கொழும்பு மற்றும் அதனைச் சூழவுள்ள புறநகர்ப் பகுதிகளில் நிலவும் கடுமையான போக்குவரத்து நெரிசலுக்கு முற்றுப்புள்ளி வைக்கும் வகையில், அதிநவீன புதிய மின்சார ரயில் திட்டப் பணிகள் அடுத்த ஆண்டு ஆரம்பமாகவுள்ளன.

ஹம்பாந்தோட்டையில் நடைபெற்ற மக்கள் சந்திப்பொன்றில் உரையாற்றிய மாகாண சபைகள் மற்றும் உள்ளூராட்சி பிரதி அமைச்சர் ருவன் சேனாரத்ன, இத்திட்டத்திற்கான ஆரம்பக்கட்ட வடிவமைப்பு மற்றும் திட்டமிடல் பணிகள் தற்போது வெற்றிகரமாக நிறைவடைந்துள்ளதாகக் குறிப்பிட்டார்

மருதானை ரயில் நிலையத்தை பிரதான மையமாகக் கொண்டு இந்த நவீன மின்சார ரயில் சேவை இயங்கவுள்ளது. தினசரி அலுவலகப் பணிகளுக்காகவும் அத்தியாவசியத் தேவைகளுக்காகவும் கொழும்பு நகருக்குள் படையெடுக்கும் பொதுமக்களுக்கு மிகவும் துரிதமான, சூழல் நட்பான மற்றும் நவீனமயமான பொதுப் போக்குவரத்து கட்டமைப்பை வழங்குவதே இதன் பிரதான இலக்காகும்.

குறிப்பாக, தென் மாகாணத்திலிருந்து பயணிக்கும் பொதுமக்களுக்கு இத்திட்டம் மிகப்பெரிய மாற்றத்தை ஏற்படுத்தவுள்ளது. பெலியத்தையிலிருந்து ‘ருகுணு குமாரி’ விரைவு ரயில் மூலம் வரும் பயணிகள், பாணந்துறை ரயில் நிலையத்தில் இறங்கி, அங்கிருந்து இணைக்கப்படும் மின்சார ரயில் சேவை ஊடாக எவ்வித நெரிசலுமின்றி நேரடியாக கொழும்பு நகரப் பகுதிகளை சென்றடைய வழிவகை செய்யப்பட்டுள்ளது.

நாட்டின் தரைவழிப் போக்குவரத்து மற்றும் நெடுஞ்சாலைத் துறைகளில் பல்வேறு உட்கட்டமைப்பு மேம்பாடுகள் முன்னெடுக்கப்பட்டு வருவதாகச் சுட்டிக்காட்டிய பிரதி அமைச்சர், கொழும்பு மற்றும் அதன் சுற்றுவட்டாரப் பகுதிகளில் அரச போக்குவரத்து வலையமைப்பை பலப்படுத்தும் நோக்கில் ஏற்கனவே ‘மெட்ரோ பஸ்’ (Metro Buses) சேவைகள் வெற்றிகரமாக அறிமுகப்படுத்தப்பட்டுள்ளதாகவும் தெரிவித்தார்.

1. யாழில் அதிக விலைக்கு விற்ற 3 கடைகளுக்கு ஆப்பு: ரூ. 6.68 இலட்சம் அபராதம்!
2. தண்ணீர் போத்தல் ரூ. 200… பொன்னி சம்பா ரூ. 255க்கு மேல்: சிக்கிய யாழ் வியாபாரிகள்!
3. பால் பொன்னி என ஏமாற்றிய வியாபாரி: லேப் ரிப்போர்ட்டில் அம்பலமான உண்மை!

யாழ்ப்பாணத்தில் நுகர்வோரை ஏமாற்றி அதிக விலைக்கு அத்தியாவசியப் பொருட்களை விற்பனை செய்து வந்த வர்த்தகர்களுக்கு நுகர்வோர் விவகார அதிகாரசபை அதிரடி ‘செக்’ வைத்துள்ளது. யாழ். மாவட்ட நுகர்வோர் விவகார அதிகாரசபையின் புலனாய்வு அதிகாரிகள் மேற்கொண்ட அதிரடி சோதனைகளைத் தொடர்ந்து, யாழ். நீதவான் நீதிமன்றினால் மூன்று வர்த்தக நிலையங்களுக்கு ஒட்டுமொத்தமாக ரூ. 668,000 அபராதம் விதிக்கப்பட்டுள்ளது.

