இலங்கை திறைசேரியிலிருந்து 2.5 மில்லியன் அமெரிக்க டொலர்கள் தவறான தரப்பினருக்குப் பரிமாற்றம் செய்யப்பட்டிருப்பது ஒரு ‘சைபர் கொள்ளை’ எனத் தெரியவந்துள்ள நிலையில், இது நாட்டின் முழுப் பொருளாதாரத்திற்கும் விடுக்கப்பட்ட அச்சுறுத்தலாகும் என்று பாராளுமன்ற உறுப்பினர் பைசர் முஸ்தபா தெரிவித்துள்ளார்.

நாட்டின் தேசிய பாதுகாப்பு மற்றும் பொருளாதார ஸ்திரத்தன்மையைக் கருத்திற்கொண்டு, இது குறித்து விசாரணை நடத்த உடனடியாக ஜனாதிபதி விசேட விசாரணைக்குழு ஒன்றை நியமிக்க வேண்டும் என்று அவர் அரசாங்கத்தை வலியுறுத்தியுள்ளார்.

இந்தச் சம்பவம் குறித்து கருத்துத் தெரிவித்த ஜனாதிபதி சட்டத்தரணியும் பாராளுமன்ற உறுப்பினருமான பைசர் முஸ்தபா, இது வெறும் பணத் திருட்டு மட்டுமல்ல, நாட்டின் தேசிய பாதுகாப்பிற்கு விடுக்கப்பட்ட நேரடி சவாலாகும் என்று சுட்டிக்காட்டினார்.

உலகின் அதியுயர் பாதுகாப்பு கொண்ட அமெரிக்காவின் ‘வெள்ளை மாளிகை’ கட்டமைப்புக்களே ஹேக்கர்களால் ஊடுருவப்படும் நிலையில், இலங்கையின் சைபர் பாதுகாப்பு முறைமைகளில் உள்ள பலவீனங்கள் குறித்து புத்திஜீவித்துவக் கண்ணோட்டத்துடன் ஆராய வேண்டிய தருணம் இதுவென அவர் குறிப்பிட்டார்.

இந்த பாரிய நிதி மோசடியுடன் தொடர்புடையவர்கள் எவராக இருந்தாலும், அவர்களின் அரசியல் அந்தஸ்து அல்லது கட்சி பேதமின்றி சட்டத்தின் முன் நிறுத்தப்பட வேண்டும் என அவர் தெரிவித்தார். இதற்காக சர்வதேச ரீதியிலான தொடர்புகள் மற்றும் உயர் தொழில்நுட்ப அறிவு கொண்ட நிபுணர்களின் உதவியைப் பெறுவது அவசியமாகும்.

அத்துடன், நாட்டின் திறைசேரி போன்ற மிக முக்கியமான நிதி நிறுவனத்தின் பாதுகாப்பு கேள்விக்குறியாகியுள்ள நிலையில், இழந்த நிதியை மீண்டும் மீட்பதற்கு எதிர்க்கட்சியின் ஒத்துழைப்பையும் பெற்றுக்கொள்ள வேண்டும் என அவர் யோசனை முன்வைத்துள்ளார்.

இலங்கையின் வங்கி முறைமை மற்றும் உள்நாட்டு இறைவரித் திணைக்களம் போன்ற முக்கிய நிறுவனங்கள் டிஜிட்டல் மயமாக்கப்பட்டு வரும் நிலையில், தற்போது பயன்படுத்தப்படும் தொழில்நுட்ப பாதுகாப்பு முறைகள் காலாவதியானவையா என்பதை உடனடியாகப் பரிசோதிக்க வேண்டும் என அவர் கோரியுள்ளார்.

தொழில்நுட்ப ரீதியிலான நிதிப் பரிமாற்றங்களின் பாதுகாப்பை உறுதிப்படுத்த கலாநிதி ஹான்ஸ் விஜேசுரிய போன்ற துறைசார் நிபுணர்களை உள்ளடக்கிய ‘ஜனாதிபதி விசேட விசாரணைக்குழு’ ஒன்றை உடனடியாக நியமிக்குமாறு அவர் அரசாங்கத்திடம் கோரிக்கை விடுத்துள்ளார்.

