கட்டுநாயக்க, பண்டாரநாயக்க சர்வதேச விமான நிலையத்தில் கடந்த நேற்று முன்னெடுக்கப்பட்ட விசேட சோதனைகளின் போது, சட்டவிரோதமாகப் பொருட்களைக் கடத்தி வர முயன்ற 15 சீனப் பிரஜைகள் சுங்கப் பிரிவினரால் கைது செய்யப்பட்டுள்ளனர்.

சுங்கப் பணிப்பாளரும் ஊடகப் பேச்சாளருமான சந்தன புஞ்சிஹேவா இதனைத் தெரிவித்துள்ளார்.

இவர்கள் அனைவரும் வர்த்தகர்கள் என அடையாளப்படுத்தியுள்ளதுடன், வெவ்வேறு விமானங்களின் ஊடாக இலங்கையை வந்தடைந்த போதே விமான நிலைய Green Channel பாதையில் வைத்து சுங்க அதிகாரிகளால் தடுத்து நிறுத்தப்பட்டனர்.

முதலாவது சம்பவத்தில், 9 சீன வர்த்தகர்கள் தமது உடல், உடைகள் மற்றும் பயணப்பொதிகளில் மிகவும் சூட்சுமமான முறையில் மறைத்து வைத்து 383 கையடக்கத் தொலைபேசிகள், 101 டெப்லட்டுகள் (Tabs), 6 வைபை ரவுட்டர்கள், GPS கருவிகளைக் கடத்தி வந்துள்ளனர்.

இவ்வாறு கைப்பற்றப்பட்ட இலத்திரனியல் பொருட்களின் மொத்தப் பெறுமதி ரூ. 2 கோடி 40 இலட்சத்து 20 ஆயிரம் (ரூ. 24,020,000) என மதிப்பிடப்பட்டுள்ளதுடன், அவை அனைத்தும் சுங்கத் திணைக்களத்தினால் அரசுடமையாக்கப்பட்டுள்ளன.

அதே தினத்தில் முன்னெடுக்கப்பட்ட மற்றுமொரு நடவடிக்கையில், 75,900 சிகரெட்டுகளை சட்டவிரோதமாகக் கொண்டுவந்த மேலும் 6 சீன வர்த்தகர்கள் சுங்கப் போதைப்பொருள் கட்டுப்பாட்டுப் பிரிவினரால் கைது செய்யப்பட்டுள்ளனர்.

இவர்கள் தமது முதுகுப்பைகள் (Backpacks) மற்றும் பயணப்பொதிகளில் இந்த சிகரெட்டுகளை மறைத்து வைத்திருந்தமை சோதனையின் போது கண்டுபிடிக்கப்பட்டது.

பறிமுதல் செய்யப்பட்ட இந்தச் சிகரெட்டுகளின் சந்தைப் பெறுமதி சுமார் ரூ. 1 கோடி 38 இலட்சத்து 50 ஆயிரம் (ரூ. 11,385,000) என மதிப்பிடப்பட்டுள்ளதாக சுங்கப் பணிப்பாளர் சந்தன புஞ்சிஹேவா மேலும் தெரிவித்துள்ளார்.

களுத்துறை நாகொட வைத்தியசாலையில் சிகிச்சை பெற்று வந்த நோயாளி ஒருவர், அங்கு பணியாற்றும் பெண் வைத்தியர் ஒருவருக்குப் பாலியல் தொல்லை கொடுத்த குற்றச்சாட்டில் கைது செய்யப்பட்டுள்ளார். 

சந்தே நபர் மத்துகம பிம்புர வைத்தியசாலையில் சிகிச்சை பெற்று வந்த நிலையில், மேலதிக சிகிச்சைக்காக நாகொட வைத்தியசாலைக்கு மாற்றப்பட்டவராவார். 

பெண் வைத்தியர் சந்தேக நபரின் இரத்த அழுத்தத்தைப் பரிசோதிக்கச் சென்றபோது, அவர் வைத்தியரின் மார்புப் பகுதியைத் தொட்டுள்ளார். 

அந்த நேரத்தில் வைத்தியர் இது குறித்து பொலிஸில் முறைப்பாடு செய்யப்போவதாகத் எச்சரித்துள்ளார். 

எனினும், மீண்டும் பரிசோதனை மேற்கொண்டபோது இரண்டாவது முறையும் அந்த வைத்தியருக்கு அவர் பாலியல் தொல்லை கொடுத்ததாகத் தெரிவிக்கப்படுகிறது. 

