நாட்டில் பொது அவசரகால நிலையைப் பிரகடனப்படுத்தி வெளியிடப்பட்டுள்ள வர்த்தமானி அறிவித்தல் மீண்டும் நீடிக்கப்பட்டுள்ளது. 

ஜனவரி மாதம் 28 ஆம் திகதி முதல் நடைமுறைக்கு வரும் வகையில், ஜனாதிபதி அநுர குமார திசாநாயக்கவின் உத்தரவின் பேரில் இந்த வர்த்தமானி அறிவித்தல் வெளியிடப்பட்டுள்ளதாகத் தெரிவிக்கப்படுகிறது. 

நிலவிய அனர்த்த நிலைமையைக் கருத்திற் கொண்டு, ஜனாதிபதி அநுர குமார திசாநாயக்கவினால் கடந்த நவம்பர் மாதம் 28 ஆம் திகதி பொது பாதுகாப்பு மற்றும் நாட்டின் நல்வாழ்வைப் பாதுகாத்தல் மற்றும் பொதுமக்களின் வாழ்க்கைக்கு அவசியமான விநியோகங்கள் மற்றும் சேவைகளைப் பேணுதல் ஆகியவற்றைக் குறிக்கோளாகக் கொண்டு பொது அவசரகால நிலை பிரகடனப்படுத்தப்பட்டது. 

இதற்கிடையில், 2025 ஆம் ஆண்டின் 01 ஆம் இலக்க அவசரகால ஏற்பாடுகள் மற்றும் அதிகாரங்கள் தொடர்பான கட்டளைகளைத் திருத்தம் செய்வதற்கும் அரசாங்கம் நடவடிக்கை எடுத்துள்ளது. 

கடந்த நவம்பர் மாதம் 28 ஆம் திகதி பிரகடனப்படுத்தப்பட்ட குறித்த கட்டளைகள், ஜனவரி மாதம் 28 ஆம் திகதி முதல் நடைமுறைக்கு வரும் வகையில் ஜனாதிபதி அநுர குமார திசாநாயக்கவின் அறிவுறுத்தலின் பேரில் திருத்தப்பட்டுள்ளதாகத் தெரிவிக்கப்படுகிறது. அதற்குரிய வர்த்தமானி அறிவித்தலும் வெளியிடப்பட்டுள்ளது. 

புதிய அவசரகால கட்டளைகளுக்கு இணங்க, இதற்கு முன்னர் நடைமுறையிலிருந்த பல கட்டளைகளைத் திருத்தம் செய்வதற்கு அரசாங்கம் நடவடிக்கை எடுத்துள்ளதுடன், பல புதிய கட்டளைகளை அறிமுகப்படுத்தவும் நடவடிக்கை எடுக்கப்பட்டுள்ளதாகத் தெரிவிக்கப்படுகிறது. 

அவசரகால நிலைப் பிரகடனத்துடன் அரச அதிகாரிகள் எவ்வாறு செயற்பட வேண்டும் என்பது குறித்தும், குறித்த கட்டளைகளுக்கு முரணாகச் செயற்படுபவர்களுக்கு எதிராக எடுக்கப்பட வேண்டிய நடவடிக்கைகள் குறித்தும் அந்தக் கட்டளைகளின் மூலம் விளக்கமளிக்கப்பட்டுள்ளது.

கல்வியே ஒரு சமூகத்தின் கண்கள். அந்தக் கண்கள் இருண்டுவிடக் கூடாது என்ற ஆதங்கத்தில், இன்று புத்தளம் நகரில் பெற்றோர்கள் ஒருமித்த குரலில் திரண்டனர்.

6-ம் தர மாணவர்களுக்கான புதிய பாடத்திட்டத்தை உடனடியாக நடைமுறைப்படுத்தக் கோரி, கல்வி அதிகாரிகளின் கதவுகளைத் தட்டி தங்களது நீதியான கோரிக்கையை முன்வைத்தனர்.

இன்று காலை புத்தளம் வலயக் கல்விப் பணிமனைக்கு முன்பாக பெற்றோர்கள் பெருமளவில் திரண்டனர். எந்தவிதமான வன்முறைகளுமின்றி, மிகவும் அமைதியான முறையில் அதேநேரம் அதிகாரிகளின் கவனத்தை ஈர்க்கும் வகையில் இந்த ஆர்ப்பாட்டத்தை முன்னெடுத்தனர்.

