பொலிஸ் உயர் மட்டத்தில் தூள் பறக்கும் மாற்றி யோசிப்பு! மாகாணங்களுக்குப் பொறுப்பான ‘பிக் பாஸ்களுக்கு’ விழுந்த அதிரடி சீட்டு

நாட்டின் பாதுகாப்பு மற்றும் பொலிஸ் நிர்வாகக் கட்டமைப்பில் பாரிய மாற்றத்தை ஏற்படுத்தும் வகையில், பொலிஸ் தலைமையகத்தினால் விடுக்கப்பட்டுள்ள உத்தரவு ஒன்று பொலிஸ் வட்டாரங்களில் பெரும் பரபரப்பை ஏற்படுத்தியுள்ளது. சிரேஷ்ட பிரதிப் பொலிஸ் மா அதிபர்கள் (SDIGs) மற்றும் உதவிப் பொலிஸ் அத்தியட்சகர்கள் (ASPs) அடங்கலாகப் பல உயர் அதிகாரிகள் உடனடி அமலுக்கு வரும் வகையில் இடமாற்றம் செய்யப்பட்டுள்ளனர்.

இந்த அதிரடி ஆட்டத்தின் முதலாவது நகர்வாக, சிறப்புப் பணியகத்தில் பணியாற்றி வந்த சிரேஷ்ட பிரதிப் பொலிஸ் மா அதிபர் சம்பத் குமார உடனடியாக கிழக்கு மாகாணத்திற்கு மாற்றப்பட்டுள்ளார். அதேபோல், இதுவரை தெற்கு மாகாணத்திற்குப் பொறுப்பாக இருந்து களம் கண்ட சிரேஷ்ட பிரதிப் பொலிஸ் மா அதிபர் கித்சிறி ஜெயலத், சபரகமுவ மாகாணத்தின் புதிய பொலிஸ் தலைவராகப் பொறுப்பேற்கவுள்ளார்.

விஷயம் இதோடு முடியபோவதில்லை. சிறுவர் மற்றும் மகளிர் பணியகத்தின் தலைவராகச் செயலாற்றும் சிரேஷ்ட பிரதிப் பொலிஸ் மா அதிபர் வருண ஜெயசுந்தரவிற்கு, பயிற்சி மற்றும் உயர்மட்டப் பயிற்சிகள் பிரிவின் பணிப்பாளர் என்ற கூடுதல் பொறுப்பு வழங்கி அவரது அதிகாரக் கரம் மேலும் வலுப்படுத்தப்பட்டுள்ளது.

அதேநேரம், வடக்கு மற்றும் தெற்கு மாகாணங்களின் பாதுகாப்பு வியூகங்களில் ஒரு சுவாரஷ்யமான “நாற்காலி ஆட்டம்” அரங்கேறியுள்ளது. சிறப்புப் பாதுகாப்புப் பிரிவுக்குப் பொறுப்பாக இருந்த சிரேஷ்ட பிரதிப் பொலிஸ் மா அதிபர் கே.பி. கருணரத்ன வடக்கு மாகாணத்திற்குப் பொறுப்பாக மாற்றப்பட, இதுவரை வடக்கை தன் கட்டுப்பாட்டில் வைத்திருந்த சிரேஷ்ட பிரதிப் பொலிஸ் மா அதிபர் புத்திக சிறிவர்தன, அப்படியே தெற்கு மாகாணத்தின் புதிய தளபதியாக நியமிக்கப்பட்டுள்ளார்.

சிரேஷ்ட அதிகாரிகள் மட்டுமல்லாது, 6 உதவிப் பொலிஸ் அத்தியட்சகர்களும் (ASPs) இந்த இடமாற்றப் பட்டியலில் சிக்கியுள்ளனர். இதில் காலி மாவட்ட குற்றத்தடுப்புப் பிரிவின் பணிப்பாளராகக் கடமையாற்றிய உதவிப் பொலிஸ் அத்தியட்சகர் நாமல் பெரேரா, பொலிஸ் களப்படைப் பிரிவுக்கு மாற்றப்பட்டிருப்பது குறிப்பிடத்தக்கது.

இந்த அதிரடி இடமாற்றங்கள் அனைத்தும் தேசிய பொலிஸ் ஆணைக்குழுவின் (NPC) இறுதி அங்கீகாரத்திற்கு உட்பட்டே முறைப்படி அமல்படுத்தப்படும் என பொலிஸ் தலைமையகம் தெளிவுபடுத்தியுள்ளது.

