த்தையிலும் ஈரான் எழுப்பியுள்ளது. முரண்பாடு ஈரானின் யுரேனியம் செறிவூட்டல் திட்டத்தை அமெரிக்கா ஏற்றுக் கொள்ள வேண்டும் என்ற கோரிக்கை வைக்கப்பட்டுள்ளது.. ஆனால், இதில் கவனிக்க வைக்க வேண்டிய விஷயம் என்னவென்றால் செறிவூட்டல் திட்டத்தை ஏற்க வேண்டும் என்ற விடயம் போர் நிறுத்தம் குறித்து வெளியிடப்பட்ட ஆங்கில பதிவில் இல்லை. அதாவது ஈரான் போர் நிறுத்தம் தொடர்பாக ஆங்கிலம் மற்றும் பார்சி என இரு மொழிகளில் அறிக்கை வெளியிட்டு இருந்தது. அதில் ஃபார்சி மொழி செய்திக்குறிப்பில் மட்டுமே யுரேனியம் செறிவூட்டல் குறித்த அறிவிப்பு இருந்தது. ஆங்கிலப் பதிப்பில் இது இல்லை.

போர் நிறுத்தம் தொடர்பாக அமெரிக்கா விதித்த காலக்கெடு நெருங்கிய சூழலில், கடைசி நேரத்தில் தாக்குதலை நிறுத்துவதாக அமெரிக்கா அறிவித்தது. முதலில் அமெரிக்க ஜனாதிபதி டொனால்ட் டிரம்ப் போர் நிறுத்தத்தை அறிவித்தார். பாகிஸ்தான் பிரதமர் ஷெபாஸ் ஷெரீப் மற்றும் அந்நாட்டின் ராணுவ தளபதி அசிம் முனீர் ஆகியோருடன் நடத்திய பேச்சுவார்த்தைகளின் அடிப்படையில் இந்த முடிவை எடுத்ததாக அவர் குறிப்பிட்டார்.

பின்னர், அமெரிக்காவுடனான இரண்டு வாரப் போர் நிறுத்தத்தை ஈரானும் உறுதி செய்தது. போர் நிறுத்தம் அமலில் இருக்கும் காலத்தில் ஹார்முஸ் ஜலசந்தியில் கப்பல் போக்குவரத்து தொடர்ந்து செயல்படும் என்றும் அறிவிக்கப்பட்டது. மேலும், ஈரான் மீதான தாக்குதல்கள் நிறுத்தப்பட்டால், ஈரானும் பதிலடி கொடுப்பதை நிறுத்தும் என அறிவிக்கப்பட்டது.

அமெரிக்காவின் நிலைப்பாடு ஈரானின் 10 அம்ச முன்மொழிவில் உள்ள அனைத்து கோரிக்கைகளையும் அமெரிக்கா ஏற்றுக்கொண்டதாக ஈரான் ஊடகங்கள் கூறினாலும் கூட அதை அமெரிக்கா உறுதி செய்யவில்லை. அமெரிக்க அதிபர் டிரம்பும் கூட அதை பரிசீலனை செய்கிறோம் என மட்டுமே கூறியிருந்தாரே தவிர, ஏற்பதாகச் சொல்லவில்லை. ஈரானின் அணுசக்தி திட்டத்தை முழுமையாக முடிவுக்குக் கொண்டுவருவதே போரின் முக்கிய நோக்கம் என்று டிரம்ப் கூறியிருந்த நிலையில், அமெரிக்கா யுரேனியம் செறிவூட்டலை ஏற்க ஒப்புக்கொண்டது என்பது நம்பும்படி இல்லை.