தமது பிள்ளைகளின் கல்வி எதிர்காலம் கேள்விக்குறியாவதை பொறுத்துக்கொள்ள முடியாத பெற்றோர்கள், கைகளில் ஏந்தியிருந்த பதாதைகள் வழியே அதிகாரிகளுக்கு பலமான செய்தியைச் சொல்ல முயன்றனர். “புதிய பாடத்திட்டம் எங்கே?”, “எங்கள் பிள்ளைகளின் கல்வி உரிமையை பறிக்காதே!” போன்ற வாசகங்கள் அந்த இடத்தையே உணர்வுபூர்வமாக மாற்றியது.

ஆர்ப்பாட்டத்தில் ஈடுபட்ட பெற்றோர்கள் பேரணியாகச் சென்று, தமது நியாயமான கோரிக்கைகள் அடங்கிய மகஜரை (Petition) உரிய அதிகாரிகளிடம் கையளித்தனர்.

முதலில், புத்தளம் வலயக் கல்விப் பணிமனையின் நிர்வாக அதிகாரி மனூஷா செவ்வந்தி அவர்களிடம் மகஜர் வழங்கப்பட்டது.

அதனைத் தொடர்ந்து, புத்தளம் மாவட்டச் செயலாளர் இந்திக்க சில்வா அவர்களையும் நேரில் சந்தித்து தமது கவலைகளையும் கோரிக்கைகளையும் பெற்றோர்கள் பகிர்ந்து கொண்டனர்.

ஏன் இந்தப் போராட்டம்?

புதிய பாடத்திட்டம் அறிமுகப்படுத்தப்படுவதாக அறிவிக்கப்பட்டும், அது இன்னும் முழுமையாக நடைமுறைக்கு வராதது மாணவர்களின் கற்றல் செயல்பாடுகளைப் பாதித்துள்ளதாக பெற்றோர்கள் கவலை தெரிவிக்கின்றனர்.

பரீட்சைகள் நெருங்கும் வேளையில், போதிய வழிகாட்டல்கள் இன்றி மாணவர்கள் தவிப்பதாகவும், இதற்கு கல்வி அமைச்சு உடனடியாகத் தீர்வுகாண வேண்டும் என்றும் அவர்கள் வலியுறுத்தினர்.

சமூகத்தின் அடித்தளமான மாணவர்களின் கல்விக்காக, தகிக்கும் வெயிலையும் பொருட்படுத்தாது வீதிக்கு வந்த பெற்றோர்களின் இந்த முயற்சி, அதிகாரிகளின் செவிகளை எட்டுமா என்பதை பொறுத்திருந்துதான் பார்க்க வேண்டும்.

நிசாம் காரியப்பர் மற்றும் அதாஉல்லாவின் பலத்த எதிர்ப்பினால் நுரைச்சோலை பிரேரணை புஸ்வாணமானது

(எஸ்.எம்.அறூஸ்)

அம்பாரை மாவட்ட ஒருங்கிணைப்புக் குழுக்கூட்டம் அரசாங்க அதிபர் சிந்தக்க அபேவிக்ரமவின் ஒருங்கிணைப்பிலும், அம்பாரை மாவட்ட ஒருங்கிணைப்புக் குழுத்தலைவரும்,கிராமிய அபிவிருத்தி,சமூக பாதுகாப்பு மற்றும் சமூக வலுவூட்டல் பிரதியமைச்சருமான வசந்த பியதிஸ்ஸ தலைமையில் இன்று (30) மாவட்ட செயலக கேட்போர் கூடத்தில் இடம்பெற்றது.

இக்கூட்டத்தில் கிழக்கு மாகாண ஆளுநர் பேராசிரியர் ஜயந்தலால் ரத்நாயக்க, மாவட்ட பாராளுமன்ற உறுப்பினர்களான மஞ்சுல. ரத்நாயக்க, எம்.எஸ்.உதுமாலெப்பை, முத்து ரத்வத்த, ஏ.ஆதம்பாவா, கே.கோடிஸ்வரன், எம்.எஸ்.அப்துல் வாசித், சட்டத்தரணி நிசாம் காரியப்பர், சட்டத்தரணி பிரியந்த விஜேரத்ன உள்ளிட்ட கிழக்குமாகாண அமைச்சுக்களின் செயலாளர்கள், திணைக்களத் தலைவர்கள், உள்ளுராட்சி மன்றங்களின் தலைவர்கள், பாதுகாப்பு உயர் அதிகாரிகள் என பலரும் கலந்து கொண்டு சிறப்பித்தனர்.

