ஜூட் சமந்த

நாட்டில் நாளுக்கு நாள் அதிகரித்து வரும் எரிபொருள் மற்றும் சமையல் எரிவாயு விலையினால் மக்கள் பெரும் துயரங்களுக்கு உள்ளாகி வருவதாகத் தெரிவித்து, வென்னப்புவ பிரதேச சபையின் எதிர்க்கட்சி உறுப்பினர்கள் விறகு சுமை தாங்கியபடி சபை அமர்வில் கலந்து கொண்டு தமது எதிர்ப்பை வெளிப்படுத்தியுள்ளனர்.

வென்னப்புவ பிரதேச சபையின் மாதாந்த சபை அமர்வு கடந்த 07ஆம் திகதி அதன் தலைவர் அன்டன் குமார தலைமையில் சபை மண்டபத்தில் நடைபெற்றது.

இதன்போது சபை அமர்வில் கலந்து கொள்வதற்காக வருகை தந்த எதிர்க்கட்சித் தலைவர் சுசந்த பெர்னாண்டோ தலைமையிலான ஐக்கிய மக்கள் சக்தி மற்றும் ஐக்கிய தேசியக் கட்சியைப் பிரதிநிதித்துவப்படுத்தும் உறுப்பினர்கள், விறகு கட்டுகளைத் தலையில் சுமந்தவாறு சபைக்குள் நுழைந்தனர்.

அத்தியாவசியப் பொருட்களின் விலையேற்றம், குறிப்பாக எரிபொருள் மற்றும் எரிவாயு விலை அதிகரிப்பு காரணமாக சாதாரண மக்கள் அன்றாட உணவைத் தயாரிப்பதற்கு கூட வழியின்றி விறகு அடுப்புகளைப் பயன்படுத்த வேண்டிய நிலைக்குத் தள்ளப்பட்டுள்ளனர் என்பதைச் சுட்டிக்காட்டும் வகையிலேயே இந்த நூதன போராட்டம் முன்னெடுக்கப்பட்டது.

பிரதேச சபையின் நுழைவாயிலில் இருந்து சபை மண்டபம் வரை விறகு கட்டுகளைச் சுமந்து வந்த உறுப்பினர்கள், அரசாங்கத்தின் விலை உயர்வுக் கொள்கைகளுக்கு எதிராகத் தமது கடுமையான கண்டனங்களைப் பதிவு செய்தனர்.

ஜூட் சமந்த

அல்பேனியா, கனடா மற்றும் ஜப்பான் ஆகிய நாடுகளில் வேலை பெற்றுத் தருவதாகக் கூறி, ஒரு கோடி ரூபாவுக்கும் அதிக பணத்தை மோசடி செய்த குற்றச்சாட்டில் இரண்டு பெண்கள் மற்றும் ஒரு ஆடவர் ஆகியோரை வெளிநாட்டு வேலைவாய்ப்புப் பணியகத்தின் அதிகாரிகள் கைது செய்துள்ளனர்.

மகரகம பகுதியில் மாணவர் வீசா (Student Visa) பெற்றுத் தரும் நிறுவனம் என்ற போர்வையில், சட்டவிரோத வெளிநாட்டு வேலைவாய்ப்பு முகவர் நிலையத்தை நடத்தி வந்த பெண் ஒருவர் வெளிநாட்டு வேலைவாய்ப்புப் பணியக அதிகாரிகளால் கைது செய்யப்பட்டுள்ளார்.

நாட்டின் பல்வேறு பகுதிகளைச் சேர்ந்தவர்களிடம் வெளிநாட்டு வேலை பெற்றுத் தருவதாகக் கூறி, ஒரு கோடி ரூபாவுக்கும் அதிகமான பணத்தை இவர் மோசடி செய்துள்ளமை முதற்கட்ட விசாரணைகளில் தெரியவந்துள்ளது.

குறித்த பெண், வெளிநாட்டு வேலைவாய்ப்புப் பணியகத்தில் எவ்விதப் பதிவுகளுமின்றி இந்த நிலையத்தை நடத்தி வந்துள்ளார். சோதனையின் போது அங்கிருந்த ஏராளமான வேலைவாய்ப்பு ஒப்பந்த ஆவணங்களை அதிகாரிகள் கைப்பற்றியுள்ளனர். சந்தேக நபரான இந்தப் பெண் நுகேகொடை நீதவான் நீதிமன்றத்தில் ஆஜர்படுத்தப்பட்டதை அடுத்து, இம்மாதம் 09 ஆம் திகதி வரை விளக்கமறியலில் வைக்கப்பட்டுள்ளார்.