10 (அம்சங்கள்) பாயிண்டுகள்

• எந்தவொரு ஆக்ரோஷமான நடவடிக்கைகளும் இருக்கக்கூடாது
• ஹார்முஸ் நீரிணை மீதான ஈரானின் கட்டுப்பாடு தொடர வேண்டும்
• யுரேனியம் செறிவூட்டலை ஏற்றுக்கொள்ள வேண்டும்
• முதன்மையான பொருளாதாரத் தடைகளை நீக்க வேண்டும்.
• இரண்டாம் கட்ட பொருளாதாரத் தடைகளையும் நீக்க வேண்டும்.
• ஐநா பாதுகாப்பு கவுன்சில் அனைத்து தீர்மானங்களையும் முடித்துக் கொள்ள வேண்டும்.
• சர்வதேச அணுசக்தி முகமை குழுவின் அனைத்து தீர்மானங்களையும் முடிவுக்குக் கொண்டு வர வேண்டும்
• ஈரானுக்கு இழப்பீடு வழங்கப்பட வேண்டும்.
• வளைகுடா பகுதிகளில் உள்ள அமெரிக்கப் போர்ப் படைகள் அனைத்தையும் விலக்கிக் கொள்ள வேண்டும்
• லெபனானுக்கு எதிரான போர் உட்பட அனைத்து போர்களையும் நிறுத்த வேண்டும்.

கடந்த ஒரு மாதத்திற்கும் மேலாக வளைகுடா பிராந்தியத்தை உலுக்கி வந்த அமெரிக்கா – ஈரான் இடையேயான நேரடிப் போர், தற்போது இரு வார கால தற்காலிக போர் நிறுத்த ஒப்பந்தத்துடன் ஒரு முடிவுக்கு வந்துள்ளது. இந்த அறிவிப்பைத் தொடர்ந்து ஈரானின் பல்வேறு நகரங்களில் மக்கள் வீதிகளில் இறங்கி உற்சாகமாகக் கொண்டாடி வருகின்றனர்.

கடந்த பிப்ரவரி மாத இறுதியில், அமெரிக்கா மற்றும் இஸ்ரேல் படைகள் இணைந்து ஈரான் மீது அதிரடித் தாக்குதலைத் தொடங்கின. போரின் முதல் நாளிலேயே ஈரானின் உச்ச தலைவர் அலி கமேனி கொல்லப்பட்ட சம்பவம் உலகத்தையே அதிர்ச்சியில் ஆழ்த்தியது. தலைமை பலவீனமடைந்ததால் ஈரான் விரைவில் சரணடையும் என்று எதிர்பார்க்கப்பட்டது.

ஆனால், ஈரான் பின்வாங்காமல் வளைகுடா நாடுகளில் உள்ள அமெரிக்க தூதரகங்கள் மற்றும் ராணுவ தளங்கள் மீது சரமாரித் தாக்குதல்களை நடத்தியது. குறிப்பாக, உலகப் பொருளாதாரத்தின் உயிர்நாடியான ஹார்முஸ் ஜலசந்தியை ஈரான் முடக்கியதால், சர்வதேச சந்தையில் கச்சா எண்ணெய் விலை வரலாறு காணாத அளவிற்கு உயர்ந்தது.

இந்தச் சூழலில், போர் நிறுத்த அறிவிப்பை அமெரிக்க அதிபர் டொனால்ட் டிரம்ப் முதலில் வெளியிட்டார்.

• முதற்கட்டமாக: இரண்டு வாரங்களுக்குப் போர் நிறுத்தம் அமலில் இருக்கும்.
• அடுத்த கட்டம்: இந்த காலக்கெடுவிற்குள் நிரந்தர அமைதி தீர்வை எட்ட இரு நாடுகளும் பேச்சுவார்த்தையில் ஈடுபடும்.

ஈரான் அரசும் இந்த போர் நிறுத்தத்தை உறுதிப்படுத்தியதோடு, மூடப்பட்டிருந்த ஹார்முஸ் ஜலசந்தி மீண்டும் திறக்கப்படுவதாக அறிவித்துள்ளது.

ஈரானில் பாதிப்புகள்: ஒரு பார்வை

“வெற்றி பெற்றோம்” – வீதிகளில் கொண்டாடிய மக்கள்

போர் நிறுத்த அறிவிப்பு வெளியான நள்ளிரவிலேயே, ஈரானின் தலைநகர் டெஹ்ரான் உள்ளிட்ட முக்கிய நகரங்களில் மக்கள் தேசியக் கொடிகளுடன் குவியத் தொடங்கினர்.

“நாங்கள் அமெரிக்காவையும் இஸ்ரேலையும் வீழ்த்திவிட்டோம். எங்களின் விடாப்பிடியான போராட்டத்திற்குத் தோல்வி இல்லை” என்ற கோஷங்களுடன் ஈரான் மக்கள் இந்த அறிவிப்பை ஒரு மாபெரும் வெற்றியாகக் கொண்டாடி வருகின்றனர். இது தொடர்பான வீடியோக்கள் தற்போது சமூக வலைதளங்களில் வைரலாகி வருகின்றன.