சிறைகளுக்குள் பாரிய சதி! கைதிகளை பகடைக்காய்களாக மாற்ற பிளான்: அம்பலப்படுத்துகிறது அரசாங்கம்

நாட்டின் பாதுகாப்பு மற்றும் சிறைச்சாலைகளின் அமைதியை குலைக்கும் வகையில் பின்னணியில் இருந்து இயங்கும் சில சுயநலவாதிகள், கைதிகளை தூண்டிவிட்டு பெரும் கலவரத்தை உருவாக்க சதித்திட்டம் தீட்டி வருவதாக அதிர்ச்சித் தகவல்கள் வெளியாகியுள்ளன.

தங்களின் குறுகிய அரசியல் மற்றும் தனிப்பட்ட நோக்கங்களுக்காக கைதிகளின் உணர்ச்சிகளை தூண்டிவிடும் இந்த அபாண்டமான வலையில் யாரும் சிக்கிவிடக் கூடாது என நீதி மற்றும் தேசிய ஒருமைப்பாடு அமைச்சர் ஹர்ஷன நாணயக்கார மிகக் கடுமையான எச்சரிக்கையை விடுத்துள்ளார்.

நீண்டகாலமாக சிறைக்கைதிகள் சந்தித்து வரும் மிக முக்கியப் பிரச்சினையான பிணை தாமதத்திற்கு, அரசாங்க பகுப்பாய்வாளர் திணைக்களத்தின் அறிக்கை தாமதமே முதன்மை காரணம் என்பது கண்டறியப்பட்டுள்ளது. இந்தத் துறையில் காணப்பட்ட 118 பணியாளர் வெற்றிடங்கள் காரணமாகவே ஆயிரக்கணக்கான அறிக்கைகள் முடங்கிக் கிடந்தன. ஆனால், இந்த முடக்கத்திற்கு முற்றுப்புள்ளி வைக்கும் வகையில், உடனடியாக 70 புதிய ஊழியர்களை நியமிக்கவும், இம் மாத இறுதிக்குள் அதிநவீன தொழில்நுட்ப சாதனங்களை இறக்கி வேலையை விரைவுபடுத்தவும் அரசாங்கம் அதிரடி நடவடிக்கை எடுத்துள்ளது.

இதுமட்டுமன்றி, மாதத்திற்கு 7,500 முதல் 9,000 அறிக்கைகள் வரை விரைவாக வழங்கி வழக்குகளை தள்ளுபடி செய்யும் அளவுக்கு திணைக்களத்தின் திறனை அதிகரிக்க திட்டமிடப்பட்டுள்ளது. அடுத்த கட்டமாக, 10 கிராமிற்கும் அதிகமான தூய போதைப்பொருள் வழக்குகளில் மேல்முறையீட்டு நீதிமன்றம் வரை செல்ல வேண்டிய சிக்கலான சட்ட விதிகளில் திருத்தம் கொண்டுவரப்படவுள்ளது. இதன் மூலம் மேல் நீதிமன்றங்கள் மூலமாகவே மிக விரைவாக பிணை கோரக்கூடிய சட்ட முன்மொழிவு அமைச்சரவைக்கு சமர்ப்பிக்கப்படவுள்ளது.

“உங்களின் நியாயமான கோரிக்கைகளுக்கும் பிரச்சனைகளுக்கும் அரசாங்கம் படிப்படியாக தீர்வு கண்டு வருகிறது. சிறை நெரிசலைக் குறைக்கவும் வசதிகளை மேம்படுத்தவும் முன்னெப்போதும் இல்லாத முயற்சிகள் எடுக்கப்பட்டு வருகின்றன. எனவே, சிலரின் சுயநல ஆசைக்காக உங்களை பகடைக்காய்களாக பயன்படுத்த அனுமதிக்காதீர்கள்” என அமைச்சர் நேரடி வேண்டுகோள் விடுத்துள்ளார்.