இதற்கிடையில், ஜப்பானில் வேலை பெற்றுத் தருவதாகக் கூறி பணத்தை மோசடி செய்த மிகிரிகம பிரதேசத்தைச் சேர்ந்த மற்றுமொரு முகவர் நிலையம் குறித்து மூன்று முறைப்பாடுகள் கிடைக்கப்பெற்றன. இதனைத் தொடர்ந்து, வெளிநாட்டு வேலைவாய்ப்புப் பணியக அதிகாரிகள் இரகசியத் திட்டமொன்றின் மூலம் சுற்றிவளைப்பை மேற்கொண்டு சந்தேக நபர்களைக் கைது செய்துள்ளனர்.

இந்தச் சுற்றிவளைப்பின் போது, மோசடியான முறையில் முகவர் நிலையத்தை நடத்தி வந்த மினுவாங்கொடையைச் சேர்ந்த ஒரு பெண்ணும், அவருக்கு உதவியாக இருந்த ஜா-எல பகுதியைச் சேர்ந்த ஒருவரும் கைது செய்யப்பட்டுள்ளனர். சந்தேக நபர்கள் அத்தனகல்ல நீதவான் முன்னிலையில் ஆஜர்படுத்தப்பட்டனர்.

இதன்போது, பிரதான சந்தேக நபரான பெண் எதிர்வரும் 21 ஆம் திகதி வரை விளக்கமறியலில் வைக்கப்பட்டுள்ளார். இரண்டாவது சந்தேக நபர் பிணையில் விடுவிக்கப்பட்டுள்ளதாகத் தெரிவிக்கப்படுகிறது.

ஜூட் சமந்த

மாரவில பொலிஸ் பிரிவிற்குட்பட்ட கடற்கரைப் பகுதியில் நண்பர்களுடன் நீராடச் சென்ற 16 வயதுடைய பாடசாலை மாணவர் ஒருவர், கடல் அலையில் சிக்கி அடித்துச் செல்லப்பட்ட நிலையில் உயிரிழந்துள்ளதாக மாரவில பொலிஸார் தெரிவித்துள்ளனர்.

இந்தச் சோகமான சம்பவம் கடந்த ஏப்ரல் மாதம் 07ஆம் திகதி மாலை 6.00 மணியளவில் இடம்பெற்றுள்ளது. உயிரிழந்தவர் நாத்தாண்டியா – 80 ஏக்கர் பிரதேசத்தைச் சேர்ந்த வர்ணகுலசூரியகே மலிந்து தனஞ்சய (வயது 16) என அடையாளம் காணப்பட்டுள்ளார். இவர் நாத்தாண்டியா தம்மிஸ்ஸர தேசிய பாடசாலையில் கல்வி பயின்று வந்த மாணவராவார்.

சம்பவத்தன்று மாலை தனது நண்பர்கள் குழுவினருடன் மாரவில கடற்கரைக்கு நீராடச் சென்றபோது, எதிர்பாராத விதமாக உருவான பலத்த அலையினால் அவர் இழுத்துச் செல்லப்பட்டுள்ளார். இதனைத் தொடர்ந்து பிரதேசவாசிகள் ஒன்றிணைந்து முன்னெடுத்த தீவிர தேடுதல் நடவடிக்கையின் பயனாக, அன்றைய தினம் இரவு 7.00 மணியளவில் மாணவரின் உடல் கண்டெடுக்கப்பட்டது. எனினும், மீட்கப்பட்ட போதே அவர் உயிரிழந்திருந்ததாகத் தெரிவிக்கப்படுகிறது.

தற்போது மாணவரின் உடல் மாரவில ஆதார வைத்தியசாலையில் வைக்கப்பட்டுள்ளதுடன், இது குறித்த பிரேத பரிசோதனைகள் முன்னெடுக்கப்படவுள்ளன.