இந்தச் சோதனையின் போது அம்பலமான பகீர் விவகாரங்களில் முதன்மையானது ஒரு குடிநீர் போத்தல் மோசடி. சந்தையில் அதிகபட்ச சில்லறை விலை ரூ. 120 என நிர்ணயிக்கப்பட்ட ஒரு லீற்றர் குடிநீர் போத்தலை, யாழ்ப்பாணத்திலுள்ள உணவகம் மற்றும் மதுபான விற்பனை நிலையம் ஒன்று ரூ. 200க்கு விற்பனை செய்துள்ளது. இந்த அப்பட்டமான விதிமீறலை நிரூபித்த அதிகாரிகளின் நடவடிக்கையைத் தொடர்ந்து, அந்த உணவகத்திற்கு நீதிமன்றம் ரூ. 300,000 என்ற பாரிய அபராதத்தை விதித்தது.

இதனைத் தொடர்ந்து சிக்கிய மற்றொரு பிரபல கஃபே (Café), போத்தலில் அச்சிடப்பட்ட சில்லறை விலையை விடக் கூடுதல் விலைக்கு குளிர்பானத்தை (Soda) விற்ற குற்றத்திற்காக நீதிமன்றத்தால் ரூ. 100,000 அபராதம் விதிக்கப்பட்டு தண்டிக்கப்பட்டது.

எனினும், நீதிமன்றத்தையே ஏமாற்ற முயன்ற மற்றொரு அரிசி வியாபாரியின் தந்திரம் விஞ்ஞான ரீதியாக அம்பலமான சம்பவம் அங்கு பெரும் பரபரப்பை ஏற்படுத்தியது. ஒரு கிலோகிராம் பொன்னி சம்பா அரிசிக்கான அதிகபட்ச சில்லறை விலை ரூ. 255 ஆக உள்ள நிலையில், அதனை விட அதிக விலைக்கு விற்ற வியாபாரி ஒருவர் மீது வழக்குத் தொடரப்பட்டது. நீதிமன்ற விசாரணையின் போது, தாம் விற்றது சாதாரண சம்பா அல்ல, விலை உயர்ந்த ‘பால் பொன்னி’ என அந்த உரிமையாளர் வாதிட்டார்.

ஆனால், நுகர்வோர் விவகார அதிகாரசபை சளைக்காமல் நீதிமன்ற உத்தரவு பெற்று, அந்த அரிசி மாதிரியை அரிசி ஆராய்ச்சி நிறுவனத்திற்கு அனுப்பி பரிசோதனை செய்தது. பரிசோதனை முடிவில் அது சாதாரண இறக்குமதி செய்யப்பட்ட ‘பொன்னி சம்பா’ என்பது அறிவியல் பூர்வமாக நிரூபிக்கப்படவே, ஏமாற்றிய குற்றத்திற்காக அந்த வர்த்தகருக்கு நீதிமன்றம் ரூ. 268,000 அபராதம் விதித்து அதிரடி தீர்ப்பளித்தது.

பொருட்களைக் கொள்வனவு செய்யும் போது அச்சிடப்பட்ட விலை மற்றும் அதிகபட்ச சில்லறை விலையைச் சரிபார்த்து வாங்குமாறும், முறைப்பாடுகளை முன்வைக்க பற்றுச்சீட்டுகளை (Receipts) ஆதாரமாகப் பாதுகாத்து வைக்குமாறும் நுகர்வோர் விவகார அதிகாரசபை பொதுமக்களைக் கேட்டுக்கொண்டுள்ளது. இவ்வாறான வர்த்தக அநீதிகள் அல்லது விலை மோசடிகள் இடம்பெற்றால், வேலை நேரங்களில் 1977 என்ற அவசர தொலைபேசி இலக்கத்திற்கு உடனடியாகத் தொடர்பு கொண்டு முறையிடுமாறு நுகர்வோர் அறிவுறுத்தப்படுகின்றனர்.

