நாட்டில் மின்சார கட்டணம் அதிகரிக்கப்படுமானால் அதற்கு எதிராக போராட்டங்கள் வெடிக்கும் என எதிர்க்கட்சித் தலைவர் சஜித் பிரேமதாச எச்சரிக்கை விடுத்துள்ளார். 

ஐக்கிய மக்கள் சக்தியின் தலைமை செயலகத்தில் டி.எஸ். சேனநாயக்க அரசியல் கற்கைகள் பீடத்தின் திறப்பு விழா, எதிர்க்கட்சித் தலைவரும் ஐக்கிய மக்கள் சக்தியின் தலைவருமான சஜித் பிரேமதாசவின் பங்கேற்புடன் இன்று (11) இடம்பெற்றது. 

இதன்போது கலந்து கொண்டு உரையாற்றிய எதிர்க்கட்சித் தலைவர், 

அரசாங்கம் நாட்டு மக்களுக்கு நற்செய்தியொன்றை வழங்க தயாராகி வருகின்றது. 

மீண்டும் மின்சாரக் கட்டணத்தை அதிகரிப்பதே அந்த நற்செய்தியாகும். இந்த மின்சாரக் கட்டணம் அதிகரிக்கப்படக் கூடாது என்றே நாம் பிரார்த்திக்கிறோம். 

அரசாங்கம் ஏதோ ஒருவகையில் மின்சாரக் கட்டணத்தை மீண்டும் அதிகரித்தால், ஐக்கிய மக்கள் சக்தியினரான நாம், மக்களுடன் வீதிக்கு இறங்குவோம். 

இதற்கு எதிராக நாம் வீதியில் இறங்கி நடவடிக்கை எடுப்போம். மின்சாரக் கட்டணம் அதிகரிக்கப்பட்டால் வீட்டுப் பொருளாதாரத்தில் தாய்மார்களும் பெண்களும் தான் அதிகம் பாதிக்கப்படுபவர்களாக காணப்படுகின்றனர். 

துன்பம், பசி, அடக்குமுறை மற்றும் அசௌகரியத்தால் மக்களை நசுக்கி, என்றுமே மக்களை அநாதவரவான நிலையில் வைத்துக் கொள்வதற்கு எடுக்கும் அரசாங்கத்தின் இந்த மோசமான கொள்கைகளை தோற்கடிக்க நாம் நடவடிக்கை எடுக்க வேண்டும். 

220 இலட்சம் மக்களினது உரிமைகளைப் பாதுகாக்க மக்கள் முன்வர வேண்டும் என்று எதிர்க்கட்சித் தலைவர் சஜித் பிரேமதாச அழைப்பு விடுத்தார்.

இலங்கை இராணுவத்தின் 25வது தளபதியாக, இலங்கை இராணுவத்தின் அனைத்துப் படைவீரர்களுக்கும் 76வது ஆண்டு நிறைவை முன்னிட்டு, “தேசத்தின் பாதுகாவலரின்” பெருமைமிக்க நினைவு தினத்தை முன்னிட்டு எனது வாழ்த்துக்களையும் பாராட்டுகளையும் தெரிவித்துக் கொள்கிறேன் என இராணுவத் தளபதி லசந்த ரொட்ரிகோ தெரிவித்துள்ளார்.

1949 அக்டோபர் 10 ஆம் தேதி நிறுவப்பட்டதிலிருந்து, இலங்கை இராணுவம் நாட்டின் ஒற்றுமை, இறையாண்மை மற்றும் பிராந்திய ஒருமைப்பாட்டின் உறுதியான பாதுகாவலராக இருந்து வருகிறது, மகத்தான தியாகங்கள் மூலம் நமது அன்புக்குரிய தாய்நாட்டிற்கு அமைதி மற்றும் ஸ்திரத்தன்மையைப் பாதுகாத்து வருகிறது. இந்த புனிதமான சந்தர்ப்பத்தில், கடமையின் போது உச்சபட்ச தியாகத்தைச் செய்த துணிச்சலான அதிகாரிகள் மற்றும் வீரர்களை மிகுந்த மரியாதையுடன் நினைவுகூருகிறோம் என அறிக்கை ஒன்றின் மூலம் தெரிவித்துள்ளார்.

காயமடைந்த மற்றும் ஊனமுற்றோரின் நீடித்த தைரியத்திற்காகவும், தொடர்ச்சியான வலிமை மற்றும் விரைவான மீட்சிக்காகவும் நாங்கள் மரியாதையுடன் நினைவுகூருகிறோம்.