ஜூட் சமந்த

புத்தளம் புனித அன்ரு மத்திய கல்லூரி மாணவர்களின் போக்குவரத்துத் தேவைகளை நிறைவு செய்யும் வகையில், அந்தப் பாடசாலையின் பழைய மாணவர் சங்கத்தினால் கடந்த ஏப்ரல் மாதம் 06 ஆம் திகதி பஸ் வண்டி ஒன்று வழங்கி வைக்கப்பட்டது.

புனித அன்ரு கல்லூரி ஆரம்பிக்கப்பட்டு 140 ஆண்டுகள் நிறைவடைவதை முன்னிட்டு, கடந்த ஆண்டு நவம்பர் மாதம் பழைய மாணவர் சங்கத்தினால் பிரம்மாண்டமான ஜூபிலி (Jubilee) திருவிழா ஒன்று ஏற்பாடு செய்யப்பட்டிருந்தது. பாடசாலைக்கு ஒரு பஸ் வண்டியைப் பெற்றுக் கொடுக்க வேண்டும் என்ற உயரிய நோக்கோடு இந்த விழா நடத்தப்பட்டது.

இந்த ஜுபிலி விழாவின் மூலம் திரட்டப்பட்ட நிதியிலிருந்து சுமார் ஒரு கோடியே 12 இலட்சம் (11.2 மில்லியன்) ரூபா செலவில் இந்தப் புதிய பஸ் வண்டி கொள்வனவு செய்யப்பட்டுள்ளது.

பழைய மாணவர் சங்கத்தின் அதிகாரிகள் மற்றும் உறுப்பினர்களால் இந்தப் புதிய பஸ் வண்டி, கல்லூரியின் அதிபர் ஸ்ரீலக் பெர்னாண்டோவிடம் உத்தியோகபூர்வமாக கையளிக்கப்பட்டது. அதனைத் தொடர்ந்து அதிபரினால் அந்த பஸ் வண்டி மாணவர்களின் பயன்பாட்டிற்காக கையளிக்கப்பட்டமை குறிப்பிடத்தக்கது.

இலங்கை நிலக்கரி நிறுவனத்தில் பதிவு செய்யப்படாத நிறுவனம் ஒன்றுக்கே அரசாங்கம் நிலக்கரி கொள்வனவுக்கான கேள்விக்கோரலை வழங்கி இருக்கிறது. அதேநேரம் நிலக்கரி தரம் குறித்து பரிசோதிப்பதற்கு அங்கீகாரம் இல்லாத நிறுவனமே இதுவரை காலமும் நிலக்கரி தரம் தொடர்பான அறிக்கையை சமர்ப்பித்திருக்கிறது என கணக்காய்வாளர் நாயகத்தின் அறிக்கையில் தெரிவிக்கப்பட்டுள்ளது என எதிர்க்கட்சி உறுப்பினர் அஜித் பி பெரேரா தெரிவித்தார்.

பாராளுமன்றத்தில் நேற்று செவ்வாய்க்கிழமை (07) இடம்பெற்ற சமூக பாதுகாப்பு உதவுதொகை அறவீடு (திருத்தச்) சட்டமூலம், விளையாட்டில் ஊக்கப்பதார்த்தப் பயன்பாட்டிற்கெதிரான சமவாயச் சட்டத்தின் கீழ் ஒழுங்குவிதிகள் மீதான விவாதத்தில் கலந்துகொண்டு உரையாற்றுகையிலேயே இவ்வாறு தெரிவித்தார்.

அவர் அங்கு தொடர்ந்து உரையாற்றுகையில்,

லக்விஜய மின்சாரசபைக்காக இலங்கை நிலக்கரி நிறுவனத்தினால் நிலக்கரி விலைக்கு பெற்றுக்கொள்ளும் செயற்பாடு தொடர்பில் 2026 ஏப்ரல் 2ஆம் திகதி தயாரிக்கப்பட்ட விசேட கணக்காய்வு அறிக்கை பாராளுமன்றத்துக்கு சமர்ப்பிக்கப்பட்டிருக்கிறது. நிலக்கரி கொள்வனவு தொடர்பில் சுயாதீன நிலைப்பாடு ஒன்றை நாட்டு மக்கள் இதுவரை எதிர்பார்த்திருந்தனர்.

