ஒரே வருடத்தில் இரண்டு தேசிய வெற்றிகளைப் பெற்று புளிச்சாக்குளம் உமர் பாறுக் மகா வித்தியாலயம் சாதனை!
(கற்பிட்டி எம் எச் எம் சியாஜ்)
2025 இவ் ஆண்டில், புளிச்சாக்குளம் உமர் பாறுக் மகா வித்தியாலய மாணவர்கள் இரண்டு தேசிய மட்டப் போட்டிகளில் வெற்றி பெற்று, பாடசாலையின் நற்பெயரை நாடளாவிய ரீதியில் பிரகாசமாக்கியுள்ளனர்.
அகில இலங்கை தமிழ்மொழி தினப் போட்டியில் பாடசாலை மாணவிகள் இருவர் ஒரே வருடத்தில் இரண்டு தேசிய வெற்றிகளைப் பெற்று பாடசாலைக்கு கெளரவத்தை பெற்றுக்கொடுத்துள்ளனர்.
திறனாய்வுப் போட்டியில் ஜீ. தரண்யா முதலாம் இடத்தையும், இலக்கிய விமர்சனம் போட்டியில் வீ. நதீஹாஷினி மூன்றாம் இடத்தையும் பெற்று சாதித்துள்ளனர்.
இவ்விரு மாணவிகளின் வெற்றிக்குப் பின்னால் இருந்து சாதனைக்கு வழிகாட்டியாக இருந்த திருமதி ஏ. சுலைஹா ஆசிரியையின் பங்கு பாராட்டப்படத்தக்கது என பாடசாலையின் அதிபர் எம்.யூ.எம். சாஜஹான் குறிப்பிட்டார்.
இந்த சாதனைகள் பாடசாலையின் கல்வித் தரத்தையும், கலாச்சார வளர்ச்சியையும் பிரதிபலிப்பதாகவும் அவர் மேலும் தெரிவித்தார்.
வெற்றி பெற்ற மாணவர்களுக்கும், பாடசாலை சமூகத்திற்கும் பலரும் வாழ்த்துக்களை தெரிவித்துள்ளனர்.
13ஆவது சர்வதேச குஜுர்யு கராத்தே மற்றும் சோடகன் கராத்தே (GUJURYU KARATE & SHOTOKHAN KARATE) ஓபன் சாம்பியன் போட்டிகள் கடந்த 04.10.2025 சனிக்கிழமை குளியாப்பிட்டியில் உள்ள வயம்ப பல்கலைக்கழத்தில் இடம்பெற்றது.
விளையாட்டு அமைச்சு மற்றும் கல்வி அமைச்சின் கீழ் பதிவுசெய்யப்பட்ட கராத்தே சம்மேளனத்தின் போட்டியாளர்கள் பங்குபற்றிய குறித்த போட்டிகளை I.G.K.A. இலங்கை கிளை நடாத்தியது.
மேலும் குறித்த போட்டிகளில் இலங்கை, இந்தியா, மலேசிய மற்றும் நியூசிலாந்து நாட்டைச் சேர்ந்த கராத்தே வீரர்களும் இதில் கலந்துகொண்டனர்.
அந்த வகையில் 12 வயது பிரிவின் கீழ் இடம்பெற்ற “காடா” பிரிவில் புத்தளம் எருக்கலம்பிட்டியை சேர்ந்த ரைசுதீன் – பர்வீன் தம்பதிகளின் இளம் வாரிசு “ரைசுதீன் ஷெஷாட் அஹமட்” இரண்டாம் இடத்தினை பெற்று நாட்டிற்கும், பாடசாலைக்கும், ஊருக்கும் கெளரவத்தை பெற்றுக்கொடுத்துள்ளார்.
அதேபோல் 12 வயது பிரிவின் கீழ் இடம்பெற்ற மற்றுமொரு போட்டியான “கொமிடி” பிரிவிலும் பங்குபற்றி இரண்டாம் இடத்தினை பெற்று சாதனை படைத்துள்ளார்.