இன்று இராணுவம் கொண்டுள்ள கௌரவம், மற்றும் செயல்பாட்டு நம்பகத்தன்மை, அதன் கடந்த கால தளபதிகள் மற்றும் அனைத்து படைவீரர்களின் அசைக்க முடியாத அர்ப்பணிப்பு மற்றும் அர்ப்பணிப்பின் பெருமைக்குரிய விளைவாகும், அவர்களின் ஒழுக்கம் மற்றும் கடமை மீதான அர்ப்பணிப்பு நமது இராணுவ சிறப்பின் அடித்தளத்தை உருவாக்கியுள்ளன. இந்த முக்கியமான நாளில், இலங்கை இராணுவத்தின் மிக உயர்ந்த தரங்களை தொடர்ந்து நிலைநிறுத்துவதற்கான அவர்களின் சிறந்த சேவை மற்றும் நீடித்த பங்களிப்புக்கு நான் மரியாதை செலுத்துகிறேன் என அவரின் அறிக்கையில் மேலும் தெரிவிக்கப்பட்டுள்ளது.

குறித்த அறிக்கையில் மேலும் தெறிவிக்கப்பட்டுள்ளதாவது;

எனது தொலைநோக்கு தெளிவாக உள்ளது; “நமது இராணுவத்தை உண்மையிலேயே சிப்பாய் மையமாகக் கொண்ட மற்றும் சிப்பாய் நட்பு அமைப்பாக மாற்றுவது. ஒவ்வொரு சிப்பாயும் மதிப்புமிக்கவராகவும், ஆதரிக்கப்பட்டவராகவும், சிறந்து விளங்க அதிகாரம் பெற்றவராகவும் உணரும் சூழலை நான் கற்பனை செய்கிறேன்”. இந்த தொலைநோக்குப் பார்வையால் வழிநடத்தப்பட்டு, அனைத்து படைவீரர்களின் தரநிலைகள், நலன் மற்றும் மன உறுதியை மேம்படுத்த பல நடவடிக்கைகளை நாங்கள் செயல்படுத்தியுள்ளோம். இலங்கை இராணுவத்தின் ஒவ்வொரு உறுப்பினரும் ஒரு பெருமைமிக்க மற்றும் மரியாதைக்குரிய இராணுவப் படையாக நம்மை வரையறுக்கும் முக்கிய மதிப்புகளை நிலைநிறுத்துவது கட்டாயமாகும்.

இலங்கை இராணுவத்தின் முக்கிய பங்கு, நாடு முழுவதும் அமைதி மற்றும் ஸ்திரத்தன்மையைப் பேணுவதன் மூலம் தேசிய பாதுகாப்பை உறுதி செய்வதாகும். அதன்படி, சவாலான சூழ்நிலைகளில் திறம்பட பதிலளிக்க இராணுவம் மிக உயர்ந்த அளவிலான போர் தயார்நிலை, செயல்பாட்டு திறன் மற்றும் மூலோபாய தொலைநோக்கு ஆகியவற்றை தொடர்ந்து நிலைநிறுத்த வேண்டும். இந்தப் பொறுப்புகள், அதிமேதகு ஜனாதிபதி மற்றும் ஆயுதப்படைகளின் தளபதி மற்றும் இலங்கை ஜனநாயக சோசலிசக் குடியரசின் அரசாங்கத்தின் தேசிய அளவிலான உத்தரவுகளுக்கு இணங்க நிறைவேற்றப்பட வேண்டும்.

இராணுவத்தின் பெருமை மற்றும் தொழில்முறை ஒவ்வொரு அதிகாரி மற்றும் சிப்பாயின் தோள்களிலும் தங்கியுள்ளது. இலங்கை இராணுவத்தின் பெருமைமிக்க மரபுகளைப் பாதுகாக்கவும், அதன் பாரம்பரியத்தை எதிர்கால தலைமுறைகளுக்கு வலுப்படுத்தவும் “முன்மாதிரியாக வழிநடத்த” அனைத்துப் படையினரையும் நான் அழைக்கிறேன்.

இலங்கை ஜனநாயக சோசலிசக் குடியரசின் அரசாங்கத்தின் உத்தரவுகளுக்கு இணங்க, “சுத்தமான இலங்கை” முயற்சி இராணுவத்திற்குள் செயல்படுத்தப்பட்டுள்ளது; ஊழலைக் கட்டுப்படுத்துதல், வெளிப்படைத்தன்மையை மேம்படுத்துதல் மற்றும் சுற்றுச்சூழல் சீரழிவைக் குறைத்தல் ஆகியவற்றை நோக்கமாகக் கொண்ட ஒரு தேசிய முயற்சி. அரசு அல்லது அரசு சாரா வளங்களைப் பயன்படுத்துவதில் ஒருமைப்பாடு, பொறுப்புக்கூறல் மற்றும் நெறிமுறை நடத்தை ஆகியவற்றின் மிக உயர்ந்த தரங்களை நிலைநிறுத்தி, இந்த முயற்சிக்கு அனைத்துப் படையினரும் ஆர்வத்துடன் பங்களிக்க வேண்டும் என்று நான் கேட்டுக்கொள்கிறேன் என மேலும் குறிப்பிடப்பட்டுள்ளது.

