உலகளாவிய ரீதியில் நிலவும் போர்ச் சூழல்கள் மற்றும் பல்வேறு சவால்களுக்கு மத்தியிலும், இலங்கை ஒரு நாடாகப் பல பொருளாதார வெற்றிகளை ஈட்டிக்கொண்டிருக்கும் தீர்மானமிக்கதொரு தருணத்தில் இம்முறை சர்வதேச தொழிலாளர் தினத்தைக் கொண்டாடுவதாக ஜனாதிபதி அநுர குமார திசாநாயக்க தெரிவித்துள்ளார்.

மே தினத்தை முன்னிட்டு அவர் விடுத்துள்ள விசேட வாழ்த்துச் செய்தியில், நாட்டின் தற்போதைய பொருளாதார முன்னேற்றம் மற்றும் உழைக்கும் மக்களுக்காக அரசாங்கம் முன்னெடுத்துள்ள நலன்புரித் திட்டங்கள் குறித்து விரிவாகக் குறிப்பிட்டுள்ளார்.

சர்வதேச ரீதியில் அமெரிக்க தீர்வை வரி விதிப்பு, மத்திய கிழக்கு போர்ச் சூழல் மற்றும் உள்நாட்டில் ‘டித்வா’ சூறாவளி போன்ற பாரிய சவால்கள் ஏற்பட்ட போதிலும், இலங்கையின் தனித்துவமான அணிசேரா வெளிநாட்டுக் கொள்கையினால் புலம்பெயர் தொழிலாளர்களின் பாதுகாப்பு உறுதிப்படுத்தப்பட்டுள்ளதாக ஜனாதிபதி சுட்டிக்காட்டினார்.

அவர் தனது செய்தியில் சுட்டிக்காட்டியுள்ள முக்கிய பொருளாதார மைல்கற்கள்:

• குறைந்த பற்றாக்குறை: 1977 ஆம் ஆண்டிற்குப் பின்னர் பதிவான மிகக்குறைந்த வரவு செலவுத் திட்டப் பற்றாக்குறை 2025 இல் பதிவாகியுள்ளது.
• அதிகூடிய வருமானம்: 2007 ஆம் ஆண்டிற்குப் பிறகு நாட்டின் அதிகூடிய அரச வருமானம் ஈட்டப்பட்டுள்ளது.
• ஏற்றுமதி சாதனை: பொருட்கள் மற்றும் சேவை ஏற்றுமதி வருமானம் 17 பில்லியன் டொலர்களைத் தாண்டியுள்ளது.
• நிதி மேலாண்மை: முதன்மைக் கணக்கில் மேலதிக இருப்பைப் பேணியதுடன், வரலாற்றில் முதல்முறையாக அரச வருமான இலக்குகளை விஞ்சிய ஆண்டாக இது பதிவாகியுள்ளது.

உழைக்கும் மக்களுக்கான சலுகைகள்

தொழிலாளர்களின் உழைப்பிற்கு மதிப்பளிக்கும் வகையில் அரசாங்கம் பல காத்திரமான நடவடிக்கைகளை எடுத்துள்ளதாக ஜனாதிபதி தெரிவித்தார். குறிப்பாக:

• அரசு மற்றும் தனியார் துறை ஊழியர்களின் அடிப்படைச் சம்பளம் அதிகரிப்பு.
• 2016 இற்குப் பின் பணியில் இணைந்த அரச ஊழியர்களுக்கான ஓய்வூதிய உரிமை மீள வழங்கப்பட்டமை.
• பெருந்தோட்டத் தொழிலாளர்களின் சம்பளம் 1,750 ரூபாவாக அதிகரிக்கப்பட்டமை.
• மாணவர்களின் ‘மஹபொல’ புலமைப்பரிசில் கொடுப்பனவு 10,000 ரூபாவால் அதிகரிப்பு.

‘டித்வா’ சூறாவளியால் பாதிக்கப்பட்ட விவசாயிகள், மீனவர்கள் மற்றும் சிறு தொழில் முயற்சியாளர்களுக்கு வரலாற்றில் இதுவரை வழங்கப்படாத அதிகூடிய இழப்பீட்டுத் தொகை வழங்கப்பட்டுள்ளதை ஜனாதிபதி நினைவு கூர்ந்தார். அனர்த்தத்தால் பாதிக்கப்பட்டவர்களின் வாழ்வாதாரத்தை மேம்படுத்த ‘Rebuilding Sri Lanka’ திட்டம் வெற்றிகரமாக முன்னெடுக்கப்பட்டு வருவதாகவும் அவர் குறிப்பிட்டார்.

“மக்களின் கண்ணீருக்குப் பதிலாகப் பாதுகாப்பான பொருளாதாரத்தையும், பிள்ளைகளுக்குச் சிறந்த எதிர்காலத்தையும் உருவாக்குவதே எமது நோக்கம்” என அவர் தனது செய்தியில் வலியுறுத்தியுள்ளார்.