ஈரான் மிகக் கடுமையான பொருளாதார மற்றும் உயிர்ச் சேதங்களைச் சந்தித்திருந்தாலும், போர் நிறுத்தம் அந்த நாட்டு மக்களுக்குப் பெரும் நிம்மதியை அளித்துள்ளது. எனினும், இந்த இரண்டு வார கால தற்காலிக போர் நிறுத்தம், ஒரு நிரந்தரமான அமைதிக்கு வழிவகுக்குமா என்பதைப் பொறுத்திருந்துதான் பார்க்க வேண்டும்.

அமெரிக்க ஜனாதிபதி டொனால்ட் ட்ரம்ப், ஈரானை “ஒரே இரவில் அழித்துவிடுவோம்” (Taken out in one night) என்று விடுத்துள்ள எச்சரிக்கை மத்திய கிழக்கில் பெரும் போர் பதற்றத்தை ஏற்படுத்தியுள்ளது.

ஈரான் தனது கட்டுப்பாட்டில் உள்ள ஹார்முஸ் ஜலசந்தியை (Strait of Hormuz) உடனடியாக திறக்க வேண்டும் என்றும், இல்லையெனில் செவ்வாய்க்கிழமை இரவு (ஏப்ரல் 7, 2026) ஈரானின் அனைத்து மின் உற்பத்தி நிலையங்கள் மற்றும் பாலங்கள் தரைமட்டமாக்கப்படும் என்றும் ட்ரம்ப் எச்சரித்துள்ளார்.

“எங்களிடம் ஒரு திட்டம் உள்ளது. ஈரானின் ஒவ்வொரு பாலமும், மின்சார நிலையமும் எரியும், வெடிக்கும்; அவை மீண்டும் ஒருபோதும் பயன்படுத்த முடியாதபடி அழிக்கப்படும்” என்று அவர் குறிப்பிட்டுள்ளார்.

ட்ரம்ப்பின் இந்த மிரட்டலை “மனநோயாளித்தனமானது” (Delusional) என்று ஈரான் ராணுவம் சாடியுள்ளது. ஈரானின் சிவில் உள்கட்டமைப்புகள் மீது அமெரிக்கா தாக்குதல் நடத்தினால், அதற்குப் பதிலாக அமெரிக்காவிற்குச் சொந்தமான தளங்கள் அல்லது அதற்கு ஆதரவளிக்கும் நாடுகள் மீது “உலகம் பார்த்திராத மிகக் கடுமையான பதிலடி” கொடுக்கப்படும் என ஈரான் எச்சரித்துள்ளது.

பொதுமக்கள் பயன்படுத்தும் பாலங்கள் மற்றும் மின் நிலையங்களை தாக்குவது “போர்க்குற்றம்” என்று சர்வதேச சட்ட நிபுணர்கள் சுட்டிக்காட்டியுள்ளதுடன், ஈரானின் ஐக்கிய நாடுகள் சபை தூதரகம், இது பயங்கரவாதத்தைத் தூண்டும் செயல் என்று கண்டனம் தெரிவித்துள்ளது.

மத்திய கிழக்கில் அதிகரித்து வரும் பதற்றம், உலகளாவிய வர்த்தக மற்றும் எரிசக்தி சந்தைகளில் புதிய அச்சத்தை உருவாக்கியுள்ளது.

இந்த சூழலில் ஈரான் ஏற்கனவே ஹார்மூஸ் நீரிணையை மொத்தமாக கைப்பற்றி தனது கட்டுப்பாட்டில் வைத்திருக்கும் நிலையில் தற்போது அடுத்தாக ஒரு முக்கிய வழித்தடத்தை முடக்க உள்ளதாக எச்சரித்துள்ளது. அதுதான் Bab al-Mandab Strait, இது உலக வரைபடத்தில் சிறியதாகத் தோன்றினாலும், உலக பொருளாதாரத்தில் இந்த நீரிணை மிகப்பெரிய பங்கு வகிக்கிறது.