கல்பிட்டியில் சட்டவிரோதமாக இறக்குமதி செய்யப்பட்ட 150 பறவைகளுடன் 02 சந்தேக நபர்கள் கடற்படையினரால் கைப்பற்றப்பட்டனர்

இலங்கை கடற்படையினர், கல்பிட்டி கிம்புல்பொக்க களப்பு பகுதியில் கடந்த 2025 அக்டோபர் 07 ஆம் திகதி நடத்திய சிறப்பு தேடுதல் நடவடிக்கையின் போது, வெளிநாட்டிலிருந்து சட்டவிரோதமாக நாட்டிற்கு கொண்டு வரப்பட்ட நூற்று ஐம்பது (150) பறவைகளை ஏற்றிச் சென்ற இரண்டு (02) சந்தேக நபர்களையும் ஒரு (01) டிங்கி படகையும் கடற்படையினர் கைப்பற்றினர்.

அதன்படி, 2025 அக்டோபர் 07 ஆம் திகதி, வடமேற்கு கடற்படை கட்டளையின் இலங்கை கடற்படை கப்பல் விஜயவின் உச்சமுனை கடற்படைப் பிரிவினால் கல்பிட்டி கிம்புல்பொக்க லகூன் பகுதியில் நடத்தப்பட்ட இந்த சிறப்பு தேடுதல் நடவடிக்கையின் போது, சந்தேகத்திற்கிடமான டிங்கி படகு ஒன்று கண்காணிக்கப்பட்டு சோதனை செய்யப்பட்டது. அங்கு, நூற்று ஐம்பது (150) பறவைகளும், இரண்டு (02) சந்தேக நபர்களையும் கடற்படையினர் கைதுசெய்தனர்.

மேலும், இந்த நடவடிக்கையின் போது கடற்படையினரால் கைது செய்யப்பட்ட சந்தேக நபர்கள் 27 மற்றும் 39 வயதுடைய கல்பிட்டி பகுதியில் வசிப்பவர்கள் என அடையாளம் காணப்பட்டுள்ளதுடன், சந்தேக நபர்கள், டிங்கி படகு மற்றும் பறவைகள் மேலதிக சட்ட நடவடிக்கைகளுக்காக கருவலகஸ்வெவ வனவிலங்கு பாதுகாப்புத் துறையிடம் ஒப்படைக்கப்பட்டன.

சுற்றாடல் அமைச்சு மற்றும், “Clean Sri Lanka” வேலைத்திட்டம் இணைந்து செயற்படுத்தும் சுற்றாடல் பாதுகாப்புத் திட்டத்தின் மற்றுமொரு துரித செயற்திட்டம், புத்தளம் மாவட்டத்தின் கருவலகஸ்வெவ, தப்போவ குளத்தை மையமாக கொண்டு (10) ஆரம்பமானது.

இலங்கை எதிர்கொள்ளும் ஒரு பாரிய பிரச்சினையான மனித-யானை மோதலுக்கு நிலையான தீர்வை வழங்குவதே இந்த திட்டத்தின் முக்கிய நோக்கமாகும். அந்த நோக்கத்திற்காக “யானை வேலிக்கு அப்பால் ஒரு நிலையான தீர்வு” என்ற கருப்பொருளின் கீழ் இது ஒரு தேசிய வேலைத் திட்டமாக ஆரம்பிக்கப்படுகிறது.

யானைகளுக்கு உகந்த சுற்றுச்சூழல் அமைப்புகளை உருவாக்குதல் மற்றும் யானைகள் பாதுகாப்பு வலயங்களை நிறுவுதல் ஆகியவை இந்த தேசிய வேலைத்திட்டத்தின் முக்கிய பணிகளாக அடையாளம் காணப்பட்டுள்ளன. இதன் ஆரம்ப கட்டமாக, தப்போவ குளத்தில் பரவியிருந்த ஆக்கிரமிப்புத் தாவரங்கள் அகற்றப்பட்டன. முப்படை அதிகாரிகள், பொலிஸ் அதிகாரிகள், சிவில் பாதுகாப்பு அதிகாரிகள், மற்றும் பிரதேச இளைஞர்கள், சுற்றாடல் முன்னோடி அணியினர், பாடசாலை மாணவர்கள் உட்பட சுமார் ஆயிரம் பேர் இந்த சிரமதான நடவடிக்கையில் பங்களித்தனர்.

இத்திட்டத்தின் கீழ், வனஜீவராசிகள் பாதுகாப்பு வனங்களில் குளங்களைப் புனரமைக்கவும், கிராமியக் குழுக்களின் ஊடாக பிரதேச செயலக மட்டத்தில் பொறிமுறையொன்றை நடைமுறைப்படுத்துவதன் மூலம் இந்த செயல்முறையை வலுப்படுத்த எதிர்பார்க்கப்படுகிறது.