சம்பவம் குறித்து முறைப்பாடு கிடைத்ததையடுத்து, பொலிஸார் சந்தேக நபரை கைது செய்துள்ளனர். 

எனினும், அவருக்குச் சிகிச்சை தேவைப்படுவதால் பொலிஸ் பாதுகாப்பின் கீழ் வைத்தியசாலையிலேயே அவருக்குச் சிகிச்சை அளிக்கப்பட்டு வருகிறது. 

சந்தேக நபர் இன்றைய தினம் (15) களுத்துறை நீதவான் நீதிமன்றில் முன்னிலைப்படுத்தப்படவுள்ளார். 

களுத்துறை தெற்கு தலைமையக பொலிஸ் பரிசோதகர் நாலக குணசேகரவின் ஆலோசனையின் பேரில், உப பொலிஸ் பரிசோதகர் வன்னியாரச்சி உள்ளிட்ட அதிகாரிகள் மேலதிக விசாரணைகளை முன்னெடுத்து வருகின்றனர்.

இன்று (15), நாளை (16) மற்றும் நாளை மறுதினம் (17) அனைத்து அரச நிறுவனங்களும், அலுவலகங்களும் வழமைப்போல் திறந்திருக்கும் என பொதுநிர்வாக, மாகாண சபைகள் மற்றும் உள்ளூராட்சி அமைச்சு அறிவித்துள்ளது.​ 

தமிழ் மற்றும் சிங்கள புத்தாண்டை முன்னிட்டு, அரச ஊழியர்களுக்கு கடந்த திங்கட்கிழமை மற்றும் நேற்று (14) ஆகிய இரண்டு நாட்கள் மட்டுமே விடுமுறை வழங்கப்பட்டிருந்தது. 

இந்நிலையில் இன்று முதல் அரச நிறுவனங்கள் மற்றும் அலுவலங்களின் செயற்பாடுகள் வழமைபோல் இடம்பெறும் என அந்த திணைக்களம் குறிப்பிட்டுள்ளது். 

அதேநேரம் சித்திரை புத்தாண்டுக்காக சொந்த ஊர்களுக்கு சென்று மீண்டும் கொழும்புக்கு திரும்பும் பயணிகளின் தேவையைக் கருத்திற்கொண்டு, இன்று (15) முதல் பஸ்களைச் சேவையில் ஈடுபடுத்த நடவடிக்கை எடுத்துள்ளதாக தேசிய போக்குவரத்து ஆணைக்குழு தெரிவித்துள்ளது. 

அனைத்து மாகாண போக்குவரத்து அதிகார சபைகளுக்கும் இதற்கான அறிவுறுத்தல்கள் வழங்கப்பட்டுள்ளதாக அதன் போக்குவரத்துப் பணிப்பாளர் ஷெரின் அதுகோரள குறிப்பிட்டுள்ளார். 

இதேவேளை, இன்று ஒரு சாதாரண அலுவலக நாள் என்பதால் அலுவலக ரயில்களை வழக்கம் போல் இயக்குவதற்குத் திட்டமிட்டுள்ளதாக ரயில்வே திணைக்களம் தெரிவித்துள்ளது. 

பயணிகளின் தேவைக்கேற்ப உரிய ரயில்கள் சேவையில் ஈடுபடுத்தப்படும் என இலங்கை ரயில்வே திணைக்களத்தின் போக்குவரத்து அதிகாரி அசங்க சமரசிங்க தெரிவித்துள்ளார்.

நாட்டின் பெரும்பாலான பகுதிகளில் பிற்பகல் 1 மணிக்குப் பின்னர் மழையோ அல்லது இடியுடன் கூடிய மழையோ பெய்யக் கூடிய சாத்தியம் காணப்படுவதாக வளிமண்டலவியல் திணைக்களம் எதிர்வுகூறியுள்ளது. 

மேல், சப்ரகமுவ மற்றும் மத்திய மாகாணங்களிலும் காலி மற்றும் மாத்தறை மாவட்டங்களிலும் சில இடங்களில் 50 மி.மீ க்கும் அதிகமான ஓரளவு பலத்த மழைவீழ்ச்சி எதிர்பார்க்கப் படுகின்றது. 