அமைதியின்மை என்ற பெயரில் சிறைச்சாலை சொத்துக்களை தீயிட்டு கொளுத்துவதும், வளங்களை சேதப்படுத்துவதும் இறுதியில் கைதிகளின் உரிமைகளையே பறிக்கும் என எச்சரித்த அமைச்சர், சட்டத் திருத்தங்கள் மற்றும் பகுப்பாய்வு அறிக்கைகளை விரைவுபடுத்தும் அரசாங்கத்தின் இந்த வரலாற்றுச் சிறப்புமிக்க நடவடிக்கைகளுக்கு முழு ஒத்துழைப்பு நல்குமாறு கேட்டுக்கொண்டுள்ளார்.

நாட்டின் தற்போதைய அரசியல் சூழலில், ஊடகங்கள் மற்றும் மக்கள் எதிர்கொள்ளும் சவால்கள் குறித்து ஜனாதிபதி அநுரகுமார திசாநாயக்கவின் கவனத்திற்கு கொண்டு செல்லும் வகையில் எழுதப்பட்ட திறந்த மடலொன்று இன்று சமூக வலைத்தளங்களிலும் இணைய ஊடகங்களிலும் பெருமளவில் வைரலாகி வருகின்றது. ‘டெய்லி மிரர்’ பத்திரிகையில் வெளியிடப்பட்டுள்ள இந்த பகிரங்கக் கடிதம், தற்போதைய ஆட்சியின் செயற்பாடுகள் மற்றும் ஊடகங்கள் மீதான பார்வை குறித்த முக்கிய விவாதங்களைத் தோற்றுவித்துள்ளது.

தவறு செய்தவர்களுக்கும் ஊழல்வாதிகளுக்கும் எதிராக ஜனாதிபதி எடுத்து வரும் தீவிர நடவடிக்கைகள் தினமும் மக்களால் பாராட்டப்பட்டு வருகின்ற போதிலும், நாட்டின் சாமானிய மக்கள் எதிர்கொள்ளும் அன்றாடப் பிரச்சினைகள் மற்றும் துயரங்கள் புறக்கணிக்கப்படக் கூடாது என்பது இந்த மடலின் பிரதான செய்தியாகும். “ஜனாதிபதி அவர்களே, உங்களது அலுவலக ஜன்னல் வழியே வெளியே பாருங்கள்; உங்களது மக்களின் அன்றாடப் போராட்டங்களையும் துயரங்களையும் காதுகொடுத்துக் கேளுங்கள்” என்ற கோரிக்கை அதில் ஆழமாகப் பதிவு செய்யப்பட்டுள்ளது.

குறிப்பாக, ஊடகங்கள் தொடர்பாக ஜனாதிபதி அண்மையில் வெளியிட்ட கருத்துக்களுக்கு இதில் காட்டமான பதிலடி கொடுக்கப்பட்டுள்ளது. ஊடகங்கள் அரசாங்கத்தின் எதிரிகள் அல்ல என்றும், அவை குறிப்பிடப்பட்டது போல எந்தவொரு “குப்பை மேட்டிலும்” இல்லை என்றும் சுட்டிக்காட்டப்பட்டுள்ளது. அதேநேரம், தற்போதைய அரசாங்கத்தின் அமைச்சர்கள் ஊடகங்களை எதிர்கொள்வதற்கும் கேள்விகளுக்குப் பதிலளிப்பதற்கும் தேவையான தைரியம் இல்லாமல் விலகி ஓடுவதாகவும் இதில் விமர்சிக்கப்பட்டுள்ளது.

ஜனாதிபதி அநுரகுமார திசாநாயக்க மற்றும் அவரது தேசிய மக்கள் சக்தி (NPP) தரப்பினர், ஊடக நிறுவனங்கள் மற்றும் சமூக ஊடகங்கள் தங்களுக்கு எதிராகப் போலிச் செய்திகளையும், தவாறான அரசியல் பரப்புரைகளையும் மேற்கொண்டு வருவதாக நாடாளுமன்றத்திலும் பொதுக் கூட்டங்களிலும் கடுமையாகச் சாடினர். ஊடகங்கள் பொறுப்புடன் செயல்படாவிடில் சட்டம் பாயும் என்ற அரசாங்கத்தின் தொனி ஊடகச் சுதந்திரத்தை முடக்கும் முயற்சியோ என்ற அச்சத்தை ஏற்படுத்தியுள்ளது.