இங்கு அரசாங்கத்தினால் முன்னெடுக்கப்பட்டு வரும் விசேட வேலைத்திட்டங்கள் தொடர்பாகவும், 2025 – 2026ம் ஆண்டில் அம்பாரை மாவட்ட செயலகம் ஊடாக செயற்படுத்தப்படுகின்ற செயற்திட்டங்கள் மற்றும் வேறு தாபனங்கள் ஊடாக செயற்படுத்தப்படும் செயற்திட்டங்கள் தொடர்பிலும் ஆராயப்பட்டது.

தொடர்ந்தும் அம்பாரை மாவட்டத்தில் காணப்படும் நீர்ப்பாசனம், சுகாதாரம், கல்வி, காணி,வீதி அபிவிருத்தி,திண்மக்கழிவகற்றல், குடிநீர் திட்டம், யானை வேலி பாதுகாப்பு முறைமை போன்ற பல விடயங்கள் தொடர்பில் விரிவாக கலந்துரையாடப்பட்டதுடன் உரிய அதிகாரிகள் இவ்விடயங்களில் அதீக அக்கரையுடன் பணியாற்றுமாறு ஒருங்கிணைப்புக் குழுவின் தலைவர் மற்றும் மாகாண ஆளுநர் ஆகியோரினால் அறிவுறுத்தல் வழங்கப்பட்டமை விசேட அம்சமாகும்.

மேலும், நுரைச்சோலை வீட்டுத் திட்டத்தை நீதிமன்றத் தீர்ப்பை மையமாக வைத்து மக்களிடம் கையளிக்கும் பிரேரணையை பிரதியமைச்சர் வசந்த பியதிஸ்ஸ கொண்டு வந்த போது, பாராளுமன்ற உறுப்பினர் நிசாம் காரியப்பர் மற்றும் அக்கரைப்பற்று மாநகர சபை மேயர் ஏ.எல்.எம்.அதாஉல்லா ஆகியேர் பலமாக எதிர்த்ததுடன் பாராளுமன்றக் குழுவின் ஊடாகவே இதனை ஆராய்ந்து முடிவெடுக்க வேண்டுமென நிசாம் காரியப்பர் இங்கு தெரிவித்தார்.

நுரைச்சோலை வீட்டுத் திட்டம் பாதிக்கப்பட்ட மக்களுக்குரியது எனவும் அக்காணிகள் யாவும் அக்கறைப்பற்று பிரதேசத்திற்குரிய காணிகள் என்பதையும் மிகவும் ஆணித்தரமாக குரல் எழுப்பினார். அவருக்கு ஆதரவாக அக்கரைப்பற்று மாநகர சபை உறுப்பினர் ஏ.எல்.தவம் அவர்களும் தனது கருத்தை தெரிவித்தார். இதன்போது இரு தரப்பினருக்குமிடையில் வாக்குவாதம் இடம்பெற்றதும் குறிப்பிடத்தக்கதாகும்.

அத்தோடு எதிர்காலத்தில் பிரதேசங்களின் அபிவிருத்தி வேலைத்திட்ட நிகழ்வுகளில் எதிர்க்கட்சி பாராளுமன்ற உறுப்பினர்களையும் அழைக்க வேண்டும் என பாராளுமன்ற உறுப்பினர் எம்.எஸ்.உதுமாலெப்பை கொண்டு வந்த பிரேரணையை ஒருங்கிணைப்புக் குழுவின் தலைவரும், பிரதியமைச்சருமான வசந்த பியதிஸ்ஸ ஏற்றுக்கொண்டு அதற்கு நடவடிக்கை எடுப்பதாக இங்கு தெரிவித்தார்.

தொடர்ந்தும், பிரஜா சக்தி குழுக்கள் நியமித்தப்படும்போது, கட்சி அரசியல் சாராமல் உறுப்பினர்கள் நியமிக்கப்படுவார்கள் என்பதுடன் அவ்வாறு நியமிக்கப்பட்டால் தனக்கு எழுத்து மூலம் அறிவிக்குமாரும் பிரதியமைச்சர் வசந்த பியதிஸ்ஸ குறிப்பிட்டார்.