• முச்சக்கர வண்டிகளை ஓட்டுவதற்கான குறைந்தபட்ச வயதை 40 ஆக உயர்த்துவதற்கு அரசு எதிர்பார்ப்பு.
• பள்ளிப் படிப்பை முடித்த உடனேயே இளைஞர்கள் முச்சக்கரவண்டி தொழிலுக்குள் நுழைவதைத் தடுப்பதே நோக்கம்.
• தொழிற்கல்வி பிரதி அமைச்சர் நளின் ஹேவகே விடுத்துள்ள முக்கிய அறிக்கை.

இலங்கையில் இளைஞர்கள் மத்தியில் பெரும் பேசுபொருளாக மாறக்கூடிய அதிரடியான கருத்து ஒன்றை தொழிற்கல்வி பிரதி அமைச்சர் நளின் ஹேவகே வெளியிட்டுள்ளார். நாட்டில் முச்சக்கர வண்டிகளைச் செலுத்துவதற்கான குறைந்தபட்ச வயதை 40 ஆக உயர்த்துவதற்கு அரசாங்கம் எதிர்பார்த்துள்ளதாக அவர் குறிப்பிட்டுள்ளார்.

பாடசாலைக் கல்வியை நிறைவு செய்த உடனேயே, பல இளைஞர்கள் எவ்வித தொழிற்பயிற்சியுமின்றி நேரடியாக முச்சக்கர வண்டி ஓட்டும் தொழிலைத் தெரிவு செய்து வீதிக்கு வருகின்றனர். இந்த நிலையை முற்றாகக் கட்டுப்படுத்தி, இளைஞர்களின் ஆற்றலை நாட்டின் ஆக்கப்பூர்வமான பணிகளுக்குப் பயன்படுத்துவதே இத்திட்டத்தின் பிரதான நோக்கம் என அமைச்சர் தெளிவுபடுத்தியுள்ளார்.

நாட்டின் எதிர்காலம் முழுமையாகப் பிள்ளைகளின் கைகளிலேயே தங்கியுள்ளது என்பதைச் சுட்டிக்காட்டிய பிரதி அமைச்சர், ஒரு நாடு அபிவிருத்தியடைய வேண்டுமானால் அங்கு முறையான மற்றும் திறமையான மனித வளம் உருவாக்கப்பட வேண்டும் என்பதை ஆணித்தரமாகத் தெரிவித்தார்.

இதனைக் கருத்திற்கொண்டு, தற்போதைய அரசாங்கம் மனித வள மேம்பாட்டிற்கு அதிக முன்னுரிமை வழங்கி செயற்பட்டு வருகிறது. அதன் ஒரு கட்டமாகவே, கல்வி முறையில் பாரிய மாற்றங்களை ஏற்படுத்தும் நோக்கில் புதிய கல்விச் சீர்திருத்தங்கள் யாவும் தற்போது அறிமுகப்படுத்தப்பட்டு வருகின்றன.

இளைஞர்கள் பாடசாலைக் கல்வியை முடித்த கையோடு வீதிக்கு வந்து முச்சக்கர வண்டி ஓட்டுவதைத் தடுத்து, அவர்களை முறையான கல்வி மற்றும் தொழிற்திறன் கொண்ட மனித வளமாக மாற்றுவதே தங்களின் இறுதி இலக்கு என அமைச்சர் மேலும் திட்டவட்டமாகக் கூறினார்.

• சபாநாயகருக்கு வரம்பற்ற எரிபொருள்: 2024-இல் மாதத்திற்கு சராசரியாக 6,122 லீற்றர் வரை பயன்படுத்தப்பட்டு, எரிபொருளுக்காக மட்டும் ரூ. 2.6 கோடிக்கும் மேல் செலவு.
• சொந்த சொகுசு காருக்கு அரசு எரிபொருள்: பிரதி சபாநாயகர் தனது சொந்த வாகனத்திற்கு மட்டும் விதிமுறைகளை மீறி ரூ. 85 இலட்சத்திற்கும் அதிக பெறுமதியான 21,299 லீற்றர் எரிபொருளைப் பெற்றுள்ளார்.