இந்த அரசாங்கத்தின் கீழ் வலுசக்தி அமைச்சரின் தலைமையில் அநுரகுமார திசாநாயக்க நிதி அமைச்சராக அரச தலைவராக இருக்கும் நிலையில் இடம்பெற்ற நிலக்கரி கொள்வனவில் பாரியளவில் மோசடி இடம்பெற்றுள்ளதாக இந்த கணக்காய்வு அறிக்கையில் தெரிவிக்கப்பட்டுள்ளது.

நிலக்கரி மாேசடி இடம்பெற்றிருப்பதை சாப்பிட்டு பார்த்தா தெரிந்துகொள்வது என ஜனாதிபதி இந்த சபையில் கேட்டிருந்தார். ஆனால் ஆவணங்களை பரீட்சித்து பார்ப்பதன் மூலம் இங்கு மோசடி இடம்பெற்றுள்ளதை கணக்காய்வாளர் நாயகத்துக்கு கண்டுபிடிக்க முடியுமாகி இருக்கிறது. 

மேலும் நிலக்கரி கொள்வனவுக்காக கேள்விக்கோரலை வழங்கி இருக்கும் நிறுவனம் 2025,ஆகஸ்ட் 18 ஆம் திகதியில் பதிவு செய்திருக்கவில்லை. இலங்கை நிலக்கரி நிறுவனத்தில் பதிவு செய்யப்படாத நிறுவனம் ஒன்றுக்கே இந்த கேள்விக்கோரலை வழங்கி இருக்கிறது. இது தொடர்பில் அரசாங்கம் வெட்கப்படவேண்டும்.

ஜனாதிபதி மக்களுக்கு நிவாரணம் வழங்க ஒதுக்கிய பணத்துக்கும் அதிகமான நட்டம் இதன் மூலம் நாட்டுக்கு ஏற்பட்டுள்ளது.

அத்துடன் இந்த நிலக்கரியின் தரம் குறித்து ஆய்வு அறிக்கைகளில் முரண்பாடுகள் இருந்தாலும், அம்பய மாதிரிகளை பரிசோதிப்பதன் மூலம் இந்த முரண்பாடுகளை தீர்த்துக்கொள்ள முடியுமாகி இருந்தபோதும், இன்றுவரை அம்பய மாதிரி பரிசோதிக்கப்படாமல் இருப்பது தவறு, அது மோசடி என கணக்காளர்  நாயகம் தெரிவித்திருக்கிறார். 

அதேநேரம் இந்த நிலக்கரி தரம் குறித்து பரிசோதிப்பதற்கு வழங்கப்பட்டிருக்கும் நிறுவனத்துக்கு அதுதொடர்பில் அங்கீகாரம் இல்லை. அங்கீகாரம் இல்லாத நிறுவனமே இதுவரை காலமும் இந்த அறிக்கையை சமர்ப்பித்திருக்கிறது.

அத்துடன் தற்போது 3 இலட்சம் மெட்ரிக்தொன் நிலக்கரி அவசர கொள்வனவுக்காக அரசாங்கம் ஒப்பந்தம் செய்துள்ள நிறுவனம் அது தொடர்பில் அடிப்படை தகுதிகளை பூரணப்படுத்தியிருக்கவில்லை என கணக்காய்வாளர் நாயகத்தின் கணக்காய்வு அறிக்கையில் தெரிவிக்கப்பட்டுள்ளது. 

அதனால் இந்த நலக்கரி கொள்வனவு தொடர்பில் இதுவரை காலமுமும் அரசாங்கம் தெரிவித்துவந்த பொய் பிரசாரம் தொடர்பில் மக்களிடம் மன்னிப்பு கோரவேண்டும். அமைச்சர் பதவி விலகவேண்டும் என்றார்.

ஜனாதிபதி அவர்களின் தலைமையில் 2026.04.06 அன்று நடைபெற்ற அமைச்சரவைக் கூட்டத்தில், பொதுமக்களின் வாழ்வாதாரத்தை மேம்படுத்தும் வகையிலான பல சலுகைத் திட்டங்களுக்கும், நாட்டின் உட்கட்டமைப்பு மற்றும் சட்ட ரீதியான மாற்றங்களுக்கும் முக்கிய தீர்மானங்கள் மேற்கொள்ளப்பட்டுள்ளன.

மத்திய கிழக்குப் போர் சூழலால் ஏற்பட்டுள்ள பொருளாதாரத் தாக்கத்தைக் குறைக்கும் நோக்கில், குறைந்த வருமானம் கொண்ட குடும்பங்கள் மற்றும் தொழிலாளர்களுக்குப் பல சலுகைகள் அறிவிக்கப்பட்டுள்ளன.