நாட்டை நவீனமயப்படுத்தும் நோக்கில் கல்விச் சீர்திருத்தங்கள், டிஜிட்டல் பொருளாதாரத் திட்டம், ‘Clean Sri Lanka’ மற்றும் ‘சமூக சக்தி’ போன்ற திட்டங்கள் முன்னெடுக்கப்படுவதாகக் குறிப்பிட்ட அவர், “வளமான நாடு – அழகான வாழ்க்கை” எனும் இலக்கை அடைய உழைக்கும் மக்கள் அனைவரும் ஒன்றிணைய வேண்டும் என அழைப்பு விடுத்துள்ளார்.

ஒரு தோல்வியுறாத பயணத்திற்காகத் தொடர்ந்தும் அர்ப்பணிப்புடன் பணியாற்றுவோம் என்ற உறுதிமொழியுடன், நாட்டின் அனைத்துத் தரப்பு உழைக்கும் மக்களுக்கும் ஜனாதிபதி தனது மே தின வாழ்த்துகளைத் தெரிவித்துள்ளார்.

இன்று நாம் அனுபவிக்கும் எட்டு மணி நேர வேலை மற்றும் வாராந்த விடுமுறை என்பது தானாகக் கிடைத்தவை அல்ல. 

19-ஆம் நூற்றாண்டில் அமெரிக்காவின் சிகாகோ வீதிகளில் தொழிலாளர்கள் சிந்திய இரத்தத்திலிருந்து கிடைத்ததே இந்த சர்வதேச மே தினமாகும். 

அமெரிக்கா மற்றும் ஐரோப்பிய நாடுகளில் தொழில் வளர்ச்சி, 18ம் நூற்றாண்டில் துரிதமானது. 

வளர்ச்சியடைந்த நாடுகளில் 24 மணிநேரத்தில் 12 முதல் 18 மணித்தியாலங்கள் வரை வேலை செய்ய வேண்டுமென தொழிலாளர்கள் நிர்ப்பந்திக்கப்பட்டனர். 

1886 ஆம் ஆண்டு மே மாதத்தில் சிகாகோவின் ஹேமார்க்கெட் சதுக்கத்தில் 8 மணி நேர வேலைக் கோரிக்கையை முன்வைத்து நடந்த போராட்டத்தில் பொலிஸார் நடத்திய துப்பாக்கிச் சூடுதான் மே தினத்தின் வித்தாக அமைந்தது. 

இந்த அலை உலகெங்கும் பரவி, 1889-ல் பெரிஸில் நடந்த சர்வதேச சோசலிச மாநாட்டில் மே 1-ஆம் திகதி தொழிலாளர் தினமாக பிரகடனப்படுத்தப்பட்டது. 

உலக வரலாற்றோடு பின்னிப் பிணைந்த இந்த மே தினத்திற்கு இலங்கையில் ஒரு நீண்ட மற்றும் உணர்ச்சிகரமான வரலாறு உண்டு. 

இலங்கையின் மே தின வரலாற்றில் ஏ.ஈ. குணசிங்கவின் பங்கு மிக முக்கியம் இடம் வகிக்கின்றது. 

இலங்கை தொழிற்சங்க இயக்கத்தின் தந்தை என அறியப்படும் இவர், 1927-ஆம் ஆண்டில் இலங்கையில் முதன்முதலாக மே தினத்தைக் கொண்டாடினார். 

1933-ல் ஏ.ஈ. குணசிங்கவின் தலைமையில் கொழும்பு பிரைஸ் பூங்காவிலிருந்து காலி முகத்திடல் வரை ஒரு பிரம்மாண்ட பேரணி நடைபெற்றது. 

இதில் பங்கேற்ற தொழிலாளர்கள் சிவப்பு மற்றும் வெள்ளை நிற ஆடைகளை அணிந்து, வாத்தியங்கள் முழங்க நடனங்களுடன் அணிவகுத்துச் சென்றனர். 

ஆச்சரியமான விஷயம் என்னவென்றால், அந்த முதல் பேரணியில் அரசியல் முழக்கங்கள் எதுவும் எழுப்பப்படவில்லை. 

அது முழுக்க முழுக்க உழைப்பின் கொண்டாட்டமாகவே இருந்தது. 

1935-ல் லங்கா சமசமாஜக் கட்சி உருவான பிறகு, மே தினம் ஒரு அரசியல் சக்தியாக உருவெடுத்தது. 1956-ஆம் ஆண்டில் அப்போதைய பிரதமர் எஸ்.டபிள்யூ.ஆர்.டி. பண்டாரநாயக்க மே 1-ஆம் திகதியை அரச விடுமுறை தினமாக அறிவித்தார். 

இது தொழிலாளர் உரிமைகளுக்குக் கிடைத்த மிகப்பெரிய அங்கீகாரமாகும். 1960-களில் கொழும்பு வீதிகள் இடதுசாரி கட்சிகளின் சிவப்பு நிறக் கொடிகளால் நிறைந்திருந்தன, இது ‘சிவப்பு மே தினம்’ என்று அழைக்கப்பட்டது. 

1993 மே 1. கொழும்பு ஆமர் வீதி சந்தியில் நடைபெற்ற ஐக்கிய தேசியக் கட்சியின் மே தினப் பேரணியில், அப்போதைய ஜனாதிபதி ரணசிங்க பிரேமதாச தற்கொலை குண்டுத் தாக்குதலில் கொல்லப்பட்டது இலங்கையின் மே தின வரலாற்றில் மறக்க முடியாத ஒரு கறுப்பு நாளாக அமைந்தது. 