சைபர் பாதுகாப்பு தொடர்பான தொழில்நுட்பக் குறைபாடுகள் குறித்து முறையான ஆய்வுகளை மேற்கொண்டு, பலமான ‘ஃபயர்வால்’ அல்லது நவீன பாதுகாப்பு உத்திகளைப் புகுத்தாவிட்டால், இது தேசிய பொருளாதாரத்திற்கு பாரிய பாதிப்பை ஏற்படுத்தும் என அவர் எச்சரித்தார்.

இந்த வெளிப்பாடானது ஒரு சாதாரண செய்தி மட்டுமல்ல, நாட்டின் நிதி இறையாண்மையைப் பாதுகாப்பதற்கான ஒரு எச்சரிக்கை மணியாகும் என்றும் பைசர் முஸ்தபா மேலும் குறிப்பிட்டுள்ளார்.

செய்தித் தொகுப்பு: ஜூட் சமந்த

மகாவெவ, சிவிராஜ விசேட தேவையுடையோர் பாடசாலைக்கு அருகில் உள்ள பாலம் உடைந்து வீழ்ந்து 6 மாதங்கள் கடந்துள்ள போதிலும், அதனை புனரமைக்க அதிகாரிகள் எவ்வித நடவடிக்கையும் எடுக்கவில்லை என பிரதேச மக்கள் குற்றம் சுமத்துகின்றனர்.

சுமார் 100 ஆண்டுகளுக்கு முன்பு, மேல் மகாவெவ மற்றும் வீஹேன ஆகிய கிராமங்களை இணைக்கும் வகையில் “தம்வெல் அகார” கால்வாயின் குறுக்கே மூன்று சிறிய பாலங்கள் அமைக்கப்பட்டன.

அந்த வகையில் சிவிராஜ விசேட தேவையுடையோர் பாடசாலைக்கு அருகில் மூன்று பாலங்களில் ஒன்றான குறித்த பாலம் புகழ்பெற்ற ஓவியர் சோலியஸ் மென்டிஸ் அவர்களால் அமைக்கப்பட்டிருந்தது. இந்தப் பாடசாலைக்கு தினசரி ஏராளமானோர் வருகை தருவதோடு, அரச ஊழியர்கள் மற்றும் பாடசாலை மாணவர்கள் எனப் பலரும் இப்பாலத்தைப் பயன்படுத்தி வந்தனர்.

சுமார் 6 மாதங்களுக்கு முன்பு, மரக்கட்டைகளை ஏற்றிச் சென்ற லொறி ஒன்று பயணித்த போது இந்தப் பாலம் திடீரென உடைந்து வீழ்ந்தது. விபத்துக்குள்ளான லொறியின் உரிமையாளர், பாலத்திற்கு ஏற்பட்ட சேதத்திற்காக சுமார் 6 இலட்சம் ரூபாயை வீதி அபிவிருத்தி அதிகார சபையிடம் செலுத்தி தனது வாகனத்தை விடுவித்துக் கொண்டதாகக் கூறப்படுகிறது. இருப்பினும், நட்டஈடு அறவிடப்பட்ட போதிலும் பாலத்தைப் புனரமைக்க இதுவரை எவ்வித நடவடிக்கையும் எடுக்கப்படவில்லை.

இது குறித்து சிவிராஜ விசேட தேவையுடையோர் பாடசாலையின் தலைவர் பிரின்ஸ்லி விக்ரமநாயக்க கருத்து தெரிவிக்கையில்:

“எமது பாடசாலையில் 28 ஆசிரியர்கள் பணிபுரிகின்றனர். அவர்கள் அனைவரும் இந்தப் பாலத்தின் ஊடாகவே வரவேண்டும். பாலம் உடைந்ததால் தற்போது கிராம மக்கள் தற்காலிகமாக ஒரு மரப்பாலத்தை அமைத்துள்ளனர். இதன் மூலம் வாகனங்கள் செல்ல முடியாது. இதனால் மக்கள் நீண்ட தூரம் சுற்றிச் செல்ல வேண்டியுள்ளது. பொறுப்பு வாய்ந்த அதிகாரிகளுக்குத் தெரிவித்தும் இதுவரை பலனில்லை,” என்றார்.