• அஸ்வெசும விசேட கொடுப்பனவு: ஏப்ரல் மாதத்திற்காக, தீவிர வறுமையிலுள்ள குடும்பங்களுக்கு 7,500 ரூபாயும், வறுமையிலுள்ள குடும்பங்களுக்கு 5,000 ரூபாயும், நிலைமாறுகால குடும்பங்களுக்கு 2,500 ரூபாயும் மேலதிகமாக வழங்கப்படவுள்ளது.
• எரிபொருள் மற்றும் மின்சார மானியம்: மோட்டார் சைக்கிள்களுக்கு லீற்றருக்கு 20 ரூபாயும், முச்சக்கரவண்டிகளுக்கு 100 ரூபாயும் எரிபொருள் சலுகை வழங்க அனுமதி அளிக்கப்பட்டுள்ளது. அத்துடன், 90 யூனிட்டுகளுக்கும் குறைவாக மின்சாரம் பயன்படுத்தும் நுகர்வோருக்கு 3 மாதங்களுக்கு மானியம் வழங்க அரசாங்கம் பொறுப்பேற்றுள்ளது.
• விவசாயம் மற்றும் கடற்றொழில்: நெற் செய்கைக்கான உர மானியம் ஹெக்டேயருக்கு 30,000 ரூபாயாக அதிகரிக்கப்பட்டுள்ளதுடன், ஏனைய பயிர்களுக்கு 18,000 ரூபாயாக உயர்த்தப்பட்டுள்ளது. கடற்றொழிலாளர்களுக்கு 25 லீற்றர் எரிபொருளுக்கு லீற்றருக்கு 50 ரூபாய் வீதம் 3 மாதங்களுக்கு மானியம் வழங்கப்படும்.

உட்கட்டமைப்பு மற்றும் அபிவிருத்தித் திட்டங்கள்

• காலி கோட்டை சுற்றுலா மேம்பாடு: காலி கோட்டையிலுள்ள பழைய நீதிமன்றக் கட்டடத் தொகுதியைச் சுற்றுலாத் துறையின் பயன்பாட்டிற்கு வழங்கவும், புதிய நீதிமன்ற வளாகத்தை மேலகம பகுதியில் அமைக்கவும் தீர்மானிக்கப்பட்டுள்ளது.
• டிஜிட்டல் பொது உட்கட்டமைப்பு (DPI): அரசாங்க சேவைகளை டிஜிட்டல் மயமாக்கும் நோக்கில் 563 மில்லியன் ரூபாய் செலவில் ‘GovTech App’ மற்றும் சந்தை வாய்ப்புகளை உருவாக்கும் திட்டத்திற்கு அங்கீகாரம் வழங்கப்பட்டுள்ளது.
• அனுராதபுரம் குடிநீர் திட்டம்: அனுராதபுரம் வடக்கு நீர் வழங்கல் திட்டத்தின் இரண்டாம் கட்ட பணிகளுக்காக மெஸ்ஸர்ஸ் மாகா இன்ஜினியரிங் நிறுவனத்திற்கு ஒப்பந்தம் வழங்கப்பட்டுள்ளது.

சுகாதாரம் மற்றும் வேலைவாய்ப்பு

• மருத்துவ உபகரண கொள்வனவு: 2026 ஆம் ஆண்டிற்குத் தேவையான 40 மில்லியன் மீற்றர் சிகிச்சைக் கட்டுத் துணிகளை உள்நாட்டு உற்பத்தியாளர்களிடமிருந்து 2,405.6 மில்லியன் ரூபாய்க்கு கொள்வனவு செய்யத் தீர்மானிக்கப்பட்டுள்ளது.
• வீரர்களுக்கு வேலைவாய்ப்பு: தேசிய மட்டத்திலான விளையாட்டு வீரர்களுக்கு அரச துறையில் நிரந்தர தொழில் வாய்ப்புகளை வழங்குவதற்கான புதிய நடைமுறை அறிமுகப்படுத்தப்படவுள்ளது.