பொதுவான ஊடகச் சுதந்திர வாக்குறுதிகளுக்கு மத்தியில், சமூக ஊடகங்களில் ஜனாதிபதி மற்றும் அமைச்சர்களுக்கு எதிராக அவதூறு அல்லது போலித் தகவல்களைப் பரப்புபவர்களை அவசரகாலச் சட்ட விதிகளின் (Emergency Regulations) கீழ் கைது செய்யுமாறு பொதுப் பாதுகாப்பு அமைச்சின் மூலம் பொலிஸாருக்கு உத்தரவிடப்பட்டமை பெரும் சர்ச்சையை ஏற்படுத்தியுள்ளதுடன், பேரிடர் மேலாண்மைக்கு மட்டுமே அவசரகாலச் சட்டம் பயன்படுத்தப்படும் என்ற ஜனாதிபதியின் முந்தைய வாக்குறுதிக்கு இது முரணாக இருப்பதாக சிவில் அமைப்புகள் கடுமையாக விமர்சித்து வருகின்றன.

ஜனாதிபதி தலைமையிலான அரசாங்கம் கடந்த காலப் பழிவாங்கல்களுக்குப் பொறுப்புக்கூறுவதைத் தவிர்ப்பதாகவும், மனித உரிமை ஆர்வலர்கள் மற்றும் விமர்சனக் குரல்களை எழுப்பும் ஊடகவியலாளர்களை மௌனிக்கச் செய்யும் வகையில் அடக்குமுறைகளைக் கையாள்வதாகவும் Civicus Monitor போன்ற சர்வதேச மனித உரிமை கண்காணிப்பு அமைப்புகள் குற்றம் சாட்டியுள்ளன.

குறுகிய காலத்தில் ஆட்சி அமைத்துள்ள போதிலும், முந்தைய ஆட்சியாளர்களிடமிருந்து மாறுபட்ட ஒரு தலைவராகவே ஜனாதிபதி அநுரகுமார தன்னை நிரூபித்துள்ளார் என்பதை ஏற்றுக்கொள்ளும் அதேவேளை, உண்மையை தைரியமாக எதிர்கொள்ளும் பண்பை தொடர்ந்து வெளிப்படுத்த வேண்டும் எனவும் கோரிக்கை விடுக்கப்பட்டுள்ளது. இந்த திறந்த மடல் தற்போது இலங்கையின் அரசியல் களத்தில் பெரும் பரபரப்பை ஏற்படுத்தியுள்ளதுடன், அரசாங்கத்தின் அடுத்தகட்ட நகர்வுகள் என்னவாக இருக்கும் என்ற எதிர்பார்ப்பையும் மக்களிடையே அதிகரித்துள்ளது.

கடலோர நகரான நீர்கொழும்பின் அமைதியைக் குலைக்கும் வகையில், அங்குள்ள பல்லான்சேனை சிறைச்சாலையில் திடீரெனக் கடுமையான பதற்றமான சூழ்நிலை ஏற்பட்டுள்ளது. சிறை வளாகத்திற்குள் எதிர்பாராதவிதமாக உருவாகியுள்ள இந்த அமைதியின்மை குறித்துத் தகவல்கள் வெளியானதைத் தொடர்ந்து, அப்பகுதியில் பெரும் பரபரப்பும் பதற்றமும் தொற்றிக்கொண்டுள்ளது.

சம்பவம் நடந்த சில நிமிடங்களிலேயே நிலைமையின் தீவிரத்தை உணர்ந்த பொலிஸ் உயர் அதிகாரிகள், உடனடியாகச் செயற்பட்டுப் பல பொலிஸ் குழுக்களைச் சம்பவ இடத்திற்கு விரைந்து அனுப்பியுள்ளனர். சிறை வளாகத்தைச் சுற்றிலும் மற்றும் அதனை அண்மித்த முக்கிய வீதிகளிலும் பொலிஸார் பலத்த பாதுகாப்பு வளையத்தை அமைத்து நிலைமையைக் தீவிரமாகக் கண்காணித்து வருகின்றனர்.

இருப்பினும், சிறைச்சாலையினுள் இந்தத் திடீர் பதற்ற நிலைமை எதனால் ஏற்பட்டது, கைதிகளுக்கு இடையே மோதல் ஏதேனும் உருவானதா அல்லது வேறு ஏதேனும் அசம்பாவிதங்கள் நிகழ்ந்தனவா என்பது தொடர்பான உத்தியோகபூர்வ முழுமையான விவரங்களைச் பொலிஸார் இதுவரை ஊடகங்களுக்கு வெளிப்படுத்தவில்லை.