மேல் மகாவெவ சமூக பொலிஸ் குழுவின் தலைவர் மெக்மில்லன் பெர்னாண்டோ கூறுகையில்:

“உடைந்த நிலையில் உள்ள இந்தப் பாலம் தற்போது மிகவும் அபாயகரமாக உள்ளது. இரவு நேரங்களில் இப்பகுதி இருட்டாக இருப்பதால், பாதையை அறியாதவர்கள் விபத்துக்குள்ளாகும் வாய்ப்பு அதிகம். ஏற்கனவே இரண்டு மோட்டார் சைக்கிள்கள் பாலத்தில் இருந்து கீழே விழுந்து விபத்துக்குள்ளாகின. இன்னும் ஒரு உயிர் பலி வாங்கும் வரை அதிகாரிகள் காத்திருக்கின்றனரா?” எனக் கேள்வி எழுப்பினார்.

வீஹேன கிராமத்தில் அதிகளவிலான குடும்பங்கள் வசித்து வரும் நிலையில், எஞ்சியுள்ள ஏனைய இரண்டு பாலங்களும் பலவீனமடைந்து காணப்படுகின்றன. அவை உடைந்தால் இரண்டு கிராமங்களும் முழுமையாகத் துண்டிக்கப்படும் அபாயம் உள்ளது.

எனவே, பொதுமக்களின் பாதுகாப்பைக் கருத்திற்கொண்டு, இந்த பாலத்தை உடனடியாகப் புனரமைத்துத் தருமாறு பிரதேச மக்கள் மற்றும் சிவில் அமைப்புகள் பொறுப்பு வாய்ந்த அதிகாரிகளிடம் கோரிக்கை விடுத்துள்ளனர்.

வில்பத்து பாதுகாக்கப்பட்ட வனப்பகுதிக்கு அருகில் உள்ள காடுகளை அழித்து மீள்குடியேற்றம் செய்தமைக்கு எதிராக வழங்கப்பட்ட தீர்ப்பை எதிர்த்து, முன்னாள் அமைச்சர் ரிஷாட் பதியுதீன் தாக்கல் செய்த மேன்முறையீட்டு மனுவை விசாரிப்பதிலிருந்து உயர்நீதிமன்ற நீதியரசர் ஒருவர் இன்று (27) விலகியுள்ளார். 

ரிஷாட் பதியுதீனால் தாக்கல் செய்யப்பட்ட இந்த மேன்முறையீடு, இன்று ஏ.எச்.எம்.டி. நவாஸ், சம்பத் அபேகோன் மற்றும் கிஹான் குலதுங்க ஆகிய மூவர் அடங்கிய உயர்நீதிமன்ற நீதியரசர்கள் குழாம் முன்னிலையில் விசாரணைக்கு எடுத்துக்கொள்ளப்பட்டது. 

இதன்போது, தனிப்பட்ட காரணங்களுக்காக இந்த மனு விசாரணையிலிருந்து தான் விலகுவதாக நீதியரசர் ஏ.எச்.எம்.டி. நவாஸ் தெரிவித்தார். 

இதற்கமைய, இந்த மேன்முறையீட்டு மனுவை வேறு ஒரு நீதியரசர்கள் குழாம் முன்னிலையில் செப்டம்பர் மாதம் 09ஆம் திகதி விசாரணைக்கு அழைக்குமாறு நீதியரசர்கள் குழாம் உத்தரவிட்டது. 

வில்பத்து பாதுகாக்கப்பட்ட வனப்பகுதிக்கு அருகிலுள்ள காடுகளை அழித்து அங்கு மக்களைக் குடியேற்றியமைக்கு எதிராக, முன்னாள் அமைச்சர் ரிஷாட் பதியுதீன் உள்ளிட்ட குழுவினருக்கு எதிராக சுற்றுச்சூழல் நீதி மையம் 2015ஆம் ஆண்டு மேன்முறையீட்டு நீதிமன்றத்தில் நீதிப்பேராணை மனு (Writ) மனு ஒன்றைத் தாக்கல் செய்திருந்தது. 