சட்ட சீர்திருத்தங்கள் மற்றும் நியமனங்கள்

• வரித் திருத்தங்கள்: டிஜிட்டல் சேவை வழங்குநர்களுக்கான ‘சேவை பெறுமதி வரி’ (VAT) முறையை 2026.07.01 முதல் அமுல்படுத்தும் வகையில் சட்டத் திருத்தங்கள் மேற்கொள்ளப்படவுள்ளன. தொலைத்தொடர்புக் கோபுரங்களுக்கான வரி அறவீடு தொடர்பான நிதிச் சட்டத்திலும் திருத்தங்கள் வர்த்தமானியில் வெளியிடப்படும்.
• புதிய நியமனம்: இலங்கை நிர்வாகச் சேவையின் சிரேஷ்ட அதிகாரியான திரு. எஸ்.எம்.ஜே.எம். ஹேரத் அவர்கள் புதிய பதிவாளர் நாயகமாக நியமிக்கப்பட்டுள்ளார்.

தோட்டத் தொழிலாளர்களுக்கான வீடமைப்பு ‘தித்வா’ புயல் அனர்த்தத்தால் பாதிக்கப்பட்ட தோட்டத் தொழிலாளர்களுக்கு, தலா 5 மில்லியன் ரூபாய் பெறுமதியில் 650 சதுர அடி பரப்பளவிலான வீடுகளை அமைத்துக் கொடுக்கும் திட்டத்திற்கும் அமைச்சரவை பச்சைக்கொடி காட்டியுள்ளது.

இந்தத் தீர்மானங்கள் அனைத்தும் நாட்டின் தற்போதைய பொருளாதார நிலைமையைக் கருத்தில் கொண்டும், நீண்டகால அபிவிருத்தியை நோக்காகக் கொண்டும் எடுக்கப்பட்டுள்ளதாக அமைச்சரவை அறிவித்துள்ளது.

ஜூட் சமந்த

இலங்கையின் இரண்டாவது முக்கிய ஈரநில வலயமான ஆரச்சிகட்டுவ – ஆனைவிழுந்தாவ ராம்சர் சரணாலயத்திற்கு ஒவ்வோர் ஆண்டும் வருகை தரும் வெளிநாட்டுப் பறவைகளின் வருகை இந்த முறை பாரியளவில் குறைந்துள்ளதாக அப்பகுதி மக்கள் கவலை தெரிவித்துள்ளனர்.

கடந்த 2001 ஆம் ஆண்டு ஆகஸ்ட் மாதம் 08 ஆம் திகதி சர்வதேச ஈரநில சாசனத்தின் படி, 1397 ஹெக்டேயர் பரப்பளவைக் கொண்ட இந்த பிரதேசம் ராம்சர் சரணாலயமாக பிரகடனப்படுத்தப்பட்டது.

இந்த சரணாலயத்தினுள் ஆனைவிழுந்தாவ, மையாவ, சுருவில, பின்கட்டிய மற்றும் வெல்லவல என ஐந்து குளங்கள் காணப்படுகின்றன. ரதம்பலா ஓயாவினால் போஷிக்கப்படும் இந்தக் குளங்கள் ‘எல்லங்கா’ (Ellanga system) எனும் குளச் சங்கிலி முறைமையின் அடிப்படையில் ஒன்றுடன் ஒன்று பிணைக்கப்பட்டுள்ளமை இதன் சிறப்பம்சமாகும்.

சுற்றுச்சூழல் ஆய்வாளர்களின் கூற்றுப்படி, இந்த ஈரநிலத்தில் 47 வகை மீன் இனங்கள், 11 வகை நிலநீர் வாழ்விகள், 34 வகை ஊர்வன, 78 வகை பட்டாம்பூச்சிகள் மற்றும் 168 வகை பறவையினங்கள் அடையாளம் காணப்பட்டுள்ளன. குறிப்பாக, 37 வகை வெளிநாட்டுப் பறவைகள் ஆண்டுதோறும் இங்கு வந்து இனப்பெருக்கம் செய்துவிட்டு, தமது குஞ்சுகளுடன் மீண்டும் தாயகம் திரும்புவது வழக்கம். அத்தோடு, சுமார் 2500 குடும்பங்கள் விவசாயம், நன்னீர் மீன்பிடி மற்றும் இறால் வளர்ப்பு போன்ற வாழ்வாதாரங்களுக்காக இந்தக் குளங்களையே நம்பியுள்ளனர்.