மத்திய, சப்ரகமுவ, ஊவா மற்றும் வடக்கு மாகாணங்களிலும் காலி, மாத்தறை வவுனியா மாவட்டங்களிலும் மற்றும் சில இடங்களில் அதிகாலை வேளையில் பனி மூட்டமான நிலை காணப்படும் என தெரிவிக்கப்படுகின்றது. 

இடியுடன் கூடிய மழை பெய்யும் வேளைகளில் அப்பிரதேசங்களில் தற்காலிகமாக வீசக்கூடிய பலத்த காற்று மற்றும் மின்னல் தாக்கங்களினால் ஏற்படக்கூடிய பாதிப்புகளை குறைத்துக்கொள்ள தேவையான முன்னெச்சரிக்கை நடவடிக்கைகளை எடுத்துக்கொள்ளுமாறு பொதுமக்கள் அறிவுறுத்தப்படுகின்றார்கள். 

சூரியனின் வடதிசை நோக்கிய நகர்வு காரணமாக, நாளை (15) வரையில் இலங்கையின் அகலாங்குகளுக்கு நேராக உச்சம் கொடுக்கவுள்ளது. 

அதற்கிணங்க இன்று நண்பகல் 12.10 அளவில் நாவலடி, பரந்தன், முரசுமோட்டை, வெள்ளிக்கண்டல், உடபத்துக்கண்டல், புளியம்பொக்கணைஆகிய பகுதிகளுக்கு மேலாக சூரியன் உச்சம் கொடுக்கவுள்ளது.

எழுந்துள்ள சவால்களைத் துணிவுடன் எதிர்கொண்டு, வளமான நாடு – அழகான வாழ்க்கை எனும் இலக்கை அனைவருக்கும் உரித்தாக்குவதற்குச் சகோதரத்துவத்துடன் கைகோர்ப்போம் என ஜனாதிபதி அநுர குமார திசாநாயக்க கோரிக்கை விடுத்துள்ளார். 

மலர்ந்துள்ள பராபவ சித்திரை புத்தாண்டுக்கான தமது வாழ்த்துச் செய்தியில் ஜனாதிபதி இதனைக் குறிப்பிட்டுள்ளார். 

பௌதிக ரீதியாகவும் ஆன்மீக ரீதியாகவும் புதுமைபெறும் எதிர்பார்ப்பை அடையாளப்படுத்தும் சித்திரை புத்தாண்டு, இந்நாட்டு மக்களின் பிரதான கலாசார விழாவாகும். 

பாரம்பரிய சம்பிரதாயங்களைப் பாதுகாத்து, சடங்குகளுக்கும் சமயக் கிரியைகளுக்கும் முன்னுரிமை அளித்து, அனைவரும் ஒன்றிணைந்து ஒரே சுபவேளையில் செயற்படுவது இப்புத்தாண்டின் சிறப்பம்சமாகும். 

இவ்வாறு பகிர்ந்துகொள்ளப்படும் கலாசாரம் உலகிற்கு முன்னால் எமது நாட்டின் தனித்துவத்தையும், எமது சமூகங்களுக்கு இடையே நிலவும் சமூக-கலாசார பிணைப்பையும் மிகச்சிறப்பாகப் பிரதிபலிக்கின்றது. 

நாட்டின் எதிர்கால அபிவிருத்திப் பாதையை இந்த பெறுமதிமிக்க கலாசாரத்துடனும், சிறந்த வரலாற்று மரபுரிமையுடனும் மட்டுமே தேர்ந்தெடுக்க முடியும் என்று நாம் திடமாக நம்புகின்றோம். 

அதற்கமைய, எமது அனைத்து எதிர்கால அபிவிருத்தித் திட்டங்களும் அந்த பெறுமதிமிக்க மரபுரிமை மற்றும் கலாசாரத்தின் மீது வலுவாகக் காலூன்றித் தயாரிக்கப்பட்டுள்ளன என்பதை இங்கு நினைவுகூர வேண்டும். 

அதேபோல், சூரியப் பெயர்ச்சிக்கு இணையாக மேற்கொள்ளப்படும் அனைத்துச் சடங்குகளினதும் பொதுவான எதிர்பார்ப்பு, கூட்டுமுயற்சியை மதிக்கின்ற, மற்றவர்களினதும் இயற்கையினதும் இருப்புக்கு மதிப்பளிக்கின்ற ஒரு மனிதாபிமானமுள்ள புதிய மனிதனை உருவாக்குவதாகும். 