ஈரான் இந்த பாப் அல் மண்டப் பாதையை முடக்கினால் சவுதி அரேபியாவின் வர்த்தகம், பொருளாதாரம், வருமானம் என அனைத்தும் பாதிக்கும் அபாயம் உள்ளது. இதேபோல் ஐரோப்பா, ஆப்பிரிக்காவின் பொருளாதாரத்தை முடக்கும் அபாயம் இந்த வழித்தடத்திக்கு உள்ளது.

அமெரிக்காவின் எரிசக்தித் தகவல் நிர்வாகத்தின் தரவுகளின்படி, 2024ஆம் ஆண்டில் தினமும் சுமார் 4.1 மில்லியன் பேரல் பெட்ரோலியம் பொருட்கள் இந்த நீரிணை வழியாக சென்றுள்ளது. இது ஹார்மூஸ் வழியாக செல்லும் 20 மில்லியன் பேரலுடன் ஒப்பிடும்போது குறைவாக இருந்தாலும், முக்கியத்துவம் வாய்ந்தாக உள்ளது எப்படி?

இது ஹார்மூஸ் வழித்தடம் முடங்கும் போது எண்ணெய் ஏற்றுமதிக்கான மாற்று பாதையாகவும் பாப் அல் மண்டப் நீரிணை செயல்படுகிறது. சவுதி அரேபியாவின் Yanbu துறைமுகத்திற்கு தினமும் சுமார் 7 மில்லியன் பேரல் எண்ணெய் குழாய் வழியாக கொண்டு செல்லப்படுகிறது. அங்கிருந்து, அது செங்கடல் வழியாக பாப் அல்-மண்டப் நீரிணையை கடந்து உலக சந்தைகளுக்கு அனுப்பப்படுகிறது. தற்போது இது முடக்கப்பட்டால் சவுதியின் பெரும்பகுதி வர்த்தகம் முடங்கும்.

மத்திய கிழக்கின் எரிசக்தி பொருளாதாரத்தில், சவுதி அரேபியா மிக முக்கியமான நாடாக உள்ளது. இந்த நாட்டின் எண்ணெய் ஏற்றுமதியை உலக சந்தைகளுக்கு கொண்டு செல்லும் முக்கிய கடல் வழித்தடங்களில் ஒன்றாக பாப் அல் மண்டப் நீரிணை திகழ்கிறது.

குறிப்பாக ஐரோப்பா உள்ளிட்ட பல நாடுகளுக்கு தினமும் மில்லியன் கணக்கான பேரல் எண்ணெய் இந்த வழியாக அனுப்பப்படுகிறது. இதனால், இந்த நீரிணையின் பாதுகாப்பு சவுதி பொருளாதாரத்திற்கு நேரடி தாக்கத்தை ஏற்படுத்தும் முக்கிய விஷயமாகும். ஹார்மூஸ் நீரிணை பாதையில் பதற்றம் அல்லது தடைகள் உருவானால், பாப் அல்-மண்டப் நீரிணை முக்கிய மாற்று பாதையாக சவுதி அரேபியாவுக்கு செயல்படுகிறது. சவுதி அரேபியாவின் மேற்குக் கடற்கரையில் உள்ள துறைமுகங்களுக்கு எண்ணெய் குழாய்கள் மூலம் கொண்டு எரிவாயு, கச்சா எண்ணெய் செல்லப்பட்டு, அங்கிருந்து செங்கடலில் இந்த நீரிணை வழியாக உலக சந்தைகளுக்கு சவுதி அரேபியா ஏற்றுமதி செய்து வருகிறது.

இதனால், ஹார்முஸ் பாதை பாதிக்கப்பட்டாலும், சவுதி தனது ஏற்றுமதியை தொடரும் வாய்ப்பு பாப் அல் மண்டப் நீரிணை தந்தது. ஆனால் தற்போது ஈரான் ஹார்மூஸ் மற்றும் பாப் அல் மண்டெப் ஆகிய இரு முக்கிய கடல் வழித்தடங்களும் ஒரே நேரத்தில் முடக்கும் காரணத்தால், சவுதி அரேபியாவின் எண்ணெய் ஏற்றுமதி கடுமையாக பாதிக்கப்படும். இது உலகளாவிய எண்ணெய் விநியோகத்தில் பெரிய பாதிப்பை உருவாக்கும்.