எருக்கலம்பிட்டி இளம் வாரிசான “ரைசுதீன் ஷெஷாட் அஹமட்” மதுரங்குளி மெர்சி லங்கா தனியார் பாடசாலையில் கல்வி பயின்று வருவதுடன், குறித்த போட்டியில் பங்குபற்றி வெற்றிபெற சகல வழிகளிலும் பெரும் துணையாக இருந்திருக்கிறார் கராத்தே பயிற்சியாளர் பைரோஸ் (பிளக் பெல்ட்).
நடைபெற்ற சர்வதேச குஜுர்யு கராத்தே மற்றும் சோடகன் கராத்தே போட்டிகளில் பங்குபற்றி அதீத திறமையை வெளிப்படுத்தியதுடன், இரண்டு போட்டிகளிலும் மிகவும் சிறப்பாக பங்குபற்றி இரண்டாம் இடங்களை பெற்றுக்கொண்ட “ரைசுதீன் ஷெஷாட் அஹமட்” என்ற இளம் சிங்கத்திற்கு ஊர் மக்கள், பாடசாலை சமூகம் என பலரும் தமது வாழ்த்துக்களை தெரிவித்து வருவதுடன், பயிற்சியாளர் பைரோஸ் அவர்களுக்கும் தமது வாழ்த்துக்களை தெரிவித்துள்ளமை குறிப்பிடத்தக்கது.
அதேபோல் எமது ஊடகம் சார்பாகவும் மனமார்ந்த வாழ்த்துக்களை தெரிவித்துக்கொள்கிறோம்.
யானை-மனித மோதலால் நாட்டின் பொருளாதாரம் கடுமையாக பாதிக்கப்பட்டுள்ளதால், இந்தப் பிரச்சினைக்கு தற்காலிகமான தீர்வை தாண்டி, நிரந்தர தீர்வை வழங்க அரசாங்கம் பாடுபடுவதாக பொது நிர்வாக மற்றும் உள்துறை அமைச்சர் கலாநிதி சந்தன அபேரத்ன தெரிவித்தார்.
புத்தளம் மாவட்ட செயலகத்தில் அண்மையில் நடைபெற்ற ஊடகவியலாளர் சந்திப்பில் அமைச்சர் இவ்வாறு தெரிவித்தார்.
காட்டு யானைகள் மற்றும் யானைகளுக்கு சிறந்த சூழலை உருவாக்கி அவற்றுக்கான சூழலை வளப்படுத்தும் தேசிய திட்டம் குறித்து ஊடகங்களுக்கு தெரிவிக்க குறித்த ஊடக சந்திப்பு ஏற்பாடு செய்யப்பட்டதுடன், புத்தளம்-தப்போவ குளக்கரையில் எதிர்வரும் 10 ஆம் திகதி குறித்த திட்டம் தொடங்க திட்டமிடப்பட்டுள்ளதாக தெரிவித்தார்.
நிகழ்வில் பேசிய சுற்றுச்சூழல் பிரதி அமைச்சர் அன்டன் ஜெயக்கொடி:
கடந்த காலங்களில், யானை-மனித நடவடிக்கைகளால் சுமார் 380 காட்டு யானைகளையும் 150 மனித உயிர்களையும் இழந்துள்ளோம். சொத்துக்களுக்கு ஏற்பட்ட சேதம் மிகப்பெரியது.
இந்த மனித-யானை பிரச்சினைக்கு முக்கிய காரணம் இரு தரப்பினரும் பொது நிலங்களைப் பயன்படுத்துவதும், ஒழுங்கமைக்கப்படாத திட்டங்களை செயல்படுத்துவதும்தான் என்பதை நாங்கள் அடையாளம் கண்டுள்ளோம்.
கிராமங்களுக்குள் படையெடுத்த காட்டு யானைகளை மீண்டும் காடுகளுக்குள் விரட்ட, அதற்கு முன் செய்ய வேண்டிய பல விஷயங்கள் உள்ளன.
முதலில் செய்ய வேண்டியது, காட்டு யானைகளை மீள்குடியேற்றுவதற்கு ஏற்ற வனப்பகுதியை அடையாளம் காண்பது. பின்னர், அந்த பகுதி அவற்றை நட்புறவாக மாற்றும் வகையில் தயாரிக்கப்பட வேண்டும்.