புத்தாண்டின் சடங்குகள் மூலம் வெளிப்படும் அந்த ஒற்றுமையின் பண்புகளும் விழுமியங்களும் அந்த சில நாட்களுக்கு மாத்திரமன்றி, வருடம் முழுவதும் எமது நடத்தையில் பிரதிபலிக்க வேண்டும் என்று நான் கருதுகிறேன். 

கடந்த வருடம் நாம் எதிர்கொண்ட மிகப்பெரிய இயற்கை அனர்த்த சவால்களின் போது உலகிற்கு வெளிப்படுத்திய எமது உள்வாங்கும் திறன் மற்றும் சகிப்புத்தன்மையைப் போலவே, மத்திய கிழக்கு யுத்தம் காரணமாக ஏற்பட்டுள்ள வெளிப்புற சவால்களையும் திட்டமிட்ட முறையான முகாமைத்துவத்துடன் வெற்றிகொள்வதற்குத் தேவையான வேலைத்திட்டங்களை அரசாங்கம் தற்போது நடைமுறைப்படுத்தியுள்ளது. 

ஒரு நாடாக ஒன்றிணைந்து இந்தச் சவால்களை வென்றெடுக்கும்போது, சித்திரை புத்தாண்டு காலத்தில் வெளிப்படுத்தப்படும் ஒற்றுமை மற்றும் பகிர்தல் போன்ற பண்புகளால் எமது வாழ்க்கையை மேலும் அர்த்தமுள்ளதாக்கிக் கொள்ள அர்ப்பணிப்புடன் செயற்படுமாறு நான் அனைவரிடமும் கேட்டுக்கொள்கின்றேன். 

பெற்றுக்கொண்ட வெற்றிகளை மேலும் உறுதிப்படுத்துவதுடன், எழுந்துள்ள சவால்களைத் துணிவுடன் எதிர்கொண்டு, வளமான நாடு – அழகான வாழ்க்கை எனும் இலக்கை அனைவருக்கும் உரித்தாக்குவதற்குச் சகோதரத்துவத்துடன் கைகோர்ப்போம் என அழைப்பு விடுத்து, பிறந்துள்ள இச்சித்திரை புத்தாண்டு அமைதியும் மகிழ்ச்சியும் நிறைந்த இனிய புத்தாண்டாக அமைய வாழ்த்துவதாக ஜனாதிபதி சுட்டிக்காட்டியுள்ளார்.

விசேட அரசியல் ஆய்வு அறிக்கை

இலங்கையின் அரசியல் வரலாற்றில் ஒரு திருப்புமுனையாக தேசிய மக்கள் சக்தி (NPP) ஆட்சி அதிகாரத்தைக் கைப்பற்றியுள்ளமையானது, பாரம்பரிய அரசியல் ஆய்வாளர்களிடையே ஒரு புதிய விவாதத்தைத் தோற்றுவித்துள்ளது. குறிப்பாக, அரசியல் தத்துவார்த்த ரீதியாக முழுமையான ஒரு அரசியல் வகையினமாக கருதப்படாத “ஊழல் எதிர்ப்பு” எனும் கோஷம், எவ்வாறு ஒரு மக்கள் சக்தியைத் திரட்டி அரச அதிகாரத்தைக் கைப்பற்றும் அளவுக்கு வலுப்பெற்றது என்பது இங்குள்ள முக்கிய கேள்வியாகும்.

நெருக்கடியின் மத்தியில் ஊழல் எதிர்ப்பு: ஒரு “வெற்று அடையாளமாக” (Empty Signifier)

அரசியல் கோட்பாட்டாளர் எர்னஸ்டோ லாக்லோ (Ernesto Laclau) குறிப்பிடுவது போல, ஊழல் எதிர்ப்பு என்பது ஒரு “வெற்று அடையாளமாக” இங்கு தொழிற்பட்டுள்ளது. பொருளாதார வீழ்ச்சி, நிர்வாகத் தோல்வி, குடும்ப ஆட்சி மற்றும் அரச நிறுவனங்களின் பலவீனம் என அனைத்துப் பிரச்சினைகளும் “ஊழல்” என்ற ஒற்றைச் சொல்லுக்குள் அடக்கப்பட்டன.