இத்திட்டத்துடன் இணைந்ததாக, நீர்ப்பாசனத் திணைக்களத்தின் தலைமையில் தப்போவ குளத்தின் எல்லைகள் குறித்தல், வனப் பாதுகாப்புத் திணைக்களத்திற்குச் சொந்தமான கல்வல சூழலியல் பூங்காவில் ஆக்கிரமிப்புச் செடிகள் அகற்றப்பட்டு, அதே பூங்காவில் சமூக மைய அபிவிருத்தி நிகழ்ச்சியும் நடத்தப்பட்டது. மேலும், எதிர்வரும் நாட்களில் வனாத்தவில்லுவ பிரதேசத்தில் உள்ள எலாரிஸ் குளம் மற்றும் அனாத்த குளம் புனரமைக்கப்படவுள்ளதுடன் கருவலகஸ்வெவ மின்கம்பியின் இருபுறமும் உள்ள காடுகளை அகற்றி வனாத்தவில்லுவ மின்கம்பிக்கு அருகில் உள்ள வீதியும் சீரமைக்கப்படும்.

சுற்றாடல் அமைச்சும் “Clean Sri Lanka” வேலைத்த்திட்டமும் இணைந்து ஏற்பாடு செய்திருந்த இந்த நிகழ்ச்சித்திட்டத்தின் ஆரம்ப நிகழ்விற்காக சுற்றாடல் அமைச்சர் வைத்திய தம்மிக்க படபெந்தி,

பொது நிர்வாகம், மாகாண சபைகள் மற்றும் உள்ளூராட்சி அமைச்சர் கலாநிதி சந்தன அபேரத்ன, சுற்றாடல் பிரதி அமைச்சர் என்டன் ஜயகொடி மற்றும் புத்தளம் மாவட்ட பாராளுமன்ற உறுப்பினர்கள், “Clean Sri Lanka” செயலக பணிப்பாளர்களான கபில செனரத் (சமூக) அஞ்சுல பிரேமரத்ன (சுற்றாடல்), இசுரு அனுராத (தகவல் தொழில்நுட்பம்), புத்தளம் மாவட்ட செயலாளர், மேலதிக மாவட்ட செயலாளர், பிரதேச செயலாளர்கள் உள்ளிட்ட அரச அதிகாரிகள் பலரும் இந்நிகழ்வில் கலந்து கொண்டனர்.

நமது சிறார்களுக்கு நாட்டைக் கட்டியெழுப்புவதற்குத் தேவையான சக்தி, திறமை மற்றும் மனப்பான்மை இருப்பதாகவும், அதற்குத் தேவையான பாதைகளைத் திறந்து விடுவதுதான் பெரியவர்களின் கடமையாகும் என்றும் கல்வி, உயர்கல்வி மற்றும் தொழில் கல்வி அமைச்சர், பிரதமர் கலாநிதி ஹரிணி அமரசூரிய தெரிவித்தார்.

“Sri Lanka Skills Expo 2025” கண்காட்சியின் ஆரம்ப நிகழ்வில் நேற்று ஒக்டோபர் 10 ஆம் திகதி கலந்துகொண்டு உரையாற்றும்போதே பிரதமர் இவ்வாறு குறிப்பிட்டார்.

இலங்கையில் இளைஞர்களிடையே நிலவும் தொழில்வாய்ப்பின்மை வீதத்தைக் குறைப்பதை நோக்கமாகக் கொண்டு, இந்தக் கண்காட்சி மூன்றாவது முறையாகவும் ஒக்டோபர் மாதம் 10, 11 ஆகிய இரு தினங்களில் அலரி மாளிகையின் பிரதான மண்டபத்தில் நடத்தப்படுகின்றது. கைத்தொழில் துறை திறன் சபையும் (Industry Sector Skills Councils – ISSC), கல்வி, உயர்கல்வி மற்றும் தொழில் கல்வி அமைச்சும் இணைந்து இந்தக் கண்காட்சியை நடத்துகின்றன.

இதில் மேலும் உரையாற்றிய பிரதமர்:

நாம் ஆரம்பித்துள்ள கல்விச் சீர்திருத்தத்தில் இதுவொரு சிறப்பான சந்தர்ப்பமாகும். இதன் மூலம் நாம் எதிர்பார்ப்பது, எமது பிள்ளைகளுக்குக் கல்வித் துறையில் காணப்படுகின்ற வாய்ப்புகளை விரிவுபடுத்துவதை மாத்திரமல்ல, அந்த வாய்ப்புகளை இனங்கண்டுகொள்வதற்கான பாதையைத் திறந்து விடுவதோடு, இந்த அனுபவங்களை கல்வி மூலம் மாணவர்களுக்குக் கற்றுக் கொடுப்பதற்காகவே இந்த நிகழ்ச்சித்திட்டங்களை ஏற்பாடு செய்கின்றோம்.