இலங்கையின் 8-வது மற்றும் 9-வது பாராளுமன்றக் கூட்டத்தொடர்களின் போது சபாநாயகர், பிரதி சபாநாயகர் மற்றும் உயர் அதிகாரிகளால் மேற்கொள்ளப்பட்ட கட்டுக்கடங்காத எரிபொருள் பயன்பாடுகள் மற்றும் செலவினங்கள் தொடர்பான அதிர்ச்சித் தகவல்கள் தேசிய கணக்காய்வு அறிக்கையின் மூலம் வெளிச்சத்திற்கு வந்துள்ளன.

சபாநாயகரின் எல்லையற்ற பயன்பாடு

சபாநாயகரின் உத்தியோகபூர்வ பயன்பாட்டிற்கு எவ்வித வரம்புகளும் விதிக்கப்படாததன் காரணமாக, கடுமையான நிதி நெருக்கடி நிலவிய காலப்பகுதியிலும் எரிபொருள் பயன்பாடு மிகக் கணிசமாக அதிகரித்துள்ளது. 2022-ஆம் ஆண்டுடன் ஒப்பிடுகையில், 2023-இல் 66% வளர்ச்சியுடன் மாதம் சராசரியாக 3,994 லீற்றரும், 2024-இல் 155% அதிரடி வளர்ச்சியுடன் மாதம் சராசரியாக 6,122 லீற்றரும் பயன்படுத்தப்பட்டுள்ளது. இதற்காக 2023-இல் ரூ. 19.37 மில்லியனும், 2024-இல் ரூ. 26.04 மில்லியனும் அரசுப் பணத்திலிருந்து செலவிடப்பட்டுள்ளது.

சொந்த சொகுசு காருக்கு ரூ. 85 இலட்சம் அரசு எரிபொருள்

பிரதி சபாநாயகருக்கு அமைச்சரவை அல்லாத அமைச்சர் அந்தஸ்து வழங்கப்பட்டிருந்த போதும், உரிய எரிபொருள் வரம்புகள் பின்பற்றப்படவில்லை. அனுமதிக்கப்பட்ட 3 உத்தியோகபூர்வ வாகனங்களுக்கும் மேலதிகமாக, 2023–2024 காலப்பகுதியில் தனது சொந்த சொகுசு காரொன்றிற்கு ரூ. 8,545,037 பெறுமதியான 21,299 லீற்றர் எரிபொருளை அவர் பெற்றுள்ளார். மேலும், உத்தியோகபூர்வ வாகனங்களுக்கும் அனுமதிக்கப்பட்ட எல்லையைத் தாண்டி 2023-இல் 6,980 லீற்றரும், 2024-இல் 1,515 லீற்றரும் மேலதிகமாகப் பெறப்பட்டுள்ளது. அதேபோன்று, ‘குழுக்களின் தலைவர்’ பதவிக்கு எவ்வித முறையான ஒழுங்குவிதிகளுமின்றி 3 வாகனங்களுடன் கட்டுப்பாடற்ற எரிபொருள் வழங்கப்பட்டுள்ளது.

அமைச்சின் செயலாளர்களை முந்திய செயலாளர் நாயகம்

2022 முதல் 2024 வரையான காலப்பகுதியில், பாராளுமன்ற செயலாளர் நாயகம் ரூ. 6,071,690 பெறுமதியான 15,063 லீற்றர் எரிபொருளைப் பயன்படுத்தியுள்ளார். இது பொதுத்துறையில் மிக உயர்ந்த எரிபொருள் படியைப் பெறும் ஒரு அமைச்சின் செயலாளரின் ஒதுக்கீட்டை விட ஆண்டுக்கு 2,300 லீற்றர் அதிகமாகும். அத்துடன் இவர் ஒரே நேரத்தில் இரண்டு உத்தியோகபூர்வ வாகனங்களைப் பயன்படுத்தியமையும் கண்டறியப்பட்டுள்ளது.