ஒரு நாட்டின் தலைவரே மே தின ஊர்வலத்தில் கொல்லப்பட்டமை உலக மே தின வரலாற்றிலேயே ஒரு அதிர்ச்சிகரமான நிகழ்வாகும். ​

தோட்டத் தொழிலாளர்கள் முதல் ஆடைத் தொழிற்சாலை ஊழியர்கள் வரை இன்றும் இலங்கையின் பொருளாதாரத் தூண்களாகத் திகழும் உழைப்பாளர்களுக்கு இந்த நாள் ஒரு கௌரவமாகும். 

இந்த நாளானது உழைக்கும் வர்க்கத்தின் ஒற்றுமையையும், மனித மாண்பையும் பறைசாற்றும் ஒரு வரலாற்றுச் சாசனமாகும். 

முதலாளித்துவ வர்க்கத்தின் அடக்குமுறைகளை அடக்குவதற்கு உழைப்பாளர்கள் அன்று வீதியில் இறங்கினார்கள். உயிர்த் தியாகமும் செய்தார்கள் அவர்களை நினைவுகூறும் அதேவேளை அவர்கள் வென்றெடுத்த உரிமைகளை தொடர்ந்தும் பாதுகாத்து முன்னொக்கி செல்ல வேண்டும் என்பதே இந்த நாள் உணர்த்தும் முக்கிய செய்தியாக அமைந்துள்ளது. 

2026 ஆம் ஆண்டுக்கான தொனிப்பொருளாக ஆரோக்கியமான உளவியல் சமூகப் பணிச்சூழழை உறுதி செய்தல் என அறிவிக்கப்பட்டுள்ளது. 

இது மன அழுத்தம் மற்றும் பணிச்சுமை போன்ற நவீன பணிச்சூழல் சார்ந்த சிக்கல்களை கையாள்வதில் கவனம் செலுத்துவதாக அமைந்துள்ளது. 

இந்நிலையில் அனைத்து தொழிலாளர்களுக்கும் அத தெரண சார்பில் மே தின வாழ்த்துக்களை தெரிவித்துக்கொள்கின்றோம்.

இலங்கையில் எதிர்கால சந்ததியினரை புகையிலை மற்றும் மதுபானப் பாவனையிலிருந்து பாதுகாக்கும் நோக்கில், “புகையிலை இல்லாத தலைமுறை” எனும் விசேட திட்டத்திற்கான பரிந்துரை அறிக்கை சுகாதார மற்றும் வெகுஜன ஊடக அமைச்சரிடம் உத்தியோகபூர்வமாக கையளிக்கப்பட்டது.

தேசிய புகையிலை மற்றும் மதுபான அதிகாரசபையினால் (NATA) தயாரிக்கப்பட்ட இந்தத் திட்டம், 2010 ஆம் ஆண்டுக்குப் பின்னர் பிறந்த அனைத்துக் குழந்தைகளையும் புகையிலை பாவனை இல்லாத ஒரு தலைமுறையாக மாற்றுவதை முதன்மை நோக்கமாகக் கொண்டுள்ளது.

இந்த இலக்கை அடைய இரண்டு முக்கிய நடவடிக்கைகள் பரிந்துரைக்கப்பட்டுள்ளன:

1. சட்டத் திருத்தம்: தற்போதிருக்கும் தேசிய புகையிலை மற்றும் மதுபான அதிகாரசபைச் சட்டத்தின் விதிமுறைகளைப் புதுப்பித்தல்.
2. அணுகலைத் தடை செய்தல்: ஒரு குறிப்பிட்ட வயதுக்குப் பிறகு பிறந்த எவருக்கும் புகையிலைப் பொருட்களை வாங்குவதற்கோ அல்லது அணுகுவதற்கோ சட்ட ரீதியாகத் தடை விதித்தல்.

இந்த அறிக்கையைப் பெற்றுக்கொண்ட சுகாதார மற்றும் வெகுஜன ஊடகத்துறை அமைச்சர் டாக்டர் நளிந்த ஜெயதிஸ்ஸ, ஆரோக்கியமான எதிர்காலத்தை நோக்கி குழந்தைகள் செல்வதற்கு புகையிலையும் மதுபானமும் பெரும் தடையாக இருப்பதைச் சுட்டிக்காட்டினார். இத்திட்டத்தை நடைமுறைப்படுத்துவதற்கான தனது முழுமையான விருப்பத்தையும் அவர் இதன்போது வெளிப்படுத்தினார். இந்நிகழ்வில் சுகாதார பிரதி அமைச்சர் டாக்டர் ஹன்சகா விஜேமுனியாவும் கலந்துகொண்டார்.