அமைதியான கிராமப்புறச் சூழலுக்குள் மறைந்திருந்த பாரிய போதைப்பொருள் வலைப்பின்னலை மேல் மாகாண வடக்கு குற்றத்தடுப்புப் பிரிவினர் இன்று அதிரடியாக முறியடித்துள்ளனர்.

இன்று (29) காலை கணேமுல்ல, பொல்லதே பகுதியில் முன்னெடுக்கப்பட்ட விஷேட சுற்றிவளைப்பின் போது, எவரும் எதிர்பாராத வகையில் 48 வயதுடைய பெண் ஒருவர் கைது செய்யப்பட்டுள்ளார். அவரிடமிருந்து கைப்பற்றப்பட்ட போதைப்பொருட்களின் பெறுமதி பொலிஸாரையே வியப்பில் ஆழ்த்தியுள்ளது.

இன்று (29) காலை மேல் மாகாண வடக்கு குற்றத்தடுப்புப் பிரிவினரால் இந்தச் சந்தேகநபர் கைது செய்யப்பட்டார். 

ஒரு நடுத்தர வயதுப் பெண் இவ்வளவு பெரிய தொகையிலான போதைப்பொருட்களைப் பதுக்கி வைத்திருந்தமை அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. இளைய தலைமுறையைச் சீரழிக்கும் இந்த “மெதுவான விஷம்” சமூகத்தின் அடிமட்டம் வரை ஊடுருவியிருப்பதை இச்சம்பவம் உறுதிப்படுத்துகிறது.

குறித்த பெண்ணை கைது செய்யும் போது, அவரிடமிருந்து 04 கிலோகிராமிற்கும் அதிகமான கொக்கேய்ன் மற்றும் 3450 இற்கும் அதிகமான போதை மாத்திரைகள் பொலிஸாரால் கைப்பற்றப்பட்டுள்ளன. 

சம்பவம் தொடர்பில் மேல் மாகாண வடக்கு குற்றத்தடுப்புப் பிரிவு மேலதிக விசாரணைகளை மேற்கொண்டு வருகிறது.

இலங்கைக்குள் ‘நிபா’ வைரஸ் பரவும் அபாயம் தற்போது மிகக் குறைந்த மட்டத்திலேயே காணப்படுவதாகச் சுகாதார மற்றும் வெகுசன ஊடக அமைச்சின் செயலாளர், விசேட வைத்திய நிபுணர் அனில் ஜாசிங்க தெரிவித்துள்ளார். 

‘நிபா’ வைரஸ் தொடர்பில் தெளிவுபடுத்தி ஊடக அறிக்கை ஒன்றை வெளியிட்டு அவர் இதனைக் குறிப்பிட்டுள்ளார். 

அண்மைக் காலத்தில் இந்தியாவின் மேற்கு வங்காள மாநிலத்தில் ‘நிபா’ வைரஸ் தொற்றுடைய சிலர் அடையாளம் காணப்பட்டுள்ளதாக அந்த அறிக்கையில் குறிப்பிடப்பட்டுள்ளது. 

எனினும், அந்த நிலைமையைக் கருத்திற்கொண்டு உலக சுகாதார ஸ்தாபனம் சர்வதேச பயணக் கட்டுப்பாடுகளை விதிக்கப் பரிந்துரைக்கவில்லை எனவும் சுகாதார மற்றும் வெகுசன ஊடக அமைச்சின் செயலாளர் வெளியிட்டுள்ள அறிக்கையில் தெரிவிக்கப்பட்டுள்ளது. 

‘நிபா’ வைரஸ் பிரதானமாக விலங்குகளுக்கு இடையில், குறிப்பாக வௌவால்களுக்கு இடையில் காணப்படும் ஒரு தொற்று நோயாகும். 

தொற்றுக்குள்ளான விலங்குகள் அல்லது பொருட்களுடன் நெருங்கிய தொடர்பு ஏற்படும் போது மிக அரிதாகவே மனிதர்களுக்குப் பரவக்கூடும் எனவும் அதில் தெளிவுபடுத்தப்பட்டுள்ளது. 

