எரிபொருள் விலை அதிகரிப்பினைத் தொடர்ந்து, பாடசாலை மாணவர்களின் போக்குவரத்துச் சேவையில் ஈடுபடும் வாகனங்களின் கட்டணங்களை இன்று (10) முதல் நடைமுறைக்கு வரும் வகையில் 5 வீதத்தால் அதிகரிக்க தீர்மானிக்கப்பட்டுள்ளது. 

ஊடகவியலாளர் சந்திப்பொன்றில் கலந்துகொண்டு கருத்து தெரிவித்த அகில இலங்கை பாடசாலை மாணவர் போக்குவரத்து சங்கத்தின் தலைவர் லலித் சந்திரசிறி பெர்னாண்டோ, இதற்கு முன்னர் பலமுறை எரிபொருள் விலையில் மாற்றம் ஏற்பட்ட போதிலும், நாட்டின் சூழ்நிலையைக் கருத்திற்கொண்டு போக்குவரத்து கட்டணங்களில் மாற்றம் செய்யவில்லை எனக் குறிப்பிட்டார். 

இருப்பினும், இம்முறை டீசல் விலை 22 ரூபாவினால் அதிகரிக்கப்பட்டுள்ளதால், போக்குவரத்து கட்டணத்தையும் அதிகரிக்க வேண்டிய நிலை ஏற்பட்டுள்ளதாக அவர் மேலும் தெரிவித்தார். 

ஏனைய சங்கங்களுடன் கலந்தாலோசித்த பின்னரே இந்த முடிவு எடுக்கப்பட்டதாக அவர் ஊடகங்களிடம் கூறினார். இது குறித்து அவர் மேலும் கருத்து தெரிவிக்கையில்: 

“தூங்கி எழுந்திருக்கும் போது திடீரென எரிபொருள் விலை உயர்ந்துள்ளது. எமது போக்குவரத்து சங்கம் என்ற ரீதியில் கட்டணத்தை 5 வீதத்தால் அதிகரிக்க தீர்மானித்துள்ளோம். அதன்படி, ஒரு பாடசாலை மாணவருக்கான கட்டணம் 10,000 ரூபாவாக இருந்தால், அது 500 ரூபாவினால் அதிகரிக்கும். 22 ரூபா விலை அதிகரிப்பானது போக்குவரத்து துறையில் எமக்கு பெரும் பாதிப்பை ஏற்படுத்துகிறது. விருப்பம் இல்லாவிட்டாலும் இந்த முடிவை எடுக்க வேண்டியதாயிற்று.” என்றார்.

இதேவேளை டீசல் விலை உயர்த்தப்பட்ட போதிலும் பேருந்து கட்டண திருத்தம் மேற்கொள்ளப்பட மாட்டாது என தேசிய போக்குவரத்து ஆணைக்குழு தெரிவித்துள்ளது. 

நேற்று (09) நள்ளிரவு முதல் டீசல் விலை உயர்ந்த போதிலும், அது பேருந்து கட்டண திருத்தத்தில் தாக்கத்தை ஏற்படுத்தாது என அதன் பணிப்பாளர் நாயகம் கலாநிதி நிலான் மிரண்டா தெரிவித்துள்ளார். 

இதன் காரணமாக தற்போதைய கட்டணங்களே அவ்வாறே நடைமுறையில் இருக்கும் என்றும் கலாநிதி நிலான் மிரண்டா மேலும் குறிப்பிட்டுள்ளமை குறிப்பிடத்தக்கது.

ஜூட் சமந்த

மாதம்ப பொலிஸ் பிரிவுக்குட்பட்ட பகுதியில் வீட்டிற்குள் புகுந்த இனந்தெரியாத நபர்கள், 60,000 ரூபா பணம் மற்றும் 14 இலட்சம் ரூபா பெறுமதியான தங்க நகைகளைத் திருடிச் சென்றுள்ளதாக மாதம்ப பொலிஸார் தெரிவித்துள்ளனர்.

வீரகொடியான – ரத்னகிரிய வத்தையைச் சேர்ந்த 59 வயதுடைய அகிலியஸ் புள்ளேகே ஜோசப் என்பவர் வழங்கிய முறைப்பாட்டின் அடிப்படையில் இந்த விசாரணை ஆரம்பிக்கப்பட்டுள்ளது.