இந்தக் கண்காட்சி மூலம் உங்கள் எதிர்காலப் பயணத்திற்கான வழிகாட்டல்களை உங்களால் பெற்றுக்கொள்ள முடியும். உங்களதும் பெற்றோரினதும் விருப்பம், உங்களது திறமைகள் ஆகியவற்றைக் கருத்தில் கொண்டு, இன்றைய உலகில் உருவாகும் வாய்ப்புகளைப் பற்றி அறிந்துகொள்ள இது ஒரு மிகச்சிறந்த சந்தர்ப்பமாகும் என நான் நினைக்கிறேன்.

உண்மையில், இந்தக் காலகட்டத்தில் கல்வி கற்று சமூகத்தில் இணைந்து கொள்ளவிருக்கும் உங்களது தலைமுறையினர் முகம் கொடுக்க வேண்டிய பல சவால்கள் காணப்படுகின்றன. தொழில்நுட்பத்தின் காரணமாக உலகம் மிக வேகமாக மாறி வருகிறது. குறிப்பாக, எவராலும் நினைத்துப் பார்க்க இயலாத வகையில் சமூகம் மாற்றம் பெரும்போது, மாறிவரும் அந்தச் சமூகத்தில் தொழில்களும் மாற்றமடைகின்றன. நாம் சிந்திக்கப் பழகியிருக்கும் பாரம்பரியப் பாதையில் பயணிப்பதன் மூலம் இந்தச் சமூகத்தில் வெற்றிகரமான பயணத்தை மேற்கொள்ள இயலாது. ஆகையினால், மாறிவரும் சமூகத்தைப் பற்றி நாம் நன்கு புரிந்துகொண்டு எமது கல்விப் பயணத்தைத் தொடர வேண்டும்.

இதன் மூலமே எமது தேசிய அபிவிருத்தித் திட்டத்தில் உங்களை இணைத்துக்கொள்வது சாத்தியமாகும். நாம் நமது பொருளாதாரத்தை மேம்படுத்த பயணிக்கும் பாதைகள் எவை என்பதை இந்த நிகழ்ச்சிகள் மூலம் உங்களுக்கு அறிமுகப்படுத்தப்படும். இந்த அபிவிருத்திப் பொருளாதாரத் திட்டத்தில் நீங்கள் எங்கு இணைந்து கொள்ளலாம், எங்குப் பங்காளியாக இருக்கலாம், எந்தப் பாதையில் செல்லலாம் என்பதைப் பற்றி உங்களுக்கு மாத்திரமின்றி, உங்களது ஆசிரியர்களுக்கும், பெற்றோருக்கும் ஒரு புரிதலைப் பெற்றுக்கொள்ளக் கூடியதாக இருக்கும்.

இந்தக் கண்காட்சி மிகவும் முக்கியமானதாகும். இதன் மூலம் உங்களுக்கு ஒரு புதிய உலகத்திற்கான, சமூகத்திற்கான கதவுகள் திறக்கப்படுகின்றன. உலகத்தின் புதிய போக்குகள் என்ன என்பதை அறிந்துகொள்ள முடிகின்றது. நீங்கள் நினைப்பதை விடச் சமூகத்தில் உங்களுக்கான வாய்ப்புகள் இருக்கின்றன, உங்களுக்கென ஓர் இடம் இருக்கின்றது. அந்த இடத்திற்கு நீங்கள் வரும்வரை நாம் காத்துக் கொண்டிருக்கிறோம். இந்தச் சந்தர்ப்பத்தைப் பயன்படுத்தி அதனுடன் இணைந்து முன்னோக்கிச் செல்லுங்கள். நீங்கள் முன்னோக்கிச் செல்லும் அந்தப் பயணத்தில் நாட்டை அபிவிருத்தி செய்வதே எமது எதிர்பார்ப்பாகும்.

எம்மால் செய்யக்கூடியது, உங்களுக்கு இந்தச் சந்தர்ப்பத்தை வழங்குவதும், புதிய வாய்ப்புகளுக்கான பாதையை அமைத்துக் கொடுப்பதுமே ஆகும். அந்த வாய்ப்புகளைப் பெற்றுக்கொண்டு முன்னோக்கிச் செல்வதே உங்கள் பொறுப்பாகும்.

இங்கு கூடியிருக்கும் சிறார்களாகிய உங்களுக்கு இந்தச் சமூகத்தைக் கட்டியெழுப்பத் தேவையான சக்தி, திறமை மற்றும் மனப்பான்மை இருக்கின்றது என நான் நம்புகிறேன்.