தேசிய புகையிலை மற்றும் மதுபான அதிகாரசபையின் தலைவர் வைத்திய நிபுணர் ஆனந்த ரத்நாயக்க மற்றும் ராஜரட்ட பல்கலைக்கழக மருத்துவ பீடத்தின் எல்.எல். அமில இசுரு ஆகியோர் இதன்போது சில அதிர்ச்சியூட்டும் தகவல்களைப் பகிர்ந்துகொண்டனர்:

• இறப்பு விகிதம்: இலங்கையில் நிகழும் இறப்புகளில் சுமார் 80 சதவீதம் தொற்றா நோய்களால் ஏற்படுகின்றன, இதற்கு புகையிலை மற்றும் மதுபானமே பிரதான காரணம்.
• உள்நாட்டு பாதிப்பு: இலங்கையில் புகையிலை மற்றும் மதுவினால் ஆண்டுதோறும் ஏறக்குறைய 22,000 பேர் உயிரிழக்கின்றனர்.
• உலகளாவிய தாக்கம்: உலகில் ஆண்டுதோறும் சுமார் 8 கோடி மக்கள் புகையிலையினால் உயிரிழக்கின்றனர்; இதில் 10 சதவீதம் பேர் மறைமுகப் புகைப்பிடித்தலால் (Passive Smoking) பாதிக்கப்படுபவர்கள்.
• பொருளாதாரச் சுமை: சுகாதார சேவைக்காக ஒதுக்கப்படும் நிதியில் பெரும்பகுதி, புகைப்பிடிப்பதால் நோய்வாய்ப்படுபவர்களுக்கான சிகிச்சைக்கே செலவிடப்படுகிறது.

பாடசாலை மாணவர்களிடையே சிகரெட் பயன்பாடு அதிகரித்து வருவதாகக் கவலை வெளியிட்ட நிபுணர்கள், சிகரெட்டுகள் மற்றும் மதுபானம் மற்ற போதைப்பொருட்களுக்கான ஆரம்ப நுழைவாயிலாக அமைவதாகவும் எச்சரித்தனர். எனவே, எதிர்கால சந்ததியினர் சிகரெட்டுகளைப் பெறுவதற்கான வாய்ப்பைத் தடுப்பதே அறிவியல் ரீதியான தீர்வாகும் என வலியுறுத்தப்பட்டது.

இந்த வரலாற்று முக்கியத்துவம் வாய்ந்த நடவடிக்கை நாட்டின் சுகாதாரத் துறையிலும் குழந்தைகளின் எதிர்காலத்திலும் ஒரு மாபெரும் வெற்றியாக அமையும் என நிபுணர்கள் நம்பிக்கை வெளியிட்டுள்ளனர்.

2026ஆம் ஆண்டுக்கான புனித ஹஜ் யாத்திரையை மேற்கொள்வதற்காக இலங்கையிலிருந்து புறப்படும் முதலாவது குழு நாளை புனித மக்கா நோக்கி பயணமாகிறது.

புனித கடமையை நிறைவேற்ற புறப்பட்டுள்ள முதலாவது குழுவினரை வாழ்த்தி வழியனுப்பும் விசேட நிகழ்வு நாளை (மே 01) நடைபெறவுள்ளது.

முஸ்லிம் சமய பண்பாட்டலுவல்கள் திணைக்களம் மற்றும் ஹஜ், உம்ரா குழு ஆகியவற்றின் ஏற்பாட்டில், இந்த விசேட நிகழ்வு கட்டுநாயக்க பண்டாரநாயக்க சர்வதேச விமான நிலையத்தில் இடம்பெற ஏற்பாடுகள் செய்யப்பட்டுள்ளன.

இந்த கௌரவமிக்க நிகழ்வில் பல முக்கிய பிரமுகர்கள் கலந்துகொண்டு யாத்திரிகர்களை வாழ்த்தி வழியனுப்பி வைக்கவுள்ளனர்

அந்த வகையில் மத மற்றும் கலாசார விவகார பிரதி அமைச்சர் கௌரவ முனீர் முலப்பர், மேல் மாகாண ஆளுநர் கௌரவ ஹனீப் யூசுப், இலங்கைக்கான சவூதி அரேபிய தூதுவர் மேன்மைதங்கிய காலித் ஹமூத் அல்கஹ்தானி முஸ்லிம் சமய பண்பாட்டலுவல்கள் திணைக்களத்தின் பணிப்பாளர் மற்றும் ஹஜ், உம்ரா குழுவின் உறுப்பினர்கள் உள்ளிட்ட பல முக்கிய பிரமுகர்கள் இந்நிகழ்வில் கலந்துகொள்ள உள்ளனர்.

ஜூட் சமந்த

நாத்தாண்டியா பகுதியில் இடம்பெற்ற மோட்டார் சைக்கிள் விபத்தில் படுகாயமடைந்து, கடந்த ஒரு மாத காலமாக தீவிர சிகிச்சை பிரிவில் சிகிச்சை பெற்று வந்த நபர் சிகிச்சை பலனின்றி உயிரிழந்துள்ளதாக மாரவில பொலிஸார் தெரிவித்துள்ளனர்.

நாத்தாண்டியா – பஹல வலஹாபிட்டிய பகுதியைச் சேர்ந்த பனம்பரம்கே ரொஷான் பிரகீத் (51 வயது) என்பவரே இவ்வாறு உயிரிழந்தவர் ஆவார்.