முறைப்பாட்டாளரின் மனைவி வெளிநாட்டில் வசிப்பதுடன், அவரும் அவரது மகளும் மாத்திரமே வீட்டில் தங்கியுள்ளனர். முறைப்பாட்டாளர் தும்பு தொழிற்சாலையிலும் (Fiber mill), அவரது மகள் ஆடைத் தொழிற்சாலையிலும் பணிபுரிகின்றனர்.

தனது மகளின் மேலதிக வகுப்புக் கட்டணத்தைச் செலுத்துவதற்காக, அலங்கார மேசையின் இழுப்பறையில் (Dressing table drawer) வைத்திருந்த பணத்தை எடுக்கச் சென்றபோதே, பணம் காணாமல் போயிருப்பதை அவர் கவனித்துள்ளார். அதனைத் தொடர்ந்து சோதனையிட்ட போது, மகளுக்குச் சொந்தமான தங்க நகைகளும் களவாடப்பட்டிருப்பது தெரியவந்தது.

வீட்டின் கதவுகள் அல்லது ஜன்னல்கள் உடைக்கப்படவில்லை எனவும், வீடு திறந்திருந்த நேரத்தில் யாரோ உள்ளே புகுந்து இந்தத் திருட்டைச் செய்திருக்கலாம் எனவும் பொலிஸார் குறிப்பிடுகின்றனர். மேலும், அயலவர் ஒருவர் அண்மைக்காலமாக அதிகளவில் பணத்தைச் செலவிட்டு வருவதாக முறைப்பாட்டாளர் பொலிஸாரிடம் சந்தேகம் வெளியிட்டுள்ளார்.

திருடப்பட்ட பணம் மற்றும் நகைகள் தொடர்பில் இதுவரை எவரும் கைது செய்யப்படவில்லை என்பதுடன், மாதம்ப பொலிஸார் மேலதிக விசாரணைகளை முன்னெடுத்து வருகின்றனர்.

ஜூட் சமந்த

புத்தளம் – அனுராதபுரம் வீதியின் 9ஆம் மைல் கல் பகுதியில் அமைந்துள்ள பாலம் மீண்டும் சேதமடைந்துள்ளதால், அவ்வீதியூடான போக்குவரத்து நடவடிக்கைகள் மட்டுப்படுத்தப்பட்டுள்ளதாக கருவலகஸ்வெவ பொலிஸார் தெரிவித்துள்ளனர்.

கடந்த ஆண்டு நவம்பர் மாதம் நிலவிய ‘டித்வா’ (Ditwa) சூறாவளியின் போது இந்தப் பாலம் கடுமையாகப் பாதிக்கப்பட்டு இடிந்து விழுந்தது. அதனைத் தொடர்ந்து, போக்குவரத்துப் பாதிப்புகளைக் குறைக்கும் வகையில் அதிகாரிகளால் தற்காலிகப் பாலமொன்று அமைக்கப்பட்டு, சில நாட்களிலேயே போக்குவரத்துச் சீர்செய்யப்பட்டது.

கடந்த 9ஆம் திகதி, கருவலகஸ்வெவ பொலிஸ் போக்குவரத்துப் பிரிவினர் மேற்கொண்ட ஆய்வின் போது, தற்காலிகமாக அமைக்கப்பட்ட இந்தப் பாலம் மூன்று இடங்களில் வெடிப்புக்குள்ளாகியிருப்பது கண்டறியப்பட்டது. இந்த விடயம் தொடர்பாக புத்தளம் வீதி அபிவிருத்தி அதிகார சபையின் நிறைவேற்றுப் பணிப்பாளருக்கு பொலிஸாரால் உடனடியாக அறிவிக்கப்பட்டது.

பாலத்தின் அபாயகரமான நிலையைக் கருத்திற்கொண்டு, கடந்த 9ஆம் திகதி மாலை முதல் இலகுரக வாகனங்கள் மாத்திரம் பாலத்தின் ஊடாகச் செல்ல வீதி அபிவிருத்தி அதிகார சபை அனுமதி வழங்கியுள்ளது.

அதேவேளை, கனரக வாகனங்கள் இந்தப் பாலத்தைப் பயன்படுத்துவது தடை செய்யப்பட்டுள்ளதுடன், அவை தமது பயணங்களுக்காக மாற்று வழிகளைப் பயன்படுத்துமாறு வீதி அபிவிருத்தி அதிகார சபை வேண்டுகோள் விடுத்துள்ளமை குறிப்பிடத்தக்கது.