சந்தைக்குப் பொருந்தாத கட்டணமும் அரசுக்கு ஏற்பட்ட இழப்பும்

பாராளுமன்ற பிரதிச் செயலாளர் மற்றும் உதவிச் செயலாளர் போன்ற அதிகாரிகளுக்கு எல்லையற்ற உத்தியோகபூர்வ பயண எரிபொருளுடன், சொந்தப் பயன்பாட்டிற்கு மாதம் 1,200 கி.மீ வரை சலுகை வழங்கப்பட்டுள்ளது (ஏனைய துறைத் தலைவர்களுக்கு 960 கி.மீ மட்டுமே). ஜூன் 2022 வரை எல்லை தாண்டிய தனியார் பயன்பாட்டுக்கு ஒரு கிலோமீட்டருக்கு வெறும் 8 ரூபாய் மட்டுமே வசூலிக்கப்பட்டதால், அரசுக்கு ரூ. 2,712,995 நிதி இழப்பு ஏற்பட்டுள்ளது. எனினும், ஜூலை 2022-இல் சந்தை நிலவரத்திற்கு ஏற்ப கட்டணம் உயர்த்தப்பட்ட பின்னர் தனியார் பயணங்களுக்கான பயன்பாடு கணிசமாகக் குறைந்துள்ளதாக கணக்காய்வு அறிக்கை சுட்டிக்காட்டுகிறது.

மொனராகலை மாவட்டத்தின் அடர்ந்த வனப்பகுதியை அண்டிய மவுஆர எல ஆற்றங்கரையில், நாட்டை உலுக்கும் வகையில் முன்னெடுக்கப்பட்ட அதிரடிச் சுற்றிவளைப்பில் ரூபா 7 கோடிக்கும் அதிக பெறுமதியான கஞ்சா போதைப்பொருள் வலைக்குள் சிக்கியுள்ளது.

அம்பேகமுவ, கொமகல வீதியின் எல்லையில் அமைந்துள்ள மவுஆர ஆற்றங்கரைப் பகுதியில் இரகசியமாகப் பெரும் போதைப்பொருள் கடத்தல் இடம்பெறுவதாகக் கிடைத்த இரகசியத் தகவலையடுத்து, வலானை ஊழல் தடுப்புப் பிரிவினர் அந்தப் பகுதியை அதிரடியாகச் சூழ்ந்து முற்றுகையிட்டனர்.

அங்கு கடத்துவதற்குத் தயார் நிலையில் பொதி செய்யப்பட்டு வைக்கப்பட்டிருந்த 1,044 கிலோகிராம் 180 கிராம் நிறையுடைய பாரிய கஞ்சா கையிருப்பைக் கைப்பற்றிய அதிகாரிகள், அங்கிருந்த முக்கிய சந்தேகநபர் ஒருவரையும் கையும் மெய்யுமாக மடக்கிப் பிடித்தனர். இதன் சந்தைப் பெறுமதி சுமார் 7 கோடியே 37 இலட்சத்து 80 ஆயிரம் ரூபா என மதிப்பிடப்பட்டுள்ளது.

இந்த அதிரடி சோதனையின் தொடர்ச்சியாக, அருகிலுள்ள காட்டுப் பகுதியில் ஒன்றரை ஏக்கர் பரப்பளவில் மறைமுகமாகப் பராமரிக்கப்பட்டு வந்த பிரம்மாண்ட கஞ்சா தோட்டத்தையும் பாதுகாப்புப் படையினர் துல்லியமாகக் கண்டுபிடித்தனர்.

அந்தத் தோட்டத்தில் செழிப்பாக வளர்க்கப்பட்டிருந்த 54,096 கஞ்சா செடிகளை அழித்த பொலிஸார், பயிர்ச்செய்கையில் ஈடுபட்டிருந்த மற்றுமொரு சந்தேகநபரையும் சம்பவ இடத்திலேயே கைது செய்தனர்.