கடந்த மார்ச் மாதம் 15 ஆம் திகதி இரவு 11:00 மணியளவில் நாத்தாண்டியா நகரில் தனது மோட்டார் சைக்கிளில் பயணித்துக்கொண்டிருந்த போது, முன்னால் சென்ற மற்றொரு மோட்டார் சைக்கிளின் பின் பகுதியில் மோதி விபத்துக்குள்ளானார்.

விபத்தில் படுகாயமடைந்த அவர், உடனடியாக மாரவில ஆதார வைத்தியசாலையில் அனுமதிக்கப்பட்டார். எனினும், அவரது நிலைமை கவலைக்கிடமாக இருந்ததால் மேலதிக சிகிச்சைக்காக கொழும்பு தேசிய வைத்தியசாலைக்கு மாற்றப்பட்டார்.

அங்கு தீவிர சிகிச்சை பிரிவில் சுமார் 30 நாட்கள் மரணப் போராட்டம் நடத்தி வந்த நிலையில், நேற்று (ஏப்ரல் 29) அவர் சிகிச்சை பலனின்றி உயிரிழந்துள்ளார்.

வேகமாக வந்த மோட்டார் சைக்கிளைக் கட்டுப்படுத்த முடியாமல் போனதே இந்த விபத்துக்குக் காரணம் என ஆரம்பக்கட்ட விசாரணைகளில் இருந்து தெரியவந்துள்ளதாக பொலிஸார் குறிப்பிட்டுள்ளனர். மாரவில பொலிஸ் நிலையத்தின் போக்குவரத்துப் பிரிவினர் இது தொடர்பான மேலதிக விசாரணைகளை முன்னெடுத்து வருகின்றனர்.

இலங்கை கிரிக்கெட் நிறுவனத்தின் இடைக்கால நிர்வாகக் குழுவின் தலைவராகப் பொறுப்பேற்றதைத் தொடர்ந்து, ஐக்கிய மக்கள் சக்தியின் செயற்குழு மற்றும் நிர்வாகக் குழு பதவிகளிலிருந்து முன்னாள் பாராளுமன்ற உறுப்பினர் எரான் விக்ரமரத்ன இராஜினாமா செய்துள்ளார்.

ஐக்கிய மக்கள் சக்தியின் முன்னாள் நாடாளுமன்ற உறுப்பினர் எரான் விக்கிரமரத்ன சமர்ப்பித்த இராஜினாமா கடிதத்தை அக்கட்சி உத்தியோகபூர்வமாக ஏற்றுக்கொண்டுள்ளது.

இலங்கை கிரிக்கெட் நிறுவனத்தின் இடைக்கால நிர்வாகக் குழுவின் தலைவராகப் பொறுப்பேற்றதைத் தொடர்ந்து, ஐக்கிய மக்கள் சக்தியின் செயற்குழு மற்றும் நிர்வாகக் குழு பதவிகளிலிருந்து முன்னாள் பாராளுமன்ற உறுப்பினர் எரான் விக்ரமரத்ன இராஜினாமா செய்துள்ளார்.

ஐக்கிய மக்கள் சக்தியின் முன்னாள் நாடாளுமன்ற உறுப்பினர் எரான் விக்கிரமரத்ன சமர்ப்பித்த இராஜினாமா கடிதத்தை அக்கட்சி உத்தியோகபூர்வமாக ஏற்றுக்கொண்டுள்ளது.

ஸ்ரீலங்கா கிரிக்கெட் நிறுவனத்தின் (SLC) மீளமைப்புக் குழுவின் தலைவராக அண்மையில் நியமிக்கப்பட்ட முன்னாள் நாடாளுமன்ற உறுப்பினர் எரான் விக்கிரமரத்னவை, கட்சியின் உறுப்புரிமையிலிருந்தும் விலகுமாறு ஐக்கிய மக்கள் சக்தி கோரியுள்ளது.

இது தொடர்பாக ஐக்கிய மக்கள் சக்தியின் பொதுச் செயலாளர் ரஞ்சித் மத்தும பண்டாரவினால் 2026 ஏப்ரல் 29 அன்று அனுப்பப்பட்டுள்ள கடிதத்தில், எரான் விக்கிரமரத்னவினால் 2026.04.29 அன்று வழங்கப்பட்ட இராஜினாமா கடிதத்தை கட்சியின் முகாமைத்துவக் குழு மற்றும் செயற்குழு ஆகியன ஏற்றுக்கொண்டுள்ளதாக அறிவிக்கப்பட்டுள்ளது.

அனைத்து விளையாட்டு சங்கங்களும் அரசியல் தலையீடுகளற்ற சுயாதீனமான நிர்வாகத்தைக் கொண்டிருக்க வேண்டும் என்பதும், அரசியல்வாதிகள் அவற்றில் பதவிகளை வகிக்கக் கூடாது என்பதுமே கட்சியின் உறுதியான கொள்கையாகும் என அக் கடிதத்தில் சுட்டிக்காட்டப்பட்டுள்ளது.

எனவே, கட்சியின் இந்தக் கொள்கைக்கு முரணாக அமையாத வகையில், எரான் விக்கிரமரத்ன தார்மீக ரீதியாக ஐக்கிய மக்கள் சக்தியின் கட்சி உறுப்புரிமையிலிருந்தும் விலகிக்கொள்ள வேண்டும் என பொதுச் செயலாளர் கோரிக்கை விடுத்துள்ளார்.