ஒரு காட்டு யானைக்கு பொதுவாக ஒரு நாளைக்கு சுமார் 150 கிலோகிராம் உணவு மற்றும் சுமார் 30 லிட்டர் தண்ணீர் தேவைப்படும் என்று கூறப்படுகிறது. எனவே, காட்டு யானைகளை காடுகளில் மீள்குடியேற்றுவதற்கு முன், அந்தப் பகுதிகளில் உள்ள நீர் தொட்டிகளை புதுப்பிக்க வேண்டும்.
மேலும், தற்போதுள்ள காடுகள் மற்றும் சுற்றியுள்ள பகுதிகளில் உள்ள சேறுகள் மற்றும் பிற ஆக்கிரமிப்பு தாவரங்கள் உள்ளிட்ட ஆக்கிரமிப்பு தாவரங்களை அகற்ற வேண்டும்.
எதிர்வரும் 10 ஆம் திகதி முதல் 12 ஆம் திகதி வரை தப்போவாவில் இதுதான் ஆரம்பிக்கப்பட்ட இருக்கிறது. இங்கு, வன பாதுகாப்பு மற்றும் வனவிலங்கு துறைகளுக்குச் சொந்தமான பாதுகாக்கப்பட்ட காடுகளில் அமைந்துள்ள பல பாழடைந்த குளங்களின் புனரமைப்பு தொடங்கும்.
இந்தத் திட்டத்தில் 370 கிலோமீட்டர் யானை வேலியின் பாழடைந்த பகுதிகளைக் கண்டறிந்து சரிசெய்வதும் அடங்கும்.
க்ளீன் ஸ்ரீலங்கா திட்டத்தின் கீழ் செயல்படுத்தப்படும் இந்த தேசிய திட்டத்திற்கு காவல்துறை, முப்படைகள், சிவில் பாதுகாப்புப் படைகள் மற்றும் பொதுமக்களின் ஆதரவைப் பெற நாங்கள் நம்புகிறோம் என பிரதி அமைச்சர் தெரிவித்தார்.
அக்டோபர் 10 முதல் 12 வரை புத்தளம் தப்போவ குளக்கரையில் தொடங்கப்படும் சுற்றுச்சூழல் வளப்படுத்தும் திட்டத்தை செயல்படுத்துவதன் மூலம் காட்டு யானைகளுக்கும் மனிதர்களுக்கும் இடையிலான மோதலைக் குறைக்க முடியும் என அரசாங்கம் எதிர்பார்க்கிறது.
புத்தளம் மாவட்ட நாடாளுமன்ற உறுப்பினர்களான கயான் ஜனக, அஜித் கிஹான், முகமது பைசல், புத்தளம் மாவட்ட செயலாளர் ஒய்.ஐ.எம். சில்வா, புத்தளம் மாவட்ட வனவிலங்கு உதவி இயக்குநர் எரந்த கமகே, புத்தளம் மாவட்ட வன அலுவலர் கமல் தென்னத்தோன் மற்றும் பிற அதிகாரிகள் இந்நிகழ்வில் கலந்து கொண்டனர்.
நாடு முழுவதும் 100 சிறிய கடற்கரை பூங்காக்களை நிறுவும் திட்டத்திற்கு ஏற்ப புத்தளம் மாவட்டத்தில் 07 கடற்கரை பூங்காக்களை நிறுவ கடலோர பாதுகாப்புத் துறை நடவடிக்கை எடுத்துள்ளது.
புத்தளம் மாவட்டத்தில் முதல் சிறிய கடற்கரை பூங்காவிற்கான அடிக்கல் நாட்டு விழா சமீபத்தில் மாரவில – குருசா தேவாலயத்திற்கு அருகில் சுற்றுச்சூழல் பிரதி அமைச்சர் அன்டன் ஜெயக்கொடி தலைமையில் நடைபெற்றது.
புத்தளம் மாவட்ட நாடாளுமன்ற உறுப்பினர்களான கயான் ஜனக, ஹிருணி விஜேசிங்க, மற்றும் நாட்டாண்டியா பிரதேச சபைத் தலைவர் சாகர விஜேசேகர ஆகியோரும் இந்த நிகழ்வில் பங்கேற்றனர்.