இந்தச் சூழலில், பிரச்சினைகளுக்கான ஆழமான கட்டமைப்பு ரீதியான காரணங்கள் புறந்தள்ளப்பட்டு, “அனைவரும் திருடர்கள், அவர்களைத் தண்டிக்க வேண்டும்” என்ற மிக எளிமையான, பொதுவான மற்றும் உணர்ச்சிகரமான கோஷம் மக்கள் மத்தியில் பெரும் வரவேற்பைப் பெற்றது. இது ஒரு மாற்றுக் கொள்கையை முன்வைப்பதை விட, நிலவும் முறையை ஒட்டுமொத்தமாக நிராகரிக்கும் ஒரு மொழியாகவே பயன்படுத்தப்பட்டது.

அரசியல் மாற்றத்தின் வரலாற்றுப் பின்னணி

NPP இன் வெற்றி என்பது வெறும் ஆட்சி மாற்றம் மட்டுமல்ல; இது தசாப்தங்களாக வேரூன்றியிருந்த ஒரு அரசியல் கலாசாரத்தை மக்கள் நிராகரித்த ஒரு வரலாற்றுத் தருணமாகும்.

• மக்களின் அவநம்பிக்கை: ஐக்கிய தேசியக் கட்சி (UNP) போன்ற பாரம்பரிய கட்சிகள் மீதான கடும் அதிருப்தி NPP க்கான பாதையைச் செப்பனிட்டது.
• எதிர்க்கட்சிகளின் பிளவு: எதிர்க்கட்சிகள் பிளவுபட்டிருந்ததும், பழைய அரசியல் முறைமையையே பிரதிநிதித்துவப்படுத்தியதும் NPP க்கான அரசியல் வாய்ப்பை அதிகரித்தது.

ஜே.வி.பி (JVP) முதல் தேசிய மக்கள் சக்தி வரை: ஜனரஞ்சகவாதத்தின் புதிய முகம்

முன்னர் “இடதுசாரி ஜனரஞ்சகவாதத்தை” முன்னிறுத்திய ஜே.வி.பி, இன்று “தேசியவாத ஜனரஞ்சகவாதத்தின்” ஆரம்ப அறிகுறிகளைக் காட்டுவது ஒரு முரண்பாடான உண்மையாகப் பார்க்கப்படுகிறது. ஊழல் எதிர்ப்பு என்ற தார்மீகக் கோஷத்தை முன்னிறுத்தி, முழு அமைப்பையும் விமர்சிக்கும் ஒரு அரசியல் மொழியை NPP உருவாக்கியுள்ளது. “ஊழலை ஒழிப்பதன் மூலம் அனைத்துப் பிரச்சினைகளுக்கும் விமோசனம் கிடைக்கும்” என்ற எண்ணம் மக்கள் மத்தியில் ஆழமாக விதைக்கப்பட்டுள்ளது.

அதிகாரத்தைக் கைப்பற்றிய பின் எழும் சவால்கள்

அதிகாரத்தைப் பெறுவதற்கு ஊழல் எதிர்ப்பு ஒரு சிறந்த ஆயுதமாக இருந்திருக்கலாம், ஆனால் ஆட்சி நடத்துவதற்கு அது போதுமானதல்ல. ஜாக் டெரிடாவின் (Jacques Derrida) “கட்டமைப்புச் சிதைவு” (Deconstruction) எனும் கருதுகோளின் அடிப்படையில் பார்த்தால், தற்போது நிலவும் அதிகார உறவுகள் மற்றும் நிறுவன முறைகள் தொடர்ந்து கேள்விக்குள்ளாக்கப்பட வேண்டும்.

• எதிர்ப்பு முதல் கட்டமைப்பு வரை: “எதற்கெதிராக இருக்கிறோம்” என்பதில் இருந்து “எதனை உருவாக்கப் போகிறோம்” என்ற இடத்திற்கு NPP நகர வேண்டியுள்ளது.
• அரசியல் விலை: கடந்த காலப் போராட்டங்களின் நினைவுகள், தியாகங்கள் மற்றும் சகோதரத்துவத்தின் விழுமியங்கள் இந்த அதிகாரப் போட்டியில் நீர்த்துப்போகும் அபாயம் உள்ளது. இந்த அரசியல் விலையைச் செலுத்த ஜே.வி.பி தயாராக உள்ளதா?