விளையாட்டுத் துறையில் அரசியல் தலையீடுகளைத் தவிர்ப்பதற்கான கட்சியின் கொள்கையினைப் பாதுகாக்கும் நோக்கில் இந்த நடவடிக்கை எடுக்கப்பட்டுள்ளதாக அக்கடிதத்தின் மூலம் அறியமுடிகிறது.

விளையாட்டுத்துறை அமைச்சர் சுனில் குமார கமகேவினால் ஸ்ரீலங்கா கிரிக்கெட் மாற்றியமைப்புக் குழுவின் தலைவராக எரான் விக்கிரமரத்ன நியமிக்கப்பட்டமை குறிப்பிடத்தக்கது.

ஜூட் சமந்த

சிலாபம், அம்பகந்தவில பகுதியில் கடலில் மிதந்து வந்த பெருமளவிலான பீடி இலைகளை கடலோர பாதுகாப்பு திணைக்கள அதிகாரிகள் மீட்டுள்ளனர். கைப்பற்றப்பட்ட இந்த பீடி இலைகள் மேலதிக விசாரணைகளுக்காக சிலாபம் பொலிஸாரிடம் ஒப்படைக்கப்பட்டுள்ளன.

கடந்த ஏப்ரல் 29 ஆம் திகதி மாலை, சிலாபம் – அம்பகந்தவில கடலோர பாதுகாப்பு திணைக்களத்தின் சோதனைச் சாவடி அதிகாரிகளுக்கு கடலில் சில சந்தேகத்திற்கிடமான பொதிகள் மிதப்பதாக தகவல் கிடைத்துள்ளது. இதனைத் தொடர்ந்து மேற்கொள்ளப்பட்ட தேடுதலின் போது, கடலில் மிதந்து வந்து கரையை அடைந்த 250 கிலோ 900 கிராம் எடையுள்ள 06 பொதிகள் அதிகாரிகளால் கைப்பற்றப்பட்டன.

இந்த பீடி இலைகள் இந்தியாவிலிருந்து கடல் மார்க்கமாக கடத்தி வரப்பட்டிருக்கலாம் என பொலிஸார் சந்தேகிக்கின்றனர். பெரிய படகுகளில் இருந்து சிறிய படகுகள் மூலம் கரைக்கு மாற்ற முற்பட்ட போது, கடற்படையினரின் சோதனையில் இருந்து தப்பிக்கும் நோக்கில் அல்லது வேறு ஏதேனும் காரணத்திற்காக கடத்தல்காரர்கள் இப்பொதிகளை கடலில் வீசிச் சென்றிருக்கலாம் என நம்பப்படுகிறது.

தற்போது வரை இந்த கடத்தலுடன் தொடர்புடைய நபர்கள் எவரும் அடையாளம் காணப்படவில்லை. கைப்பற்றப்பட்ட பீடி இலைகளின் பெறுமதி மற்றும் அவற்றை கொண்டு வந்தவர்கள் குறித்த மேலதிக விசாரணைகளை சிலாபம் பொலிஸார் முன்னெடுத்து வருகின்றனர்.

மராட்டிய மாநிலத்தில் கோடை வெயிலின் தாக்கம் முன்னெப்போதும் இல்லாத வகையில் தீவிரமடைந்துள்ள நிலையில், வெப்பத்தால் உயிரிழப்புகள் அதிகரித்து வருவகின்றன. 

மாநில சுகாதாரத் துறை வெளியிட்டுள்ள அறிக்கையின்படி, கடந்த மார்ச் 1, 2026 முதல் ஏப்ரல் 20 வரை வெப்பத்தாக்கத்தால் 39 நேரடி பாதிப்புகள் உறுதிசெய்யப்பட்டுள்ளன. 

இதனுடன், மாநிலம் முழுவதும் இதுவரை மொத்தம் 109 உயிரிழப்புகள் பதிவாகியுள்ளன. 

அக்கோலா, நந்துர்பார் மற்றும் ரத்னகிரி மாவட்டங்களில் அதிகப்படியான பாதிப்புகள் பதிவாகியுள்ளன. 

மும்பை மாநகராட்சிப் பகுதியில் நேரடி வெப்பத்தாக்கங்கள் புதிதாக இல்லை என்றாலும், வெப்பம் தொடர்பான பிற உடல்நலக் குறைபாடுகளால் 108 மரணங்கள் நிகழ்ந்துள்ளதாக தகவல் தெரிவிக்கப்பட்டுள்ளது. 

மேலும், மாநிலம் முழுவதும் உள்ள வைத்தியசாலைகளில் சுமார் 3.34 லட்சத்திற்கும் அதிகமானோர் வெப்பம் தொடர்பான பல்வேறு உடல்நலப் பிரச்சினைகளுக்காக சிகிச்சை பெற்றுள்ளனர். 

இந்த அபாயகரமான நிலையை முன்னிட்டு, மாநில சுகாதாரத் துறை அனைத்து மாவட்ட மருத்துவமனைகளும் தயார்நிலையில் இருக்குமாறு உத்தரவிட்டுள்ளது. 