புத்தளம் மாவட்டத்தில் மாரவில, சிலாபம், புத்தளம் மற்றும் கல்பிட்டி பகுதிகளில் 07 கடற்கரை பூங்காக்கள் க்ளீன் ஸ்ரீலங்கா திட்டத்துடன் இணைந்து செயற்படுத்த திட்டமிடப்பட்டுள்ளன.
விற்பனைக்காக ஐஸ் மற்றும் ஹெராயின் போதை பொருட்களை பொதி செய்து கொண்டிருந்த மூன்று சந்தேக நபர்கள் கொஸ்வத்த பொலிஸாரால் கைது செய்யப்பட்டுள்ளனர்.
நேற்று 5 ஆம் தேதி கொஸ்வத்த – போதியபுர பகுதியில் காவல்துறை அதிகாரிகளால் இந்த சோதனை நடத்தப்பட்டது.
இந்த சோதனையின் போது, 106.08 கிராம் ஐஸ் மற்றும் 32.684 கிராம் ஹெராயின், ஒரு மின்னணு தராசு, 03 மொபைல் போன்கள் மற்றும் போதைப்பொருள் பொதி செய்ய பயன்படுத்தப்படும் பாலிதீன் உள்ளிட்ட பல பொருட்கள் போலீசாரால் கைப்பற்றப்பட்டன. கொஸ்வத்த – போதியபுர மற்றும் கஹதவில ஆகிய இடங்களில் வசிக்கும் மூன்று பேர் போதைப்பொருட்களுடன் போலீசாரால் நேற்று கைது செய்யப்பட்டுள்ளனர்.
கைதுசெய்யப்பட்டவர்கள் 35, 36 மற்றும் 29 வயதுடையவர்கள் என போலீசார் தெரிவித்துள்ளனர்.
முக்கிய சந்தேக நபரான போதியபுர கிராமத்தைச் சேர்ந்த “சத்து” என்பவரின் வீட்டில் பலர் விற்பனைக்காக போதைப்பொருட்களை பொதி செய்து வருவதாக சிலாபம் புலனாய்வுப் பிரிவுக்கு தகவலை அடுத்து கொஸ்வத்த பொலிசார் குறித்த சோதனையை மேற்கொண்டுள்ளனர்.
காவல்துறை அதிகாரிகள் சோதனை நடத்தியபோது, மூன்று சந்தேக நபர்களும் “சத்து” என்பவரின் வீட்டில் உள்ள ஒரு அறையில் போதைப்பொருட்களை பொதி செய்து கொண்டிருந்த நிலையில் கைதுசெய்யப்பட்டனர்.
பின்னர், காவல்துறையினரால் கைப்பற்றப்பட்ட போதைப் பொருட்கள் மாரவில ஆதார மருத்துவமனையின் மருந்தாளரால் எடைபோடப்பட்டு சீல் வைக்கப்பட்டன.
கைது செய்யப்பட்ட சந்தேக நபர்கள் சிறிது காலமாக வெளிப் பகுதிகளிலிருந்து போதைப்பொருட்களைக் கொண்டு வந்து, அவற்றைப் பொதி செய்து, தங்கள் கிராமங்களில் வசிப்பவர்களுக்கு விற்பனை செய்து வருவதாக சோதனை நடத்திய அதிகாரிகள் தெரிவித்தனர்.
கைது செய்யப்பட்ட சந்தேக நபர்களும், காவல்துறையினரால் கைப்பற்றப்பட்ட போதைப்பொருட்களும் மாரவில நீதவானிடம் ஆஜர்படுத்தப்பட உள்ளன.
கொஸ்வத்த காவல்துறையினர் மேலதிக விசாரணைகளை மேற்கொண்டு வருகின்றனர்.
விற்பனைக்காக வைத்திருந்த சுமார் 700 லேகியம் (குலி) பாக்கெட்டுகளுடன் சந்தேக நபர் ஒருவர் ஒருவர் வெண்ணப்புவ பொலிஸாரினால் கைதுசெய்யப்பட்டுள்ளார்.
நேற்றைய தினம் குறித்த சந்தேக நபர் வெண்ணப்புவ பகுதியில் வைத்து கைதுசெய்யப்பட்டுள்ளார்.
25 வயது மதிக்கத்தக்க குளியாபிட்டி பகுதியை சேர்ந்த நபர் ஒருவரே இவ்வாறு கைதுசெய்யப்பட்டுள்ளார்.