மத்திய கிழக்கில் நிலவும் மோதல் நிலைமைகளுக்கு மத்தியில் தற்காலிகமாக நிறுத்தப்பட்டிருந்த ரியாத் மற்றும் டுபாய்க்கான தினசரி விமான சேவைகளை மீண்டும் ஆரம்பிப்பதாக ஸ்ரீலங்கன் ஏர்லைன்ஸ் அறிவித்துள்ளது. 

இதன்படி, ரியாத்துக்கான தினசரி விமான சேவைகள் இன்று இரவும், டுபாய்க்கான சேவைகள் நாளையிலிருந்தும் மீண்டும் ஆரம்பமாகவுள்ளன. 

மத்திய கிழக்கின் நிலைமைகளைத் தொடர்ந்து உன்னிப்பாகக் கண்காணித்து வருவதாகவும், பயணிகள் மற்றும் பணியாளர்களின் பாதுகாப்பிற்கு முன்னுரிமை அளிக்கப்படும் என்றும் நிறுவனம் குறிப்பிட்டுள்ளது. 

இயக்கப்படவுள்ள விமானங்களின் விபரங்கள் பின்வருமாறு: 

UL265   Colombo–Riyadh   18:15 hrs 

UL266   Riyadh–Colombo   22:35 hrs 

UL231   Colombo–Dubai 1  2:40 hrs 

UL232   Dubai–Colombo   17:00 hrs 

மேலதிக விபரங்களுக்கு பொதுமக்கள் www.srilankan.com என்ற இணையதளத்தைப் பார்வையிடலாம்.

“முழு நாடும் ஒன்றாக” எனும் தேசிய செயற்திட்டத்தின் கீழ், இலங்கையைச் சுற்றியுள்ள கடல் எல்லையைப் பாதுகாக்கும் நோக்கில் கடற்படையினர் முன்னெடுத்த விசேட நடவடிக்கையில், பெருமளவிலான போதைப்பொருட்களுடன் உள்ளூர் மீன்பிடி படகு ஒன்று திக்கோவிட்ட மீன்பிடி துறைமுகத்தில் வைத்து நேற்று (08) கைப்பற்றப்பட்டது.

இலங்கைக்கு தெற்கே ஆழ்கடல் பகுதியில் மேற்கொள்ளப்பட்ட இந்த வெற்றிகரமான சோதனையின் போது, சந்தேகத்திற்குரிய ஆறு (06) நபர்கள் கைது செய்யப்பட்டனர். பொலிஸ் போதைப்பொருள் பணியகத்தின் (PNB) நிபுணத்துவ ஆய்வுகளின்படி, ஹெராயின்: சுமார் 102 கிலோகிராம், கொகைன்: 900 கிராமுக்கும் அதிக போதைப்பொருட்கள் கைப்பற்றப்பட்டன.

இந்த விசேட சுற்றிவளைப்பை ஆய்வு செய்ய பாதுகாப்பு இராஜாங்க அமைச்சர் மேஜர் ஜெனரல் அருண ஜெயசேகர (ஓய்வு) மற்றும் கடற்படைத் தளபதி வைஸ் அட்மிரல் காஞ்சன பனகொட ஆகியோர் நேரில் வருகை தந்திருந்தனர்.

இந்த நிகழ்வின் போது உரையாற்றிய பாதுகாப்பு இராஜாங்க அமைச்சர், ஜனாதிபதியின் நேரடி வழிகாட்டலின் கீழ் முன்னெடுக்கப்படும் இந்த தேசிய திட்டத்தின் முக்கியத்துவத்தை விளக்கினார்.

கடந்த 2025 ஆம் ஆண்டில் சர்வதேச புலனாய்வு அமைப்புகளுடன் இணைந்து முன்னெடுக்கப்பட்ட நடவடிக்கைகளை நினைவுகூர்ந்த அமைச்சர், கடற்படையினர் மட்டும் கடந்த ஆண்டு சுமார் 75,000 மில்லியன் ரூபாவுக்கும் அதிக பெறுமதியான போதைப்பொருட்களைக் கைப்பற்றி சாதனை படைத்துள்ளதாகக் குறிப்பிட்டார். உலகளாவிய போர்ச் சூழல் மற்றும் கடல் விபத்துக்களுக்கு மத்தியிலும், இலங்கை கடற்படை சர்வதேச விதிகளுக்கு உட்பட்டு பொதுமக்களையும் இளைஞர்களையும் பாதுகாக்க இரவு பகலாக உழைத்து வருவதாகவும் அவர் பாராட்டினார்.