தற்போது பொலிஸ் படையினரின் கட்டுப்பாட்டிற்குள் கொண்டுவரப்பட்டு வரும் பல்லான்சேனை சிறை வளாகத்தில், அசம்பாவிதங்கள் எதுவும் தொடராமல் தடுப்பதற்காக மேலதிகப் பாதுகாப்புப் பலப்படுத்தப்பட்டுள்ளது. சம்பவம் தொடர்பான அடுத்தகட்ட அதிகாரப்பூர்வமான தகவல்களைப் பொலிஸார் விரைவில் வெளியிடுவார்கள் என எதிர்பார்க்கப்படுகின்றது.

அவுஸ்திரேலியாவிற்குச் செலுத்த வேண்டிய கடன் திருப்பிச் செலுத்துதல் மற்றும் அது தொடர்பான நிதியியல் முறைகேடுகள் குறித்துப் பாராளுமன்றத்தில் புதன்கிழமை (05) விவாதம் சூடுபிடித்த போது, சபையே ஒரு கணம் அதிர்ந்து போனது. ஸ்ரீலங்கா முஸ்லிம் காங்கிரஸின் தலைவரும் கண்டி மாவட்ட பாராளுமன்ற உறுப்பினருமான ரவூப் ஹக்கீம், அதிகாரிகளின் பொறுப்பற்ற தனத்தை அடுக்கடுக்கான ஆதாரங்களுடன் வெளிப்படுத்தி ஆவேசமாக உரையாற்றினார்.

அரச பொறுப்பு முயற்சிகள் பற்றிய குழுவில் (கோப் குழு) இடம்பெற்ற விசாரணைகளைச் சுட்டிக்காட்டி தனது உரையைத் தொடங்கிய அவர், அங்கு நடந்த கூத்துக்களைச் சபையில் தோலுரித்துக் காட்டினார். நிதியமைச்சிலும் மத்திய வங்கியிலும் பொறுப்பான பதவிகளிலிருக்கும் அதிகாரிகளிடம் கேள்விகளை எழுப்பிய போது, அவர்கள் எவ்வித பொறுப்புணர்ச்சியும் இன்றி ஒருவர் மீது ஒருவர் குற்றஞ்சாட்டி ‘பந்து பரிமாற்றம்’ செய்யும் விளையாட்டிலேயே ஈடுபட்டதாக அவர் அம்பலப்படுத்தினார்.

அங்கிருந்த அறிக்கையை வாசித்துக் காட்டிய ரவூப் ஹக்கீம், நாட்டின் வங்கியாளராகச் செயற்படும் மத்திய வங்கி, பணமோசடி தடுப்புச் சட்டத்தின் கீழ் சந்தேகத்திற்குரிய இந்தப் பரிவர்த்தனைகள் குறித்து ஏற்கனவே அறிந்திருந்தும் கைகட்டி வேடிக்கை பார்த்ததாகக் சாடினார். “அங்கே ஏதோ தவறு நடக்கிறது” எனச் சிவப்பு எச்சரிக்கைகள் விடுக்கப்பட்ட போதிலும், அதைப் பொருட்படுத்தாமல் சம்பந்தப்பட்ட தரப்பினர் தொடர்ந்து அந்தச் சந்தேகத்திற்குரிய பணப் பரிவர்த்தனைகளுக்கு அங்கீகாரம் வழங்கிப் பணத்தை அனுப்பியுள்ளனர்!

நாட்டின் நிதிப் பாதுகாப்பை உறுதி செய்ய வேண்டிய மத்திய வங்கி, இத்தகைய சந்தேகத்திற்குரிய பரிவர்த்தனைகள் குறித்து நிதிப் புலனாய்வுப் பிரிவிடம் முன்கூட்டியே அறிக்கையிட்டிருக்க வேண்டும். ஆனால், இந்த பாரிய தவறிலிருந்து மத்திய வங்கி எக்காரணத்தைக் கொண்டும் தப்பியோட முடியாது என அவர் முழங்கினார். நிதி அறிக்கையிடல் சட்டத்தின் கீழ் அரசாங்கத்தின் சார்பில் பணத்தை மாற்றிய வங்கியாளர் என்ற முறையில் மத்திய வங்கி முழுப் பொறுப்பையும் ஏற்றாக வேண்டும்.