குறித்த சந்தேக நபர் தான் வேலை செய்யும் இடத்தில் லேகியம் (குலி) விற்பனை செய்வதாக பொலிஸாருக்கு கிடைத்த இரகசிய தகவலை அடுத்து மேற்கொண்ட சுற்றிவளைப்பில் சுமார் 700 லேகியம் (குலி) பாக்கெட்டுகளுடன் சந்தேக நபர் வெண்ணப்புவ பொலிஸாரினால் கைதுசெய்யப்பட்டுள்ளார்.
கைதுசெய்யப்பட்ட சந்தேக நபர் மாறவில நீதவான் முன்னிலையில் ஆஜர்படுத்தப்பட உள்ளத்துடன், மேலதிக விசாரணைகளை பொலிஸார் மேற்கொண்டு வருகின்றமை குறிப்பிடத்தக்கது.
காசாவிற்கு நிவாரணப் பொருட்களை ஏற்றிச் சென்ற கப்பல் போராளிகளை இஸ்ரேல் ராணுவம் சிறைப்பிடித்த நிலையில், அவர்கள் சித்திரவதை செய்யப்பட்டதாக வெளியான தகவல் உலகை உலுக்கியுள்ளது. காசா பகுதிக்கு மனிதாபிமான உதவிப் பொருட்களுடன் 40க்கும் மேற்பட்ட கப்பல்களில் சென்ற ‘குளோபல் சுமுத்’ நிவாரணக் கப்பல் கூட்டணியை இஸ்ரேல் கடற்படை அண்மையில் வழிமறித்தது. அதில் பயணம் செய்த, பருவநிலை செயற்பாட்டாளர் கிரெட்டா தன்பெர்க் உள்ளிட்ட 450க்கும் மேற்பட்ட சமூக ஆர்வலர்கள் கைது செய்யப்பட்டு சிறை வைக்கப்பட்டனர்.
இந்தச் சம்பவத்திற்கு துருக்கி, தென்னாப்பிரிக்கா உள்ளிட்ட நாடுகள் கடும் கண்டனம் தெரிவித்திருந்தன. இந்த நிலையில், சிறைப்பிடிக்கப்பட்ட ஆர்வலர்களில் ஒரு பகுதியினர் துருக்கியின் இஸ்தான்புல் நகருக்கு நேற்று நாடு கடத்தப்பட்டனர். இது தொடர்பாக துருக்கி பத்திரிகையாளர் எர்சின் செலிக் செய்தியாளர்களிடம் கூறுகையில், ‘கிரெட்டா தன்பெர்க்கை இஸ்ரேல் படையினர் மிகக் கடுமையாக அவமானப்படுத்தினர். அவரது தலைமுடியைப் பிடித்து இழுத்துச் சென்று, கொடூரமாகத் தாக்கினர். மேலும், அவரைத் தரையில் மண்டியிட வைத்து இஸ்ரேல் நாட்டு கொடியை வலுக்கட்டாயமாக முத்தமிட வைத்தனர்.
இதேபோல, இத்தாலிய பத்திரிகையாளர் லொரன்சோ அகோஸ்டினோ, ‘கிரெட்டாவின் மீது இஸ்ரேல் கொடியைப் போர்த்தி, வெற்றிப் கோப்பையைப் போல அவரை ஊர்வலமாக இழுத்துச் சென்றனர். பல நாட்கள் தங்களுக்கு உணவு தராமல் பட்டினி போட்டதாகவும், கழிவறையில் இருந்த நீரைக் குடிக்கச் சொல்லி வற்புறுத்தியதாகவும் மற்ற ஆர்வலர்கள் வேதனையுடன் தெரிவித்தனர்’ என்றார். இந்தக் குற்றச்சாட்டுகளை முழுமையாக மறுத்துள்ள இஸ்ரேல் வெளியுறவு அமைச்சகம், இது ‘முழுக்க முழுக்கப் பொய்’ என்றும், கைதான அனைவரும் சட்டப்படி நடத்தப்பட்டதாகவும் விளக்கம் அளித்துள்ளது.