வலானை ஊழல் தடுப்புப் பிரிவின் பணிப்பாளர் உதவிப் பொலிஸ் அத்தியாட்சகர் ரோஹன ஓலுகலவின் நேரடிக் கண்காணிப்பில், அதன் நிலையப் பொறுப்பதிகாரியின் நெறிப்படுத்தலில் முன்னெடுக்கப்பட்ட இந்த பாரிய சுற்றிவளைப்பு, அப்பகுதியில் இயங்கி வந்த போதைப்பொருள் கடத்தல் வலையமைப்பிற்கு பலத்த அடியைக் கொடுத்துள்ளது.

சிலாபம் – முன்னேஸ்வரம் ஸ்ரீ வடிவாம்பிகா சமேத ஈஸ்வரன் ஆலயத்தின் வருடாந்த தீ மிதிப்புத் திருவிழா, ஆயிரக்கணக்கான பக்தர்களின் பக்திப் பரவசத்திற்கு மத்தியில் நேற்றைய முன்தினம் (22) மாலை வெகுவிமரிசையாக இடம்பெற்றது.

ஆலய முன்றலில் அமைக்கப்பட்டிருந்த தீக்குண்டத்தில் செந்நிறத் தணல் கனன்றெரிய, “ஓம் நமசிவாய” என்ற சிவ நாம கோஷங்கள் விண்ணைப் பிளக்க பக்தர்கள் பக்திப் பரவசத்துடன் தீ மிதித்து தமது நேர்த்திக்கடன்களை நிறைவேற்றினர். நாடளாவிய ரீதியில் இருந்து வருகை தந்த பல்லாயிரக்கணக்கான பக்தர்களின் வருகையினால் ஆலயம் மக்கள் வெள்ளத்தால் நிரம்பி வழிந்தது.

குறிப்பாக, பாரம்பரிய ஆன்மிக வழக்கப்படி உடப்பு பகுதியிலிருந்து விரதமிருந்த பெருந்திரளான பக்தர்கள், பல மைல் தூரம் பாதயாத்திரையாக முன்னேஸ்வரத்தை வந்தடைந்து தீக்குண்டத்தில் இறங்கிய காட்சி பார்ப்போரை மெய்சிலிர்க்க வைத்தது.

இந்து சமயத்தின் புனிதமான அக்னி வழிபாட்டை அடிப்படையாகக் கொண்ட இந்த தீ மிதிப்புச் சடங்கு, இலங்கை மற்றும் இந்தியாவில் மட்டுமன்றி, ஜப்பான் உள்ளிட்ட உலகின் பல நாடுகளிலும் ஆழமான நம்பிக்கையுடன் அனுஷ்டிக்கப்பட்டு வரும் ஒரு விசேட ஆன்மிக நிகழ்வாகப் போற்றப்படுகின்றது.

(தகவல்: ஜூட் சமந்த)

ஜுட் சமந்த

இந்தியாவில் இருந்து கடல் வழியாக இலங்கைக்குள் சட்டவிரோதமாகக் கடத்தி வரப்பட்ட பெருந்தொகையான பூச்சிக்கொல்லி கிருமிநாசினிகள் மற்றும் ஏலக்காய் பொதிகள், கற்பிட்டி – கந்தக்குழிய விமானப்படை முகாமின் அதிகாரிகளால் அதிரடியாகக் கைப்பற்றப்பட்டுள்ளன.

கற்பிட்டி, கந்தக்குழிய கடற்கரையை அண்டிய பகுதியில் இலங்கை விமானப்படையினரால் ‘துப்பாக்கிச் சூட்டு களம்’ என்ற விசேட பயிற்சி முகாமொன்று இயங்கி வருகின்றது. இப்பகுதியை மையப்படுத்தி பாதுகாப்புப் படையினர் மேற்கொண்ட தீவிர சுற்றிவளைப்புத் தேடுதலின் போதே, இந்தியாவிலிருந்து கரையை அடைந்த குறித்த கடத்தல் பொருட்கள் மற்றும் அவற்றுக்குப் பயன்படுத்தப்பட்ட சிறிய ரக டிங்கி படகு என்பன கண்டுபிடிக்கப்பட்டுள்ளன.