வெப்பத்தாக்க நோயாளிகளுக்கென தனிப்படுக்கைகள், போதுமான அளவு ஓஆர்எஸ் (ORS) பாக்கெட்டுகள் மற்றும் குளிர்ந்த குடிநீர் வசதிகளை ஏற்படுத்த அறிவுறுத்தப்பட்டுள்ளது. 

மேலும், பொதுமக்கள் மதியம் 12 மணி முதல் மாலை 4 மணி வரை வெளியே செல்வதை தவிர்க்கவும், தளர்வான பருத்தி ஆடைகளை அணியவும், அதிகளவில் தண்ணீர் குடித்து உடல் நீர்ச்சத்தை பராமரிக்கவும் அறிவுறுத்தப்பட்டுள்ளனர். 

ஏதேனும் உடல்நலக் குறைபாடுகள் ஏற்பட்டால் தாமதிக்காமல் உடனடியாக அருகிலுள்ள வைத்தியசாலைக்கு சென்று சிகிச்சை பெற வேண்டும் என சுகாதாரத் துறை எச்சரிக்கை விடுத்துள்ளது.

வெசாக் – ஹஜ்ஜுப் பெருநாள், இரண்டு சமயக் கடமைகளும் சமூகத்தில் மிக முக்கிய நிகழ்வுகள் என, ஜனாதிபதியிடமும் அவரது செயலாளரிடமும் ஜனாதிபதி சட்டத்தரணி பைஸர் முஸ்தபா சுட்டிக் காட்டியுள்ளார்.

உழ்ஹிய்யா விவகாரம் தொடர்பில் அவசரமாகவும் அவசியமாகவும் சுமூகமான தீர்வொன்றினைப் பெற்றுக்கொடுக்குமாறும், பைஸர் முஸ்தபா அவர்களிடம் வேண்டுகோள் விடுத்துள்ளார்.

தொலைபேசி ஊடாகவே பைஸர் முஸ்தபா, இந்த வேண்டுகோளை விடுத்துள்ளார்.
இம்முறை வெசாக் வாரத்தை அரசாங்கம் எதிர்வரும் மே மாதம் 27 ஆம் திகதி முதல் ஜூன் மாதம் 2 ஆம் திகதி வரை பிரகடனப்படுத்தப்பட்டுள்ள நிலையில், மே மாதம் 28 ஆம் திகதி முஸ்லிம்கள் புனித ஈதுல் அல்ஹா ஹஜ்ஜுப் பெருநாளைக் கொண்டாடவுள்ளனர்.

முஸ்லிம்களின் முக்கிய கடமைகளில் ஒன்றான உழ்ஹிய்யாக் கடமையை நிறைவேற்றுவதற்கான காலம், ஹஜ்ஜுப் பெருநாள் தினமான “அய்யாமுத் தஷ்ரீக்” (துல்ஹஜ் பிறை 10) மே மாதம் 28 முதல், (துல்ஹஜ் பிறை 13) மே மாதம் 31 அஸர் தொழுகை நேரம் வரையிலாகும். இக்காலப் பகுதியிலேயே வெசாக் வாரமும் பிரகடனப்படுத்தப்பட்டுள்ளது.

இக்காலப் பகுதியில் இறைச்சிக்கான பிராணிகளை அறுப்பதோ அல்லது விற்பனை செய்வதோ கூடாது என, மாகாண சபைகள், உள்ளூராட்சி மற்றும் பொது நிர்வாக அமைச்சு விசேட வர்த்தமானி மூலம் அறிவுறுத்தியுள்ளது. இதனடிப்படையில், இக்காலப் பகுதியில் உழ்ஹிய்யாவுக்காக ஆடு மாடுகளை அறுப்பதும் தடை செய்யப்பட்டதாகக் கருத வேண்டியுள்ளது.

இதன் பின்னணியில், உழ்ஹிய்யாக் கொடுப்பது தொடர்பான பலரினதும் பல்வேறு கருத்துக்கள், தற்போது சர்ச்சையாக உருவாகியும் கேள்விக் குறியாகவும் மாறியுள்ளன.

எனவேதான், உழ்ஹிய்யா விவகாரம் தொடர்பில், ஜனாதிபதி சட்டத்தரணியும் பாராளுமன்ற உறுப்பினருமான பைஸர் முஸ்தபா, ஜனாதிபதி மற்றும் ஜனாதிபதியின் செயலாளர் ஆகியோருடன் கலந்துரையாடியுள்ளார்.

வெசாக் – ஹஜ்ஜுப் பெருநாள், இரண்டு சமயக் கடமைகளும் சமூகத்தில் மிக முக்கிய நிகழ்வுகளாக இருப்பதால், வெசாக் போயா தினமல்லாத ஏனைய நாட்களில் குறித்த விவகாரம் தொடர்பில் அவசரமாகவும் அவசியமாகவும் சுமூகமான தீர்வொன்றினைப் பெற்றுக்கொடுக்குமாறும், பைஸர் முஸ்தபா இருவரிடமும் வேண்டுகோள் விடுத்துள்ளார்.