ஆனால், இங்குதான் அரசாங்கத்தின் மிகப்பெரிய அதிகாரப் துஷ்பிரயோகம் நடந்துள்ளது! சட்டமா அதிபர் திணைக்களத்தின் உதவியைப் பெற்று மத்திய வங்கி தன் மீதான குற்றச்சாட்டுகளிலிருந்து சாதுரியமாகத் தப்பித்துக்கொண்டுள்ளதாக ஹக்கீம் கடுமையாக விமர்சித்தார். மத்திய வங்கி மற்றும் சட்டமா அதிபர் திணைக்களம் போன்ற உயர்மட்ட அரச நிறுவனங்களின் இந்தத் தீவிரக் கவனக்குறைவாலும், பொறுப்பற்ற தன்மையாலும் ஏற்கனவே ஒரு தற்கொலைச் சம்பவம் நிகழ்ந்து, ஒரு மூத்த அதிகாரியின் உயிரே பறிபோயுள்ளது என்ற அரச நிர்வாகத்தின் படுதோல்வியை அவர் மிகுந்த வேதனையுடன் சுட்டிக்காட்டினார்.

இரத்தினபுரி குருவிட்ட சிறைச்சாலையில் ஏற்கனவே நிலவி வந்த அமைதியின்மை, இன்று வெள்ளிக்கிழமை காலை எதிர்பாராதவிதமாக ஒரு பயங்கர இரத்தக் களறியாக மாறியுள்ளது. சிறைக் கூடங்களுக்குள் கைதிகள் குழுக்களாகப் பிரிந்து திடீரென நடத்திய கொடூரத் தாக்குதலில் இரு கைதிகள் கொடூரமாகக் கொல்லப்பட்டுள்ளதுடன், மேலும் இருவர் படுகாயமடைந்து தீவிர சிகிச்சைப் பிரிவில் அனுமதிக்கப்பட்டுள்ளதாகக் குருவிட்ட பொலிஸார் அதிர்ச்சித் தகவலை வெளியிட்டுள்ளனர்.

இன்று அதிகாலை சிறை வளாகத்திற்குள் கைதிகளுக்கு இடையே திடீரென ஏற்பட்ட வாய்த்தர்க்கம், நொடிப் பொழுதில் கட்டுக்கடங்காத கலவரமாக உருவெடுத்தது. ஆத்திரமடைந்த கைதிகள் ஒருவரை ஒருவர் மிருகத்தனமாகத் தாக்கிக்கொண்டதில் நான்கு பேர் பலத்த காயங்களுடன் ரத்த வெள்ளத்தில் சரிந்தனர். உடனடியாக மீட்டெடுக்கப்பட்டு மருத்துவமனையில் அனுமதிக்கப்பட்ட போதிலும், காயங்களின் வீரியம் தாங்காமல் இரு கைதிகள் பரிதாபமாக உயிரிழந்ததாக பொலிஸார் உறுதிப்படுத்தியுள்ளனர்.

சிறைச்சாலையின் உள்ளே நிலைமை முற்றிலும் கைமீறிச் சென்று வன்முறை வெடித்ததையடுத்து, கலகக்காரர்களைக் கட்டுப்படுத்தவும் ஏனைய கைதிகளின் உயிரைப் பாதுகாக்கவும் சிறைத்துறை அதிகாரிகள் அதிரடியாகக் கண்ணீர்ப்புகைப் பிரயோகம் மேற்கொண்டனர். புகை மண்டலத்திற்குள் சிக்கிய கலகக்காரர்கள் நாலாபுறமும் சிதறி ஓடியதைத் தொடர்ந்து, அதிகாரிகளால் நிலைமை தற்காலிகமாகக் கட்டுப்பாட்டுக்குள் கொண்டுவரப்பட்டது.

நேற்றைய தினம் கொழும்பு புதிய மெகசின் சிறையிலும், குருவிட்ட சிறையிலும் நிலவிய பதற்றமான சூழ்நிலைகளின் தொடர்ச்சியாகவே இந்த மோதல் வெடித்துள்ளதா அல்லது கைதிகளுக்கு இடையிலான தனிப்பட்ட பகையா என்பது குறித்துப் பொலிஸாரும் சிறைச்சாலை அதிகாரிகளும் தீவிர விசாரணைகளை முடுக்கிவிட்டுள்ளனர். தற்போது சிறை வளாகத்தைச் சுற்றிப் பலத்த பாதுகாப்பு போடப்பட்டுள்ளதுடன், இந்தச் சம்பவம் தொடர்பில் மேலதிக விசாரணைகள் தொடர்ந்தும் முன்னெடுக்கப்பட்டு வருகின்றன.