அந்த மனுவை விசாரித்து தீர்ப்பளித்த மேன்முறையீட்டு நீதிமன்றம், குறித்த பகுதிகளில் காடுகளை அழித்தமைக்கு முன்னாள் அமைச்சரே பொறுப்புக்கூற வேண்டும் என்றும், அதற்கமைய மீண்டும் காடுகளை வளர்ப்பதற்கான செலவை அவர் வனப் பாதுகாப்புத் திணைக்களத்திற்கு செலுத்த வேண்டும் என்றும் உத்தரவிட்டது. 

அதன்படி, மீண்டும் காடுகளை வளர்ப்பதற்காக முன்னாள் அமைச்சர் சுமார் 106 கோடி ரூபாய் பணத்தைச் செலுத்த வேண்டும் என வனப் பாதுகாப்புத் திணைக்களம் கணக்கிட்டிருந்தது. 

இந்த மேன்முறையீட்டு நீதிமன்றத் தீர்ப்பு சட்டத்திற்கு முரணானது எனவும், அதனை ரத்து செய்யுமாறு கோரியுமே ரிஷாட் பதியுதீன் உயர்நீதிமன்றத்தில் இந்த மேன்முறையீட்டைத் தாக்கல் செய்துள்ளார். 

இந்த மனு விசாரணையிலிருந்து நீதியரசர்களான மஹிந்த சமயவர்தன, யசந்த கோதாகொட, ஜனக் டி சில்வா மற்றும் அர்ஜுன ஒபேசேகர ஆகியோர் ஏற்கனவே விலகியிருந்தமை குறிப்பிடத்தக்கது.

இலங்கை பெற்றோலியக் கூட்டுத்தாபனத்தினால் மேற்கொள்ளப்பட்ட டீசல் இறக்குமதியின் போது பாரிய ஊழல்கள் மற்றும் முறைகேடுகள் இடம்பெற்றுள்ளதாகக் கூறி, அந்த விடயம் தொடர்பில் விசாரணை நடத்துமாறு கோரி இலஞ்சம் மற்றும் ஊழல் ஒழிப்பு ஆணைக்குழுவில் முறைப்பாடு தாக்கல் செய்யப்பட்டுள்ளது.

கூட்டு எதிர்க்கட்சியின் பிரதிநிதிகளால் இந்த முறைப்பாடு இன்று திங்கட்கிழமை (27) சமர்ப்பிக்கப்பட்டது. குறித்த டீசல் இறக்குமதி நடவடிக்கையினால் அரசாங்கத்திற்கு பெருமளவிலான நிதி நஷ்டம் ஏற்பட்டுள்ளதாக அந்த முறைப்பாட்டில் சுட்டிக்காட்டப்பட்டுள்ளது.

இந்த விடயம் தொடர்பில் உரிய அதிகாரிகளிடம் விசாரணை நடத்தி, சம்பந்தப்பட்ட ஆவணங்களைப் பரிசீலிக்குமாறு எதிர்க்கட்சி பிரதிநிதிகள் ஆணைக்குழுவிடம் கேட்டுக்கொண்டுள்ளனர். 

இந்த கொடுக்கல் வாங்கலில் பாரிய மோசடி இடம்பெற்றுள்ளதா என்பது குறித்து கண்டறியப்பட வேண்டும் எனவும், இந்த நஷ்டத்திற்குப் பொறுப்பான நபர்களுக்கு எதிராக சட்ட நடவடிக்கை எடுக்கப்பட வேண்டும் எனவும் அந்த முறைப்பாட்டில் மேலும் வலியுறுத்தப்பட்டுள்ளது.   

ஜூட் சமந்த

ஆரச்சிக்கட்டுவ, உடப்பு கடற்கரைப் பிரதேசம் மீண்டும் ஒருமுறை பாரிய கடல் அரிப்புக்கு உள்ளாகத் தொடங்கியுள்ளதாக அப்பகுதி மீனவர்கள் கவலை தெரிவிக்கின்றனர்.

தெற்கே பெருங்கடலாலும், மேற்கே முந்தலம் களப்பாலும் சூழப்பட்டுள்ள உடப்பு கிராமத்தில் சுமார் 5000-க்கும் மேற்பட்ட குடும்பங்கள் வாழ்ந்து வருகின்றனர்.