ஜனநாயகத்தை மறுசீரமைப்பதற்கான வாய்ப்பு

பழைய அரசியல் முறைமை வீழ்ச்சியடைந்துள்ள இந்த தருணத்தைப் பயன்படுத்தி, ஜனநாயகத்தைப் பலப்படுத்த பின்வரும் சீர்திருத்தங்கள் அவசியமானவை:

1. நிறைவேற்று அதிகாரம் கொண்ட ஜனாதிபதி முறையை மறுபரிசீலனை செய்தல்.
2. நாடாளுமன்றக் கட்டுப்பாட்டை வலுப்படுத்துதல்.
3. மக்கள் பங்கேற்புடனான அரசியல் உரையாடல்களை உருவாக்குதல்.

முடிவுரை

தேசிய மக்கள் சக்தியின் எழுச்சி என்பது ஊழல் எதிர்ப்பு எனும் கோஷம் ஒரு சக்திவாய்ந்த அரசியல் கருவியாக இருக்க முடியும் என்பதை நிரூபித்துள்ளது.

எனினும், ஒரு தார்மீகக் கோஷத்தை மட்டும் வைத்துக் கொண்டு நீண்ட காலத் தீர்வுகளை வழங்க முடியாது. பழைய விமர்சனங்களை நிராகரிக்காமல், புதிய அரசியல் யதார்த்தத்தோடு இணைந்த, இன்னும் ஆழமான ஜனநாயகப் பொறிமுறையை நோக்கி நாம் நகர வேண்டியுள்ளது.

இது தோல்வியடையும் பட்சத்தில், நிராகரிக்கப்பட்ட பழைய பிற்போக்கு சக்திகள் மீண்டும் பலம்பெறும் அபாயம் இருப்பதை நாம் மறந்துவிடக் கூடாது.

Digital creator
Lecturer at Open University of Sri Lanka
Former Teaching assistant at University of Colombo

மின்சாரக் கட்டணத் திருத்தங்களின் போது மின் உற்பத்தி, கடத்தல் மற்றும் விநியோகத்திற்காக ஏற்படும் நியாயமான செலவுகளை மாத்திரமே கருத்திற் கொள்ளவுள்ளதாக இலங்கை பொதுப்பயன்பாடுகள் ஆணைக்குழு (PUCSL) அறிவித்துள்ளது.

பொதுமக்களுக்குச் சுமையளிக்காத வகையில், மின்சாரக் கட்டணங்களை நிர்ணயிப்பது தொடர்பில் ஆணைக்குழு முக்கிய தீர்மானங்கள் சிலவற்றை முன்மொழிந்துள்ளது.

கடந்த காலங்களில் மேற்கொள்ளப்பட்ட மின்சாரக் கட்டணத் திருத்தங்களின் போதும், நிலக்கரி இறக்குமதியின் போது ஏற்பட்ட மேலதிக செலவுகள் அல்லது ஏனைய நியாயமற்ற செலவினங்களுக்கு அனுமதி வழங்கப்படவில்லை என்பதை ஆணைக்குழு சுட்டிக்காட்டியுள்ளது.

எதிர்காலத்தில் முன்வைக்கப்படும் மின்சாரக் கட்டணத் திருத்த யோசனைகளின் போதும் பின்வரும் விடயங்களை மின்சாரக் கட்டணத்தில் உள்ளடக்காதிருக்க ஆணைக்குழு ஏகமனதாகத் தீர்மானித்துள்ளது:

• நிலக்கரி விநியோகச் சிக்கல்கள் அல்லது தரக்குறைபாடுகள் காரணமாக ஏற்படும் மேலதிக செலவுகள்.
• மின்சார சபையினால் முன்வைக்கப்படும் ஏனைய நியாயமற்ற செலவினங்கள்.

நிலக்கரியின் தரம் மற்றும் ஏனைய நிர்வாக ரீதியான குறைபாடுகளால் ஏற்படும் நட்டங்களை நுகர்வோர் மீது சுமத்த முடியாது என்பதில் ஆணைக்குழு உறுதியாக உள்ளது.

உற்பத்தி மற்றும் விநியோகச் சங்கிலியில் ஏற்படும் உண்மையான மற்றும் அவசியமான செலவுகளை மட்டுமே அடிப்படையாகக் கொண்டு எதிர்கால மின்சாரக் கட்டணங்கள் நிர்ணயிக்கப்படும் என பொதுப்பயன்பாடுகள் ஆணைக்குழு மேலும் தெரிவித்துள்ளது.