இலங்கை கடற்படையினர், கடந்த வெள்ளிக்கிழமை (03) கற்பிட்டி குடாவ கடல் பகுதியில் நடத்திய சிறப்பு தேடுதல் நடவடிக்கையின் போது, சட்டவிரோதமாக நாட்டிற்கு கொண்டு வர முயன்ற சுமார் நானூற்று ஐந்து (405) கிலோகிராம் பீடி இலைகள், ஒரு (01) டிங்கி படகு மற்றும் இரண்டு (02) சந்தேக நபர்களையும் கடற்படையினர் கைதுசெய்துள்ளனர்.
கடல் வழிகள் ஊடாக கடத்தல் உட்பட சட்டவிரோத நடவடிக்கைகளை எதிர்த்து தீவைச் சுற்றியுள்ள கடல் மற்றும் கடற்க்கரைகளை உள்ளடக்கி கடற்படை வழக்கமான ரோந்து மற்றும் தேடுதல் நடவடிக்கைகளை மேற்கொள்கின்றது.
அதன்படி வெள்ளிக்கிழமை (03) இரவு கற்பிட்டிக்கு அருகிலுள்ள கடல் பகுதியில் வடமேற்கு கடற்படை கட்டளையின் இலங்கை கடற்படை கப்பல் விஜய நடத்திய இந்த சிறப்பு தேடுதல் நடவடிக்கையின் போது, சந்தேகத்திற்கிடமான டிங்கி (01) படகு சோதனை செய்யப்பட்டது. இந்த நடவடிக்கையின் போது, சட்டவிரோதமாக நாட்டிற்கு கொண்டு வரப்பட்ட சுமார் நானூற்று ஐந்து (405) கிலோகிராம் பீடி இலைகள் மற்றும் டிங்கி படகு இரண்டு (02) சந்தேக நபர்களுடன் கடற்படையினரால் கைப்பற்றப்பட்டுள்ளது
மேற்படி நடவடிக்கையின் போது கடற்படையினரால் கைது செய்யப்பட்ட சந்தேக நபர்கள் கற்பிட்டி முகத்துவாரம் மற்றும் பள்ளிவாசல்துறை பகுதிகளைச் சேர்ந்தவர்கள் என அடையாளம் காணப்பட்டுள்ளனர். சந்தேக நபர்கள், டிங்கி படகு மற்றும் பீடி இலைகள் மேலதிக சட்ட நடவடிக்கைகளுக்காக புத்தளம் மதுவரி திணைக்கள சிறப்புப் பிரிவிடம் ஒப்படைக்கப்பட்டுள்ளதாக தெரிவிக்கப்பட்டுள்ளது.
மூத்த ஊடகவியலாளர் அமீன் பலஸ்தீன சர்வதேச ஊடக மற்றும் தொடர்பாடல் மன்றத்தின் (Tawasol) இலங்கைப் பிரதிநிதியாக நியமிக்கப்பட்டுள்ளார்.
(கற்பிட்டி எம் எச் எம் சியாஜ்)
துருக்கியின், இஸ்தான்புல் நகரை தலைமையகமாகக் கொண்டியங்கும் பலஸ்தீன சர்வதேச ஊடக மற்றும் தொடர்பாடல் மன்றம் (Palestine International Forum for Media and Communication – Tawasol) 2014 ஆம் ஆண்டில் நிறுவப்பட்டதுடன், பலஸ்தீன மக்களின் குரலை உலக ஊடகங்களில் வலுப்படுத்துவது மற்றும் சர்வதேச ஊடகவியலாளர்கள், ஊடக ஆசிரியர்கள், ஊடக நிபுணர்கள் ஆகியோருக்கிடையிலான ஒத்துழைப்பை மேம்படுத்துவது இதன் முக்கிய இலக்காகும்.
இம்மன்றம் வருடந்தோறும் நடத்தும் மாநாடுகள், பயிற்சிகள், ஊடக முன்முயற்சிகள் மற்றும் ஆய்வுகளின் மூலம் 70க்கும் மேற்பட்ட நாடுகளிலிருந்து ஆயிரத்துக்கும் மேற்பட்ட ஊடகவியலாளர்களை ஒன்றிணைக்கின்றது.