இவர்களில் பெரும்பாலானோரின் பிரதான வாழ்வாதாரமாக மீன்பிடித் தொழில் காணப்படுகிறது. கடலிலும் களப்பிலும் மீன்பிடித்தல் மற்றும் பிடிபடும் மீன்களை விற்பனை செய்தல் என இக்கிராமத்தின் பொருளாதாரம் முழுமையாக கடலைச் சார்ந்தே அமைந்துள்ளது. மேலும், உடப்புக் கடற்கரையில் அமைந்துள்ள மீன்பிடி வாடிகளில் பெருமளவிலான கருவாடு உற்பத்தி செய்யப்பட்டு தினசரி சந்தைக்கு விற்பனைக்காக அனுப்பி வைக்கப்படுகிறது.

கடலே தங்களின் உயிர்நாடி என்பதால், உடப்பு மக்கள் கடற்கரையைப் பாதுகாப்பதில் மிகுந்த அக்கறை காட்டி வருகின்றனர். கடற்கரை அரிப்புக்குள்ளாவதால் மீன்பிடிப் படகுகளை நிறுத்தி வைப்பதற்கும், மீன்பிடி வலைகளைச் சுத்தம் செய்வதற்கும், கருவாடு காயவைப்பதற்கான வாடிகளை அமைப்பதற்கும் இடமில்லாத சூழல் உருவாகியுள்ளமை அம்மக்களின் வாழ்வாதாரத்தை நேரடியாகப் பாதித்துள்ளது.

கடந்த சில ஆண்டுகளாகவே பருவக்காற்று காலங்களில் உடப்பு கடற்கரை கடும் அரிப்புக்கு உள்ளாகி வருகின்றது. இது குறித்து மக்கள் மற்றும் ஊடகங்கள் விடுத்த கோரிக்கைகளை அடுத்து, கடற்கரை பாதுகாப்புத் திணைக்களம் கடல் அரிப்பைக் கட்டுப்படுத்த கற்பாறைகளை இட்டுத் தற்காலிகப் பாதுகாப்பை வழங்கியது.

இருப்பினும், தற்போது இடப்பட்டுள்ள அந்தப் பாறைகளுக்கு இடையினூடாக கடல் நீர் உட்புகுந்து கடற்கரை அரிக்கப்படுவது பாரிய சோகத்தை ஏற்படுத்தியுள்ளது.

“பருவக்காற்று காலம் ஆரம்பிப்பதற்கு முன்னரே இவ்வளவு மோசமான கடல் அரிப்பு ஏற்படுகின்றது என்றால், வரும் நாட்களில் நிலைமை இன்னும் மோசமாகும்,” என கிராம மக்கள் அச்சம் தெரிவிக்கின்றனர்.

கடல் அரிப்பின் கோரத்தாண்டவத்தால் ஏற்கனவே கடற்கரையோரம் இருந்த பல வீடுகளும், கடற்கரைக்கு இணையாக இருந்த வீதியும் கடலுக்குள் மூழ்கியுள்ளன. அத்துடன், கடற்கரையோரம் அமைக்கப்பட்டிருந்த பல மின் கம்பங்கள் கடல் அரிப்பினால் சரிந்து விழுந்துள்ளதை அவதானிக்க முடிகின்றது.

தொடர்ந்து அதிகரித்து வரும் இந்த கடல் அரிப்பைத் தடுக்க அதிகாரிகள் உடனடியாக நிரந்தரத் தீர்வொன்றை வழங்காவிட்டால், எதிர்காலத்தில் இலங்கையின் வரைபடத்திலிருந்து ‘உடப்பு’ என்ற கிராமம் மறைந்து போவது ஆச்சரியப்படுவதற்கில்லை என இப்பகுதி மக்கள் எச்சரிக்கின்றனர்.

பொலிஸ் போதைப்பொருள் ஒழிப்புப் பிரிவினரால் மேற்கொள்ளப்பட்ட பல்வேறு சுற்றிவளைப்புகளின் போது கைப்பற்றப்பட்ட பெருந்தொகையான போதைப்பொருட்கள் நீதிமன்ற உத்தரவிற்கமைய அழிக்கப்பட்டது.