நீங்களே அடுத்த தலைமுறையின் தலைமையை ஏற்கப் போகிறீர்கள். இது எல்லோரும் உங்களுக்குச் சொல்லும் விடயம் என்று நான் நினைக்கிறேன். ஆயினும், நாம் அதைச் சொல்வதோடு நின்றுவிடாது, அந்தச் சந்தர்ப்பங்களை, அந்தத் தலைமையைப் பெறக்கூடிய கல்விப் பின்னணி, பொருளாதார அபிவிருத்தி ஆகியவற்றை ஏற்படுத்துவதற்கான பாதைகளை உங்களுக்காகத் திறந்து விடுகிறோம். பெரியவர்களாகிய எமக்கு ஒரு பொறுப்பு இருக்கிறது, இதை எப்படியாவது உங்களுக்குச் செய்துகொடுப்போம். இந்தச் சந்தர்ப்பத்தைப் பயன்படுத்திக்கொண்டு நீங்கள் இந்த நாட்டை முன்னோக்கி எடுத்துச் செல்லுங்கள் என்று நான் உங்களைக் கேட்டுக்கொள்கிறேன், எனப் பிரதமர் தெரிவித்தார்.

இந்த நிகழ்வில் கைத்தொழில் மற்றும் தொழில்முனைவோர் அபிவிருத்தி அமைச்சர் சுனில் ஹந்துன்னெத்தி, பிரதி அமைச்சர் சத்துரங்க அபேசிங்க, தொழில் கல்வி பிரதி அமைச்சர் நளின் ஹேவகே, பிரதமரின் செயலாளர் பிரதீப் சபுத்தந்திரீ, கல்வி அமைச்சின் செயலாளர் நாளக களுவெவ உட்படப் பலரும் கலந்துகொண்டனர்.

வட மாகாண சபரிமலை யாத்திரிகர்கள் இணையம் நடாத்தும் மாபெரும் மாநாடும் மகாகுரு ரவிசுவாமியின் கௌரவிப்பு நிகழ்வும் கிளிநொச்சி கூட்டுறவாளர் மண்டபத்தில் இன்று நடைபெறுகின்றது.

சபரி ஐயப்ப சீரடி சாவி அறக்கட்டளை ஸ்தாபகத் தலைவரும், வட மாகாண சபரிமலை யாத்திரிகர்கள் இணையத்தலைவருமான தவத்திரு.தரணீஸ்வர குருசுவாமி தலைமையில் இன்று 11.10.2025 நடைபெறுகிறது.

குறித்த பாராளுமன்ற உறுப்பினர் துரைராசா ரவிகரன், கரைச்சி பிரதேச சபையின் தவிசாளர் அருணாச்சலம் வேழமாலிகிதன், குரு சுவாமிகள் உள்ளிட்ட ஐயப்ப பக்தர்கள் பலர் கலந்து கொண்டுள்ளனர்.

“மவத்ததா வ ரஹ்மா” (பாசம் மற்றும் கருணை) எனும் தொனிப்பொருளின் கீழ் இரண்டாவது பிரம்மாண்ட திருமண நிகழ்வு கௌரவ திரு. நாடாளுமன்ற உறுப்பினரும் அகில இலங்கை மக்கள் காங்கிரஸ் தலைவருமான ரிஷாத் பதியுதீன் தலைமையில் கடந்த 2025 அக்டோபர் 7 ஆம் தேதி வவுனியாவில் நடைபெற்றது.

இலங்கையில் முதன்முறையாக நடைபெற்ற இந்த வரலாற்று நிகழ்வில், இலங்கையின் பல்வேறு சமூகங்களுக்கிடையில் நல்லிணக்கம், இரக்கம் மற்றும் ஒற்றுமையை ஏற்படுத்தும் நோக்கில் 20 பௌத்த, கத்தோலிக்க மற்றும் இந்து ஜோடிகளுக்கு திருமணம் நடத்திவைக்கப்பட்டது.

ஒவ்வொரு ஜோடிக்கும் அவர்களின் புதிய வாழ்க்கையை கண்ணியத்துடன் தொடங்க நிதி உதவியும் வழங்கப்பட்டது.

ஐக்கிய அரபு எமிரேட்ஸின் ஸ்தாபகத் தந்தை மறைந்த ஷேக் சயீத் பின் சுல்தான் அல் நஹ்யானின் நினைவாக இந்த நீதி பங்களிப்பை ஷேக் மஹ்மூத் ஃபதே அப்துல்லா அல் கஜே வழங்கிவைத்தார்.

வவுனியாவில் சர்வமத நல்லிணக்கத்தை பிரதிபலிக்கும் வகையில், அனைத்து முக்கிய மதங்களைச் சேர்ந்த மதத் தலைவர்கள் விழாவில் பங்கேற்று, தங்கள் ஆசீர்வாதங்களையும் ஒற்றுமையின் செய்திகளையும் வழங்கினர். இந்த நிகழ்வில் வண. மிகிந்தலே தேரர் பிரதம விருந்தினராக கலந்து கொண்டார், இது அனைத்து சமூகங்களுக்கிடையில் அமைதியான சகவாழ்வின் உணர்வைக் குறிக்கிறது.