(ஐ. ஏ. காதிர் கான்)

பயிற்சிகளை நிறைவுசெய்த ஆயுர்வேத, சித்த மற்றும் யுனானி மருத்துவப் பட்டதாரிகள் 402 பேருக்கான நியமனக் கடிதங்களை வழங்கும் நிகழ்வு நேற்று (28) கொழும்பு பல்கலைக்கழகத்தின் முதுகலை பட்டப்படிப்பு பீட கேட்போர் கூடத்தில் நடைபெற்றது. சுகாதார மற்றும் வெகுஜன ஊடக அமைச்சர் வைத்தியர் நலிந்த ஜயதிஸ்ஸ தலைமையில் இந்த நிகழ்வு இடம்பெற்றது.

கொழும்பு பல்கலைக்கழகத்தின் உள்நாட்டு மருத்துவ பீடம், கம்பஹா விக்ரமாராச்சி உள்நாட்டு மருத்துவ பல்கலைக்கழகத்தின் உள்நாட்டு மருத்துவ பீடம், யாழ்ப்பாணப் பல்கலைக்கழகத்தின் சித்த மருத்துவ பீடம், கிழக்குப் பல்கலைக்கழகத்தின் சித்த மருத்துவ பீடங்களில் ஐந்தாண்டு கால மருத்துவப் படிப்பை நிறைவு செய்தவர்களுக்கே குறித்த நியமனக் கடிதங்கள் வழங்கிவைக்கப்பட்டன.

இவர்கள் 2017–2018 ஆம் கல்வியாண்டுகளில் கல்விப் பொதுத்தராதரப் பத்திரப் படிப்பை மேற்கொண்டவர்களாவர். தெரிவு செய்யப்பட்ட 402 பட்டதாரிகளில் 249 பேர் ஆயுர்வேதத் துறையையும், 109 பேர் சித்த மருத்துவத் துறையையும், 44 பேர் யுனானி மருத்துவத் துறையையும் சேர்ந்தவர்கள் என்பது குறிப்பிடத்தக்கது.

இந்தப் பட்டதாரிகள் போதனா வைத்தியசாலைகள், ஆயுர்வேத ஆராய்ச்சி நிறுவனம் மற்றும் மாகாண ஆயுர்வேத திணைக்களத்தின் கீழ் உள்ள வைத்தியசாலைகளில் ஓராண்டு காலத்திற்கு உள்ளக பயிற்சியைப் பெறு உள்ளனர். விசேட வைத்திய நிபுணர்கள் மற்றும் முதலாம் தர வைத்தியர்களின் நேரடி மேற்பார்வையின் கீழ் இப்பயிற்சிகள் வழங்கப்பட உள்ளது.

பயிற்சிக் காலத்தின் போது, சுகாதார மற்றும் வெகுஜன ஊடக அமைச்சினால் இவர்களுக்கு மாதாந்தக் கொடுப்பனவு வழங்கப்பட உள்ளதுடன், பயிற்சியை வெற்றிகரமாக நிறைவு செய்யும் அதிகாரிகள், ஆயுர்வேத மருத்துவ சபையில் தங்களை ஆயுர்வேத வைத்தியர்களாகப் பதிவு செய்துகொள்ள முடியுமென தெரிவிக்கப்பட்டுள்ளது.

நிகழ்வில் உரையாற்றிய அமைச்சர் வைத்தியர் நலிந்த ஜயதிஸ்ஸ, வளர்ந்து வரும் ஒரு நாடாக இலங்கையை முன்னோக்கி கொண்டு செல்ல கடுமையான நிதி ஒழுக்கம் அவசியம் என வலியுறுத்தினார்.

‘தித்வா’ சூறாவளியினால் ஏற்பட்ட சேதங்களை சீரமைக்க திறைசேரியினால் 500 மில்லியன் ரூபாய் ஒதுக்கப்பட்டுள்ளது. மேலும், இந்த ஆண்டு இறுதியில் சமர்ப்பிக்கப்படவுள்ள வரவு செலவுத் திட்டத்தில் மூலதனச் செலவுகளுக்காக வரலாற்றில் மிக அதிக தொகையான 2000 பில்லியன் ரூபாய் ஒதுக்கப்படும் என அமைச்சர் தெரிவித்தார்.

உயர்கல்வி அமைச்சினால் வழங்கப்படும் அனைத்துப் பட்டதாரிகளையும் சுகாதார அமைச்சு நேரடியாக உள்வாங்கும் நிலை இனி இருக்காது என அமைச்சர் தெளிவுபடுத்தினார். தற்போது மேற்குலக மருத்துவப் பட்டதாரிகளுக்கும் வெற்றிடங்கள் குறைந்து வருவதால், எதிர்காலத்தில் ஒரு குறிப்பிட்ட பொறிமுறையின் ஊடாகவே சேவையில் இணைய வேண்டிய சூழல் ஏற்படும் என அவர் எச்சரித்தார்.

இந்த நிகழ்வில் சுகாதார அமைச்சின் மேலதிக செயலாளர் சமந்தி ரணசிங்க, ஆயுர்வேத ஆணையாளர் நாயகம் தீப்தி சுமனசேன மற்றும் பல முக்கிய அதிகாரிகள் கலந்துகொண்டனர்.