இன்று 2026.04.27 திங்கட்கிழமை காலை 09.00 மணியளவில், புத்தளம் வநாதவில்லுவ பகுதியில் அமைந்துள்ள ‘லெக்டோவத்தை’ (Lactowatta) எரியூட்டும் உலையில் வைத்து குறித்த போதைப்பொருட்கள் தகனம் செய்யப்பட்டது.

பல்பிட்டிய மற்றும் சிலாபம் ஆகிய நீதிமன்றங்களில் விசாரணைகள் நிறைவடைந்த வழக்குகளுடன் தொடர்புடைய பெருமளவான போதைப்பொருள் தொகையே இவ்வாறு அழிக்கப்பட்டன.

அந்த வகையில் ஹெரோயின்: 22 கிலோ கிராம் 888 கிராம், கேரளா கஞ்சா: 33 கிலோ கிராம் 172 கிராம், கஞ்சா: 247 கிலோ கிராம் 940 கிராம் போதைப்பொருட்கள் எரியூட்டும் உலையில் வைத்து தகனம் செய்யப்பட்டது.

இன்று அதிகாலை 05.00 மணிக்கு, பல்பிட்டிய நீதவான் நீதிமன்ற வளாகத்திலிருந்தும், காலை 07.30 மணியளவில், சிலாபம் நீதவான் நீதிமன்ற வளாகத்திலிருந்து மீதமுள்ள போதைப்பொருள் தொகுதிகளும் எரியூட்டும் இடத்திற்கு கொண்டு செல்லப்பட்டமை குறிப்பிடத்தக்கது.

இந்நிகழ்வில் பொலிஸ் போதைப்பொருள் ஒழிப்புப் பிரிவின் சிரேஷ்ட பிரதிப் பொலிஸ் மா அதிபர் அசோக தர்மசேன, போதைப்பொருள் ஒழிப்புப் பிரிவின் பணிப்பாளர் சந்தன ஹேரத் ஆகியோர் கலந்துகொண்டனர்.

மேலும், அரசாங்க இரசாயன பகுப்பாய்வு திணைக்களம் மற்றும் அபாயகரமான ஒளடதங்கள் கட்டுப்பாட்டு தேசிய சபை ஆகியவற்றின் உயர்மட்ட அதிகாரிகளும் இந்த அழிப்பு நடவடிக்கையின் போது பிரசன்னமாகியிருந்தனர்.

கிளிநொச்சி, கனகாம்பிகைக்குளத்தில் நீராடச் சென்ற நிலையில் நீரில் மூழ்கி காணாமல் போன குடும்பஸ்தர், இன்று காலை சடலமாக மீட்கப்பட்டுள்ளார். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.

நேற்று (ஞாயிற்றுக்கிழமை) பிற்பகல் கிளிநொச்சி கனகாம்பிகைக்குளத்தில் மூன்று பேர் நீராடிக்கொண்டிருந்தனர். இதன்போது, எதிர்பாராத விதமாக அவர்களில் ஒருவர் நீரில் மூழ்கி காணாமல் போயுள்ளார்.

காணாமல் போனவரைத் தேடும் பணிகள் நேற்று மாலை முதல் தீவிரமாக முன்னெடுக்கப்பட்டன. இரவு வரை தேடுதல் நடவடிக்கைகள் தொடர்ந்த போதிலும், போதிய வெளிச்சமின்மை மற்றும் இயற்கை சவால்களால் உடல் அடையாளம் காணப்படவில்லை.

இந்நிலையில், இன்று (திங்கட்கிழமை) அதிகாலை முதல் மீண்டும் தேடுதல் பணிகள் ஆரம்பிக்கப்பட்டன. காலை 8.00 மணியளவில், இரணைமடு நன்னீர் மீனவர்களின் பாரிய ஒத்துழைப்புடன் குறித்த நபர் சடலமாக மீட்கப்பட்டார்.

இச்சம்பவத்தில் உயிரிழந்தவர் கிளிநொச்சி, ஸ்கந்தபுரத்தைச் சேர்ந்த 32 வயதுடைய நபர் என அடையாளம் காணப்பட்டுள்ளார். இவர் மூன்று பிள்ளைகளின் தந்தை என்பது குறிப்பிடத்தக்கது.