“மவத்ததா வ ரஹ்மா” திட்டம் முதன்முதலில் 2025 ஆகஸ்ட் 24 அன்று புத்தளத்தில் தொடங்கப்பட்டது, அங்கு ஒரே தடவையில் 20 முஸ்லிம் ஜோடிகள் திருமணம் செய்து கொண்டனர். அந்த தொடக்க விழாவில் இலங்கைக்கான ஐக்கிய அரபு எமிரேட்ஸின் தூதர் மாண்புமிகு காலித் நாசர் அல் அமேரி பிரதம விருந்தினராக கலந்து கொண்டார்.

இந்த முயற்சியின் மூலம், கௌரவ ரிஷாத் பதியுதீன் சமூக நல்லிணக்கம், மதங்களுக்கு இடையேயான ஒற்றுமை மற்றும் இரக்கத்தை மேம்படுத்துவதையும், அனைத்து தரப்பு இளம் தம்பதிகளுக்கும் நடைமுறை ஆதரவை வழங்குவதையும் நோக்கமாகக் கொண்டுள்ளார், இது செயலில் பாசம் மற்றும் கருணையின் உண்மையான பிரதிபலிப்பாகும்.

புத்தளம் எருக்கலம்பிட்டி பாடசாலையின் அபிவிருத்திப் பணிக்காக அதே பாடசாலையின் பழைய மாணவர்களினால் ஒரு தொகை நிதி இன்று 10.10.2025 வெள்ளிக்கிழமை வழங்கிவைக்கப்பட்டுள்ளது.

புத்தளம் எருக்கலம்பிட்டி பாடசாலையில் கல்வி பயின்ற 2002 ஆம் ஆண்டு சாதரண தர மாணவிகளினால் சுமார் 70 ஆயிரம் ரூபாய் பணத்தொகை பாடசாலையின் அதிபர் ஜனாப் S.M. ஹுசைமத் அவர்களிடம் இன்றைய தினம் கையளிக்கப்பட்டது.

பாடசாலையில் நிலவிவரும் நிதிப்பற்றாக்குறையை கருத்திற்கொண்டும், பாடசாலையில் தற்போது முன்னெடுக்கப்பட்டுவரும் அபிவிருத்தி பணிகளுக்காகவும் குறித்த மாணவிகளினால் இந் நிதிப்பங்களிப்பு செய்யப்பட்டுள்ளது.

இதுவரை பாடசாலையின் பழைய ஆண் மாணவர்கள் மாத்திரமே அதிகமான நிதிப்பங்களிப்புகள் மற்றும் பொருளாதார உதவிகளை செய்திருக்கும் நிலையில், முதன் முறையாக பாடசாலையின் பழைய பெண் மாணவிகள் முன்வந்து இவ்வாறான நிதிப்பங்களிப்பை செய்துள்ளமை அனைவரின் பாராட்டையும் பெற்றுள்ளது.

கட்டட அனுமதிக்கு விண்ணப்பித்து குடிபுகு சான்றிதழ் (COC)/ அமைவு சான்றிதழ் பெற்றுக்கொள்ளாமல் வணிக நோக்கில் இயங்கும் நிறுவனங்களில் வர்த்தக நடவடிக்கைகளை தடை செய்யுமாறு உள்ளூராட்சி மன்றங்களை வடக்கு மாகாண கௌரவ ஆளுநர் நா.வேதநாயகன் அவர்கள் பணித்தார்.

குடிபுகு சான்றிதழ் பெற்றுக் கொள்ளாமையால் குறித்த கட்டடத்தின் பாதுகாப்பு உறுதி செய்யப்படாமையாலும் உள்ளூராட்சி மன்றங்களால் வரி அறவிட முடியாத நிலைமை காணப்படுகின்றமையாலும் அதனால் ஏற்படும் வருமான இழப்பையும் கருத்தில்கொண்டு இந்த நடவடிக்கை முன்னெடுக்கப்பட்டுள்ளதாக அவர் குறிப்பிட்டார்.

நிதியும் திட்டமிடலும், சட்டமும் ஒழுங்கும், காணி, மின்சக்தி, வீடமைப்பும் நிர்மாணமும், சுற்றுலா, உள்ளூராட்சி, மாகாண நிர்வாகம், கிராம அபிவிருத்தி, வீதி அபிவிருத்தி, மோட்டார் போக்குவரத்து மற்றும் போக்குவரத்து அமைச்சின் கீழ் இந்த ஆண்டு நடைமுறைப்படுத்தப்படும் திட்டங்களின் நிதி மற்றும் பௌதீக முன்னேற்றம் தொடர்பில் ஆராயும் மாதாந்தக் கலந்துரையாடல் மற்றும் உள்ளூராட்சி மன்றங்களின் செயலாளர்களுடனான மாதாந்தக் கலந்துரையாடல் என்பன வடக்கு மாகாண கௌரவ ஆளுநர் நா.வேதநாயகன் அவர்கள் தலைமையில் ஆளுநர் செயலகத்தில் இன்று வெள்ளிக்கிழமை (10.10.2025) நடைபெற்றது.