கடந்த ஆண்டு நவம்பர் மாதம் வீசிய ‘டிட்ஸ்வா’ (Ditswa) சூறாவளியின் போது ஏற்பட்ட கடும் வெள்ளப்பெருக்கினால் ஆனைவிழுந்தாவ உள்ளிட்ட மூன்று குளங்களின் வரம்புகள் உடைந்து சேதமடைந்தன. இதனால் குளங்களில் இருந்த நீர் முழுமையாக வெளியேறிய நிலையில், தற்போது குளத்தின் தரைப்பகுதி வறண்டு வெடிப்புக்கள் காணப்படுகின்றன.

இந்த நிலைமையால் சரணாலயத்தின் குளிர்ச்சியான சூழல் மற்றும் பல்லுயிர்த்தன்மை பாதிக்கப்பட்டுள்ளது. தற்போது ஒரு சில கொக்குகள் மற்றும் நீர் காகங்கள் மாத்திரமே அங்கு எஞ்சியிருப்பதை காணமுடிகிறது. உணவும் நீரும் இன்றி இந்தப் பறவைகளும் ஆபத்தான நிலைக்குத் தள்ளப்பட்டுள்ளன.

உடைந்து போயுள்ள குளக்கட்டுகளை விரைவாக புனரமைப்பதாக அதிகாரிகள் உறுதியளித்த போதிலும், முறையான முன்னுரிமைகள் வழங்கப்படாமல் பணிகள் முன்னெடுக்கப்படுவதாக கிராம மக்கள் குற்றம் சுமத்துகின்றனர். நாட்டின் மிக முக்கியமான இயற்கைச் சொத்தான ஆனைவிழுந்தாவ சரணாலயத்தை பாதுகாக்க வேண்டியது தார்மீகப் பொறுப்பாகும் என அவர்கள் வலியுறுத்துகின்றனர்.

ஜூட் சமந்த

தங்கொட்டுவ பிரதேசத்திலுள்ள பிரபல பாடசாலை ஒன்றில், சக மாணவன் ஒருவனால் கடதாசி வெட்டும் கத்தியால் (Paper cutter) தாக்கப்பட்டு மாணவர் ஒருவர் படுகாயமடைந்துள்ள சம்பவம் தொடர்பில் பொலிஸார் விசாரணைகளை ஆரம்பித்துள்ளனர்.

இச்சம்பவம் கடந்த 06 ஆம் திகதி மதிய வேளையில் பாடசாலை வளாகத்தினுள்ளேயே இடம்பெற்றுள்ளது. தாக்குதலுக்குள்ளான மாணவன் தங்கொட்டுவ – மாவத்தகம பிரதேசத்தைச் சேர்ந்த 16 வயதுடைய கே. கவிந்து நிம்சார என அடையாளம் காணப்பட்டுள்ளார். அவர் தற்போது மேலதிக சிகிச்சைக்காக நீர்கொழும்பு பொது வைத்தியசாலையில் அனுமதிக்கப்பட்டுள்ளார்.

காயமடைந்த மாணவனும், தாக்குதலை நடத்திய மாணவனும் அதே பாடசாலையில் ஒரே வகுப்பில் கல்வி பயின்று வருபவர்கள் எனத் தெரிவிக்கப்படுகிறது. இவ்விரு மாணவர்களுக்கும் இடையில் பாடசாலையில் அடிக்கடி தகராறுகள் ஏற்பட்டு வந்துள்ளதாக ஆரம்பகட்ட பொலிஸ் விசாரணைகளில் இருந்து தெரியவந்துள்ளது.

சம்பவம் இடம்பெற்ற தினமான கடந்த 6ஆம் திகதி இவர்களுக்குள் ஏற்பட்ட வாய்த்தர்க்கம் முற்றிய நிலையில், ஒரு மாணவன் மற்றைய மாணவனின் கையை கடதாசி வெட்டும் கத்தியால் வெட்டிக் காயப்படுத்தியுள்ளார்.

இந்தக் கத்திக்குத்து சம்பவம் தொடர்பில் இதுவரை எவரும் கைது செய்யப்படவில்லை எனத் தெரிவிக்கப்பட்டுள்ளது. இச்சம்பவம் குறித்து தங்கொட்டுவ பொலிஸார் மேலதிக விசாரணைகளை முன்னெடுத்து வருகின்றனர்