போதைப்பொருள் ஒழிப்பு என்பது தனித்து ஒரு துறையின் பொறுப்பல்ல, மாறாக அது ஒரு கூட்டுப் பொறுப்பு என்று அமைச்சர் வலியுறுத்தினார்:

• மறுவாழ்வு: போதைக்கு அடிமையானவர்களை மீட்க பெருமளவு நிதி செலவிடப்படுவதால், இளைஞர்கள் இந்த அழிவுப் பாதையைத் தவிர்க்க வேண்டும்.
• பொதுமக்கள் பங்களிப்பு: கடத்தல்காரர்கள் பற்றிய தகவல்களை 1818 அல்லது 1997 ஆகிய அவசர இலக்கங்களுக்குத் தொடர்புகொண்டு வழங்குமாறு கேட்டுக்கொள்ளப்பட்டது.
• ஊடகங்களின் பங்கு: விழிப்புணர்வை ஏற்படுத்துவதில் ஊடகங்கள் காட்டும் பொறுப்புணர்வை அவர் இதன்போது பாராட்டினார்.

கைப்பற்றப்பட்ட 102 கிலோ ஹெராயின், 900 கிராம் கொகைன், பல நாள் மீன்பிடி படகு மற்றும் கைது செய்யப்பட்ட 06 சந்தேக நபர்கள் மேலதிக விசாரணைகளுக்காக பொலிஸ் போதைப்பொருள் பணியகத்திடம் ஒப்படைக்கப்பட்டுள்ளனர். சட்ட நடைமுறைகள் நிறைவடைந்த பின்னர், கைப்பற்றப்பட்ட போதைப்பொருட்களை பகிரங்கமாக அழிப்பதற்கான ஏற்பாடுகள் செய்யப்பட்டுள்ளதாக அறிவிக்கப்பட்டுள்ளது.

ஜூட் சமந்த

வீதியில் ஏனைய வாகனங்களுக்கு இடையூறு விளைவிக்கும் வகையில், மிகவும் அபாயகரமான முறையில் மோட்டார் சைக்கிளைச் செலுத்திய சந்தேக நபர் ஒருவரை நவகத்தேகம பொலிஸார் கைது செய்துள்ளனர்.

கைது செய்யப்பட்டவர் நவகத்தேகம பிரதேசத்தைச் சேர்ந்த 19 வயதுடைய இளைஞர் என அடையாளம் காணப்பட்டுள்ளார். இவர் பழைய இரும்பு சேகரித்து மீண்டும் விற்பனை செய்யும் தொழிலில் ஈடுபட்டு வருபவர் என பொலிஸார் தெரிவித்துள்ளனர்.

ஆனமடுவ – நவகத்தேகம வீதியில் ஏனைய வாகனங்கள் மற்றும் மோட்டார் சைக்கிள்களுக்குப் பெரும் அச்சுறுத்தல் ஏற்படும் வகையில், குறித்த இளைஞர் மிக மோசமாக மோட்டார் சைக்கிளை ஓட்டிச் செல்லும் வீடியோ ஒன்று கடந்த சில நாட்களாக சமூக வலைத்தளங்களில் வேகமாகப் பரவியது. இது தொடர்பாக மேற்கொள்ளப்பட்ட விசாரணைகளின் மூலம், அந்தச் சம்பவம் ஆனமடுவ – நவகத்தேகம பிரதான வீதியில் நடைபெற்றது உறுதி செய்யப்பட்டது.

இதனையடுத்து, சம்பந்தப்பட்ட சந்தேக நபரை உடனடியாகக் கைது செய்யுமாறு பொலிஸ் மா அதிபர், நவகத்தேகம பொலிஸாருக்கு உத்தரவு பிறப்பித்திருந்தார்.

உயர்மட்ட உத்தரவின் பேரில் விரைந்து செயற்பட்ட நவகத்தேகம பொலிஸார், சந்தேக நபரைத் தேடிக் கண்டுபிடித்துக் கைது செய்தனர். கைது செய்யப்பட்டுள்ள இளைஞருக்கு எதிராக, அஜாக்கிரதையாக வாகனத்தைச் செலுத்தியமை மற்றும் அதன் மூலம் சாவற்ற நரஹத்தி (கொலை முயற்சி) செய்யத் தூண்டியமை ஆகிய பாரதூரமான குற்றச்சாட்டுகளின் கீழ், ஆனமடுவ நீதிவான் நீதிமன்றத்தில் வழக்குத் தாக்கல் செய்ய நடவடிக்கை எடுக்கப்பட்டுள்ளதாக பொலிஸார் மேலும் குறிப்பிட்டுள்ளனர்.