இராணுவ அதிகாரிகளால் கைப்பற்றப்பட்ட பொருட்களின் விபரம்:

• ULTJMOS (150g): 320 பக்கட்டுகள்
• ATLAS (50ml): 800 பக்கட்டுகள்
• DHAN PREET (100ml): 100 பக்கட்டுகள்
• SHAR (100ml): 150 பக்கட்டுகள்
• LEOKEM Plus (100ml): 300 போத்தல்கள்
• JAFGOR (250ml): 80 போத்தல்கள்
• ஏலக்காய்: 22 கிலோகிராம் அடங்கிய பொலித்தீன் மூட்டை – 01
• சிறிய ரக டிங்கி படகு – 01

இப்பண்டங்களை நாட்டுக்குள் கடத்தி வந்த பிரதான சந்தேகநபர்கள் தப்பியோடியுள்ள நிலையில், அவர்களைக் கண்டறிவதற்கான எந்தவொரு தகவலும் இதுவரை வெளியாகவில்லை எனப் பொலிஸார் தெரிவித்துள்ளனர்.

கைப்பற்றப்பட்ட அனைத்துப் பொருட்களும் டிங்கி படகும் மேலதிக சட்ட நடவடிக்கைகளுக்காகக் கற்பிட்டி பொலிஸ் நிலையத்தில் ஒப்படைக்கப்பட்டுள்ள நிலையில், தப்பியோடிய கடத்தல்காரர்களைக் கைது செய்யப் பொலிஸார் தீவிர விசாரணைகளை முன்னெடுத்து வருகின்றனர்.

சிலாபம் – கொழும்பு பிரதான வீதியில் பயணித்துக் கொண்டிருந்த பாதசாரி ஒருவர் மீது வேகமாக வந்த லொறி மோதியதில், அவர் சம்பவ இடத்திலேயே படுகாயமடைந்து உயிரிழந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

கடந்த 22ஆம் திகதி மாலை வேளையில், மாரவில – கட்டுனேரிய பகுதியில் வீதியைக் கடக்க அல்லது வீதியோரமாக நடந்து செல்ல முயன்ற நபர் மீதே இந்த விபத்து நேர்ந்துள்ளது. லொறி பலமாக மோதிய வேகத்தில் தூக்கி வீசப்பட்ட அவர், இரத்த வெள்ளத்தில் உயிருக்குப் போராடிக் கொண்டிருந்தார்.

இதனைத் தொடர்ந்து, அங்கிருந்தவர்கள் உடனடியாக அவரை மீட்டு அவசர சிகிச்சைகளுக்காக மாரவில தள வைத்தியசாலைக்கு அனுப்பி வைத்தனர். எனினும், வைத்தியசாலையில் அனுமதிக்கப்பட்ட போதிலும் சிகிச்சை பலனின்றி அவர் பரிதாபமாக உயிரிழந்ததாக வைத்தியசாலைத் தகவல்கள் தெரிவிக்கின்றன.

விபத்தில் உயிரிழந்த நபர் யார், எந்த ஊரைச் சேர்ந்தவர் என்ற விபரம் இதுவரை கண்டறியப்படவில்லை. உயிரிழந்தவரின் உடலம் உறவினர்களால் அடையாளம் காணப்படுவதற்காக தற்போது மாரவில தள வைத்தியசாலையின் பிரேத அறையில் வைக்கப்பட்டுள்ளது.

விபத்தை ஏற்படுத்திய லொறியை உடனடியாகத் தனது கட்டுப்பாட்டுக்குள் கொண்டுவந்த மாரவில பொலிஸ் நிலையத்தின் போக்குவரத்துப் பிரிவு, அதன் சாரதியையும் கைது செய்துள்ளது. சம்பவம் தொடர்பில் மேலதிக விசாரணைகளை மாரவில பொலிஸார் முன்னெடுத்து வருகின்றனர்.