மனிதர்களுக்கு இடையில் தொற்று பரவுவது நெருங்கிய மற்றும் நீண்டகால தொடர்புகள் ஊடாக மாத்திரமே இடம்பெறுவதாகவும், இந்த வைரஸ் இன்ஃபுளுவென்சா போன்று காற்றின் மூலம் இலகுவாகப் பரவும் வைரஸ் அல்ல எனவும் குறிப்பிடப்பட்டுள்ளது. 

மேலும், நோயாளர்களை விரைவாக அடையாளம் காண்பதற்காகப் பலமான நோய் கண்காணிப்பு முறைமை இலங்கையில் செயற்படுவதாகவும், ஏதேனும் நோய் நிலைமை அடையாளம் காணப்பட்டால் உடனடியாகப் பதிலளிக்கச் சுகாதார அமைச்சு முழுமையாகத் தயாராக உள்ளதாகவும் செயலாளர் குறிப்பிட்டுள்ளார். 

அதற்காக மருத்துவ ஆராய்ச்சி நிறுவனத்திடம் நோயைக் கண்டறிவதற்கு தேவையான ஆய்வுகூட வசதிகளும் உள்ளதாக அவர் வலியுறுத்தினார். 

சுகாதார அமைச்சு உலக சுகாதார ஸ்தாபனம் உள்ளிட்ட உரிய சர்வதேச நிறுவனங்களுடன் நெருங்கிய ஒத்துழைப்புடன் செயற்பட்டுப் பிராந்திய நோய் நிலைமையைக் கண்காணித்து வருவதாகவும், சரியான தகவல்களுக்கு உத்தியோகபூர்வ அறிவிப்புகள் மற்றும் நம்பகமான மூலங்களை மாத்திரம் பயன்படுத்துமாறும் பொதுமக்களுக்கு ஆலோசனை வழங்கப்பட்டுள்ளது.

ஏ9 பிரதான வீதியில் இன்று பகல் இடம்பெற்ற பயங்கர விபத்தில், அரச பேருந்தும் மணல் ஏற்றி வந்த டிப்பர் வாகனமும் மோதி விபத்துக்குள்ளாகின. இந்த விபத்தில் பேருந்து சாரதி உட்பட நால்வர் படுகாயமடைந்து உயிருக்கு போராடிய நிலையில் கிளிநொச்சி வைத்தியசாலையில் அனுமதிக்கப்பட்டுள்ளனர்.

யாழ்ப்பாணத்திலிருந்து வவுனியா நோக்கிப் பயணித்த இலங்கை போக்குவரத்துச் சபைக்குச் சொந்தமான பேருந்து, கிளிநொச்சி பொலிஸ் பிரிவுக்குட்பட்ட முருகண்டி பகுதியில் பயணித்துக் கொண்டிருந்தபோது இந்த விபத்து நேர்ந்துள்ளது.

எதிரே யாழ்ப்பாணம் நோக்கி மணல் ஏற்றி வந்த டிப்பர் வாகனத்தின் சாரதிக்கு ஏற்பட்ட திடீர் நித்திரை கலக்கம் காரணமாக, கட்டுப்பாட்டை இழந்த டிப்பர் வாகனம் வேகமாக வந்த பேருந்துடன் நேருக்கு நேர் மோதியுள்ளது.

மோதிய வேகத்தில் இரண்டு வாகனங்களின் முன்பகுதிகளும் பலத்த சேதமடைந்தன.

சம்பவ இடத்திற்கு விரைந்த பொதுமக்கள் மற்றும் பொலிஸார், சிதைந்த பாகங்களுக்குள் சிக்கியிருந்தவர்களை நீண்ட போராட்டத்திற்குப் பிறகு மீட்டு கிளிநொச்சி மாவட்ட பொது வைத்தியசாலையில் அனுமதித்தனர்.

காயமடைந்தவர்களின் நிலைமை கவலைக்கிடமாக உள்ளதாக வைத்தியசாலை தகவல்கள் தெரிவிக்கின்றன.

நீண்ட தூரப் பயணங்களை மேற்கொள்ளும் சாரதிகள், போதிய ஓய்வெடுத்து வாகனங்களை செலுத்துவதன் மூலமே இவ்வாறான அனர்த்தங்களைத் தவிர்க்க முடியும் என பொலிஸார் மீண்டும் எச்சரிக்கை விடுத்துள்ளனர்.