இலங்கையின் ஊடகத் துறையில் நீண்ட அனுபவம் கொண்ட என்.எம். அமீன் ஸ்ரீ லங்கா முஸ்லிம் மீடியா போரத்தின் முன்னாள் தலைவர் என்பதுடன், இலங்கையில் முஸ்லிம் அமைப்புகளின் கூட்டு நிறுவனமான முஸ்லிம் கவுன்சில் ஒப் ஸ்ரீ லங்கா நிறுவனத்தின் தலைவரும் தெற்காசிய சுதந்திர ஊடக அமைப்பின் (SAFMA) இலங்கைக்கான ஒருங்கிணைப்பாளரும் ஆவார்.
நல்லிணக்கத்தையும் சமூக ஒற்றுமையையும் ஊக்குவிக்கும் பணிகளில் முக்கிய பங்காற்றி வரும் அவர், ஒழுக்க நெறியுடன் கூடிய ஊடகப் பண்பாட்டை வளர்த்தெடுத்தல், ஊடக அடக்குமுறைக்கு எதிராக குரல் கொடுத்தல் மற்றும் ஊடக சுதந்திரம் தொடர்பில் முன்னிற்பதற்காக பரவலாக பாராட்டப்பட்டுள்ளார்.
Tawasol மன்றத்தின் இலங்கை பிரதிநிதியாக நியமிக்கப்பட்டுள்ள என்.எம். அமீன் அவர்கள் இலங்கையிலுள்ள ஊடகவியலாளர்கள் மற்றும் மன்றத்துக்கிடையிலான ஒருங்கிணைப்பை வலுப்படுத்துவதோடு, பலஸ்தீன விவகாரம் மற்றும் ஊடகத்துறை வளர்ச்சி தொடர்பான சர்வதேச ஒத்துழைப்பை மேம்படுத்தும் பணிகளை முன்னெடுக்கவுள்ளார்.
நாரம்மல – குருநாகல் வீதியின் நாரம்மல நகருக்கு அருகில் லொறி ஒன்று இலங்கை போக்குவரத்து சபை பேருந்துடன் மோதியதில் மூன்று பேர் உயிரிழந்தனர்.
இன்று (05) அதிகாலை இந்த விபத்து இடம்பெற்றுள்ளதாக பொலிஸார் தெரிவிக்கின்றனர்.
குருநாகலில் இருந்து நாரம்மல நோக்கி பயணித்த லொறியின் சாரதியின் கட்டுப்பாட்டை இழந்து வீதியின் வலது பக்கத்திற்கு சென்று கட்டுநாயக்கவிலிருந்து அக்கரைப்பற்று நோக்கி பயணித்த இலங்கை போக்குவரத்து சபைக்கு சொந்தமான பேருந்துடன் மோதி இந்த விபத்து இடம்பெற்றுள்ளது.
விபத்தில் லொறியின் சாரதி, ஆண் ஒருவர் , 2 பெண்கள் மற்றும் இரண்டு குழந்தைகள் காயமடைந்த நிலையில் நாரம்மல மற்றும் குருநாகல் வைத்தியசாலைகளில் அனுமதிக்கப்பட்டுள்ளனர்.
இதன்போது லொறியின் சாரதி, ஆண் ஒருவர் மற்றும் பெண் ஒருவருமாக மூவர் உயிரிழந்ததாக பொலிஸார் தெரிவிக்கின்றனர்.
உயிரிழந்தவர்கள் பொலன்னறுவையைச் சேர்ந்த, 41, 80 மற்றும் 82 வயதுடையவர்கள் என தெரியவந்துள்ளது.
குறித்த லொறியில் பயணித்த 40 வயதுடைய பெண், 16 மற்றும் 9 வயதுடைய இரண்டு சிறுமிகள் இன்னும் குருநாகல் வைத்தியசாலையில் சிகிச்சை பெற்று வருகின்றனர்.
சடலங்கள் நாரம்மல மற்றும் குருநாகல் வைத்தியசாலைகளின் பிரேத அறைகளில் வைக்கப்பட்டுள்ளன.
பேருந்தின் சாரதி கைது செய்யப்பட்டுள்ளதுடன் நாரம்மல பொலிஸார் மேலதிக விசாரணைகளை முன்னெடுத்து வருகின்றனர்.