ஜுட் சமந்த

விமான நிலையத்தில் இடம்பெற்ற பாரிய ஊழல் மோசடிகளைத் தோலுரித்துக் காட்டிய நேர்மையான அதிகாரிக்கு இடமாற்றத் தண்டனை வழங்கப்பட்டுள்ளதாகக் கூறி, சுகாதாரத் துறையில் பெரும் புயல் கிளம்பியுள்ளது. கட்டுநாயக்க விமான நிலையத்தின் பிரதான பொதுச் சுகாதார பரிசோதகரை (PHI) நடைமுறைகளை மீறி இடமாற்றியமைக்கு எதிர்ப்புத் தெரிவித்து, நாடு தழுவிய ரீதியில் முன்னெடுக்கப்படும் அனைத்து டெங்கு ஒழிப்பு நடவடிக்கைகளிலிருந்தும் உடனடியாக விலகிக் கொள்ள இலங்கை பொதுச் சுகாதார பரிசோதகர்கள் சங்கம் தீர்மானித்துள்ளது.

விமான நிலைய சுகாதார அலுவலகத்தில் நீண்டகாலமாகப் பல்வேறு பாரதூரமான முறைகேடுகள் இடம்பெற்று வந்துள்ளன. குறிப்பாக, சட்டவிரோதமாகக் கொண்டுவரப்பட்டு அதிகாரிகளால் பறிமுதல் செய்யப்பட்ட பொருட்கள் மாயமானமை மற்றும் விமானங்களில் கிருமிநாசினி புகைமூட்டுவதற்காக (Fumigation) கொண்டுவரப்பட்ட விலைமதிப்பற்ற இரசாயனப் பொருட்கள் மர்மமான முறையில் காணாமல் போனமை உள்ளிட்ட அதிர்ச்சித் தகவல்கள் இதில் முக்கியமானவை.

இந்த மோசடிகள் அனைத்தையும் ஆதாரங்களுடன் முறைப்படி வெளிச்சத்துக்குக் கொண்டுவந்து, உரிய தரப்பினருக்கு விமான நிலைய பிரதான பொதுச் சுகாதார பரிசோதகர் எழுத்துப்பூர்வமாக அறிவித்துள்ளார். ஆனால், அதிகாரிகளோ குற்றவாளிகள் மீது எந்தவித சட்ட நடவடிக்கையும் எடுக்காமல், முறைகேட்டை அம்பலப்படுத்திய அந்த அதிகாரியையே பழிவாங்கும் நோக்குடன் அங்கிருந்து திடீரென இடமாற்றம் செய்து மூடிமறைக்க முற்பட்டுள்ளனர்.

அதிகாரிகளின் இந்த அநீதியான செயற்பாட்டுக்கு எதிராக கடந்த வாரமே நாடளாவிய ரீதியில் ஒரு நாள் அடையாள வேலைநிறுத்தப் போராட்டம் முன்னெடுக்கப்பட்டது. எனினும், அந்த எச்சரிக்கையையும் பொருட்படுத்தாத சுகாதார அதிகாரிகள், தங்கள் தவறைத் திருத்திக் கொள்ளவோ அல்லது இடமாற்றத்தை இரத்து செய்யவோ இதுவரை எவ்வித நடவடிக்கையும் எடுக்கவில்லை.

இதன் காரணமாகவே, அடுத்த கட்டமாக நாடு முழுவதும் தீவிரமடைந்து வரும் டெங்கு ஒழிப்புப் பணிகளிலிருந்து முற்றாக விலகும் கடுமையான தீர்மானத்தை எடுத்துள்ளதாக அச்சங்கத்தின் பதில் தலைவர் உபுல் ரோஹண தெரிவித்துள்ளார். “அரசாங்கத்தையோ அல்லது பொதுமக்களையோ அசௌகரியத்திற்கு உள்ளாக்குவது எங்கள் நோக்கமல்ல; ஆனால் அதிகாரிகளின் இத்தகைய எதேச்சதிகார முடிவுகளால் இறுதியில் பாதிக்கப்படப்போவது இந்நாட்டு மக்களே என்பதை நினைவூட்டுகிறோம்” என்றும் அவர் ஆணித்தரமாக எச்சரித்துள்ளார்.