கச்சா எண்ணெய் மட்டுமல்லாமல், உலகளாவிய சரக்கு வர்த்தகத்திலும் பாப் அல் மண்டப் நீரிணை முக்கிய பங்கு வகிக்கிறது. சூயஸ் கால்வாய் வழியாக ஐரோப்பா மற்றும் ஆசியா இடையே பயணிக்கும் கப்பல்கள், இந்த நீரிணையை கடக்கின்றன. இதனால், உலக வர்த்தகத்தின் சுமார் 12% சரக்கு போக்குவரத்து இந்த பாதையை சார்ந்துள்ளது. இந்த வழித்தடம் பாதிக்கப்பட்டால், அதன் தாக்கம் மத்திய கிழக்கை மட்டுமல்லாது, உலகம் முழுவதும் எதிரொலிக்கும்.

பாப் அல்-மண்டப் நீரிணையுடன் ஈரான் எந்த வகையிலும் நேரடியாக கடற்கரை இணைப்பு இல்லாத போதிலும், ஈரான் இந்த பகுதியில் பாதிப்பை ஏற்படுத்தும் திறன் கொண்டுள்ளது. இதற்கு காரணம், ஈரானுக்கு பக்கபலமாக இருக்கும் யெமன் நாட்டில் செயல்படும் ஹவுதி கிளர்ச்சியாளர்கள் குழு. இந்த ஹவுதி அமைப்பு, கடந்த 2023-2024 காலகட்டத்தில் செங்கடலில் இஸ்ரேல் தொடர்புடைய கப்பல்களை குறிவைத்து பல தாக்குதல்கள் நடத்தியுள்ளது. தற்போது ஈரானுக்கு ஆதரவமாக, இஸ்ரேல் ராணுவ இலக்குகளையும் தாக்க தொடங்கியுள்ளது. இதனால், ஈரான்-யெமன் கூட்டணி எந்த நேரத்திலும் பாப் அல்-மண்டப் நீரிணையை கைப்பபற்றி முடக்க கூடும் என்ற அச்சம் அதிகரித்துள்ளது. பாப் அல்-மண்டப் நீரிணை முடக்கப்பட்டால் சூயஸ் கால்வாய் வழியாக ஆசியாவுக்கு நடக்கும் அனைத்து வர்த்தகமும் பாதிக்கப்படும்.

ஏற்கனவே ஹார்மூஸ் பகுதியில் ஏற்பட்ட பதற்றம் காரணமாக கச்சா எண்ணெய் விலைகளை ஒரு போரலுக்கு 110 டாலர் வரையில் உயர்ந்துள்ளன. அமெரிக்காவில் பெட்ரோல் விலை ஒரு கேலனுக்கு 4 டாலரை கடந்துள்ளது. மேலும் ஜேபி மோர்கன் சேஸ் ஆய்வாளர்கள், இந்த நிலை தொடர்ந்தால் கச்சா எண்ணெய் விலை ஒரு பேரலுக்கு 150 டாலர் வரை உயரக்கூடும் என கணித்துள்ளனர். மேலும் குறுகிய காலத்தில் $120-$130 இடையே நிலைத்திருக்கலாம் என்றும் கணித்துள்ளனர்.

பாப் அல்-மண்டப் நீரிணையும் பாதிக்கப்பட்டால், இந்த விலை மேலும் அதிகரித்து 200 டாலரை கூட தாண்டும் அபாயம் இருப்பதாக முன்பு எச்சரிக்கப்பட்டுள்ளது. தற்போது வரை ஹூதி அமைப்பு பாப் அல்-மண்டப் நீரிணையில் கப்பல்களை நேரடியாக தாக்கவில்லை. இருப்பினும், நிலைமை வேகமாக மாறக்கூடியதாக இருப்பதால், உலக சந்தைகள் தொடர்ந்து கவனத்தில் வைத்துள்ளன. இதுக்குறித்து ஈரானின் புதிய உச்ச தலைவர் முஜ்தபா கமேனி-யின் ஆலோசகரான அலி அக்பர் விலாயதி போட்ட டிவீட் தான் தற்போது பதற்றத்திற்கு முக்கியமான காரணமாக விளங்குகிறது.