சடலம் தற்போது உடற்கூற்று பரிசோதனைகளுக்காக வைத்தியசாலைக்கு கொண்டு செல்லப்பட்டுள்ளது. இச்சம்பவம் தொடர்பில் கிளிநொச்சி பொலிஸார் மேலதிக விசாரணைகளை முன்னெடுத்து வருகின்றனர்.

இன்றைய போட்டி நிறைந்த உலகில் கல்விக்கும் வேலைவாய்ப்பிற்கும் இடையிலான இடைவெளியை குறைப்பதில் திறன் மேம்பாட்டுப் பயிற்சிகள் மிக முக்கியப் பங்காற்றுகின்றன என புத்தளம் மாநகரசபை மாண்புமிகு மேயர் ரின்சாத் அகமது அவர்கள் தெரிவித்தார்.

தேசிய ரீதியில் முன்னெடுக்கப்படும் ஸ்கில்ஸ் விஸ்டா ‘Skills Vista’ திட்டத்தின் 2025/2026 ஆம் ஆண்டிற்கான சான்றிதழ் வழங்கும் விழா அண்மையில் மிகச்சிறப்பாக நடைபெற்றது. இந்நிகழ்வில் கௌரவ விருந்தினராகக் கலந்துகொண்டு உரையாற்றும் போதே அவர் மேற்கண்டவாறு குறிப்பிட்டார்.

இலங்கை கல்வி அமைச்சு, மூன்றாம் நிலை மற்றும் தொழிற்கல்வி ஆணைக்குழு (TVEC) மற்றும் தேசிய கல்வி நிறுவனம் (NIE) ஆகிய உயர்மட்ட நிறுவனங்கள் ஒன்றிணைந்து இத்திட்டத்தை முன்னெடுத்து வருகின்றன.

முக்கியமாக, உயர் தர மாணவர்களை இலக்காகக் கொண்டு வடிவமைக்கப்பட்டுள்ள இத்திட்டம் பல முக்கிய அம்சங்களை உள்ளடக்கியுள்ளது:

• தொழில் வழிகாட்டல் (Career Guidance): மாணவர்களின் எதிர்கால இலக்குகளைத் தீர்மானித்தல்.
• தகவல் தொழில்நுட்பம் (ICT): நவீன டிஜிட்டல் உலகிற்குத் தேவையான கணினித் திறன்கள்.
• ஆங்கில மொழிப் பயிற்சி (English Language): சர்வதேச மட்டத்தில் தொடர்பாடல் திறனை வளர்த்தல்.
• வாழ்க்கைத் திறன்கள் (Life Skills): ஆளுமை மற்றும் தலைமைத்துவப் பண்புகளை மேம்படுத்தல்.

இந்நிகழ்வில் பயிற்சிகளை வெற்றிகரமாக நிறைவு செய்த மாணவர்களுக்கு மேயர் அவர்களால் சான்றிதழ்கள் வழங்கி கௌரவிக்கப்பட்டது. சான்றிதழ்களைப் பெற்றுக்கொண்ட மாணவர்களை வாழ்த்திய மேயர், கல்வி அறிவு என்பது வெறும் புத்தகங்களோடு நின்றுவிடாமல், இத்தகைய செயல்முறைத் திறன்களையும் (Practical Skills) வளர்த்துக்கொள்ளும் போதுதான் ஒரு இளைஞர் முழுமையான வெற்றியாளராக மாற முடியும் என வலியுறுத்தினார்.

மேலும், நாட்டின் எதிர்காலத் தூண்களான இளைஞர்களைச் சரியான பாதையில் வழிநடத்தும் நோக்கில் இத்தகைய காத்திரமான திட்டத்தை முன்னெடுத்து வரும் கல்வி அமைச்சு மற்றும் சம்பந்தப்பட்ட நிறுவனங்களுக்கு மேயர் தனது மனமார்ந்த பாராட்டுக்களைத் தெரிவித்துக் கொண்டார்.

இந்த ‘Skills Vista’ திட்டம் கல்வி முடித்து வெளியேறும் மாணவர்களுக்கு வேலைவாய்ப்புச் சந்தையில் ஒரு பலமான அடித்தளத்தை அமைத்துக் கொடுக்கும் என்பதில் ஐயமில்லை.