சிறைச்சுவர் தாண்டிய இரகசியப் பொதி! கொழும்பில் வெடித்த கலவரமும் ட்ரோன் பறந்த நள்ளிரவுப் பரபரப்பும்!

இரவின் அமைதியைக் கிழித்துக்கொண்டு கொழும்பு புதிய மெகசின் சிறைச்சாலையிலிருந்து திடீரெனக் கேட்ட அலறல் சத்தங்கள், தலைநகரையே ஒரு கணம் உரைய வைத்தன. சிறைச்சாலையின் உயரமான சுவருக்கு மேலால் திடீரென உள்ளே விழுந்த அந்த ஒரு சிறிய இரகசியப் பொதிதான், அத்தனை கலவரத்திற்கும் பிள்ளையார் சுழி போட்டது. ரோந்து பணியிலிருந்த அதிகாரி ஒருவர் சமயோசிதமாகச் செயற்பட்டு அப்பொதியைக் கைப்பற்ற முயன்ற கணமே, சிறை வளாகமே ஒரு போர்க்களமாக மாறத் தொடங்கியது.

பொதி கைநழுவிய ஆத்திரத்தில் கைதிகள் சிலர் கட்டுக்கடங்காத வன்முறையில் இறங்கினர். அடுத்த சில நிமிடங்களிலேயே ஒரு சிறை அறையின் பூட்டைத் தகர்த்தெறிந்த 40க்கும் மேற்பட்ட கைதிகள், எதற்கும் துணிந்தவர்களாக வெளியே பாய்ந்து வந்தனர். நிலைமை கையை மீறிச் சென்ற அந்த நள்ளிரவு வேளையில், சிறை அதிகாரிகள், பொலிஸார் மற்றும் பொலிஸ் விசேட அதிரடிப்படையினர் (STF) இணைந்து களமிறங்கினர். வான்வழியாக நிலைமையைக் கண்காணிக்க விமானப்படையின் ட்ரோன் கேமராக்கள் விண்ணில் வட்டமிட, முப்படையினரின் பலத்த பாதுகாப்பு வளையத்திற்குள் மெகசின் சிறை கொண்டுவரப்பட்டு நிலைமை முழுமையாகக் கட்டுப்பாட்டிற்குள் கொண்டுவரப்பட்டது.

கொழும்பு சிறையில் நிலைமை சீரடைந்து, அசம்பாவிதங்களில் ஈடுபட்ட கைதிகளை வேறு சிறைகளுக்கு மாற்ற நீதி அமைச்சர் ஹர்ஷன நாணயக்கார அதிரடி உத்தரவைப் பிறப்பித்த சில மணி நேரங்களிலேயே, அடுத்த அதிர்ச்சிச் செய்தி இரத்தினபுரியிலிருந்து வந்தது. நேற்றிரவு லேசான பதற்றத்துடன் காணப்பட்ட இரத்தினபுரி குருவிட்ட சிறைச்சாலையில், இன்று காலை மீண்டும் கட்டுக்கடங்காத கைதிகளின் கலவரம் வெடித்துச் சிதறியது.

இம்முறை கைதிகளின் கோரத் தாக்குதலுக்கு இரையானது சிறைச்சாலையின் வைத்தியசாலைப் பிரிவுதான். கட்டடத்தின் பெரும் பகுதி அடித்து நொறுக்கப்பட்டுச் சேதமாக்கப்பட, நிலைமை முற்றாகக் கட்டுப்பாட்டை இழந்தது. இதையடுத்து, வன்முறையைக் கட்டுப்படுத்த பொலிஸார் அதிரடியாகக் கண்ணீர்ப்புகைப் பிரயோகத்தை மேற்கொண்டு களத்தை அதிரவைத்துள்ளனர். மெகசினில் தொடங்கிய வன்முறை அலை குருவிட்டவிற்கும் பரவியுள்ளதா அல்லது இதன் பின்னணியில் வேறு ஏதேனும் சூழ்ச்சி உள்ளதா என்பது குறித்துப் பொலிஸார் தீவிர விசாரணைகளை முடுக்கிவிட்டுள்ளனர்.