இங்கு கருத்துத் தெரிவித்த ஆளுநர்,

பருவமழை எதிர்வரும் 23ஆம் திகதி ஆரம்பமாகும் என எதிர்வுகூறப்பட்டுள்ள நிலையில் அதற்கு முன்னதாக திட்டங்களை நிறைவுசெய்யுமாறு கோரினார். அத்துடன் இம்முறை குறைவான காலப் பகுதியினுள் அதிகளவான மழை வீழ்ச்சி கிடைக்கப்பெறும் என எதிர்பார்க்கப்படுவதால், கடந்த காலங்களில் வெள்ளம் ஏற்படக் காரணமாக இடங்களை அடையாளப்படுத்தி இம்முறை அந்தப் பாதிப்பை குறைப்பதற்கான செயற்பாடுகளை முன்னெடுக்குமாறும் அறிவுறுத்தினார்.

மேலும், பொதுமக்களால் சமர்ப்பிக்கப்படும் விண்ணப்பங்களுடன் இணைக்கப்படும் ஆவணங்கள் தொடர்பில் ஏதாவது குறைபாடுகள் இருந்தால் அந்த விண்ணப்பங்களை கிடப்பில்போடாமல் சம்பந்தப்பட்ட பொதுமகனுக்கு உடனடியாகவே அழைப்பை மேற்கொண்டு அவற்றைப்பெற்று விண்ணப்பங்களை விரைந்து பரிசீலித்து முடிக்குமாறும் ஆளுநர் கேட்டுக்கொண்டார்.

கழிவகற்றல் தொடர்பான விவகாரம் மிகப் பெரும் சவாலாக உருவாகிவரும் நிலையில் கொழும்பு மாநகர சபையால் கழிவுப் பொருட்களிலிருந்து மின்சாரம் உருவாக்கும் மின்உற்பத்தி நிலையங்கள் உருவாக்கப்பட்டுள்ள நிலையில் அவற்றைப் பார்வையிட்டு அத்தகையை திட்டத்தை முன்னெடுப்பதற்கான சாத்தியப்பாடுகளை ஆராயுமாறும் ஆளுநர் அறிவுறுத்தினார்.

மேலும், உள்ளூராட்சி மன்றங்கள் தமது எல்லைக்குட்பட்ட பகுதிகளில் குப்பைகள் போடுவதைக் கண்காணிக்கும் வகையில் சிசிரிவி கமராக்களைப் பொருத்துவதற்கு நடவடிக்கை எடுக்குமாறும் ஆளுநர் குறிப்பிட்டார். நல்லூர் பிரதேச சபை அவ்வாறு சிசிரிவி கமராக்களைப் பொருத்தி அதன் ஊடாக தண்டப் பணத்தை அறவிட்டு வருவதாக சபையின் செயலாளர் இதன்போது தெரிவித்தார்.

இன்றைய கலந்துரையாடலில், உள்ளூராட்சி அமைச்சு, உள்ளூராட்சித் திணைக்களம், ஒவ்வொரு மாவட்டத்தினதும் உள்ளூராட்சி உதவி ஆணையாளர்கள் அலுவலகம், மாகாண கிராம அபிவிருத்தித் திணைக்களம், வீதி அபிவிருத்தித் திணைக்களம், சுற்றுலா அதிகார சபை, வீதிப் பயணிகள் போக்குவரத்து அதிகார சபை என ஒவ்வொரு திணைக்களங்களினதும் ஒவ்வொரு திட்டங்களினதும் முன்னேற்றங்கள் பற்றி விரிவாக ஆராயப்பட்டன. ஒப்பந்தகாரர்களால் சில இடங்களில் வேலைகளில் ஏற்பட்டுள்ள தாமதங்கள் தொடர்பிலும் கலந்துரையாடப்பட்டது.

இந்தக் கலந்துரையாடலில் வடக்கு மாகாண ஆளுநரின் செயலாளர், உள்ளூராட்சி அமைச்சின் செயலாளர், விவசாய அமைச்சின் செயலாளர், பிரதிப் பிரதம செயலாளர் – நிதி, திட்டமிடல், கட்டடங்கள் திணைக்களப் பணிப்பாளர், மாகாணப் பணிப்பாளர்கள், உள்ளூராட்சி மன்றங்களின் செயலாளர்கள் பங்கேற்றனர்.